১. অচেলকসিক্খাপদৰণ্ণনা

অচেলকস্সাতি যস্স কস্সচি পব্বজ্জাসমাপন্নস্স নগ্গস্স. পরিব্বাজকস্সাতি ঠপেত্ৰা ভিক্খুঞ্চ সামণেরঞ্চ অৰসেসস্স যস্স কস্সচি পব্বজ্জাসমাপন্নস্স. পরিব্বাজিকাযাতি ঠপেত্ৰা ভিক্খুনিং, সিক্খমানং, সামণেরিঞ্চ অৰসেসায যায কাযচি পব্বজ্জাসমাপন্নায. এতে চ সব্বে অঞ্ঞতিত্থিযা ৰেদিতব্বা. তেনাহ ‘‘এতেসং অচেলকাদীনং অঞ্ঞতিত্থিযান’’ন্তি.

তেসন্তি অঞ্ঞতিত্থিযানং. ভাজনং নিক্খিপিত্ৰাতি আমিসভরিতং ভাজনং নিক্খিপিত্ৰা. বাহিরালেপন্তি তেলাদিং.

অচেলকাদযো যস্মা, তিত্থিযাৰ মতা ইধ;

তস্মা তিত্থিযনামেন, তিকচ্ছেদো কতো তযো.

অতিত্থিযস্স নগ্গস্স, তথা তিত্থিযলিঙ্গিনো;

গহট্ঠস্সাপি ভিক্খুস্স, কপ্পতীতি ৰিনিচ্ছযো.

অতিত্থিযস্স চিত্তেন, তিত্থিযস্স চ লিঙ্গিনো;

সোতাপন্নাদিনো দাতুং, কপ্পতীতীধ নো মতি.

অচেলকসিক্খাপদৰণ্ণনা নিট্ঠিতা.