৭৪. অৰিপ্পৰাসসীমানুজাননকথা

১৪৩. অন্ধকৰিন্দং নামাতি তস্স গামস্স নামং. তন্তি অন্ধকৰিন্দং. থেরোতি মহাকস্সপত্থেরো. ততোতি অন্ধকৰিন্দতো. ইমিনা ‘‘অন্ধকৰিন্দা’’তি এত্থ নিস্সক্কত্থে নিস্সক্কৰচনন্তি দস্সেতি. উপোসথন্তি তদত্থে উপযোগৰচনং. উপোসথত্থাযাতি হি অত্থো. অন্ধকৰিন্দা রাজগহং আগমনস্স কারণং দস্সেন্তো আহ ‘‘রাজগহং হী’’তিআদি. তত্থ হীতি যস্মা. অন্ধকৰিন্দা ৰিহারং অন্তো কত্ৰা ‘‘অট্ঠারস মহাৰিহারা’’তি ৰুত্তং. নেসন্তি অট্ঠারসন্নং মহাৰিহারানং. সঙ্ঘস্স সামগ্গিদানত্থন্তি এত্থ সঙ্ঘস্স সামগ্গিদানং অত্তনো উপোসথকিচ্চং সিদ্ধং. তস্মা পাল়িযং ‘‘উপোসথং আগচ্ছন্তো’’তি ৰুত্তং. ‘‘সিপ্পিনিযং নামা’’তি ইমিনা নদিং তরন্তোতি এত্থ নদিযা নামং দস্সেতি. মনং ৰূল়্হোতি এত্থ মনন্তি নিপাতো ঈসকত্থোতি দস্সেন্তো আহ ‘‘ঈসক’’ন্তি. ‘‘অপ্পমত্ত’’ন্তি ইমিনা ‘‘ঈসক’’ন্তিপদস্স অত্থং দস্সেতি. ‘‘ৰূল়্হভাৰো’’তি ইমিনা ভাৰপচ্চযেন ৰিনা ভাৰত্থো ঞাতব্বোতি দস্সেতি. চণ্ডেনাতি খরেন. তত্থাতি নদিযং. অমনসিকরোন্তোতি ‘‘চণ্ডসোত’’ন্তি আভোগং অকরোন্তো. ন পন ৰূল়্হোতি ন পন মহাৰূল়্হো. উদকব্ভাহতানীতি উদকেন অভিআহতানি. অস্সাতি থেরস্স. অল্লানীতি তিন্তানি.

১৪৪. পুরিমকম্মৰাচাতি ‘‘সম্মতা সা সীমা সঙ্ঘেন তিচীৰরেন অৰিপ্পৰাসা’’তি পুরে ৰুত্তা কম্মৰাচা. অযমেৰাতি ‘‘ঠপেত্ৰা গামঞ্চ গামূপচারঞ্চা’’তিপদং পক্খিপিত্ৰা অনুপঞ্ঞত্তা অযমেৰ কম্মৰাচা. অযন্তি পচ্ছিমকম্মৰাচা. হি যস্মা ভিক্খুনিসঙ্ঘো অন্তোগামে ৰসতি, তস্মা পুরিমাযেৰ ৰট্টতীতি যোজনা. যদি এৰন্তি যদি ভিক্খুনিসঙ্ঘস্স অযং পচ্ছিমকম্মৰাচা ৰট্টনং সিযা ভৰেয্য, এৰং সতীতি যোজনা. সোতি ভিক্খুনিসঙ্ঘো. এতায কম্মৰাচাযাতি পচ্ছিমকম্মৰাচায. ন লভেয্যাতি অন্তোগামে ৰসনত্তা তিচীৰরপরিহারং ন লভেয্য. কিং ন লভতিযেৰাতি আহ ‘‘অত্থি চস্স পরিহারো’’তি. অস্সাতি ভিক্খুনিসঙ্ঘস্স. দ্ৰেপি সীমাযোতি সমানসংৰাসকসীমা চ অৰিপ্পৰাসসীমা চাতি দ্ৰেপি সীমাযো. তত্থাতি ভিক্খুভিক্খুনীসু. তস্সাতি ভিক্খূনং সীমায. এসেৰ নযোতি ভিক্খুনীনং সীমং অজ্ঝোত্থরিত্ৰাপি অন্তোপৰিসিত্ৰাপি ভিক্খূনং সীমায সম্মনে এসেৰ নযো. এতেতি ভিক্খুভিক্খুনিযো. সামঞ্ঞত্তা হি পুল্লিঙ্গেন ৰুত্তং. এত্থ চাতি ‘‘ঠপেত্ৰা গামঞ্চ গামূপচারঞ্চা’’তিপদে চ. সঙ্গহো ৰেদিতব্বো, কস্মা? গামেন নিগমনগরানং একলক্খণত্তা.

পরিক্খেপোকাসোতি পরিক্খেপারহোকাসো. তেসূতি গামগামূপচারেসু. পরিহারন্তি চীৰরৰিপ্পৰাসআপত্তিঅপনযনং. ‘‘ইতী’’তিআদি নিগমনং. এত্থাতি সমানসংৰাসকঅৰিপ্পৰাসসীমাসু. অত্তনো ধম্মতাযাতি অত্তনো সভাৰেন. যত্থাতি যস্মিং ঠানে. হীতি সচ্চং, যস্মা ৰা. তস্সাতি অৰিপ্পৰাসসীমায. ৰিসুন্তি সমানসংৰাসকসীমতো পাটেক্কং. তত্থাতি দ্ৰীসু সীমাসু. অৰিপ্পৰাসাযাতি অৰিপ্পৰাসসীমায. তন্তি গামং. সাতি অৰিপ্পৰাসসীমা. সম্মতায সীমাযাতি অৰিপ্পৰাসসীমায সম্মতায সতিযাতি সম্বন্ধো. সম্মততো পচ্ছাতি ৰা যোজনা. নিৰিসতীতি নিৰাসত্থায ৰিসতি পৰিসতি. সোপীতি গামোপি. সীমসঙ্খ্যংযেৰাতি অৰিপ্পাসসীমৰোহারমেৰ. অধিট্ঠিততেচীৰরিকা ভিক্খূ পরিহারং লভন্তীতি অধিপ্পাযো. যথা পচ্ছা নিৰিট্ঠো গামো সীমসঙ্খ্যংযেৰ গচ্ছতি, এৰন্তি যোজনা. ‘‘পৰিসিস্সামা’’তি গেহানি কতানি, ‘‘পৰিসিস্সামা’’তি আলযোপি অত্থীতি যোজনা. আলযোপীতি অপেক্খোপি. অপৰিট্ঠাতি গেহানি অপৰিট্ঠা. গেহমেৰ ছড্ডেত্ৰাতি গেহং ছড্ডেত্ৰা এৰ. ইমিনা গেহে ছড্ডিতে সব্বং ছড্ডিতমেৰাতি দস্সেতি. পৰিট্ঠং ৰা অগতং ৰা একম্পি কুলং অত্থি সচেতি যোজনা. এত্থ চ ‘‘একম্পি কুলং পৰিট্ঠং ৰা’’তি ইদং নৰগামং সন্ধায ৰুত্তং. ‘‘একম্পি কুলং অগতং ৰা’’তি ইদং পোরাণকগামং সন্ধাযাতি দট্ঠব্বং.

তত্রাতি ‘‘ৰত্তং জানিতব্ব’’ন্তিৰচনে. অৰিপ্পৰাসসীমাযন্তি মহাসীমায. সা এৰ হি যস্মা অৰিপ্পৰাসকম্মৰাচায বহুলপযোজনা হোতি, তস্মা অৰিপ্পৰাসসীমাতি ৰুচ্চতি. ইতরাযাতি অৰিপ্পৰাসসীমায. তত্থাতি তাসু দ্ৰীসু সীমাসু. নিরাসঙ্কট্ঠানেসু ঠত্ৰাতি চেতিযঙ্গণাদীনং খণ্ডসীমায অনোকাসত্তা ৰুত্তং. খণ্ডসীমঞ্হি সম্মনন্তা চেতিযঙ্গণাদিট্ঠানং পহায অঞ্ঞস্মিং ৰিৰিত্তোকাসে ৰিহারপচ্চন্তং খণ্ডিত্ৰা সম্মনন্তি. সমূহনিতুন্তি অৰিপ্পৰাসসীমং সমূহনিতুং. পটিবন্ধিতুং ন সক্খিস্সন্তেৰাতি অৰিপ্পৰাসংযেৰ জানিত্ৰা খণ্ডসীমায অঞ্ঞাতত্তা পটিবন্ধিতুং ন সক্খিস্সন্তেৰ. সীমসম্ভেদন্তি খণ্ডসীমঅৰিপ্পৰাসসীমানং সম্ভেদং. সাসনন্তরধানেন ৰাতি সত্থু আণায অন্তরধানেন ৰা. সাধুকং পনাতি নিক্কঙ্খং পন.