৭. গব্ভিনীৰগ্গো

১-২. গব্ভিনীআদিসিক্খাপদৰণ্ণনা

পঠমং উত্তানত্থমেৰ.

থনে ভৰং থঞ্ঞং, খীরং. যং পাযেতীতি যং দারকং পাযেতি.

গব্ভিনীআদিসিক্খাপদৰণ্ণনা নিট্ঠিতা.

৩. পঠমসিক্খমানসিক্খাপদৰণ্ণনা

পদভাজনে ৰুত্তনযেনাতি ‘‘পাণাতিপাতা ৰেরমণিং দ্ৰে ৰস্সানি অৰীতিক্কম্ম সমাদানং সমাদিযামি…পে… ৰিকালভোজনা ৰেরমণিং দ্ৰে ৰস্সানি অৰীতিক্কম্ম সমাদানং সমাদিযামী’’তি (পাচি. ১০৭৯) পদভাজনসমীপে অট্ঠুপ্পত্তিযং ৰুত্তনযেন. ইমা পন ছ সিক্খাযো সট্ঠিৰস্সাযপি পব্বজিতায দাতব্বাযেৰ, ন এতাসু অসিক্খিতা উপসম্পাদেতব্বা.

পঠমসিক্খমানসিক্খাপদৰণ্ণনা নিট্ঠিতা.

৪-৫. দুতিযসিক্খমানাদিসিক্খাপদৰণ্ণনা

পদভাজনে ৰুত্তা উপসম্পদাসম্মুতি ন দিন্না হোতীতি পদভাজনসমীপে অট্ঠুপ্পত্তিযং ৰুত্তা উপসম্পদাসম্মুতি ঞত্তিদুতিযায কম্মৰাচায ন দিন্না হোতি.

পঞ্চমং উত্তানত্থমেৰ.

দুতিযসিক্খমানাদিসিক্খাপদৰণ্ণনা নিট্ঠিতা.

৬-১০. দুতিযগিহিগতাদিসিক্খাপদৰণ্ণনা

দসৰস্সায গিহিগতায সিক্খাসম্মুতিং দত্ৰা পরিপুণ্ণদ্ৰাদসৰস্সং উপসম্পাদেতুং ৰট্টতি.

সত্তমঅট্ঠমনৰমদসমানি উত্তানত্থানেৰ.

দুতিযগিহিগতাদিসিক্খাপদৰণ্ণনা নিট্ঠিতা.

গব্ভিনীৰগ্গো সত্তমো.