পঞ্চৰগ্গো

কম্মৰগ্গৰণ্ণনা

৪৮৩. কম্মৰগ্গে ঠপিতউপোসথপৰারণানং কত্তিকমাসে সামগ্গিযা কতায সামগ্গীপৰারণং মুঞ্চিত্ৰা উপোসথং কাতুং ন ৰট্টতীতি আহ ‘‘ঠপেত্ৰা কত্তিকমাস’’ন্তি. সচে পন তেসং নানাসীমাসু মহাপৰারণায ৰিসুং পৰারিতানং কত্তিকমাসব্ভন্তরে সামগ্গী হোতি, সামগ্গীউপোসথো এৰ তেহি কত্তব্বো, ন পৰারণা. একস্মিং ৰস্সে কতপৰারণানং পুন পৰারণায অৰিহিতত্তা. সামগ্গীদিৰসোতি অনুপোসথদিৰসে সামগ্গীকরণং সন্ধায ৰুত্তং. সচে পন চাতুদ্দসিযং, পন্নরসিযং ৰা সঙ্ঘো সামগ্গিং করোতি, তদা সামগ্গীউপোসথদিৰসো ন হোতি, চাতুদ্দসীপন্নরসীউপোসথোৰ হোতি. উপরি পৰারণাযপি এসেৰ নযো.

পচ্চুক্কড্ঢিত্ৰা ঠপিতদিৰসোতি ভণ্ডনকারকেহি উপদ্দুতা ৰা কেনচিদেৰ করণীযেন পৰারণাসঙ্গহং ৰা কত্ৰা ঠপিতো কাল়পক্খচাতুদ্দসীদিৰসোৰ. দ্ৰে চ পুণ্ণমাসিযোতি পুব্ব-কত্তিকপুণ্ণমা, পচ্ছিমকত্তিকপুণ্ণমা চাতি দ্ৰে পুণ্ণমাসিযো. এৰং চতুব্বিধম্পীতি পুণ্ণমাসীদ্ৰযেন সদ্ধিং সামগ্গীপৰারণং, চাতুদ্দসীপৰারণঞ্চ সম্পিণ্ডেত্ৰা ৰুত্তং. ইদঞ্চ পকতিচারিত্তৰসেন ৰুত্তং. তথারূপপচ্চযে পন সতি উভিন্নং পুণ্ণমাসীনং পুরিমা দ্ৰে চাতুদ্দসিযোপি কাল়পক্খচাতুদ্দসিযা অনন্তরা পন্নরসীপীতি ইমেপি তযো দিৰসা পৰারণাদিৰসা এৰাতি ইমং সত্তৰিধম্পি পৰারণাদিৰসং ঠপেত্ৰা অঞ্ঞস্মিং দিৰসে পৰারেতুং ন ৰট্টতি.

৪৮৪. অনুস্সাৰনকম্মং কত্ৰাতি পঠমং অনুস্সাৰনং সাৰেত্ৰা ‘‘এসা ঞত্তী’’তি অনুস্সাৰনানন্তরমেৰ সকলং ঞত্তিং ৰত্ৰা, পরিযোসানে ‘‘এসা ঞত্তী’’তি ৰত্ৰাতি অধিপ্পাযো.

৪৮৫. য্ৰাযন্তি ব্যঞ্জনপ্পভেদো অধিপ্পেতো. দসধা ব্যঞ্জনবুদ্ধিযা পভেদোতি এত্থ দসধা দসৰিধেন ব্যঞ্জনানং পভেদোতি যোজেতব্বং. কেনাযং পভেদোতি আহ ‘‘ব্যঞ্জনবুদ্ধিযা’’তি. যথাধিপ্পেতত্থব্যঞ্জনতো ব্যঞ্জনসঙ্খাতানং অক্খরানং জনিকা বুদ্ধি ব্যঞ্জনবুদ্ধি, তায ব্যঞ্জনবুদ্ধিযা, অক্খরসমুট্ঠাপকচিত্তভেদেনেৰাতি অত্থো. যং ৰা সংযোগপরং কত্ৰা ৰুচ্চতি, ইদম্পি গরুকন্তি যোজনা.

তত্থ আযস্মতোতিআদীসু যানি অনন্তরিতানি স-কারম-কারাদিব্যঞ্জনানি ‘‘সংযোগো’’তি ৰুচ্চন্তি, সো সংযোগো পরো যস্স অ-কারাদিনো, সো সংযোগপরো নাম. রস্সন্তি অকারাদিব্যঞ্জনরহিতং সরং. অসংযোগপরন্তি ‘‘যস্স নক্খমতী’’তিআদীসু য-কার ন-কারাদিব্যঞ্জনসহিতসরং সন্ধায ৰুত্তং. ত-কারস্স থ-কারং অকত্ৰা ৰগ্গন্তরে সিথিলমেৰ কত্ৰা ‘‘সুণাটু মে’’তিআদিং ৰদন্তোপি দুরুত্তং করোতিযেৰ ঠপেত্ৰা অনুরূপং আদেসং. যঞ্হি ‘‘সচ্চিকত্থপরমত্থেনা’’তি ৰত্তব্বে ‘‘সচ্চিকট্ঠপরমট্ঠেনা’’তি চ ‘‘অত্থকথা’’তি ৰত্তব্বে ‘‘অট্ঠকথা’’তি চ তত্থ তত্থ ৰুচ্চতি, তাদিসং পাল়িঅট্ঠকথাসু দিট্ঠপযোগং, তদনুরূপঞ্চ ৰত্তুং ৰট্টতি, ততো অঞ্ঞং ন ৰট্টতি. তেনাহ ‘‘অনুক্কমাগতং পৰেণিং অৰিনাসেন্তেনা’’তিআদি.

দীঘে ৰত্তব্বে রস্সন্তিআদীসু ‘‘ভিক্খূন’’ন্তি ৰত্তব্বে ‘‘ভিক্খুন’’ন্তি ৰা ‘‘বহূসূ’’তি ৰত্তব্বে ‘‘বহুসূ’’তি ৰা ‘‘নক্খমতী’’তি ৰত্তব্বে ‘‘ন খমতী’’তি ৰা ‘‘উপসম্পদাপেক্খো’’তি ৰত্তব্বে ‘‘উপসম্পদাপেখো’’তি ৰা এৰং অনুরূপট্ঠানেসু এৰ দীঘরস্সাদি রস্সদীঘাদিৰসেন পরিৰত্তেতুং ৰট্টতি, ন পন ‘‘নাগো’’তি ৰত্তব্বে ‘‘নগো’’তি ৰা ‘‘সঙ্ঘো’’তি ৰত্তব্বে ‘‘সঘো’’তি ৰা ‘‘তিস্সো’’তি ৰত্তব্বে ‘‘তিসো’’তি ৰা ‘‘যাচতী’’তি ৰত্তব্বে ‘‘যাচন্তী’’তি ৰা এৰং অননুরূপট্ঠানেসু ৰত্তুং. সম্বন্ধং, পন ৰৰত্থানঞ্চ সব্বথাপি ৰট্টতীতি গহেতব্বং.

৪৮৬. সেসসীমাসুপীতি অতিমহতীআদীসু দসসুপি.

৪৮৮. চতুৰগ্গকরণেতি চতুৰগ্গেন সঙ্ঘেন কত্তব্বে. অনিস্সারিতাতি উপোসথট্ঠপনাদিনা ৰা লদ্ধিনানাসংৰাসকভাৰেন ৰা ন বহিকতা. অট্ঠকথাযঞ্হি ‘‘অপকতত্তস্সাতি উক্খিত্তকস্স ৰা, যস্স ৰা উপোসথপৰারণা ঠপিতা হোন্তী’’তি (পরি. অট্ঠ. ৪২৫) ৰুত্তত্তা ঠপিতউপোসথপৰারণো ভিক্খু অপকতত্তো এৰাতি গহেতব্বং. পরিসুদ্ধসীলাতি পারাজিকং অনাপন্না অধিপ্পেতা. পরিৰাসাদিকম্মেসু পন গরুকট্ঠাপি অপকতত্তা এৰাতি গহেতব্বং. অৰসেসা…পে… ছন্দারহাৰ হোন্তীতি সঙ্ঘতো হত্থপাসং ৰিজহিত্ৰা ঠিতে সন্ধায ৰুত্তং. অৰিজহিত্ৰা ঠিতা পন ছন্দারহা ন হোন্তি, তেপি চতুৰগ্গাদিতো অধিকা হত্থপাসং ৰিজহিত্ৰাৰ ছন্দারহা হোন্তি. তস্মা সঙ্ঘতো হত্থপাসং ৰিজহিত্ৰা ঠিতেনেৰ ছন্দো ৰা পারিসুদ্ধি ৰা দাতব্বা.

কম্মৰগ্গৰণ্ণনা নিট্ঠিতা.

অপলোকনকম্মকথাৰণ্ণনা

৪৯৬. এতরহি সচেপি সামণেরোতিআদীসু বুদ্ধাদীনং অৰণ্ণভাসনম্পি অকপ্পিযাদিং কপ্পিযাদিভাৰেন দীপনম্পি দিট্ঠিৰিপত্তিযঞ্ঞেৰ পৰিসতি. তেনেৰ ৰক্খতি ‘‘তং লদ্ধিং নিস্সজ্জাপেতব্বো’’তি. ভিক্খূনম্পি এসেৰ নযো. মিচ্ছাদিট্ঠিকোতি বুদ্ধৰচনাধিপ্পাযং ৰিপরীততো গণ্হন্তো, সো এৰ অন্তগ্গাহিকায দিট্ঠিযা সমন্নাগতোতি চ ৰুত্তো. কেচি পন ‘‘সস্সতুচ্ছেদানং অঞ্ঞতরদিট্ঠিযা সমন্নাগতো’’তি ৰদন্তি, তং ন যুত্তং, সস্সতুচ্ছেদগ্গাহস্স সামণেরানং লিঙ্গনাসনায কারণত্তেন হেট্ঠা অট্ঠকথাযমেৰ (মহাৰ. অট্ঠ. ১০৮) ৰুত্তত্তা, ইধ চ দণ্ডকম্মনাসনায এৰ অধিপ্পেতত্তা.

তস্সাপি দাতব্বোতি ৰিজ্জমানং মুখরাদিভাৰং নিস্সায অপ্পটিপুচ্ছিত্ৰাপি পটিঞ্ঞং অগ্গহেত্ৰাপি আপত্তিং অনারোপেত্ৰাপি দেসিতাযপি আপত্তিযা খুংসনাদিতো অনোরমন্তস্স দাতব্বোৰ. ওরমন্তস্স পন খমাপেন্তস্স ন দাতব্বো.

ব্রহ্মদণ্ডস্স দানন্তি খরদণ্ডস্স উক্কট্ঠদণ্ডস্স দানং. তজ্জনীযাদিকম্মে হি কতে ওৰাদানুসাসনিপ্পদানপটিক্খেপো নত্থি. দিন্নব্রহ্মদণ্ডে পন তস্মিং সদ্ধিং তজ্জনীযাদিকম্মকতেহি পটিক্খিত্তম্পি কাতুং ন ৰট্টতি, ‘‘নেৰ ৰত্তব্বো’’তিআদিনা আলাপসল্লাপাদিমত্তস্সাপি নকারেন পটিক্খিত্তত্তা. তঞ্হি দিস্ৰা ভিক্খূ গীৰং পরিৰত্তেত্ৰা ওলোকনমত্তম্পি ন করোন্তি, এৰং ৰিৰজ্জেতব্বং নিম্মদনকরণত্থমেৰ তস্স দণ্ডস্স অনুঞ্ঞাতত্তা. তেনেৰ ছন্নত্থেরোপি উক্খেপনীযাদিকম্মকতোপি অভাযিত্ৰা ব্রহ্মদণ্ডে দিন্নে ‘‘সঙ্ঘেনাহং সব্বথা ৰিৰজ্জিতো’’তি মুচ্ছিতো পপতি. যো পন ব্রহ্মদণ্ডকতেন সদ্ধিং ঞত্ৰা সংসট্ঠো অৰিৰজ্জেত্ৰা ৰিহরতি, তস্স দুক্কটমেৰাতি গহেতব্বং অঞ্ঞথা ব্রহ্মদণ্ডৰিধানস্স নিরত্থকতাপসঙ্গতো. তেনাতি ব্রহ্মদণ্ডকতেন. যথা তজ্জনীযাদিকম্মকতেহি, এৰমেৰ ততো অধিকম্পি সঙ্ঘংআরাধেন্তেন সম্মাৰত্তিতব্বং. তঞ্চ ‘‘সোরতো নিৰাতৰুত্তী’’তিআদিনা সরূপতো দস্সিতমেৰ. তেনাহ ‘‘সম্মাৰত্তিত্ৰা খমাপেন্তস্স ব্রহ্মদণ্ডো পটিপ্পস্সম্ভেতব্বো’’তি.

যং তং ভগৰতা অৰন্দিযকম্মং অনুঞ্ঞাতন্তি সম্বন্ধো. ‘‘তস্স ভিক্খুনো দণ্ডকম্মং কাতু’’ন্তি সামঞ্ঞতো অনুঞ্ঞাতপ্পকারং দস্সেত্ৰা পুন ৰিসেসতো অনুঞ্ঞাতপ্পকারং দস্সেতুং ‘‘অথ খো’’তিআদিপাল়ি উদ্ধটাতি ৰেদিতব্বং. ইমস্স অপলোকনকম্মস্স ঠানং হোতীতি অপলোকনকম্মস্স সামঞ্ঞস্স পৰত্তিট্ঠানং হোতীতি. ৰিসেসব্যতিরেকেন অৰিজ্জমানম্পি তদঞ্ঞত্থ অপ্পৰত্তিং দস্সেতুং ৰিসেসনিস্সিতং ৰিয ৰোহরীযতি. ‘‘কম্মঞ্ঞেৰ লক্খণ’’ন্তি ইমিনা ওসারণাদিৰসেন গহিতাৰসেসানং সব্বেসং অপলোকনকম্মস্স সামঞ্ঞলক্খণৰসেন গহিতত্তা কম্মঞ্ঞেৰ লক্খণমস্সাতি কম্মলক্খণন্তি নিব্বচনং দস্সেতি. ইদঞ্চ ৰুত্তাৰসেসানং কম্মানং নিট্ঠানট্ঠানং, সঙ্খারক্খন্ধধম্মাযতনানি ৰিয ৰুত্তাৰসেসখন্ধাযতনানন্তি দট্ঠব্বং. তেনেৰ ৰক্খতি ‘‘অযং পনেত্থ পাল়িমুত্তকোপি কম্মলক্খণৰিনিচ্ছযো’’তিআদি (পরি. অট্ঠ. ৪৯৫-৪৯৬). যথা চেত্থ, এৰং উপরি ঞত্তিকম্মাদীসুপি কম্মলক্খণং ৰুত্তন্তি ৰেদিতব্বং. তস্স করণন্তি অৰন্দিযকম্মস্স করণৰিধানং.

‘‘ন ৰন্দিতব্বো’’তি ইমিনা ৰন্দন্তিযা দুক্কটন্তি দস্সেতীতি দট্ঠব্বং. সঙ্ঘেন কতং কতিকং ঞত্ৰা মদ্দনং ৰিয হি সঙ্ঘসম্মুতিং অনাদরেন অতিক্কমন্তস্স আপত্তি এৰ হোতি.

ভিক্খুসঙ্ঘস্সাপি পনেতং লব্ভতিযেৰাতি অৰন্দিযকম্মস্স উপলক্খণমত্তেন গহিতত্তা ভিক্খুসঙ্ঘস্সাপি কম্মলক্খণং লব্ভতি এৰ.

সলাকদানট্ঠানং সলাকগ্গং নাম. যাগুভত্তানং ভাজনট্ঠানানি যাগগ্গভত্তগ্গানি নাম. এতেসুপি হি ঠানেসু সব্বো সঙ্ঘো উপোসথে ৰিয সন্নিপতিতো, কম্মঞ্চ ৰগ্গকম্মং ন হোতি, ‘‘মযমেতং ন জানিম্হা’’তি পচ্ছা খিয্যন্তাপি ন হোন্তি. খণ্ডসীমায পন কতে খিয্যন্তি. সঙ্ঘিকপচ্চযঞ্হি অচ্ছিন্নচীৰরাদীনং দাতুং অপলোকেন্তেহি উপচারসীমট্ঠানং সব্বেসং অনুমতিং গহেত্ৰাৰ কাতব্বং. যো পন ৰিসভাগপুগ্গলো ধম্মিকং অপলোকনং পটিবাহতি, তং উপাযেন বহিউপচারসীমাগতং ৰা কত্ৰা খণ্ডসীমং ৰা পৰিসিত্ৰা কাতুং ৰট্টতি.

যং সন্ধায ‘‘অপলোকনকম্মং করোতী’’তি সামঞ্ঞতো দস্সেতি, তং অপলোকনকম্মং সরূপতো দস্সেতুমাহ ‘‘অচ্ছিন্নচীৰরং’’ইচ্চাদি. যদি অপলোকেত্ৰাৰ চীৰরং দাতব্বং, কিং পন অপ্পমত্তকৰিস্সজ্জকসম্মুতিযাতি আহ ‘‘অপ্পমত্তকৰিস্সজ্জনকেন পনা’’তিআদি. নাল়ি ৰা উপড্ঢনাল়ি ৰাতি দিৰসে দিৰসে অপলোকেত্ৰা দাতব্বস্স পমাণদস্সনং. তেন যাপনমত্তমেৰ অপলোকেতব্বং, ন অধিকন্তি দস্সেতি. একদিৰসংযেৰ ৰাতিআদি দসৰীসতিদিৰসানং একস্মিং দিৰসেযেৰ দাতব্বপরিচ্ছেদদস্সনং, তেন যাৰ জীৰন্তি ৰা যাৰ রোগা ৰুট্ঠহতীতি ৰা এৰং অপলোকেতুং ন ৰট্টতীতি দস্সেতি. ইণপলিবোধন্তি ইণৰত্থুং দাতুং ৰট্টতীতি সম্বন্ধো. তঞ্চ ইণাযিকেহি পলিবুদ্ধস্স লজ্জিপেসলস্স সাসনুপকারকস্স পমাণযুত্তমেৰ কপ্পিযভণ্ডং নিযমেত্ৰা অপলোকেত্ৰা দাতব্বং, ন পন সহস্সং ৰা সতসহস্সং ৰা মহাইণং. তাদিসঞ্হি ভিক্খাচরিযৰত্তেন সব্বেহি ভিক্খূহি তাদিসস্স ভিক্খুনো পরিযেসিত্ৰা দাতব্বং.

উপনিক্খেপতোতি চেতিযপটিজগ্গনত্থায ৰড্ঢিযা পযোজেত্ৰা কপ্পিযকারকেহি ঠপিতৰত্থুতো. সঙ্ঘিকেনপীতি ন কেৰলঞ্চ তত্রুপ্পাদতো পচ্চযদাযকেহি চতুপচ্চযত্থায সঙ্ঘস্স দিন্নৰত্থুনাপীতি অত্থো.

সঙ্ঘভত্তং কাতুং ন ৰট্টতীতি মহাদানং দেন্তেহিপি করিযমানং সঙ্ঘভত্তং ৰিয কারেতুং ন ৰট্টতীতি অধিপ্পাযো.

‘‘যথাসুখং পরিভুঞ্জিতুং রুচ্চতী’’তি ৰুত্তত্তা অত্তনো পরিভোগপ্পহোনকং অপ্পং ৰা বহুং ৰা গহেতব্বং, অধিকং পন গহেতুং ন লভতি. উপোসথদিৰসেতি নিদস্সনমত্তং, যস্মিং কিস্মিঞ্চি দিৰসেপি কতং সুকতমেৰ হোতি. করোন্তেন ‘‘যং ইমস্মিং ৰিহারে অন্তোসীমায সঙ্ঘসন্তকং…পে… যথাসুখং পরিভুঞ্জিতুং ময্হং রুচ্চতী’’তি এৰং কতিকা কাতব্বা, তথা দ্ৰীহি তীহিপি ‘‘আযস্মন্তানং রুচ্চতী’’তি ৰচনমেৰ হেত্থ ৰিসেসো. তেসম্পীতি রুক্খানং. সা এৰ কতিকাতি ৰিসুং কতিকা ন কাতব্বাতি অত্থো.

তেসন্তি রুক্খানং. সঙ্ঘো সামীতি সম্বন্ধো. পুরিমৰিহারেতি পুরিমে যথাসুখং পরিভোগত্থায কতকতিকে ৰিহারে. পরিৰেণানি কত্ৰা জগ্গন্তীতি যত্থ অরক্খিযমানে ফলাফলানি, রুক্খা চ ৰিনস্সন্তি, তাদিসং ঠানং সন্ধায ৰুত্তং, তত্থ সঙ্ঘস্স কতিকা ন পৰত্তীতি অধিপ্পাযো. যে পন রুক্খা বীজানি রোপেত্ৰা আদিতো পট্ঠায পটিজগ্গিতা, তেপি দসমভাগং দত্ৰা রোপকেহেৰ পরিভুঞ্জিতব্বা. তেহীতি জগ্গকেহি.

তত্থাতি তস্মিং ৰিহারে. মূলেতি আদিকালে, পুব্বেতি অত্থো. দীঘা কতিকাতি অপরিচ্ছিন্নকালা যথাসুখং পরিভোগত্থায কতিকা. নিক্কুক্কুচ্চেনাতি ‘‘অভাজিতমিদ’’ন্তি কুক্কুচ্চং অকত্ৰাতি অত্থো. খিয্যনমত্তমেৰেতন্তি তেন খিয্যনেন বহুং খাদন্তানং দোসো নত্থি অত্তনো পরিভোগপ্পমাণস্সেৰ গহিতত্তা, খিয্যন্তেপি অত্তনো পহোনকং গহেত্ৰা খাদিতব্বন্তি অধিপ্পাযো.

গণ্হথাতি ন ৰত্তব্বাতি তথাৰুত্তে তেনেৰ ভিক্খুনা দিন্নং ৰিয মঞ্ঞেয্যুং, তং নিস্সায মিচ্ছাজীৰসম্ভৰো হোতীতি ৰুত্তং. তেনাহ ‘‘অনুৰিচরিত্ৰা’’তিআদি. উপড্ঢভাগোতি একভিক্খুনো পটিৰীসতো উপড্ঢভাগো. দেন্তেন চ ‘‘এত্তকং দাতুং সঙ্ঘো অনুঞ্ঞাসী’’তি এৰং অত্তানং পরিমোচেত্ৰা যথা তে সঙ্ঘে এৰ পসীদন্তি, এৰং ৰত্ৰা দাতব্বং.

অপচ্চাসীসন্তেনাতি গিলানগমিকিস্সরাদীনং অনুঞ্ঞাতপুগ্গলানম্পি অত্তনো সন্তকং দেন্তেন অপচ্চাসীসন্তেনেৰ দাতব্বং, অননুঞ্ঞাতপুগ্গলানং পন অপচ্চাসীসন্তেনাপি দাতুং ন ৰট্টতীতি. সঙ্ঘিকমেৰ যথাকতিতায দাপেতব্বং. অত্তনো সন্তকম্পি পচ্চযদাযকাদী সযমেৰ ৰিস্সাসেন গণ্হন্তি, ন ৰারেতব্বা, লদ্ধকপ্পিযন্তি তুণ্হী ভৰিতব্বং. পুব্বে ৰুত্তমেৰাতি ‘‘কুদ্ধো হি সো রুক্খেপি ছিন্দেয্যা’’তিআদিনা তুণ্হীভাৰে কারণং পুব্বে ৰুত্তমেৰ. তেহি কতঅনত্থাভাৰেপি কারুঞ্ঞেন তুণ্হী ভৰিতুং ৰট্টতি, ‘‘গণ্হথা’’তিআদি পন ৰত্তুং ন ৰট্টতি.

গরুভণ্ডত্তা…পে… ন দাতব্বন্তি জীৰরুক্খানং আরামট্ঠানীযত্তা, দারূনঞ্চ গেহসম্ভারানুপগতত্তা ‘‘সব্বং ত্ৰমেৰ গণ্হা’’তি দাতুং ন ৰট্টতীতি ৰুত্তং. অকতাৰাসং ৰা কত্ৰাতি পুব্বে অৰিজ্জমানং সেনাসনং কত্ৰা জগ্গিতকালে ফলৰারে সম্পত্তে.

অপলোকনকম্মকথাৰণ্ণনা নিট্ঠিতা.

অত্থৰসৰগ্গাদিৰণ্ণনা

৪৯৮. ৰিপাকদুক্খসঙ্খাতানং সম্পরাযিকৰেরানন্তি এত্থ পাণাতিপাতাদিৰেরেন নিব্বত্তত্তা, ৰেরপ্পত্তিযা হেতুত্তা চ ‘‘ৰিপাকদুক্খৰেদনা’’তি ৰুত্তা. পাণাতিপাতাদিপঞ্চৰেরৰিনিমুত্তানম্পি অকুসলানং ৰেরেহি সহ একতো সঙ্গণ্হনত্থং ‘‘দসঅকুসলকম্মপথপ্পভেদান’’ন্তি পুন ৰুত্তং.

৪৯৯-৫০০. তং কম্মন্তি তজ্জনীযাদিকম্মমেৰ, সত্তা আপত্তিক্খন্ধা পঞ্ঞত্তং নামাতি সম্বন্ধো. অন্তরা কেনচি অপঞ্ঞত্তে সিক্খাপদেতি ইমস্মিং কপ্পে আদিতো পট্ঠায যাৰ অম্হাকং ভগৰতো অভিসম্বোধি, তাৰ অন্তরাকালে ককুসন্ধাদিং ঠপেত্ৰা কেনচি অপঞ্ঞত্তে সিক্খাপদেতি অত্থো. ৰিনীতকথা সিক্খাপদন্তি ৰিনীতৰত্থূনি এৰ. তানি হি তংতংসিক্খাকোট্ঠাসানং পকাসনতো ‘‘সিক্খাপদ’’ন্তি চ আপত্তিঅনাপত্তীনং অনুপঞ্ঞাপনতো ‘‘অনুপঞ্ঞত্ত’’ন্তি চ ৰুচ্চন্তি.

অত্থৰসৰগ্গাদিৰণ্ণনা নিট্ঠিতা.

সঙ্গহৰগ্গৰণ্ণনানযো নিট্ঠিতো.

ইতি মহাৰগ্গো, পঞ্ঞত্তিৰগ্গো, সঙ্গহৰগ্গোতি তীহি মহাৰগ্গেহি পটিমণ্ডিতো পরিৰারোতি ৰেদিতব্বো.

ইতি সমন্তপাসাদিকায ৰিনযট্ঠকথায ৰিমতিৰিনোদনিযং

পরিৰারৰণ্ণনানযো নিট্ঠিতো.

নিগমনকথাৰণ্ণনা

অৰসানগাথাসু উভতোৰিভঙ্গ-খন্ধক-পরিৰারেহি ৰিভত্তত্তা ৰিভাগপটিদেসনা যস্মিং ৰিনযপিটকে. সো উভতোৰিভঙ্গ-খন্ধক-পরিৰারৰিভত্তদেসনো আহাতি যোজনা. তস্সাতি ৰিনযপিটকস্স.

সত্থু মহাবোধীতি দক্খিণসাখং সন্ধায ৰদতি. যং পধানঘরং নাম পরিৰেণং, তত্থ চারুপাকারেন সঞ্চিতং পরিক্খিত্তং যং পাসাদং কারযি, তত্র তস্মিং মহানিগমসামিনো পাসাদে ৰসতাতি যোজেতব্বা.

বুদ্ধসিরিং উদ্দিসিত্ৰা নিস্সায, তস্স ৰা অজ্ঝেসনম্পি পটিচ্চ যা ইদ্ধা পরিপুণ্ণৰিনিচ্ছযতায সমিদ্ধা ৰিনযসংৰণ্ণনা আরদ্ধাতি যোজনা.

সিরিনিৰাসস্সাতি সিরিযা নিৰাসনট্ঠানভূতস্স সিরিপালনামকস্স রঞ্ঞো. জযসংৰচ্ছরেতি ৰিজযযুত্তে সংৰচ্ছরে. আরদ্ধকালদস্সনত্থং পুন ‘‘জযসংৰচ্ছরে অযং আরদ্ধা’’তি ৰুত্তং.

কালে ৰস্সন্তি যুত্তকালে ৰস্সনসীলো. দেৰোতি মেঘো.

নিগমনকথাৰণ্ণনা নিট্ঠিতা.

নিগমনকথা

এত্তাৰতা চ আরদ্ধা, ৰিনযট্ঠকথায যা;

ৰণ্ণনা নাতিৰিত্থিণ্ণা, পরিপুণ্ণৰিনিচ্ছযা.

পঞ্ঞাসভাণৰারায, তন্তিযা পরিমাণতো;

সমিজ্ঝনিট্ঠিপরমা, যা ৰিমতিৰিনোদনী.

অনন্তরাযেন কতা, অযং নিট্ঠমুপাগতা;

যং তং নিট্ঠং তথা সব্বে, পাণিনো সমনোরথা.

থেরেহি ৰিনযঞ্ঞূহি, সুচিসল্লেখৰুত্তিহি;

অৰিস্সত্থাতিৰিত্থিণ্ণ-গন্থভীরূ হিপত্থিতং.

করোন্তেন মযা এৰং, ৰিনযঅত্থৰণ্ণনং;

যং পত্তং কুসলং তেন, পত্ৰা সম্বোধিমুত্তমং.

ৰিনযত্থং পকাসেত্ৰা, যো সোপাযেন লক্খণং;

সোপাযং ৰিমতিচ্ছেদ-ঞাণচক্খুপদাযকং.

ৰিরদ্ধত্থৰিপল্লাস-গন্থৰিত্থারহানিযা;

ৰিসুদ্ধিং পাপযিস্সামি, সত্তে সংসারদুক্খতো.

লোকিযেহি চ ভোগেহি, গুণেহি নিখিলা পজা;

সব্বেহি সহিতা হোন্তু, রতা সম্বুদ্ধসাসনেতি.

ৰিমতিৰিনোদনীটীকা নিট্ঠিতা.