৩. ৰস্সূপনাযিকক্খন্ধকৰণ্ণনা

ৰস্সূপনাযিকানুজাননকথাৰণ্ণনা

১৮৪. মহাঅট্ঠকথাযম্পি ‘‘সঙ্কাসযিস্সন্তী’’তি পাঠো, দীপৰাসিনো ‘‘সঙ্কাপযিস্সন্তী’’তি পঠন্তি কির. ‘‘কতি নু খো ৰস্সূপনাযিকা’’তি চিন্তাযং ‘‘কিং নিমিত্ত’’ন্তি ৰুত্তে ‘‘অনুজানামি, ভিক্খৰে, ৰস্সং উপগন্তু’’ন্তি যং ৰস্সূপগমনং ৰুত্তং, তং ‘‘ইমং তেমাসং ৰস্সং উপেমী’’তি ৰত্ৰা উপগন্তব্বং. ৰস্সানমাসা চ চত্তারো. তত্থ পঠমং তেমাসং, পচ্ছিমং তেমাসন্তি দুৰিধং তেমাসং. তেনাযং তেসং ভিক্খূনং চিন্তা অহোসি.

ৰস্সানেচারিকাপটিক্খেপাদিকথাৰণ্ণনা

১৮৫. অনপেক্খগমনেন ৰা অঞ্ঞত্থ অরুণং উট্ঠাপনেন ৰা আপত্তি ৰেদিতব্বাতি এত্থ পঠমং তাৰ সো সত্তাহং অনাগতায পৰারণায সকরণীযো পক্কমতি. ‘‘আগচ্ছেয্য ৰা সো, ভিক্খৰে, ভিক্খু তং আৰাসং ন ৰা আগচ্ছেয্য, তস্স, ভিক্খৰে, ভিক্খুনো পুরিমিকা চ পঞ্ঞাযতি, পটিস্সৰে চ অনাপত্তী’’তি ৰচনতো ওরং সন্ধায ৰুত্তন্তি ৰেদিতব্বং. তথা হি ‘‘সো তদহেৰ অকরণীযো পক্কমতি, সকরণীযো পক্কমতি, তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্সা’’তি (মহাৰ. ২০৭) ৰুত্তং.

সত্তাহকরণীযানুজাননকথাৰণ্ণনা

১৮৭-৮. দুতিযং পন ‘‘সো তং সত্তাহং বহিদ্ধা ৰীতিনামেতি, তস্স, ভিক্খৰে, ভিক্খুনো পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্সা’’তি ৰচনতো সত্তাহতো পরং ৰেদিতব্বং. তথা হি ‘‘সো তং সত্তাহং অন্তো সন্নিৰত্তং করোতি, তস্স, ভিক্খৰে, ভিক্খুনো পুরিমিকা চ পঞ্ঞাযতি, পটিস্সৰে চ অনাপত্তী’’তি (মহাৰ. ২০৭) ৰুত্তং. সতিপি কারণদ্ৰযে ৰস্সচ্ছেদকারণাভাৰে আপত্তি ৰেদিতব্বা, তস্মা তীণিপি এতানি ৰচনানি যথাসম্ভৰং যোজিতানি ৰিগ্গহানি হোন্তি. তীণি পরিহীনানীতি তাসং নত্থিতায.

পহিতেযেৰঅনুজাননকথাৰণ্ণনা

১৯৯. ‘‘অনুজানামি ভিক্খৰে, সঙ্ঘকরণীযেন গন্তুং, সত্তাহং সন্নিৰত্তো কাতব্বো’’তি ৰচনতো অন্তোৰস্সে সংহারিকভাৰেন গন্তুং ৰট্টতি. তত্থ ধম্মছন্দৰসেনপি আগতে সঙ্ঘস্স আযমুখং ৰিনস্সতি. ততো ‘‘সেনাসনানি কত্ৰা’’তি চ ৰুত্তং. আগতন্তি আগমনং. ভাৰেত্থ তপচ্চযোযং. সঙ্ঘকরণীযেন গন্তুন্তি এত্থ ‘‘সেনাসনপটিসংযুত্তেসু এৰ সঙ্ঘকরণীযেসু, ন অঞ্ঞেসূ’’তি ধম্মসিরিত্থেরো ৰদতি কির. অট্ঠকথাযম্পি তং পদং উদ্ধরিত্ৰা ‘‘যং কিঞ্চি উপোসথাগারাদীসু সেনাসনেসূ’’তিআদিনা সেনাসনমেৰ দস্সিতং, তস্মা উপপরিক্খিতব্বং.

অনিমন্তিতেন গন্তুং ন ৰট্টতীতি তস্স রত্তিচ্ছেদো চ দুক্কটাপত্তি চ হোতি, তং ‘‘ৰস্সচ্ছেদো’’তি চ ৰদন্তি. নিমন্তিতোযেৰ নাম হোতীতি এত্থ উপাসকেহি ‘‘ইমস্মিং নাম দিৰসে দানাদীনি করোম, সব্বে সন্নিপতন্তূ’’তি কতাযপি কতিকায গন্তুং ৰট্টতি. পৰারণায নৰমিতো পট্ঠায পংসুকূলিকচীৰরং পরিযেসিতুং কাৰীরপট্টনে ৰিয সব্বেসং গন্তুং ৰট্টতি অনুসংৰচ্ছরং নিযমতো উপাসকেহি সজ্জিত্ৰা ঠপনতো. ৰুত্তম্পি চেতং অন্ধকট্ঠকথাযং ‘‘ভিক্খুসঙ্ঘেন ৰা কতিকা কতা ‘সমন্তা ভিক্খূ গচ্ছন্তূ’তি, ঘোসনং ৰা কতং উপাসকেহি, তত্থ গচ্ছন্তস্স রত্তিচ্ছেদো নত্থীতি তথা ‘অনুসংৰচ্ছরং আগচ্ছন্তূ’তি সকিং নিমন্তিতেপি ৰট্টতী’’তি চ ‘‘চীৰরকালতো পট্ঠায নিযমং কত্ৰা সমন্ততো আগতানং সজ্জেত্ৰা দানতো কাৰীরপট্টনে ঘোসেত্ৰা করণাকারো পঞ্ঞাযতীতি অপরে’’তি চ. আচরিযা পন এৰং ন ৰদন্তি.

অন্তরাযেঅনাপত্তিৰস্সচ্ছেদকথাৰণ্ণনা

২০১. ‘‘সচে দূরং গতো হোতি, সত্তাহৰারেন অরুণো উট্ঠাপেতব্বো’’তি ৰচনতো ‘যস্মিং অন্তরাযে সতি ৰস্সচ্ছেদং কাতুং ৰট্টতি, তস্মিং অন্তরাযেৰ ৰস্সচ্ছেদমকত্ৰা সত্তাহকরণীযেন ৰীতিনামেতুং ৰট্টতীতি দীপিতন্তি অপরে’’তি ৰুত্তং. ৰিনযধরা পন ন ইচ্ছন্তি, তস্মা ‘‘সত্তাহৰারেন অরুণো উট্ঠাপেতব্বো’’তি ইদং তত্রুপ্পাদাদিনিমিত্তং ৰুত্তন্তি ৰেদিতব্বং. তং সন্ধায ‘‘আচরিযা পন এৰং ন ৰদন্তী’’তি ৰুত্তং. গাৰুং ৰাতি বলিবদ্ধং ৰা. বহিসীমায ঠিতানন্তি তেহি খণ্ডসীমায ঠিতেহিপীতি উপতিস্সত্থেরো. ৰস্সচ্ছেদে অস্স ৰস্সচ্ছেদস্স. ৰিহারা অঞ্ঞত্থ ৰুট্ঠাপেন্তেহি তত্থেৰ সন্নিপতিত্ৰা ‘‘ইমিনা চ ইমিনা চ কারণেন ইমস্মিং নাম পদেসে ইমং ৰিহারং নেত্ৰা ৰুট্ঠাপেমা’’তি অনুস্সাৰেত্ৰাৰ কাতব্বন্তি.

ৰজাদীসুৰস্সূপগমনকথাৰণ্ণনা

২০৩. ৰজেন সদ্ধিং গতস্স ৰস্সচ্ছেদে অনাপত্তীতি ৰস্সচ্ছেদো ন হোতীতি কির অধিপ্পাযো. সত্থস্স অৰিহারত্তা ‘‘ইমস্মিং ৰিহারে’’তি অৰত্ৰা ‘‘ইধ ৰস্সং উপেমী’’তি এত্তকং ৰত্তব্বং. ‘‘সত্থে পন ৰস্সং উপগন্তুং ন ৰট্টতীতি ‘ইমস্মিং ৰিহারে ইমং তেমাস’ন্তি ৰা ‘ইধ ৰস্সং উপেমী’তি ৰা ন ৰট্টতি, আলযকরণমত্তেনেৰ ৰট্টতীতি অধিপ্পাযো’’তি লিখিতং. তং পন অট্ঠকথায ৰিরুজ্ঝতি. ‘‘ইধ ৰস্সং উপেমীতি তিক্খত্তুং ৰত্তব্ব’’ন্তি হি ৰুত্তং. অট্ঠকথাৰচনম্পি পুব্বাপরং ৰিরুজ্ঝতীতি চে? ন, অধিপ্পাযাজাননতো. সত্থো দুৰিধো ঠিতো, সঞ্চারোতি. তত্থ ঠিতে কুটিকায ‘‘ইধ ৰস্সং উপেমী’’তি ৰত্ৰা ৰসিতব্বং. ইদঞ্হি সন্ধায ‘‘অনুজানামি, ভিক্খৰে, সত্থে ৰস্সং উপগন্তু’’ন্তি ৰুত্তং, সঞ্চারিম্হি পন সত্থে কুটিকায অভাৰতো ৰস্সং উপগন্তুং ন ৰট্টতি. সতি সিৰিকায ৰা সকটকুটিকায ৰা ৰট্টতি, তথা ৰজেপি. তীসু ঠানেসু ভিক্খুনো নত্থি ৰস্সচ্ছেদে আপত্তি.

পৰারেতুঞ্চ লভতীতি এত্থাযং ৰিচারণা – ‘‘অনুজানামি, ভিক্খৰে, যেন ৰজো, তেন গন্তু’’ন্তি ইদং কিং ৰস্সরক্খণত্থং ৰুত্তং, উদাহু ৰস্সচ্ছেদাপত্তিরক্খণত্থন্তি? কিঞ্চেত্থ যদি ৰস্সরক্খণত্থং, ‘‘ন, ভিক্খৰে, অসেনাসনিকেন ৰস্সং উপগন্তব্ব’’ন্তি ইদং ৰিরুজ্ঝতি. অথ ৰস্সচ্ছেদাপত্তিরক্খণত্থং ৰুত্তন্তি সিদ্ধং ন সো পৰারেতুং লভতীতি, কা পনেত্থ যুত্তি? যতো অযমেৰ তিৰিধো পৰারেতুং লভতি, নেতরো. ৰাল়েহি উব্বাল়্হাদিকো হি উপগতট্ঠানাপরিচ্চাগা লভতি. পরিচ্চাগা ন লভতীতি অযমেত্থ যুত্তি. যেন গামো, তত্থ গতোপি পৰারেতুং লভতীতি একেনাতি আচরিযো. যো হি পুব্বে ‘‘ইধ ৰস্সং উপেমী’’তি ন উপগতো, ‘‘ইমস্মিং ৰিহারে’’তি উপগতো, সো চ পরিচ্চত্তো. অঞ্ঞথা ৰিনা ৰিহারেন কেৰলং গামং সন্ধায ‘‘ইধ ৰস্সং উপেমী’’তি উপগন্তুং ৰট্টতীতি. আপজ্জতূতি চে? ন, ‘‘অনুজানামি, ভিক্খৰে, ৰজে সত্থে নাৰায ৰস্সং উপগন্তু’’ন্তি ৰচনং ৰিয ‘‘গামে উপগন্তু’’ন্তি ৰচনাভাৰতো. যস্মা ‘‘তীসু ঠানেসু ভিক্খুনো নত্থি ৰস্সচ্ছেদে আপত্তী’’তি ৰচনং তত্থ ৰস্সূপগমনং অত্থীতি দীপেতি তদভাৰে ছেদাভাৰা, তস্মা ‘‘সত্থে পন ৰস্সং উপগন্তুং ন ৰট্টতী’’তি কুটিযা অভাৰকালং সন্ধায ৰুত্তন্তি সিদ্ধং. তীসু ঠানেসু ভিক্খুনো নত্থি ৰস্সচ্ছেদে আপত্তীতি ‘‘তেহি সদ্ধিং গচ্ছন্তস্সেৰ নত্থি, ৰিরুজ্ঝিত্ৰা গমনে আপত্তি চ, পৰারেতুঞ্চ ন লভতী’’তি লিখিতং, তস্মা যং ৰুত্তং অট্ঠকথাযং ‘‘অথ সত্থো অন্তোৰস্সেযেৰ ভিক্খুনা পত্থিতট্ঠানং পত্ৰা অতিক্কমতি…পে… অন্তরা একস্মিং গামে তিট্ঠতি ৰা ৰিপ্পকিরতি ৰা’’তিআদি, তং এত্তাৰতা ৰিরুজ্ঝিত্ৰা গতানম্পি ৰিরুজ্ঝিত্ৰা গমনং ন হোতি, তস্মা পৰারেতব্বন্তি দস্সনত্থন্তি ৰেদিতব্বং.

তত্থ ‘‘পদরচ্ছদনং কুটিং কত্ৰা উপগন্তব্ব’’ন্তি ৰচনতো সেনাসনত্থায রুক্খং আরুহিতুং ৰট্টতীতি সিদ্ধং হোতি, ন পাল়িৰিরোধতোতি চে? ন, তপ্পটিক্খেপেনেৰ সিদ্ধত্তা, ইমস্স ইধ পুনপি পটিক্খেপনতো. ‘‘ন, ভিক্খৰে, অসেনাসনিকেন ৰস্সং উপগন্তব্ব’’ন্তি ইমিনা পটিক্খেপেন সিদ্ধে ‘‘ন, ভিক্খৰে, অজ্ঝোকাসে ৰস্সং উপগন্তব্ব’’ন্তি পটিক্খেপো ৰিয সিযাতি চে? ন, অজ্ঝোকাসস্স অসেনাসনভাৰানুমতিপ্পসঙ্গতো. অজ্ঝোকাসো হি ‘‘অজ্ঝোকাসে পলালপুঞ্জে’’তি ৰচনতো সেনাসনন্তি সিদ্ধং. চতুসালঅজ্ঝোকাসে ৰসন্তোপি ‘‘চতুসালায ৰসতী’’তি ৰুচ্চতি, তস্মা তত্থ ৰট্টতীতি আপজ্জতি, তস্মা ইধ অসেনাসনিকো নাম অত্তনা ৰা পরেন ৰা অত্তনো নিবদ্ধৰাসত্থং অপাপিতসেনাসনিকোতি ৰেদিতব্বং. অঞ্ঞথা দ্ৰিন্নং পটিক্খেপানং অঞ্ঞতরাতিরেকতা চ রুক্খমূলেপি নিব্বকোসেপি ৰস্সং উপগন্তুং ৰট্টতীতি চ, অপাপিতসেনাসনিকেনাপি গব্ভে ৰসিতুং ৰট্টতীতি চ আপজ্জতি, সদ্ৰারবন্ধমেৰ সেনাসনং ইধ অধিপ্পেতন্তি কথং পঞ্ঞাযতীতি চে? নিদানতো. অযঞ্হি অসেনাসনিকৰস্সূপগমনাপত্তি ‘‘তেন খো পন সমযেন ভিক্খূ অসেনাসনিকা ৰস্সং উপগচ্ছন্তি, সীতেনপি উণ্হেনপি কিলমন্তী’’তি ইমস্মিং নিদানে পঞ্ঞত্তা, তস্মা সীতাদিপটিক্খেপমেৰ ইধ সেনাসনন্তি অধিপ্পেতব্বন্তি সিদ্ধং. এৰং সন্তে সিদ্ধং পুব্বপক্খনিদস্সনন্তি চে? ন, পুব্বে অপরত্থপৰত্তিসূচনতো. দুতিযজ্ঝাননিদ্দেসে ‘‘ৰিতক্কৰিচারানং ৰূপসমা অৰিতক্কং অৰিচার’’ন্তি (দী. নি. ১.২২৮; ম. নি. ১.২৭১) ৰচনানি নিদস্সনং. অজ্ঝোকাসপটিক্খেপনিদানেন বহিঅজ্ঝোকাসোৰ পটিক্খিত্তো, ন চতুসালাদিমজ্ঝগতো অজ্ঝোকাসোতি আপজ্জতি, তস্মা ন নিদানং পমাণন্তি চে? ন, নিযমতো. কিঞ্চি হি সিক্খাপদং নিদানাপেক্খং হোতীতি সাধিতমেতং. ইদং সাপেক্খং, ইদং অনপেক্খন্তি কথং পঞ্ঞাযতি, ন হি এত্থ উভতোৰিভঙ্গে ৰিয সিক্খাপদানং পদভাজনং, অনাপত্তিৰারো ৰা অত্থীতি? ইধাপি দেসনাৰিধানতো পঞ্ঞাযতি. ‘‘দেৰে ৰস্সন্তে রুক্খমূলম্পি নিব্বকোসম্পি উপধাৰন্তী’’তি হি ইমেহি দ্ৰীহি নিদানৰচনেহি বহি ৰা অন্তো ৰা সব্বং ওৰস্সকট্ঠানং ইধ অজ্ঝোকাসো নাম. অনোৰস্সকট্ঠানম্পি অনিব্বকোসমেৰ ইধ ইচ্ছিতব্বন্তি সিদ্ধং হোতি. তেন ন উপগন্তব্বন্তি ন আলযকরণপটিক্খেপো, ‘‘ইধ ৰস্সং উপেমী’’তি ৰচনপটিক্খেপো. ছৰসরীরং দহিত্ৰা ছারিকায, অট্ঠিকানঞ্চ অত্থায কুটিকা করীযতীতি অন্ধকট্ঠকথাৰচনং. ‘‘টঙ্কিতমঞ্চোতি কসিকুটিকাপাসাণঘর’’ন্তি লিখিতং. ‘‘অকৰাটবদ্ধসেনাসনে অত্তনো পাপিতে সভাগট্ঠানে সকৰাটবদ্ধে ৰসতি চে, ৰট্টতী’’তি ৰুত্তং. পযোগোপি অত্থি, ‘‘অসেনাসনিকেন ৰস্সং ন উপগন্তব্ব’’ন্তি পাল়ি চ অট্ঠকথা চ, তস্মা উপপরিক্খিতব্বং.

অধম্মিককতিকাদিকথাৰণ্ণনা

২০৫. মহাৰিভঙ্গে ৰুত্তন্তি এত্থ অযং অন্ধকট্ঠকথাৰচনং ঊনপন্নরসৰস্সেন সামণেরেন ইধ ৰিহারে ন ৰত্থব্বা, ন পংসুকূলং আহিণ্ডিতব্বং, ন চোল়ভিক্খা গহেতব্বা, ন অঞ্ঞৰিহারে ভুঞ্জিতব্বং, ন অঞ্ঞস্স ভিক্খুস্স ৰা ভিক্খুনিযা ৰা সন্তকং ভুঞ্জিতব্বং, অঞ্ঞমঞ্ঞং নেৰ আলপেয্যাম ন সল্লপেয্যাম, ন সজ্ঝাযিতব্বং, মত্তিকাপত্তেন ৰট্টতি, ন অপরিপুণ্ণপরিক্খারস্স ৰাসোতি.

২০৬. মুসাৰাদোতি ৰিসংৰাদো অধিপ্পেতো. কেচি ‘‘ৰিসংৰাদনৰসেন পটিস্সুণিত্ৰাতি ৰুত্ত’’ন্তি চ, ‘‘রঞ্ঞো ৰুত্তৰচনানুরূপতো মুসাৰাদোতি গহট্ঠা গণ্হন্তীতি ৰুত্ত’’ন্তি চ ৰদন্তি.

২০৭. ‘‘পুরিমিকা চ ন পঞ্ঞাযতি. কস্মা? ‘দুতিযে ৰসামী’তি চিত্তে উপ্পন্নে পঠমসেনাসনগ্গাহো পটিপ্পস্সম্ভতি. পুন ‘পঠমে এৰ ৰসামী’তি চিত্তে উপ্পন্নে দুতিযো পটিপ্পস্সম্ভতি. উভযাৰাসে ৰিধানং নত্থী’’তি লিখিতং. পোরাণগণ্ঠিপদে পন ‘‘পঠমং গহিতট্ঠানে অৰসিত্ৰা অঞ্ঞস্মিং ৰিহারে সেনাসনং গহেত্ৰা দ্ৰীহতীহং ৰসতি, ততো পঠমগ্গাহো পটিপ্পস্সম্ভতীতি পুরিমিকা চ ন পঞ্ঞাযতি. পচ্ছিমগ্গাহো ন পটিপ্পস্সম্ভতি. ইদঞ্হি দিৰসৰসেন পটিপ্পস্সম্ভনং নাম হোতি. অথ পচ্ছিমং তেমাসং অঞ্ঞস্মিং ৰসতি, পুরিমিকা চ ন পঞ্ঞাযতি, ইদং সেনাসনগ্গাহানং ৰসেন পটিপ্পস্সম্ভনং নামা’’তি ৰুত্তং. উভোপেতে অত্থৰিকপ্পা ইধ নাধিপ্পেতা. যত্থাযং পটিস্সুতো, তত্থ পুরিমিকা চ ন পঞ্ঞাযতি, পটিস্সৰে চ আপত্তি দুক্কটস্স. কত্থ পন পুরিমিকা পঞ্ঞাযতীতি? অন্তরামগ্গে দ্ৰীসু আৰাসেসু যত্থ তদহেৰ পচ্ছিমগ্গাহো, তত্থ পঠমং গহিতট্ঠানে সত্তাহকরণীযেন গচ্ছতো ন ৰস্সচ্ছেদো, সো তদহেৰ অকরণীযো পক্কমতীতিআদিম্হি ‘‘করণীযং নাম সত্তাহকরণীয’’ন্তি লিখিতং.

পাল়িমুত্তকরত্তিচ্ছেদৰিনিচ্ছযে ‘‘ধম্মস্সৰনাদী’’তি ৰুত্তং. আদিম্হি চতূসু ৰারেসু নিরপেক্খপক্কমনস্সাধিপ্পেতত্তা ‘‘সত্তাহকরণীযেনা’’তি ন ৰুত্তং তস্মিং সতি নিরপেক্খগমনাভাৰতো. তত্থ পুরিমা দ্ৰে ৰারা ৰস্সং অনুপগতস্স ৰসেন ৰুত্তা, তস্মা উপগতস্স তদহেৰ সত্তাহকরণীযেন গন্ত্ৰা অন্তোসত্তাহং আগচ্ছতো ন ৰস্সচ্ছেদোতি সিদ্ধং. পচ্ছিমা দ্ৰে ৰারা উপগতস্স নিরপেক্খগমনৰসেন ৰুত্তা, ‘‘সত্তাহং অনাগতায পৰারণায সকরণীযো পক্কমতী’’তি ততো বহিদ্ধা সত্তাহং ৰীতিনামেন্তস্স ৰস্সচ্ছেদোতি দস্সনত্থং ৰুত্তং. তত্থ ‘‘অকরণীযো পক্কমতী’’তি ৰচনাভাৰা ৰিনা রত্তিচ্ছেদকারণেন গন্তুং ন ৰট্টতীতি সিদ্ধং. পৰারেত্ৰা পন গন্তুং ৰট্টতি পৰারণায তংদিৰসসন্নিস্সিতত্তা. তত্থ ন ৰা আগচ্ছেয্যাতি অন্তরাযেন. আচরিযো পন ‘‘ন পুন ইধাগচ্ছামী’তি নিরপেক্খোপি সকরণীযোৰ গন্তুং লভতীতি দস্সনত্থং অকরণীযো’তি ন ৰুত্ত’’ন্তি ৰদতি. ‘‘সীহল়দীপে কির চূল়পৰারণা নাম অত্থি, তং পৰারণং কত্ৰা যথাসুখং সকরণীযা গচ্ছন্তি, পযোগঞ্চ দস্সেন্তী’’তি ৰুত্তং. ‘‘তত্থ ছ অরুণা অন্তোৰস্সে হোন্তি, একো বহি, তস্মা সো তেমাসং ৰুত্থো হোতীতি অপরে’’তি চ, ‘‘আচরিযো এৰং ন ৰদতী’’তি চ ৰুত্তং. সব্বত্থ ৰিহারং উপেতীতি অত্তনো ৰস্সগ্গেন পত্তগব্ভং উপেতীতি পোরাণা. অসতিযা পন ৰস্সং ন উপেতীতি এত্থ ‘‘ইমস্মিং ৰিহারে ইমং তেমাস’’ন্তি অৰচনেন. ‘‘অট্ঠকথাযং ৰুত্তরত্তিচ্ছেদকারণং ৰিনা তিরোৰিহারে ৰসিত্ৰা আগচ্ছিস্সামীতি গচ্ছতোপি ৰস্সচ্ছেদ’’ন্তি লিখিতং.

২০৮. পটিস্সুতো হোতি পচ্ছিমিকাযাতি অন্তরা পব্বজিতভিক্খুনা, ছিন্নৰস্সেন ৰা পটিস্সুতো, অঞ্ঞেন পন পুরিমং অনুপগন্ত্ৰা পচ্ছিমিকাযং পটিস্সৰো ন কাতব্বো. রত্তিচ্ছেদে সব্বত্থ ৰস্সচ্ছেদোতি সন্নিট্ঠানং কত্ৰা ৰদন্তি. কেচি পন ন ইচ্ছন্তি. তং সাধেতুং অনেকধা পপঞ্চেন্তি. কিং তেন.

ৰস্সূপনাযিকক্খন্ধকৰণ্ণনা নিট্ঠিতা.