১২. সত্তসতিকক্খন্ধকৰণ্ণনা

দসৰত্থুকথাৰণ্ণনা

৪৪৬. নিক্খিত্তমণিসুৰণ্ণাতি সিক্খাপদেনেৰ পটিক্খিত্তমণিসুৰণ্ণা. তত্থ মণিগ্গহণেন সব্বং দুক্কটৰত্থু, সুৰণ্ণগ্গহণেন সব্বং পাচিত্তিযৰত্থু গহিতং হোতি. ভিক্খগ্গেন ভিক্খুগণনাযাতি ৰুত্তং হোতি.

৪৪৭. মহিকাতি হিমং. পোসাতি সত্তা. সরজাতি সকিলেসরজা. মগাতি মগসদিসা. তস্মিং তস্মিং ৰিসযে, ভৰে ৰা নেতীতি নেত্তি, তণ্হাযেতং অধিৰচনং, তায সহ ৰত্তন্তীতি সনেত্তিকা.

৪৫০-২. অহোগঙ্গোতি পব্বতস্স নামং. অনুমানেস্সামাতি পঞ্ঞাপেস্সাম. আসুতাতি সজ্জিতা, ‘‘অসুত্তা’’তি ৰা পাঠো, অনাৰিলা অপক্কা তরুণা.

৪৫৩. উজ্জৰিংসু পটিসোতেন গচ্ছিংসু.

৪৫৫. অপ্পেৰ নামাতি সাধু নাম. মূলা দাযকা পেসলকা. ‘‘কুল্লকৰিহারেনাতি খুদ্দকৰিহারেনা’’তি লিখিতং. রূপাৰতারত্তা কুল্লকৰিহারো নাম. কথং পনেতং পঞ্ঞাযতি, যেন সন্নিধিকতং যাৰজীৰিকং যাৰকালিকেন তদহুপটিগ্গহিতেন সম্ভিন্নরসং তদহুপটিগ্গহিতসঙ্খযং আগন্ত্ৰা সন্নিধিকতামিসসঙ্খ্যমেৰ গচ্ছতীতি? ৰুচ্চতে – ‘‘যাৰকালিকেন, ভিক্খৰে, যাৰজীৰিকং তদহুপটিগ্গহিত’’ন্তি ৰচনতো পুরেপটিগ্গহিতং যাৰজীৰিকং তদহুপটিগ্গহিতেনামিসেন চে সম্ভিন্নং, পুরেপটিগ্গহিতসঙ্খ্যমেৰ গচ্ছতীতি সিদ্ধং. অঞ্ঞথা ‘‘সত্তাহকালিকেন, ভিক্খৰে, যাৰজীৰিকং পটিগ্গহিতং সত্তাহং কপ্পতী’’তি (মহাৰ. ৩০৫) ৰুত্তট্ঠানে ৰিয ইধাপি ‘‘যাৰকালিকেন, ভিক্খৰে, যাৰজীৰিকং পটিগ্গহিতং কালে কপ্পতী’’তি ৰদেয্য, তঞ্চাৰুত্তং. তস্মা পুরেপটিগ্গহিতং তং আমিসসম্ভিন্নং আমিসগতিকমেৰাতি ৰেদিতব্বং. গণ্ঠিপদে পন ‘‘সন্নিধিকারকং খাদনীযং ৰা ভোজনীযং ৰা’’তি (পাচি. ২৫৩) ৰুত্তং. ব্যঞ্জনমত্তং ন গহেতব্বং.

৪৫৭. ইধাতি ইমস্মিং পাঠে. ‘‘‘কালে কপ্পতি, ৰিকালে ন কপ্পতী’তি (মহাৰ. ৩০৫) ৰুত্তৰচনমত্তেন ‘ৰিকালে কপ্পতী’তি ৰিকালভোজনপাচিত্তিযং আৰহং হোতীতি অত্থো, ‘ন কপ্পতী’তি সন্নিধিভোজনপাচিত্তিযং আৰহং হোতীতি অত্থো, যদি সম্ভিন্নরসং অজ্জপটিগ্গহিতম্পি যাৰজীৰিকন্তি অত্থো’’তি লিখিতং. সুত্তৰিভঙ্গেতি মাতিকাসঙ্খাতে সুত্তে চ তস্স পদভাজনীযসঙ্খাতে ৰিভঙ্গে চাতি অত্থো. ইদং আগতমেৰ. কতরন্তি? ‘‘অতিক্কামযতো ছেদনক’’ন্তি ইদং.

তিৰিদত্থিপমাণঞ্চে, অদসং তং নিসীদনং;

নিসীদনং কথং হোতি, সদসং তঞ্হি লক্খণং.

তিৰিদত্থিপমাণং তং, দসা তত্থ ৰিদত্থি চে;

তংনিসীদননামত্তা, তস্মিং ছেদনকং সিযা.

অনিসীদননামম্হি, কথং ছেদনকং ভৰে;

ইতি চে নেৰ ৰত্তব্বং, নিসীদনৰিদত্থিতো.

কপ্পতে সদসামত্তং, নিসীদনমিতি কারণং;

কথং যুজ্জতি নো চেতং, নিসীদনস্স নামকং.

নিসীদনন্তি ৰুত্তত্তা, পমাণসমতিক্কমা;

তস্সানুমতিহেতুত্তা, তত্থ ছেদনকং ভৰে.

জাতরূপকপ্পে –

জাতরূপং পটিক্খিত্তং, পুগ্গলস্সেৰ পাল়িযং;

ন সঙ্ঘস্সাতি সঙ্ঘস্স, তঞ্চে কপ্পতি সব্বসো.

ৰিকালভোজনঞ্চাপি, পুগ্গলস্সেৰ ৰারিতং;

ন সঙ্ঘস্সাতি সঙ্ঘস্স, কপ্পতীতি কথং সমং.

সত্তসতিকক্খন্ধকৰণ্ণনা নিট্ঠিতা.

চূল়ৰগ্গৰণ্ণনা নিট্ঠিতা.

নমো তস্স ভগৰতো অরহতো সম্মাসম্বুদ্ধস্স