৪. পৰারণাক্খন্ধকৰণ্ণনা

অফাসুকৰিহারকথাৰণ্ণনা

২১০. ‘‘সঙ্ঘং আৰুসো পৰারেমী’’তি ৰুত্তত্তা পচ্ছাপি ‘‘ৰদতু মং সঙ্ঘো’’তি ৰত্তব্বং ৰিয দিস্সতি. অযং পনেত্থ অধিপ্পাযো – যস্মা অহং সঙ্ঘং পৰারেমি, তস্মা তত্থ পরিযাপন্না থেরা, মজ্ঝিমা, নৰা ৰা অৰিসেসেনাযস্মন্তো সব্বেপি মং ৰদন্তূতি.

পৰারণাভেদৰণ্ণনা

২১২. দ্ৰেমা, ভিক্খৰে, পৰারণাতি এত্থ তাদিসে কিচ্চে সতি যত্থ কত্থচি পৰারেতুং ৰট্টতি. তেনেৰ মহাৰিহারে ভিক্খূ চাতুদ্দসিযং পৰারেত্ৰা পন্নরসিযং কাযসামগ্গিং ইদানিপি দেন্তি. চেতিযগিরি মহাদস্সনত্থম্পি অট্ঠমিযং গচ্ছন্তি, তম্পি চাতুদ্দসিযং পৰারেতুকামানংযেৰ হোতি. ‘‘সত্তাহং অনাগতায পৰারণায সকরণীযো পক্কমতি, অনাপত্তীতি ৰচনতো ইদং আচিণ্ণ’’ন্তি লিখিতং. ‘‘নো চে অধিট্ঠহেয্য, আপত্তি দুক্কটস্সা’’তি একস্স ৰুত্তদুক্কটং, তস্সেৰ ৰুত্তং পুব্বকিচ্চঞ্চ সঙ্ঘগণানম্পি নেতব্বং.

পৰারণাদানানুজাননকথাৰণ্ণনা

২১৩. তেন চ ভিক্খুনাতি পৰারণাদাযকেন.

অনাপত্তিপন্নরসকাদিকথাৰণ্ণনা

‘‘তস্সা চ পৰারণায আরোচিতায সঙ্ঘেন চ পৰারিতে সব্বেসং সুপ্পৰারিতং হোতীতি ৰচনতো কেৰলং পৰারণায পৰারণাদাযকোপি পৰারিতোৰ হোতী’’তি ৰদন্তীতি.

২২২. অৰুট্ঠিতায পরিসাযাতি পৰারেত্ৰা পচ্ছা অঞ্ঞমঞ্ঞং কথেন্তিযা. একচ্চায ৰুট্ঠিতাযাতি একচ্চেসু যথানিসিন্নেসু একচ্চেসু সকসকট্ঠানং গতেসু. পুন পৰারেতব্বন্তি পুনপি সব্বেহি সমাগন্ত্ৰা পৰারেতব্বং. আগচ্ছন্তি সমসমা, তেসং সন্তিকে পৰারেতব্বন্তি ‘‘গতে অনানেত্ৰা নিসিন্নানংযেৰ সন্তিকে পৰারেতব্বং, উপোসথক্খন্ধকেপি এসেৰ নযো’’তি লিখিতং. সব্বায ৰুট্ঠিতায পরিসায আগচ্ছন্তি সমসমা, তেসং সন্তিকে পৰারেতব্বন্তি ‘‘যদি সব্বে ৰুট্ঠহিত্ৰা গতা, সন্নিপাতেতুঞ্চ ন সক্কা, একচ্চে সন্নিপাতাপেত্ৰা পৰারেতুং ৰট্টতী’’তি ৰদন্তি. কস্মা? ঞত্তিং ঠপেত্ৰা কত্তব্বসঙ্ঘকম্মাভাৰা ৰগ্গং ন হোতি কির. এত্থ পন একচ্চেসু গতেসুপি সব্বেসু গতেসুপি সব্বে সন্নিপাতাপেত্ৰা ঞত্তিং অট্ঠপেত্ৰা কেৰলং পৰারেতব্বং. একচ্চে সন্নিপাতাপেত্ৰা পৰারেতুং ন ৰট্টতি ‘‘সঙ্ঘং, ভন্তে, পৰারেমী’’তি ৰচনতো. সব্বেপি হি সন্নিপতিতা পচ্ছা দিট্ঠং ৰা সুতং ৰা পরিসঙ্কিতং ৰা ৰত্তারো হোন্তি. অনাগতানং অত্থিভাৰং ঞত্ৰাপি একচ্চানং সন্তিকে পৰারণাৰচনং ৰিয হোতি. সম্মুখীভূতে চত্তারো সন্নিপাতাপেত্ৰা নিস্সগ্গিযং আপন্নচীৰরাদিনিস্সজ্জনং ৰিয পৰারণা ন হোতি সব্বাযত্তত্তা. ‘‘সমগ্গানং পৰারণা পঞ্ঞত্তা’’তি ৰচনঞ্চেত্থ সাধকং. ‘‘ইতো অঞ্ঞথা ন ৰট্টতি অট্ঠকথাযং অননুঞ্ঞাতত্তা’’তি উপতিস্সত্থেরো ৰদতি. ‘‘থোকতরেহি তেসং সন্তিকে পৰারেতব্বং ঞত্তিং অট্ঠপেত্ৰাৰা’’তি ৰুত্তং. আগন্তুকা নাম নৰমিতো পট্ঠাযাগতা ৰা ৰজসত্থনাৰাসু ৰুত্থৰস্সা ৰা হোন্তি.

২৩৭. ‘‘দসৰত্থুকা মিচ্ছাদিট্ঠি হোতি তথাগতোতিআদী’’তি লিখিতং. ‘‘নত্থি দিন্নন্তিআদী’’তি ৰুত্তং.

২৩৯. ‘‘উপপরিক্খিত্ৰা জানিস্সামাতি তেন সহ পৰারেতব্ব’’ন্তি লিখিতং.

পৰারণাক্খন্ধকৰণ্ণনা নিট্ঠিতা.