সেদমোচনগাথা

অৰিপ্পৰাসপঞ্হাৰণ্ণনা

৪৭৯. সেদমোচনগাথাসু অকপ্পিযসম্ভোগোতি অনুপসম্পন্নেহি সদ্ধিং কাতুং পটিক্খিত্তো উপোসথাদিসংৰাসো এৰ ৰুত্তো. পঞ্হা মেসাতি এত্থ ম-কারো পদসন্ধিকরো. এসাতি চ লিঙ্গৰিপল্লাসৰসেন ৰুত্তং, পঞ্হো এসোতি অত্থো. পঞ্হ-সদ্দো ৰা দ্ৰিলিঙ্গো দট্ঠব্বো. তেনাহ ‘‘এসা পঞ্হা’’তিআদি.

গরুভণ্ডং সন্ধাযাতি গরুভণ্ডেন গরুভণ্ডপরিৰত্তনং সন্ধায. দসাতি দস অৰন্দিযপুগ্গলে. একাদসেতি অভব্বপুগ্গলে. সিক্খায অসাধারণোতি খুরভণ্ডং ধারেতুং অনুঞ্ঞাতসিক্খাপদেন ভিক্খূহি অসাধারণসিক্খাপদোতি অত্থো.

উব্ভক্খকে ন ৰদামীতি অক্খতো উদ্ধং সীসে ঠিতমুখমগ্গেপি পারাজিকং সন্ধায ন ৰদামি. অধোনাভিন্তি নাভিতো হেট্ঠা ঠিতৰচ্চপস্সাৰমগ্গেপি ৰিৰজ্জিয অঞ্ঞস্মিং সরীরপ্পদেসে মেথুনধম্মপচ্চযা কথং পারাজিকো সিযাতি অত্থো.

ছেজ্জৰত্থুন্তি পারাজিকং.

অৰিপ্পৰাসপঞ্হাৰণ্ণনা নিট্ঠিতা.

পারাজিকাদিপঞ্হাৰণ্ণনা

৪৮০. দুস্সকুটিআদীনীতি আদি-সদ্দেন অচ্ছতরতিপুপট্টাদীহি, তিণপণ্ণাদীহি চ পটিচ্ছন্নকুটিযো সঙ্গণ্হাতি. তাদিসায হি কুটিযা বহি ঠত্ৰা অন্তো ঠিতায ইত্থিযা মগ্গে দুস্সাদিনা সন্থতং কত্ৰা পৰেসেন্তোপি পারাজিকো সিযা. লিঙ্গপরিৰত্তং সন্ধায ৰুত্তাতি লিঙ্গে পরিৰত্তে পটিগ্গহণস্স ৰিজহনতো পুন অপ্পটিগ্গহেত্ৰা পরিভুঞ্জনাপত্তিং সন্ধায ৰুত্তং.

পাল়িযং ভিক্খূ সিযা ৰীসতিযা সমাগতাতি ৰীসতিযা সঙ্খাতায ভিক্খূ সমাগতা, এতেন সব্বকম্মারহতং সঙ্ঘস্স দস্সেতি.

নিৰত্থোতি গাথায অন্তরৰাসকেন নিৰত্থো উত্তরাসঙ্গেন দিগুণং কত্ৰা পারুতসঙ্ঘাটিযো. ইতি তানি তীণিপি চীৰরানি কাযে গতানেৰ ভিক্খুনিযা বিন্দুমত্তং কাল়কং উদকেন ধোৰিতমত্তে নিস্সগ্গিযানি হোন্তীতি অত্থো.

ইত্থিং হনেতি গাথায ন মাতুভূতং ইত্থিং হনেয্য, ন পিতুভূতং পুরিসং হনেয্য. অনরিযন্তি তঞ্চ অনরহন্তমেৰ হনেয্য, এতেন অরহন্তঘাতকোপি ন হোতীতি দস্সেতি. অনন্তরং ফুসেতি আনন্তরিযং ফুসতীতি অত্থো.

৪৮১. সুপ্পতিট্ঠিত-নিগ্রোধসদিসন্তি যোজনৰিত্থতং রুক্খং সন্ধায ৰুত্তং.

সত্তরসকেসূতি ভিক্খুনীনং পঞ্ঞত্তসত্তরসসঙ্ঘাদিসেসেসু.

পারাজিকাদিপঞ্হাৰণ্ণনা নিট্ঠিতা.