সমুট্ঠানসীসৰণ্ণনা

২৫৭. পাল়িযং নিব্বানঞ্চেৰ পঞ্ঞত্তীতি এত্থ যস্মা সঙ্খতধম্মে উপাদায পঞ্ঞত্তা সম্মুতিসচ্চভূতা পুগ্গলাদিপঞ্ঞত্তি পরমত্থতো অৰিজ্জমানত্তা উপ্পত্তিৰিনাসযুত্তৰত্থুধম্মনিযতেন অনিচ্চদুক্খলক্খণদ্ৰযেন যুত্তাতি ৰত্তুং অযুত্তা, কারকৰেদকাদিরূপেন পন পরিকপ্পিতেন অত্তসভাৰেন ৰিরহিতত্তা ‘‘অনত্তা’’তি ৰত্তুং যুত্তা. তস্মা অযং পঞ্ঞত্তিপি অসঙ্খতত্তসামঞ্ঞতো ৰত্থুভূতেন নিব্বানেন সহ ‘‘অনত্তা ইতি নিচ্ছযা’’তি ৰুত্তা. অৰিজ্জমানাপি হি সম্মুতি কেনচি পচ্চযেন অকতত্তা অসঙ্খতা এৰাতি.

করুণাসীতলত্তং, পঞ্ঞাপভাসিতত্তঞ্চ ভগৰতো দস্সেতুং ‘‘বুদ্ধচন্দে, বুদ্ধাদিচ্চে’’তি এতং উভযং ৰুত্তং. হাযতি এতেনাতি হানি, দুক্খস্স হানি দুক্খহানি, সব্বদুক্খাপনূদনকারণন্তি অত্থো. পিটকে তীণি দেসযীতি যস্মা অঞ্ঞেপি মহাৰীরা সম্মাসম্বুদ্ধা সদ্ধম্মং দেসযন্তি, তস্মা অঙ্গীরসো পিটকানি তীণি দেসযীতি যোজনা. মহাগুণন্তি মহানিসংসং. এৰং নীযতি সদ্ধম্মোতি যদি ৰিনযপরিযত্তি অপরিহীনা তিট্ঠতি, এৰং সতি পটিপত্তিপটিৰেধসদ্ধম্মোপি নীযতি পৰত্তীযতি, ন পরিহাযতীতি অত্থো.

ৰিনযপরিযত্তি পন কথং তিট্ঠতীতি আহ ‘‘উভতো চা’’তিআদি. পরিৰারেন গন্থিতা তিট্ঠতীতি যোজেতব্বং. তস্সেৰ পরিৰারস্সাতি তস্মিং এৰ পরিৰারে. সমুট্ঠানং নিযতো কতন্তি একচ্চং সমুট্ঠানেন নিযতং কতং. তস্মিং পরিৰারে কিঞ্চি সিক্খাপদং নিযতসমুট্ঠানং অঞ্ঞেহি অসাধারণং, তং পকাসিতন্তি অত্থো.

সম্ভেদং নিদানঞ্চঞ্ঞন্তি সম্ভেদো সিক্খাপদানং অঞ্ঞমঞ্ঞসমুট্ঠানেন সংকিণ্ণতা, নিদানঞ্চ পঞ্ঞত্তিট্ঠানং, অঞ্ঞং পুগ্গলাদিৰত্থাদি চ. সুত্তে দিস্সন্তি উপরীতি হেট্ঠা ৰুত্তে, উপরি ৰক্খমানে চ পরিৰারসুত্তে এৰ দিস্সন্তি. যস্মা চ এৰং, তস্মা সকলসাসনাধারস্স ৰিনযস্স ঠিতিহেতুভূতং পরিৰারং সিক্খেতি, এৰমেত্থ যোজনা দট্ঠব্বা.

সম্ভিন্নসমুট্ঠানানীতি অঞ্ঞেহি সাধারণসমুট্ঠানানি. আদিম্হি তাৰ পুরিমনযেতি সব্বপঠমে পঞ্ঞত্তিৰারে আগতনযং সন্ধায ৰদতি, তত্থ পন পঞ্ঞত্তিৰারে ‘‘পঠমং পারাজিকং কত্থ পঞ্ঞত্তন্তি, ৰেসালিযং পঞ্ঞত্ত’’ন্তিআদিনা (পরি. ১) নিদানম্পি দিস্সতি এৰ. পরতোতি আগতভাৰং পন সন্ধায পরতো আগতে সুত্তে দিস্সতীতি ৰেদিতব্বন্তি ৰুত্তং. তস্সাতি উভতোৰিভঙ্গপরিযাপন্নস্স সিক্খাপদস্স.

২৫৮. অনিযতা পঠমিকাতি আপত্তিং অপেক্খিত্ৰাৰ ইত্থিলিঙ্গং কতং, পঠমানিযতং সিক্খাপদন্তি অত্থো. পাল়িযং নানুবন্ধে পৰত্তিনিন্তি ৰুট্ঠাপিতং পৰত্তিনিং অননুবন্ধনসিক্খাপদং.

২৬০. এল়কলোমসিক্খাপদৰত্থুস্মিং ‘‘ভিক্খুনিযো এল়কলোমানি ধোৰন্তিযো রজন্তিযো ৰিজটেন্তিযো রিঞ্চন্তি উদ্দেসং পরিপুচ্ছ’’ন্তি (পারা. ৫৭৬) আগতত্তা ইমং রিঞ্চন্তি-পদং গহেত্ৰা সিক্খাপদং উপলক্খিতন্তি দস্সেন্তো ‘‘ৰিভঙ্গে ‘রিঞ্চন্তি উদ্দেস’ন্তি আগতং এল়কলোমধোৰাপনসিক্খাপদ’’ন্তি আহ.

ৰস্সিকসাটিকসিক্খাপদন্তি অসমযে ৰস্সিকসাটিকপরিযেসনসিক্খাপদং (পারা. ৬২৬ আদযো). রতনসিক্খাপদন্তি রতনং ৰা রতনসম্মতং ৰা পটিসামনসিক্খাপদং (পাচি. ৫০২ আদযো).

২৬৫. পাল়িযং বুদ্ধঞাণেনাতি পটিৰিদ্ধসব্বঞ্ঞুতঞ্ঞাণেন.

২৬৭. ‘‘ন দেসেন্তি তথাগতা’’তি এতেন ছত্তপাণিস্স ধম্মদেসনাপটিক্খেপং দস্সেতি.

২৬৯. অকতন্তি অঞ্ঞেহি অমিস্সীকতং, নিযতসমুট্ঠানন্তি অত্থো. অকতন্তি ৰা পুব্বে অনাগতং, অভিনৰন্তি অত্থো.

২৭০. সমুট্ঠানঞ্হি সঙ্খেপন্তি এত্থ সঙ্খিপন্তি সঙ্গয্হন্তি সদিসসমুট্ঠানানি এত্থাতি সঙ্খেপো, সমুট্ঠানসীসং. নেতি ৰিনেতি কাযৰচীদুচ্চরিতন্তি নেত্তি, ৰিনযপাল়ি, সা এৰ ধম্মোতি নেত্তিধম্মোতি আহ ‘‘ৰিনযপাল়িধম্মস্সা’’তি.

সমুট্ঠানসীসৰণ্ণনা নিট্ঠিতা.