১৫৩. যানাদিপটিক্খেপকথা

২৫৩. ইত্থিযুত্তেনাতি এত্থ রূল়ীৰসেন ধেনুপি ইত্থী নামাতি আহ ‘‘ধেনুযুত্তেনা’’তি. পুরিসন্তরেনাতি এত্থ পুরিসো এৰ অন্তরো অঞ্ঞো এত্থাতি পুরিসন্তরং যানং. পুরিসন্তরো নাম অত্থতো সারথীতি আহ ‘‘পুরিসসারথিনা’’তি, যানেনাতি যোজনা. গঙ্গামহিযাযাতি এত্থ গঙ্গা চ মহী চ গঙ্গামহী, তত্থ কীল়িকা গঙ্গামহিযাতি অত্থং দস্সেন্তো আহ ‘‘গঙ্গামহীকীল়িকাযা’’তি. তত্থ হি ইত্থিপুরিসা যানেহি উদককীল়ং কীল়ন্তি. পুরিসযুত্তং হত্থৰট্টকন্তি এত্থ ‘‘অনুজানামি ভিক্খৰে পুরিসযুত্তঞ্চ হত্থৰট্টকঞ্চা’’তি দস্সেন্তো আহ ‘‘এত্থা’’তিআদি. তত্থ পুরিসযুত্তন্তি পুরিসেন যুজ্জিতব্বন্তি পুরিসযুত্তং যানং. হত্থৰট্টকন্তি হত্থেন ৰট্টেতব্বন্তি হত্থৰট্টকং যানং. যানুগ্ঘাতেনাতি যানস্স উল্লঙ্ঘিত্ৰা গমনেন. হনধাতু হি গত্যত্থো. তমত্থং দস্সেন্তো আহ ‘‘যানং অভিরুহন্তস্সা’’তিআদি. ‘‘তপ্পচ্চযা’’তি ইমিনা যানুগ্ঘাতেনাতি এত্থ হেত্ৰত্থে করণৰচনন্তি দস্সেতি. পীঠকসিৰিকন্তি পীঠেন সহ কতং সিৰিকং. পটপোটলিকন্তি পটমযং পোটলিকং.