নমো তস্স ভগৰতো অরহতো সম্মাসম্বুদ্ধস্স

ৰিনযপিটকে

ৰিনযালঙ্কার-টীকা (পঠমো ভাগো)

গন্থারম্ভকথা

মুত্তহারাদিনযগাথা

যো লোকে লোকলোকো ৰরতরপরদো রাজরাজগ্গজঞ্ঞো;

আকাসাকারকারো পরমরতিরতো দেৰদেৰন্তৰজ্জো.

সংসারাসারসারো সুনরনমনতো মারহারন্তরট্ঠো;

লোকালঙ্কারকারো অতিসতিগতিমা ধীরৰীরত্তরম্মো.

সীহনিৰত্তননযগাথা

সংসারচক্কৰিদ্ধংসং, সম্বুদ্ধং তং সুমানসং;

সংনমামি সুগুণেসং, সংদেসিতসুদুদ্দসং.

অনোতত্তোদকাৰত্তনযগাথা

যেন ৰিদ্ধংসিতা পাপা, যেন নিব্বাপিতা দরা;

যেন লোকা নিস্সরিসুং, যেন চাহং নমামি তং.

চতুদীপচক্কৰত্তননযগাথা

সঙ্ঘং সসঙ্ঘং নমামি, ৰন্তন্তৰরধম্মজং;

মগ্গগ্গমনফলট্ঠং, সুসংসং সুভমানসং.

অব্যপেতচতুপাদআদিযমকগাথা

ৰিনযং ৰিনযং সারং, সঙ্গহং সঙ্গহং করং;

চরিযং চরিযং ৰন্দে, পরমং পরমং সুতং.

ব্যপেতচতুপাদআদিঅন্তযমকগাথা

পকারে বহুপকারে, সাগরে গুণসাগরে;

গরৰো মম গরৰো, ৰন্দামি অভিৰন্দামি.

ৰত্থুত্তযে গন্থকারে, গরূসু সাদরং মযা;

কতেন নমক্কারেন, হিত্ৰা সব্বে উপদ্দৰে.

সিক্খাকামেহি ধীরেহি, জিনসাসনকারিভি;

ভিক্খূহি ৰিনযঞ্ঞূহি, সাদরং অভিযাচিতো.

ৰণ্ণযিস্সামি ৰিনয-সঙ্গহং পীতিৰড্ঢনং;

ভিক্খূনং ৰেনযিকানং, যথাসত্তিবলং অহং.

পোরাণেহি কতা টীকা, কিঞ্চাপি অত্থি সা পন;

অতিসঙ্খেপভাৰেন, ন সাধেতি যথিচ্ছিতং.

তস্মা হি নানাসত্থেহি, সারমাদায সাধুকং;

নাতিসঙ্খেপৰিত্থারং, করিস্সং অত্থৰণ্ণনং.

ৰিনযালঙ্কারং নাম, পেসলানং পমোদনং;

ইমং পকরণং সব্বে, সম্মা ধারেন্তু সাধৰোতি.

গন্থারম্ভকথাৰণ্ণনা

ৰিৰিধৰিসেসনযসমন্নাগতং কাযৰাচাৰিনযনকরণসমত্থং লজ্জিপেসলভিক্খূনং সংসযৰিনোদনকারকং যোগাৰচরপুগ্গলানং সীলৰিসুদ্ধিসম্পাপকং জিনসাসনৰুড্ঢিহেতুভূতং পকরণমিদমারভিতুকামো অযমাচরিযাসভো পঠমং তাৰ রতনত্তযপণামপণামারহভাৰঅভিধেয্যকরণহেতু করণপ্পকারপকরণাভিধাননিমিত্তপযোজনানি দস্সেতুং ‘‘ৰত্থুত্তযং নমস্সিত্ৰা’’তিআদিমাহ. এত্থ হি ৰত্থুত্তযং নমস্সিত্ৰাতি ইমিনা রতনত্তযপণামো ৰুত্তো পণামেতব্বপণামঅত্থদস্সনতো. সরণং সব্বপাণিনন্তি ইমিনা পণামারহভাৰো পণামহেতুদস্সনতো. পাল়িমুত্তৰিনিচ্ছযন্তি অভিধেয্যো ইমস্স পকরণস্স অত্থভাৰতো. ৰিপ্পকিণ্ণমনেকত্থাতি করণহেতু তেনেৰকারণেন পকরণস্স কতত্তা. সমাহরিত্ৰা একত্থ, দস্সযিস্সমনাকুলন্তি করণপ্পকারো তেনাকারেন পকরণস্স করণতো. পকরণাভিধানং পন সমাহরিতসদ্দস্স সামত্থিযতো দস্সিতং সমাহরিত্ৰা দস্সনেনেৰ ইমস্স পকরণস্স ৰিনযসঙ্গহইতি নামস্স লভনতো.

নিমিত্তং পন অজ্ঝত্তিকবাহিরৰসেন দুৰিধং. তত্থ অজ্ঝত্তিকং নাম করুণা, তং দস্সনকিরিযায সামত্থিযতো দস্সিতং তস্মিং অসতি দস্সনকিরিযায অভাৰতো. বাহিরং নাম সোতুজনসমূহো, তং যোগাৰচরভিক্খূনন্তি তস্স করুণারম্মণভাৰতো. পযোজনং পন দুৰিধং পণামপযোজনপকরণপযোজনৰসেন. তত্থ পণামপযোজনং নাম অন্তরাযৰিসোসনপসাদজননাদিকং, তং সরণং সব্বপাণিনন্তি ইমস্স সামত্থিযতো দস্সিতং হেতুম্হি সতি ফলস্স অৰিনাভাৰতো. ৰুত্তঞ্হি অভিধম্মটীকাচরিযেন ‘‘গুণৰিসেসৰা হি পণামারহো হোতি, পণামারহে চ কতো পণামো ৰুত্তপ্পযোজনসিদ্ধিকরোৰ হোতী’’তি (ধ. স. মূলটী. ১). পকরণপযোজনম্পি দুৰিধং মুখ্যানুসঙ্গিকৰসেন. তেসু মুখ্যপযোজনং নাম ব্যঞ্জনানুরূপং অত্থস্স পটিৰিজ্ঝনং পকাসনঞ্চ অত্থানুরূপং ব্যঞ্জনস্স উদ্দিসনং উদ্দেসাপনঞ্চ, তং ৰিনযে পাটৰত্থাযাতি ইমিনা ৰুত্তং. অনুসঙ্গিকপযোজনং নাম সীলাদিঅনুপাদাপরিনিব্বানন্তো অত্থো, তং সমাহরিত্ৰা একত্থ দস্সযিস্সন্তি ইমস্স সামত্থিযেন দস্সিতং একত্থ সমাহরিত্ৰা দস্সনে সতি তদুগ্গহপরিপুচ্ছাদিনা কতপযোগস্স অনন্তরাযেন তদত্থসিজ্ঝনতোতি.

কিমত্থং পনেত্থ রতনত্তযপণামাদযো আচরিযেন কতা, ননু অধিপ্পেতগন্থারম্ভোৰ কাতব্বোতি? ৰুচ্চতে – এত্থ রতনত্তযপণামকরণং তব্বিহতন্তরাযো হুত্ৰা অনাযাসেন গন্থপরিসমাপনত্থং. পণামারহভাৰৰচনং অত্তনো যুত্তপত্তকারিতাদস্সনত্থং, তং ৰিঞ্ঞূনং তোসাপনত্থং, তং পকরণস্স উগ্গহণত্থং, তং সব্বসম্পত্তিনিপ্ফাদনত্থং. অভিধেয্যকথনং ৰিদিতাভিধেয্যস্স গন্থস্স ৰিঞ্ঞূনং উগ্গহধারণাদিৰসেন পটিপজ্জনত্থং. করণহেতুকথনং অকারণে কতস্স ৰাযামস্স নিপ্ফলভাৰতো তপ্পটিক্খেপনত্থং. করণপ্পকারকথনং ৰিদিতপ্পকারস্স গন্থস্স সোতূনং উগ্গহণাদীসু রুচিজননত্থং. অভিধানদস্সনং ৰোহারসুখত্থং. নিমিত্তকথনং আসন্নকারণদস্সনত্থং. পযোজনদস্সনং দুৰিধপযোজনকামীনং সোতূনং সমুস্সাহজননত্থন্তি.

রতনত্তযপণামপযোজনং পন বহূহি পকারেহি ৰিত্থারযন্তি আচরিযা, তং তত্থ তত্থ ৰুত্তনযেনেৰ গহেতব্বং. ইধ পন গন্থগরুভাৰমোচনত্থং অট্ঠকথাচরিযেহি অধিপ্পেতপযোজনমেৰ কথযিম্হ. ৰুত্তঞ্হি অট্ঠকথাচরিযেন –

‘‘নিপচ্চকারস্সেতস্স;

কতস্স রতনত্তযে;

আনুভাৰেন সোসেত্ৰা;

অন্তরাযে অসেসতো’’তি. (ধ. স. অট্ঠ. গন্থারম্ভকথা ৭);

অযমেত্থ সমুদাযত্থো, অযং পন অৰযৰত্থো – অহং সব্বপাণীনং সরণং সরণীভূতং ৰত্থুত্তযং নমস্সামি, নমস্সিত্ৰা যোগাৰচরভিক্খূনং ৰিনযে পাটৰত্থায অনেকত্থৰিপ্পকিণ্ণং পাল়িমুত্তৰিনিচ্ছযং একত্থ সমাহরিত্ৰা অনাকুলং কত্ৰা দস্সযিস্সং দস্সযিস্সামীতি যোজনা.

তত্থ ৰসন্তি এত্থাতি ৰত্থু. কিং তং? বুদ্ধাদিরতনং. তঞ্হি যস্মা সরণগতা সপ্পুরিসা সরণগমনসমঙ্গিনো হুত্ৰা বুদ্ধাদিরতনং আরম্মণং কত্ৰা তস্মিং আরম্মণে ৰসন্তি আৰসন্তি নিৰসন্তি, তস্মা ‘‘ৰত্থূ’’তি ৰুচ্চতি. আরম্মণঞ্হি আধারো, আরম্মণিকং আধেয্যোতি. ইতো পরানিপি ৰত্থুসদ্দস্স ৰচনত্থাদীনি আচরিযেহি ৰুত্তানি, তানিপি তত্থ তত্থ ৰুত্তনযেনেৰ ৰেদিতব্বানি. ইধ পন গন্থৰিত্থারপরিহরণত্থং এত্তকমেৰ ৰুত্তন্তি ৰেদিতব্বন্তি. তিণ্ণং সমূহোতি তযং, তযো অংসা অৰযৰা অস্সাতি ৰা তযং. কিং তং? সমুদাযো. ৰত্থূনং তযন্তি ৰত্থুত্তযং. কিং তং? বুদ্ধাদিরতনত্তযং. নমস্সামীতি নমস্সিত্ৰা, অনমিন্তি নমস্সিত্ৰা. বুদ্ধাদিরতনঞ্হি আরম্মণং কত্ৰা চিত্তস্স উপ্পজ্জনকালে ত্ৰা-পচ্চযো পচ্চুপ্পন্নকালিকো হোতি, তস্মা পঠমো ৰিগ্গহো কতো, পাল়িমুত্তৰিনিচ্ছযং একত্থ দস্সনকালে অতীতকালিকো, তস্মা দুতিযো ৰিগ্গহো. তেনেৰ চ কারণেন অত্থযোজনাযপি পচ্চুপ্পন্নকালঅতীতকালৰসেন যোজনা কতা.

সরতি হিংসতীতি সরণং. কিং তং? বুদ্ধাদিরতনত্তযং. তঞ্হি সরণগতানং সপ্পুরিসানং ভযং সন্তাসং দুক্খং দুগ্গতিৰিনিপাতং সংকিলেসং সরতি হিংসতি ৰিনাসেতি, তস্মা ‘‘সরণ’’ন্তি ৰুচ্চতি. ৰুত্তঞ্হি ভগৰতা –

‘‘যস্মিং, মহানাম, সমযে অরিযসাৰকো তথাগতং অনুস্সরতি, নেৰস্স তস্মিং সমযে রাগপরিযুট্ঠিতং চিত্তং হোতী’’তিআদি (অ. নি. ৬.১০; ১১.১১),

‘‘এৰং বুদ্ধং সরন্তানং;

ধম্মং সঙ্ঘঞ্চ ভিক্খৰো;

ভযং ৰা ছম্ভিতত্তং ৰা;

লোমহংসো ন হেস্সতী’’তি চ. (সং. নি. ১.২৪৯);

যস্মা পন ‘‘সরণ’’ন্তি ইদং পদং ‘‘নাথ’’ন্তি পদস্স ৰেৰচনভূতং কিতসুদ্ধনামপদং হোতি, ন কিতমত্তপদং, তস্মা ধাত্ৰত্থো অন্তোনীতো. ‘‘সর হিংসায’’ন্তি হি ৰুত্তং হিংসত্থং গহেত্ৰা সব্বপাণীনং সরণং হিংসকং ৰত্থুত্তযং নমস্সিত্ৰা ৰিঞ্ঞাযমানে অনিট্ঠপ্পসঙ্গতো সব্বপাণীনং সরণং সরণীভূতং নাথভূতং ৰত্থুত্তযং নমস্সিত্ৰাতি ৰিঞ্ঞাযমানেযেৰ যুজ্জতি, তেনেৰ চ কারণেন অত্থযোজনাযম্পি তথা যোজনা কতা. সব্ব-সদ্দো নিরৰসেসত্থৰাচকং সব্বনামপদং. সহ অৰেন যো ৰত্ততীতি সব্বোতি কতে পন সকল-সদ্দো ৰিয সমুদাযৰাচকং সমাসনামপদং হোতি. পাণো এতেসং অত্থীতি পাণিনো, পাণোতি চেত্থ জীৰিতিন্দ্রিযং অধিপ্পেতং. সব্বে পাণিনো সব্বপাণিনো, তেসং সব্বপাণীনং. এত্তাৰতা ৰত্থুত্তযস্স সব্বলোকসরণভাৰং, ততোযেৰ চ নমস্সনারহভাৰং, নমস্সনারহে চ কতাযনমস্সনকিরিযায যথাধিপ্পেতত্থসিদ্ধিকরভাৰং, অত্তনো কিরিযায চ খেত্তঙ্গতভাৰং দস্সেতি.

এৰং সহেতুকং রতনত্তযপণামং দস্সেত্ৰা ইদানি পকরণারম্ভস্স সনিমিত্তং মুখ্যপযোজনং দস্সেতুমাহ ‘‘ৰিনযে পাটৰত্থায, যোগাৰচরভিক্খূন’’ন্তি. এত্থ চ ৰিনযে পাটৰত্থাযাতি মুখ্যপযোজনদস্সনং, তংদস্সনেন চ অনুসঙ্গিকপযোজনম্পি ৰিভাৰিতমেৰ হোতি কারণে সিদ্ধে কারিযস্স সিজ্ঝনতো. যোগাৰচরভিক্খূনন্তি বাহিরনিমিত্তদস্সনং, তস্মিং দস্সিতে অজ্ঝত্তিকনিমিত্তম্পি দীপিতমেৰ হোতি আরম্মণে ঞাতে আরম্মণিকস্স ঞাতব্বতো. তত্থ ৰিৰিধা নযা এত্থাতি ৰিনযো, দুৰিধপাতিমোক্খদুৰিধৰিভঙ্গপঞ্চৰিধপাতিমোক্খুদ্দেসপঞ্চআপত্তিক্খন্ধসত্তআপত্তিক্খন্ধাদযো ৰিৰিধা অনেকপ্পকারা নযা এত্থ সন্তীতি অত্থো. অথ ৰা ৰিসেসা নযা এত্থাতি ৰিনযো, দল়্হীকম্মসিথিলকরণপযোজনা অনুপঞ্ঞত্তিনযাদযো ৰিসেসা নযা এত্থ সন্তীতি অত্থো. অথ ৰা ৰিনেতীতি ৰিনযো. কাযো ৰিনেতি কাযৰাচাযো, ইতি কাযৰাচানং ৰিনযনতো ৰিনযো. ৰুত্তঞ্হি অট্ঠকথাযং –

‘‘ৰিৰিধৰিসেসনযত্তা;

ৰিনযনতো চেৰ কাযৰাচানং;

ৰিনযত্থৰিদূহি অযং;

ৰিনযো ‘ৰিনযো’তি অক্খাতো’’তি. (পারা. অট্ঠ. ১.পঠমমহাসঙ্গীতিকথা; ধ. স. অট্ঠ. নিদানকথা; দী. নি. অট্ঠ. ১.পঠমমহাসঙ্গীতিকথা);

কো সো? ৰিনযপিটকং. তস্মিং ৰিনযে. পটতি ৰিযত্তভাৰং গচ্ছতীতি পটু. কো সো? পণ্ডিতো. পটুনো ভাৰো পাটৰং. কিং তং? ঞাণং. অসতি কারণানুরূপং ভৰতীতি অত্থো. কো সো? পযোজনং. পাটৰমেৰ অত্থো পাটৰত্থো, তস্স পাটৰত্থায, ৰিনযপিটকে কোসল্লঞাণপযোজনাযাতি ৰুত্তং হোতি. যুঞ্জনং যোগো, কম্মট্ঠানমনসিকারো. অৰচরন্তীতি অৰচরা, যোগে অৰচরা যোগাৰচরা, কম্মট্ঠানিকা ভিক্খূ. সংসারে ভযং ইক্খন্তীতি ভিক্খূ, যোগাৰচরা চ তে ভিক্খূ চাতি যোগাৰচরভিক্খূ, তেসং যোগাৰচরভিক্খূনং. এতেন ৰিনযে পটুভাৰো নাম ভিক্খূনংযেৰ অত্থো হোতি, ন গহট্ঠতাপসপরিব্বাজকাদীনং. ভিক্খূসু চ কম্মট্ঠানে নিযুত্তানং লজ্জিপেসলভিক্খূনংযেৰ, ন ৰিস্সট্ঠকম্মট্ঠানানং অলজ্জিভিক্খূনন্তি ইমমত্থং দস্সেতি.

এৰং পকরণারম্ভস্স সনিমিত্তং পযোজনং দস্সেত্ৰা ইদানি সহেতুকং অভিধেয্যং দস্সেতুং ‘‘ৰিপ্পকিণ্ণমনেকত্থ, পাল়িমুত্তৰিনিচ্ছয’’ন্তি আহ. তত্থ ৰিপ্পকিণ্ণং অনেকত্থাতি ইমিনা পকরণারম্ভস্স হেতুং দস্সেতি হেতুমন্তৰিসেসনত্তা, ইমস্স অনেকত্থৰিপ্পকিণ্ণত্তাযেৰ আচরিযস্স আরম্ভো হোতি, ন অৰিপ্পকিণ্ণে সতি. ৰক্খতি হি ‘‘সমাহরিত্ৰা একত্থ দস্সযিস্স’’ন্তি (ৰি. সঙ্গ. অট্ঠ. গন্থারম্ভকথা). পাল়িমুত্তৰিনিচ্ছযন্তি ইমিনা পকরণাভিধেয্যং. তত্থ কিরতি ৰিক্খিপতীতি কিণ্ণো, পকারেন কিণ্ণো পকিণ্ণো, ৰিৰিধেন পকিণ্ণো ৰিপ্পকিণ্ণো. কো সো? পাল়িমুত্তৰিনিচ্ছযো, তং ৰিপ্পকিণ্ণং.

অনেকত্থাতি এত্থ সঙ্খ্যাৰাচকো সব্বনামিকো এক-সদ্দো, ন একো অনেকে. বহ্ৰত্থৰাচকো অনেকসদ্দো. একন্তএকৰচনন্তোপি এক-সদ্দো ন-ইতিনিপাতেন যুত্তত্তা বহুৰচনন্তো জাতোতি. তত্থ অনেকত্থ বহূসূতি অত্থো, পারাজিককণ্ডট্ঠকথাদীসু অনেকেসু পকরণেসূতি ৰুত্তং হোতি. পোরাণটীকাযং পন অনেকত্থাতি অনেকেসু সিক্খাপদপদেসেসূতি অত্থো দস্সিতো, এৰঞ্চ সতি উপরি ‘‘সমাহরিত্ৰা একত্থা’’তি ৰক্খমানত্তা ‘‘অনেকত্থৰিপ্পকিণ্ণং একত্থ সমাহরিত্ৰা’’তি ইমেসং পদানং সহযোগীভূতত্তা অনেকেসু সিক্খাপদপদেসেসু ৰিপ্পকিণ্ণং একস্মিং সিক্খাপদপদেসে সমাহরিত্ৰাতি অত্থো ভৰেয্য, সো চ অত্থো অযুত্তো. কস্মা? অনেকেসু পকরণেসু ৰিপ্পকিণ্ণং একস্মিং পকরণে সমাহরিত্ৰাতি অত্থো অম্হেহি ৰুত্তো. অথ পন ‘‘একত্থা’’তি ইমস্স ‘‘একতো’’তি অত্থং ৰিকপ্পেত্ৰা অনেকেসু সিক্খাপদপদেসেসু ৰিপ্পকিণ্ণং একতো সমাহরিত্ৰাতি অত্থং গণ্হেয্য, সো অত্থো যুত্তো ভৰেয্য.

পকট্ঠানং আল়ীতি পাল়ি, উত্তমানং ৰচনানং অনুক্কমোতি অত্থো. অথ ৰা অত্তত্থপরত্থাদিভেদং অত্থং পালেতি রক্খতীতি পাল়ি, লল়ানমৰিসেসো. কা সা? ৰিনযতন্তি. মুচ্চতীতি মুত্তো, পাল়িতো মুত্তো পাল়িমুত্তো. ছিন্দিযতে অনেনাতি ছযো, নীহরিত্ৰা ছযো নিচ্ছযো, ৰিসেসেন নিচ্ছযো ৰিনিচ্ছযো, খিলমদ্দনাকারেন পৰত্তো সদ্দনযো অত্থনযো চ. পাল়িমুত্তো চ সো ৰিনিচ্ছযো চাতি পাল়িমুত্তৰিনিচ্ছযো, তং পাল়িমুত্তৰিনিচ্ছযং. ইদঞ্চ ‘‘আনগরা খদিরৰন’’ন্তিআদীসু ৰিয যেভুয্যনযৰসেন ৰুত্তং কত্থচি পাল়িৰিনিচ্ছযস্সপি দিস্সনতো. পোরাণটীকাযং পন পাল়িৰিনিচ্ছযো চ পাল়িমুত্তৰিনিচ্ছযো চ পাল়িমুত্তৰিনিচ্ছযোতি এৰং একদেসসরূপেকসেসৰসেন ৰা এতং ৰুত্তন্তি দট্ঠব্বন্তি দুতিযনযোপি ৰুত্তো, এৰঞ্চ সতি পাল়িৰিনিচ্ছযপাল়িমুত্তৰিনিচ্ছযেহি অঞ্ঞস্স ৰিনিচ্ছযস্স অভাৰা কিমেতেন গন্থগরুকরেন পাল়িমুত্তগ্গহণেন. ৰিসেসনঞ্হি সম্ভৰব্যভিচারে চ সতি সাত্থকং সিযাতি পঠমনযোৰ আরাধনীযো হোতি.

এৰং সহেতুকং অভিধেয্যং দস্সেত্ৰা ইদানি করণপ্পকারং দস্সেতি ‘‘সমাহরিত্ৰা’’তিআদিনা. দুৰিধো হেত্থ করণপ্পকারো একত্থসমাহরণঅনাকুলকরণৰসেন. সো দুৰিধোপি তেন পকারেন পকরণস্স কতত্তা ‘‘করণপ্পকারো’’তি ৰুচ্চতি. তত্থ সমাহরিস্সামীতি সমাহরিত্ৰা, সং-সদ্দো সঙ্খেপত্থো, তস্মা সঙ্খিপিয আহরিস্সামীতি অত্থো. অনাগতকালিকৰসেন পচ্চমানেন ‘‘দস্সযিস্স’’ন্তি পদেন সমানকালত্তা অনাগতকালিকো ইধ ত্ৰা-পচ্চযো ৰুত্তো. একত্থাতি একস্মিং ইধ ৰিনযসঙ্গহপ্পকরণে. একত্থাতি ৰা একতো. দস্সযিস্সন্তি দস্সযিস্সামি, ঞাপযিস্সামীতি অত্থো. আকুলতি ব্যাকুলতীতি আকুলো, ন আকুলো অনাকুলো, পুব্বাপরব্যাকিণ্ণৰিরহিতো পাল়িমুত্তৰিনিচ্ছযো. অনাকুলন্তি পন ভাৰনপুংসকং, তস্মা করধাতুমযেন কত্ৰাসদ্দেন যোজেত্ৰা দস্সনকিরিযায সম্বন্ধিতব্বং.

এৰং রতনত্তযপণামাদিকং পুব্বকরণং দস্সেত্ৰা ইদানি যে পাল়িমুত্তৰিনিচ্ছযে দস্সেতুকামো, তেসং অনুক্কমকরণত্থং মাতিকং ঠপেন্তো ‘‘তত্রাযং মাতিকা’’তিআদিমাহ. মাতিকায হি অসতি দস্সিতৰিনিচ্ছযা ৰিকিরন্তি ৰিধংসেন্তি যথা তং সুত্তেন অসঙ্গহিতানি পুপ্ফানি. সন্তিযা পন মাতিকায দস্সিতৰিনিচ্ছযা ন ৰিকিরন্তি ন ৰিধংসেন্তি যথা তং সুত্তেন সঙ্গহিতানি পুপ্ফানি. তং তং অত্থং জানিতুকামেহি মাতিকানুসারেন গন্ত্ৰা ইচ্ছিতিচ্ছিতৰিনিচ্ছযং পত্ৰা সো সো অত্থো জানিতব্বো হোতি, তস্মা সুখগ্গহণত্থং মাতিকা ঠপিতা. তত্থ তত্রাতি তস্মিং পাল়িমুত্তৰিনিচ্ছযে. অযন্তি অযং মযা ৰক্খমানা. মাতা ৰিযাতি মাতিকা. যথা হি পুত্তা মাতিতো পভৰন্তি, এৰং নিদ্দেসপদানি উদ্দেসতো পভৰন্তি, তস্মা উদ্দেসো মাতিকা ৰিযাতি ‘‘মাতিকা’’তি ৰুচ্চতি.

দিৰাসেয্যাতিআদীসু দিৰাসেয্যা দিৰাসেয্যৰিনিচ্ছযকথা. পরিক্খারো পরিক্খারৰিনিচ্ছযকথা…পে… পকিণ্ণকং পকিণ্ণকৰিনিচ্ছযকথাতি যোজনা. তেনেৰ ৰক্খতি ‘‘দিৰাসযনৰিনিচ্ছযকথা সমত্তা’’তিআদি. ইতি-সদ্দো ইদমত্থো ৰা নিদস্সনত্থো ৰা পরিসমাপনত্থো ৰা. তেসু ইদমত্থে কা সা? দিৰাসেয্যা…পে… পকিণ্ণকং ইতি অযন্তি. নিদস্সনত্থে কথং সা? দিৰাসেয্যা…পে… পকিণ্ণকং ইতি দট্ঠব্বাতি. পরিসমাপনত্থে সা কিত্তকেন পরিসমত্তা? দিৰাসেয্যা…পে… পকিণ্ণকং ইতি এত্তকেন পরিসমত্তাতি অত্থো. ইমেসং পন দিৰাসেয্যাদিপদানং ৰাক্যৰিগ্গহং কত্ৰা অত্থে ইধ ৰুচ্চমানে অতিপপঞ্চো ভৰিস্সতি, সোতূনঞ্চ দুস্সল্লক্খণীযো, তস্মা তস্স তস্স নিদ্দেসস্স আদিম্হিযেৰ যথানুরূপং ৰক্খাম.

গন্থারম্ভকথাৰণ্ণনা নিট্ঠিতা.

১. দিৰাসেয্যৰিনিচ্ছযকথা

১. এৰং পাল়িমুত্তৰিনিচ্ছযকথানং মাতিকং ঠপেত্ৰা ইদানি যথাঠপিতমাতিকানুক্কমেন নিদ্দিসন্তো ‘‘তত্থ দিৰাসেয্যাতি দিৰানিপজ্জন’’ন্তিআদিমাহ. তত্থ তত্থাতি তেসু মাতিকাপদেসু সমভিনিৰিট্ঠস্স ‘‘দিৰাসেয্যা’’তি পদস্স ‘‘দিৰানিপজ্জন’’ন্তি অত্থো দট্ঠব্বোতি যোজনা. তত্থ দিৰা-সদ্দো অহৰাচকো আকারন্তো নিপাতো. ৰুত্তঞ্হি অভিধানপ্পদীপিকাযং ‘‘আনুকূল্যেতু সদ্ধঞ্চ, নত্তং দোসো দিৰা ত্ৰহে’’তি. সযনং সেয্যা, করজকাযগতরূপানং উদ্ধং অনুগ্গন্ত্ৰা দীঘৰসেন ৰিত্থারতো পৰত্তনসঙ্খাতো ইরিযাপথৰিসেসো. দিৰাকালস্মিং সেয্যা দিৰাসেয্যা. অরুণুগ্গমনতো পট্ঠায যাৰ সূরিযত্থঙ্গমনা, এতস্মিং কালে সযনইরিযাপথকরণন্তি. তেনাহ ‘‘দিৰানিপজ্জনন্তি অত্থো’’তি.

তত্রাতি তস্মিং দিৰাসযনে অযং ৰক্খমানো ৰিনিচ্ছযো ৰেদিতব্বোতি যোজনা. ‘‘অনুজানামি…পে… ৰচনতো’’তি (পারা. ৭৭) অযং পঠমপারাজিকসিক্খাপদস্স ৰিনীতৰত্থূসু আগতো ভগৰতা আহচ্চভাসিতো ঞাপকপাঠো. তত্থ দিৰা পটিসল্লীযন্তেনাতি দিৰা নিপজ্জন্তেন. দ্ৰারং সংৰরিত্ৰা পটিসল্লীযিতুন্তি দ্ৰারং পিদহিত্ৰা নিপজ্জিতুং. ‘‘দিৰা…পে… নিপজ্জিতব্বন্তি ঞাপ্যং. ননু পাল়িযং ‘‘অযং নাম আপত্তী’’তি ন ৰুত্তা, অথ কথমেত্থ আপত্তি ৰিঞ্ঞাযতীতি চোদনং সন্ধাযাহ ‘‘এত্থ চ কিঞ্চাপী’’তিআদি. তত্থ এত্থাতি এতস্মিং দিৰানিপজ্জনে. চ-সদ্দো ৰাক্যারম্ভজোতকো, কিঞ্চাপি-সদ্দো নিপাতসমুদাযো, যদিপীত্যত্থো. পাল়িযং অযং নাম আপত্তীতি কিঞ্চাপি ন ৰুত্তা, পন তথাপি অসংৰরিত্ৰা নিপজ্জন্তস্স অট্ঠকথাযং (পারা. অট্ঠ. ১.৭৭) দুক্কটং যস্মা ৰুত্তং, তস্মা এত্থ আপত্তি ৰিঞ্ঞাযতীতি যোজনা. এৰং সন্তেপি অসতি ভগৰতো ৰচনে কথং অট্ঠকথাযং ৰুত্তং সিযাতি আহ ‘‘ৰিৰরিত্ৰা…পে… অনুঞ্ঞাতত্তা’’তি. এতেন ভগৰতো অনুজাননম্পি তং অকরোন্তস্স আপত্তিকারণং হোতীতি দস্সেতি.

তত্থ ‘‘উপ্পন্নে ৰত্থুম্হীতি ইত্থিযা কতঅজ্ঝাচারৰত্থুস্মি’’ন্তি ৰিমতিৰিনোদনিযং (ৰি. ৰি. টী. ১.৭৭) ৰুত্তং, সারত্থদীপনিযং (সারত্থ. টী. ২.৭৭) পন ‘‘মেথুনৰত্থুস্মিং উপ্পন্নে’’তি ৰুত্তং, পোরাণটীকাযম্পি তমেৰ গহেত্ৰা ‘‘উপ্পন্নে মেথুনৰত্থুস্মি’’ন্তি ৰুত্তং, তদেতং ৰিচারেতব্বং মেথুনলক্খণস্স অভাৰা. ননু সিক্খাপদপঞ্ঞাপনং নাম বুদ্ধৰিসযো, অথ কস্মা অট্ঠকথাযং দুক্কটং ৰুত্তন্তি আহ ‘‘ভগৰতো’’তিআদি. ন কেৰলং উপালিত্থেরাদীহি এৰ অট্ঠকথা ঠপিতা, অথ খো পাল়িতো চ অত্থতো চ বুদ্ধেন ভগৰতা ৰুত্তো. ন হি ভগৰতা অব্যাকতং তন্তিপদং নাম অত্থি, সব্বেসংযেৰ অত্থো কথিতো, তস্মা সম্বুদ্ধেনেৰ তিণ্ণং পিটকানং অত্থৰণ্ণনক্কমোপি ভাসিতোতি দট্ঠব্বং. তত্থ তত্থ হি ভগৰতা পৰত্তিতা পকিণ্ণকদেসনাযেৰ অট্ঠকথাতি.

কিং পনেত্থ এতং দিৰা দ্ৰারং অসংৰরিত্ৰা নিপজ্জন্তস্স দুক্কটাপত্তিআপজ্জনং অট্ঠকথাযং ৰুত্তত্তা এৰ সিদ্ধং, উদাহু অঞ্ঞেনপীতি আহ ‘‘অত্থাপত্তী’’তিআদি. এতং দুক্কটাপত্তিআপজ্জনং ন কেৰলং অট্ঠকথাযং ৰুত্তত্তা এৰ সিদ্ধং, অথ খো ‘‘অত্থাপত্তি দিৰা আপজ্জতি, নো রত্তি’’ন্তি (পরি. ৩২৩) ইমিনা পরিৰারপাঠেনপি সিদ্ধং হোতীতি যোজনা. কতরস্মিং পন ৰত্থুস্মিং ইদং সিক্খাপদং ৰুত্তন্তি? ‘‘তেন খো পন সমযেন অঞ্ঞতরো ভিক্খু ৰেসালিযং মহাৰনে কূটাগারসালাযং দিৰা ৰিহারগতো দ্ৰারং ৰিৰরিত্ৰা নিপন্নো অহোসি. তস্স অঙ্গমঙ্গানি ৰাতুপত্থদ্ধানি অহেসুং. তেন খো পন সমযেন সম্বহুলা ইত্থিযো গন্ধঞ্চ মালঞ্চ আদায ৰিহারং আগমিংসু ৰিহারপেক্খিকাযো. অথ খো তা ইত্থিযো তং ভিক্খুং পস্সিত্ৰা অঙ্গজাতে অভিনিসীদিত্ৰা যাৰদত্থং কত্ৰা ‘পুরিসুসভো ৰতায’ন্তি ৰত্ৰা গন্ধঞ্চ মালঞ্চ আরোপেত্ৰা পক্কমিংসু. ভিক্খূ কিলিন্নং পস্সিত্ৰা ভগৰতো এতমত্থং আরোচেসুং. পঞ্চহি, ভিক্খৰে, আকারেহি অঙ্গজাতং কম্মনিযং হোতি রাগেন, ৰচ্চেন, পস্সাৰেন, ৰাতেন, উচ্চালিঙ্গপাণকদট্ঠেন. ইমেহি খো, ভিক্খৰে, পঞ্চহাকারেহি অঙ্গজাতং কম্মনিযং হোতি. অট্ঠানমেতং, ভিক্খৰে, অনৰকাসো, যং তস্স ভিক্খুনো রাগেন অঙ্গজাতং কম্মনিযং অস্স, অরহং সো, ভিক্খৰে, ভিক্খু, অনাপত্তি ভিক্খৰে তস্স ভিক্খুনো. অনুজানামি ভিক্খৰে দিৰা পটিসল্লীযন্তেন দ্ৰারং সংৰরিত্ৰা পটিসল্লীযিতু’’ন্তি (পারা. ৭৭) এতস্মিং ৰত্থুস্মিং ইদং ৰুত্তন্তি দট্ঠব্বং.

২. ইদানি দ্ৰারৰিসেসং দস্সেতুং ‘‘কীদিস’’ন্তিআদিমাহ. তত্থ পরিৰত্তকদ্ৰারমেৰাতি সংৰরণৰিৰরণৰসেন ইতো চিতো চ পরিৰত্তনযোগ্গদ্ৰারমেৰ. রুক্খসূচিকণ্টকদ্ৰারন্তি রুক্খসূচিদ্ৰারং কণ্টকদ্ৰারঞ্চ. ‘‘রুক্খসূচিদ্ৰারকণ্টকদ্ৰার’’মিচ্চেৰ ৰা পাঠো. যং উভোসু পস্সেসু রুক্খত্থম্ভে নিখনিত্ৰা তত্থ ৰিজ্ঝিত্ৰা মজ্ঝে দ্ৰে তিস্সো রুক্খসূচিযো পৰেসেত্ৰা করোন্তি, তং রুক্খসূচিদ্ৰারং নাম. পৰেসননিক্খমনকালে অপনেত্ৰা থকনযোগ্গং একায, বহূহি ৰা কণ্টকসাখাহি কতং কণ্টকদ্ৰারং নাম. গামদ্ৰারস্স পিধানত্থং পদরেন ৰা কণ্টকসাখাদীহি ৰা কতস্স কৰাটস্স উদুক্খলপাসকরহিততায একেন সংৰরিতুং ৰিৰরিতুঞ্চ অসক্কুণেয্যস্স হেট্ঠা একং চক্কং যোজেন্তি, যেন পরিৰত্তমানককৰাটং সুখথকনকং হোতি, তং সন্ধায ৰুত্তং ‘‘চক্কলকযুত্তদ্ৰার’’ন্তি. চক্কমেৰ হি লাতব্বত্থেন সংৰরণৰিৰরণত্থায গহেতব্বত্থেন চক্কলকং, তেন যুত্তকৰাটম্পি চক্কলকং নাম, তেন যুত্তদ্ৰারং চক্কলকযুত্তদ্ৰারং.

মহাদ্ৰারেসু পন দ্ৰে তীণি চক্কলকানি যোজেতীতি আহ ‘‘ফলকেসূ’’তিআদি. কিটিকাসূতি ৰেল়ুপেসিকাদীহি কণ্টকসাখাদীহি চ কতথকনকেসু. সংসরণকিটিকদ্ৰারন্তি চক্কলকযন্তেন সংসরণকিটিকাযুত্তমহাদ্ৰারং. গোপ্ফেত্ৰাতি আৰুণিত্ৰা, রজ্জূহি গন্থেত্ৰা ৰা. একং দুস্সসাণিদ্ৰারমেৰাতি এত্থ কিলঞ্জসাণিদ্ৰারম্পি সঙ্গহং গচ্ছতি. ৰজিরবুদ্ধিটীকাযং (ৰজির. টী. পারাজিক ৭৬-৭৭) পন ‘‘দুস্সদ্ৰারং সাণিদ্ৰারঞ্চ দুস্সসাণিদ্ৰারং. দুস্সসাণি কিলঞ্জসাণীতিআদিনা ৰুত্তং সব্বম্পি দুস্সসাণিযমেৰ সঙ্গহেত্ৰা ৰুত্তং, একসদিসত্তা একন্তি ৰুত্ত’’ন্তি ৰুত্তং.

৩. এৰং দ্ৰারৰিসেসং দস্সেত্ৰা ইদানি যত্তকেন দ্ৰারং সংৰুতং হোতি, তং পমাণং দস্সেতুং ‘‘কিত্তকেন’’ত্যাদিমাহ. তত্থ সূচীতি মজ্ঝে ছিদ্দং কত্ৰা পৰেসিতা. ঘটিকাতি উপরি যোজিতা. ইদানি যত্থ দ্ৰারং সংৰরিত্ৰা নিপজ্জিতুং ন সক্কা হোতি, তত্থ কাতব্বৰিধিং দস্সেতুং ‘‘সচে বহূনং ৰল়ঞ্জনট্ঠানং হোতী’’তিআদি ৰুত্তং. বহূনং অৰল়ঞ্জনট্ঠানেপি একং আপুচ্ছিত্ৰা নিপজ্জিতুং ৰট্টতিযেৰ. অথ ভিক্খূ…পে… নিসিন্না হোন্তীতি ইদং তত্থ ভিক্খূনং সন্নিহিতভাৰদস্সনত্থং ৰুত্তং, ন সেসইরিযাপথসমঙ্গিতানিৰত্তনত্থং, তস্মা নিপন্নেপি আভোগং কাতুং ৰট্টতি. নিপজ্জিত্ৰা নিদ্দাযন্তে পন আভোগং কাতুং ন ৰট্টতি. অসন্তপক্খে ঠিতত্তা রহো নিসজ্জায ৰিয দ্ৰারসংৰরণং নাম মাতুগামানং পৰেসনিৰারণত্থং অনুঞ্ঞাতন্তি আহ ‘‘কেৰলং ভিক্খুনিং ৰা’’তিআদি.

এত্থ চ তং যুত্তং, এৰং সব্বত্থপি যো যো থেরৰাদো ৰা অট্ঠকথাৰাদো ৰা পচ্ছা ৰুচ্চতি, সো সোৰ পমাণন্তি গহেতব্বন্তি ইদং অট্ঠকথাৰচনতো অতিরেকং আচরিযস্স ৰচনং. ইতো পুব্বাপরৰচনং অট্ঠকথাৰচনমেৰ. তত্থ তং যুত্তন্তি ‘‘কুরুন্দট্ঠকথাযং পন…পে… ন ৰত্ততী’’তি যং ৰচনং অট্ঠকথাচরিযেহি ৰুত্তং, তং ৰচনং যুত্তন্তি অত্থো. এৰং…পে… গহেতব্বন্তি যথা চেত্থ কুরুন্দিযং ৰুত্তৰচনং যুত্তং, এৰং সব্বত্থপি ৰিনিচ্ছযে যো যো থেরৰাদো ৰা অট্ঠকথাৰাদো ৰা পচ্ছা ৰুচ্চতি, সো সোৰ পমাণন্তি গহেতব্বং, পুরে ৰুত্তো থেরৰাদো ৰা অট্ঠকথাৰাদো ৰা পমাণন্তি ন গহেতব্বন্তি অধিপ্পাযো. ইদং ৰচনং অট্ঠানে ৰুত্তং ৰিয দিস্সতি. কথং? যং তাৰ ৰুত্তং, তং যুত্তন্তি. তং ইমস্মিং আপুচ্ছনআভোগকরণৰিনিচ্ছযে অঞ্ঞস্স অযুত্তস্স অট্ঠকথাৰাদস্স ৰা থেরৰাদস্স ৰা অভাৰা ৰত্তুং ন সক্কা. ন হি পুব্বৰাক্যে ‘‘ভিক্খূ এৰা’’তি অৰধারণং কতং, অথ খো আসন্নৰসেন ৰা পট্ঠানৰসেন ৰা ‘‘ভিক্খূ চীৰরকম্মং’’ইচ্চাদিকংযেৰ ৰুত্তং. যম্পি ৰুত্তং ‘‘এৰং সব্বত্থপী’’ত্যাদি, তম্পি অনোকাসং. ইমস্মিং ৰিনিচ্ছযে অঞ্ঞস্স অট্ঠকথাৰাদস্স ৰা আচরিযৰাদস্স ৰা অৰচনতো পুরে পচ্ছাভাৰো চ ন দিস্সতি, অযং ‘‘পমাণ’’ন্তি গহেতব্বো, অযং ‘‘ন গহেতব্বো’’তি ৰত্তব্বভাৰো চ.

উপরি পন ‘‘কো মুচ্চতি, কো ন মুচ্চতী’’তি ইমস্স পঞ্হস্স ৰিস্সজ্জনে মহাপচ্চরিৰাদো চ কুরুন্দিৰাদো চ মহাঅট্ঠকথাৰাদো চাতি তযো অট্ঠকথাৰাদা আগতা, একো মহাপদুমত্থেরৰাদো, তস্মা তত্থেৰ যুত্তাযুত্তভাৰো চ পমাণাপমাণভাৰো চ গহেতব্বাগহেতব্বভাৰো চ দিস্সতি, তস্মা তস্মিংযেৰ ঠানে ৰত্তব্বং সিযা, সুৰিমলৰিপুলপঞ্ঞাৰেয্যত্তিযসমন্নাগতেন পন আচরিযাসভেন অৰত্তব্বট্ঠানে ৰুত্তং ন সিযা, তস্মা উপরি অট্ঠকথাৰাদসংসন্দনাৰসানে মহাপদুমত্থেরেন ৰুত্তন্তি ইমস্স ৰচনস্স পচ্ছতো ৰুত্তং সিযা, তং পচ্ছা লেখকেহি পরিৰত্তেত্ৰা লিখিতং ভৰেয্য, পারাজিককণ্ডট্ঠকথাযঞ্চ ইদং ৰচনং ৰুত্তং. টীকাযঞ্চ ইমস্মিং ঠানে ন ৰুত্তং, উপরিযেৰ ৰুত্তং, ‘‘যো চ যক্খগহিতকো, যো চ বন্ধিত্ৰা নিপজ্জাপিতো’’তি ইমস্স অট্ঠকথাৰাদস্স পচ্ছিমত্তা সোযেৰ পমাণতো গহেতব্বো. তথা চ ৰক্খতি ‘‘সব্বত্থ যো যো অট্ঠকথাৰাদো ৰা থেরৰাদো ৰা পচ্ছা ৰুচ্চতি, সো সোযেৰ পমাণতো দট্ঠব্বো’’তি, তস্মা ইদমেত্থ ৰিচারেত্ৰা গহেতব্বং.

৪. ইদানি দ্ৰারং সংৰরণস্স অন্তরাযে সতি অসংৰরিত্ৰাপি নিপজ্জিতুং ৰট্টতীতি দস্সেতুং ‘‘অথ দ্ৰারস্স’’ত্যাদিমাহ. নিস্সেণিং আরোপেত্ৰাতি উপরিমতলং আরোপেত্ৰা ৰিসঙ্খরিত্ৰা ভূমিযং পাতেত্ৰা, ছড্ডেত্ৰা ৰা নিপজ্জিতুং ৰট্টতি. ইদং একাবদ্ধতায ৰুত্তং. দ্ৰেপি দ্ৰারানি জগ্গিতব্বানীতি এত্থ সচে একস্মিং দ্ৰারে কৰাটং ৰা নত্থি, হেট্ঠা ৰুত্তনযেন সংৰরিতুং ৰা ন সক্কা, ইতরং দ্ৰারং অসংৰরিত্ৰা নিপজ্জিতুং ৰট্টতি. দ্ৰারপালস্সাতি দ্ৰারকোট্ঠকে মহাদ্ৰারে, নিস্সেণিমূলে ৰা ঠত্ৰা দ্ৰারজগ্গনকস্স. পচ্ছিমানং ভারোতি একাবদ্ধৰসেন আগচ্ছন্তে সন্ধায ৰুত্তং. অসংৰুতদ্ৰারে অন্তোগব্ভে ৰাতি যোজেতব্বং. বহি ৰাতি গব্ভতো বহি. নিপজ্জনকালেপি…পে… ৰট্টতিযেৰাতি এত্থ দ্ৰারজগ্গনকস্স তদধীনত্তা তদা তস্স তত্থ সন্নিহিতাসন্নিহিতভাৰং অনুপধারেত্ৰাপি আভোগং কাতুং ৰট্টতিযেৰাতি ৰদন্তি.

যেন কেনচি পরিক্খিত্তেতি এত্থ পরিক্খেপস্স উব্বেধতো পমাণং সহসেয্যপ্পহোনকে ৰুত্তসদিসমেৰ. ৰুত্তঞ্হি সমন্তপাসাদিকাযং (পাচি. অট্ঠ. ৫১) ‘‘যঞ্হি সেনাসনং উপরি পঞ্চহি ছদনেহি অঞ্ঞেন ৰা কেনচি সব্বমেৰ পটিচ্ছন্নং, অযং সব্বচ্ছন্না নাম সেয্যা…পে… যং পন সেনাসনং ভূমিতো পট্ঠায যাৰ ছদনং আহচ্চ পাকারেন ৰা অঞ্ঞেন ৰা কেনচি অন্তমসো ৰত্থেনপি পরিক্খিত্তং, অযং সব্বপরিচ্ছন্না নাম সেয্যা. ছদনং অনাহচ্চ সব্বন্তিমেন পরিযাযেন দিযড্ঢহত্থুব্বেধেন পাকারাদিনা পরিক্খিত্তাপি সব্বপরিচ্ছন্নাযেৰাতি কুরুন্দট্ঠকথাযং ৰুত্ত’’ন্তি. ‘‘দিযড্ঢহত্থুব্বেধো ৰড্ঢকিহত্থেন গহেতব্বো’’তি সারত্থদীপনিযং (সারত্থ. টী. পাচিত্তিয ৩.৫১) ৰিমতিৰিনোদনিযঞ্চ (ৰি. ৰি. টী. পাচিত্তিয ২.৫০-৫১) ৰুত্তং. মহাপরিৰেণন্তি মহন্তং অঙ্গণং. তেন বহুজনসঞ্চরণট্ঠানং দস্সেতি. তেনাহ ‘‘মহাবোধী’’তিআদি.

অরুণে উগ্গতে ৰুট্ঠাতি, অনাপত্তি অনাপত্তিখেত্তভূতায রত্তিযা সুদ্ধচিত্তেন নিপন্নত্তা. পবুজ্ঝিত্ৰা পুন সুপতি, আপত্তীতি অরুণে উগ্গতে পবুজ্ঝিত্ৰা অরুণুগ্গমনং ঞত্ৰা ৰা অঞত্ৰা ৰা অনুট্ঠহিত্ৰা সযিতসন্তানেন সুপতি, উট্ঠহিত্ৰা কত্তব্বস্স দ্ৰারসংৰরণাদিনো অকতত্তা অকিরিযসমুট্ঠানা আপত্তি হোতি অনাপত্তিখেত্তে কতনিপজ্জনকিরিযায অনঙ্গত্তা. অযঞ্হি আপত্তি ঈদিসে ঠানে অকিরিযা, দিৰা দ্ৰারং অসংৰরিত্ৰা নিপজ্জনক্খণে কিরিযাকিরিযা চ অচিত্তকা চাতি ৰেদিতব্বা. পুরারুণা পবুজ্ঝিত্ৰাপি যাৰ অরুণুগ্গমনা সযন্তস্সপি পুরিমনযেন আপত্তিযেৰ.

অরুণে উগ্গতে ৰুট্ঠহিস্সামীতি…পে… আপত্তিযেৰাতি এত্থ কদা অস্স আপত্তীতি? ৰুচ্চতে – ন তাৰ রত্তিযং, ‘‘দিৰা আপজ্জতি, নো রত্তি’’ন্তি (পরি. ৩২৩) ৰুত্তত্তা অনাদরিযদুক্কটা ন মুচ্চতীতি ৰুত্তদুক্কটং পন দিৰাসযনদুক্কটমেৰ ন হোতি অনাদরিযদুক্কটত্তা এৰ. ‘‘অরুণুগ্গমনে পন অচিত্তকং অকিরিযসমুট্ঠানং আপত্তিং আপজ্জতীতি ৰেদিতব্ব’’ন্তি ৰিমতিৰিনোদনিযং (ৰি. ৰি. টী. ১.৭৭) ৰুত্তং, সারত্থদীপনিযম্পি (সারত্থ. টী. পারাজিক ২.৭৭) ‘‘যথাপরিচ্ছেদমেৰ ৰুট্ঠাতীতি অরুণে উগ্গতেযেৰ উট্ঠহতি. তস্স আপত্তীতি অসুদ্ধচিত্তেনেৰ নিপন্নত্তা নিদ্দাযন্তস্সপি অরুণে উগ্গতে দিৰাপটিসল্লানমূলিকা আপত্তি. ‘এৰং নিপজ্জন্তো অনাদরিযদুক্কটাপি ন মুচ্চতী’তি ৰুত্তত্তা অসুদ্ধচিত্তেন নিপজ্জন্তো অরুণুগ্গমনতো পুরেতরং উট্ঠহন্তোপি অনুট্ঠহন্তোপি নিপজ্জনকালেযেৰ অনাদরিযদুক্কটং আপজ্জতি, দিৰাপটিসল্লানমূলিকং পন দুক্কটং অরুণেযেৰ আপজ্জতী’’তি ৰুত্তং, তস্মা এৰং নিপজ্জন্তস্স দ্ৰে দুক্কটানি আপজ্জন্তীতি ৰেদিতব্বং.

সচে দ্ৰারং সংৰরিত্ৰা অরুণে উগ্গতে উট্ঠহিস্সামীতি নিপজ্জতি, দ্ৰারে চ অঞ্ঞেহি অরুণুগ্গমনকালে ৰিৰটেপি তস্স অনাপত্তিযেৰ দ্ৰারপিদহনস্স রত্তিদিৰাভাগেসু ৰিসেসাভাৰা. আপত্তিআপজ্জনস্সেৰ কালৰিসেসো ইচ্ছিতব্বো, ন তপ্পরিহারস্সাতি গহেতব্বং. ‘‘দ্ৰারং সংৰরিত্ৰা রত্তিং নিপজ্জতী’’তি (পারা. অট্ঠ. ১.৭৭) হি ৰুত্তং. দিৰা সংৰরিত্ৰা নিপন্নস্স কেনচি ৰিৰটেপি দ্ৰারে অনাপত্তিযেৰ, অত্তনাপি অনুট্ঠহিত্ৰাৰ সতি পচ্চযে ৰিৰটেপি অনাপত্তীতি ৰদন্তি, ইদম্পি ৰিমতিৰিনোদনিযমেৰ (ৰি. ৰি. টী. ১.৭৭) ৰুত্তং.

যথাপরিচ্ছেদমেৰ ৰুট্ঠাতীতি অরুণে উগ্গতেযেৰ ৰুট্ঠাতি, আপত্তিযেৰাতি মূলাপত্তিং সন্ধায ৰুত্তং. অনাদরিযআপত্তি পন পুরারুণা উট্ঠিতস্সপি তস্স হোতেৰ ‘‘দুক্কটা ন মুচ্চতী’’তি ৰুত্তত্তা. দুক্কটা ন মুচ্চতীতি চ পুরারুণা উট্ঠহিত্ৰা মূলাপত্তিযা মুত্তোপি অনাদরিযদুক্কটা ন মুচ্চতীতি অধিপ্পাযো.

৫. নিদ্দাৰসেন নিপজ্জতীতি নিদ্দাভিভূততায একপস্সেন নিপজ্জতি. ‘‘নিদ্দাৰসেন নিপজ্জতী’’তি ৰোহারৰসেন ৰুত্তং, পাদানং পন ভূমিতো অমোচিতত্তা অযং নিপন্নো নাম হোতীতি তেনেৰ অনাপত্তি ৰুত্তা. অপস্সায সুপন্তস্সাতি কটিট্ঠিতো উদ্ধং পিট্ঠিকণ্টকে অপ্পমত্তকং পদেসং ভূমিং অফুসাপেত্ৰা সুপন্তস্স. কটিট্ঠিং পন ভূমিং ফুসাপেন্তস্স সযনং নাম ন হোতি. পিট্ঠিপসারণলক্খণা হি সেয্যা দীঘা, ৰন্দনাদীসুপি তিরিযং পিট্ঠিকণ্টকানং পসারিতত্তা নিপজ্জনমেৰাতি আপত্তি পরিহরিতব্বাৰ. ৰন্দনাপি হি পাদমূলে নিপজ্জতীতিআদীসু নিপজ্জনমেৰ ৰুত্তা. সহসা ৰুট্ঠাতীতি পক্খলিতা পতিতো ৰিয সহসা ৰুট্ঠাতি, তস্সপি অনাপত্তি পতনক্খণে অৰিসযত্তা, ৰিসযে জাতে সহসা ৰুট্ঠিতত্তা চ. যস্স পন ৰিসঞ্ঞিতায পচ্ছাপি অৰিসযো এৰ, তস্স অনাপত্তিযেৰ পতনক্খণে ৰিয. তত্থেৰ সযতি, ন ৰুট্ঠাতীতি ইমিনা ৰিসযেপি অকরণং দস্সেতি, তেনেৰ তস্স আপত্তীতি ৰুত্তং.

ইদানি অট্ঠকথাৰাদসংসন্দনং কাতুং ‘‘কো মুচ্চতি, কো ন মুচ্চতী’’তিআদিমাহ. তত্থ মহাপচ্চরিযন্তিআদীসু পচ্চরীতি উল়ুম্পং ৰুচ্চতি, তস্মিং নিসীদিত্ৰা কতত্তা তমেৰ নামং জাতং. কুরুন্দিৰল্লিৰিহারো নাম অত্থি, তত্থ কতত্তা কুরুন্দীতি নামং জাতং. মহাঅট্ঠকথা নাম সঙ্গীতিত্তযমারুল়্হা তেপিটকস্স বুদ্ধৰচনস্স অট্ঠকথা. যা মহামহিন্দত্থেরেন তম্বপণ্ণিদীপং আভতা, তম্বপণ্ণিযেহি থেরেহি পচ্ছা সীহল়ভাসায অভিসঙ্খতা চ হোতি. একভঙ্গেনাতি একপস্সভঞ্জনেন পাদে ভূমিতো অমোচেত্ৰা একপস্সেন সরীরং ভঞ্জিত্ৰা নিপন্নোতি ৰুত্তং হোতি. মহাঅট্ঠকথাযং পন মহাপদুমত্থেরেন ৰুত্তন্তি সম্বন্ধো. তেন মহাঅট্ঠকথায লিখিতমহাপদুমত্থেরৰাদে ‘‘অয’’ন্তি দস্সেতি. ‘‘মুচ্ছিত্ৰা পতিতত্তা অৰিসযত্তা আপত্তি ন দিস্সতী’’তি থেরেন ৰুত্তং. আচরিযা পন যথা যক্খগহিতকো বন্ধিত্ৰা নিপজ্জাপিতো চ পরৰসো হোতি, এৰং অপরৰসত্তা মুচ্ছিত্ৰা পতিতো কঞ্চিকালং জানিত্ৰা নিপজ্জতীতি অনাপত্তিং ন ৰদন্তি, ৰিসঞ্ঞিতে পন সতি অনাপত্তিযেৰ.

দ্ৰে জনাতিআদি মহাঅট্ঠকথাযমেৰ ৰচনং, তদেৰ পচ্ছা ৰুত্তত্তা পমাণং. যক্খগহিতগ্গহণেনেৰ চেত্থ ৰিসঞ্ঞিভূতোপি সঙ্গহিতো, একভঙ্গেন নিপন্নো পন অনিপন্নত্তা আপত্তিতো মুচ্চতিযেৰাতি গহেতব্বং. সারত্থদীপনিযঞ্চ (সারত্থ. টী. ২.৭৭) ‘‘যো চ যক্খগহিতকো, যো চ বন্ধিত্ৰা নিপজ্জাপিতো’’তি ইমস্স অট্ঠকথাৰাদস্স পচ্ছিমত্তা সোযেৰ পমাণতো গহেতব্বো, তথা চ ৰক্খতি ‘‘সব্বত্থ যো যো অট্ঠকথাৰাদো ৰা পচ্ছা ৰুচ্চতি, সো সোযেৰ পমাণতো গহেতব্বো’’তি. ইমস্মিং ঠানে ইমস্স অট্ঠকথাপাঠস্স আনীতত্তা ইমস্মিং ৰিনযসঙ্গহপ্পকরণেপি ইমস্মিংযেৰ ঠানে সো পাঠো ৰত্তব্বোতি নো খন্তি. এত্থ চ ‘‘রত্তিং দ্ৰারং ৰিৰরিত্ৰা নিপন্নো অরুণে উগ্গতে উট্ঠাতি, অনাপত্তী’’তিআদিৰচনতো অরুণুগ্গমনে সংসযৰিনোদনত্থং অরুণকথা ৰত্তব্বা. তত্রিদং ৰুচ্চতি –

‘‘কো এস অরুণো নাম;

কেন সো অরুণো ভৰে;

কীদিসো তস্স ৰণ্ণা তু;

সণ্ঠানং কীদিসং ভৰে.

‘‘কিস্মিং কালে চ দেসে চ, অরুণো সমুগচ্ছতি;

কিং পচ্চক্খসিদ্ধো এসো, উদাহু অনুমানতো’’তি.

তত্থ কো এস অরুণো নামাতি এত্থ এস অরুণো নাম সূরিযস্স পভাৰিসেসো. ৰুত্তঞ্হেতং অভিধানপ্পদীপিকাযং –

‘‘সূরস্সোদযতো পুব্বুট্ঠিতরংসি সিযারুণো’’তি;

তট্টীকাযঞ্চ ‘‘সূরস্স উদযতো পুব্বে উট্ঠিতরংসি অরুণো নাম সিযা’’তি. ৰিমতিৰিনোদনীনামিকাযং ৰিনযটীকাযঞ্চ (ৰি. ৰি. টী. ১.৪৬৩) ‘‘অরুণোতি চেত্থ সূরিযুগ্গমনস্স পুরেচরো ৰড্ঢনঘনরত্তো পভাৰিসেসোতি দট্ঠব্বো’’তি ৰুত্তং, তস্মা সূরিযপ্পভাযেৰ অরুণো নাম, ন অঞ্ঞোতি দট্ঠব্বং. কেন সো অরুণো ভৰেতি এত্থ অরুণো ৰণ্ণো অস্সাতি অরুণো, কিঞ্চিরত্তৰণ্ণসমন্নাগতোতি অত্থো. অথ ৰা অরতি গচ্ছতি রত্তৰণ্ণভাৰেন পৰত্ততীতি অরুণো. ৰুত্তঞ্হেতং অভিধানপ্পদীপিকাটীকাযং ‘‘অরুণৰণ্ণতায অরতি গচ্ছতীতি অরুণো’’তি. কীদিসো তস্স ৰণ্ণোতি এত্থ অব্যত্তরত্তৰণ্ণো তস্স ৰণ্ণো ভৰে. ৰুত্তঞ্হি অভিধানপ্পদীপিকাযং ‘‘অরুণো কিঞ্চিরত্তোথা’’তি. তট্টীকাযঞ্চ ‘‘কিঞ্চিরত্তো অব্যত্তরত্তৰণ্ণো অরুণো নাম যথা মচ্ছস্স অক্খী’’তি. ৰিমতিৰিনোদনিযঞ্চ (ৰি. ৰি. টী. ১.৪৬৩) ‘‘ৰড্ঢনঘনরত্তো পভাৰিসেসো’’তি, তস্মা সূরিযস্স রত্তপ্পভাযেৰ অরুণো নাম, ন সেতপ্পভাদযোতি দট্ঠব্বং. যদি এৰং পাতিমোক্খট্ঠপনক্খন্ধকৰণ্ণনায ৰিমতিৰিনোদনিযং (ৰি. ৰি. টী. চূল়ৰগ্গ ২.৩৮৩) ‘‘পাল়িযং পন নন্দিমুখিযাতি ওদাতদিসামুখতায তুট্ঠমুখিযা’’তি ৰুত্তং, তং কথং যুজ্জেয্যাতি, নো ন যুজ্জেয্য. তত্থ হি অরুণুগ্গতকালে অরুণোভাসেন ওদাতদিসামুখভাৰো ৰুত্তো, ন অরুণোভাসস্স ওদাতভাৰো. ৰুত্তঞ্হেতং উদানট্ঠকথাযং (উদা. অট্ঠ. ২৩) ‘‘নন্দিমুখিযাতি অরুণস্স উগ্গতত্তা এৰ অরুণোভায সূরিযালোকূপজীৰিনো সত্তে নন্দাপনমুখিযা রত্তিযা জাতায ৰিভাযমানাযাতি অত্থো’’তি.

জাতকট্ঠকথাযঞ্চ –

‘‘জিঘঞ্ঞরত্তিং অরুণস্মিমুহতে;

যা দিস্সতি উত্তমরূপৰণ্ণিনী;

তথূপমা মং পটিভাসি দেৰতে;

আচিক্খ মে তং কতমাসি অচ্ছরা’’তি. (জা. অট্ঠ. ৫.২১.২৫৪);

ইমস্স গাথায অত্থৰণ্ণনাযং ‘‘তত্থ জিঘঞ্ঞরত্তিন্তি পচ্ছিমরত্তিং, রত্তিপরিযোসানেতি অত্থো. উহতেতি অরুণে উগ্গতে. যাতি যা পুরত্থিমা দিসা রত্তৰণ্ণতায উত্তমরূপধরা হুত্ৰা দিস্সতী’’তি. এৰং অরুণুগ্গতসমযে পুরত্থিমদিসায রত্তৰণ্ণতা ৰুত্তা, তস্মা তস্মিং সমযে অরুণস্স উট্ঠিতত্তা পুরত্থিমায দিসায রত্তভাগো সূরিযালোকস্স পত্থটত্তা সেসদিসানং ওদাতভাৰো ৰিঞ্ঞাযতি.

সণ্ঠানং কীদিসং ভৰেতি এত্থ অরুণস্স পাটেক্কং সণ্ঠানং নাম নত্থি রস্মিমত্তত্তা. যত্তকং পদেসং ফরতি, তত্তকং তস্স সণ্ঠানন্তি দট্ঠব্বং. অথ ৰা পুরত্থিমদিসাসণ্ঠানং. ৰুত্তঞ্হি জাতকট্ঠকথাযং (জা. অট্ঠ. ৫.২১.২৫৫) ‘‘পুরত্থিমদিসা রত্তৰণ্ণতায উত্তমরূপধরা হুত্ৰা দিস্সতী’’তি.

কিস্মিং কালে চ দেসে চ, অরুণো সমুগচ্ছতীতি এত্থ এস অরুণো সূরিযুগ্গমনস্স পুরে কালে পুরত্থিমদিসাযং উগ্গচ্ছতি. ৰুত্তঞ্হেতং উদানট্ঠকথাযং (উদা. অট্ঠ. ২৩) ‘‘উদ্ধস্তে অরুণেতি উগ্গতে অরুণে, অরুণো নাম পুরত্থিমদিসাযং সূরিযোদযতো পুরেতরমেৰ উট্ঠিতোভাসো’’তি. অভিধানপ্পদীপিকাযঞ্চ ‘‘সূরস্সোদযতো পুব্বুট্ঠিতরংসী’’তি.

কিং পচ্চক্খসিদ্ধো এসো, উদাহু অনুমানতোতি এত্থ অযং অরুণো নাম পচ্চক্খসিদ্ধো এৰ, ন অনুমানসিদ্ধো. কস্মা ৰিঞ্ঞাযতীতি চে? চক্খুৰিঞ্ঞাণগোচরৰণ্ণাযতনভাৰতো. অক্খস্স পতীতি পচ্চক্খং, চক্খুরূপানং অভিমুখভাৰেন আপাথগতত্তা চক্খুৰিঞ্ঞাণং হোতি. ৰুত্তঞ্হেতং ভগৰতা ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি (ম. নি. ১.২০৪, ৪০০; ৩.৪২১, ৪২৫, ৪২৬; সং. নি. ২.৪৩, ৪৪, ৪৫, সং. নি. ৪.৬০; কথা. ৪৬৫, ৪৬৭), তস্মা অযং অরুণৰণ্ণো চক্খুনা দিস্ৰা জানিতব্বতো পচ্চক্খসিদ্ধোযেৰ হোতি, ন এৰং সতি এৰং ভৰেয্যাতি অনুমানেন পুনপ্পুনং চিন্তনেন সিদ্ধোতি. ইমং পঞ্হৰিস্সজ্জনং সাধুকং মনসি করিত্ৰা পণ্ডিতেহি রত্তোভাসোযেৰ অরুণোতি পচ্চেতব্বো সল্লক্খেতব্বোতি.

কস্মা পন ইমস্মিং ঠানে অরুণকথা ৰুত্তাতি? ইমিস্সা অরুণকথায মহাৰিসযভাৰতো. কথং? উপোসথিকা উপাসকা চ উপাসিকাযো চ অরুণুগ্গমনং তথতো অজানন্তা অনুগ্গতেযেৰ অরুণে উগ্গতসঞ্ঞায খাদনীযং ৰা খাদন্তি, ভোজনীযং ৰা ভুঞ্জন্তি, মালাগন্ধাদীনি ৰা ধারেন্তি, ততো তেসং সীলং ভিজ্জতি. সামণেরা তথেৰ ৰিকালভোজনং ভুঞ্জিত্ৰা সীলৰিনাসং পাপুণন্তি. নিস্সযপটিপন্নকা ভিক্খূ আচরিযুপজ্ঝাযেহি ৰিনা বহিসীমে চরন্তা নিস্সযপ্পস্সম্ভনং পাপুণন্তি, অন্তোৰস্সে ভিক্খূ উপচারসীমতো বহিগচ্ছন্তা ৰস্সচ্ছেদং, তেচীৰরিকা ভিক্খূ অবদ্ধসীমাযং চীৰরেন ৰিপ্পৰসন্তা নিস্সগ্গিযপাচিত্তিযং, তথা সত্তব্ভন্তরসীমাযং, সহসেয্যপ্পহোনকট্ঠানে অনুপসম্পন্নমাতুগামেহি সহ সযন্তা পাচিত্তিযং, তথা যাৰকালিকং ভুঞ্জন্তা ভিক্খূ, পারিৰাসিকাদযো ৰত্তং নিক্খিপন্তা রত্তিচ্ছেদং. এৰমাদিঅনেকাদীনৰসম্ভৰতো লজ্জিপেসলানং ভিক্খূনং তথতো অরুণুগ্গমনস্স জাননত্থং ৰুত্তাতি দট্ঠব্বা.

কেচি পন ভিক্খূ অড্ঢরত্তিসমযে ঘটিসুঞ্ঞত্তা অড্ঢরত্তিকালং অতিক্কম্ম অঞ্ঞদিৰসো হোতি, তস্মা তস্মিং কালে অরুণং উট্ঠিতং নাম হোতীতি মঞ্ঞমানা অড্ঢরত্তিং অতিক্কম্ম খাদনীযভোজনীযাদীনি ভুঞ্জন্তি, তে পন বুদ্ধসমযং অজানন্তা ৰেদসমযমেৰ মনসি করোন্তা এৰং করোন্তি, তস্মা তেসং তংকরণং পমাণং ন হোতি. বহৰো পন ভিক্খূ অরুণস্স পচ্চক্খভাৰং অজানন্তা অনুমানৰসেন চিন্তিতুঞ্চ অসক্কোন্তা অনুস্সৰৰসেনেৰ পরৰচনং সদ্দহন্তা অম্হাকং আচরিযা অরুণুগ্গমনৰেলাযং উট্ঠায গচ্ছন্তা সূরিযুগ্গমনৰেলাযং দ্ৰিসহস্সদণ্ডপ্পমাণং ঠানং পাপুণন্তি, তিসহস্সদণ্ডপ্পমাণং ঠানং পাপুণন্তীতি চ ৰদন্তি. ইমম্হা ৰিহারা অসুকং নাম ৰিহারং অসুকং নাম চেতিযং অসুকং নাম গামং পাপুণন্তীতিআদীনি চ ৰদন্তীতি এৰং অনুস্সৰৰচনং ৰদন্তি, তম্পি অপ্পমাণং. কস্মা? অদ্ধানং নাম বলৰন্তস্স জৰসম্পন্নস্স চ রস্সং হোতি, দুব্বলস্স সন্তস্স চ দীঘং হোতি. ৰুত্তঞ্হি ভগৰতা –

‘‘দীঘা জাগরতো রত্তি, দীঘং সন্তস্স যোজনং;

দীঘো বালান সংসারো, সদ্ধম্মং অৰিজানত’’ন্তি. (ধ. প. ৬০);

তস্মা অদ্ধানং নাম সব্বেসং একসদিসং ন হোতীতি অরুণুগ্গমনস্স লক্খণং ভৰিতুং ন সক্কা, ন চ তে আযস্মন্তো পিটকত্তযতো কিঞ্চি সাধকভূতং ৰচনং আহরন্তি, অসক্খিকং অড্ডং করোন্তি ৰিয যথাজ্ঝাসযমেৰ ৰদন্তীতি পমাণং ন হোতি.

অঞ্ঞে পন –

‘‘অতীতরত্তিযা যামো;

পচ্ছিমোড্ঢমমুস্স ৰা;

ভাৰিনিযাদিপ্পহারো;

তদড্ঢং ৰাজ্জতেহ্য হোতি –

কচ্চাযনসারপ্পকরণাগতং গাথং ৰত্ৰা অতীতরত্তিযা পচ্ছিমো যামো অজ্জ পরিযাপন্নো, তস্মা পচ্ছিমযামস্স আদিতো পট্ঠায অরুণং উগ্গচ্ছতী’’তি ৰদন্তি. অযং ৰাদো সকারণসঞ্ঞাপকত্তা পুরিমেহি বলৰা হোতি, এৰং সন্তেপি অযুত্তোযেৰ. কস্মা? অযঞ্হি গাথা বাহিরসদ্দসত্থে জঙ্গদাসপ্পকরণে ৰুত্তনযেন অজ্জ ভৰা অজ্জতনীতি ৰুত্তঅজ্জৰোহারস্স পৰত্তনকালং দস্সেতুং ৰুত্তা, ন পিটকত্তযে ৰুত্তস্স অরুণুগ্গমনস্স কালং দস্সেতুং, তস্মা অঞ্ঞসাধ্যস্স অঞ্ঞসাধকেন সাধিতত্তা অযুত্তোযেৰ.

অপরে পন ‘‘পহারো যামসঞ্ঞিতো’’তি অভিধানপ্পদীপিকাযং ৰুত্তত্তা পহারযামসদ্দানং একত্থত্তা তত্থেৰ ‘‘তিযামা সংৰরী ভৰে’’তি ৰুত্তত্তা রত্তিযা চ তিযামভাৰতো পাল়িযঞ্চ (উদা. ৪৫; চূল়ৰ. ৩৮৩) ‘‘অভিক্কন্তা, ভন্তে, রত্তি, নিক্খন্তো পচ্ছিমো যামো, উদ্ধস্তো অরুণো’’তি আগতত্তা ইদানি রত্তিযা চতূসু পহারেসু ততিযপ্পহারস্স অৰসানে অরুণো উগ্গতো, তস্মা অৰসেসএকপ্পহারমত্তো কালো দিৰসভাগং ভজতীতি ৰদেয্যুং, অযং ৰাদো ততিযৰাদতোপি বলৰতরো. কস্মা? ঞাপকঞাপ্যানং অনুরূপভাৰতো. তথা হি ‘‘পহারো যামসঞ্ঞিতো’’তি অযং ঞাপকো পহারযামানং একত্থভাৰস্স অনুরূপো, ‘‘তিযামা সংৰরীভৰে’’তি অযং রত্তিযা তিযামভাৰস্স, ‘‘পাল়িযঞ্চা’’তিআদি ততিযপ্পহারস্স অৰসানে অরুণুগ্গমনস্স, তথাপি অযুত্তোযেৰ হোতি. কস্মা? ‘‘অৰসেসএকপ্পহারমত্তো কালো দিৰসভাগং ভজতী’’তি ৰচনস্স ৰিরুদ্ধত্তা. মজ্ঝিমদেসে হি দসঘটিকাপমাণস্স কালস্স একপ্পহারত্তা সব্বা রত্তি তিযামাৰ হোতি, ন চতুযামা, ইদানি পন পচ্চন্তৰিসযেসু সত্তট্ঠঘটিকামত্তস্স কালস্স একপ্পহারকতত্তা চতুপ্পহারা ভৰতি, তস্মা মজ্ঝিমদেসৰোহারং গহেত্ৰা অভিধানপ্পদীপিকাযঞ্চ ‘‘তিযামা সংৰরী ভৰে’’তি ৰুত্তং, পাল়িযঞ্চ (উদা. ৪৫; চূল়ৰ. ৩৮৩) ‘‘নিক্খন্তো পচ্ছিমো যামো, উদ্ধস্তো অরুণো’’তি, তস্মা রত্তিপরিযোসানেযেৰ অরুণো উগ্গতোতি দট্ঠব্বো. তথা হি ৰুত্তং ৰিমতিৰিনোদনিযং (ৰি. ৰি. টী. মহাৰগ্গ ২.২০১) ‘‘তথা পারিৰাসিকাদীনম্পি অরুণং অনুট্ঠাপেত্ৰা ৰত্তং নিক্খিপন্তানং রত্তিচ্ছেদো ৰুত্তো, উগ্গতে অরুণে নিক্খিপিতব্বন্তি হি ৰুত্ত’’ন্তি.

সহসেয্যসিক্খাপদেপি (পাচি. ৫২-৫৪) ‘‘অনুপসম্পন্নেহি সহ নিৰুত্থভাৰপরিমোচনত্থং পুরারুণা নিক্খমিত্ৰা’’তিআদি ৰুত্তং. এৰং চীৰরৰিপ্পৰাসাদীসু চ সব্বত্থ রত্তিপরিযোসানে আগমনৰসেন অরুণুগ্গমনং দস্সিতং, ন অতীতারুণৰসেনাতি. জাতকট্ঠকথাযম্পি (জা. অট্ঠ. ৫.২১.২৫৫) ‘‘রত্তিপরিযোসানেতি অত্থো’’তি. ন কেৰলং মজ্ঝিমদেসেসু রত্তিযাযেৰ তিপ্পহারভাৰো হোতি, অথ খো দিৰসস্সপি. তথা হি ৰুত্তং অট্ঠসালিনিযং (ধ. স. অট্ঠ. নিদানকথা) ‘‘সম্মাসম্বুদ্ধস্স অভিধম্মদেসনাপরিযোসানঞ্চ তেসং ভিক্খূনং সত্তপ্পকরণউগ্গহণঞ্চ একপ্পহারেনেৰ হোতী’’তি, মূলটীকাযঞ্চ (ধ. স. মূলটী. নিদানকথাৰণ্ণনা) ‘‘একপ্পহারেনাতি এত্থ পহারোতি দিৰসস্স ততিযভাগো ৰুচ্চতী’’তি, তস্মা একো রত্তিদিৰো ছপ্পহারো হোতীতি ৰিঞ্ঞাযতি. এৰং মজ্ঝিমদেসৰোহারেন তিযামসঙ্খাতস্স তিপ্পহারস্স অৰসানে সব্বরত্তিপরিযোসানে উট্ঠিতং অরুণং পচ্চন্তদেসৰোহারেন তিপ্পহারস্স অৰসানেতি গহেত্ৰা একপ্পহারাৰসেসকালে অরুণো উগ্গতোতি ৰুত্তত্তা অযম্পি ৰাদো অযুত্তোযেৰ হোতীতি দট্ঠব্বো.

বহৰো পন পণ্ডিতা ‘‘খুদ্দসিক্খানিস্সযে ৰুত্তং –

‘সেতরুণঞ্চ পঠমং, দুতিযং নন্দিযাৰট্টং;

ততিযং তম্বৰণ্ণঞ্চ, চতুত্থং গদ্রভং মুখ’ন্তি. –

ইমং গাথং নিস্সায একরত্তিযং অরুণো চতুক্খত্তুং উট্ঠহতি, তত্থ পঠমং সেতৰণ্ণং হোতি, দুতিযং নন্দিযাৰট্টপুপ্ফৰণ্ণং হোতি, ততিযং তম্বৰণ্ণং হোতি, চতুত্থং গদ্রভমুখৰণ্ণং হোতী’’তি ৰত্ৰা রত্তোভাসতো পুরেতরং অতীতরত্তিকালেযেৰ ৰত্তনিক্খিপনাদিকম্মং করোন্তি. তেসং তং করণং অনিসম্মকারিতং আপজ্জতি. অযঞ্হি গাথা নেৰ পাল়িযং দিস্সতি, ন অট্ঠকথাযং, ন টীকাসু, কেৰলং নিস্সযে এৰ, নিস্সযেসু চ একস্মিংযেৰ খুদ্দসিক্খানিস্সযে দিস্সতি, ন অঞ্ঞনিস্সযেসু, তত্থাপি নেৰ পুব্বাপরসম্বন্ধো দিস্সতি, ন হেতুফলাদিভাৰো, ন চ লিঙ্গনিযমোতি ন নিস্সযকারাচরিযেন ঠপিতা ভৰেয্য, অথ খো পচ্ছা অঞ্ঞেহি লেখকেহি ৰা অত্তনো ইচ্ছানুরূপং লিখিতা ভৰেয্য, তস্মা অযং গাথা কুতো আভতা পাল়িতো ৰা অট্ঠকথাতো ৰা টীকাতো ৰা ৰিনযতো ৰা সুত্তন্ততো ৰা অভিধম্মতো ৰাতি পভৰং অপরিযেসিত্ৰা নিস্সযে দিট্ঠমত্তমেৰ সারতো গহেত্ৰা পাল়িযট্ঠকথাটীকাসু ৰুত্তৰচনং অনিসামেত্ৰা কতত্তা অনিসম্মকারিতং আপজ্জতি.

তত্রাযং পাল়ি ‘‘তেন খো পন সমযেন বুদ্ধো ভগৰা সীতাসু হেমন্তিকাসু রত্তীসু অন্তরট্ঠকাসু হিমপাতসমযে রত্তিং অজ্ঝোকাসে একচীৰরো নিসীদি, ন ভগৰন্তং সীতং অহোসি. নিক্খন্তে পঠমে যামে সীতং ভগৰন্তং অহোসি, দুতিযং ভগৰা চীৰরং পারুপি, ন ভগৰন্তং সীতং অহোসি. নিক্খন্তে মজ্ঝিমে যামে সীতং ভগৰন্তং অহোসি, ততিযং ভগৰা চীৰরং পারুপি, ন ভগৰন্তং সীতং অহোসি. নিক্খন্তে পচ্ছিমে যামে উদ্ধস্তে অরুণে নন্দিমুখিযা রত্তিযা সীতং ভগৰন্তং অহোসি, চতুত্থং ভগৰা চীৰরং পারুপি, ন ভগৰন্তং সীতং অহোসী’’তি. অযং মহাৰগ্গে (মহাৰ. ৩৪৬) চীৰরক্খন্ধকাগতা ৰিনযপাল়ি. পাল়িযং নন্দিমুখিযাতি তুট্ঠিমুখিযা, পসন্নদিসামুখাযাতি অত্থো. অযং তংসংৰণ্ণনায ৰিমতিৰিনোদনীপাঠো (ৰি. ৰি. টী. মহাৰগ্গ ২.৩৪৬).

‘‘তেন খো পন সমযেন বুদ্ধো ভগৰা সাৰত্থিযং ৰিহরতি পুব্বারামে মিগারমাতুপাসাদে. তেন খো পন সমযেন ভগৰা তদহুপোসথে ভিক্খুসঙ্ঘপরিৰুতো নিসিন্নো হোতি. অথ খো আযস্মা আনন্দো অভিক্কন্তায রত্তিযা নিক্খন্তে পঠমে যামে উট্ঠাযাসনা একংসং উত্তরাসঙ্গং করিত্ৰা যেন ভগৰা তেনঞ্জলিং পণামেত্ৰা ভগৰন্তং এতদৰোচ – অভিক্কন্তা, ভন্তে রত্তি, নিক্খন্তো পঠমো যামো, চিরনিসিন্নো ভিক্খুসঙ্ঘো, উদ্দিসতু, ভন্তে, ভগৰা ভিক্খূনং পাতিমোক্খন্তি. এৰং ৰুত্তে ভগৰা তুণ্হী অহোসি. দুতিযম্পি খো আযস্মা আনন্দো অভিক্কন্তায রত্তিযা নিক্খন্তে মজ্ঝিমে যামে উট্ঠাযাসনা একংসং উত্তরাসঙ্গং করিত্ৰা যেন ভগৰা তেনঞ্জলিং পণামেত্ৰা ভগৰন্তং এতদৰোচ – অভিক্কন্তা, ভন্তে, রত্তি, নিক্খন্তো মজ্ঝিমো যামো, চিরনিসিন্নো ভিক্খুসঙ্ঘো, উদ্দিসতু, ভন্তে, ভগৰা ভিক্খূনং পাতিমোক্খন্তি. দুতিযম্পি ভগৰা তুণ্হী অহোসি. ততিযম্পি খো আযস্মা আনন্দো অভিক্কন্তায রত্তিযা নিক্খন্তে পচ্ছিমে যামে উদ্ধস্তে অরুণে নন্দিমুখিযা রত্তিযা উট্ঠাযাসনা একংসং উত্তরাসঙ্গং করিত্ৰা যেন ভগৰা তেনঞ্জলিং পণামেত্ৰা ভগৰন্তং এতদৰোচ – অভিক্কন্তা, ভন্তে, রত্তি, নিক্খন্তো পচ্ছিমো যামো, উদ্ধস্তং অরুণং, নন্দিমুখী রত্তি, চিরনিসিন্নো ভিক্খুসঙ্ঘো, উদ্দিসতু ভন্তে ভগৰা ভিক্খূনং পাতিমোক্খন্তি. অপরিসুদ্ধা, আনন্দ, পরিসা’’তি (চূল়ৰ. ৩৮৩). অযং চূল়ৰগ্গে পাতিমোক্খট্ঠপনক্খন্ধকাগতা অপরাপি ৰিনযপাল়ি.

নন্দিমুখিযা রত্তিযাতি অরুণুট্ঠিতকালে পীতিমুখা ৰিয রত্তি খাযতি. তেনাহ ‘‘নন্দিমুখিযা’’তি (চূল়ৰ. অট্ঠ. ৩৮৩) অযং তংসংৰণ্ণনাভূতসমন্তপাসাদিকট্ঠকথাপাঠো. অভিক্কন্তাতি পরিক্খীণা. উদ্ধস্তে অরুণেতি উগ্গতে অরুণসীসে. নন্দিমুখিযাতি তুট্ঠিমুখিযা. অযং তংসংৰণ্ণনাভূতসারত্থদীপনীপাঠো (সারত্থ. টী. চূল়ৰগ্গ ৩.৩৮৩). পাল়িযং নন্দিমুখিযাতি ওদাতদিসামুখিতায তুট্ঠমুখিযা. অযং তংসংৰণ্ণনায (ৰি. ৰি. টী. চূল়ৰগ্গ ২.২৮৩) ৰিমতিৰিনোদনীপাঠো.

‘‘ততিযম্পি খো আযস্মা আনন্দো অভিক্কন্তাযরত্তিযা নিক্খন্তে পচ্ছিমে যামে উদ্ধস্তে অরুণে নন্দিমুখিযা রত্তিযা উট্ঠাযাসনা একংসং চীৰরং কত্ৰা যেন ভগৰা তেনঞ্জলিং পণামেত্ৰা ভগৰন্তং এতদৰোচ – অভিক্কন্তা, ভন্তে, রত্তি, নিক্খন্তো পচ্ছিমো যামো, উদ্ধস্তো অরুণো, নন্দিমুখী রত্তি, চিরনিসিন্না আগন্তুকা ভিক্খূ, পটিসম্মোদতু, ভন্তে, ভগৰা আগন্তুকে ভিক্খূ’’তি. অযং উদানাগতা সুত্তন্তপাল়ি (উদা. ৪৫). উদ্ধস্তে অরুণেতি উগ্গতে অরুণে. অরুণো নাম পুরত্থিমদিসাযং সূরিযোদযতো পুরেতরমেৰ উট্ঠিতোভাসো. নন্দিমুখিযা রত্তিযাতি অরুণস্স উগ্গতত্তা এৰ অরুণোভায সূরিযালোকূপজীৰিনো সত্তে নন্দাপনমুখিযা রত্তিযা জাতায, ৰিভাযমানাযাতি অত্থো. অযং তংসংৰণ্ণনাভূতা উদানট্ঠকথা (উদা. অট্ঠ. ২৩).

ইতি এত্তকাসু ৰিনযসুত্তন্তাগতাসু পাল়িযট্ঠকথাটীকাসু একস্মিম্পিঠানে অরুণো চতুক্খত্তুং উগ্গতোতি নত্থি, একৰারমেৰ ৰুত্তো. চতুব্বিধৰণ্ণসমন্নাগতোতিপি নত্থি, একৰণ্ণো এৰ ৰুত্তো. জাতকট্ঠকথাযম্পি (জা. অট্ঠ. ৫.২১.২৫৫) রত্তৰণ্ণো এৰ ৰুত্তো, ন সেতৰণ্ণাদিকো. নন্দিমুখীতি চ সত্তে নন্দাপনদিসামুখী রত্তি এৰ ৰুত্তা, ন অরুণস্স নন্দিযাৰট্টপুপ্ফসদিসৰণ্ণতা. তেনাহ ‘‘সত্তে নন্দাপনমুখিযা রত্তিযা’’তি. এৰং অভিধানপ্পদীপিকাপকরণৰচনেন ৰিরুদ্ধত্তা পাল়িযট্ঠকথাদীহি অসংসন্দনতো দুব্বলসাধকত্তা চ অযম্পি ৰাদো অযুত্তোযেৰাতি দট্ঠব্বো, তস্মা সম্মাসম্বুদ্ধস্স আণং অনতিক্কন্তেন লজ্জিভিক্খুনা যদি কেনচি অপ্পটিচ্ছন্নে ৰিৰটোকাসে হোতি, মচ্ছক্খিসমানঅব্যত্তরত্তোভাসস্স পঞ্ঞাযমানকালতো পট্ঠায ৰত্তনিক্খিপনাদিকম্মং কাতব্বং.

যদি পন পব্বতাদিনা পটিচ্ছন্নট্ঠানং হোতি, যত্তকেন কালেন ৰিৰটট্ঠানে রত্তোভাসো পঞ্ঞাযতি, সূরিযমণ্ডলস্স দিস্সনকালতো একঘটিকামত্তেন ৰা দ্ৰিঘটিকামত্তেন ৰা তত্তকং কালং সল্লক্খেত্ৰা ইমস্মিং কালে অরুণো উগ্গতো ভৰেয্যাতি তক্কেত্ৰা কাতব্বং, সংসযং অনিচ্ছন্তেন ততোপি কঞ্চিকালং অধিৰাসেত্ৰা নিস্সংসযকালে কত্তব্বং, অযং তত্থ সামীচি. অযং পন ৰাদো যথাৰুত্তপ্পকরণৰচনেহি সুট্ঠু সংসন্দতি যথা গঙ্গোদকেন যমুনোদকং, তস্মা পণ্ডিতেহি পুনপ্পুনং পুব্বাপরং আলোল়েন্তেন মনসি কাতব্বো. এৰং মনসি করিত্ৰা অরুণপটিসংযুত্তেসু ঠানেসু সংসযো ছিন্দিতব্বো, সংসযং ছিন্দিত্ৰা ৰিসারদেন হুত্ৰা তং তং কম্মং কাতব্বন্তি.

ৰিসুদ্ধত্থায সীলস্স, ভিক্খূনং পিযসীলিনং;

কতারুণকথা এসা, ন সারম্ভাদিকারণা.

তস্মা সুট্ঠূপধারেত্ৰা, যুত্তং গণ্হন্তু সাধৰো;

অযুত্তঞ্চে ছড্ডযন্তু, মা হোন্তু দুম্মনাদযোতি.

ইতি ৰিনযসঙ্গহসংৰণ্ণনাভূতে ৰিনযালঙ্কারে

দিৰাসেয্যৰিনিচ্ছযকথালঙ্কারো নাম

পঠমো পরিচ্ছেদো.

২. পরিক্খারৰিনিচ্ছযকথা

৬. এৰং দিৰাসেয্যৰিনিচ্ছযং কথেত্ৰা ইদানি পরিক্খারৰিনিচ্ছযং কথেতুং ‘‘পরিক্খারোতি সমণপরিক্খারো’’তিআদিমাহ. তত্থ দিৰাসেয্যৰিনিচ্ছযকথায আদিম্হি ৰুত্তং ‘‘তত্থা’’তি পদং আনেত্ৰা তত্থ তেসু মাতিকাপদেসু সমভিনিৰিট্ঠস্স ‘‘পরিক্খারো’’তি পদস্স ‘‘সমণপরিক্খারো’’তি অত্থো দট্ঠব্বোতি যোজনা, এস নযো ইতো পরেপি. সমণপরিক্খারো ৰুত্তো, ন গিহিপরিক্খারোতি অধিপ্পাযো. পরিসমন্ততো করিযতেতি পরিক্খারো, ছত্তাদিকো. তত্রাতি সমণপরিক্খারে. কপ্পতীতি কপ্পিযো, ন কপ্পিযো অকপ্পিযো, কপ্পিযো চ অকপ্পিযো চ কপ্পিযাকপ্পিযো, সমাহারদ্ৰন্দেপি পুল্লিঙ্গমিচ্ছন্তি পণ্ডিতা. কপ্পিযাকপ্পিযো চ সো পরিক্খারো চেতি তথা, তস্স ৰিনিচ্ছযো কপ্পিযাকপ্পিযপরিক্খারৰিনিচ্ছযো.

কেচি তালপণ্ণচ্ছত্তন্তি ইদং উপলক্খণমত্তং. সব্বম্পি হি ছত্তং তথাকরিযমানং ন ৰট্টতি. তেনেৰাহ ৰজিরবুদ্ধিটীকাযং (ৰজির. টী. পারাজিক ৮৫) ‘‘সব্বপরিক্খারেসু ৰণ্ণমট্ঠৰিকারং করোন্তস্স দুক্কটন্তি দীপেন্তেন ন ৰট্টতীতি ৰুত্তন্তি ৰেদিতব্ব’’ন্তি. ন ৰণ্ণমট্ঠত্থাযাতি ইমিনা থিরকরণত্থং একৰণ্ণসুত্তেন ৰিনন্ধিযমানং যদি ৰণ্ণমট্ঠং হোতি, তত্থ ন দোসোতি দস্সেতি. আরগ্গেনাতি নিখাদনমুখেন. যদি ন ৰট্টতি, তাদিসং ছত্তদণ্ডং লভিত্ৰা কিং কাতব্বন্তি আহ ‘‘ঘটকং ৰা’’তিআদি. সুত্তকেন ৰা দণ্ডো ৰেঠেতব্বোতি যথা লেখা ন পঞ্ঞাযতি, তথা ৰেঠেতব্বো. দণ্ডবুন্দেতি দণ্ডমূলে, ছত্তদণ্ডস্স হেট্ঠিমকোটিযন্তি অত্থো. ছত্তমণ্ডলিকন্তি ছত্তস্স অন্তো খুদ্দকমণ্ডলং, ছত্তপঞ্জরে মণ্ডলাকারেন বদ্ধদণ্ডৰলযং ৰা. উক্কিরিত্ৰাতি নিন্নং, উন্নতং ৰা কত্ৰা উট্ঠাপেত্ৰা. সা ৰট্টতীতি সা লেখা রজ্জুকেহি বন্ধন্তু ৰা মা ৰা, বন্ধিতুং যুত্তট্ঠানত্তা ৰট্টতি. তেন ৰুত্তং আচরিযবুদ্ধদত্তমহাথেরেন –

‘‘ছত্তং পণ্ণমযং কিঞ্চি, বহি অন্তো চ সব্বসো;

পঞ্চৰণ্ণেন সুত্তেন, সিব্বিতুং ন চ ৰট্টতি.

‘‘ছিন্দিতুং অড্ঢচন্দং ৰা, পণ্ণে মকরদন্তকং;

ঘটকং ৰাল়রূপং ৰা, লেখা দণ্ডে ন ৰট্টতি.

‘‘সিব্বিতুং একৰণ্ণেন, ছত্তং সুত্তেন ৰট্টতি;

থিরত্থং পঞ্চৰণ্ণেন, পঞ্জরং ৰা ৰিনন্ধিতুং.

‘‘ঘটকং ৰাল়রূপং ৰা, লেখা ৰা পন কেৰলা;

ছিন্দিত্ৰা ৰাপি ঘংসিত্ৰা, ধারেতুং পন ৰট্টতি.

‘‘অহিচ্ছত্তকসণ্ঠানং, দণ্ডবুন্দম্হি ৰট্টতি;

উক্কিরিত্ৰা কতা লেখা, বন্ধনত্থায ৰট্টতী’’তি.

তস্স ৰণ্ণনাযম্পি ছত্তং পণ্ণমযং কিঞ্চীতি তালপণ্ণাদিপণ্ণচ্ছদনং যং কিঞ্চি ছত্তং. বহীতি উপরি. অন্তোতি হেট্ঠা. সিব্বিতুন্তি রূপং দস্সেত্ৰা সূচিকম্মং কাতুং. পণ্ণেতি ছদনপণ্ণে. অড্ঢচন্দন্তি অড্ঢচন্দাকারং. মকরদন্তকন্তি মকরদন্তাকারং, যং ‘‘গিরিকূট’’ন্তি ৰুচ্চতি. ছিন্দিতুং ন ৰট্টতীতি সম্বন্ধো. মুখৰট্টিযা নামেত্ৰা বদ্ধপণ্ণকোটিযা ৰা মত্থকমণ্ডলকোটিযা ৰা গিরিকূটাদিং করোন্তি, ইমিনা তং পটিক্খিত্তং. দণ্ডেতি ছত্তদণ্ডে. ঘটকন্তি ঘটাকারো. ৰাল়রূপং ৰাতি ব্যগ্ঘাদিৰাল়ানং রূপকং ৰা. লেখাতি উক্কিরিত্ৰা ৰা ছিন্দিত্ৰা ৰা চিত্তকম্মৰসেন ৰা কতরাজি. পঞ্চৰণ্ণানং সুত্তানং অন্তরে নীলাদিএকৰণ্ণেন সুত্তেন থিরত্থং ছত্তং অন্তো চ বহি চ সিব্বিতুং ৰা ছত্তদণ্ডগ্গাহকসলাকপঞ্জরং থিরত্থং ৰিনন্ধিতুং ৰা ৰট্টতীতি যোজনা. পঞ্চৰণ্ণানং একৰণ্ণেন থিরত্থন্তি ইমিনা অনেকৰণ্ণেহি সুত্তেহি ৰণ্ণমট্ঠত্থায সিব্বিতুঞ্চ ৰিনন্ধিতুঞ্চ ন ৰট্টতীতি দীপেতি. পোত্থকেসু পন ‘‘পঞ্চৰণ্ণেনা’’তি পাঠো দিস্সতি, তস্স একৰণ্ণেন পঞ্চৰণ্ণেন ৰা সুত্তেন থিরত্থং সিব্বিতুং ৰিনন্ধিতুং ৰা ৰট্টতীতি যোজনা কাতব্বা হোতি.

এত্থ চ হেট্ঠা ৰুত্তেন ‘‘পঞ্চৰণ্ণেন সুত্তেন সিব্বিতুং ন চ ৰট্টতী’’তি পাঠেন চ ‘‘কেচি তালপণ্ণচ্ছত্তং অন্তো ৰা বহি ৰা পঞ্চৰণ্ণেন সুত্তেন সিব্বেত্ৰা ৰণ্ণমট্ঠং করোন্তি, তং ন ৰট্টতি, একৰণ্ণে পন নীলেন ৰা পীতকেন ৰা যেন কেনচি সুত্তেন অন্তো ৰা বহি ৰা সিব্বিতুং, ছত্তদণ্ডগ্গাহকং সলাকপঞ্জরং ৰা ৰিনন্ধিতুং ৰট্টতি, তঞ্চ খো থিরকরণত্থং, ন ৰণ্ণমট্ঠত্থাযা’’তি অট্ঠকথাপাঠেন চ ৰিরুজ্ঝতি, তস্মা সো ন গহেতব্বো.

লেখা ৰা পন কেৰলাতি যথাৰুত্তপ্পকারা সকলা লেখা ৰা. ছিন্দিত্ৰাতি উক্কিরিত্ৰা কতং ছিন্দিত্ৰা. ঘংসিত্ৰাতি চিত্তকম্মাদিৰসেন কতং ঘংসিত্ৰা. দণ্ডবুন্দম্হীতি ছত্তদণ্ডস্স পঞ্জরে গাহণত্থায ফালিতবুন্দম্হি, মূলেতি অত্থো. অযমেত্থ নিস্সন্দেহে ৰুত্তনযো. খুদ্দসিক্খাগণ্ঠিপদে পন ‘‘ছত্তপিণ্ডিযা মূলে’’তি ৰুত্তং. অহিচ্ছত্তকসণ্ঠানন্তি ফুল্লঅহিচ্ছত্তকাকারং. রজ্জুকেহি গাহাপেত্ৰা দণ্ডে বন্ধন্তি, তস্মিং বন্ধনট্ঠানে ৰলযমিৰ উক্কিরিত্ৰাতি ৰলযং ৰিয উপট্ঠাপেত্ৰা. বন্ধনত্থাযাতি ৰাতেন যথা ন চলতি, এৰং রজ্জূহি দণ্ডে পঞ্জরস্স বন্ধনত্থায. উক্কিরিত্ৰা কতা লেখা ৰট্টতীতি যোজনা. যথা ৰাতপ্পহারেন অচলনত্থং ছত্তমণ্ডলিকং রজ্জুকেহি গাহাপেত্ৰা দণ্ডে বন্ধন্তি, তস্মিং বন্ধনট্ঠানে ৰলযমিৰ উক্কিরিত্ৰা লেখং ঠপেন্তি, সা ৰট্টতীতি. সচেপি ন বন্ধতি, বন্ধনারহট্ঠানত্তা ৰলযং উক্কিরিত্ৰা ৰট্টতীতি গণ্ঠিপদে ৰত্তন্তীতি আগতং, তস্মা পক্খরণেসু আগতনযেনেৰ ছত্তে পটিপজ্জিতব্বন্তি.