৯. অধিকরণৰূপসমনসমথকথা

২২৮. চতুৰগ্গকরণে কম্মেতি সীমসম্মুতিআদিকম্মে. পঞ্চৰগ্গকরণেতি পচ্চন্তিমেসু জনপদেসু উপসম্পদাদিকম্মে. দসৰগ্গকরণেতি মজ্ঝিমেসু জনপদেসু উপসম্পদকম্মে. ৰীসতিৰগ্গকরণেতি অব্ভানকম্মে. কম্মপ্পত্তাতি কম্মস্স পত্তা যুত্তা অনুরূপা.

২৩০. সম্পটিচ্ছিতব্বন্তি পটিগ্গণ্হিতব্বং. সম্পটিচ্ছিত্ৰা চ পন অতিক্কামেতব্বন্তি সম্বন্ধো. ভণ্ডকন্তি চীৰরাদিভণ্ডকং. মাননিগ্গহত্থাযাতি ভণ্ডনজাতানং মানস্স নিগ্গহত্থায. কতিপাহন্তি কতিপযাহং, দ্ৰীহতীহন্তি অত্থো.

২৩১. অনন্তানি চেৰ ভস্সানীতি এত্থ অনন্তসদ্দো অপরিমাণসদ্দেন অত্থতো একোতি আহ ‘‘অপরিমাণানী’’তি. ‘‘ৰচনানী’’তি ইমিনা ভস্সসদ্দো ৰচনপরিযাযোতি দস্সেতি. উব্বাহিকায সম্মনিতব্বোতি কেন সম্মনিতব্বোতি আহ ‘‘অপলোকেত্ৰা ৰা’’তিআদি. ইমিনা অপলোকনকম্মেন ৰা ঞত্তিদুতিযকম্মেন ৰা সম্মনিতব্বোতি দস্সেতি. অনন্তানি ভস্সানি ধম্মকথিকং উদ্ধরিত্ৰা বাহতি পটিসেধেতি ইমায সম্মুতিযাতি উব্বাহিকা, তায. এৰং সম্মতেহি পন ভিক্খূহি ৰিনিচ্ছিতব্বন্তি সম্বন্ধো. ৰিসুং নিসীদিত্ৰা তস্সাযেৰ পরিসায নিসীদিত্ৰা ৰাতি যোজনা. অঞ্ঞেহীতি সম্মতভিক্খূহি অঞ্ঞেহি.

২৩৩. তত্রস্সাতি এত্থ তত্র অস্সাতি পদৰিভাগং কত্ৰা তসদ্দো পরিসৰিসযো পসিদ্ধৰিসযো, অস্সসদ্দো আখ্যাতিকোতি আহ ‘‘তস্সং পরিসতি ভৰেয্যা’’তি. ‘‘নেৰ সুত্তং আগত’’ন্তি সামঞ্ঞতো ৰুত্তেপি ‘‘নো সুত্তৰিভঙ্গো’’তি ৰক্খমানত্তা মাতিকং সন্ধায ৰুত্তন্তি আহ ‘‘ন মাতিকা আগতা’’তি. ৰিনযোপীতি খন্ধকৰিনযোপি. পিসদ্দেন সুত্তৰিভঙ্গং অপেক্খতি. ব্যঞ্জনচ্ছাযাযাতি এত্থ ছাযাসদ্দো পটিবিম্বে চ পভায চ হোতীতি আহ ‘‘ব্যঞ্জনমত্তমেৰা’’তি, ব্যঞ্জনপটিবিম্বিকব্যঞ্জনপভাৰন্তভূতং অত্থং অগ্গহেত্ৰা ব্যঞ্জনপটিবিম্বব্যঞ্জনপভামত্তমেৰ গহেত্ৰাতি অধিপ্পাযো. ‘‘পটিসেধেতী’’তি ইমিনা পটিবাহসদ্দো পটিসেধত্থোযেৰ, ন মদ্দনত্থোতি দস্সেতি. পটিবাহনাকারং দস্সেন্তো আহ ‘‘জাতরূপরজতখেত্তৰত্থুপটিগ্গহণাদীসূ’’তিআদি. কিন্তি কেন কারণেন, কস্মা কারণা ৰা. ইমেতি জাতরূপাদিপটিগ্গাহকে ভিক্খূ. কারেথাতি তুম্হে কারেয্যাথ. এয্যাথস্স হি এথাদেসো. পুচ্ছাযং সত্তমীৰিভত্তি হোতি. সুত্তেতি সুত্তন্তপিটকে. অপরো ধম্মকথিকো ৰদতীতি সম্বন্ধো. ইমেসন্তি ওলম্বেত্ৰা নিৰাসেন্তানং. এত্থাতি ওলম্বেত্ৰা নিৰাসনে.

২৩৪. বহুতরা ভিক্খূতি এত্থ দ্ৰিগুণতিগুণাদিনা অধিকা এৰ বহুতরা নামাতি আহ ‘‘একেনপি অধিকা বহুতরাৰা’’তি. ‘‘কো পন ৰাদো’’তিআদিনা ‘‘একেনপী’’তি এত্থ পিসদ্দস্স গরহত্থং দস্সেতি.

তিৰিধসলাকগ্গাহকথা

২৩৫. সঞ্ঞত্তিযাতি এত্থ সঞ্ঞাপনং সঞ্ঞত্তি, তদত্থাযাতি দস্সেন্তো আহ ‘‘সঞ্ঞাপনত্থাযা’’তি. গূহিতব্বোতি গূল়্হো, সোযেৰ গূল়্হকো, সলাকগ্গাহো কাতব্বোতি সম্বন্ধো. ৰিৰরিতব্বোতি ৰিৰটো, সোযেৰ ৰিৰটকো. সস্স অত্তনো কণ্ণসমীপে জপ্পীযতি কথীযতীতি সকণ্ণজপ্পো, সোযেৰ সকণ্ণজপ্পকো. ‘‘নিমিত্তসঞ্ঞং আরোপেত্ৰা’’তি ইমিনা ৰণ্ণাৰণ্ণাযো কত্ৰাতি এত্থ ৰণ্ণসদ্দো সণ্ঠানৰাচকোতি দস্সেতি. সুসণ্ঠানদুসণ্ঠানা সলাকাযো কত্ৰাতি অত্থো. ততোতি ৰিসভাগকরণতো পরং গহেতব্বোতি সম্বন্ধো. সব্বাপি তা সলাকাযোতি যোজনা. কত্ৰাতি পক্খিপনং কত্ৰা. ৰুত্তনযেনাতি ‘‘অলজ্জুস্সন্নাযা’’তিআদিনা ৰুত্তনযেন. ‘‘যাৰততিয’’ন্তি ইমিনা পচ্চুক্কড্ঢিতব্বন্তি এত্থ পুনপ্পুনং উদ্ধং কড্ঢিতব্বন্তি অত্থং দস্সেতি. অতিরেকজাতেতি অধম্মৰাদীহি অতিরেকতো জাতে সতীতি সম্বন্ধো. যাৰততিযম্পীতি পিসদ্দো ততো ঊনে একদ্ৰেৰারে পন কা নাম কথাতি দস্সেতি.

সকণ্ণজপ্পকে পন এৰং ৰিনিচ্ছযো ৰেদিতব্বোতি যোজনা. সচে সঙ্ঘত্থেরো গণ্হাতীতি সম্বন্ধো. সোতি সঙ্ঘত্থেরো. ৰযোঅনুপ্পত্তাতি পচ্ছিমৰযং অনুপ্পত্তা. এতন্তি অধম্মৰাদিসলাকং. অস্সাতি সঙ্ঘত্থেরস্স. ইতরা সলাকাতি অধম্মৰাদিসলাকাহি অঞ্ঞা ধম্মৰাদিসলাকা. সোতি সঙ্ঘত্থেরো. তন্তি ধম্মৰাদিসলাকং. ততোতি নেৰ অৰবুজ্ঝনকারণা. ৰুত্তনযমেৰাতি গূল়্হকে ৰুত্তনযমেৰ. ৰিৰটো অত্থো ইমস্সাতি ৰিৰটত্থো.

তস্সপাপিযসিকাৰিনযকথা

২৩৮. পারাজিকসামন্তং নামাতি পারাজিকস্স আসন্নং নাম. অদিন্নাদানাদীসূতি আদিসদ্দেন মনুস্সৰিগ্গহ উত্তরিমনুস্সধম্মপারাজিকে সঙ্গণ্হাতি. নিব্বেঠযমানন্তি ৰেঠনরহিতং, তমেনং ভিক্খুন্তি সম্বন্ধো. ইমিনা নিব্বেঠেন্তন্তি এত্থ অন্তসদ্দো মানসদ্দপরিযাযোতি দস্সেতি. অতিৰেঠেতীতি এত্থ কেহি অতিৰেঠেতীতি আহ ‘‘ইঙ্ঘাযস্মাতিআদিৰচনেহী’’তি. তেনাতি চোদকেন. মন্তি মমং. আহাতি চুদিতকো আহ. এতস্সাতি অৰজাননপটিজাননাদিকারকস্স পাপিযস্স পুগ্গলস্স. সীলৰা ভৰিস্সতীতি পাপিযো পুগ্গলো সচে সীলৰা ভৰিস্সতি. পটিপ্পস্সদ্ধিন্তি পাপিযভাৰতো পটিপ্পস্সম্ভনং. নো চেতি সীলৰা নো ভৰিস্সতি চে. তথা নাসিতোতি তেন তস্স পাপিযসিককম্মকরণেন নাসং গতো ভৰিস্সতি. সব্বত্থাতি সব্বস্মিং সমথক্খন্ধকে.

ইতি সমথক্খন্ধকৰণ্ণনায যোজনা সমত্তা.