𑁩. 𑀅𑀟𑁆𑀠𑀯𑀕𑁆𑀕𑁄

𑁩𑁭𑁧. 𑀤𑀻𑀖𑀻𑀢𑀺𑀓𑁄𑀲𑀮𑀚𑀸𑀢𑀓𑀁 (𑁫-𑁩-𑁧)

𑁧𑁧𑁦. 𑀏𑀯𑀁𑀪𑀽𑀢𑀲𑁆𑀲 𑀢𑁂 𑀭𑀸𑀚, 𑀆𑀕𑀢𑀲𑁆𑀲 𑀯𑀲𑁂 [𑀯𑀲𑁄 (𑀧𑀻. 𑀓.)] 𑀫𑀫;

𑀅𑀢𑁆𑀣𑀺 𑀦𑀼 𑀓𑁄𑀘𑀺 𑀧𑀭𑀺𑀬𑀸𑀬𑁄, 𑀬𑁄 𑀢𑀁 𑀤𑀼𑀓𑁆𑀔𑀸 𑀧𑀫𑁄𑀘𑀬𑁂.

𑁧𑁧𑁧. 𑀏𑀯𑀁𑀪𑀽𑀢𑀲𑁆𑀲 𑀫𑁂 𑀢𑀸𑀢, 𑀆𑀕𑀢𑀲𑁆𑀲 𑀯𑀲𑁂 𑀢𑀯;

𑀦𑀢𑁆𑀣𑀺 𑀦𑁄 𑀓𑁄𑀘𑀺 𑀧𑀭𑀺𑀬𑀸𑀬𑁄, 𑀬𑁄 𑀫𑀁 𑀤𑀼𑀓𑁆𑀔𑀸 𑀧𑀫𑁄𑀘𑀬𑁂.

𑁧𑁧𑁨. 𑀦𑀸𑀜𑁆𑀜𑀁 𑀲𑀼𑀘𑀭𑀺𑀢𑀁 𑀭𑀸𑀚, 𑀦𑀸𑀜𑁆𑀜𑀁 𑀭𑀸𑀚 𑀲𑀼𑀪𑀸𑀲𑀺𑀢𑀁;

𑀢𑀸𑀬𑀢𑁂 𑀫𑀭𑀡𑀓𑀸𑀮𑁂, 𑀏𑀯𑀫𑁂𑀯𑀺𑀢𑀭𑀁 𑀥𑀦𑀁.

𑁧𑁧𑁩. 𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀉𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀁 𑀦 𑀲𑀫𑁆𑀫𑀢𑀺.

𑁧𑁧𑁪. 𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀦𑀼𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀽𑀧𑀲𑀫𑁆𑀫𑀢𑀺.

𑁧𑁧𑁫. 𑀦 𑀳𑀺 𑀯𑁂𑀭𑁂𑀦 𑀯𑁂𑀭𑀸𑀦𑀺, 𑀲𑀫𑁆𑀫𑀦𑁆𑀢𑀻𑀥 𑀓𑀼𑀤𑀸𑀘𑀦𑀁;

𑀅𑀯𑁂𑀭𑁂𑀦 𑀘 𑀲𑀫𑁆𑀫𑀦𑁆𑀢𑀺, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄𑀢𑀺.

𑀤𑀻𑀖𑀻𑀢𑀺𑀓𑁄𑀲𑀮𑀚𑀸𑀢𑀓𑀁 𑀧𑀞𑀫𑀁.

𑁩𑁭𑁨. 𑀫𑀺𑀕𑀧𑁄𑀢𑀓𑀚𑀸𑀢𑀓𑀁 (𑁫-𑁩-𑁨)

𑁧𑁧𑁬. 𑀅𑀕𑀸𑀭𑀸 𑀧𑀘𑁆𑀘𑀼𑀧𑁂𑀢𑀲𑁆𑀲, 𑀅𑀦𑀕𑀸𑀭𑀲𑁆𑀲 𑀢𑁂 𑀲𑀢𑁄;

𑀲𑀫𑀡𑀲𑁆𑀲 𑀦 𑀢𑀁 𑀲𑀸𑀥𑀼, 𑀬𑀁 𑀧𑁂𑀢𑀫𑀦𑀼𑀲𑁄𑀘𑀲𑀺.

𑁧𑁧𑁭. 𑀲𑀁𑀯𑀸𑀲𑁂𑀦 𑀳𑀯𑁂 𑀲𑀓𑁆𑀓, 𑀫𑀦𑀼𑀲𑁆𑀲𑀲𑁆𑀲 𑀫𑀺𑀕𑀲𑁆𑀲 𑀯𑀸;

𑀳𑀤𑀬𑁂 𑀚𑀸𑀬𑀢𑁂 𑀧𑁂𑀫𑀁, 𑀦 𑀢𑀁 𑀲𑀓𑁆𑀓𑀸 𑀅𑀲𑁄𑀘𑀺𑀢𑀼𑀁.

𑁧𑁧𑁮. 𑀫𑀢𑀁 𑀫𑀭𑀺𑀲𑁆𑀲𑀁 𑀭𑁄𑀤𑀦𑁆𑀢𑀺, 𑀬𑁂 𑀭𑀼𑀤𑀦𑁆𑀢𑀺 𑀮𑀧𑀦𑁆𑀢𑀺 𑀘;

𑀢𑀲𑁆𑀫𑀸 𑀢𑁆𑀯𑀁 𑀇𑀲𑀺 𑀫𑀸 𑀭𑁄𑀤𑀺, 𑀭𑁄𑀤𑀺𑀢𑀁 𑀫𑁄𑀖𑀫𑀸𑀳𑀼 𑀲𑀦𑁆𑀢𑁄.

𑁧𑁧𑁯. 𑀭𑁄𑀤𑀺𑀢𑁂𑀦 𑀳𑀯𑁂 𑀩𑁆𑀭𑀳𑁆𑀫𑁂, 𑀫𑀢𑁄 𑀧𑁂𑀢𑁄 𑀲𑀫𑀼𑀝𑁆𑀞𑀳𑁂;

𑀲𑀩𑁆𑀩𑁂 𑀲𑀗𑁆𑀕𑀫𑁆𑀫 𑀭𑁄𑀤𑀸𑀫, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀜𑀸𑀢𑀓𑁂.

𑁧𑁨𑁦. 𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁨𑁧. 𑀅𑀩𑁆𑀩𑀳𑀺 𑀯𑀢 𑀫𑁂 𑀲𑀮𑁆𑀮𑀁, 𑀬𑀫𑀸𑀲𑀺 𑀳𑀤𑀬𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀼𑀢𑁆𑀢𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁨𑁨. 𑀲𑁄𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀯𑀻𑀢𑀲𑁄𑀓𑁄 𑀅𑀦𑀸𑀯𑀺𑀮𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀯𑀸𑀲𑀯𑀸𑀢𑀺.

𑀫𑀺𑀕𑀧𑁄𑀢𑀓𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁩𑁭𑁩. 𑀫𑀽𑀲𑀺𑀓𑀚𑀸𑀢𑀓𑀁 (𑁫-𑁩-𑁩)

𑁧𑁨𑁩. 𑀓𑀼𑀳𑀺𑀁 𑀕𑀢𑀸 𑀓𑀢𑁆𑀣 𑀕𑀢𑀸, 𑀇𑀢𑀺 𑀮𑀸𑀮𑀧𑁆𑀧𑀢𑀻 𑀚𑀦𑁄;

𑀅𑀳𑀫𑁂𑀯𑁂𑀓𑁄 𑀚𑀸𑀦𑀸𑀫𑀺, 𑀉𑀤𑀧𑀸𑀦𑁂 𑀫𑀽𑀲𑀺𑀓𑀸 𑀳𑀢𑀸.

𑁧𑁨𑁪. 𑀬𑀜𑁆𑀘𑁂𑀢𑀁 [𑀬𑀣𑁂𑀢𑀁 (𑀧𑀻.), 𑀬𑀯𑁂𑀢𑀁 (𑀓.), 𑀬𑀫𑁂𑀢𑀁 (𑀓𑀢𑁆𑀣𑀘𑀺)] 𑀇𑀢𑀺 𑀘𑀻𑀢𑀺 𑀘, 𑀕𑀤𑁆𑀭𑀪𑁄𑀯 𑀦𑀺𑀯𑀢𑁆𑀢𑀲𑀺;

𑀉𑀤𑀧𑀸𑀦𑁂 𑀫𑀽𑀲𑀺𑀓𑀁 𑀳𑀦𑁆𑀢𑁆𑀯𑀸, 𑀬𑀯𑀁 𑀪𑀓𑁆𑀔𑁂𑀢𑀼𑀫𑀺𑀘𑁆𑀙𑀲𑀺.

𑁧𑁨𑁫. 𑀤𑀳𑀭𑁄 𑀘𑀸𑀲𑀺 𑀤𑀼𑀫𑁆𑀫𑁂𑀥, 𑀧𑀞𑀫𑀼𑀧𑁆𑀧𑀢𑁆𑀢𑀺𑀓𑁄 [𑀧𑀞𑀫𑀼𑀧𑁆𑀧𑀢𑁆𑀢𑀺𑀢𑁄 (𑀲𑀻. 𑀧𑀻.)] 𑀲𑀼𑀲𑀼;

𑀤𑀻𑀖𑀜𑁆𑀘𑁂𑀢𑀁 [𑀤𑀻𑀖𑀫𑁂𑀢𑀁 (𑀧𑀻.)] 𑀲𑀫𑀸𑀲𑀚𑁆𑀚 [𑀲𑀫𑀸𑀧𑀚𑁆𑀚 (𑀲𑁆𑀬𑀸. 𑀓.)], 𑀦 𑀢𑁂 𑀤𑀲𑁆𑀲𑀸𑀫𑀺 𑀚𑀻𑀯𑀺𑀢𑀁.

𑁧𑁨𑁬. 𑀦𑀸𑀦𑁆𑀢𑀮𑀺𑀓𑁆𑀔𑀪𑀯𑀦𑁂𑀦, 𑀦𑀸𑀗𑁆𑀕𑀧𑀼𑀢𑁆𑀢𑀧𑀺𑀦𑁂𑀦 [𑀦𑀸𑀗𑁆𑀕𑀧𑀼𑀢𑁆𑀢𑀲𑀺𑀭𑁂𑀦 (𑀲𑀻. 𑀲𑁆𑀬𑀸. 𑀧𑀻.)] 𑀯𑀸;

𑀧𑀼𑀢𑁆𑀢𑁂𑀦 𑀳𑀺 𑀧𑀢𑁆𑀣𑀬𑀺𑀢𑁄, 𑀲𑀺𑀮𑁄𑀓𑁂𑀳𑀺 𑀧𑀫𑁄𑀘𑀺𑀢𑁄.

𑁧𑁨𑁭. 𑀲𑀩𑁆𑀩𑀁 𑀲𑀼𑀢𑀫𑀥𑀻𑀬𑁂𑀣, 𑀳𑀻𑀦𑀫𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀁;

𑀲𑀩𑁆𑀩𑀲𑁆𑀲 𑀅𑀢𑁆𑀣𑀁 𑀚𑀸𑀦𑁂𑀬𑁆𑀬, 𑀦 𑀘 𑀲𑀩𑁆𑀩𑀁 𑀧𑀬𑁄𑀚𑀬𑁂;

𑀳𑁄𑀢𑀺 𑀢𑀸𑀤𑀺𑀲𑀓𑁄 𑀓𑀸𑀮𑁄, 𑀬𑀢𑁆𑀣 𑀅𑀢𑁆𑀣𑀸𑀯𑀳𑀁 𑀲𑀼𑀢𑀦𑁆𑀢𑀺.

𑀫𑀽𑀲𑀺𑀓𑀚𑀸𑀢𑀓𑀁 𑀢𑀢𑀺𑀬𑀁.

𑁩𑁭𑁪. 𑀘𑀽𑀴𑀥𑀦𑀼𑀕𑁆𑀕𑀳𑀚𑀸𑀢𑀓𑀁 (𑁫-𑁩-𑁪)

𑁧𑁨𑁮. 𑀲𑀩𑁆𑀩𑀁 𑀪𑀡𑁆𑀟𑀁 𑀲𑀫𑀸𑀤𑀸𑀬, 𑀧𑀸𑀭𑀁 𑀢𑀺𑀡𑁆𑀡𑁄𑀲𑀺 𑀩𑁆𑀭𑀸𑀳𑁆𑀫𑀡;

𑀧𑀘𑁆𑀘𑀸𑀕𑀘𑁆𑀙 𑀮𑀳𑀼𑀁 𑀔𑀺𑀧𑁆𑀧𑀁, 𑀫𑀫𑁆𑀧𑀺 𑀢𑀸𑀭𑁂𑀳𑀺 𑀤𑀸𑀦𑀺𑀢𑁄 [𑀤𑀸𑀦𑀺𑀪𑁄 (𑀲𑁆𑀬𑀸.)].

𑁧𑁨𑁯. 𑀅𑀲𑀦𑁆𑀣𑀼𑀢𑀁 𑀫𑀁 𑀘𑀺𑀭𑀲𑀦𑁆𑀣𑀼𑀢𑁂𑀦, 𑀦𑀺𑀫𑀻𑀦𑀺 𑀪𑁄𑀢𑀻 𑀅𑀤𑁆𑀥𑀼𑀯𑀁 𑀥𑀼𑀯𑁂𑀦;

𑀫𑀬𑀸𑀧𑀺 𑀪𑁄𑀢𑀻 𑀦𑀺𑀫𑀺𑀦𑁂𑀬𑁆𑀬 𑀅𑀜𑁆𑀜𑀁, 𑀇𑀢𑁄 𑀅𑀳𑀁 𑀤𑀽𑀭𑀢𑀭𑀁 𑀕𑀫𑀺𑀲𑁆𑀲𑀁.

𑁧𑁩𑁦. 𑀓𑀸𑀬𑀁 𑀏𑀴𑀕𑀮𑀸𑀕𑀼𑀫𑁆𑀩𑁂 [𑀏𑀴𑀕𑀡𑀕𑀼𑀫𑁆𑀩𑁂 (𑀓.)], 𑀓𑀭𑁄𑀢𑀺 𑀅𑀳𑀼𑀳𑀸𑀲𑀺𑀬𑀁;

𑀦𑀬𑀻𑀥 𑀦𑀘𑁆𑀘𑀕𑀻𑀢𑀁 𑀯𑀸 [𑀦𑀬𑀺𑀥 𑀦𑀘𑁆𑀘𑀁 𑀯𑀸 𑀕𑀻𑀢𑀁 𑀯𑀸 (𑀲𑀻. 𑀲𑁆𑀬𑀸. 𑀧𑀻.)], 𑀢𑀸𑀴𑀁 𑀯𑀸 𑀲𑀼𑀲𑀫𑀸𑀳𑀺𑀢𑀁;

𑀅𑀦𑀫𑁆𑀳𑀺𑀓𑀸𑀮𑁂 [𑀅𑀦𑀫𑁆𑀳𑀓𑀸𑀮𑁂 (𑀧𑀻.)] 𑀲𑀼𑀲𑁄𑀡𑀺 [𑀲𑀼𑀲𑁆𑀲𑁄𑀡𑀺 (𑀲𑀻. 𑀲𑁆𑀬𑀸. 𑀧𑀻.)], 𑀓𑀺𑀁 𑀦𑀼 𑀚𑀕𑁆𑀖𑀲𑀺 𑀲𑁄𑀪𑀦𑁂 [𑀲𑁄𑀪𑀡𑁂 (𑀧𑀻. 𑀓.)].

𑁧𑁩𑁧. 𑀲𑀺𑀗𑁆𑀕𑀸𑀮 𑀩𑀸𑀮 𑀤𑀼𑀫𑁆𑀫𑁂𑀥, 𑀅𑀧𑁆𑀧𑀧𑀜𑁆𑀜𑁄𑀲𑀺 𑀚𑀫𑁆𑀩𑀼𑀓;

𑀚𑀻𑀦𑁄 𑀫𑀘𑁆𑀙𑀜𑁆𑀘 𑀧𑁂𑀲𑀺𑀜𑁆𑀘, 𑀓𑀧𑀡𑁄 𑀯𑀺𑀬 𑀛𑀸𑀬𑀲𑀺.

𑁧𑁩𑁨. 𑀲𑀼𑀤𑀲𑁆𑀲𑀁 𑀯𑀚𑁆𑀚𑀫𑀜𑁆𑀜𑁂𑀲𑀁, 𑀅𑀢𑁆𑀢𑀦𑁄 𑀧𑀦 𑀤𑀼𑀤𑁆𑀤𑀲𑀁;

𑀚𑀻𑀦𑀸 𑀧𑀢𑀺𑀜𑁆𑀘 𑀚𑀸𑀭𑀜𑁆𑀘, 𑀫𑀜𑁆𑀜𑁂 𑀢𑁆𑀯𑀜𑁆𑀜𑁂𑀯 [𑀫𑀫𑁆𑀧𑀺 𑀢𑁆𑀯𑀜𑁆𑀜𑁂𑀯 (𑀲𑀻. 𑀲𑁆𑀬𑀸.), 𑀢𑁆𑀯𑀫𑁆𑀧𑀺 𑀫𑀜𑁆𑀜𑁂𑀯 (𑀧𑀻.)] 𑀛𑀸𑀬𑀲𑀺.

𑁧𑁩𑁩. 𑀏𑀯𑀫𑁂𑀢𑀁 𑀫𑀺𑀕𑀭𑀸𑀚, 𑀬𑀣𑀸 𑀪𑀸𑀲𑀲𑀺 𑀚𑀫𑁆𑀩𑀼𑀓;

𑀲𑀸 𑀦𑀽𑀦𑀸𑀳𑀁 𑀇𑀢𑁄 𑀕𑀦𑁆𑀢𑁆𑀯𑀸, 𑀪𑀢𑁆𑀢𑀼 𑀳𑁂𑀲𑁆𑀲𑀁 𑀯𑀲𑀸𑀦𑀼𑀕𑀸.

𑁧𑁩𑁪. 𑀬𑁄 𑀳𑀭𑁂 𑀫𑀢𑁆𑀢𑀺𑀓𑀁 𑀣𑀸𑀮𑀁, 𑀓𑀁𑀲𑀣𑀸𑀮𑀫𑁆𑀧𑀺 𑀲𑁄 𑀳𑀭𑁂;

𑀓𑀢𑀜𑁆𑀘𑁂𑀯 [𑀓𑀢𑀁𑀬𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀢𑀬𑀸 𑀧𑀸𑀧𑀁, 𑀧𑀼𑀦𑀧𑁂𑀯𑀁 𑀓𑀭𑀺𑀲𑁆𑀲𑀲𑀻𑀢𑀺.

𑀘𑀽𑀴𑀥𑀦𑀼𑀕𑁆𑀕𑀳𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁩𑁭𑁫. 𑀓𑀧𑁄𑀢𑀚𑀸𑀢𑀓𑀁 (𑁫-𑁩-𑁫)

𑁧𑁩𑁫. 𑀇𑀤𑀸𑀦𑀺 𑀔𑁄𑀫𑁆𑀳𑀺 𑀲𑀼𑀔𑀺𑀢𑁄 𑀅𑀭𑁄𑀕𑁄, 𑀦𑀺𑀓𑁆𑀓𑀡𑁆𑀝𑀓𑁄 𑀦𑀺𑀧𑁆𑀧𑀢𑀺𑀢𑁄 𑀓𑀧𑁄𑀢𑁄;

𑀓𑀸𑀳𑀸𑀫𑀺 𑀤𑀸𑀦𑀻 𑀳𑀤𑀬𑀲𑁆𑀲 𑀢𑀼𑀝𑁆𑀞𑀺𑀁, 𑀢𑀣𑀸𑀳𑀺𑀫𑀁 𑀫𑀁𑀲𑀲𑀸𑀓𑀁 𑀩𑀮𑁂𑀢𑀺.

𑁧𑁩𑁬. 𑀓𑀸𑀬𑀁 𑀩𑀮𑀸𑀓𑀸 𑀲𑀺𑀔𑀺𑀦𑁄, 𑀘𑁄𑀭𑀻 𑀮𑀗𑁆𑀖𑀺𑀧𑀺𑀢𑀸𑀫𑀳𑀸;

𑀑𑀭𑀁 𑀩𑀮𑀸𑀓𑁂 𑀆𑀕𑀘𑁆𑀙, 𑀘𑀡𑁆𑀟𑁄 𑀫𑁂 𑀯𑀸𑀬𑀲𑁄 𑀲𑀔𑀸.

𑁧𑁩𑁭. 𑀅𑀮𑀜𑁆𑀳𑀺 𑀢𑁂 𑀚𑀕𑁆𑀖𑀺𑀢𑀸𑀬𑁂, 𑀫𑀫𑀁 𑀤𑀺𑀲𑁆𑀯𑀸𑀦 𑀏𑀤𑀺𑀲𑀁;

𑀯𑀺𑀮𑀽𑀦𑀁 𑀲𑀽𑀤𑀧𑀼𑀢𑁆𑀢𑁂𑀦, 𑀧𑀺𑀝𑁆𑀞𑀫𑀡𑁆𑀟𑁂𑀦 [𑀧𑀺𑀝𑁆𑀞𑀫𑀤𑁆𑀤𑁂𑀦 (𑀲𑀻. 𑀲𑁆𑀬𑀸. 𑀧𑀻.)] 𑀫𑀓𑁆𑀔𑀺𑀢𑀁.

𑁧𑁩𑁮. 𑀲𑀼𑀦𑁆𑀳𑀸𑀢𑁄 𑀲𑀼𑀯𑀺𑀮𑀺𑀢𑁆𑀢𑁄𑀲𑀺, 𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑀺𑀢𑁄;

𑀓𑀡𑁆𑀞𑁂 𑀘 𑀢𑁂 𑀯𑁂𑀴𑀼𑀭𑀺𑀬𑁄, 𑀅𑀕𑀫𑀸 𑀦𑀼 𑀓𑀚𑀗𑁆𑀕𑀮𑀁.

𑁧𑁩𑁯. 𑀫𑀸 𑀢𑁂 𑀫𑀺𑀢𑁆𑀢𑁄 𑀅𑀫𑀺𑀢𑁆𑀢𑁄 𑀯𑀸, 𑀅𑀕𑀫𑀸𑀲𑀺 𑀓𑀚𑀗𑁆𑀕𑀮𑀁;

𑀧𑀺𑀜𑁆𑀙𑀸𑀦𑀺 𑀢𑀢𑁆𑀣 𑀮𑀸𑀬𑀺𑀢𑁆𑀯𑀸, 𑀓𑀡𑁆𑀞𑁂 𑀩𑀦𑁆𑀥𑀦𑁆𑀢𑀺 𑀯𑀝𑁆𑀝𑀦𑀁.

𑁧𑁪𑁦. 𑀧𑀼𑀦𑀧𑀸𑀧𑀚𑁆𑀚𑀲𑀻 𑀲𑀫𑁆𑀫, 𑀲𑀻𑀮𑀜𑁆𑀳𑀺 𑀢𑀯 𑀢𑀸𑀤𑀺𑀲𑀁;

𑀦 𑀳𑀺 𑀫𑀸𑀦𑀼𑀲𑀓𑀸 𑀪𑁄𑀕𑀸, 𑀲𑀼𑀪𑀼𑀜𑁆𑀚𑀸 𑀳𑁄𑀦𑁆𑀢𑀺 𑀧𑀓𑁆𑀔𑀺𑀦𑀸𑀢𑀺.

𑀓𑀧𑁄𑀢𑀚𑀸𑀢𑀓𑀁 𑀧𑀜𑁆𑀘𑀫𑀁.

𑀅𑀟𑁆𑀠𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀣 𑀯𑀡𑁆𑀡 𑀲𑀲𑀻𑀮 𑀳𑀺𑀭𑀺 𑀮𑀪𑀢𑁂, 𑀲𑀼𑀫𑀼𑀔𑀸 𑀯𑀺𑀲 𑀲𑀸𑀴𑀺𑀬𑀫𑀺𑀢𑁆𑀢𑀯𑀭𑁄;

𑀅𑀣 𑀘𑀓𑁆𑀓 𑀧𑀮𑀸𑀲 𑀲𑀭𑀸𑀚 𑀲𑀢𑁄, 𑀬𑀯 𑀩𑀸𑀮 𑀓𑀧𑁄𑀢𑀓 𑀧𑀦𑁆𑀦𑀭𑀲𑀸𑀢𑀺.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀚𑀻𑀦𑀜𑁆𑀘 𑀯𑀡𑁆𑀡𑀁 𑀅𑀲𑀫𑀁𑀯𑀕𑀼𑀧𑁆𑀧𑀭𑀺, 𑀲𑀼𑀤𑁂𑀲𑀺𑀢𑀸 𑀚𑀸𑀢𑀓𑀦𑁆𑀢𑀺 𑀲𑀦𑁆𑀢𑀺 𑀯𑀻𑀲𑀢𑀺 [𑀚𑀸𑀢𑀓 𑀧𑀜𑁆𑀘𑀯𑀻𑀲𑀢𑀺 (?)];

𑀫𑀳𑁂𑀲𑀺𑀦𑁄 𑀩𑁆𑀭𑀳𑁆𑀫𑀘𑀭𑀺𑀢𑁆𑀢𑀫𑀼𑀢𑁆𑀢-𑀫𑀯𑁄𑀘 𑀕𑀸𑀣𑀸 𑀅𑀢𑁆𑀣𑀯𑀢𑀻 𑀲𑀼𑀩𑁆𑀬𑀜𑁆𑀚𑀦𑀸𑀢𑀺.

𑀧𑀜𑁆𑀘𑀓𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.