চোদনাকণ্ডং

অনুৰিজ্জককিচ্চৰণ্ণনা

৩৬০. পাল়িযং যং খো ত্ৰন্তিআদীসু ত্ৰং, আৰুসো, যং ইমং ভিক্খুং চোদেসি, তং কিম্হি দোসে চোদেসি, কতরায ৰিপত্তিযা চোদেসীতি অত্থো. এৰং সব্বত্থ.

৩৬১. অসুদ্ধপরিসঙ্কিতোতি অসুদ্ধায অট্ঠানে উপ্পন্নায পরিসঙ্কায পরিসঙ্কিতো. তেনাহ ‘‘অমূলকপরিসঙ্কিতো’’তি.

৩৬৪. পাল়িযং উপোসথো সামগ্গত্থাযাতি ৰিসুদ্ধানং ভিক্খূনং অঞ্ঞোঞ্ঞনিরপেক্খো অহুত্ৰা উপোসথো উপোসথট্ঠানং সন্নিপতিত্ৰা ‘‘পারিসুদ্ধিং আযস্মন্তো আরোচেথ, পরিসুদ্ধেত্থাযস্মন্তো, পরিসুদ্ধো অহং আৰুসো’’তিআদিনা অঞ্ঞমঞ্ঞং পরিসুদ্ধিৰীমংসনারোচনৰসেন অযুত্তে ৰিৰজ্জেত্ৰা যুত্তেহেৰ কাযচিত্তসামগ্গীকরণত্থায.

ৰিসুদ্ধায পৰারণাতি দিট্ঠসুতাদীহি অঞ্ঞমঞ্ঞং কথাপেত্ৰা ৰিসুদ্ধিসম্পাদনত্থাযাতি অত্থো. উভো এতেতি আমিসপুগ্গলনিস্সযনে এতে উভো.

অনুৰিজ্জককিচ্চৰণ্ণনা নিট্ঠিতা.