১১. পঞ্চসতিকক্খন্ধকৰণ্ণনা

সঙ্গীতিনিদানকথাৰণ্ণনা

৪৩৭. ছিন্নপাতন্তি ভাৰনপুংসকং, তেনাকারেন পতন্তীতি অত্থো. উপদ্দুতা চ মযং হোমাতি অতীতত্থে ৰত্তমানৰচনং, অহুম্হাতি অত্থো. অথ ৰা তস্মিং সতি হোম. ‘‘পঞ্চ ভিক্খুসতানী’’তি গণনৰসেন ৰত্ৰা ‘‘ৰস্সং ৰসন্তা’’তি পুগ্গলনিদ্দেসো কতো.

খুদ্দানুখুদ্দককথাৰণ্ণনা

৪৪৩. ‘‘ৰস্সিকসাটিকং অক্কমিত্ৰা’’তি ৰচনতো ভগৰতো চতুত্থচীৰরম্পি অত্থীতি সিদ্ধং. তেনেৰাহ চীৰরক্খন্ধকে ‘‘চতুত্থং চীৰরং পারুপী’’তি.

৪৪৪. ‘‘অপিচ যথেৰ মযা’’তিআদি সঙ্গীতিযা অগ্গহণাধিপ্পাযৰসেন ৰুত্তং, কিন্তু সুসঙ্গীতা আৰুসো থেরেহি ধম্মো চ ৰিনযো চ. অপিচাহং নাম তথেৰাহং ধারেস্সামীতি যথেৰ মযা ভগৰতো সম্মুখা সুতং সম্মুখা পটিগ্গহিতং, তথেৰ থেরেহি ভগৰতা সযমেৰ এতদগ্গং আরোপিতেহি, তস্মা সুসঙ্গহিতা সঙ্গীতীতি ৰুত্তং হোতি.

ব্রহ্মদণ্ডকথাৰণ্ণনা

৪৪৫. ‘‘ত্ৰংযেৰ আণাপেহী’’তি এত্তকমেৰ ৰুত্তং, থেরা পন ব্রহ্মদণ্ডং কত্ৰা ৰুত্তংযেৰ ‘‘ছন্নস্সা’’তিআদিমাহংসূতি ৰেদিতব্বং. এত্থ চ আনন্দত্থেরো ৰিয অঞ্ঞোপি সঙ্ঘেন আণত্তো ভিক্খু ব্রহ্মদণ্ডকতেন ভিক্খুনা আলপিতুং লভতি, ন অঞ্ঞো. উজ্জৰনিকাযাতি পটিসোতগামিনিযা. আগমা নু খো ইধ আগমা নু খ্ৰিধ. আগমা খো ইধ, তে ওরোধা ইধ আগমা খো. ‘‘ভিসিচ্ছৰীতি ভিসিত্থৰিকা’’তি লিখিতং. সব্বেৰিমেতি সব্বমেৰ. কুলৰং গমেন্তীতি নিরত্থকৰিনাসং গমেন্তি. কুচ্ছিতো লৰো কুলৰো, অনযৰিনাসোতি ৰুত্তং হোতি. ইমায খো পন ‘‘ধম্মৰিনযসঙ্গীতিযা’’তি ৰত্তব্বে ৰিসেসেন ৰিনযস্স সাসনমূলভাৰদস্সনত্থং, তস্মিং ঠিতে সকলসাসনঠিতিসিদ্ধিদীপনত্থঞ্চ ‘‘ইদং ৰো কপ্পতি, ইদং ৰো ন কপ্পতী’’তি ৰত্থুস্মিং আরদ্ধত্তা, ইমিস্সা চ পরিযত্তিযা ৰিনযপিটকত্তা ‘‘ৰিনযসঙ্গীতিযা’’তি ইধ ৰুত্তং.

পঞ্চসতিকক্খন্ধকৰণ্ণনা নিট্ঠিতা.