𑁨. 𑀯𑀡𑁆𑀡𑀸𑀭𑁄𑀳𑀯𑀕𑁆𑀕𑁄

𑁩𑁬𑁧. 𑀯𑀡𑁆𑀡𑀸𑀭𑁄𑀳𑀚𑀸𑀢𑀓𑀁 (𑁫-𑁨-𑁧)

𑁬𑁦. 𑀯𑀡𑁆𑀡𑀸𑀭𑁄𑀳𑁂𑀦 𑀚𑀸𑀢𑀺𑀬𑀸, 𑀩𑀮𑀦𑀺𑀓𑁆𑀓𑀫𑀦𑁂𑀦 𑀘;

𑀲𑀼𑀩𑀸𑀳𑀼 𑀦 𑀫𑀬𑀸 𑀲𑁂𑀬𑁆𑀬𑁄, 𑀲𑀼𑀤𑀸𑀞 𑀇𑀢𑀺 𑀪𑀸𑀲𑀲𑀺.

𑁬𑁧. 𑀯𑀡𑁆𑀡𑀸𑀭𑁄𑀳𑁂𑀦 𑀚𑀸𑀢𑀺𑀬𑀸, 𑀩𑀮𑀦𑀺𑀓𑁆𑀓𑀫𑀦𑁂𑀦 𑀘;

𑀲𑀼𑀤𑀸𑀞𑁄 𑀦 𑀫𑀬𑀸 𑀲𑁂𑀬𑁆𑀬𑁄, 𑀲𑀼𑀩𑀸𑀳𑀼 𑀇𑀢𑀺 𑀪𑀸𑀲𑀲𑀺.

𑁬𑁨. 𑀏𑀯𑀁 𑀘𑁂 𑀫𑀁 𑀯𑀺𑀳𑀭𑀦𑁆𑀢𑀁, 𑀲𑀼𑀩𑀸𑀳𑀼 𑀲𑀫𑁆𑀫 𑀤𑀼𑀩𑁆𑀪𑀲𑀺;

𑀦 𑀤𑀸𑀦𑀸𑀳𑀁 𑀢𑀬𑀸 𑀲𑀤𑁆𑀥𑀺𑀁, 𑀲𑀁𑀯𑀸𑀲𑀫𑀪𑀺𑀭𑁄𑀘𑀬𑁂.

𑁬𑁩. 𑀬𑁄 𑀧𑀭𑁂𑀲𑀁 𑀯𑀘𑀦𑀸𑀦𑀺, 𑀲𑀤𑁆𑀤𑀳𑁂𑀬𑁆𑀬 [𑀲𑀤𑁆𑀤𑀳𑁂𑀣 (𑀲𑀻. 𑀲𑁆𑀬𑀸. 𑀧𑀻.)] 𑀬𑀣𑀸𑀢𑀣𑀁;

𑀔𑀺𑀧𑁆𑀧𑀁 𑀪𑀺𑀚𑁆𑀚𑁂𑀣 𑀫𑀺𑀢𑁆𑀢𑀲𑁆𑀫𑀺𑀁, 𑀯𑁂𑀭𑀜𑁆𑀘 𑀧𑀲𑀯𑁂 𑀩𑀳𑀼𑀁.

𑁬𑁪. 𑀦 𑀲𑁄 𑀫𑀺𑀢𑁆𑀢𑁄 𑀬𑁄 𑀲𑀤𑀸 𑀅𑀧𑁆𑀧𑀫𑀢𑁆𑀢𑁄, 𑀪𑁂𑀤𑀸𑀲𑀗𑁆𑀓𑀻 𑀭𑀦𑁆𑀥𑀫𑁂𑀯𑀸𑀦𑀼𑀧𑀲𑁆𑀲𑀻;

𑀬𑀲𑁆𑀫𑀺𑀜𑁆𑀘 𑀲𑁂𑀢𑀻 𑀉𑀭𑀲𑀻𑀯 𑀧𑀼𑀢𑁆𑀢𑁄, 𑀲 𑀯𑁂 𑀫𑀺𑀢𑁆𑀢𑁄 𑀬𑁄 𑀅𑀪𑁂𑀚𑁆𑀚𑁄 𑀧𑀭𑁂𑀳𑀻𑀢𑀺.

𑀯𑀡𑁆𑀡𑀸𑀭𑁄𑀳𑀚𑀸𑀢𑀓𑀁 𑀧𑀞𑀫𑀁.

𑁩𑁬𑁨. 𑀲𑀻𑀮𑀯𑀻𑀫𑀁𑀲𑀚𑀸𑀢𑀓𑀁 (𑁫-𑁨-𑁨)

𑁬𑁫. 𑀲𑀻𑀮𑀁 𑀲𑁂𑀬𑁆𑀬𑁄 𑀲𑀼𑀢𑀁 𑀲𑁂𑀬𑁆𑀬𑁄, 𑀇𑀢𑀺 𑀫𑁂 𑀲𑀁𑀲𑀬𑁄 𑀅𑀳𑀼;

𑀲𑀻𑀮𑀫𑁂𑀯 𑀲𑀼𑀢𑀸 𑀲𑁂𑀬𑁆𑀬𑁄, 𑀇𑀢𑀺 𑀫𑁂 𑀦𑀢𑁆𑀣𑀺 𑀲𑀁𑀲𑀬𑁄.

𑁬𑁬. 𑀫𑁄𑀖𑀸 𑀚𑀸𑀢𑀺 𑀘 𑀯𑀡𑁆𑀡𑁄 𑀘, 𑀲𑀻𑀮𑀫𑁂𑀯 𑀓𑀺𑀭𑀼𑀢𑁆𑀢𑀫𑀁;

𑀲𑀻𑀮𑁂𑀦 𑀅𑀦𑀼𑀧𑁂𑀢𑀲𑁆𑀲, 𑀲𑀼𑀢𑁂𑀦𑀢𑁆𑀣𑁄 𑀦 𑀯𑀺𑀚𑁆𑀚𑀢𑀺.

𑁬𑁭. 𑀔𑀢𑁆𑀢𑀺𑀬𑁄 𑀘 𑀅𑀥𑀫𑁆𑀫𑀝𑁆𑀞𑁄, 𑀯𑁂𑀲𑁆𑀲𑁄 𑀘𑀸𑀥𑀫𑁆𑀫𑀦𑀺𑀲𑁆𑀲𑀺𑀢𑁄;

𑀢𑁂 𑀧𑀭𑀺𑀘𑁆𑀘𑀚𑁆𑀚𑀼𑀪𑁄 𑀮𑁄𑀓𑁂, 𑀉𑀧𑀧𑀚𑁆𑀚𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑁬𑁮. 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀪𑀯𑀦𑁆𑀢𑀺 𑀢𑀺𑀤𑀺𑀯𑁂 𑀲𑀫𑀸.

𑁬𑁯. 𑀦 𑀯𑁂𑀤𑀸 𑀲𑀫𑁆𑀧𑀭𑀸𑀬𑀸𑀬, 𑀦 𑀚𑀸𑀢𑀺 𑀦𑀸𑀧𑀺 [𑀦𑁄𑀧𑀺 (𑀧𑀻.)] 𑀩𑀦𑁆𑀥𑀯𑀸;

𑀲𑀓𑀜𑁆𑀘 𑀲𑀻𑀮𑀁 𑀲𑀁𑀲𑀼𑀤𑁆𑀥𑀁, 𑀲𑀫𑁆𑀧𑀭𑀸𑀬𑀸𑀬 𑀲𑀼𑀔𑀸𑀬 𑀘𑀸𑀢𑀺 [𑀲𑀼𑀔𑀸𑀯𑀳𑀦𑁆𑀢𑀺 (𑀲𑀻. 𑀲𑁆𑀬𑀸.)].

𑀲𑀻𑀮𑀯𑀻𑀫𑀁𑀲𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁩𑁬𑁩. 𑀳𑀺𑀭𑀺𑀚𑀸𑀢𑀓𑀁 (𑁫-𑁨-𑁩)

𑁭𑁦. 𑀳𑀺𑀭𑀺𑀁 𑀢𑀭𑀦𑁆𑀢𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀁, 𑀢𑀯𑀸𑀳𑀫𑀲𑁆𑀫𑀻 𑀇𑀢𑀺 𑀪𑀸𑀲𑀫𑀸𑀦𑀁;

𑀲𑁂𑀬𑁆𑀬𑀸𑀦𑀺 𑀓𑀫𑁆𑀫𑀸𑀦𑀺 𑀅𑀦𑀸𑀤𑀺𑀬𑀦𑁆𑀢𑀁, 𑀦𑁂𑀲𑁄 𑀫𑀫𑀦𑁆𑀢𑀺 𑀇𑀢𑀺 𑀦𑀁 𑀯𑀺𑀚𑀜𑁆𑀜𑀸.

𑁭𑁧. 𑀬𑀜𑁆𑀳𑀺 𑀓𑀬𑀺𑀭𑀸 𑀢𑀜𑁆𑀳𑀺 𑀯𑀤𑁂, 𑀬𑀁 𑀦 𑀓𑀬𑀺𑀭𑀸 𑀦 𑀢𑀁 𑀯𑀤𑁂;

𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁭𑁨. 𑀦 𑀲𑁄 𑀫𑀺𑀢𑁆𑀢𑁄 𑀬𑁄 𑀲𑀤𑀸 𑀅𑀧𑁆𑀧𑀫𑀢𑁆𑀢𑁄, 𑀪𑁂𑀤𑀸𑀲𑀗𑁆𑀓𑀻 𑀭𑀦𑁆𑀥𑀫𑁂𑀯𑀸𑀦𑀼𑀧𑀲𑁆𑀲𑀻;

𑀬𑀲𑁆𑀫𑀺𑀜𑁆𑀘 𑀲𑁂𑀢𑀻 𑀉𑀭𑀲𑀻𑀯 𑀧𑀼𑀢𑁆𑀢𑁄, 𑀲 𑀯𑁂 𑀫𑀺𑀢𑁆𑀢𑁄 𑀬𑁄 𑀅𑀪𑁂𑀚𑁆𑀚𑁄 𑀧𑀭𑁂𑀳𑀺.

𑁭𑁩. 𑀧𑀸𑀫𑁄𑀚𑁆𑀚𑀓𑀭𑀡𑀁 𑀞𑀸𑀦𑀁, 𑀧𑀲𑀁𑀲𑀸𑀯𑀳𑀦𑀁 𑀲𑀼𑀔𑀁;

𑀨𑀮𑀸𑀦𑀺𑀲𑀁𑀲𑁄 𑀪𑀸𑀯𑁂𑀢𑀺, 𑀯𑀳𑀦𑁆𑀢𑁄 𑀧𑁄𑀭𑀺𑀲𑀁 𑀥𑀼𑀭𑀁.

𑁭𑁪. 𑀧𑀯𑀺𑀯𑁂𑀓𑀭𑀲𑀁 𑀧𑀺𑀢𑁆𑀯𑀸, 𑀭𑀲𑀁 𑀉𑀧𑀲𑀫𑀲𑁆𑀲 𑀘;

𑀦𑀺𑀤𑁆𑀤𑀭𑁄 𑀳𑁄𑀢𑀺 𑀦𑀺𑀧𑁆𑀧𑀸𑀧𑁄, 𑀥𑀫𑁆𑀫𑀧𑁆𑀧𑀻𑀢𑀺𑀭𑀲𑀁 𑀧𑀺𑀯𑀦𑁆𑀢𑀺.

𑀳𑀺𑀭𑀺𑀚𑀸𑀢𑀓𑀁 𑀢𑀢𑀺𑀬𑀁.

𑁩𑁬𑁪. 𑀔𑀚𑁆𑀚𑁄𑀧𑀦𑀓𑀚𑀸𑀢𑀓𑀁 (𑁫-𑁨-𑁪)

𑁭𑁫. 𑀓𑁄 𑀦𑀼 𑀲𑀦𑁆𑀢𑀫𑁆𑀳𑀺 𑀧𑀚𑁆𑀚𑁄𑀢𑁂, 𑀅𑀕𑁆𑀕𑀺𑀧𑀭𑀺𑀬𑁂𑀲𑀦𑀁 𑀘𑀭𑀁;

𑀅𑀤𑁆𑀤𑀓𑁆𑀔𑀺 𑀭𑀢𑁆𑀢𑀺 [𑀭𑀢𑁆𑀢𑀺𑀁 (𑀲𑁆𑀬𑀸.)] 𑀔𑀚𑁆𑀚𑁄𑀢𑀁, 𑀚𑀸𑀢𑀯𑁂𑀤𑀁 𑀅𑀫𑀜𑁆𑀜𑀣.

𑁭𑁬. 𑀲𑁆𑀯𑀲𑁆𑀲 𑀕𑁄𑀫𑀬𑀘𑀼𑀡𑁆𑀡𑀸𑀦𑀺, 𑀅𑀪𑀺𑀫𑀢𑁆𑀣𑀁 𑀢𑀺𑀡𑀸𑀦𑀺 𑀘;

𑀯𑀺𑀧𑀭𑀻𑀢𑀸𑀬 𑀲𑀜𑁆𑀜𑀸𑀬, 𑀦𑀸𑀲𑀓𑁆𑀔𑀺 𑀧𑀚𑁆𑀚𑀮𑁂𑀢𑀯𑁂.

𑁭𑁭. 𑀏𑀯𑀫𑁆𑀧𑀺 𑀅𑀦𑀼𑀧𑀸𑀬𑁂𑀦, 𑀅𑀢𑁆𑀣𑀁 𑀦 𑀮𑀪𑀢𑁂 𑀫𑀺𑀕𑁄 [𑀫𑀽𑀕𑁄 (𑀲𑁆𑀬𑀸.)];

𑀯𑀺𑀲𑀸𑀡𑀢𑁄 𑀕𑀯𑀁 𑀤𑁄𑀳𑀁, 𑀬𑀢𑁆𑀣 𑀔𑀻𑀭𑀁 𑀦 𑀯𑀺𑀦𑁆𑀤𑀢𑀺.

𑁭𑁮. 𑀯𑀺𑀯𑀺𑀥𑁂𑀳𑀺 𑀉𑀧𑀸𑀬𑁂𑀳𑀺, 𑀅𑀢𑁆𑀣𑀁 𑀧𑀧𑁆𑀧𑁄𑀦𑁆𑀢𑀺 𑀫𑀸𑀡𑀯𑀸;

𑀦𑀺𑀕𑁆𑀕𑀳𑁂𑀦 𑀅𑀫𑀺𑀢𑁆𑀢𑀸𑀦𑀁, 𑀫𑀺𑀢𑁆𑀢𑀸𑀦𑀁 𑀧𑀕𑁆𑀕𑀳𑁂𑀦 𑀘.

𑁭𑁯. 𑀲𑁂𑀦𑀸𑀫𑁄𑀓𑁆𑀔𑀧𑀮𑀸𑀪𑁂𑀦 [𑀲𑁂𑀦𑀻 𑀫𑁄𑀓𑁆𑀔𑀽𑀧𑀮𑀸𑀪𑁂𑀦 (𑀲𑁆𑀬𑀸.)], 𑀯𑀮𑁆𑀮𑀪𑀸𑀦𑀁 𑀦𑀬𑁂𑀦 𑀘;

𑀚𑀕𑀢𑀺𑀁 𑀚𑀕𑀢𑀺𑀧𑀸𑀮𑀸, 𑀆𑀯𑀲𑀦𑁆𑀢𑀺 𑀯𑀲𑀼𑀦𑁆𑀥𑀭𑀦𑁆𑀢𑀺.

𑀔𑀚𑁆𑀚𑁄𑀧𑀦𑀓𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁩𑁬𑁫. 𑀅𑀳𑀺𑀢𑀼𑀡𑁆𑀟𑀺𑀓𑀚𑀸𑀢𑀓𑀁 (𑁫-𑁨-𑁫)

𑁮𑁦. 𑀥𑀼𑀢𑁆𑀢𑁄𑀫𑁆𑀳𑀺 𑀲𑀫𑁆𑀫 𑀲𑀼𑀫𑀼𑀔, 𑀚𑀽𑀢𑁂 𑀅𑀓𑁆𑀔𑀧𑀭𑀸𑀚𑀺𑀢𑁄;

𑀳𑀭𑁂𑀳𑀺 [𑀲𑁂𑀯𑁂𑀳𑀺 (𑀧𑀻.)] 𑀅𑀫𑁆𑀩𑀧𑀓𑁆𑀓𑀸𑀦𑀺, 𑀯𑀻𑀭𑀺𑀬𑀁 𑀢𑁂 𑀪𑀓𑁆𑀔𑀬𑀸𑀫𑀲𑁂.

𑁮𑁧. 𑀅𑀮𑀺𑀓𑀁 𑀯𑀢 𑀫𑀁 𑀲𑀫𑁆𑀫, 𑀅𑀪𑀽𑀢𑁂𑀦 𑀧𑀲𑀁𑀲𑀲𑀺;

𑀓𑁄 𑀢𑁂 𑀲𑀼𑀢𑁄 𑀯𑀸 𑀤𑀺𑀝𑁆𑀞𑁄 𑀯𑀸, 𑀲𑀼𑀫𑀼𑀔𑁄 𑀦𑀸𑀫 𑀫𑀓𑁆𑀓𑀝𑁄.

𑁮𑁨. 𑀅𑀚𑁆𑀚𑀸𑀧𑀺 𑀫𑁂 𑀢𑀁 𑀫𑀦𑀲𑀺 [𑀢𑁂 𑀫𑀁 𑀲𑀭𑀲𑀺 (𑀓.)], 𑀬𑀁 𑀫𑀁 𑀢𑁆𑀯𑀁 𑀅𑀳𑀺𑀢𑀼𑀡𑁆𑀟𑀺𑀓;

𑀥𑀜𑁆𑀜𑀸𑀧𑀡𑀁 𑀧𑀯𑀺𑀲𑀺𑀢𑁆𑀯𑀸, 𑀫𑀢𑁆𑀢𑁄 [𑀫𑀼𑀢𑁆𑀢𑁄 (𑀓.)] 𑀙𑀸𑀢𑀁 𑀳𑀦𑀸𑀲𑀺 𑀫𑀁.

𑁮𑁩. 𑀢𑀸𑀳𑀁 𑀲𑀭𑀁 𑀤𑀼𑀓𑁆𑀔𑀲𑁂𑀬𑁆𑀬𑀁, 𑀅𑀧𑀺 𑀭𑀚𑁆𑀚𑀫𑁆𑀧𑀺 𑀓𑀸𑀭𑀬𑁂;

𑀦𑁂𑀯𑀸𑀳𑀁 𑀬𑀸𑀘𑀺𑀢𑁄 𑀤𑀚𑁆𑀚𑀁, 𑀢𑀣𑀸 𑀳𑀺 𑀪𑀬𑀢𑀚𑁆𑀚𑀺𑀢𑁄.

𑁮𑁪. 𑀬𑀜𑁆𑀘 𑀚𑀜𑁆𑀜𑀸 𑀓𑀼𑀮𑁂 𑀚𑀸𑀢𑀁, 𑀕𑀩𑁆𑀪𑁂 𑀢𑀺𑀢𑁆𑀢𑀁 𑀅𑀫𑀘𑁆𑀙𑀭𑀺𑀁;

𑀢𑁂𑀦 𑀲𑀔𑀺𑀜𑁆𑀘 𑀫𑀺𑀢𑁆𑀢𑀜𑁆𑀘, 𑀥𑀻𑀭𑁄 𑀲𑀦𑁆𑀥𑀸𑀢𑀼𑀫𑀭𑀳𑀢𑀻𑀢𑀺.

𑀅𑀳𑀺𑀢𑀼𑀡𑁆𑀟𑀺𑀓𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁩𑁬𑁬. 𑀕𑀼𑀫𑁆𑀩𑀺𑀬𑀚𑀸𑀢𑀓𑀁 (𑁫-𑁨-𑁬)

𑁮𑁫. 𑀫𑀥𑀼𑀯𑀡𑁆𑀡𑀁 𑀫𑀥𑀼𑀭𑀲𑀁, 𑀫𑀥𑀼𑀕𑀦𑁆𑀥𑀁 𑀯𑀺𑀲𑀁 𑀅𑀳𑀼;

𑀕𑀼𑀫𑁆𑀩𑀺𑀬𑁄 𑀖𑀸𑀲𑀫𑁂𑀲𑀸𑀦𑁄, 𑀅𑀭𑀜𑁆𑀜𑁂 𑀑𑀤𑀳𑀻 𑀯𑀺𑀲𑀁.

𑁮𑁬. 𑀫𑀥𑀼 𑀇𑀢𑀺 𑀫𑀜𑁆𑀜𑀫𑀸𑀦𑀸 [𑀫𑀥𑀽𑀢𑀺 𑀫𑀜𑁆𑀜𑀫𑀸𑀦𑀸𑀬 (𑀓.)], 𑀬𑁂 𑀢𑀁 𑀯𑀺𑀲𑀫𑀔𑀸𑀤𑀺𑀲𑀼𑀁 [𑀯𑀺𑀲𑀫𑀲𑀸𑀬𑀺𑀲𑀼𑀁 (𑀲𑀻. 𑀲𑁆𑀬𑀸.)];

𑀢𑁂𑀲𑀁 𑀢𑀁 𑀓𑀝𑀼𑀓𑀁 𑀆𑀲𑀺, 𑀫𑀭𑀡𑀁 𑀢𑁂𑀦𑀼𑀧𑀸𑀕𑀫𑀼𑀁.

𑁮𑁭. 𑀬𑁂 𑀘 𑀔𑁄 𑀧𑀝𑀺𑀲𑀗𑁆𑀔𑀸𑀬, 𑀯𑀺𑀲𑀁 𑀢𑀁 𑀧𑀭𑀺𑀯𑀚𑁆𑀚𑀬𑀼𑀁;

𑀢𑁂 𑀆𑀢𑀼𑀭𑁂𑀲𑀼 𑀲𑀼𑀔𑀺𑀢𑀸, 𑀟𑀬𑁆𑀳𑀫𑀸𑀦𑁂𑀲𑀼 𑀦𑀺𑀩𑁆𑀩𑀼𑀢𑀸.

𑁮𑁮. 𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀯𑀺𑀲𑀁 𑀓𑀸𑀫𑀸 𑀲𑀫𑁄𑀳𑀺𑀢𑀸;

𑀆𑀫𑀺𑀲𑀁 𑀩𑀦𑁆𑀥𑀦𑀜𑁆𑀘𑁂𑀢𑀁, 𑀫𑀘𑁆𑀘𑀼𑀯𑁂𑀲𑁄 [𑀧𑀘𑁆𑀘𑀼𑀯𑀲𑁄 (𑀲𑀻. 𑀲𑁆𑀬𑀸.)] 𑀕𑀼𑀳𑀸𑀲𑀬𑁄.

𑁮𑁯. 𑀏𑀯𑀫𑁂𑀯 𑀇𑀫𑁂 𑀓𑀸𑀫𑁂, 𑀆𑀢𑀼𑀭𑀸 𑀧𑀭𑀺𑀘𑀸𑀭𑀺𑀓𑁂 [𑀧𑀭𑀺𑀘𑀸𑀭𑀓𑁂 (𑀓.)];

𑀬𑁂 𑀲𑀤𑀸 𑀧𑀭𑀺𑀯𑀚𑁆𑀚𑁂𑀦𑁆𑀢𑀺, 𑀲𑀗𑁆𑀕𑀁 𑀮𑁄𑀓𑁂 𑀉𑀧𑀘𑁆𑀘𑀕𑀼𑀦𑁆𑀢𑀺.

𑀕𑀼𑀫𑁆𑀩𑀺𑀬𑀚𑀸𑀢𑀓𑀁 𑀙𑀝𑁆𑀞𑀁.

𑁩𑁬𑁭. 𑀲𑀸𑀴𑀺𑀬𑀚𑀸𑀢𑀓𑀁 (𑁫-𑁨-𑁭)

𑁯𑁦. 𑀬𑁆𑀯𑀸𑀬𑀁 𑀲𑀸𑀴𑀺𑀬 [𑀲𑀸𑀮𑀺𑀬 (𑀲𑀻. 𑀲𑁆𑀬𑀸. 𑀧𑀻.), 𑀲𑀸𑀴𑀺𑀓 (?)] 𑀙𑀸𑀧𑁄𑀢𑀺, 𑀓𑀡𑁆𑀳𑀲𑀧𑁆𑀧𑀁 𑀅𑀕𑀸𑀳𑀬𑀺;

𑀢𑁂𑀦 𑀲𑀧𑁆𑀧𑁂𑀦𑀬𑀁 𑀤𑀝𑁆𑀞𑁄, 𑀳𑀢𑁄 𑀧𑀸𑀧𑀸𑀦𑀼𑀲𑀸𑀲𑀓𑁄.

𑁯𑁧. 𑀅𑀳𑀦𑁆𑀢𑀸𑀭 [𑀅𑀳𑀦𑀦𑁆𑀢 (𑀧𑀻.), 𑀅𑀳𑀭𑀦𑁆𑀢 (?)] 𑀫𑀳𑀦𑁆𑀢𑀸𑀭𑀁, 𑀬𑁄 𑀦𑀭𑁄 𑀳𑀦𑁆𑀢𑀼𑀫𑀺𑀘𑁆𑀙𑀢𑀺;

𑀏𑀯𑀁 𑀲𑁄 𑀦𑀺𑀳𑀢𑁄 𑀲𑁂𑀢𑀺, 𑀬𑀣𑀸𑀬𑀁 𑀧𑀼𑀭𑀺𑀲𑁄 𑀳𑀢𑁄.

𑁯𑁨. 𑀅𑀳𑀦𑁆𑀢𑀸𑀭 [𑀅𑀳𑀦𑀦𑁆𑀢 (𑀲𑀻. 𑀲𑁆𑀬𑀸. 𑀧𑀻.), 𑀅𑀳𑀭𑀦𑁆𑀢 (?)] 𑀫𑀖𑀸𑀢𑁂𑀦𑁆𑀢𑀁, 𑀬𑁄 𑀦𑀭𑁄 𑀳𑀦𑁆𑀢𑀼𑀫𑀺𑀘𑁆𑀙𑀢𑀺;

𑀏𑀯𑀁 𑀲𑁄 𑀦𑀺𑀳𑀢𑁄 𑀲𑁂𑀢𑀺, 𑀬𑀣𑀸𑀬𑀁 𑀧𑀼𑀭𑀺𑀲𑁄 𑀳𑀢𑁄.

𑁯𑁩. 𑀬𑀣𑀸 𑀧𑀁𑀲𑀼𑀫𑀼𑀝𑁆𑀞𑀺𑀁 𑀧𑀼𑀭𑀺𑀲𑁄, 𑀧𑀝𑀺𑀯𑀸𑀢𑀁 𑀧𑀝𑀺𑀓𑁆𑀔𑀺𑀧𑁂;

𑀢𑀫𑁂𑀯 𑀲𑁄 𑀭𑀚𑁄 𑀳𑀦𑁆𑀢𑀺, 𑀢𑀣𑀸𑀬𑀁 𑀧𑀼𑀭𑀺𑀲𑁄 𑀳𑀢𑁄.

𑁯𑁪. 𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺, 𑀲𑀼𑀤𑁆𑀥𑀲𑁆𑀲 𑀧𑁄𑀲𑀲𑁆𑀲 𑀅𑀦𑀗𑁆𑀕𑀡𑀲𑁆𑀲;

𑀢𑀫𑁂𑀯 𑀩𑀸𑀮𑀁 𑀧𑀘𑁆𑀘𑁂𑀢𑀺 𑀧𑀸𑀧𑀁, 𑀲𑀼𑀔𑀼𑀫𑁄 𑀭𑀚𑁄 𑀧𑀝𑀺𑀯𑀸𑀢𑀁𑀯 𑀔𑀺𑀢𑁆𑀢𑁄𑀢𑀺.

𑀲𑀸𑀴𑀺𑀬𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁩𑁬𑁮. 𑀢𑀘𑀲𑀸𑀭𑀚𑀸𑀢𑀓𑀁 (𑁫-𑁨-𑁮)

𑁯𑁫. 𑀅𑀫𑀺𑀢𑁆𑀢𑀳𑀢𑁆𑀣𑀢𑁆𑀣𑀕𑀢𑀸 [𑀳𑀢𑁆𑀣𑀢𑁆𑀢𑀕𑀢𑀸 (𑀓𑀢𑁆𑀣𑀘𑀺, 𑀲𑀻. 𑀦𑀺𑀬𑁆𑀬)], 𑀢𑀘𑀲𑀸𑀭𑀲𑀫𑀧𑁆𑀧𑀺𑀢𑀸;

𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑀸𑀢𑁆𑀣, 𑀓𑀲𑁆𑀫𑀸 𑀢𑀼𑀫𑁆𑀳𑁂 𑀦 𑀲𑁄𑀘𑀣.

𑁯𑁬. 𑀦 𑀲𑁄𑀘𑀦𑀸𑀬 𑀧𑀭𑀺𑀤𑁂𑀯𑀦𑀸𑀬, 𑀅𑀢𑁆𑀣𑁄𑀯 𑀮𑀩𑁆𑀪𑁄 [𑀅𑀢𑁆𑀣𑁄 𑀘 𑀮𑀩𑁆𑀪𑀸 (𑀲𑀻. 𑀲𑁆𑀬𑀸.), 𑀅𑀢𑁆𑀣𑁄𑀥 𑀮𑀩𑁆𑀪𑀸 (𑀅. 𑀦𑀺. 𑁫.𑁪𑁮)] 𑀅𑀧𑀺 𑀅𑀧𑁆𑀧𑀓𑁄𑀧𑀺;

𑀲𑁄𑀘𑀦𑁆𑀢𑀫𑁂𑀦𑀁 𑀤𑀼𑀔𑀺𑀢𑀁 𑀯𑀺𑀤𑀺𑀢𑁆𑀯𑀸, 𑀧𑀘𑁆𑀘𑀢𑁆𑀣𑀺𑀓𑀸 𑀅𑀢𑁆𑀢𑀫𑀦𑀸 𑀪𑀯𑀦𑁆𑀢𑀺.

𑁯𑁭. 𑀬𑀢𑁄 𑀘 𑀔𑁄 𑀧𑀡𑁆𑀟𑀺𑀢𑁄 𑀆𑀧𑀤𑀸𑀲𑀼, 𑀦 𑀯𑁂𑀥𑀢𑀻 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀜𑁆𑀜𑀽;

𑀧𑀘𑁆𑀘𑀢𑁆𑀣𑀺𑀓𑀸𑀲𑁆𑀲 [𑀧𑀘𑁆𑀘𑀢𑁆𑀣𑀺𑀓𑀸 𑀢𑁂 (𑀓.)] 𑀤𑀼𑀔𑀺𑀢𑀸 𑀪𑀯𑀦𑁆𑀢𑀺, 𑀤𑀺𑀲𑁆𑀯𑀸 𑀫𑀼𑀔𑀁 𑀅𑀯𑀺𑀓𑀸𑀭𑀁 𑀧𑀼𑀭𑀸𑀡𑀁.

𑁯𑁮. 𑀚𑀧𑁆𑀧𑁂𑀦 𑀫𑀦𑁆𑀢𑁂𑀦 𑀲𑀼𑀪𑀸𑀲𑀺𑀢𑁂𑀦, 𑀅𑀦𑀼𑀧𑁆𑀧𑀤𑀸𑀦𑁂𑀦 𑀧𑀯𑁂𑀡𑀺𑀬𑀸 𑀯𑀸;

𑀬𑀣𑀸 𑀬𑀣𑀸 𑀬𑀢𑁆𑀣 𑀮𑀪𑁂𑀣 𑀅𑀢𑁆𑀣𑀁, 𑀢𑀣𑀸 𑀢𑀣𑀸 𑀢𑀢𑁆𑀣 𑀧𑀭𑀓𑁆𑀓𑀫𑁂𑀬𑁆𑀬.

𑁯𑁯. 𑀬𑀢𑁄 𑀘 𑀚𑀸𑀦𑁂𑀬𑁆𑀬 𑀅𑀮𑀩𑁆𑀪𑀦𑁂𑀬𑁆𑀬𑁄, 𑀫𑀬𑀸 𑀯 [𑀫𑀬𑀸 𑀯𑀸 (𑀲𑁆𑀬𑀸. 𑀓.)] 𑀅𑀜𑁆𑀜𑁂𑀦 𑀯𑀸 𑀏𑀲 𑀅𑀢𑁆𑀣𑁄;

𑀅𑀲𑁄𑀘𑀫𑀸𑀦𑁄 𑀅𑀥𑀺𑀯𑀸𑀲𑀬𑁂𑀬𑁆𑀬, 𑀓𑀫𑁆𑀫𑀁 𑀤𑀴𑁆𑀳𑀁 𑀓𑀺𑀦𑁆𑀢𑀺 𑀓𑀭𑁄𑀫𑀺 𑀤𑀸𑀦𑀻𑀢𑀺.

𑀢𑀘𑀲𑀸𑀭𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁩𑁬𑁯. 𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑀁 (𑁫-𑁨-𑁯)

𑁧𑁦𑁦. 𑀓𑁆𑀬𑀸𑀳𑀁 𑀤𑁂𑀯𑀸𑀦𑀫𑀓𑀭𑀁, 𑀓𑀺𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀬𑀁 𑀫𑁂 𑀲𑀺𑀭𑀲𑁆𑀫𑀺𑀁 𑀑𑀳𑀘𑁆𑀘 [𑀉𑀳𑀘𑁆𑀘 (𑀓.), 𑀉𑀳𑀘𑁆𑀘 (𑀧𑀻.)], 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂.

𑁧𑁦𑁧. 𑀅𑀢𑀺𑀓𑁆𑀓𑀫𑁆𑀫 𑀭𑀫𑀡𑀓𑀁, 𑀲𑀤𑀸𑀫𑀢𑁆𑀢𑀜𑁆𑀘 𑀤𑀽𑀪𑀓𑀁;

𑀩𑁆𑀭𑀳𑁆𑀫𑀢𑁆𑀢𑀭𑀜𑁆𑀘 𑀧𑀸𑀲𑀸𑀤𑀁, 𑀓𑁂𑀦𑀢𑁆𑀣𑁂𑀦 𑀇𑀥𑀸𑀕𑀢𑁄.

𑁧𑁦𑁨. 𑀇𑀢𑁄 𑀩𑀳𑀼𑀢𑀭𑀸 𑀪𑁄𑀕𑀸, 𑀅𑀢𑁆𑀭 𑀫𑀜𑁆𑀜𑁂 𑀪𑀯𑀺𑀲𑁆𑀲𑀭𑁂;

𑀇𑀢𑀺 𑀏𑀢𑀸𑀬 𑀲𑀜𑁆𑀜𑀸𑀬, 𑀧𑀲𑁆𑀲 𑀫𑀁 𑀩𑁆𑀬𑀲𑀦𑀁 𑀕𑀢𑀁.

𑁧𑁦𑁩. 𑀘𑀢𑀼𑀩𑁆𑀪𑀺 𑀅𑀝𑁆𑀞𑀚𑁆𑀛𑀕𑀫𑀸, 𑀅𑀝𑁆𑀞𑀸𑀳𑀺𑀧𑀺 𑀘 [𑀅𑀝𑁆𑀞𑀸𑀳𑀺 𑀘𑀸𑀧𑀺 (𑀲𑀻. 𑀲𑁆𑀬𑀸.), 𑀅𑀝𑁆𑀞𑀸𑀪𑀺 𑀘𑀸𑀧𑀺 (𑀓.)] 𑀲𑁄𑀴𑀲;

𑀲𑁄𑀴𑀲𑀸𑀳𑀺 𑀘 𑀩𑀸𑀢𑁆𑀢𑀺𑀁𑀲, 𑀅𑀢𑁆𑀭𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄;

𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂.

𑁧𑁦𑁪. 𑀉𑀧𑀭𑀺𑀯𑀺𑀲𑀸𑀮𑀸 𑀤𑀼𑀧𑁆𑀧𑀽𑀭𑀸, 𑀇𑀘𑁆𑀙𑀸 𑀯𑀺𑀲𑀝𑀕𑀸𑀫𑀺𑀦𑀻 [𑀉𑀧𑀭𑀺 𑀯𑀺𑀲𑀸𑀮𑀁 𑀤𑀼𑀧𑁆𑀧𑀽𑀭𑀁, 𑀇𑀘𑁆𑀙𑀸𑀯𑀺𑀲𑀤𑀕𑀸𑀫𑀺𑀦𑀻 (𑀲𑀻.)];

𑀬𑁂 𑀘 𑀢𑀁 𑀅𑀦𑀼𑀕𑀺𑀚𑁆𑀛𑀦𑁆𑀢𑀺, 𑀢𑁂 𑀳𑁄𑀦𑁆𑀢𑀺 𑀘𑀓𑁆𑀓𑀥𑀸𑀭𑀺𑀦𑁄𑀢𑀺.

𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑀁 𑀦𑀯𑀫𑀁.

𑁩𑁭𑁦. 𑀧𑀮𑀸𑀲𑀚𑀸𑀢𑀓𑀁 (𑁫-𑁨-𑁧𑁦)

𑁧𑁦𑁫. 𑀳𑀁𑀲𑁄 𑀧𑀮𑀸𑀲𑀫𑀯𑀘, 𑀦𑀺𑀕𑁆𑀭𑁄𑀥𑁄 𑀲𑀫𑁆𑀫 𑀚𑀸𑀬𑀢𑀺;

𑀅𑀗𑁆𑀓𑀲𑁆𑀫𑀺𑀁 [𑀅𑀗𑁆𑀕𑀲𑁆𑀫𑀺𑀁 (𑀓.)] 𑀢𑁂 𑀦𑀺𑀲𑀺𑀦𑁆𑀦𑁄𑀯, 𑀲𑁄 𑀢𑁂 𑀫𑀫𑁆𑀫𑀸𑀦𑀺 𑀙𑁂𑀘𑁆𑀙𑀢𑀺 [𑀙𑀺𑀚𑁆𑀚𑀢𑀺 (𑀓.)].

𑁧𑁦𑁬. 𑀯𑀟𑁆𑀠𑀢𑀸𑀫𑁂𑀯 [𑀯𑀤𑁆𑀥𑀺𑀢𑀫𑁂𑀯 (𑀓.)] 𑀦𑀺𑀕𑁆𑀭𑁄𑀥𑁄, 𑀧𑀢𑀺𑀝𑁆𑀞𑀲𑁆𑀲 𑀪𑀯𑀸𑀫𑀳𑀁;

𑀬𑀣𑀸 𑀧𑀺𑀢𑀸 𑀘 𑀫𑀸𑀢𑀸 𑀘 [𑀧𑀺𑀢𑀸 𑀯𑀸 𑀫𑀸𑀢𑀸 𑀯𑀸 (𑀧𑀻.), 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 (𑀓.)], 𑀏𑀯𑀁 𑀫𑁂 𑀲𑁄 𑀪𑀯𑀺𑀲𑁆𑀲𑀢𑀺.

𑁧𑁦𑁭. 𑀬𑀁 𑀢𑁆𑀯𑀁 𑀅𑀗𑁆𑀓𑀲𑁆𑀫𑀺𑀁 𑀯𑀟𑁆𑀠𑁂𑀲𑀺, 𑀔𑀻𑀭𑀭𑀼𑀓𑁆𑀔𑀁 𑀪𑀬𑀸𑀦𑀓𑀁;

𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫, 𑀯𑀼𑀟𑁆𑀠𑀺 𑀫𑀲𑁆𑀲 𑀦 𑀭𑀼𑀘𑁆𑀘𑀢𑀺.

𑁧𑁦𑁮. 𑀇𑀤𑀸𑀦𑀺 𑀔𑁄 𑀫𑀁 𑀪𑀸𑀬𑁂𑀢𑀺, 𑀫𑀳𑀸𑀦𑁂𑀭𑀼𑀦𑀺𑀤𑀲𑁆𑀲𑀦𑀁;

𑀳𑀁𑀲𑀲𑁆𑀲 𑀅𑀦𑀪𑀺𑀜𑁆𑀜𑀸𑀬, 𑀫𑀳𑀸 𑀫𑁂 𑀪𑀬𑀫𑀸𑀕𑀢𑀁.

𑁧𑁦𑁯. 𑀦 𑀢𑀲𑁆𑀲 𑀯𑀼𑀟𑁆𑀠𑀺 𑀓𑀼𑀲𑀮𑀧𑁆𑀧𑀲𑀢𑁆𑀣𑀸, 𑀬𑁄 𑀯𑀟𑁆𑀠𑀫𑀸𑀦𑁄 𑀖𑀲𑀢𑁂 𑀧𑀢𑀺𑀝𑁆𑀞𑀁;

𑀢𑀲𑁆𑀲𑀽𑀧𑀭𑁄𑀥𑀁 𑀧𑀭𑀺𑀲𑀗𑁆𑀓𑀫𑀸𑀦𑁄, 𑀧𑀢𑀸𑀭𑀬𑀻 𑀫𑀽𑀮𑀯𑀥𑀸𑀬 𑀥𑀻𑀭𑁄𑀢𑀺.

𑀧𑀮𑀸𑀲𑀚𑀸𑀢𑀓𑀁 𑀤𑀲𑀫𑀁.

𑀯𑀡𑁆𑀡𑀸𑀭𑁄𑀳𑀯𑀕𑁆𑀕𑁄 𑀤𑀼𑀢𑀺𑀬𑁄 [𑀇𑀫𑀲𑁆𑀲𑀼𑀤𑁆𑀤𑀸𑀦𑀁 𑀢𑀢𑀺𑀬𑀯𑀕𑁆𑀕𑀧𑀭𑀺𑀬𑁄𑀲𑀸𑀦𑁂 𑀪𑀯𑀺𑀲𑁆𑀲𑀢𑀺].