অকুসলকম্মপথকথাৰণ্ণনা

সরসেন অত্তনো সভাৰেন. যায চেতনায পৰত্তমানস্স জীৰিতিন্দ্রিযস্স পচ্চযভূতেসু মহাভূতেসু উপক্কমকরণহেতু তংমহাভূতপচ্চযা উপ্পজ্জনকমহাভূতা নুপ্পজ্জিস্সন্তি, সা তাদিসপযোগসমুট্ঠাপিকা চেতনা পাণাতিপাতো নাম. লদ্ধুপক্কমানি হি ভূতানি ন পুরিমভূতানি ৰিয ৰিসদানীতি সমানজাতিযানং ভূতানং কারণং ন হোন্তীতি. একস্সপি পযোগস্স সহসা নিপ্ফাদনৰসেন কিচ্চসাধিকায বহুক্খত্তুং পৰত্তজৰনেহি লদ্ধাসেৰনায চ সন্নিট্ঠাপকচেতনায ৰসেন পযোগস্স মহন্তভাৰো. সতিপি কদাচি খুদ্দকে চেৰ মহন্তে চ পাণে পযোগস্স সমভাৰে মহন্তং হনন্তস্স চেতনা তিব্বতরা উপ্পজ্জতীতি ৰত্থুস্স মহন্তভাৰোতি তদুভযং চেতনায বলৰভাৰেনেৰ হোতীতি আহ ‘‘পযোগ…পে… ভাৰতো’’তি. যথাৰুত্তপচ্চযৰিপরিযাযেপীতি পযোগৰত্থুআদিপচ্চযানং অমহত্তেপি. তংতংপচ্চযেহীতি গুণৰন্ততাদিপচ্চযেহি. এত্থ চ হন্তব্বস্স গুণৰন্ততায মহাসাৰজ্জতা ৰত্থুমহন্ততায ৰিয দট্ঠব্বা. কিলেসানং উপক্কমানং দ্ৰিন্নঞ্চ মুদুতায তিব্বতায চ অপ্পসাৰজ্জতা মহাসাৰজ্জতা চ যোজেতব্বা. পাণো পাণসঞ্ঞিতা ৰধকচিত্তঞ্চ পুব্বভাগসম্ভারা, উপক্কমো ৰধকচেতনাসমুট্ঠাপিতো, পঞ্চসম্ভারৰতী পাণাতিপাতচেতনাতি সা পঞ্চসম্ভারৰিনিমুত্তা দট্ঠব্বা. এস নযো অদিন্নাদানাদীসুপি.

মন্তপরিজপ্পনেন পরস্স সন্তকহরণং ৰিজ্জামযো, ৰিনা মন্তেন পরসন্তকস্স কাযৰচীপযোগেহি আকড্ঢনং তাদিসইদ্ধিযোগেন ইদ্ধিমযো পযোগোতি অদিন্নাদানস্সপি ছ পযোগা সাহত্থিকাদযো ৰেদিতব্বা.

অভিভৰিত্ৰা ৰীতিক্কমনে মিচ্ছাচারো মহাসাৰজ্জো, ন তথা উভিন্নং সমানচ্ছন্দভাৰে. ‘‘চত্তারো সম্ভারাতি ৰুত্তত্তা অভিভৰিত্ৰা ৰীতিক্কমনে সতিপি মগ্গেনমগ্গপটিপত্তিঅধিৰাসনে পুরিমুপ্পন্নসেৰনাভিসন্ধিপযোগাভাৰতো মিচ্ছাচারো ন হোতি অভিভুয্যমানস্সা’’তি ৰদন্তি. সেৰনচিত্তে সতি পযোগাভাৰো ন পমাণং ইত্থিযা সেৰনপ্পযোগস্স যেভুয্যেন অভাৰতো. পুরিসস্সেৰ হি যেভুয্যেন সেৰনপ্পযোগো হোতীতি ইত্থিযা পুরেতরং সেৰনচিত্তং উপট্ঠাপেত্ৰা নিপন্নাযপি মিচ্ছাচারো ন সিযাতি আপজ্জতি, তস্মা পুরিসস্স ৰসেন উক্কংসতো চত্তারো সম্ভারা ৰুত্তাতি দট্ঠব্বং. অঞ্ঞথা ইত্থিযা পুরিসকিচ্চকরণকালে পুরিসস্সপি সেৰনপ্পযোগাভাৰতো মিচ্ছাচারো ন সিযাতি. কেচি পন ‘‘অত্তনো রুচিযা পৰত্তিতস্স তীণি অঙ্গানি, বলক্কারেন পৰত্তিতস্স তীণীতি সব্বানি অগ্গহিতগ্গহণেন চত্তারী’’তি ৰদন্তি, ৰীমংসিত্ৰা গহেতব্বং.

দুট্ঠচিত্তস্স অমরণাধিপ্পাযস্স ফরুসকাযৰচীপযোগসমুট্ঠাপিকা ফরুসচেতনা ফরুসৰাচা. মরণাধিপ্পাযে পন সতি অত্থসিদ্ধিতদভাৰেসু পাণাতিপাতা ব্যাপাদা চ হোন্তীতি. যং পতি ফরুসৰাচা পযুজ্জতি, তস্স সম্মুখাৰ সীসং এতি. ‘‘পরম্মুখেপি ফরুসৰাচা হোতী’’তি ৰদন্তি.

যদি চেতনায সব্বদা কম্মপথভাৰাভাৰতো অনিযতো কম্মপথভাৰোতি কম্মপথরাসিম্হি অৰচনং, ননু অভিজ্ঝাদীনম্পি কম্মপথং অপ্পত্তানং অত্থিতায অনিযতো কম্মপথভাৰোতি তেসম্পি কম্মপথরাসিযং অৰচনং আপজ্জতীতি? নাপজ্জতি, কম্মপথতাতংসভাগতাহি তেসং তত্থ ৰুত্তত্তা. যদি এৰং চেতনাপি তত্থ ৰত্তব্বা সিযাতি? সচ্চমেতং, সা পন পাণাতিপাতাদিকাতি পাকটো তস্সা কম্মপথভাৰোতি ন ৰুত্তং সিযা. চেতনায হি ‘‘চেতনাহং, ভিক্খৰে, কম্মং ৰদামি,’’‘‘তিৰিধা, ভিক্খৰে, কাযসঞ্চেতনা অকুসলং কাযকম্ম’’ন্তিআদিৰচনেহি কম্মভাৰো দীপিতো. কম্মংযেৰ চ সুগতিদুগ্গতীনং তদুপ্পজ্জনসুখদুক্খানঞ্চ পথভাৰেন পৰত্তং কম্মপথোতি ৰুচ্চতীতি পাকটো তস্সা কম্মপথভাৰো. অভিজ্ঝাদীনং পন চেতনাসমীহনভাৰেন সুচরিতদুচ্চরিতভাৰো, চেতনাজনিততংবন্ধতিভাৰেন সুগতিদুগ্গতিতদুপ্পজ্জনসুখদুক্খানং পথভাৰো চাতি ন তথা পাকটো কম্মপথভাৰোতি তে এৰ কম্মপথরাসিভাৰেন ৰুত্তা. অতথাজাতিযত্তা ৰা চেতনা তেহি সদ্ধিং ন ৰুত্তা সিযা. ৰিচারেত্ৰা গহেতব্বং.

পাণাতিপাতাদীনং আরম্মণানেৰ তব্বিরতিআরম্মণানীতি পঞ্চ সিক্খাপদা পরিত্তারম্মণা এৰাতি ৰচনেন অদিন্নাদানাদীনং সত্তারম্মণতাৰচনস্স ৰিরোধং চোদেতি. তথা হি ৰক্খতি ‘‘ৰীতিক্কমিতব্বতোযেৰ হি ৰেরমণী নাম হোতী’’তি. সযমেৰ পরিহরিস্সতীতি সিক্খাপদৰিভঙ্গে পঞ্হপুচ্ছকৰণ্ণনং সন্ধায ৰদতি. তত্থ হি ‘‘যস্মা সত্তোতি সঙ্খ্যং গতে সঙ্খারেযেৰ আরম্মণং করোতি, তস্মা পরিত্তারম্মণাতি ৰুচ্চন্তী’’তি ৰুত্তং.

দুগ্গততাদীনীতি আদি-সদ্দেন ‘‘অলদ্ধালাভো লদ্ধৰিনাসো ইচ্ছিতানং ভোগানং কিচ্ছপটিলাভো রাজাদীহি সাধারণভোগতা দুক্খৰিহারো সাসঙ্কৰিহারো’’তি এৰমাদযো সঙ্গহিতা. কেচি পন ‘‘দিট্ঠেৰ ধম্মে ভোগজানিআদযো নিস্সন্দফল’’ন্তি ৰদন্তি.