উপালিপঞ্চকং

নপ্পটিপ্পস্সম্ভনৰগ্গৰণ্ণনা

৪২১. সমগ্গেহি করণীযানীতি ৰিৰাদাধিকরণেহি পুব্বে অসমগ্গা হুত্ৰা পচ্ছা সামগ্গিং উপগতেহি কত্তব্বানি. কিং পন অসঞ্ঞতমিস্সপরিসায সদ্ধিং লজ্জিনো সামগ্গিং করোন্তীতি আহ ‘‘উপোসথপৰারণাদীসু হী’’তিআদি. তত্থ ঠিতাসূতি উপোসথপৰারণাসু অপ্পৰত্তীসু. উপত্থম্ভো ন দাতব্বোতি উপরূপরি অপ্পৰত্তনত্থায মযম্পি উপোসথং ন করিস্সামাতিআদিনা কলহস্স উপত্থম্ভো ন দাতব্বো, ধম্মেন ৰিনযেন সামগ্গিং কত্ৰা সমগ্গেহেৰ অসঞ্ঞতা ভিক্খূ ৰিনেতব্বাতি অধিপ্পাযো. তেনাহ ‘‘সচে সঙ্ঘো অচ্চযং দেসাপেত্ৰা’’তিআদি. ভিক্খুনো নক্খমতীতি কেসুচি পুগ্গলেসু অপ্পমত্তকদোসদস্সনেন ন রুচ্চতি. দিট্ঠাৰিকম্মম্পি কত্ৰাতি ‘‘ন মেতং খমতী’’তি সভাগস্স ভিক্খুনো অত্তনো দিট্ঠিং আৰিকত্ৰা. উপেতব্বাতি সাসনহানিযা অভাৰা সামগ্গিং অকোপেত্ৰা কাযসামগ্গী দাতব্বা, ঈদিসে ঠানে অলজ্জিপরিভোগো আপত্তিকরো ন হোতি, ৰট্টতিযেৰ. যে পন সাসনৰিনাসায পটিপন্না, তেহি সহ ন ৰত্ততি, আপত্তি এৰ হোতি সাসনৰিনাসো চ. তেনাহ ‘‘যত্র পন উদ্ধম্ম’’ন্তিআদি. ‘‘দিট্ঠাৰিকম্মং ন ৰট্টতী’’তি ইমিনা দিট্ঠিযা আৰিকতাযপি আপত্তিং দস্সেতি.

৪২২. কণ্হৰাচোতি রাগদোসাদীহি কিলিট্ঠৰচনো. অনত্থকৰচনস্স দীপনং পকাসনং অস্সাতি অনত্থকদীপনো. মানং নিস্সাযাতি ৰিনিচ্ছযকরণং তৰ ভারোতি সঙ্ঘেন ভারে অকতেপি ‘‘অহমেৰেত্থ ৰোহরিতুং অরহরূপো’’তি মানং নিস্সায. যথাদিট্ঠিযাতি অনুরূপলদ্ধিযা. যস্স হি অত্থস্স যাদিসী দিট্ঠি অনুরূপা, তং গহেত্ৰা ন ব্যাকতাতি অত্থো.অস্স অত্তনোতি অধম্মাদিঅত্থং সন্ধায ৰদতি, ন পুগ্গলং, অস্স অধম্মাদিঅত্থসঙ্খাতস্স অত্তনো সরূপস্স যা অনুরূপা দিট্ঠীতি অত্থো. লদ্ধিং নিক্খিপিত্ৰাতি অনুরূপলদ্ধিং ছড্ডেত্ৰা, অগ্গহেত্ৰাতি অত্থো. তেনাহ ‘‘অধম্মাদীসু ধম্মাদিলদ্ধিকো হুত্ৰা’’তি. অথ ৰা অত্তনো লদ্ধিং নিগূহিত্ৰা পুগ্গলানুগুণং তথা ব্যাকরোন্তো ন যথাদিট্ঠিযা ব্যাকতা নাম. ইমস্মিং পক্খে অধম্মাদীসু ধম্মাদিলদ্ধিকো হুত্ৰাতি এত্থ অধম্মাদীসু ধম্মাদিলদ্ধিকো ৰিয হুত্ৰাতি অত্থো গহেতব্বো.

নপ্পটিপ্পস্সম্ভনৰগ্গৰণ্ণনা নিট্ঠিতা.

ৰোহারৰগ্গাদিৰণ্ণনা

৪২৪. কম্মঞত্তীতি কম্মভূতা ঞত্তি. অনুস্সাৰননিরপেক্খা ঞত্তিকম্মভূতা ঞত্তীতি অত্থো. কম্মপাদঞত্তি নাম ঞত্তিদুতিযকম্মাদীসু অনুস্সাৰনকম্মস্স পাদভূতা অধিট্ঠানভূতা ঞত্তি. নৰসু ঠানেসূতি ওসারণাদীসু নৰসু ঠানেসু. দ্ৰীসু ঠানেসূতি ঞত্তিদুতিযঞত্তিচতুত্থকম্মেসু.

সুত্তানুলোমন্তি উভতোৰিভঙ্গে সুত্তানুলোমভূতে মহাপদেসে সন্ধায ৰুত্তং. ৰিনযানুলোমন্তি খন্ধকপরিৰারানুলোমভূতে মহাপদেসে. সুত্তন্তিকে চত্তারো মহাপদেসেতি সুত্তাভিধম্মপিটকেসু অনুঞ্ঞাতপটিক্খিত্তসুত্তানুলোমৰসেন নযতো গহেতব্বে চত্তারো অত্থে.

৪২৫. দিট্ঠীনং আৰিকম্মানীতি আপত্তিলদ্ধীনং পকাসনানি, আপত্তিদেসনাকম্মানীতি অত্থো.

যথা চতূহি পঞ্চহি দিট্ঠি আৰিকতা হোতীতি যথা আৰিকতে চতূহি পঞ্চহি একীভূতেহি একস্স পুগ্গলস্স সন্তিকে আপত্তি দেসিতা নাম হোতি, এৰং দেসেতীতি অত্থো. এৰং দেসেন্তো চ অত্তনা সদ্ধিং তযো ৰা চত্তারো ৰা ভিক্খূ গহেত্ৰা একস্স সন্তিকে দেসেতি. এৰং দেসেতুং ন ৰট্টতি. দেসিতা চ আপত্তি ন ৰুট্ঠাতি, দেসনাপচ্চযা দুক্কটঞ্চ হোতি. দ্ৰিন্নং তিণ্ণং পন একতো দেসেতুং ৰট্টতি.

৪৪৪. অদস্সনেনাতি ইমস্স অকপ্পিযং পরিৰজ্জেন্তানং ৰিনযধরানং পটিপত্তিযা অদস্সনেন, তেসং দিট্ঠানুগতিং অনাপজ্জনেনাতিপি অত্থো গহেতব্বো. অকপ্পিযে কপ্পিযসঅঞতাযাতি রজতাদিঅকপ্পিযে তিপুআদিসঞ্ঞিতায. পুচ্ছিত্ৰা ৰা অঞ্ঞেসং ৰা ৰুচ্চমানং অসুণন্তো আপজ্জতীতি এত্থ পুচ্ছিত্ৰা অসুণন্তো ৰা পুচ্ছিযমানং অসুণন্তো ৰাতি পচ্চেকং যোজেতব্বং. একরত্তাতিক্কমাদিৰসেনাতি অধিট্ঠিতচীৰরেন ৰিপ্পৰসিত্ৰা একরত্তাতিক্কমেন পাচিত্তিযং আপজ্জতি. আদি-সদ্দেন ছরত্তাতিক্কমাদীনং সঙ্গহো.

৪৫০. অনত্থং কলিসাসনন্তি অনত্থাৰহং কোধৰচনং আরোপেন্তো দোসং আরোপেন্তো উপদ্দৰায পরিসক্কতীতি অত্থো.

৪৫৪. ৰোহারনিরুত্তিযন্তি তস্স তস্স অত্থস্স ৰাচকসদ্দে পভেদগতঞাণপ্পত্তো ন হোতীতি অত্থো.

৪৫৫. পরিমণ্ডলব্যঞ্জনারোপনে কুসলো ন হোতীতি পরিমণ্ডলেন পদব্যঞ্জনেন ৰত্থুং, পরেহি ৰুত্তং জানিতুঞ্চ অসমত্থোতি অত্থো.

৪৫৮. অনুস্সাৰনেনাতি অনু অনু কথনেন. তেনাহ ‘‘ননু তুম্হে’’তিআদি, যং অৰোচুম্হ, স্ৰাযং পকাসিতোতি সম্বন্ধো. তত্থ যন্তি ইদং যস্মা ৰচনাপেক্খং ন হোতি, ৰচনত্থাপেক্খমেৰ, তস্মা তেন ৰচনেন নানাকরণাভাৰং পকাসযিস্সামাতি যমত্থং অৰোচুম্হাতি অত্থো গহেতব্বো. তেনেৰ ‘‘স্ৰায’’ন্তি পুল্লিঙ্গৰসেন পটিনিদ্দেসো কতো, তস্স সো অযং নানাকরণাভাৰোতি অত্থো.

৪৬৭. মঞ্চপদাদীসুপি নল়াটং পটিহঞ্ঞেয্যাতি অন্ধকারে চম্মখণ্ডং পঞ্ঞপেত্ৰা ৰন্দিতুং ওনমন্তস্স নল়াটং ৰা অক্খি ৰা মঞ্চাদীসু পটিহঞ্ঞতি. এতেন ৰন্দতোপি আপত্তিঅভাৰং ৰত্ৰা ৰন্দনায সব্বথা পটিক্খেপাভাৰঞ্চ দীপেতি. এৰং সব্বত্থ সুত্তন্তরেহি অপ্পটিক্খিত্তেসু. নগ্গাদীসু পন ৰন্দিতুং ন ৰট্টতীতি. একতো আৰট্টোতি একস্মিং দোসাগতিপক্খে পরিৰত্তো পৰিট্ঠোতি অত্থো. তেনাহ ‘‘সপত্তপক্খে ঠিতো’’তি. ৰন্দিযমানোতি ওনমিত্ৰা ৰন্দিযমানো. ৰন্দিতব্বেসু উদ্দেসাচরিযো, নিস্সযাচরিযো চ যস্মা নৰকাপি হোন্তি, তস্মা তে ৰুড্ঢা এৰ ৰন্দিযাতি ৰেদিতব্বা.

৪৭০. পুব্বে ৰুত্তমেৰাতি সহসেয্যাদিপণ্ণত্তিৰজ্জং. ইতরন্তি সচিত্তকং.

ৰোহারৰগ্গাদিৰণ্ণনা নিট্ঠিতা.