𑁩𑁬𑁧. 𑀯𑀡𑁆𑀡𑀸𑀭𑁄𑀳𑀚𑀸𑀢𑀓𑀁 (𑁫-𑁨-𑁧)

𑁬𑁦. 𑀯𑀡𑁆𑀡𑀸𑀭𑁄𑀳𑁂𑀦 𑀚𑀸𑀢𑀺𑀬𑀸, 𑀩𑀮𑀦𑀺𑀓𑁆𑀓𑀫𑀦𑁂𑀦 𑀘;

𑀲𑀼𑀩𑀸𑀳𑀼 𑀦 𑀫𑀬𑀸 𑀲𑁂𑀬𑁆𑀬𑁄, 𑀲𑀼𑀤𑀸𑀞 𑀇𑀢𑀺 𑀪𑀸𑀲𑀲𑀺.

𑁬𑁧. 𑀯𑀡𑁆𑀡𑀸𑀭𑁄𑀳𑁂𑀦 𑀚𑀸𑀢𑀺𑀬𑀸, 𑀩𑀮𑀦𑀺𑀓𑁆𑀓𑀫𑀦𑁂𑀦 𑀘;

𑀲𑀼𑀤𑀸𑀞𑁄 𑀦 𑀫𑀬𑀸 𑀲𑁂𑀬𑁆𑀬𑁄, 𑀲𑀼𑀩𑀸𑀳𑀼 𑀇𑀢𑀺 𑀪𑀸𑀲𑀲𑀺.

𑁬𑁨. 𑀏𑀯𑀁 𑀘𑁂 𑀫𑀁 𑀯𑀺𑀳𑀭𑀦𑁆𑀢𑀁, 𑀲𑀼𑀩𑀸𑀳𑀼 𑀲𑀫𑁆𑀫 𑀤𑀼𑀩𑁆𑀪𑀲𑀺;

𑀦 𑀤𑀸𑀦𑀸𑀳𑀁 𑀢𑀬𑀸 𑀲𑀤𑁆𑀥𑀺𑀁, 𑀲𑀁𑀯𑀸𑀲𑀫𑀪𑀺𑀭𑁄𑀘𑀬𑁂.

𑁬𑁩. 𑀬𑁄 𑀧𑀭𑁂𑀲𑀁 𑀯𑀘𑀦𑀸𑀦𑀺, 𑀲𑀤𑁆𑀤𑀳𑁂𑀬𑁆𑀬 [𑀲𑀤𑁆𑀤𑀳𑁂𑀣 (𑀲𑀻. 𑀲𑁆𑀬𑀸. 𑀧𑀻.)] 𑀬𑀣𑀸𑀢𑀣𑀁;

𑀔𑀺𑀧𑁆𑀧𑀁 𑀪𑀺𑀚𑁆𑀚𑁂𑀣 𑀫𑀺𑀢𑁆𑀢𑀲𑁆𑀫𑀺𑀁, 𑀯𑁂𑀭𑀜𑁆𑀘 𑀧𑀲𑀯𑁂 𑀩𑀳𑀼𑀁.

𑁬𑁪. 𑀦 𑀲𑁄 𑀫𑀺𑀢𑁆𑀢𑁄 𑀬𑁄 𑀲𑀤𑀸 𑀅𑀧𑁆𑀧𑀫𑀢𑁆𑀢𑁄, 𑀪𑁂𑀤𑀸𑀲𑀗𑁆𑀓𑀻 𑀭𑀦𑁆𑀥𑀫𑁂𑀯𑀸𑀦𑀼𑀧𑀲𑁆𑀲𑀻;

𑀬𑀲𑁆𑀫𑀺𑀜𑁆𑀘 𑀲𑁂𑀢𑀻 𑀉𑀭𑀲𑀻𑀯 𑀧𑀼𑀢𑁆𑀢𑁄, 𑀲 𑀯𑁂 𑀫𑀺𑀢𑁆𑀢𑁄 𑀬𑁄 𑀅𑀪𑁂𑀚𑁆𑀚𑁄 𑀧𑀭𑁂𑀳𑀻𑀢𑀺.

𑀯𑀡𑁆𑀡𑀸𑀭𑁄𑀳𑀚𑀸𑀢𑀓𑀁 𑀧𑀞𑀫𑀁.