পাটিদেসনীযকণ্ডং

২. তেলৰিঞ্ঞাপনাদিসিক্খাপদৰণ্ণনা

পাল়িযং অনাগতেসু পন অট্ঠসুপীতি পাল়িমুত্তকেসু সপ্পিআদীসু অট্ঠসুপি.

তেলৰিঞ্ঞাপনাদিসিক্খাপদৰণ্ণনা নিট্ঠিতা.

ইতি কঙ্খাৰিতরণিযা পাতিমোক্খৰণ্ণনায

ৰিনযত্থমঞ্জূসাযং লীনত্থপ্পকাসনিযং

ভিক্খুনিপাতিমোক্খে পাটিদেসনীযৰণ্ণনা নিট্ঠিতা.

১. পরিমণ্ডলাদিসিক্খাপদৰণ্ণনা

সেখিযানি চেৰাতি পঞ্চসত্ততি সেখিযানি চেৰ. ‘‘ভিক্খুপাতিমোক্খৰণ্ণনাযং ৰুত্তনযেনেৰ ৰেদিতব্বা’’তি ইমিনা যস্মা তাদিসংযেৰেত্থ অত্থৰিনিচ্ছযং ৰিদূ ৰদন্তি, তস্মা ৰিসুং তেসং অত্থৰণ্ণনা ন ৰুত্তা. তত্থ যা ৰুত্তা, সা ইধাপি ৰুত্তাযেৰাতি দস্সেতি.

পরিমণ্ডলাদিসিক্খাপদৰণ্ণনা নিট্ঠিতা.

ইতি কঙ্খাৰিতরণিযা পাতিমোক্খৰণ্ণনায

ৰিনযত্থমঞ্জূসাযং লীনত্থপ্পকাসনিযং

ভিক্খুনিপাতিমোক্খৰণ্ণনা নিট্ঠিতা.

নিগমনকথাৰণ্ণনা

যং পাতিমোক্খস্স ৰণ্ণনং আরভিন্তি সম্বন্ধো. ‘‘মহাৰিহারৰাসীন’’ন্তি ইদং পুরিমপচ্ছিমপদেহি সদ্ধিং সম্বন্ধিতব্বং, মহাৰিহারৰাসীনং পোরাণট্ঠকথাহি ৰাতি চ. পাল়িযত্থঞ্চ কেৰলন্তি সকলং পাল়িঅত্থঞ্চ, উভতোৰিভঙ্গঞ্চাতি ৰুত্তং হোতি. এত্থাতি এতিস্সং কঙ্খাৰিতরণিযং. যস্মা ন হি অত্থীতি সম্বন্ধো. যন্তি যং পদং. সীহল়ট্ঠকথানযন্তি সীহল়মাতিকট্ঠকথানযং. অট্ঠকথাসারন্তি সীহল়মাতিকট্ঠকথাযং অত্থসারং, অথ ৰা ৰিনযট্ঠকথাসু অত্থসারং. তেনেতং দস্সেতি – সীহল়মাতিকট্ঠকথাযং অত্থসারং আদায ইমং কঙ্খাৰিতরণিং করোন্তো ৰিনযট্ঠকথাসুপি ইধ ৰিনিচ্ছযে যোগক্খমং অত্থসারং আদাযেৰ অকাসিন্তি.

ইদানি সদেৰকস্স লোকস্স অচ্চন্তসুখাধিগমায অত্তনো পুঞ্ঞং পরিণামেন্তো ‘‘যথা চ নিট্ঠং সম্পত্তা’’তিআদিগাথাদ্ৰযমাহ. কল্যাণনিস্সিতাতি কুসলনিস্সিতা. সব্বসত্তানন্তি কামাৰচরাদিভেদানং সব্বেসং সত্তানং.

নিগমনকথাৰণ্ণনা নিট্ঠিতা.

নিগমনকথা

এত্তাৰতা চ –

১. লঙ্কিস্সরো যো ৰিজিতারিরাজো;

রাজা পরক্কন্তভুজো যসস্সী;

তিধাগতং সীহল়মেকরজ্জং;

অকা নিকাযঞ্চ তথা সমগ্গং.

২. পুরে পুলত্থিম্হি ৰরে পুরানং;

মজ্ঝম্হি নানারতনাকরানং;

অনন্তসম্পত্তিভরাভিরামে;

ৰরাচলুত্তঙ্গঘরাভিরামে.

৩. অভেজ্জপাকারসুগোপুরস্মিং;

নিরাকুলানেককুলাকুলস্মিং;

মুনিন্দদাঠঙ্কুরৰাসভূতে;

যো লোচনানন্দৰহে ৰসন্তো.

৪. সুফুল্লিতব্ভোরুহসাদুসীত

পসন্ননীরেহি জলাসযেহি;

সুপুপ্ফিতানেককদম্বজম্বু-

পুন্নাগনাগাদিহি ৰাভিরম্মে.

৫. সুধাৰদাতেহি মনোহরেহি;

পাকারপন্তীহি চ গোপুরেহি;

ৰিকিণ্ণমুত্তাফলসন্নিভেহি;

ৰিলোকনীযেহি সুধাতলেহি.

৬. কত্ৰান পাসাদসহস্সরম্মে;

তহিং তহিং পীতিকরে ৰিহারে;

মহাদযো জেতৰনাদযোপি;

সুসংযমানং যতিনং অদাসি.

৭. যো সাদুভূতং চতুপচ্চযঞ্চ;

গুণপ্পসন্নো সমণেসু তেসু;

নিচ্চং মহোঘং ৰিয ৰত্তযন্তো;

যোজেতি তে গন্থৰিপস্সনাসু.

৮. কারিতেসু ৰিহারেসু, তেন তেসু যসস্সিনা;

রম্মো যো পচ্ছিমারামো, পুপ্ফারামাদিসোভিতো.

৯. পরিৰেণম্হি নামেন, তহিং চোল়কুলন্তিকে;

পাসাদে দস্সনীযম্হি, ৰসন্তো করুণাপরো.

১০. সিস্সো সসীকরস্ৰচ্ছ-সীলাচারস্স ধীমতো;

সারিপুত্তমহাথের-মহাসামিস্স তাদিনো.

১১. ধীরানেকগুণোঘেন, থেরেন সুচিৰুত্তিনা;

ৰিনযট্ঠিতিকামেন, সুমেধেনাভিযাচিতো.

১২. সো বুদ্ধনাগত্থেরোহং, ভিক্খূনং পরমং হিতং;

মহাৰিহারৰাসীনং, যতীনং সমযানুগং.

১৩. ৰিনযত্থাদিমঞ্জূসং, লীনত্থস্স পকাসনিং;

মাতিকট্ঠকথাযেমং, অকাসিং সাধু ৰণ্ণনং.

১৪. সাযং সুবোধা বুধৰণ্ণনীযা;

সংৰণ্ণনা সত্তসহস্সমত্তা;

নিরাকরোন্তী ৰিনযম্হি মোহং;

তমং চরন্তী সসি খেৰ ভাতু.

১৫. আকঙ্খমানেন পরত্থমিট্ঠং;

মহত্থসারং সুৰিনিচ্ছযঞ্চ;

সংৰণ্ণনং সাধু পকুব্বতা যং;

চিতং মযা পুঞ্ঞমনপ্পভূতং.

১৬. পুঞ্ঞেন তেনাচিতদানসীল-

মযাদিনানেকৰিধেন চেৰ;

সত্তা অনীঘা সুখিনো অৰেরা;

পপ্পোন্তু সব্বে সুগতিং সিৰঞ্চ.

১৭. সদ্ধিং যথোপদ্দৰমন্তরেন;

গতা হি লীনত্থপদীপনীযং;

তথা জনানং অপি ধম্মযুত্তা;

মনোরথা সিদ্ধিমুপেন্তু নিচ্চং.

১৮. কালে পৰস্সন্তু সদা পযোদা;

ধম্মেন পালেন্তু মহিং মহিন্দা;

সত্তা পসন্না রতনত্তযস্মিং;

দানাদিপুঞ্ঞাভিরতা ভৰন্তূতি.

ৰিনযত্থমঞ্জূসা লীনত্থপ্পকাসনীনামিকাকঙ্খাৰিতরণীঅভিনৰটীকা নিট্ঠিতা.