অপরদুতিযগাথাসঙ্গণিকং

কাযিকাদিআপত্তিৰণ্ণনা

৪৭৪. ‘‘কতি আপত্তিযো’’তিআদিনা উপালিত্থেরেন ৰিনযস্স পাটৰত্থং সযমেৰ পুচ্ছিত্ৰা ৰিস্সজ্জনং কতং. ভিক্খুনীনংযেৰ…পে… অট্ঠৰত্থুকা নামাতি ভিক্খুনীনং পঞ্ঞত্তা একা এৰ আপত্তি অট্ঠৰত্থুকা নামাতি অত্থো.

৪৭৫. কম্মঞ্চ কম্মপাদকা চাতি এত্থ যস্মা ঞত্তিকম্মেসু ঞত্তি সযমেৰ কম্মং হোতি, ঞত্তিদুতিযঞত্তিচতুত্থেসু কম্মেসু অনুস্সাৰনসঙ্খাতস্স কম্মস্স ঞত্তিপাদকভাৰেন তিট্ঠতি, তস্মা ইমানি দ্ৰে ‘‘ঞত্তিকিচ্চানী’’তি ৰুত্তানি.

পাচিত্তিযেন সদ্ধিং দুক্কটা কতাতি দসসুপি সিক্খাপদেসু একতোউপসম্পন্নায ৰসেন ৰুত্তদুক্কটং সন্ধায ৰুত্তং. পঠমসিক্খাপদম্হীতি ভিক্খুনোৰাদৰগ্গস্স পঠমসিক্খাপদৰিভঙ্গে (পাচি. ১৪৪ আদযো). অধম্মকম্মেতি ভিক্খুনোৰাদকসম্মুতিকম্মে অধম্মকম্মে জাতে আপজ্জিতব্বা দ্ৰে আপত্তিনৰকা, ধম্মকম্মে দ্ৰে আপত্তিনৰকাতি চত্তারো নৰকা ৰুত্তা. আমকধঞ্ঞং ৰিঞ্ঞাপেত্ৰা ভুঞ্জন্তিযা ৰিঞ্ঞাপনাদিপুব্বপযোগে দুক্কটং, অজ্ঝোহারে পাচিত্তিযং. পাচিত্তিযেন সদ্ধিং দুক্কটা কতাযেৰাতি ৰুত্তং.

ৰিজহন্তী তিট্ঠতীতিআদীসু যদা ভিক্খুনিযা একেন পাদেন হত্থপাসং ৰিজহিত্ৰা ঠত্ৰা কিঞ্চি কম্মং কত্ৰা ততো অপরেন পাদেন ৰিজহিত্ৰা ঠাতুকামতা উপ্পজ্জতি, তদা সা যথাক্কমং ‘‘ৰিজহন্তী তিট্ঠতি, ৰিজহিত্ৰা তিট্ঠতী’’তি ইমং ৰোহারং লভতি. অঞ্ঞথা হিস্সা গামূপচারমোক্কন্তিযা ৰিসেসো ন সিযা হত্থপাসৰিজহনস্সাপি গমনত্তা. নিসীদতি ৰা নিপজ্জতি ৰাতি এত্থাপি যথাৰুত্তাধিপ্পাযেন অদ্ধাসনেন হত্থপাসং ৰিজহন্তী নিসীদতি, সকলেন ৰা আসনেন ৰিজহিত্ৰা নিসীদতি, অদ্ধসরীরেন ৰিজহন্তী নিপজ্জতি, সকলেন সরীরেন ৰিজহিত্ৰা নিপজ্জতীতি যোজেতব্বং.

কাযিকাদিআপত্তিৰণ্ণনা নিট্ঠিতা.

পাচিত্তিযৰণ্ণনা

৪৭৬. সব্বানি নানাৰত্থুকানীতি সপ্পিনৰনীতাদীনং পঞ্চন্নং ৰত্থূনং ভেদেন পাচিত্তিযানি পঞ্চ নানাৰত্থুকানি. এস নযো পণীতভোজনৰিসযে নৰ পাচিত্তিযানীতিআদীসুপি. এতেন ভেসজ্জপণীতভোজনসিক্খাপদানি একেকসিক্খাপদৰসেন পঞ্ঞত্তানিপি ৰত্থুভেদেন পচ্চেকং পঞ্চসিক্খাপদনৰসিক্খাপদসদিসানি ভিক্খুনীনং পাটিদেসনীযাপত্তিযো ৰিযাতি দস্সেতি. তেনেৰ ‘‘নানাৰত্থুকানী’’তি ৰুত্তং. সপ্পিং এৰ পটিগ্গহেত্ৰা অনেকভাজনেসু ঠপেত্ৰা সত্তাহং অতিক্কামেন্তস্স ভাজনগণনায সম্ভৰন্তিযো বহুকাপি আপত্তিযো একৰত্থুকা এৰ হোন্তি, এৰং সপ্পিভোজনমেৰ বহূসু ঠানেসু ৰিঞ্ঞাপেত্ৰা একতো ৰা ৰিসুং ৰিসুমেৰ ৰা ভুঞ্জন্তস্স আপত্তিযো একৰত্থুকা এৰাতি দট্ঠব্বা.

পাল়িযং একৰাচায দেসেয্য, ৰুত্তা আদিচ্চবন্ধুনাতি এত্থ ‘‘দেসেয্যাতি ৰুত্তা’’তি ইতি-সদ্দং অজ্ঝাহরিত্ৰা যোজেতব্বং. এৰং সেসেসুপি.

ভেদানুৰত্তকানন্তি এত্থ আদি-সদ্দো লুত্তনিদ্দিট্ঠো. যাৰততিযকা চ সব্বে উভতোৰিভঙ্গে আগতা, সঙ্ঘাদিসেসসামঞ্ঞেন একং, পাচিত্তিযসামঞ্ঞেন চ একং কত্ৰা ‘‘যাৰততিযকে তিস্সো’’তি ৰুত্তন্তি দট্ঠব্বং. এত্থ চ ঞত্তিযা দুক্কটং, দ্ৰীহি কম্মৰাচাহি থুল্লচ্চযাপি সন্তি এৰ. তানি মাতিকায ন আগতানি. মাতিকাগতৰসেন হেত্থ ‘‘তিস্সো’’তি ৰুত্তং.

সঙ্ঘাদীহীতি সঙ্ঘগণপুগ্গলেহি কারণভূতেহি. অব্ভুণ্হসীলোতি পরিসুদ্ধভাৰূপগমনেন অভিনৰুপ্পন্নসীলো. অভিনৰুপ্পন্নঞ্হি ‘‘অব্ভুণ্হ’’ন্তি ৰুচ্চতি, পরিসুদ্ধসীলোতি অত্থো. তেনাহ ‘‘পাকতিকো’’তি.

‘‘কোসম্বকক্খন্ধকে ৰুত্তানিসংসে’’তি ইদং কোসম্বকক্খন্ধকে ‘‘সচে মং ইমে ভিক্খূ আপত্তিযা অদস্সনে উক্খিপিস্সন্তি, ন মযা সদ্ধিং উপোসথং করিস্সন্তী’’তিআদিনা আপত্তিযা অদস্সনে আদীনৰং দস্সেত্ৰা পরেসম্পি সদ্ধায আপত্তিদেসনাৰিধানমুখেন সামত্থিযতো পকাসিতো. একতো উপোসথকরণ, পৰারণাকরণ, সঙ্ঘকম্মকরণ, আসনেনিসীদন, যাগুপানেনিসীদন, ভত্তগ্গেনিসীদন, একচ্ছন্নেসযন, যথাৰুড্ঢঅভিৰাদনাদিকরণসঙ্খাতে অট্ঠানিসংসে সন্ধায ৰুত্তং.

চতুন্নন্তি ৰিনযপিটকে আগতানং ৰসেন ৰুত্তং. কতমা পন সাতি সা চতুব্বিধা অচ্চযদেসনা কতমাতি অত্থো. অভিমারানন্তি মারণত্থায পযোজিতধনুগ্গহানং. উপট্ঠাযিকাযাতি সহসেয্যসিক্খাপদৰত্থুস্মিং আগতায.

অট্ঠন্নং ভিক্খুনীনন্তি থেরাসনতো পট্ঠায অট্ঠহি ভিক্খুনীহি ইতরায আগতায ৰুড্ঢায ভিক্খুনিযা আসনং দাতব্বং. অট্ঠন্নং পন ভিক্খুনীনং নৰকায আগতায অদাতুম্পি ৰট্টতি. তায পন সঙ্ঘনৰকাসনে লদ্ধোকাসে নিসীদিতব্বং. অথ ৰা অট্ঠন্নং ৰুড্ঢানং ভিক্খুনীনং ইতরায নৰকতরায আসনং দাতব্বং. কম্মানি নৰাতি ওসারণাদীনি নৰ এৰ.

পাচিত্তিযৰণ্ণনা নিট্ঠিতা.

অৰন্দনীযপুগ্গলাদিৰণ্ণনা

৪৭৭. দস জনাতি ‘‘দস ইমে, ভিক্খৰে, অৰন্দিযা’’তিআদিনা (পরি. ৩৩০) ৰুত্তা নৰকঅনুপসম্পন্ননানাসংৰাসকমাতুগামপণ্ডকা পঞ্চ, পারিৰাসিকাদযো চ পঞ্চাতি দস জনা.

দ্ৰাদস কম্মদোসাতি দোসযুত্তকম্মানি দ্ৰাদসাতি অত্থো. কম্মসম্পত্তিযোতি সম্পন্নকম্মানি, ৰিসুদ্ধকম্মানীতি অত্থো. এতদেৰাতি ধম্মেন সমগ্গমেৰ.

অনন্তং নিব্বানং অজিনি জিনিত্ৰা পটিলভতীতি অনন্তজিনোতি আহ ‘‘পরিযন্ত’’ইচ্চাদি. স্ৰেৰাতি সো এৰ ভগৰা.

‘‘ৰিনযং পটিজানন্তস্স, ৰিনযানি সুণোম তে’’তিআদিনা উপালিত্থেরেনেৰ একং ৰিনযধরং সম্মুখে ঠিতং পুচ্ছন্তেন ৰিয পুচ্ছিত্ৰা তেন ৰিস্সজ্জিতং ৰিয ৰিস্সজ্জনং কতং. তত্থ ৰিনযং পটিজানন্তস্সাতি ৰিনযং জানামীতি পটিজানন্তস্স. ৰিনযানীতি ৰিনযে তযা ৰুচ্চমানে সুণোম.

৪৭৮. পাল়িযং পারাজিকাতিআদি উভতোৰিভঙ্গেসু আগতেসু অগ্গহিতগ্গহণৰসেন ৰুত্তং.

অৰন্দনীযপুগ্গলাদিৰণ্ণনা নিট্ঠিতা.