অন্তরপেয্যালং

কতিপুচ্ছাৰারৰণ্ণনা

২৭১. কতি আপত্তিযোতি পারাজিকাদীসু পঞ্চসু আপত্তীসু মেথুনাদিন্নাদানাদিঅন্তোগধভেদং অপেক্খিত্ৰা জাতিৰসেন একত্তং আরোপেত্ৰা পুচ্ছা কতা. কতি আপত্তিক্খন্ধাতি অন্তোগধভেদং অপেক্খিত্ৰা পচ্চেকং রাসট্ঠেনাতি এত্তকমেৰেত্থ ভেদো. ৰিনীতানিযেৰ ৰিনীতৰত্থূনীতি আপত্তিতো ৰিরমণানি এৰ অৰিপ্পটিসারপামোজ্জাদিধম্মানং কারণত্তা ৰত্থূনীতি ৰিনীতৰত্থূনি, তানি এত্থ অত্থতো ৰিরতিআদিঅনৰজ্জধম্মা এৰ. ৰেরং মণতীতি ৰেরহেতুত্তা ‘‘ৰের’’ন্তি লদ্ধনামং রাগাদিঅকুসলপক্খং ৰিনাসেতি.

ধম্মস্সৰনগ্গং ভিন্দিত্ৰা গচ্ছতীতি বহূসু একতো নিসীদিত্ৰা ধম্মং সুণন্তেসু তং ধম্মস্সৰনসমাগমং কোপেত্ৰা উট্ঠায গচ্ছতি. অনাদরোৰাতি তুস্সিতব্বট্ঠানে তুট্ঠিং, সংৰিজিতব্বট্ঠানে সংৰেগঞ্চ অপৰেদেন্তো এৰ. কাযপাগব্ভিযন্তি উন্নতিৰসেন পৰত্তনকাযানাচারং.

২৭৪. মেত্তায সম্ভূতং মেত্তং, কাযকম্মং. উভযেহিপীতি নৰকেহি, থেরেহি চ. পিযং করোতীতি তং পুগ্গলং পেমট্ঠানং করোতি, কেসন্তি আহ ‘‘সব্রহ্মচারীন’’ন্তি.

পুগ্গলং পটিৰিভজিত্ৰা ভুঞ্জতীতি পকতেন সম্বন্ধো. তমেৰ পুগ্গলপটিৰিভাগং দস্সেতুং ‘‘অসুকস্সা’’তিআদি ৰুত্তং.

ভুজিস্সভাৰকরণতোতি তণ্হাদাসব্যতো মোচেত্ৰা সমথৰিপস্সনাসু সেরিৰিহারিতাকরণতোতি অত্থো. নিয্যাতীতি পৰত্ততি. সম্মাদুক্খক্খযায সংৰত্ততীতি অত্থো.

কতিপুচ্ছাৰারৰণ্ণনা নিট্ঠিতা.

ছআপত্তিসমুট্ঠানৰারৰণ্ণনা

২৭৬. পঠমেন আপত্তিসমুট্ঠানেনাতি কেৰলং কাযেন. পারাজিকাপত্তিযা একন্তসচিত্তকসমুট্ঠানত্তা ‘‘ন হীতি ৰত্তব্ব’’ন্তি ৰুত্তং. সঙ্ঘাদিসেসাদীনং দুক্কটপরিযোসানানং পঞ্চন্নং অচিত্তকানম্পি সম্ভৰতো ‘‘সিযা’’তি ৰুত্তং, আপজ্জনং সিযা ভৰেয্যাতি অত্থো. হীনুক্কট্ঠেহি জাতিআদীহি ওমসনে এৰ দুব্ভাসিতস্স পঞ্ঞত্তত্তা সা একন্তৰাচাচিত্তসমুট্ঠানা এৰাতি.

দুতিযসমুট্ঠাননযে ৰাচায এৰ সমাপজ্জিতব্বপাটিদেসনীযস্স অভাৰা ‘‘ন হী’’তি ৰুত্তং.

ততিযে পন ৰোসাসমানরূপং ভিক্খুনিং কাযৰাচাহি অনপসাদনপচ্চযা পাটিদেসনীযসম্ভৰতো ‘‘সিযা’’তি ৰুত্তং.

ওমসনে পাচিত্তিযস্স অদিন্নাদানসমুট্ঠানত্তেপি তপ্পচ্চযা পঞ্ঞত্তস্স দুব্ভাসিতস্স পঞ্চমেনেৰ সমুপ্পত্তীতি দস্সেতুং চতুত্থৰারে ‘‘দুব্ভাসিতং আপজ্জেয্যাতি ন হীতি ৰত্তব্ব’’ন্তি ৰত্ৰা পঞ্চমৰারে ‘‘সিযাতি ৰত্তব্ব’’ন্তি ৰুত্তং. কাযৰিকারেনেৰ ওমসন্তস্স পনেত্থ দুব্ভাসিতভাৰেপি কাযকীল়াভাৰাভাৰতো দুক্কটমেৰাতি দট্ঠব্বং.

ছট্ঠৰারে পন ৰিজ্জমানোপি কাযো দুব্ভাসিতস্স অঙ্গং ন হোতি, পঞ্চমসমুট্ঠানে এৰ ছট্ঠম্পি পৰিসতীতি দস্সেতুং ‘‘ন হী’’তি পটিক্খিত্তং, ন পন তত্থ সব্বথা দুব্ভাসিতেন অনাপত্তীতি দস্সেতুং. ন হি দৰকম্যতায কাযৰাচাহি ওমসন্তস্স দুব্ভাসিতাপত্তি ন সম্ভৰতি. যঞ্হি পঞ্চমেনেৰ সমাপজ্জতি, তং ছট্ঠেনপি সমাপজ্জতি এৰ ধম্মদেসনাপত্তি ৰিযাতি গহেতব্বং. সেসং সমুট্ঠানৰারে সুৰিঞ্ঞেয্যমেৰ.

ছআপত্তিসমুট্ঠানৰারৰণ্ণনা নিট্ঠিতা.

কতাপত্তিৰারৰণ্ণনা

২৭৭. দুতিযে পন কতিৰারে পঠমসমুট্ঠানেন আপজ্জিতব্বানং আপত্তীনং লহুদস্সনসুখত্থং কুটিকারাদীনি এৰ সমুদ্ধটানি, ন অঞ্ঞেসং অভাৰা, সঞ্চরিত্তাদীনম্পি ৰিজ্জমানত্তা. এৰং দুতিযসমুট্ঠানাদীসুপি. ‘‘কপ্পিযসঞ্ঞী’’তি ইমিনা অচিত্তকত্তং দস্সেতি. ‘‘কুটিং করোতী’’তি ইমিনা ৰচীপযোগাভাৰং. উভযেনাপি কেৰলং কাযেনেৰ দুক্কটাদীনং সম্ভৰং দস্সেতি. এৰং উপরিপি যথানুরূপং কাতব্বং.

‘‘একেন সমুট্ঠানেন সমুট্ঠহন্তী’’তি ইদং ইধ ৰিসেসেত্ৰা দস্সিতানং কাযতোৰ সমুট্ঠিতানং ৰসেন ৰুত্তং, অৰিসেসতো পন তা আপত্তিযো ইতরসমুট্ঠানেহিপি যথারহং সমুট্ঠহন্তি এৰ. এৰং উপরিপি.

‘‘তিণৰত্থারকেন চা’’তি ইদং সঙ্ঘাদিসেসৰজ্জিতানং চতুন্নং আপত্তীনং ৰসেন ৰুত্তং.

২৭৯. সংৰিদহিত্ৰা কুটিং করোতীতি ৰাচায সংৰিদহতি, সযঞ্চ কাযেন করোতীতি অত্থো.

কতাপত্তিৰারৰণ্ণনা নিট্ঠিতা.

আপত্তিসমুট্ঠানগাথাৰণ্ণনা

২৮৩. ততিযো পন গাথাৰারো দুতিযৰারেন ৰুত্তমেৰত্থং সঙ্গহেত্ৰা দস্সেতুং ৰুত্তো. তত্থ কাযোৰ কাযিকোতি ৰত্তব্বে ৰচনৰিপল্লাসেন ‘‘কাযিকা’’তি ৰুত্তং. তেনাহ ‘‘তেন সমুট্ঠিতা’’তি, কাযো সমুট্ঠানং অক্খাতোতি অত্থো.

ৰিৰেকদস্সিনাতি সব্বসঙ্খতৰিৰিত্তত্তা, ততো ৰিৰিত্তহেতুত্তা চ নীৰরণৰিৰেকঞ্চ নিব্বানঞ্চ দস্সনসীলেন. ৰিভঙ্গকোৰিদাতি উভতোৰিভঙ্গকুসলাতি আলপনং. ইধ পনেৰং অঞ্ঞো পুচ্ছন্তো নাম নত্থি, উপালিত্থেরো সযমেৰ অত্থং পাকটং কাতুং পুচ্ছাৰিসজ্জনঞ্চ অকাসীতি ইমিনা নযেন সব্বত্থ অত্থো ৰেদিতব্বো.

আপত্তিসমুট্ঠানগাথাৰণ্ণনা নিট্ঠিতা.

ৰিপত্তিপচ্চযৰারৰণ্ণনা

২৮৪. চতুত্থে পন ৰিপত্তিপচ্চযৰারে সীলৰিপত্তিপচ্চযাতি সীলৰিপত্তিপঅচ্ছাদনপচ্চযা.

২৮৬. দিট্ঠিৰিপত্তিপচ্চযাতি দিট্ঠিৰিপত্তিযা অপ্পটিনিস্সজ্জনপচ্চযা.

২৮৭. আজীৰৰিপত্তিপচ্চযাতি এত্থ আগম্ম জীৰন্তি এতেনাতি আজীৰো, চতুপচ্চযো, সোৰ মিচ্ছাপত্তিযা ৰিপন্নত্তা ৰিপত্তীতি আজীৰৰিপত্তি, তস্সা আজীৰৰিপত্তিযা হেতু, তদুপ্পাদনতপরিভোগনিমিত্তন্তি অত্থো.

ৰিপত্তিপচ্চযৰারৰণ্ণনা নিট্ঠিতা.

অধিকরণপচ্চযৰারৰণ্ণনা

২৯১. পঞ্চমে অধিকরণপচ্চযৰারে কিচ্চাধিকরণপচ্চযাতি অপলোকনৰচনঞত্তিকম্মৰাচাসঙ্খতকম্মৰাচাপচ্চযা. পঞ্চাতি এত্থ অধম্মিককতিকাদিং অপলোকেত্ৰা করোন্তানং অনিমিত্তন্তি অত্থো. পঞ্চমে অধিকরণপচ্চযৰারে কিচ্চাধিকরণপচ্চযা অপলোকনাৰসানে দুক্কটং, অধিপ্পাযাদিনা ঞত্তিকম্মাদিং করোন্তানং থুল্লচ্চযাদি চ সঙ্গয্হতীতি দট্ঠব্বং. অৰসেসা আপত্তিযোতি সোতাপত্তিফলসমাপত্তিআদযো. ‘‘নত্থঞ্ঞা আপত্তিযো’’তি ইদং ৰিপত্তিআদিভাগিনিযো সাৰজ্জাপত্তিযো সন্ধায ৰুত্তং.

অধিকরণপচ্চযৰারৰণ্ণনা নিট্ঠিতা.