পঠমগাথাসঙ্গণিকং

সত্তনগরেসু পঞ্ঞত্তসিক্খাপদৰণ্ণনা

৩৩৫. অড্ঢুড্ঢসতানীতি পঞ্ঞাসাধিকানি তীণি সতানি. ৰিগ্গহপদেন মনুস্সৰিগ্গহং ৰুত্তং.

অতিরেকন্তি পঠমকথিনং. কাল়কন্তি সুদ্ধকাল়কং. ভূতন্তি ভূতারোচনং. ভিক্খুনীসু চ অক্কোসোতি ‘‘যা পন ভিক্খুনী ভিক্খুং অক্কোসেয্যা’’তি (পাচি. ১০২৯) ৰুত্তং সিক্খাপদং.

দ্ৰেপি চ ভেদাতি দ্ৰে সঙ্ঘভেদসিক্খাপদানি. অন্তরৰাসকনামেন অঞ্ঞাতিকায ভিক্খুনিযা হত্থতো চীৰরপটিগ্গহণং ৰুত্তং. সুত্তন্তি সুত্তং ৰিঞ্ঞাপেত্ৰা ৰাযাপনং. ৰিকালেতি ৰিকালভোজনং. চারিত্তন্তি পুরেভত্তং পচ্ছাভত্তং চারিত্তং. নহানন্তি ওরেনদ্ধমাসনহানং.

চীৰরং দত্ৰাতি সমগ্গেন সঙ্ঘেন চীৰরং দত্ৰা খিয্যনং. গিরগ্গন্তি নচ্চগীতং. চরিযাতি অন্তোৰস্সং চারিকচরণং. তত্থেৰাতি ৰস্সংৰুত্থায চারিকং অপক্কমিত্ৰা তত্থেৰ নিৰাসনং পটিচ্চ পঞ্ঞত্তসিক্খাপদং. ছন্দদানেনাতি পারিৰাসিকেন ছন্দদানেন.

পারাজিকানি চত্তারীতি ভিক্খুনীনং অসাধারণানি. সোল়সাতি আদিতো পঞ্চ সিক্খাপদানি, কুলদূসনঞ্চাতি ছ, ভিক্খুনীনং অসাধারণানি দস নিস্সগ্গিযানি.

চতুত্তিংসাতি পঠমকথিনসুদ্ধকাল়কচীৰরপটিগ্গহণরূপিযচীৰরৰাযাপনকোসেয্যমিস্সকএল়কলোমধোৰাপনদুতিযপত্তৰজ্জিতানি ভিক্খুৰিভঙ্গে দ্ৰাৰীসতি, ভিক্খুনীনং অসাধারণানি দ্ৰাদস চাতি চতুত্তিংস. ছপঞ্ঞাসসতন্তি ৰেসালিযাদীসু পঞ্ঞত্তানি দ্ৰত্তিংসসিক্খাপদানি ঠপেত্ৰা সেসা ছপঞ্ঞাসসতং.

দস গারয্হাতি ৰোসাসঅপ্পটিসং ৰিদিতসিক্খাপদদ্ৰযঞ্চ ঠপেত্ৰা সেসানি দস পাটিদেসনীযানি. দ্ৰে সত্ততি সেখিযানি সুরুসুরুকারকসামিসেনহত্থেনপানীযথালকপটিগ্গহণসসিত্থকপত্তধোৰনানি তীণি ঠপেত্ৰা সেসানি সেখিযানি.

সেয্যাতি অনুপসম্পন্নেন সহসেয্যসিক্খাপদং. খণনেতি পথৰীখণনং. গচ্ছ দেৰতেতি ভূতগামসিক্খাপদং ৰুত্তং. সপ্পাণকং সিঞ্চন্তি সপ্পাণোদকসিঞ্চনং. মহাৰিহারোতি মহল্লকৰিহারো.

অঞ্ঞন্তি অঞ্ঞৰাদকং. দ্ৰারন্তি যাৰ দ্ৰারকোসা অগ্গল়ট্ঠপনং. সহধম্মোতি সহধম্মিকং ৰুচ্চমানো. পযোপানন্তি সুরুসুরুকারকসিক্খাপদং.

এল়কলোমোতি এল়কলোমধোৰাপনং. পত্তো চাতি দুতিযপত্তো. ওৰাদোতি ভিক্খুনুপস্সযং উপসঙ্কমিত্ৰা ওৰাদো. ভেসজ্জন্তি চতুমাসপচ্চযপৰারণাসিক্খাপদং. আরঞ্ঞিকোতি চতুত্থপাটিদেসনীযং. ওৰাদোতি ওৰাদায ৰা সংৰাসায ৰা অগমনং.

৩৩৭. ‘‘যে চ যাৰততিযকা’’তি পঞ্হস্স ‘‘ইমে খো যাৰততিযকা’’তি ৰিস্সজ্জনং ৰত্ৰা তদনন্তরং ‘‘সাধারণং অসাধারণ’’ন্তিআদিপঞ্হানং ৰিস্সজ্জনে ৰত্তব্বে যস্মা তং অৰত্ৰা ‘‘কতি ছেদনকানী’’তিআদিকে অট্ঠ পঞ্হে অন্তরা ৰিস্সজ্জেত্ৰা তেসং অনন্তরা ‘‘ৰীসং দ্ৰে সতানি ভিক্খূনং…পে… ছচত্তারীসা ভিক্খূনং, ভিক্খুনীহি অসাধারণা’’তিআদিনা উক্কমেনেৰ সাধারণাদিপঞ্হা ৰিস্সজ্জিতা, তস্মা তং উক্কমৰিস্সজ্জনকারণং দস্সেতুং ‘‘যস্মা পন যে চ যাৰততিযকাতি অযং পঞ্হো’’তিআদিমাহ.

৩৩৮. ধোৰনঞ্চ পটিগ্গহোতিআদিগাথা অট্ঠকথাচরিযানং গাথাৰ. ছব্বস্সানি নিসীদনন্তি দ্ৰে সিক্খাপদানি. দ্ৰে লোমাতি তিযোজনাতিক্কমধোৰাপনৰসেন দ্ৰে এল়কলোমসিক্খাপদানি. ৰস্সিকা আরঞ্ঞকেন চাতি ৰস্সিকসাটিকা পরিযেসনঅরঞ্ঞকেসু সেনাসনেসু ৰিহরণসিক্খাপদেন সহ.

পণীতন্তি পণীতভোজনৰিঞ্ঞাপনং. ঊনন্তি ঊনৰীসতিৰস্সূপসম্পাদনং. মাতুগামেন সদ্ধিন্তি সংৰিধায গমনং ৰুত্তং. যা সিক্খাতি যং সিক্খাপদং. নিসীদনে চ যা সিক্খাতি পমাণাতিক্কন্তনিসীদনকারাপনে যং সিক্খাপদং. তথা ৰস্সিকা যা চ সাটিকাতি এত্থাপি.

পাল়িযং সতং সত্ততি ছচ্চেৰিমে হোন্তি উভিন্নং অসাধারণাতি ভিক্খূনং ভিক্খুনীহি অসাধারণা ছচত্তারীস, ভিক্খুনীনং ভিক্খূহি অসাধারণা তিংসাধিকং সতঞ্চাতি এৰং উভিন্নং অসাধারণা চ ছসত্ততিঅধিকং সতং সিক্খাপদানীতি অত্থো. সতং সত্ততি চত্তারীতি উভিন্নং সাধারণসিক্খানং গণনা চতুসত্ততিঅধিকং সতং সিক্খাপদানীতি অত্থো.

ৰিভত্তিযোতি আপত্তিক্খন্ধা চেৰ উপোসথপৰারণাদযো চ অধিপ্পেতা. তে হি পারাজিকাদিভেদেন, ভিক্খুউপোসথাদিভেদেন চ ৰিভজীযন্তি. তেনাহ ‘‘ৰিভত্তিযো’’তিআদি. তেসন্তি অট্ঠন্নং পারাজিকাদীনং. দ্ৰীহীতিআদি ৰিৰাদাধিকরণাদীনং সমথেহি ৰূপসমদস্সনং.

সত্তনগরেসু পঞ্ঞত্তসিক্খাপদৰণ্ণনা নিট্ঠিতা.

পারাজিকাদিআপত্তিৰণ্ণনা

৩৩৯. ইদন্তি ‘‘পারাজিকন্তি যং ৰুত্ত’’ন্তিআদিনা ৰুত্তং ৰচনং সন্ধায ৰদতি. ইদঞ্হি হেট্ঠা ‘‘গরুক লহুক’’ন্তিআদিনা উদ্ধটপঞ্হেসু অনাগতম্পি ‘‘সব্বানিপেতানি ৰিযাকরোহি, হন্দ ৰাক্যং সুণোম তে’’তি এত্থ যথাৰুত্তানি অঞ্ঞানিপি ‘‘সব্বানিপেতানি ৰিযাকরোহি, হন্দ ৰাক্যং সুণোমা’’তি এৰং গহিতমেৰাতি দস্সেন্তো ‘‘ইমিনা পন আযাচনৰচনেন সঙ্গহিতস্সা’’তিআদি ৰুত্তং.

অতিৰস্সতীতি ওৰস্সতি, ৰস্সোদকং পৰিসতীতি অত্থো. ধম্মানন্তি যথা চতুপচ্চযে ধারযতীতি ধম্মো, তেসং. তেনাহ ‘‘সঙ্খতধম্মান’’ন্তি. গাথাসঙ্গণিকন্তি গাথাসঙ্গহো, তে তে অত্থা গাথাহি সঙ্গহেত্ৰা গণীযন্তি কথীযন্তি এত্থাতি হি গাথাসঙ্গণিকং.

পারাজিকাদিআপত্তিৰণ্ণনা নিট্ঠিতা.

পঠমগাথাসঙ্গণিকৰণ্ণনানযো নিট্ঠিতো.