৯. ছত্তুপাহনৰগ্গো

১-২. ছত্তুপাহনাদিসিক্খাপদৰণ্ণনা

ৰুত্তলক্খণং ছত্তন্তি ‘‘ছত্তং নাম তীণি ছত্তানি – সেতচ্ছত্তং, কিলঞ্জচ্ছত্তং, পণ্ণচ্ছত্তং মণ্ডলবদ্ধং, সলাকবদ্ধ’’ন্তি (পাচি. ১১৮১) এৰং পদভাজনে ৰুত্তলক্খণং ছত্তং. তাদিসং ঠানং পত্ৰাতি গচ্ছকদ্দমাদীসু তং তং ঠানং পত্ৰা.

ছত্তস্সেৰাতি কদ্দমাদীনি পত্ৰা উপাহনা ওমুঞ্চিত্ৰা ছত্তস্সেৰ ধারণং. উপাহনানংযেৰ ৰাতি গচ্ছাদীনি দিস্ৰা ছত্তং অপনামেত্ৰা উপাহনানংযেৰ ধারণং.

দুতিযং উত্তানত্থমেৰ.

ছত্তুপাহনাদিসিক্খাপদৰণ্ণনা নিট্ঠিতা.

৩-৫. সঙ্ঘাণিআদিসিক্খাপদৰণ্ণনা

সঙ্ঘাণিন্তি কটিযং অনুভৰিতব্বং আভরণং. তেনাহ ‘‘যং কিঞ্চি কটূপগ’’ন্তি.

চতুত্থপঞ্চমানি উত্তানত্থানেৰ.

সঙ্ঘাণিআদিসিক্খাপদৰণ্ণনা নিট্ঠিতা.

৬. ৰাসিতকসিক্খাপদৰণ্ণনা

গন্ধৰাসিতকেনাতি গন্ধপরিভাৰিতেন.

ৰাসিতকসিক্খাপদৰণ্ণনা নিট্ঠিতা.

৭-১০. ভিক্খুনিউম্মদ্দাপনাদিসিক্খাপদৰণ্ণনা

গিলানাযাতি (পাচি. অট্ঠ. ১২০৮) অন্তমসো মগ্গগমনপরিস্সমেনাপি আবাধিকায. আপদাসূতি চোরভযাদিনা সরীরকম্পনাদীসু.

অট্ঠমনৰমদসমেসু কিঞ্চি ৰত্তব্বং নত্থি.

ভিক্খুনিউম্মদ্দাপনাদিসিক্খাপদৰণ্ণনা নিট্ঠিতা.

১১. অনাপুচ্ছাসিক্খাপদৰণ্ণনা

উপচারং সন্ধাযাতি সমন্তা দ্ৰাদসহত্থূপচারং সন্ধায.

অনাপুচ্ছাসিক্খাপদৰণ্ণনা নিট্ঠিতা.

১২. পঞ্হাপুচ্ছনসিক্খাপদৰণ্ণনা

অনোদিস্সাতি ‘‘অমুকস্মিং নাম ঠানে পুচ্ছামী’’তি এৰং অনিযমেত্ৰা কেৰলং ‘‘পুচ্ছিতব্বং অত্থি, পুচ্ছামি, অয্যা’’তি এৰং ৰত্ৰা.

পঞ্হাপুচ্ছনসিক্খাপদৰণ্ণনা নিট্ঠিতা.

১৩. অসংকচ্চিকসিক্খাপদৰণ্ণনা

পরিক্খিত্তস্স গামস্স পরিক্খেপং, অপরিক্খিত্তস্স উপচারং অতিক্কমন্তিযা ৰা ওক্কমন্তিযা ৰাতি এত্থ পরিক্খিত্তস্স গামস্স পরিক্খেপং অতিক্কমন্তিযা ৰা অপরিক্খিত্তস্স গামস্স উপচারং ওক্কমন্তিযা ৰাতি যথাক্কমং সম্বন্ধো ৰেদিতব্বো. আপদাসূতি মহগ্ঘং সংকচ্চিকং পারুপিত্ৰা গচ্ছন্তিযা উপদ্দৰো উপ্পজ্জতি, এৰরূপাসু আপদাসু.

অসংকচ্চিকসিক্খাপদৰণ্ণনা নিট্ঠিতা.

ছত্তুপাহনৰগ্গো নৰমো.

ইতি কঙ্খাৰিতরণিযা পাতিমোক্খৰণ্ণনায

ৰিনযত্থমঞ্জূসাযং লীনত্থপ্পকাসনিযং

ভিক্খুনিপাতিমোক্খে পাচিত্তিযৰণ্ণনা নিট্ঠিতা.

অসাধারণসমুট্ঠানৰণ্ণনা

অচিত্তকানীতি (সারত্থ. টী. পাচিত্তিয ৩.১২১৪) ‘‘নচ্চ’’ন্তিআদিনা অজানিত্ৰা দস্সনাদিং করোন্তিযা আপত্তিসম্ভৰতো ৰত্থুঅজাননচিত্তেন অচিত্তকানি. লোকৰজ্জানীতি ‘‘নচ্চ’’ন্তিআদিনা জানিত্ৰা দস্সনাদিং করোন্তিযা অকুসলেনেৰ আপজ্জনতো লোকৰজ্জানি. তেনাহ ‘‘অযং পনেত্থ অধিপ্পাযো’’তিআদি সচিত্তকানীতি ‘‘চোরী’’তিআদিনা ৰত্থুং জানিত্ৰা করণেযেৰ আপত্তিসম্ভৰতো সচিত্তকানি. উপসম্পদাদীনং একন্তাকুসলচিত্তেনেৰ অকত্তব্বত্তা পণ্ণত্তিৰজ্জানি. ‘‘ইধ সচিত্তকাচিত্তকতা পণ্ণত্তিজাননাজাননতায অগ্গহেট্ঠা ৰত্থুজাননাজাননতায গহেতব্ব’’ন্তি ৰদন্তি.

অসাধারণসমুট্ঠানৰণ্ণনা নিট্ঠিতা.