চূল়সঙ্গামং

অনুৰিজ্জকস্স পটিপত্তিৰণ্ণনা

৩৬৫. তত্র হীতি তস্মিং সন্নিপাতে. অত্তপচ্চত্থিকাতি লজ্জিপেসলস্স চোদকপাপগরহীপুগ্গলস্স অনত্থকামা ৰেরীপুগ্গলা. সাসনপচ্চত্থিকাতি অত্তনো অনাচারানুগুণং বুদ্ধৰচনং পকাসেন্তো তণ্হাগতিকা, দিট্ঠিগতিকা চ. অজ্ঝোগাহেত্ৰাতি অলজ্জিঅভিভৰনৰসেন সঙ্ঘমজ্ঝং পৰিসিত্ৰা. সো সঙ্গামাৰচরোতি সো চোদকো সঙ্গামাৰচরো নাম. দিট্ঠসুতমুতম্পি রাজকথাদিকন্তি দিট্ঠসুতৰসেনেৰ রাজচোরাদিকথং, মুতৰসেনপি অন্নাদিকথঞ্চ অকথেন্তেনাতি যোজেতব্বং. কপ্পিযাকপ্পিযনিস্সিতা ৰাতিআদীসু রূপারূপপটিচ্ছেদপদেন সকলঅভিধম্মত্থপিটকত্তং দস্সেতি. সমথাচারাদীহি পটিসংযুত্তন্তি সকলসুত্তন্তপিটকত্তং. তত্থ সমথাচারো নাম সমথভাৰনাক্কমো. তথা ৰিপস্সনাচারো. ঠাননিসজ্জৰত্তাদিনিস্সিতাতি সঙ্ঘমজ্ঝাদীসু গরুচিত্তীকারং পচ্চুপট্ঠপেত্ৰা ঠানাদিক্কমনিস্সিতা চেৰ চুদ্দসমহাৰত্তাদিৰত্তনিস্সিতা চ, আদি-সদ্দেন অপ্পিচ্ছতাদিনিস্সিতা চাতি অত্থো. পঞ্হে উপ্পন্নেতি কেনচি উপ্পন্নে পঞ্হে পুচ্ছিতে. ইদঞ্চ উপলক্খণমত্তং, যং কিঞ্চি উপট্ঠিতং ধম্মং ভাসস্সূতি অধিপ্পাযো.

কুলপদেসো নাম খত্তিযাদিজাতিযম্পি কাসিকরাজকুলাদিকুলৰিসেসো. এতমেৰাহ ‘‘কুলপদেসো খত্তিযকুলাদিৰসেনেৰ ৰেদিতব্বো’’তি. সন্নিপাতমণ্ডলেতি অত্তনো অনুৰিজ্জমানপ্পকারং সঙ্ঘস্স ঞাপনত্থং উট্ঠায সঙ্ঘসন্নিপাতমজ্ঝে ইতো চিতো চ পরেসং মুখং ওলোকেন্তেন ন চরিতব্বং. যথানিসিন্নেনেৰ ধম্মৰিনযানুগুণং ৰিনিচ্ছযং যথা সব্বে সুণন্তি, তথা ৰত্তব্বন্তি অত্থো.

পাল়িযং অচণ্ডিকতেনাতি অকতচণ্ডভাৰেন, অফরুসেনাতি অত্থো. ‘‘হিতানুকম্পিনা’’তি এতেন মেত্তাপুব্বভাগো ৰুত্তো. ‘‘কারুণিকেন ভৰিতব্ব’’ন্তি ইমিনা অপ্পনাপ্পত্তকরুণা ৰুত্তা. ‘‘হিতপরিসক্কিনা’’তি ইমিনা করুণাপুব্বভাগো. তেনাহ ‘‘করুণা চ করুণাপুব্বভাগো চ উপট্ঠাপেতব্বোতি অযং পদদ্ৰযেপি অধিপ্পাযো’’তি. লজ্জিযাতি লজ্জিনী.

অনুযোগৰত্তং কথাপেত্ৰাতি ‘‘কালেন ৰক্খামী’’তিআদিনা (পরি. ৩৬২) ৰুত্তৰত্তং. অনুযুঞ্জনাচারক্কমেনেৰ অনুযুঞ্জনং অনুযোগৰত্তং নাম, তং কথাপেত্ৰা তেনেৰ কমেন অনুযুঞ্জাপেত্ৰাতি অত্থো. উজুমদ্দৰেনাতি এত্থ অজ্ঝাহরিতব্বপদং দস্সেতি ‘‘উপচরিতব্বো’’তি. ‘‘ধম্মেসু চ পুগ্গলেসু চা’’তি ইদং ‘‘মজ্ঝত্তেন ভৰিতব্ব’’ন্তি পকতেন সম্বন্ধিতব্বন্তি আহ ‘‘ধম্মেসু চ পুগ্গলেসু চ…পে… মজ্ঝত্তোতি ৰেদিতব্বো’’তি. যঞ্হি যত্থ কত্থচি কত্তব্বং, তং তত্থ অতিক্কমন্তো মজ্ঝত্তো নাম ন হোতি, ধম্মেসু চ গারৰো কত্তব্বো. পুগ্গলেসু পন মেত্তাভাৰেন পক্খপাতগারৰো. তস্মা ইমং ৰিধিং অনতিক্কন্তোৰ তেসু মজ্ঝত্তোতি ৰেদিতব্বো.

৩৬৬. সংসন্দনত্থন্তি আপত্তি ৰা অনাপত্তি ৰাতি সংসযে জাতে সংসন্দিত্ৰা নিচ্ছযকরণত্থং ৰুত্তন্তি অধিপ্পাযো. অত্থদস্সনাযাতি সাধেতব্বস্স আপত্তাদিউপমেয্যত্থস্স চোদকচুদিতকে অত্তনো পটিঞ্ঞায এৰ সরূপৰিভাৰনত্থং. অত্থো জানাপনত্থাযাতি এৰং ৰিভাৰিতো অত্থো চোদকচুদিতকসঙ্ঘানং ঞাপনত্থায নিজ্ঝাপনত্থায, সম্পটিচ্ছাপনত্থাযাতি অত্থো. পুগ্গলস্স ঠপনত্থাযাতি চোদকচুদিতকে অত্তনো পটিঞ্ঞায এৰ আপত্তিযং, অনাপত্তিযং ৰা পতিট্ঠাপনত্থায. সারণত্থাযাতি পমুট্ঠসরাপনত্থায. সৰচনীযকরণত্থাযাতি দোসে সারিতেপি সম্পটিচ্ছিত্ৰা পটিকম্মং অকরোন্তস্স সৰচনীযকরণত্থায. ‘‘ন তে অপসাদেতব্বা’’তি ইদং অধিপ্পেতত্থদস্সনং. তত্থ অৰিসংৰাদকট্ঠানে ঠিতা এৰ ন অপসাদেতব্বা, ন ইতরেতি দট্ঠব্বং.

অপ্পচ্চযপরিনিব্বানত্থাযাতি আযতিং পটিসন্ধিযা অকারণভূতপরিনিব্বানত্থায. পরিনিব্বানঞ্হি নাম খীণাসৰানং সব্বপচ্ছিমা চুতিচিত্তকম্মজরূপসঙ্খাতা খন্ধা, তে চ সব্বাকারতো সমুচ্ছিন্নানুসযতায পুনব্ভৰায অনন্তরাদিপচ্চযা ন হোন্তি অঞ্ঞেহি চ তণ্হাদিপচ্চযেহি ৰিরহিতত্তা. তস্মা ‘‘অপ্পচ্চযপরিনিব্বান’’ন্তি ৰুচ্চতি. তন্তি ৰিমুত্তিঞাণদস্সনং. তেনেৰাহ ‘‘তস্মি’’ন্তি. ৰিনযমন্তনাতি ৰিনযৰিনিচ্ছযো. সোতাৰধানন্তি সোতস্স ওদহনং, সৰনন্তি অত্থো. তেনাহ ‘‘যং উপ্পজ্জতি ঞাণ’’ন্তি. যথাৰুত্তায ৰিনযসংৰরাদিকারণপরম্পরায ৰিমুত্তিযা এৰ পধানত্তা সা পুন চিত্তস্স ৰিমোক্খোতি উদ্ধটোতি আহ ‘‘অরহত্তফলসঙ্খাতো ৰিমোক্খো’’তি. অথ ৰা যো যং কিঞ্চি ধম্মং অনুপাদিযিত্ৰা পরিনিব্বানৰসেন চিত্তস্স চিত্তসন্ততিযা, তপ্পটিবদ্ধকম্মজরূপসন্ততিযা চ ৰিমোক্খো ৰিমুচ্চনং অপুনপ্পৰত্তিৰসেন ৰিগমো, এতদত্থায এতস্স ৰিগমস্সত্থায এৰাতি এৰং নিগমনৰসেনপেত্থ অত্থো ৰেদিতব্বো.

৩৬৭. অনুযোগৰত্তগাথাসু কুসলেন বুদ্ধিমতাতি সম্মাসম্বুদ্ধেন. কতন্তি নিব্বত্তিতং, পকাসিতন্তি অত্থো. তেনেৰাতিআদীসু তেনেৰ কতাকতস্স অজাননেৰ পুব্বাপরং অজাননস্স, অঞ্ঞস্সপি ভিক্খুনো যং কতাকতং হোতি, তম্পি ন জানাতীতি অত্থো. অত্তনো সদিসাযাতি যথাৰুত্তেহি দোসেহি যুত্ততায অত্তনা সদিসায.

অনুৰিজ্জকস্স পটিপত্তিৰণ্ণনা নিট্ঠিতা.