১০. ভিক্খুনিক্খন্ধকৰণ্ণনা

মহাপজাপতিগোতমীৰত্থুকথাৰণ্ণনা

৪০২-৩. সূনেহীতি সুতেহি. ‘‘সেতট্টিকা নাম রোগজাতী’’তি পাল়ি. ‘‘সেতট্ঠিকা’’তি অট্ঠকথা. ‘‘পটিসম্ভিদাপত্তখীণাসৰগ্গহণেন ঝানানিপি গহিতানেৰ হোন্তি. ন হি নিজ্ঝানিকানং সব্বপ্পকারা সম্পত্তি ইজ্ঝতী’’তি লিখিতং.

ভিক্খুনীউপসম্পদানুজাননকথাৰণ্ণনা

৪০৪. যদগ্গেন যং দিৰসং আদিং কত্ৰা. তদেৰাতি তস্মিং এৰ দিৰসে. ‘‘অনুঞত্তিযা’’তি পাঠো. ‘‘অনুপঞ্ঞত্তিযা’’তি ন সুন্দরং.

৪০৫. ‘‘পটিগ্গণ্হামি যাৰজীৰং অনতিক্কমনীযো’’তি ৰত্ৰা ইদানি কিং কারণা ৰরং যাচতীতি চে? পরূপৰাদৰিৰজ্জনত্থং. দুব্বুদ্ধিনো হি কেচি ৰদেয্যুং ‘‘মহাপজাপতিযা পঠমং সম্পটিচ্ছিতত্তা উভতোসঙ্ঘস্স যথাৰুড্ঢঅভিৰাদনং ন জাতং. গোতমী চে ৰরং যাচেয্য, ভগৰা অনুজানেয্যা’’তি.

৪০৮. ৰিমানেত্ৰাতি অপরজ্ঝিত্ৰা.

৪১০-৩. কম্মপ্পত্তাযোপীতি কম্মারহাপি. আপত্তিগামিনিযোপীতি আপত্তিং আপন্নাযোপি. দ্ৰে তিস্সো ভিক্খুনিযোতি দ্ৰীহি তীহি ভিক্খুনীহি. ‘‘মনোসিলিকাযা’’তি পাঠো.

৪২০. ‘‘তেন চ ভিক্খু নিমন্তেতব্বো’’তি সামীচিৰসেন ৰুত্তং.

৪২২-৩. ‘‘অনুজানামি…পে… তাৰকালিক’’ন্তি পুগ্গলিকং সন্ধায ৰুত্তং, ন সঙ্ঘিকন্তি আচরিযো. ‘‘অনুজানামি, ভিক্খৰে, উতুনিযা কটিসুত্তক’’ন্তি ৰচনতো ভিক্খুস্স ৰিনিবন্ধং কটিসুত্তকং ন ৰট্টতি. পগ্ঘরন্তী ৰিসৰিণা. ৰেপুরিসিকা মস্সুদাঠী.

৪২৫. তযো নিস্সযেতি রুক্খমূলঞ্হি সা ন লভতি.

৪২৬. ভত্তগ্গে সচে দাযকা ভিক্খুনিসঙ্ঘস্স ভুত্তৰতো চতুপচ্চযে দাতুকামা হোন্তি, যথাৰুড্ঢমেৰ.

৪২৭. ৰিকালেতি যাৰ ৰিকালে হোন্তি, তাৰ পৰারেসুন্তি অত্থো. অজ্জত্তনাতি অজ্জতনা.

৪২৮. অনুৰাদন্তি ইস্সরিযট্ঠানং. ইদং সব্বং ‘‘অজ্জতগ্গে ওৰটো ভিক্খুনীনং ভিক্খূসু ৰচনপথো’’তি পঞ্ঞত্তস্স গরুধম্মস্স ৰীতিক্কমআপত্তিপঞ্ঞাপনত্থং ৰুত্তন্তি ৰেদিতব্বং, অঞ্ঞথা যেসং গরুধম্মানং পটিগ্গহণেন ভিক্খুনীনং উপসম্পদা অনুঞ্ঞাতা, তেসং ৰীতিক্কমে অনুপসম্পন্নাৰ সিযাতি আসঙ্কা ভৰেয্য.

৪২৯. ইত্থিযুত্তেনাতি ইত্থীহি গাৰীআদীহি ধুরট্ঠানে যুত্তেন. পুরিসন্তরেনাতি পুরিসেন অন্তরিকেন. ‘‘পুরিসদুতিযেনা’’তি লিখিতং, পুরিসসারথিনাতি অধিপ্পাযো. ‘‘বাল়্হতরং অফাসূ’’তি ৰচনতো গিলানায ৰট্টতিচ্চেৰ সিদ্ধং, ভগৰন্তং আপুচ্ছিত্ৰা অনুঞ্ঞাতট্ঠানে উপসম্পজ্জিস্সামীতি অধিপ্পাযো.

৪৩০. সা কেনচিদেৰ অন্তরাযেনাতি সব্বন্তরাযসঙ্গহনৰচনং, তস্মা তং ন অন্তরাযং কিত্তেত্ৰা, ৰুত্তন্তরাযেন ‘‘রাজন্তরাযেনা’’তি সাধেতব্বন্তি আচরিযো.

৪৩১-২. ‘‘নৰকম্মন্তি কত্ৰা ‘এত্তকানি ৰস্সানি ৰসতূ’তি অপলোকেত্ৰা সঙ্ঘিকভূমিদান’’ন্তি লিখিতং. ‘‘সাগার’’ন্তি ৰুত্তত্তা অগারপটিসংযুত্তরহোনিসজ্জসিক্খাদিৰজ্জিতাতি কেচি, যুত্তমেতং. কস্মা? ‘‘সহাগারসেয্যমত্তং ঠপেত্ৰা’’তি অট্ঠকথাযং ৰুত্তত্তা. ‘‘অনুজানামি, ভিক্খৰে, পোসেতু’’ন্তি ৰচনতো পোসনযুত্তকম্মং সব্বং ৰট্টতি মাতুযা, ন অঞ্ঞেসং. ৰসিতুং চে ন সক্কোতি দুতিযং ৰিনা, সম্মন্নিত্ৰাৰ দাতব্বা তায ইতি নো মতি. কিত্তকং কালং? ৰসিত্ৰা চে দুতিযা গন্তুমিচ্ছতি, অঞ্ঞং সম্মন্নিতুং যুত্তাৰ. সা ৰিজাতা লভেতি আচরিযো.

৪৩৪. ‘‘ইদং ওদিস্স অনুঞ্ঞাতং ৰট্টতীতি একতো ৰা উভতো ৰা অৰস্সৰে সতিপি ৰট্টতী’’তি লিখিতং. ‘‘কেসচ্ছেদাদিকং কম্মং অনুজানামি সাদিতুং ’’ইচ্চেৰ ৰুত্তত্তা ৰুত্তং ‘‘তদঞ্ঞে সাদিতু’’ন্তি. ‘‘কেসচ্ছেদাদিকং কম্মং অনুজানামি, ভিক্খৰে’’তি অৰত্ৰা এত্তকং যস্মা ‘‘সাদিতু’’ন্তি ভাসিতং, তস্মা সা ৰিচিকিচ্ছায উভতোপি অৰস্সৰে অপি পারাজিকখেত্তেন সা পারাজিকং ফুসতি. ইতি অট্ঠকথাস্ৰেতং সব্বাসুপি ৰিনিচ্ছিতং. ওদিস্সকাভিলাপো হি অঞ্ঞথা নিব্বিসেসতো তং পমাণং. যদি তথা ভিক্খুস্স কপ্পতি ৰিচিকিচ্ছা.

কালমোদিস্স নং পদং, ন সত্তোদিস্সকঞ্হি তং;

অথ ভিক্খুনিযা এৰ, কালমোদিস্স ভাসিতং.

এৰং পারাজিকাপত্তি, সিথিলাৰ কতা সিযা;

সব্বসো পিহিতং দ্ৰারং, সব্বপারাজিকস্মিন্তি.

নিরত্থকভাৰতো, উব্ভজাণুমণ্ডলে;

তস্মা ন সাদিযন্তীতি, নিদানৰচনক্কমং.

নিস্সায সত্থুনা ৰুত্তং, সাদিতুন্তি ন অঞ্ঞথা;

অত্তনো পণ্হিসম্ফস্সং, সাদিতুং যেন ৰারিতং.

অপি পারাজিকক্খেত্তে, কথং দ্ৰারং দদেয্য সো;

তথাপি বুদ্ধপুত্তানং, বুদ্ধভাসিতভাসিতং.

ৰচনঞ্চ সমানেন্তো, নো চেত্থ যুত্তিকথা ধীরা;

কেসচ্ছেদাদিকম্মস্স, অৰস্সং করণীযতো.

চিত্তস্স চাতিলোলত্তা, গণস্স চ অঙ্গসম্পদা-

ভাৰা ভিক্খুনীনং মহেসিনা, রক্খিতুঞ্চ অসঙ্কত্তা;

ননু মোদিস্সকং কতন্তি.

ভিক্খুনিক্খন্ধকৰণ্ণনা নিট্ঠিতা.