অধিকরণভেদং

উক্কোটনভেদাদিকথাৰণ্ণনা

৩৪১. ‘‘অলং আৰুসো’’তি অত্তপচ্চত্থিকে সঞ্ঞাপেত্ৰাতি পত্তচীৰরাদিঅত্থায অলং ভণ্ডনাদিকরণন্তি ৰিৰাদাদীসু দোসদস্সনমত্তেন সঞ্ঞাপেত্ৰা অঞ্ঞমঞ্ঞং খমাপেত্ৰা ৰূপসমেন্তি, ন পন অঞ্ঞমঞ্ঞং আপত্তানাপত্তিদস্সনৰসেনাতি অধিপ্পাযো. তেনাহ ‘‘পাল়িমুত্তকৰিনিচ্ছযেনেৰা’’তি.

ৰিসমানি কাযকম্মাদীনি নিস্সিতো ভিক্খু ৰিসমনিস্সিতো নাম, মিচ্ছাদিট্ঠিনিস্সিতো গহননিস্সিতো, বলৰন্তে পুরিসে নিস্সিতো বলৰনিস্সিতো নামাতি দস্সেন্তো ‘‘একো ৰিসমানী’’তিআদিমাহ.

উক্কোটনভেদাদিকথাৰণ্ণনা নিট্ঠিতা.

অধিকরণনিদানাদিৰণ্ণনা

৩৪২. আপত্তিং নিস্সায উপ্পজ্জনকআপত্তিৰসেনাতি পরেসং, অত্তনো চ আপত্তিং পটিচ্ছাদেন্তানং ৰজ্জপটিচ্ছাদীনং পারাজিকাদিআপত্তিমেৰ সন্ধায ৰুত্তং, ন সব্বাপত্তিযো. কিচ্চং নিস্সায উপ্পজ্জনককিচ্চানন্তি উক্খেপনীযাদিকম্মং নিস্সায উপ্পজ্জনকানং তদনুৰত্তিকায ভিক্খুনিযা যাৰততিযানুস্সাৰনানং কিচ্চানং ৰসেন, ন সব্বেসং কিচ্চানং ৰসেনাতি.

৩৪৪. পাল়িযং ‘‘কতিহি অধিকরণেহী’’তি পুচ্ছায ‘‘একেন অধিকরণেন কিচ্চাধিকরণেনা’’তি ৰুত্তং. ‘‘কতিসু ঠানেসূ’’তি পুচ্ছায ‘‘তীসু ঠানেসু সঙ্ঘমজ্ঝে, গণমজ্ঝে, পুগ্গলস্স সন্তিকে’’তি ৰুত্তং. ‘‘কতিহি সমথেহী’’তি পুচ্ছায ‘‘তীহি সমথেহী’’তি ৰুত্তং. তীহিপি এতেহি একো ৰূপসমনপ্পকারোৰ পুচ্ছিতো, ৰিস্সজ্জিতো চাতি ৰেদিতব্বো.

৩৪৮. ৰিৰাদাধিকরণং হোতি অনুৰাদাধিকরণন্তিআদীসু ৰিৰাদাধিকরণমেৰ অনুৰাদাধিকরণাদিপি হোতীতি পুচ্ছায ৰিৰাদাধিকরণং ৰিৰাদাধিকরণমেৰ হোতি, অনুৰাদাদযো ন হোতীতি ৰিস্সজ্জনং.

অধিকরণনিদানাদিৰণ্ণনা নিট্ঠিতা.

সত্তসমথনানাত্থাদিৰণ্ণনা

৩৫৪. অধিকরণপুচ্ছাৰিস্সজ্জনে পাল়িযং ৰিপচ্চযতায ৰোহারোতি ৰিরূপৰিপাকায অঞ্ঞমঞ্ঞং দুক্খুপ্পাদনায কাযৰচীৰোহারো. মেধগন্তি ৰুদ্ধিপ্পত্তো কলহো.

অনুসম্পৰঙ্কতাতি ৰিপত্তিচোদনায অনু অনু সংযুজ্জনৰসেন নিন্নতা.

অব্ভুস্সহনতাতি অতিৰিয সঞ্জাতুস্সাহতা. অনুবলপ্পদানন্তি চোদকানম্পি উপত্থম্ভকরণং. কম্মসঙ্গহাভাৰেনাতি সঙ্ঘসম্মুখতাদিমত্তস্স সম্মুখাৰিনযস্স সঙ্ঘাদীহি কত্তব্বকিচ্চেসু সঙ্গহাভাৰা.

সত্তসমথনানাত্থাদিৰণ্ণনা নিট্ঠিতা.

অধিকরণভেদৰণ্ণনানযো নিট্ঠিতো.

দুতিযগাথাসঙ্গণিকং

চোদনাদিপুচ্ছাৰিস্সজ্জনাৰণ্ণনা

৩৫৯. দুতিযগাথাসঙ্গণিকায ‘‘চোদনা কিমত্থাযা’’তিআদিকা পুচ্ছা উপালিত্থেরেন কতা. ‘‘চোদনা সারণত্থাযা’’তিআদিৰিস্সজ্জনং ভগৰতা ৰুত্তং. উপালিত্থেরো সযমেৰ পুচ্ছিত্ৰা ৰিস্সজ্জনং অকাসীতিপি ৰদন্তি.

মন্তগ্গহণন্তি তেসং ৰিচারণাগহণং, সুত্তন্তিকত্থেরানং, ৰিনযধরত্থেরানঞ্চ অধিপ্পাযগহণন্তি অত্থো. পাটেক্কং ৰিনিচ্ছযসন্নিট্ঠাপনত্থন্তি তেসং পচ্চেকং অধিপ্পাযং ঞত্ৰা তেহি সমুট্ঠাপিতনযম্পি গহেত্ৰা ৰিনিচ্ছযপরিযোসাপনত্থন্তি অধিপ্পাযো.

‘‘মা খো তুরিতো অভণী’’তিআদিনা অভিমুখে ঠিতং কঞ্চি অনুৰিজ্জকং ওৰদন্তেন ৰিয থেরেন অনুৰিজ্জকৰত্তং কথিতং.

অনুযুঞ্জনৰত্তন্তি অনুযুজ্জনক্কমং, তং পন যস্মা সব্বসিক্খাপদৰীতিক্কমৰিসযেপি তংতংসিক্খাপদানুলোমেন কত্তব্বং, তস্মা ‘‘সিক্খাপদানুলোমিক’’ন্তি ৰুত্তং. অত্তনো গতিং নাসেতীতি অত্তনো সুগতিগমনং ৰিনাসেতি.

অনুসন্ধিত-সদ্দো ভাৰসাধনোতি আহ ‘‘অনুসন্ধিতন্তি কথানুসন্ধী’’তি. ৰত্তানুসন্ধিতেনাতি এত্থাপি এসেৰ নযো. ৰত্তানুসন্ধিতেনাতি আচারানুসন্ধিনা, আচারেন সদ্ধিং সমেন্তিযা পটিঞ্ঞাযাতি অত্থো. তেনাহ ‘‘যা অস্স ৰত্তেনা’’তিআদি.

পাল়িযং সঞ্চিচ্চ আপত্তিন্তিআদি অলজ্জিলজ্জিলক্খণং ভিক্খুভিক্খুনীনং ৰসেন ৰুত্তং তেসঞ্ঞেৰ সব্বপ্পকারতো সিক্খাপদাধিকারত্তা. সামণেরাদীনম্পি সাধারণৰসেন পন সঞ্চিচ্চ যথাসকং সিক্খাপদৰীতিক্কমনাদিকং অলজ্জিলজ্জিলক্খণং ৰেদিতব্বং.

কথানুসন্ধিৰচনন্তি চুদিতকঅনুৰিজ্জকানং কথায অনুসন্ধিযুত্তং ৰচনং ন জানাতি, তেহি একস্মিং কারণে ৰুত্তে সযং তং অসল্লক্খেত্ৰা অত্তনো অভিরুচিতমেৰ অসম্বন্ধিতত্থন্তি অত্থো. ৰিনিচ্ছযানুসন্ধিৰচনঞ্চাতি অনুৰিজ্জকেন কতস্স আপত্তানাপত্তিৰিনিচ্ছযস্স অনুগুণং, সম্বন্ধৰচনঞ্চ.

চোদনাদিপুচ্ছাৰিস্সজ্জনাৰণ্ণনা নিট্ঠিতা.