𑁫. 𑀧𑀜𑁆𑀘𑀓𑀦𑀺𑀧𑀸𑀢𑁄

𑁧. 𑀫𑀡𑀺𑀓𑀼𑀡𑁆𑀟𑀮𑀯𑀕𑁆𑀕𑁄

𑁩𑁫𑁧. 𑀫𑀡𑀺𑀓𑀼𑀡𑁆𑀟𑀮𑀚𑀸𑀢𑀓𑀁 (𑁫-𑁧-𑁧)

𑁧. 𑀚𑀻𑀦𑁄 𑀭𑀣𑀲𑁆𑀲𑀁 𑀫𑀡𑀺𑀓𑀼𑀡𑁆𑀟𑀮𑁂 𑀘, 𑀧𑀼𑀢𑁆𑀢𑁂 𑀘 𑀤𑀸𑀭𑁂 𑀘 𑀢𑀣𑁂𑀯 𑀚𑀻𑀦𑁄;

𑀲𑀩𑁆𑀩𑁂𑀲𑀼 𑀪𑁄𑀕𑁂𑀲𑀼 𑀅𑀲𑁂𑀲𑀓𑁂𑀲𑀼 [𑀅𑀲𑁂𑀲𑀺𑀢𑁂𑀲𑀼 (𑀲𑀻. 𑀧𑀻.), 𑀅𑀲𑁂𑀲𑀺𑀓𑁂𑀲𑀼 (𑀓.)], 𑀓𑀲𑁆𑀫𑀸 𑀦 𑀲𑀦𑁆𑀢𑀧𑁆𑀧𑀲𑀺 𑀲𑁄𑀓𑀓𑀸𑀮𑁂.

𑁨. 𑀧𑀼𑀩𑁆𑀩𑁂𑀯 𑀫𑀘𑁆𑀘𑀁 𑀯𑀺𑀚𑀳𑀦𑁆𑀢𑀺 𑀪𑁄𑀕𑀸, 𑀫𑀘𑁆𑀘𑁄 𑀯𑀸 𑀢𑁂 [𑀘 𑀦𑁂 (𑀧𑀻.), 𑀥𑀦𑁂 (𑀓.)] 𑀧𑀼𑀩𑁆𑀩𑀢𑀭𑀁 𑀚𑀳𑀸𑀢𑀺;

𑀅𑀲𑀲𑁆𑀲𑀢𑀸 𑀪𑁄𑀕𑀺𑀦𑁄 𑀓𑀸𑀫𑀓𑀸𑀫𑀺, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀳𑀁 𑀲𑁄𑀓𑀓𑀸𑀮𑁂.

𑁩. 𑀉𑀤𑁂𑀢𑀺 𑀆𑀧𑀽𑀭𑀢𑀺 𑀯𑁂𑀢𑀺 [𑀧𑀽𑀭𑁂𑀢𑀺 𑀔𑀻𑀬𑀢𑀺 (𑀲𑁆𑀬𑀸.)] 𑀘𑀦𑁆𑀤𑁄, 𑀅𑀢𑁆𑀣𑀁 𑀢𑀧𑁂𑀢𑁆𑀯𑀸𑀦 [𑀅𑀦𑁆𑀥𑀁 𑀢𑀧𑁂𑀢𑁆𑀯𑀸𑀦 (𑀓.), 𑀅𑀢𑁆𑀣𑀗𑁆𑀕𑀫𑁂𑀢𑁆𑀯𑀸𑀦 (𑀲𑁆𑀬𑀸.), 𑀏𑀢𑁆𑀣 ‘‘𑀢𑀧𑁂𑀢𑁆𑀯𑀸𑀦 𑀅𑀢𑁆𑀣𑀁 𑀧𑀮𑁂𑀢𑀻’’𑀢𑀺 𑀲𑀫𑁆𑀩𑀦𑁆𑀥𑁄] 𑀧𑀮𑁂𑀢𑀺 𑀲𑀽𑀭𑀺𑀬𑁄;

𑀯𑀺𑀤𑀺𑀢𑀸 [𑀯𑀺𑀚𑀺𑀢𑀸 (𑀲𑁆𑀬𑀸.)] 𑀫𑀬𑀸 𑀲𑀢𑁆𑀢𑀼𑀓 𑀮𑁄𑀓𑀥𑀫𑁆𑀫𑀸, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀳𑀁 𑀲𑁄𑀓𑀓𑀸𑀮𑁂.

𑁪. 𑀅𑀮𑀲𑁄 𑀕𑀺𑀳𑀻 𑀓𑀸𑀫𑀪𑁄𑀕𑀻 𑀦 𑀲𑀸𑀥𑀼, 𑀅𑀲𑀜𑁆𑀜𑀢𑁄 𑀧𑀩𑁆𑀩𑀚𑀺𑀢𑁄 𑀦 𑀲𑀸𑀥𑀼;

𑀭𑀸𑀚𑀸 𑀦 𑀲𑀸𑀥𑀼 𑀅𑀦𑀺𑀲𑀫𑁆𑀫𑀓𑀸𑀭𑀻, 𑀬𑁄 𑀧𑀡𑁆𑀟𑀺𑀢𑁄 𑀓𑁄𑀥𑀦𑁄 𑀢𑀁 𑀦 𑀲𑀸𑀥𑀼.

𑁫. 𑀦𑀺𑀲𑀫𑁆𑀫 𑀔𑀢𑁆𑀢𑀺𑀬𑁄 𑀓𑀬𑀺𑀭𑀸, 𑀦𑀸𑀦𑀺𑀲𑀫𑁆𑀫 𑀤𑀺𑀲𑀫𑁆𑀧𑀢𑀺;

𑀦𑀺𑀲𑀫𑁆𑀫𑀓𑀸𑀭𑀺𑀦𑁄 𑀭𑀸𑀚 [𑀭𑀜𑁆𑀜𑁄 (𑀲𑀻. 𑀲𑁆𑀬𑀸.)], 𑀬𑀲𑁄 𑀓𑀺𑀢𑁆𑀢𑀺 𑀘 𑀯𑀟𑁆𑀠𑀢𑀻𑀢𑀺.

𑀫𑀡𑀺𑀓𑀼𑀡𑁆𑀟𑀮𑀚𑀸𑀢𑀓𑀁 𑀧𑀞𑀫𑀁.

𑁩𑁫𑁨. 𑀲𑀼𑀚𑀸𑀢𑀚𑀸𑀢𑀓𑀁 (𑁫-𑁧-𑁨)

𑁬. 𑀓𑀺𑀁 𑀦𑀼 𑀲𑀦𑁆𑀢𑀭𑀫𑀸𑀦𑁄𑀯, 𑀮𑀸𑀬𑀺𑀢𑁆𑀯𑀸 𑀳𑀭𑀺𑀢𑀁 𑀢𑀺𑀡𑀁;

𑀔𑀸𑀤 𑀔𑀸𑀤𑀸𑀢𑀺 𑀮𑀧𑀲𑀺, 𑀕𑀢𑀲𑀢𑁆𑀢𑀁 𑀚𑀭𑀕𑁆𑀕𑀯𑀁.

𑁭. 𑀦 𑀳𑀺 𑀅𑀦𑁆𑀦𑁂𑀦 𑀧𑀸𑀦𑁂𑀦, 𑀫𑀢𑁄 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂;

𑀢𑁆𑀯𑀜𑁆𑀘 𑀢𑀼𑀘𑁆𑀙𑀁 𑀯𑀺𑀮𑀧𑀲𑀺, 𑀬𑀣𑀸 𑀢𑀁 𑀤𑀼𑀫𑁆𑀫𑀢𑀻 𑀢𑀣𑀸.

𑁮. 𑀢𑀣𑁂𑀯 𑀢𑀺𑀝𑁆𑀞𑀢𑀺 𑀲𑀻𑀲𑀁, 𑀳𑀢𑁆𑀣𑀧𑀸𑀤𑀸 𑀘 𑀯𑀸𑀮𑀥𑀺;

𑀲𑁄𑀢𑀸 𑀢𑀣𑁂𑀯 𑀢𑀺𑀝𑁆𑀞𑀦𑁆𑀢𑀺 [𑀲𑁄 𑀢𑀸𑀢 𑀢𑀣𑁂𑀯 𑀢𑀺𑀝𑁆𑀞𑀢𑀺 (𑀓.)], 𑀫𑀜𑁆𑀜𑁂 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂.

𑁯. 𑀦𑁂𑀯𑀬𑁆𑀬𑀓𑀲𑁆𑀲 𑀲𑀻𑀲𑀜𑁆𑀘 [𑀲𑀻𑀲𑀁 𑀯𑀸 (𑀲𑀻. 𑀲𑁆𑀬𑀸. 𑀧𑀻.)], 𑀳𑀢𑁆𑀣𑀧𑀸𑀤𑀸 𑀘 𑀤𑀺𑀲𑁆𑀲𑀭𑁂;

𑀭𑀼𑀤𑀁 𑀫𑀢𑁆𑀢𑀺𑀓𑀣𑀽𑀧𑀲𑁆𑀫𑀺𑀁, 𑀦𑀦𑀼 𑀢𑁆𑀯𑀜𑁆𑀜𑁂𑀯 𑀤𑀼𑀫𑁆𑀫𑀢𑀺.

𑁧𑁦. 𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁 [𑀑𑀲𑀺𑀜𑁆𑀘𑀺 (𑀓.)], 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁧. 𑀅𑀩𑁆𑀩𑀳𑀻 [𑀅𑀩𑁆𑀩𑀽𑀴𑁆𑀳𑀁 (𑀲𑀻. 𑀲𑁆𑀬𑀸.), 𑀅𑀩𑁆𑀪𑀽𑀴𑁆𑀳𑀁 (𑀓.)] 𑀯𑀢 𑀫𑁂 𑀲𑀮𑁆𑀮𑀁, 𑀬𑀫𑀸𑀲𑀺 𑀳𑀤𑀬𑀲𑁆𑀲𑀺𑀢𑀁 [𑀲𑁄𑀓𑀁 𑀳𑀤𑀬𑀦𑀺𑀲𑁆𑀲𑀺𑀢𑀁 (𑀲𑀻. 𑀲𑁆𑀬𑀸.)];

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀺𑀢𑀼 𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁨. 𑀲𑁄𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀯𑀻𑀢𑀲𑁄𑀓𑁄 𑀅𑀦𑀸𑀯𑀺𑀮𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀫𑀸𑀡𑀯.

𑁧𑁩. 𑀏𑀯𑀁 𑀓𑀭𑁄𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸;

𑀯𑀺𑀦𑀺𑀯𑀢𑁆𑀢𑁂𑀦𑁆𑀢𑀺 𑀲𑁄𑀓𑀫𑁆𑀳𑀸, 𑀲𑀼𑀚𑀸𑀢𑁄 𑀧𑀺𑀢𑀭𑀁 𑀬𑀣𑀸𑀢𑀺.

𑀲𑀼𑀚𑀸𑀢𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁩𑁫𑁩. 𑀯𑁂𑀦𑀲𑀸𑀔𑀚𑀸𑀢𑀓𑀁 (𑁫-𑁧-𑁩)

𑁧𑁪. 𑀦𑀬𑀺𑀤𑀁 𑀦𑀺𑀘𑁆𑀘𑀁 𑀪𑀯𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀤𑀢𑁆𑀢, 𑀔𑁂𑀫𑀁 𑀲𑀼𑀪𑀺𑀓𑁆𑀔𑀁 𑀲𑀼𑀔𑀢𑀸 𑀘 𑀓𑀸𑀬𑁂;

𑀅𑀢𑁆𑀣𑀘𑁆𑀘𑀬𑁂 𑀫𑀸 𑀅𑀳𑀼 𑀲𑀫𑁆𑀧𑀫𑀽𑀴𑁆𑀳𑁄, 𑀪𑀺𑀦𑁆𑀦𑀧𑁆𑀮𑀯𑁄 𑀲𑀸𑀕𑀭𑀲𑁆𑀲𑁂𑀯 𑀫𑀚𑁆𑀛𑁂.

𑁧𑁫. 𑀬𑀸𑀦𑀺 𑀓𑀭𑁄𑀢𑀺 𑀧𑀼𑀭𑀺𑀲𑁄, 𑀢𑀸𑀦𑀺 𑀅𑀢𑁆𑀢𑀦𑀺 𑀧𑀲𑁆𑀲𑀢𑀺;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓𑀁;

𑀬𑀸𑀤𑀺𑀲𑀁 𑀯𑀧𑀢𑁂 𑀩𑀻𑀚𑀁, 𑀢𑀸𑀤𑀺𑀲𑀁 𑀳𑀭𑀢𑁂 𑀨𑀮𑀁.

𑁧𑁬. 𑀇𑀤𑀁 𑀢𑀤𑀸𑀘𑀭𑀺𑀬𑀯𑀘𑁄, 𑀧𑀸𑀭𑀸𑀲𑀭𑀺𑀬𑁄 𑀬𑀤𑀩𑁆𑀭𑀯𑀺;

𑀫𑀸 𑀲𑀼 [𑀫𑀸 𑀲𑁆𑀲𑀼 (𑀲𑀻. 𑀲𑁆𑀬𑀸. 𑀧𑀻.)] 𑀢𑁆𑀯𑀁 𑀅𑀓𑀭𑀺 𑀧𑀸𑀧𑀁, 𑀬𑀁 𑀢𑁆𑀯𑀁 𑀧𑀘𑁆𑀙𑀸 𑀓𑀢𑀁 𑀢𑀧𑁂.

𑁧𑁭. 𑀅𑀬𑀫𑁂𑀯 𑀲𑁄 𑀧𑀺𑀗𑁆𑀕𑀺𑀬 [𑀲𑁄 𑀧𑀺𑀗𑁆𑀕𑀺𑀬𑁄 (𑀲𑁆𑀬𑀸.), 𑀲𑁄𑀧𑀺 𑀪𑀺𑀬𑁆𑀬𑁄 (𑀓.)] 𑀯𑁂𑀦𑀲𑀸𑀔𑁄, [𑀥𑁄𑀦𑀲𑀸𑀔𑁄 (𑀓. 𑀲𑀻. 𑀧𑀻.)] 𑀬𑀫𑁆𑀳𑀺 𑀖𑀸𑀢𑀬𑀺𑀁 𑀔𑀢𑁆𑀢𑀺𑀬𑀸𑀦𑀁 𑀲𑀳𑀲𑁆𑀲𑀁;

𑀅𑀮𑀗𑁆𑀓𑀢𑁂 𑀘𑀦𑁆𑀤𑀦𑀲𑀸𑀭𑀸𑀦𑀼𑀮𑀺𑀢𑁆𑀢𑁂, 𑀢𑀫𑁂𑀯 𑀤𑀼𑀓𑁆𑀔𑀁 𑀧𑀘𑁆𑀘𑀸𑀕𑀢𑀁 𑀫𑀫𑀁.

𑁧𑁮. 𑀲𑀸𑀫𑀸 𑀘 [𑀲𑀸𑀫𑀸𑀧𑀺 (𑀲𑀻. 𑀲𑁆𑀬𑀸.)] 𑀔𑁄 𑀘𑀦𑁆𑀤𑀦𑀮𑀺𑀢𑁆𑀢𑀕𑀢𑁆𑀢𑀸 [𑀕𑀢𑁆𑀢𑀻 (𑀓. 𑀲𑀻. 𑀲𑁆𑀬𑀸. 𑀧𑀻.)], 𑀮𑀝𑁆𑀞𑀻𑀯 𑀲𑁄𑀪𑀜𑁆𑀚𑀦𑀓𑀲𑁆𑀲 𑀉𑀕𑁆𑀕𑀢𑀸;

𑀅𑀤𑀺𑀲𑁆𑀯𑀸 [𑀅𑀤𑀺𑀲𑁆𑀯𑀸𑀯 (𑀲𑀻.)] 𑀓𑀸𑀮𑀁 𑀓𑀭𑀺𑀲𑁆𑀲𑀸𑀫𑀺 𑀉𑀩𑁆𑀩𑀭𑀺𑀁, 𑀢𑀁 𑀫𑁂 𑀇𑀢𑁄 𑀤𑀼𑀓𑁆𑀔𑀢𑀭𑀁 𑀪𑀯𑀺𑀲𑁆𑀲𑀢𑀻𑀢𑀺.

𑀯𑁂𑀦𑀲𑀸𑀔𑀚𑀸𑀢𑀓𑀁 [𑀥𑁄𑀦𑀲𑀸𑀔𑀚𑀸𑀢𑀓𑀁 (𑀓. 𑀲𑀻. 𑀧𑀻.)] 𑀢𑀢𑀺𑀬𑀁.

𑁩𑁫𑁪. 𑀉𑀭𑀕𑀚𑀸𑀢𑀓𑀁 (𑁫-𑁧-𑁪)

𑁧𑁯. 𑀉𑀭𑀕𑁄𑀯 𑀢𑀘𑀁 𑀚𑀺𑀡𑁆𑀡𑀁, 𑀳𑀺𑀢𑁆𑀯𑀸 𑀕𑀘𑁆𑀙𑀢𑀺 𑀲𑀁 𑀢𑀦𑀼𑀁;

𑀏𑀯𑀁 𑀲𑀭𑀻𑀭𑁂 𑀦𑀺𑀩𑁆𑀪𑁄𑀕𑁂, 𑀧𑁂𑀢𑁂 𑀓𑀸𑀮𑀗𑁆𑀓𑀢𑁂 𑀲𑀢𑀺.

𑁨𑁦. 𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀺.

𑁨𑁧. 𑀅𑀦𑀯𑁆𑀳𑀺𑀢𑁄 𑀢𑀢𑁄 𑀆𑀕𑀸, 𑀅𑀦𑀦𑀼𑀜𑁆𑀜𑀸𑀢𑁄 [𑀦𑀸𑀦𑀼𑀜𑁆𑀜𑀸𑀢𑁄 (𑀓.)] 𑀇𑀢𑁄 𑀕𑀢𑁄;

𑀬𑀣𑀸𑀕𑀢𑁄 𑀢𑀣𑀸 𑀕𑀢𑁄, 𑀢𑀢𑁆𑀣 𑀓𑀸 𑀧𑀭𑀺𑀤𑁂𑀯𑀦𑀸.

𑁨𑁨. 𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀺.

𑁨𑁩. 𑀲𑀘𑁂 𑀭𑁄𑀤𑁂 𑀓𑀺𑀲𑀸 [𑀓𑀺𑀲𑀻 (𑀧𑀻.)] 𑀅𑀲𑁆𑀲𑀁, 𑀢𑀲𑁆𑀲𑀸 𑀫𑁂 𑀓𑀺𑀁 𑀨𑀮𑀁 𑀲𑀺𑀬𑀸;

𑀜𑀸𑀢𑀺𑀫𑀺𑀢𑁆𑀢𑀲𑀼𑀳𑀚𑁆𑀚𑀸𑀦𑀁, 𑀪𑀺𑀬𑁆𑀬𑁄 𑀦𑁄 𑀅𑀭𑀢𑀻 𑀲𑀺𑀬𑀸.

𑁨𑁪. 𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀺.

𑁨𑁫. 𑀬𑀣𑀸𑀧𑀺 𑀤𑀸𑀭𑀓𑁄 𑀘𑀦𑁆𑀤𑀁, 𑀕𑀘𑁆𑀙𑀦𑁆𑀢𑀫𑀦𑀼𑀭𑁄𑀤𑀢𑀺;

𑀏𑀯𑀁 𑀲𑀫𑁆𑀧𑀤𑀫𑁂𑀯𑁂𑀢𑀁, 𑀬𑁄 𑀧𑁂𑀢𑀫𑀦𑀼𑀲𑁄𑀘𑀢𑀺.

𑁨𑁬. 𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀺.

𑁨𑁭. 𑀬𑀣𑀸𑀧𑀺 𑀉𑀤𑀓𑀓𑀼𑀫𑁆𑀪𑁄, 𑀪𑀺𑀦𑁆𑀦𑁄 𑀅𑀧𑁆𑀧𑀝𑀺𑀲𑀦𑁆𑀥𑀺𑀬𑁄;

𑀏𑀯𑀁 𑀲𑀫𑁆𑀧𑀤𑀫𑁂𑀯𑁂𑀢𑀁, 𑀬𑁄 𑀧𑁂𑀢𑀫𑀦𑀼𑀲𑁄𑀘𑀢𑀺.

𑁨𑁮. 𑀟𑀬𑁆𑀳𑀫𑀸𑀦𑁄 𑀦 𑀚𑀸𑀦𑀸𑀢𑀺, 𑀜𑀸𑀢𑀻𑀦𑀁 𑀧𑀭𑀺𑀤𑁂𑀯𑀺𑀢𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺, 𑀕𑀢𑁄 𑀲𑁄 𑀢𑀲𑁆𑀲 𑀬𑀸 𑀕𑀢𑀻𑀢𑀺.

𑀉𑀭𑀕𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁩𑁫𑁫. 𑀖𑀝𑀚𑀸𑀢𑀓𑀁 (𑁫-𑁧-𑁫)

𑁨𑁯. 𑀅𑀜𑁆𑀜𑁂 𑀲𑁄𑀘𑀦𑁆𑀢𑀺 𑀭𑁄𑀤𑀦𑁆𑀢𑀺, 𑀅𑀜𑁆𑀜𑁂 𑀅𑀲𑁆𑀲𑀼𑀫𑀼𑀔𑀸 𑀚𑀦𑀸;

𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑁄𑀲𑀺, 𑀓𑀲𑁆𑀫𑀸 𑀖𑀝 [𑀖𑀢 (𑀲𑀻. 𑀧𑀻.)] 𑀦 𑀲𑁄𑀘𑀲𑀺.

𑁩𑁦. 𑀦𑀸𑀩𑁆𑀪𑀢𑀻𑀢𑀳𑀭𑁄 𑀲𑁄𑀓𑁄, 𑀦𑀸𑀦𑀸𑀕𑀢𑀲𑀼𑀔𑀸𑀯𑀳𑁄;

𑀢𑀲𑁆𑀫𑀸 𑀥𑀗𑁆𑀓 [𑀯𑀁𑀓 (𑀧𑀻.)] 𑀦 𑀲𑁄𑀘𑀸𑀫𑀺, 𑀦𑀢𑁆𑀣𑀺 𑀲𑁄𑀓𑁂 𑀤𑀼𑀢𑀻𑀬𑀢𑀸 [𑀲𑁄𑀓𑁄 𑀤𑀼𑀢𑀻𑀬𑀓𑀸 (𑀓.)].

𑁩𑁧. 𑀲𑁄𑀘𑀁 𑀧𑀡𑁆𑀟𑀼 𑀓𑀺𑀲𑁄 𑀳𑁄𑀢𑀺, 𑀪𑀢𑁆𑀢𑀜𑁆𑀘𑀲𑁆𑀲 𑀦 𑀭𑀼𑀘𑁆𑀘𑀢𑀺;

𑀅𑀫𑀺𑀢𑁆𑀢𑀸 𑀲𑀼𑀫𑀦𑀸 𑀳𑁄𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑀲𑁆𑀲 𑀭𑀼𑀧𑁆𑀧𑀢𑁄.

𑁩𑁨. 𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀞𑀺𑀢𑀁 𑀫𑀁 𑀦𑀸𑀕𑀫𑀺𑀲𑁆𑀲𑀢𑀺, 𑀏𑀯𑀁 𑀤𑀺𑀝𑁆𑀞𑀧𑀤𑁄 𑀅𑀳𑀁.

𑁩𑁩. 𑀬𑀲𑁆𑀲𑀢𑁆𑀢𑀸 𑀦𑀸𑀮𑀫𑁂𑀓𑁄𑀯, 𑀲𑀩𑁆𑀩𑀓𑀸𑀫𑀭𑀲𑀸𑀳𑀭𑁄;

𑀲𑀩𑁆𑀩𑀸𑀧𑀺 𑀧𑀣𑀯𑀻 𑀢𑀲𑁆𑀲, 𑀦 𑀲𑀼𑀔𑀁 𑀆𑀯𑀳𑀺𑀲𑁆𑀲𑀢𑀻𑀢𑀺.

𑀖𑀝𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁩𑁫𑁬. 𑀓𑁄𑀭𑀡𑁆𑀟𑀺𑀬𑀚𑀸𑀢𑀓𑀁 (𑁫-𑁧-𑁬)

𑁩𑁪. 𑀏𑀓𑁄 𑀅𑀭𑀜𑁆𑀜𑁂 𑀕𑀺𑀭𑀺𑀓𑀦𑁆𑀤𑀭𑀸𑀬𑀁, 𑀧𑀕𑁆𑀕𑀬𑁆𑀳 𑀧𑀕𑁆𑀕𑀬𑁆𑀳 𑀲𑀺𑀮𑀁 𑀧𑀯𑁂𑀘𑁆𑀙𑀲𑀺 [𑀧𑀯𑁂𑀚𑁆𑀛𑀲𑀺 (𑀲𑁆𑀬𑀸. 𑀲𑀻. 𑀅𑀝𑁆𑀞.)];

𑀧𑀼𑀦𑀧𑁆𑀧𑀼𑀦𑀁 𑀲𑀦𑁆𑀢𑀭𑀫𑀸𑀦𑀭𑀽𑀧𑁄, 𑀓𑁄𑀭𑀡𑁆𑀟𑀺𑀬 [𑀓𑀸𑀭𑀡𑁆𑀟𑀺𑀬 (𑀲𑀻. 𑀲𑁆𑀬𑀸. 𑀧𑀻.)] 𑀓𑁄 𑀦𑀼 𑀢𑀯 𑀬𑀺𑀥𑀢𑁆𑀣𑁄.

𑁩𑁫. 𑀅𑀳𑀜𑁆𑀳𑀺𑀫𑀁 𑀲𑀸𑀕𑀭 𑀲𑁂𑀯𑀺𑀢𑀦𑁆𑀢𑀁, 𑀲𑀫𑀁 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸𑀧𑀺 𑀧𑀸𑀡𑀺;

𑀯𑀺𑀓𑀺𑀭𑀺𑀬 𑀲𑀸𑀦𑀽𑀦𑀺 𑀘 𑀧𑀩𑁆𑀩𑀢𑀸𑀦𑀺 𑀘, 𑀢𑀲𑁆𑀫𑀸 𑀲𑀺𑀮𑀁 𑀤𑀭𑀺𑀬𑀸 𑀧𑀓𑁆𑀔𑀺𑀧𑀸𑀫𑀺.

𑁩𑁬. 𑀦𑀬𑀺𑀫𑀁 𑀫𑀳𑀺𑀁 𑀅𑀭𑀳𑀢𑀺 𑀧𑀸𑀡𑀺𑀓𑀧𑁆𑀧𑀁, 𑀲𑀫𑀁 𑀫𑀦𑀼𑀲𑁆𑀲𑁄 𑀓𑀭𑀡𑀸𑀬 𑀫𑁂𑀓𑁄;

𑀫𑀜𑁆𑀜𑀸𑀫𑀺𑀫𑀜𑁆𑀜𑁂𑀯 𑀤𑀭𑀺𑀁 𑀚𑀺𑀕𑀻𑀲𑀁 [𑀚𑀺𑀕𑀺𑀁𑀲𑀁 (𑀲𑀻. 𑀲𑁆𑀬𑀸. 𑀧𑀻.)], 𑀓𑁄𑀭𑀡𑁆𑀟𑀺𑀬 𑀳𑀸𑀳𑀲𑀺 [𑀳𑀸𑀬𑀲𑀺 (𑀲𑁆𑀬𑀸. 𑀓.)] 𑀚𑀻𑀯𑀮𑁄𑀓𑀁.

𑁩𑁭. 𑀲𑀘𑁂 𑀅𑀳𑀁 [𑀅𑀬𑀁 (𑀲𑀻. 𑀲𑁆𑀬𑀸. 𑀧𑀻.)] 𑀪𑀽𑀢𑀥𑀭𑀁 𑀦 𑀲𑀓𑁆𑀓𑀸 [𑀲𑀓𑁆𑀓𑁄 (𑀲𑁆𑀬𑀸. 𑀓.)], 𑀲𑀫𑀁 𑀫𑀦𑀼𑀲𑁆𑀲𑁄 𑀓𑀭𑀡𑀸𑀬 𑀫𑁂𑀓𑁄;

𑀏𑀯𑀫𑁂𑀯 𑀢𑁆𑀯𑀁 𑀩𑁆𑀭𑀳𑁆𑀫𑁂 𑀇𑀫𑁂 𑀫𑀦𑀼𑀲𑁆𑀲𑁂, 𑀦𑀸𑀦𑀸𑀤𑀺𑀝𑁆𑀞𑀺𑀓𑁂 𑀦𑀸𑀦𑀬𑀺𑀲𑁆𑀲𑀲𑀺 𑀢𑁂 [𑀦𑁂 (𑀓.)].

𑁩𑁮. 𑀲𑀗𑁆𑀔𑀺𑀢𑁆𑀢𑀭𑀽𑀧𑁂𑀦 𑀪𑀯𑀁 𑀫𑀫𑀢𑁆𑀣𑀁, 𑀅𑀓𑁆𑀔𑀸𑀲𑀺 𑀓𑁄𑀭𑀡𑁆𑀟𑀺𑀬 𑀏𑀯𑀫𑁂𑀢𑀁;

𑀬𑀣𑀸 𑀦 𑀲𑀓𑁆𑀓𑀸 𑀧𑀣𑀯𑀻 𑀲𑀫𑀸𑀬𑀁, 𑀓𑀢𑁆𑀢𑀼𑀁 𑀫𑀦𑀼𑀲𑁆𑀲𑁂𑀦 𑀢𑀣𑀸 𑀫𑀦𑀼𑀲𑁆𑀲𑀸𑀢𑀺.

𑀓𑁄𑀭𑀡𑁆𑀟𑀺𑀬𑀚𑀸𑀢𑀓𑀁 𑀙𑀝𑁆𑀞𑀁.

𑁩𑁫𑁭. 𑀮𑀝𑀼𑀓𑀺𑀓𑀚𑀸𑀢𑀓𑀁 (𑁫-𑁧-𑁭)

𑁩𑁯. 𑀯𑀦𑁆𑀤𑀸𑀫𑀺 𑀢𑀁 𑀓𑀼𑀜𑁆𑀚𑀭 𑀲𑀝𑁆𑀞𑀺𑀳𑀸𑀬𑀦𑀁, 𑀆𑀭𑀜𑁆𑀜𑀓𑀁 𑀬𑀽𑀣𑀧𑀢𑀺𑀁 𑀬𑀲𑀲𑁆𑀲𑀺𑀁;

𑀧𑀓𑁆𑀔𑁂𑀳𑀺 𑀢𑀁 𑀧𑀜𑁆𑀚𑀮𑀺𑀓𑀁 𑀓𑀭𑁄𑀫𑀺, 𑀫𑀸 𑀫𑁂 𑀯𑀥𑀻 𑀧𑀼𑀢𑁆𑀢𑀓𑁂 𑀤𑀼𑀩𑁆𑀩𑀮𑀸𑀬.

𑁪𑁦. 𑀯𑀦𑁆𑀤𑀸𑀫𑀺 𑀢𑀁 𑀓𑀼𑀜𑁆𑀚𑀭 𑀏𑀓𑀘𑀸𑀭𑀺𑀁, 𑀆𑀭𑀜𑁆𑀜𑀓𑀁 𑀧𑀩𑁆𑀩𑀢𑀲𑀸𑀦𑀼𑀕𑁄𑀘𑀭𑀁;

𑀧𑀓𑁆𑀔𑁂𑀳𑀺 𑀢𑀁 𑀧𑀜𑁆𑀚𑀮𑀺𑀓𑀁 𑀓𑀭𑁄𑀫𑀺, 𑀫𑀸 𑀫𑁂 𑀯𑀥𑀻 𑀧𑀼𑀢𑁆𑀢𑀓𑁂 𑀤𑀼𑀩𑁆𑀩𑀮𑀸𑀬;

𑁪𑁧. 𑀯𑀫𑀺𑀲𑁆𑀲𑀸𑀫𑀺 𑀢𑁂 𑀮𑀝𑀼𑀓𑀺𑀓𑁂 𑀧𑀼𑀢𑁆𑀢𑀓𑀸𑀦𑀺, 𑀓𑀺𑀁 𑀫𑁂 𑀢𑀼𑀯𑀁 𑀓𑀸𑀳𑀲𑀺 𑀤𑀼𑀩𑁆𑀩𑀮𑀸𑀲𑀺;

𑀲𑀢𑀁 𑀲𑀳𑀲𑁆𑀲𑀸𑀦𑀺𑀧𑀺 𑀢𑀸𑀤𑀺𑀲𑀻𑀦𑀁, 𑀯𑀸𑀫𑁂𑀦 𑀧𑀸𑀤𑁂𑀦 𑀧𑀧𑁄𑀣𑀬𑁂𑀬𑁆𑀬𑀁.

𑁪𑁨. 𑀦 𑀳𑁂𑀯 𑀲𑀩𑁆𑀩𑀢𑁆𑀣 𑀩𑀮𑁂𑀦 𑀓𑀺𑀘𑁆𑀘𑀁, 𑀩𑀮𑀜𑁆𑀳𑀺 𑀩𑀸𑀮𑀲𑁆𑀲 𑀯𑀥𑀸𑀬 𑀳𑁄𑀢𑀺;

𑀓𑀭𑀺𑀲𑁆𑀲𑀸𑀫𑀺 𑀢𑁂 𑀦𑀸𑀕𑀭𑀸𑀚𑀸 𑀅𑀦𑀢𑁆𑀣𑀁, 𑀬𑁄 𑀫𑁂 𑀯𑀥𑀻 𑀧𑀼𑀢𑁆𑀢𑀓𑁂 𑀤𑀼𑀩𑁆𑀩𑀮𑀸𑀬.

𑁪𑁩. 𑀓𑀸𑀓𑀜𑁆𑀘 𑀧𑀲𑁆𑀲 𑀮𑀝𑀼𑀓𑀺𑀓𑀁, 𑀫𑀡𑁆𑀟𑀽𑀓𑀁 𑀦𑀻𑀮𑀫𑀓𑁆𑀔𑀺𑀓𑀁;

𑀏𑀢𑁂 𑀦𑀸𑀕𑀁 𑀅𑀖𑀸𑀢𑁂𑀲𑀼𑀁, 𑀧𑀲𑁆𑀲 𑀯𑁂𑀭𑀲𑁆𑀲 𑀯𑁂𑀭𑀺𑀦𑀁;

𑀢𑀲𑁆𑀫𑀸 𑀳𑀺 𑀯𑁂𑀭𑀁 𑀦 𑀓𑀬𑀺𑀭𑀸𑀣, 𑀅𑀧𑁆𑀧𑀺𑀬𑁂𑀦𑀧𑀺 𑀓𑁂𑀦𑀘𑀻𑀢𑀺.

𑀮𑀝𑀼𑀓𑀺𑀓𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁩𑁫𑁮. 𑀘𑀽𑀴𑀥𑀫𑁆𑀫𑀧𑀸𑀮𑀚𑀸𑀢𑀓𑀁 (𑁫-𑁧-𑁮)

𑁪𑁪. 𑀅𑀳𑀫𑁂𑀯 𑀤𑀽𑀲𑀺𑀬𑀸 𑀪𑀽𑀦𑀳𑀢𑀸, 𑀭𑀜𑁆𑀜𑁄 𑀫𑀳𑀸𑀧𑀢𑀸𑀧𑀲𑁆𑀲;

𑀏𑀢𑀁 𑀫𑀼𑀜𑁆𑀘𑀢𑀼 𑀥𑀫𑁆𑀫𑀧𑀸𑀮𑀁, 𑀳𑀢𑁆𑀣𑁂 𑀫𑁂 𑀤𑁂𑀯 𑀙𑁂𑀤𑁂𑀳𑀺.

𑁪𑁫. 𑀅𑀳𑀫𑁂𑀯 𑀤𑀽𑀲𑀺𑀬𑀸 𑀪𑀽𑀦𑀳𑀢𑀸, 𑀭𑀜𑁆𑀜𑁄 𑀫𑀳𑀸𑀧𑀢𑀸𑀧𑀲𑁆𑀲;

𑀏𑀢𑀁 𑀫𑀼𑀜𑁆𑀘𑀢𑀼 𑀥𑀫𑁆𑀫𑀧𑀸𑀮𑀁, 𑀧𑀸𑀤𑁂 𑀫𑁂 𑀤𑁂𑀯 𑀙𑁂𑀤𑁂𑀳𑀺.

𑁪𑁬. 𑀅𑀳𑀫𑁂𑀯 𑀤𑀽𑀲𑀺𑀬𑀸 𑀪𑀽𑀦𑀳𑀢𑀸, 𑀭𑀜𑁆𑀜𑁄 𑀫𑀳𑀸𑀧𑀢𑀸𑀧𑀲𑁆𑀲;

𑀏𑀢𑀁 𑀫𑀼𑀜𑁆𑀘𑀢𑀼 𑀥𑀫𑁆𑀫𑀧𑀸𑀮𑀁, 𑀲𑀻𑀲𑀁 𑀫𑁂 𑀤𑁂𑀯 𑀙𑁂𑀤𑁂𑀳𑀺.

𑁪𑁭. 𑀦 𑀳𑀺 [𑀦𑀳 (𑀲𑀻. 𑀲𑁆𑀬𑀸. 𑀧𑀻.) 𑀏𑀢𑁆𑀣 𑀳-𑀓𑀸𑀭𑁄 𑀔𑁂𑀤𑁂] 𑀦𑀽𑀦𑀺𑀫𑀲𑁆𑀲 𑀭𑀜𑁆𑀜𑁄, 𑀫𑀺𑀢𑁆𑀢𑀸𑀫𑀘𑁆𑀘𑀸 𑀘 𑀯𑀺𑀚𑁆𑀚𑀭𑁂 𑀲𑀼𑀳𑀤𑀸;

𑀬𑁂 𑀦 𑀯𑀤𑀦𑁆𑀢𑀺 𑀭𑀸𑀚𑀸𑀦𑀁, 𑀫𑀸 𑀖𑀸𑀢𑀬𑀺 𑀑𑀭𑀲𑀁 𑀧𑀼𑀢𑁆𑀢𑀁.

𑁪𑁮. 𑀦 𑀳𑀺 [𑀦𑀳 (𑀲𑀻. 𑀲𑁆𑀬𑀸. 𑀧𑀻.) 𑀏𑀢𑁆𑀣 𑀳-𑀓𑀸𑀭𑁄 𑀔𑁂𑀤𑁂] 𑀦𑀽𑀦𑀺𑀫𑀲𑁆𑀲 𑀭𑀜𑁆𑀜𑁄, 𑀜𑀸𑀢𑀻 𑀫𑀺𑀢𑁆𑀢𑀸 𑀘 𑀯𑀺𑀚𑁆𑀚𑀭𑁂 𑀲𑀼𑀳𑀤𑀸;

𑀬𑁂 𑀦 𑀯𑀤𑀦𑁆𑀢𑀺 𑀭𑀸𑀚𑀸𑀦𑀁, 𑀫𑀸 𑀖𑀸𑀢𑀬𑀺 𑀅𑀢𑁆𑀭𑀚𑀁 𑀧𑀼𑀢𑁆𑀢𑀁.

𑁪𑁯. 𑀘𑀦𑁆𑀤𑀦𑀲𑀸𑀭𑀸𑀦𑀼𑀮𑀺𑀢𑁆𑀢𑀸, 𑀩𑀸𑀳𑀸 𑀙𑀺𑀚𑁆𑀚𑀦𑁆𑀢𑀺 𑀥𑀫𑁆𑀫𑀧𑀸𑀮𑀲𑁆𑀲;

𑀤𑀸𑀬𑀸𑀤𑀲𑁆𑀲 𑀧𑀣𑀩𑁆𑀬𑀸, 𑀧𑀸𑀡𑀸 𑀫𑁂 𑀤𑁂𑀯 𑀭𑀼𑀚𑁆𑀛𑀦𑁆𑀢𑀻𑀢𑀺.

𑀘𑀽𑀴𑀥𑀫𑁆𑀫𑀧𑀸𑀮𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁩𑁫𑁯. 𑀲𑀼𑀯𑀡𑁆𑀡𑀫𑀺𑀕𑀚𑀸𑀢𑀓𑀁 (𑁫-𑁧-𑁯)

𑁫𑁦. 𑀯𑀺𑀓𑁆𑀓𑀫 𑀭𑁂 𑀳𑀭𑀺𑀧𑀸𑀤 [𑀫𑀳𑀸𑀫𑀺𑀕 (𑀲𑀻. 𑀲𑁆𑀬𑀸. 𑀧𑀻.)], 𑀯𑀺𑀓𑁆𑀓𑀫 𑀭𑁂 𑀫𑀳𑀸𑀫𑀺𑀕 [𑀳𑀭𑀻𑀧𑀤 (𑀲𑀻. 𑀲𑁆𑀬𑀸. 𑀧𑀻.)];

𑀙𑀺𑀦𑁆𑀤 𑀯𑀸𑀭𑀢𑁆𑀢𑀺𑀓𑀁 𑀧𑀸𑀲𑀁, 𑀦𑀸𑀳𑀁 𑀏𑀓𑀸 𑀯𑀦𑁂 𑀭𑀫𑁂.

𑁫𑁧. 𑀯𑀺𑀓𑁆𑀓𑀫𑀸𑀫𑀺 𑀦 𑀧𑀸𑀭𑁂𑀫𑀺, 𑀪𑀽𑀫𑀺𑀁 𑀲𑀼𑀫𑁆𑀪𑀸𑀫𑀺 𑀯𑁂𑀕𑀲𑀸;

𑀤𑀴𑁆𑀳𑁄 𑀯𑀸𑀭𑀢𑁆𑀢𑀺𑀓𑁄 𑀧𑀸𑀲𑁄, 𑀧𑀸𑀤𑀁 𑀫𑁂 𑀧𑀭𑀺𑀓𑀦𑁆𑀢𑀢𑀺.

𑁫𑁨. 𑀅𑀢𑁆𑀣𑀭𑀲𑁆𑀲𑀼 𑀧𑀮𑀸𑀲𑀸𑀦𑀺, 𑀅𑀲𑀺𑀁 𑀦𑀺𑀩𑁆𑀩𑀸𑀳 𑀮𑀼𑀤𑁆𑀤𑀓;

𑀧𑀞𑀫𑀁 𑀫𑀁 𑀯𑀥𑀺𑀢𑁆𑀯𑀸𑀦, 𑀳𑀦 𑀧𑀘𑁆𑀙𑀸 𑀫𑀳𑀸𑀫𑀺𑀕𑀁.

𑁫𑁩. 𑀦 𑀫𑁂 𑀲𑀼𑀢𑀁 𑀯𑀸 𑀤𑀺𑀝𑁆𑀞𑀁 𑀯𑀸, 𑀪𑀸𑀲𑀦𑁆𑀢𑀺𑀁 𑀫𑀸𑀦𑀼𑀲𑀺𑀁 𑀫𑀺𑀕𑀺𑀁 [𑀦 𑀫𑁂 𑀲𑀼𑀢𑀸 𑀯𑀸 𑀤𑀺𑀝𑁆𑀞𑀸 𑀯𑀸, 𑀪𑀸𑀲𑀦𑁆𑀢𑀻 𑀫𑀸𑀦𑀼𑀲𑀺𑀁 𑀫𑀺𑀕𑀻 (𑀝𑀻𑀓𑀸)];

𑀢𑁆𑀯𑀜𑁆𑀘 𑀪𑀤𑁆𑀤𑁂 𑀲𑀼𑀔𑀻 𑀳𑁄𑀳𑀺, 𑀏𑀲𑁄 𑀘𑀸𑀧𑀺 𑀫𑀳𑀸𑀫𑀺𑀕𑁄.

𑁫𑁪. 𑀏𑀯𑀁 𑀮𑀼𑀤𑁆𑀤𑀓 𑀦𑀦𑁆𑀤𑀲𑁆𑀲𑀼, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀬𑀣𑀸𑀳𑀫𑀚𑁆𑀚 𑀦𑀦𑁆𑀤𑀸𑀫𑀺, 𑀫𑀼𑀢𑁆𑀢𑀁 𑀤𑀺𑀲𑁆𑀯𑀸 𑀫𑀳𑀸𑀫𑀺𑀕𑀦𑁆𑀢𑀺.

𑀲𑀼𑀯𑀡𑁆𑀡𑀫𑀺𑀕𑀚𑀸𑀢𑀓𑀁 𑀦𑀯𑀫𑀁.

𑁩𑁬𑁦. 𑀲𑀼𑀬𑁄𑀦𑀦𑁆𑀤𑀻𑀚𑀸𑀢𑀓𑀁 (𑁫-𑁧-𑁧𑁦)

𑁫𑁫. 𑀯𑀸𑀢𑀺 𑀕𑀦𑁆𑀥𑁄 𑀢𑀺𑀫𑀺𑀭𑀸𑀦𑀁, 𑀓𑀼𑀲𑀫𑀼𑀤𑁆𑀤𑁄 𑀘 [𑀯 (𑀲𑁆𑀬𑀸. 𑀧𑀻.)] 𑀖𑁄𑀲𑀯𑀸;

𑀤𑀽𑀭𑁂 𑀇𑀢𑁄 𑀲𑀼𑀬𑁄𑀦𑀦𑁆𑀤𑀻 [𑀇𑀢𑁄 𑀳𑀺 𑀲𑀼𑀲𑀦𑁆𑀤𑀻 (𑀲𑀻. 𑀲𑁆𑀬𑀸.), 𑀇𑀢𑁄𑀧𑀺 𑀲𑀼𑀲𑁆𑀲𑁄𑀦𑁆𑀤𑀻 (𑀧𑀻.)], 𑀢𑀫𑁆𑀩𑀓𑀸𑀫𑀸 𑀢𑀼𑀤𑀦𑁆𑀢𑀺 𑀫𑀁.

𑁫𑁬. 𑀓𑀣𑀁 𑀲𑀫𑀼𑀤𑁆𑀤𑀫𑀢𑀭𑀺, 𑀓𑀣𑀁 𑀅𑀤𑁆𑀤𑀓𑁆𑀔𑀺 𑀲𑁂𑀤𑀼𑀫𑀁 [𑀲𑁂𑀭𑀼𑀫𑀁 (𑀲𑀻. 𑀲𑁆𑀬𑀸. 𑀧𑀻.)];

𑀓𑀣𑀁 𑀢𑀲𑁆𑀲𑀸 𑀘 𑀢𑀼𑀬𑁆𑀳𑀜𑁆𑀘, 𑀅𑀳𑀼 𑀲𑀕𑁆𑀕 [𑀅𑀕𑁆𑀕 (𑀲𑀻. 𑀲𑁆𑀬𑀸.)] 𑀲𑀫𑀸𑀕𑀫𑁄.

𑁫𑁭. 𑀓𑀼𑀭𑀼𑀓𑀘𑁆𑀙𑀸 [𑀪𑀭𑀼𑀓𑀘𑁆𑀙𑀸 (𑀲𑀻. 𑀲𑁆𑀬𑀸. 𑀧𑀻.)] 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀫𑀓𑀭𑁂𑀳𑀺 𑀅𑀪𑀺𑀤𑀸 [𑀫𑀓𑀭𑁂𑀳𑀺𑀩𑁆𑀪𑀺𑀤𑀸 (𑀲𑀻.), 𑀫𑀓𑀭𑁂𑀳𑀺’𑀪𑀺𑀤𑀸 (𑀲𑁆𑀬𑀸.), 𑀫𑀓𑀭𑁂𑀳𑀺 𑀪𑀺𑀦𑁆𑀦𑀸 (𑀧𑀻.)] 𑀦𑀸𑀯𑀸, 𑀨𑀮𑀓𑁂𑀦𑀸𑀳𑀫𑀧𑁆𑀮𑀯𑀺𑀁.

𑁫𑁮. 𑀲𑀸 𑀫𑀁 𑀲𑀡𑁆𑀳𑁂𑀦 𑀫𑀼𑀤𑀼𑀦𑀸, 𑀦𑀺𑀘𑁆𑀘𑀁 𑀘𑀦𑁆𑀤𑀦𑀕𑀦𑁆𑀥𑀺𑀦𑀻;

𑀅𑀗𑁆𑀕𑁂𑀦 [𑀅𑀗𑁆𑀓𑁂𑀦 (𑀧𑀻. 𑀓.)] 𑀉𑀤𑁆𑀥𑀭𑀻 𑀪𑀤𑁆𑀤𑀸, 𑀫𑀸𑀢𑀸 𑀧𑀼𑀢𑁆𑀢𑀁𑀯 𑀑𑀭𑀲𑀁.

𑁫𑁯. 𑀲𑀸 𑀫𑀁 𑀅𑀦𑁆𑀦𑁂𑀦 𑀧𑀸𑀦𑁂𑀦, 𑀯𑀢𑁆𑀣𑁂𑀦 𑀲𑀬𑀦𑁂𑀦 𑀘;

𑀅𑀢𑁆𑀢𑀦𑀸𑀧𑀺 𑀘 𑀫𑀦𑁆𑀤𑀓𑁆𑀔𑀻, 𑀏𑀯𑀁 𑀢𑀫𑁆𑀩 𑀯𑀺𑀚𑀸𑀦𑀸𑀳𑀻𑀢𑀺.

𑀲𑀼𑀬𑁄𑀦𑀦𑁆𑀤𑀻𑀚𑀸𑀢𑀓𑀁 𑀤𑀲𑀫𑀁.

𑀫𑀡𑀺𑀓𑀼𑀡𑁆𑀟𑀮𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀣 𑀚𑀺𑀦𑀯𑀭𑁄 𑀳𑀭𑀺𑀢𑀁 𑀢𑀺𑀡𑀓𑁄, 𑀅𑀣 𑀪𑀺𑀦𑁆𑀦𑀧𑁆𑀮𑀯𑁄 𑀉𑀭𑀕𑁄𑀯 𑀖𑀝𑁄;

𑀤𑀭𑀺𑀬𑀸 𑀧𑀼𑀦 𑀓𑀼𑀜𑁆𑀚𑀭 𑀪𑀽𑀦𑀳𑀢𑀸, 𑀫𑀺𑀕𑀫𑀼𑀢𑁆𑀢𑀫𑀲𑀕𑁆𑀕𑀯𑀭𑁂𑀦 𑀤𑀲𑀸𑀢𑀺.

𑁨. 𑀯𑀡𑁆𑀡𑀸𑀭𑁄𑀳𑀯𑀕𑁆𑀕𑁄

𑁩𑁬𑁧. 𑀯𑀡𑁆𑀡𑀸𑀭𑁄𑀳𑀚𑀸𑀢𑀓𑀁 (𑁫-𑁨-𑁧)

𑁬𑁦. 𑀯𑀡𑁆𑀡𑀸𑀭𑁄𑀳𑁂𑀦 𑀚𑀸𑀢𑀺𑀬𑀸, 𑀩𑀮𑀦𑀺𑀓𑁆𑀓𑀫𑀦𑁂𑀦 𑀘;

𑀲𑀼𑀩𑀸𑀳𑀼 𑀦 𑀫𑀬𑀸 𑀲𑁂𑀬𑁆𑀬𑁄, 𑀲𑀼𑀤𑀸𑀞 𑀇𑀢𑀺 𑀪𑀸𑀲𑀲𑀺.