৩. সমুচ্চযক্খন্ধকৰণ্ণনা

সুক্কৰিস্সট্ঠিকথাৰণ্ণনা

৯৭. ‘‘ৰেদযামীতি জানামি, চিত্তেন সম্পটিচ্ছিত্ৰা সুখং অনুভৰামি, ন তপ্পচ্চযা অহং দুক্খিতোতি অধিপ্পাযো’’তি লিখিতং. যস্স মাল়কে নারোচিতং, তস্স আরোচেত্ৰা নিক্খিপিতব্বং. যস্স আরোচিতং, তস্স পুন আরোচনকিচ্চং নত্থি, কেৰলং নিক্খিপিতব্বমেৰ. ৰত্তং নিক্খিপিত্ৰা ৰসন্তস্স উপচারসীমাগতানং সব্বেসং আরোচনকিচ্চং নত্থি. দিট্ঠরূপানং সুতসদ্দানং আরোচেতব্বং, অদিট্ঠঅস্সুতানম্পি অন্তোদ্ৰাদসহত্থগতানং আরোচেতব্বং. ‘‘ইদং ৰত্তং নিক্খিপিত্ৰা ৰসন্তস্স লক্খণ’’ন্তি ৰুত্তং. ‘‘পরিক্খিত্তস্স ৰিহারস্স পরিক্খেপতো’তিআদি কিঞ্চাপি পাল়িযং নত্থি, অথ খো অট্ঠকথাচরিযানং ৰচনেন তথা এৰ পটিপজ্জিতব্ব’’ন্তি চ ৰুত্তং. ‘‘অত্থিভাৰং সল্লক্খেত্ৰাতি দ্ৰাদসহত্থে উপচারে সল্লক্খেত্ৰা, অনিক্খিত্তৰত্তানং উপচারসীমায আগতভাৰং সল্লক্খেত্ৰা সহৰাসাদিকং ৰেদিতব্ব’’ন্তি চ ৰুত্তং. ‘‘নিক্খিপন্তেন আরোচেত্ৰা নিক্খিপিতব্বং, পযোজনং অত্থী’’তি চ ৰুত্তং, ন পন তং পযোজনং দস্সিতং. চিণ্ণমানত্তো ভিক্খু অব্ভেতব্বোতি চিণ্ণমানত্তস্স চ অব্ভানারহস্স চ নিন্নানাকারণত্তা অঞ্ঞথা ‘‘অব্ভানারহো অব্ভেতব্বো’’তি ৰত্তব্বং সিযা. উক্খেপনীযকম্মকতোপি অত্তনো লদ্ধিগ্গহণৰসেন সভাগভিক্খুম্হি সতি তস্স অনারোচাপেতুং ন লভতি.

পরিৰাসকথাৰণ্ণনা

১০২. ‘‘অনন্তরাযিকস্স পন অন্তরাযিকসঞ্ঞায ছাদযতো অচ্ছন্নাৰা’’তি পাঠো. অৰেরিভাৰেন সভাগো অৰেরিসভাগো. ‘‘সভাগসঙ্ঘাদিসেসং আপন্নস্স পন সন্তিকে আৰি কাতুং ন ৰট্টতী’’তি পসঙ্গতো ইধেৰ পকাসিতং. লহুকেসু পটিক্খেপো নত্থি. তত্থ ঞত্তিযা আৰি কত্ৰা উপোসথং কাতুং অনুঞ্ঞাতত্তা লহুকসভাগং আৰি কাতুং ৰট্টতীতি. সভাগসঙ্ঘাদিসেসং পন ঞত্তিযা আরোচনং ন ৰট্টতীতি কির. ‘‘তস্স সন্তিকে তং আপত্তিং পটিকরিস্সতী’তি (মহাৰ. ১৭১) ৰুত্তত্তা লহুকস্সেৰাযমনুঞ্ঞাতা. ন হি সক্কা সুদ্ধস্স একস্স সন্তিকে সঙ্ঘাদিসেসস্স পটিকরণং কাতু’’ন্তি লিখিতং. লহুকেসুপি সভাগং আৰি কাতুং ন ৰট্টতীতি, তস্মা এৰ হি ঞত্তিযা আৰিকরণং অনুঞ্ঞাতং, ইতরথা তং নিরত্থকং সিযা. অঞ্ঞমঞ্ঞারোচনস্স ৰট্টতি, ততো ন ৰট্টতীতি দীপনত্থমেৰ ঞত্তিযা আৰিকরণমনুঞ্ঞাতং, তেনেৰ ইধ ‘‘সভাগসঙ্ঘাদিসেসং আপন্নস্সা’’তিআদি ৰুত্তং. অযমত্থো ‘‘এত্তাৰতা তে দ্ৰে নিরাপত্তিকা হোন্তি, তেসং সন্তিকে সেসেহি সভাগাপত্তিযো দেসেতব্বা’’তি (কঙ্খা. অট্ঠ. নিদানৰণ্ণনা) ৰচনেন কঙ্খাৰিতরণিযং পকাসিতোৰ. সঙ্ঘাদিসেসং পন ঞত্তিযা আরোচেত্ৰা উপোসথং কাতুং ৰট্টতি. তস্সা ঞত্তিযা অযমত্থো যদা সুদ্ধং ভিক্খুং পস্সিস্সতি, তস্স সন্তিকে আরোচনৰসেন পটিকরিস্সতি. এৰং পটিকতে ‘‘ন চ, ভিক্খৰে, সাপত্তিকেন পাতিমোক্খং সোতব্বং, যো সুণেয্য, আপত্তি দুক্কটস্সা’’তি (চূল়ৰ. ৩৮৬) ৰুত্তাপত্তিতো মোক্খো হোতীতি, তস্মা ‘‘গরুকং ৰা হোতু লহুকং ৰা, ঞত্তিযা আৰি কাতুং ৰট্টতী’’তি ৰুত্তং, উভোসু নযেসু যুত্ততরং গহেতব্বং.

নামঞ্চেৰ আপত্তি চাতি ‘‘তেন তেন ৰীতিক্কমেনাপন্নাপত্তি আপত্তি. নামন্তি তস্সা আপত্তিযা নাম’’ন্তি লিখিতং. আরোচেত্ৰা নিক্খিপিতব্বন্তি এত্থ আরোচনং ৰত্তভেদদুক্কটপঅহরণপ্পযোজনন্তি ৰেদিতব্বং. অকারণমেতন্তি ‘‘সম্বহুলা সঙ্ঘাদিসেসা আপত্তিযো আপজ্জি’’ন্তি ৰুত্তে ৰুট্ঠানতো.

দসসতং রত্তিসতন্তি দসসতং আপত্তিযো রত্তিসতং ছাদেত্ৰাতি যোজেতব্বং. অগ্ঘসমোধানো নাম সভাগৰত্থুকাযো সম্বহুলা আপত্তিযো আপন্নস্স বহুরত্তিং পটিচ্ছাদিতাপত্তিযং নিক্খিপিত্ৰা দাতব্বো, ইতরো নানাৰত্থুকানং ৰসেনাতি অযমেতেসং ৰিসেসোতি.

পরিৰাসকথাৰণ্ণনা নিট্ঠিতা.

‘‘গামস্সাতি ন ৰুত্ত’’ন্তি ৰচনতো কির গামূপচারেপি ৰট্টতীতি অধিপ্পাযোতি লিখিতং. ৰুত্তঞ্চ ‘‘অযং পন ৰিসেসো’’তি. ‘‘এত্থ অট্ঠকথাচরিযাৰ পমাণং. যুত্তং ন দিস্সতী’’তি লিখিতং. অনুগণ্ঠিপদে পন ‘‘অযং পন ৰিসেসো, আগন্তুকস্স…পে… ওক্কমিত্ৰা গচ্ছতি, রত্তিচ্ছেদো হোতিযেৰা’’তি ৰচনে হেট্ঠা ‘‘অন্তোঅরুণে এৰ নিক্খমিত্ৰা গামূপচারতো দ্ৰে লেড্ডুপাতে অতিক্কমিত্ৰা’’তিআদিনা নযেন গরুং কত্ৰা ৰচনতো, ভিক্খুনীনং গরুকৰসেনেৰ তত্থ তত্থ সিক্খাপদানং পঞ্ঞত্তত্তা চ তদনুরূপৰসেনেৰ অট্ঠকথাচরিযেন ভিক্খুনীনং গরুং কত্ৰা মানত্তচরণৰিধিদস্সনত্থং ‘‘যত্তকা পুরেভত্তং ৰা’’তিআদি ৰুত্তং. কুরুন্দিআদীসু ৰুত্তৰচনেন করোন্তস্সপি দোসো নত্থীতি দস্সেতুং কেৰলং লক্খণমত্তমেৰ ৰুত্তং, তদুভযম্পি তেন তেন পরিযাযেন যুজ্জতি, ৰিনিচ্ছযে পত্তে লক্খণে এৰ ঠাতব্বতো কুরুন্দিআদীসু ৰুত্তৰচনং পচ্ছা ৰুত্তং. পযোগো পন পুরিমোৰ. যথা চেত্থ, তথা সচে কাচি ভিক্খুনী দ্ৰে লেড্ডুপাতে অনতিক্কমিত্ৰা অরুণং উট্ঠপেতি, দোসো নত্থি, তথাপি সব্বট্ঠকথাসু ৰুত্তত্তা ‘‘পুরিমমেৰ আচিণ্ণ’’ন্তি ৰুত্তং. পরিৰাসৰত্তাদীনন্তি ‘‘পরিৰাসনিস্সযপটিপ্পস্সদ্ধিআদীনং উপচারসীমায পরিচ্ছিন্নত্তা ভিক্খুনুপস্সযস্স উপচারসীমাৰ গহেতব্বা, ন গামো’’তি লিখিতং. ‘‘তস্মিং গামে ভিক্খাচারো সম্পজ্জতী’তিআদি পৰারিতৰসেন ৰুত্তং. ন হি তত্থ অন্তোগামে ৰিহারো অত্থী’’তি চ লিখিতং, ‘‘তম্পি তেন পরিযাযেন যুজ্জতি, ন অত্থতো’’তি চ.

পটিচ্ছন্নপরিৰাসাদিকথাৰণ্ণনা

১০৮. ‘‘ৰিসুং মানত্থং চরিতব্বন্তি মূলায পটিকস্সনং অকত্ৰা ৰিসুং কম্মৰাচাযা’’তি চ লিখিতং. ‘‘সঙ্ঘাদিসেসাপত্তী’’তি ৰুত্তত্তা একোৰ, একৰত্থুম্হি আপন্না সঙ্ঘাদিসেসা থুল্লচ্চযদুক্কটমিস্সকা নাম. মক্খধম্মো নাম ছাদেতুকামতা.

১৪৩. ধম্মতাতি ধম্মতায, তথাতাযাতি অত্থো ‘‘অলজ্জিতা’’তি এত্থ ৰিয.

১৪৮. পুরিমং উপাদায দ্ৰে মাসা পরিৰসিতব্বাতি এত্থ ‘‘পরিৰসিতদিৰসাপি গণনূপগা হোন্তী’’তি লিখিতং.

১৮৪. তস্মিং ভূমিযন্তি তস্সং ভূমিযং. সম্বহুলা সঙ্ঘাদিসেসা আপত্তিযো আপজ্জতি পরিমাণম্পীতিআদি জাতিৰসেনেকৰচনং.

সমুচ্চযক্খন্ধকৰণ্ণনা নিট্ঠিতা.