৮. কুমারিভূতৰগ্গো

১-৫. পঠমকুমারিভূতাদিসিক্খাপদৰণ্ণনা

সব্বপঠমা দ্ৰে মহাসিক্খমানাতি গব্ভিনিৰগ্গে ৰুত্তা দ্ৰে সিক্খমানা. ‘‘সিক্খমানা’’ইচ্চেৰ ৰত্তব্বাতি সম্মুতিকম্মাদীসু এৰং ৰত্তব্বা. ‘‘গিহিগতা’’তি ৰা ‘‘কুমারিভূতা’’তি ৰা ন ৰত্তব্বাতি সচে ৰদন্তি, কম্মং কুপ্পতীতি অধিপ্পাযো.

চতুত্থপঞ্চমানি উত্তানত্থানেৰ.

পঠমকুমারিভূতাদিসিক্খাপদৰণ্ণনা নিট্ঠিতা.

৬-৮. খীযনধম্মাদিসিক্খাপদৰণ্ণনা

ৰুট্ঠাপনসম্মুতিযা যাচিতাযাতি উপসম্পদাসম্মুতিযা যাচিতায.

সত্তমট্ঠমানি উত্তানত্থানেৰ.

খীযনধম্মাদিসিক্খাপদৰণ্ণনা নিট্ঠিতা.

৯. সোকাৰাসসিক্খাপদৰণ্ণনা

আগচ্ছমানাতি আগচ্ছন্তী.

সোকাৰাসসিক্খাপদৰণ্ণনা নিট্ঠিতা.

১০. অননুঞ্ঞাতসিক্খাপদৰণ্ণনা

তেসং অত্থিভাৰং অজানন্তিযাতি (পাচি. অট্ঠ. ১১৬৩) তেসং মাতাদীনং অত্থিভাৰং অজানন্তিযা. অননুঞ্ঞাতসমুট্ঠানন্তি যং ৰাচতো, কাযৰাচতো, ৰাচাচিত্ততো, কাযৰাচাচিত্ততো চ সমুট্ঠাতি, তং অননুঞ্ঞাতসমুট্ঠানং. কথং? অব্ভানকম্মাদীসু কেনচিদেৰ করণীযেন খণ্ডসীমাযং নিসিন্না ‘‘পক্কোসথ সিক্খমানং, ইধেৰ নং উপসম্পাদেস্সামা’’তি উপসম্পাদেতি, এৰং ৰাচতো সমুট্ঠাতি. ‘‘উপস্সযতো উট্ঠায উপসম্পাদেস্সামী’’তি ৰত্ৰা খণ্ডসীমং গচ্ছন্তিযা কাযৰাচতো সমুট্ঠাতি. দ্ৰীসু ঠানেসু পণ্ণত্তিং জানিত্ৰা ৰীতিক্কমং করোন্তিযা ৰাচাচিত্ততো, কাযৰাচাচিত্ততো চ সমুট্ঠাতি. অননুজানাপেত্ৰা উপসম্পাদনতো কিরিযাকিরিযং.

অননুঞ্ঞাতসিক্খাপদৰণ্ণনা নিট্ঠিতা.

১১. পারিৰাসিকসিক্খাপদৰণ্ণনা

দারুণন্তি পাপং. পতিমানেন্তন্তি ওলোকেন্তং.

পারিৰাসিকসিক্খাপদৰণ্ণনা নিট্ঠিতা.

১২. অনুৰস্সসিক্খাপদৰণ্ণনা

একন্তরিকন্তি একেন ৰস্সেন অন্তরিকং কত্ৰা.

অনুৰস্সসিক্খাপদৰণ্ণনা নিট্ঠিতা.

১৩. একৰস্সসিক্খাপদৰণ্ণনা

মাতিকাযং একং ৰস্সং দ্ৰেতি একন্তরিকে একেকস্মিং সংৰচ্ছরে দ্ৰে. একন্তরিকং ৰুট্ঠাপেন্তিযাতি ইমস্মিং ৰস্সে একং, পুন একন্তরিকং একন্তি দ্ৰে ৰুট্ঠাপেন্তিযা অনাপত্তি.

একৰস্সসিক্খাপদৰণ্ণনা নিট্ঠিতা.

কুমারিভূতৰগ্গো অট্ঠমো.