১০. কোসম্বকক্খন্ধকৰণ্ণনা

কোসম্বকৰিৰাদকথাৰণ্ণনা

৪৫১. সুত্তন্তিকোতি এত্থ কিঞ্চাপি ‘‘ৰিনযধরো মাতিকাধরো’’তি ৰুত্তং, উভতোৰিভঙ্গং পন সন্ধায ৰুত্তং, ন খন্ধকভাণকো হোতি. আৰুসো এত্থ আপত্তীতি ৰচনং উপাদায ‘‘সো তস্সা আপত্তিযা আপত্তিদিট্ঠি হোতী’’তি ৰুচ্চতি. পচ্ছা ৰিনযধরো ‘‘ৰত্থুম্হি সতি পমাণং, ন পঞ্ঞত্তিয’’ন্তি সতিং পটিলভিত্ৰা তস্সা আপত্তিযা আপত্তিদিট্ঠি অহোসি, তেন ৰুত্তং অন্তে ‘‘অঞ্ঞে ভিক্খূ তস্সা আপত্তিযা আপত্তিদিট্ঠিনো হোন্তী’’তি.

৪৫৫. ‘‘যথা মযা ঞত্তী’’তি লিখন্তি ‘‘পঞ্ঞত্তা’’তি একৰচনত্তা.

দীঘাৰুৰত্থুকথাৰণ্ণনা

৪৫৮. ‘‘ভূতপুব্বং, ভিক্খৰে, বারাণসিযং ব্রহ্মদত্তো’’তি লিখন্তি. পুরাণপোত্থকেসু ‘‘বারাণসিয’’ন্তি নত্থি, ‘‘নত্থিভাৰোৰ সুন্দরো’’তি ৰদন্তি.

পালিলেয্যকগমনকথাৰণ্ণনা

৪৬৭. রক্খিতৰনসণ্ডেতি সঙ্গীতিত্থেরেহি সুৰিঞ্ঞেয্যং কত্ৰা ৰুত্তং. ‘‘পালিলেয্যোতি গামো, তস্স ৰসেনা’’তিপি ৰদন্তি, তং ধম্মপদট্ঠকথায ন ৰিরুজ্ঝতি.

অট্ঠারসৰত্থুকথাৰণ্ণনা

৪৭৩. ন ত্ৰেৰ…পে… পটিবাহিতব্বন্তি ৰদামীতি এত্থ সেনাসনারহস্স যো সেনাসনং পটিবাহতি, তস্সেৰ আপত্তি দুক্কটস্স. ‘‘কলহকারকাদীনমেত্থ ওকাসো নত্থীতিআদিকং সঙ্ঘস্স কতিকং ৰত্ৰা তং ন পঞ্ঞাপেন্তস্স ৰা ‘অহং বুদ্ধো’তি পসয্হ অত্তনা অত্তনো পঞ্ঞাপেত্ৰা গণ্হন্তং ‘যুত্তিযা গণ্হথা’তি ৰত্ৰা ৰারেন্তস্স ৰা দোসো নত্থি. ইধ কলহৰূপসমনত্থং আগতানং কোসম্বিকানম্পি ‘যথাৰুড্ঢ’ন্তি অৰত্ৰা ‘ৰিৰিত্তে অসতি ৰিৰিত্তং কত্ৰাপি দাতব্ব’ন্তি ৰুত্তত্তা ৰিৰিত্তং কত্ৰা দেন্তং পটিবাহেন্তস্সেৰ আপত্তীতি কির অযমত্থো পারিৰাসিকাদীনং ৰিহারপরিযন্তদাপনেন সাধিতব্বো’’তি লিখিতং.

সঙ্ঘসামগ্গীকথাৰণ্ণনা

৪৭৫. ‘‘অথ খো তে উক্খিত্তানুৰত্তকা ভিক্খূ তং উক্খিত্তকং ভিক্খুং ওসারেত্ৰা যেন উক্খেপকা ভিক্খূ…পে… তস্স ৰত্থুস্স ৰূপসমায সঙ্ঘসামগ্গিং করোমা’’তি ৰচনং দুৰিঞ্ঞেয্যৰিনিচ্ছযং ৰিনযলক্খণকুসলস্স. ৰিজ্জমানে হি কারকসঙ্ঘে ইতরো সঙ্ঘো ওসারিতুং ন লভতি. ওসারেন্তো চে, তে ভিক্খূ কারকসঙ্ঘেন সমানলদ্ধিকভাৰং পত্তত্তা তেন সমানসংৰাসকা হোন্তি, ততো উক্খেপকানং ছন্দং অগ্গহেত্ৰা ওসারেন্তানং কম্মং কুপ্পতি, তস্মা ‘‘তেন হি, ভিক্খৰে, তং ভিক্খুং ওসারেথা’’তি (মহাৰ. ৪৭৪) ভগৰতো ৰচনেন উক্খিত্তানুৰত্তকা ওসারেসুং, উদাহু নিস্সীমং গন্ত্ৰা, উদাহু ইতরেসং ছন্দং গহেত্ৰা ওসারেসুং, ননু এতেসমঞ্ঞতরেনেত্থ ভৰিতব্বং, ন চ পনেতং সব্বগণ্ঠিপদেসু ৰিচারিতং. অযং পনেত্থ তক্কো –

‘‘যস্মিং ৰত্থুস্মিং সঙ্ঘেন, কতকম্মস্স ভিক্খুনো;

সতি তস্মিং ন অঞ্ঞস্স, পটিপ্পস্সম্ভনং খমং.

‘‘ৰিরমন্তে ততো দোসো, অপি সঙ্ঘো অকারকো;

ওসারেতুং অলং যস্মা, কারকো অনুলোমিকো’’তি.

৪৭৭. ‘‘অট্ঠ দূতঙ্গানি নাম সোতা চ হোতি, সাৰেতা চ উগ্গহেতা চ ধারেতা চ ৰিঞ্ঞাতা চ ৰিঞ্ঞাপেতা চ কুসলো চ সহিতাসহিতদস্সনো চ অকলহকারকো চাতি এতানী’’তি ৰুত্তং.

কোসম্বকক্খন্ধকৰণ্ণনা নিট্ঠিতা.

মহাৰগ্গস্স লীনত্থপকাসনা নিট্ঠিতা.

নমো তস্স ভগৰতো অরহতো সম্মাসম্বুদ্ধস্স