কিরিযাব্যাকতং

মনোধাতুচিত্তৰণ্ণনা

৫৬৬. ৰাতপুপ্ফন্তি মোঘপুপ্ফং. তং অচ্ছিন্নেপি রুক্খে ন ফলতি, ছিন্নরুক্খপুপ্ফং পন অচ্ছিন্নে ফলেয্য. এৰং অচ্ছিন্নভৰমূলস্সপি পৰত্তমানং যং ন ফলতি, তং ৰাতপুপ্ফসদিসং. ইতরস্সেৰ পন পৰত্তমানং ছিন্নরুক্খপুপ্ফসদিসং. তঞ্হি অচ্ছিন্নে ভৰমূলে ফলেয্যাতি.

কিরিযমনোৰিঞ্ঞাণধাতুচিত্তৰণ্ণনা

৫৬৮. লোলুপ্পতণ্হা পহীনাতি ইমস্স চিত্তস্স পচ্চযভূতা পুরিমা পৰত্তি দস্সিতা. ইদং পন চিত্তং ৰিচারণপঞ্ঞারহিতন্তি কেৰলং সোমনস্সমত্তং উপ্পাদেন্তস্স হোতীতি. এৰং চেতিযপূজাদীসুপি দট্ঠব্বং. ৰত্তং করোন্তোতি ইদং ৰত্তং করোন্তস্স ফোট্ঠব্বারম্মণে কাযদ্ৰারচিত্তপ্পৰত্তিং সন্ধায ৰুত্তং. পঞ্চদ্ৰারানুগতং হুত্ৰা লব্ভমানং সন্ধায পঞ্চদ্ৰারে এৰ ৰা লোলুপ্পতণ্হাপহানাদিপচ্চৰেক্খণহেতুভূতং ইদমেৰ পৰত্তিং সন্ধায তত্থ তত্থ ‘‘ইমিনা চিত্তেন সোমনস্সিতো হোতী’’তি ৰুত্তন্তি ‘‘এৰং তাৰ পঞ্চদ্ৰারে লব্ভতী’’তি আহ. অতীতংসাদীসু অপ্পটিহতং ঞাণং ৰত্ৰা ‘‘ইমেহি তীহি ধম্মেহি সমন্নাগতস্স বুদ্ধস্স ভগৰতো সব্বং কাযকম্মং ঞাণানুপরিৰত্তী’’তিআদিৰচনতো (মহানি. ১৫৬ অত্থতো সমানং) ‘‘ভগৰতো ইদং উপ্পজ্জতী’’তি ৰুত্তৰচনং ৰিচারেতব্বং. অহেতুকস্স মূলাভাৰেন সুপ্পতিট্ঠিততা নত্থীতি বলভাৰো অপরিপুণ্ণো, তস্মা উদ্দেসৰারে ‘‘সমাধিবলং হোতি, ৰীরিযবলং হোতী’’তি ন ৰুত্তং. ততো এৰ হি অহেতুকানং সঙ্গহৰারে ঝানঙ্গানি চ ন উদ্ধটানি. তেনেৰ ইমস্মিম্পি অহেতুকদ্ৰযে বলানি অনুদ্দেসাসঙ্গহিতানি. যস্মা পন ৰীরিযস্স ৰিজ্জমানত্তা সেসাহেতুকেহি বলৰং, যস্মা চ এত্থ ৰিতক্কাদীনং ঝানপচ্চযমত্ততা ৰিয সমাধিৰীরিযানং বলমত্ততা অত্থি, তস্মা নিদ্দেসৰারে ‘‘সমাধিবলং ৰীরিযবল’’ন্তি ৰত্ৰা ঠপিতং. যস্মা পন নেৰ কুসলং নাকুসলং, তস্মা সম্মাসমাধি মিচ্ছাসমাধীতি, সম্মাৰাযামো মিচ্ছাৰাযামোতি চ ন ৰুত্তন্তি অধিপ্পাযো. এৰং সতি মহাকিরিযচিত্তেসু চ এতং ন ৰত্তব্বং সিযা, ৰুত্তঞ্চ, তস্মা সম্মা, মিচ্ছা ৰা নিয্যানিকসভাৰাভাৰতো মগ্গপচ্চযভাৰং অপ্পত্তা সমাধিৰাযামা ইধ তথা ন ৰুত্তাতি দট্ঠব্বা.

৫৭৪. ইন্দ্রিযপরোপরিযত্তআসযানুসযসব্বঞ্ঞুতানাৰরণঞাণানি ইমস্সানন্তরং উপ্পজ্জমানানি যমকপাটিহারিযমহাকরুণাসমাপত্তিঞাণানি চ ইমস্স অনন্তরং উপ্পন্নপরিকম্মানন্তরানি ইমিনা আৰজ্জিতারম্মণেযেৰ পৰত্তন্তীতি আহ ‘‘ছ…পে… গণ্হন্তী’’তি. মহাৰিসযত্তা মহাগজো ৰিয মহন্তন্তি মহাগজং.

রূপাৰচরারূপাৰচরকিরিযচিত্তৰণ্ণনা

৫৭৭. ইদানি যানি কিরিযানি জাতানি, তানি ৰেদিতব্বানীতি এৰং যোজনা কাতব্বা. অত্তভাৰোতি পঞ্চক্খন্ধা ৰুচ্চন্তি.

চিত্তুপ্পাদকণ্ডৰণ্ণনা নিট্ঠিতা.