𑁩𑁬𑁨. 𑀲𑀻𑀮𑀯𑀻𑀫𑀁𑀲𑀚𑀸𑀢𑀓𑀁 (𑁫-𑁨-𑁨)

𑁬𑁫. 𑀲𑀻𑀮𑀁 𑀲𑁂𑀬𑁆𑀬𑁄 𑀲𑀼𑀢𑀁 𑀲𑁂𑀬𑁆𑀬𑁄, 𑀇𑀢𑀺 𑀫𑁂 𑀲𑀁𑀲𑀬𑁄 𑀅𑀳𑀼;

𑀲𑀻𑀮𑀫𑁂𑀯 𑀲𑀼𑀢𑀸 𑀲𑁂𑀬𑁆𑀬𑁄, 𑀇𑀢𑀺 𑀫𑁂 𑀦𑀢𑁆𑀣𑀺 𑀲𑀁𑀲𑀬𑁄.

𑁬𑁬. 𑀫𑁄𑀖𑀸 𑀚𑀸𑀢𑀺 𑀘 𑀯𑀡𑁆𑀡𑁄 𑀘, 𑀲𑀻𑀮𑀫𑁂𑀯 𑀓𑀺𑀭𑀼𑀢𑁆𑀢𑀫𑀁;

𑀲𑀻𑀮𑁂𑀦 𑀅𑀦𑀼𑀧𑁂𑀢𑀲𑁆𑀲, 𑀲𑀼𑀢𑁂𑀦𑀢𑁆𑀣𑁄 𑀦 𑀯𑀺𑀚𑁆𑀚𑀢𑀺.

𑁬𑁭. 𑀔𑀢𑁆𑀢𑀺𑀬𑁄 𑀘 𑀅𑀥𑀫𑁆𑀫𑀝𑁆𑀞𑁄, 𑀯𑁂𑀲𑁆𑀲𑁄 𑀘𑀸𑀥𑀫𑁆𑀫𑀦𑀺𑀲𑁆𑀲𑀺𑀢𑁄;

𑀢𑁂 𑀧𑀭𑀺𑀘𑁆𑀘𑀚𑁆𑀚𑀼𑀪𑁄 𑀮𑁄𑀓𑁂, 𑀉𑀧𑀧𑀚𑁆𑀚𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑁬𑁮. 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀪𑀯𑀦𑁆𑀢𑀺 𑀢𑀺𑀤𑀺𑀯𑁂 𑀲𑀫𑀸.

𑁬𑁯. 𑀦 𑀯𑁂𑀤𑀸 𑀲𑀫𑁆𑀧𑀭𑀸𑀬𑀸𑀬, 𑀦 𑀚𑀸𑀢𑀺 𑀦𑀸𑀧𑀺 [𑀦𑁄𑀧𑀺 (𑀧𑀻.)] 𑀩𑀦𑁆𑀥𑀯𑀸;

𑀲𑀓𑀜𑁆𑀘 𑀲𑀻𑀮𑀁 𑀲𑀁𑀲𑀼𑀤𑁆𑀥𑀁, 𑀲𑀫𑁆𑀧𑀭𑀸𑀬𑀸𑀬 𑀲𑀼𑀔𑀸𑀬 𑀘𑀸𑀢𑀺 [𑀲𑀼𑀔𑀸𑀯𑀳𑀦𑁆𑀢𑀺 (𑀲𑀻. 𑀲𑁆𑀬𑀸.)].

𑀲𑀻𑀮𑀯𑀻𑀫𑀁𑀲𑀚𑀸𑀢𑀓𑀁 𑀤𑀼𑀢𑀺𑀬𑀁.