৬৮. সন্নিপাতানুজাননাদিকথা

১৩২. উপোসথক্খন্ধকে তরন্তি ওতরন্তি এত্থাতি তিত্থং, উদকতিত্থং, তিত্থং ৰিযাতি তিত্থং, লদ্ধীতি আহ ‘‘তিত্থং ৰুচ্চতি লদ্ধী’’তি. লদ্ধি হি বহূনং লদ্ধিকানং ওতরণট্ঠানত্তা তিত্থং নাম. অঞ্ঞন্তি সাসনিকলদ্ধিতো অঞ্ঞং. এতেসন্তি পরিব্বাজকানং. ইতোতি ইমস্মা সাসনিকলদ্ধিতো. যন্তি যং ধম্মজাতং. তেসন্তি অঞ্ঞতিত্থিযানং পরিব্বাজকানং. তে লভন্তীতি এত্থ তসদ্দো মনুস্সৰিসযোতি আহ ‘‘তে মনুস্সা’’তি. মূগসূকরাতি এত্থ থূলসরীরস্স সূকরস্স সদ্দমত্তস্সাপি অভাৰতো মূগসূকরো নামাতি আহ ‘‘থূলসরীরসূকরা’’তি.

১৩৫. অস্সাতি ভিক্খুনো. সোতি সম্পজানমুসাৰাদো. কিন্তি কিং আপত্তি. দুক্কটন্তি পদস্স দুক্কটং কম্মন্তি আসঙ্কা ভৰেয্যাতি আহ ‘‘দুক্কটাপত্তী’’তি. সা চ খো দুক্কটাপত্তি মুসাৰাদলক্খণেন ন হোতীতি যোজনা. কেন হোতীতি আহ ‘‘ভগৰতো পন ৰচনেনা’’তি. ৰচনেনাতি চ ‘‘সম্পজানমুসাৰাদে কিং হোতি? দুক্কটং হোতী’’তি (মহাৰ. ১৩৫) ৰচনেন. অকিরিযসমুট্ঠানাতি আৰি কত্তব্বায আপত্তিযা অকরণেন অকিরিযসমুট্ঠানা.

মনুজেনাতি মনুস্সেন. ৰাচাতি ৰাচায. যকারস্স হি লোপো. গিরন্তি সদ্দং. পরেতি অঞ্ঞে পুগ্গলে. ৰাচসিকন্তি ৰাচাতো সমুট্ঠিতং. অযং পনেত্থ যোজনা – ভিক্খু কেনচি আসন্নে ঠিতেন মনুজেন ৰাচায অনালপন্তো হোতি, পরে দূরে ঠিতে পুগ্গলে সন্ধায গিরং মহাসদ্দং নো চ ভণেয্য, এৰম্পি ৰাচসিকমেৰ আপজ্জেয্যাতি.

অন্তরাযিকোতি এত্থ করোত্যত্থে ণিকপচ্চযোতি আহ ‘‘অন্তরাযকরো’’তি. ‘‘কিমত্থাযা’’তি ইমিনা কিস্সাতি এত্থ তদত্থে চতুত্থীতি দস্সেতি, হেত্ৰত্থোপি যুজ্জতেৰ. সব্বত্থাতি সব্বেসু ‘‘দুতিযস্স ঝানস্স অধিগমাযা’’তিআদীসু. ইতীতিআদি নিগমনং. উদ্দেসতো চাতি ‘‘সুণাতু মে ভন্তে সঙ্ঘো’’তিআদিউদ্দেসতো চ. নিদ্দেসতো চাতি ‘‘পাতিমোক্খন্তি আদিমেত’’ন্তিআদিনিদ্দেসতো চ.

১৩৬. দেৰসিকন্তি এত্থ ণিকপচ্চযো ৰিচ্ছত্থে হোতীতি আহ ‘‘দিৰসে দিৰসে’’তি. ততিযে চ সত্তমে চ পক্খেতি একস্স উতুনো অট্ঠসু পক্খেসু ততিযে চ সত্তমে চ পক্খে. ‘‘ৰচনতো’’তি পদং ‘‘ৰট্টতী’’তি পদে ঞাপকহেতু. তথারূপে পচ্চযেতি তথারূপে ৰিকতিচারিত্তসঙ্খাতে পচ্চযে. অনুৰত্তিতব্বন্তি অনুমতিং ৰত্তিতব্বং. ৰচনতোপীতি পিসদ্দো পুব্বে ঞাপকহেতুং সম্পিণ্ডেতি. এতন্তি ‘‘যস্মিং তস্মিং চাতুদ্দসে ৰা পন্নরসে ৰা উদ্দিসিতুং ৰট্টতী’’তি ৰচনং.