১৫৪. উচ্চাসযনমহাসযনপটিক্খেপকথা

২৫৪. উচ্চং আসযনং উচ্চাসযনং. মহন্তং আসযনং মহাসযনং. আসন্দিআদীসু এৰং ৰিনিচ্ছযো ৰেদিতব্বোতি যোজনা. পমাণাতিক্কন্তাসনন্তি দীঘাসনং. তঞ্হি আগম্ম সদতি নিসীদতীতি এত্থ, আযতং ৰা সুট্ঠুং দদাতীতি আসন্দীতি ৰুচ্চতি. ৰাল়রূপানীতি সীহব্যগ্ঘাদিৰাল়রূপানি. পাদেসু ৰাল়রূপানি পরিচ্ছিন্দিত্ৰা অঙ্কীযতি লক্খীযতীতি পল্লঙ্কো. গোনকোতি গৰতি দীঘলোমেহি উগ্গচ্ছতি এত্থাতি গোনকো. কোজৰোতি কুযং ভূমিযং জৰতি গচ্ছতীতি কোজৰো. তস্সাতি গোনকস্স. লোমানি চতুরঙ্গুলাধিকানি হোন্তি কিরাতি যোজনা. ৰানচিত্রউণ্ণামযত্থরণোতি ৰানেন সিব্বনেন সঞ্জাতং চিত্ররূপমেত্থাতি ৰানচিত্রং, উণ্ণায নিব্বত্তো উণ্ণামযো, সোযেৰ অত্থরণো উণ্ণামযত্থরণো, ৰানচিত্রঞ্চ তং উণ্ণামযত্থরণো চেতি ৰানচিত্রউণ্ণামযত্থরণো. সেতত্থরণোতি সেতত্থিকেহি সেৰীযতীতি সোতো, সোযেৰ অত্থরণো সেতত্থরণো. ইমিনা অত্থেন পটতি সেতভাৰং গচ্ছতীতি পটিকাতি কাতব্বং. পটিকাসদ্দোযং অড্ঢেন্দুপাসাণেপি পৰত্ততি. ঘনপুপ্ফকোতি ঘনং কথিনং পুপ্ফমেত্থাতি ঘনপুপ্ফকো. ইমিনা ঘনপুপ্ফসঙ্খাতং পটলমেত্থ অত্থীতি পটলিকাতি দস্সেতি. সোতি অত্থরণো. আমলকপটোতি আমলকপুপ্ফং দস্সেত্ৰা কতো পটো. তূলিকাতি তূলং পূরেত্ৰা কতা তূলিকা. ৰিকতিকাতি সীহব্যগ্ঘাদিরূপেহি (দী. নি. অট্ঠ. ১.১৫) ৰিচিত্তাকারেন করীযতীতি ৰিকতিকা. দীঘনিকাযট্ঠকথাযং ‘‘উদ্দলোমীতি উভতোদসং উণ্ণামযত্থরণং. একন্তলোমীতি একতোদসং উণ্ণামযত্থরণ’’ন্তি ৰুত্তং. ইধ পন ‘‘উদ্দলোমীতি একতো উগ্গতলোমং উণ্ণামযত্থরণং, একন্তলোমীতি উভতো উগ্গতলোমং উণ্ণামযত্থরণ’’ন্তি ৰুত্তং. তস্মা দ্ৰে অট্ঠকথাযো অঞ্ঞমঞ্ঞং ৰিসদিসা হোন্তি. এত্থ দীঘনিকাযট্ঠকথানযেন ৰচনত্থং করিস্সামি. উট্ঠিতং দ্ৰীহি পক্খেহি, দ্ৰীসু ৰা দসাসঙ্খাতং লোমমেত্থাতি উদ্দলোমী. নিগ্গহিতাগমং কত্ৰা ‘‘উন্দলোমী’’তিপি পাঠো, অযমেৰত্থো. একস্মিং অন্তে দসাসঙ্খাতং লোমমেত্থাতি একন্তলোমীতি. কোসেয্যকট্টিস্সমযন্তি এত্থ কোসেয্যন্তি কোসিযসুত্তং. কট্টিস্সন্তি কট্টিস্সনামকং ৰাকং. ইমিনা কোসেয্যঞ্চ কট্টিস্সঞ্চ কট্টিস্সানীতি ৰিরূপেকসেসং কত্ৰা কট্টিস্সেহি পকতং অত্থরণং কট্টিস্সন্তি অত্থং দস্সেতি. সুদ্ধকোসেয্যন্তি রতনঅপরিসিব্বিতং সুদ্ধকোসেয্যং. ইমিনা সুদ্ধকট্টিস্সম্পি ৰট্টতীতি দস্সেতি.

সোল়স নাটকিত্থিযো ঠত্ৰা নচ্চং করোন্তি এত্থাতি কুত্তকন্তি অত্থং দস্সেন্তো আহ ‘‘সোল়সন্ন’’ন্তিআদি. অজিনচম্মেহীতি অজিনমিগচম্মেহি, কতইতি সম্বন্ধো. পৰেণীতি দুপট্টতিপট্টাদীহি পরংপরৰসেন কতত্তা ‘‘পৰেণী’’তি ৰুচ্চতি. অজিনচম্মানি হি সুখুমতরানি, তস্মা দুপট্টতিপট্টাদীনি কত্ৰা পৰেণিৰসেন কতানি. তস্মা ৰুত্তং ‘‘অজিনপৰেণী’’তি. ‘‘কদলিমিগচম্মং নামা’’তি ইমিনা তস্স চম্মং কদলিমিগইতি গহেতব্বং উত্তরপদলোপৰসেন ৰা উপচারেন ৰাতি দস্সেতি. পৰরসদ্দো উত্তমত্থোতি আহ ‘‘উত্তমপচ্চত্থরণ’’ন্তি. তন্তি কদলিমিগপৰরপচ্চত্থরণং. সউত্তরচ্ছদন্তি এত্থ সকারো সহসদ্দকারিযোতি দস্সেন্তো আহ ‘‘সহ উত্তরচ্ছদেনা’’তি. ‘‘উপরী’’তি ইমিনা উত্তরসদ্দস্স সেট্ঠাদযো নিৰত্তেতি. ‘‘সদ্ধি’’ন্তি ইমিনা সহসদ্দস্স তুল্যত্থং নিৰত্তেতি. ‘‘সেত…পে… ন ৰট্টতী’’তি ইমিনা রত্তৰিতানং হেট্ঠা কপ্পিযপচ্চত্থরণে সতিপি ন ৰট্টতীতি দস্সেতি. কস্মা? রত্তৰিতানস্স অকপ্পিযত্তা. উভতোলোহিতকূপধানন্তি এত্থ উভসরূপং দস্সেতুং ৰুত্তং ‘‘সীসূপধানঞ্চ পাদূপধানঞ্চা’’তি. সীসো উপগন্ত্ৰা তিট্ঠতি এত্থাতি উপধানং, উপ ভুসং ৰা সুখং ধারেতীতি উপধানং, বিব্বোহনং. সচে পমাণযুত্তং, তং উপধানং ৰট্টতীতি যোজনা.