কামাৰচরকুসলং

নিদ্দেসৰারকথাৰণ্ণনা

২. ফুসনকৰসেনাতি সন্তে অসন্তেপি ৰিসযে আপাথগতে চিত্তস্স সন্নিপতনৰসেন ‘‘চিত্তং মনো’’তিআদীসু (ধ. স. ৬, ১৭) ৰিয কিচ্চৰিসেসং, ‘‘মানস’’ন্তিআদীসু (ধ. স. ৬, ১৭) ৰিয সমানে অত্থে সদ্দৰিসেসং, ‘‘পণ্ডর’’ন্তিআদীসু (ধ. স. ৬, ১৭) ৰিয গুণৰিসেসং, ‘‘চেতসিকং সাত’’ন্তিআদীসু (ধ. স. ২, ১৮) ৰিয নিস্সযৰিসেসং, ‘‘চিত্তস্স ঠিতী’’তিআদীসু (ধ. স. ১৫, ২৪) ৰিয অঞ্ঞস্স অৰত্থাভাৰৰিসেসং, ‘‘অলুব্ভনা’’তিআদীসু (ধ. স. ৩২) ৰিয অঞ্ঞস্স কিরিযাভাৰৰিসেসং, ‘‘অলুব্ভিতত্ত’’ন্তিআদীসু (ধ. স. ৩২) ৰিয অঞ্ঞস্স কিরিযাভাৰভূততাৰিসেসন্তিআদিকং অনপেক্খিত্ৰা ধম্মমত্তদীপনং সভাৰপদং. ফুসন্তস্স হি চিত্তস্স ফুসনকিরিযা ফুসনাকারো. সম্ফুসনাতি আরম্মণসমাগমফুসনা, ন পটিলাভসম্ফুসনা. সম্ফুসিতস্স আরম্মণেন সমাগতস্স চিত্তস্স ভাৰো সম্ফুসিতত্তং. যস্মিং সতি চিত্তং সম্ফুসিতন্তি ৰুচ্চতি, সো তস্স ভাৰো. এৰং অঞ্ঞেসুপি ভাৰনিদ্দেসেসু দট্ঠব্বং.

অপরস্স ৰেৰচনস্স, অপরেন ৰা পুরিমত্থস্স দীপনা অপরদীপনা. ‘‘পণ্ডিচ্চং কোসল্ল’’ন্তি এৰমাদযো পঞ্ঞাৰিসেসা নানাকালে লব্ভমানাপি একস্মিং চিত্তে লব্ভন্তি. একস্মিঞ্চ ৰিসেসে ইতরেপি অনুগতা হোন্তীতি দস্সেতুং তথা ৰিভত্তি অত্থতো ৰিভত্তি হোতি অত্থনানত্তেন কতত্তা. অথ ৰা যথা ‘‘কোধো কুজ্ঝনা কুজ্ঝিতত্ত’’ন্তি (ধ. স. ১০৬৬) সভাৰাকারভাৰনিদ্দেসেহি কোধোতি এৰমাকারোৰ অত্থো ৰুত্তো, ন এৰমিধ, ইধ পন পণ্ডিতাদিভাৰাকারভিন্নো অত্থো ৰুত্তোতি ইদং ৰিভত্তিগমনং অত্থৰসেন হোতি. সম্ফুসিতত্তন্তি এত্থাপি ন ‘‘ফস্সো’’তি এৰমাকারোৰ অত্থো ৰুত্তো. সম্ফস্সোতি এৰমাকারো পন ৰুত্তোতি অত্থতো ৰিভত্তিগমনন্তি ৰুত্তং.

দোসো ব্যাপাদোতি উদ্দেসেপি নামনানত্তেন নানাভূতো উদ্দিট্ঠো. নিদ্দেসেপি তেনেৰ নানত্তেন নিদ্দিট্ঠো. একোৰ খন্ধো হোতীতি একেন খন্ধসদ্দেন ৰত্তব্বতং সন্ধাযাহ. চেতনাতি সঙ্খারক্খন্ধং দস্সেতি তপ্পমুখত্তা. অসদ্ধম্মাতি অসতং, অসন্তো ৰা ধম্মা, ন ৰা সদ্ধম্মাতি অসদ্ধম্মাতি অসদ্ধম্মৰচনীযভাৰেন একীভূতোপি অসদ্ধম্মো কোধগরুতাদিৰিসিট্ঠেন সদ্ধম্মগরুতাপটিক্খেপনানত্তেন নানত্তং গতোতি ‘‘চত্তারো’’তি ৰুত্তং. ন সদ্ধম্মগরুতাতি ৰুচ্চমানা ৰা অসদ্ধম্মগরুতা অসদ্ধম্মগরুতাভাৰেন একীভূতাপি কোধাদিৰিসিট্ঠপটিক্খেপনানত্তেন নানত্তং গতা. পটিপক্খো ৰা পটিক্খিপীযতি তেন, সযং ৰা পটিক্খিপতীতি পটিক্খেপোতি ৰুচ্চতীতি সদ্ধম্মগরুতাপটিক্খেপনানত্তেন অসদ্ধম্মগরুতা অসদ্ধম্মা ৰা নানত্তং গতা. অলোভোতিআদীনং ফস্সাদীহি নানত্তং লোভাদিৰিসিট্ঠেন পটিক্খেপেন লোভাদিপটিপক্খেন ৰা ৰেদিতব্বং. অলোভাদোসামোহানং অঞ্ঞমঞ্ঞনানত্তং যথাৰুত্তেন পটিক্খেপনানত্তেন যোজেতব্বং. পদত্থস্স পদন্তরেন ৰিভাৰনং পদত্থুতি. তেন হি তং পদং মহত্থন্তি দীপিতং হোতি অলঙ্কতঞ্চাতি. অত্থৰিসেসাভাৰেপি আভরণৰসেন চ আদরৰসেন চ পুন ৰচনং দল়্হীকম্মং.

৩. তজ্জন্তি তস্স ফলস্স অনুচ্ছৰিকং. ন কেৰলং নিদ্দিসিযমানং সাতমেৰ অধিকতং, অথ খো যথানিদ্দিট্ঠানি আরম্মণানিপীতি ‘‘তেহি ৰা’’তিআদি ৰুত্তং. তস্স ৰা জাতা কারণভাৰেন ফস্সত্থং পৰত্তাতি তজ্জা. তংসমঙ্গীপুগ্গলং, সম্পযুত্তধম্মে ৰা অত্তনি সাদযতীতি সাতং দ-কারস্স ত-কারং কত্ৰা. সুট্ঠু খাদতি, খণতি ৰা দুক্খন্তি সুখং.

৫. পাসোতি রাগপাসো. সো হি নিরাৰরণত্তা অন্তলিক্খচরো. অকুসলম্পি পণ্ডরন্তি ৰুত্তং, কো পন ৰাদো কুসলন্তি অধিপ্পাযো. তঞ্হি পণ্ডরতো নিক্খন্তং সযঞ্চ পণ্ডরন্তি. অথ ৰা সব্বম্পি চিত্তং সভাৰতো পণ্ডরমেৰ, আগন্তুকোপক্কিলেসৰোদানেহি পন সাৰজ্জানৰজ্জানং উপক্কিলিট্ঠৰিসুদ্ধতরতা হোন্তীতি. দারুপ্পমাণেসু সিলাদীসু খন্ধপঞ্ঞত্তিযা অভাৰা কিঞ্চি নিমিত্তং অনপেক্খিত্ৰা দারুম্হি পৰত্তা খন্ধপঞ্ঞত্তীতি ‘‘পণ্ণত্তিমত্তট্ঠেনা’’তি ৰুত্তং. তং-সদ্দেন মনোৰিঞ্ঞাণধাতুযেৰ ৰুচ্চেয্য নিদ্দিসিতব্বত্তাতি ন তস্সা তজ্জতা. তেহি আরম্মণেহি জাতা তজ্জাতি চ ৰুচ্চমানে সম্ফস্সজতা ন ৰত্তব্বা. ন হি সো আরম্মণং, নাপি ৰিসেসপচ্চযো. ‘‘তিণ্ণং সঙ্গতি ফস্সো’’তি ৰিঞ্ঞাণমেৰ ফস্সস্স ৰিসেসপচ্চযোতি ৰুত্তোতি তস্মা ন ৰিঞ্ঞাণং ৰিসেসপচ্চযভূতং সম্ফস্সজতায তজ্জামনোৰিঞ্ঞাণধাতুসম্ফস্সজাপঞ্ঞত্তিং লভতি, ন চ তদেৰ তস্স কারণভাৰেন ফলভাৰেন চ ৰুচ্চমানং সুৰিঞ্ঞেয্যং হোতীতি. কিং ৰা এতেন, যথা ভগৰতা ৰুত্তা তংসভাৰাযেৰ তে ধম্মাতি ন এৰংৰিধেসু কারণং মগ্গিতব্বং.

৭. এৰং তক্কনৰসেন লোকসিদ্ধেনাতি অধিপ্পাযো. এৰঞ্চেৰঞ্চ ভৰিতব্বন্তি ৰিৰিধং তক্কনং কূপে ৰিয উদকস্স আরম্মণস্স আকড্ঢনং ৰিতক্কনং.

৮. সমন্ততো চরণং ৰিচরণং.

৯. অত্তমনতাতি এত্থ অত্ত-সদ্দেন ন চিত্তং ৰুত্তং. ন হি চিত্তস্স মনো অত্থীতি. অত্তমনস্স পন পুগ্গলস্স ভাৰো অত্তমনতাতি ৰত্ৰা পুন পুগ্গলদিট্ঠিনিসেধনত্থং ‘‘চিত্তস্সা’’তি ৰুত্তং.

১১. ন বলৰতী, কস্মা অৰট্ঠিতি ৰুত্তাতি? একগ্গচিত্তেন পাণৰধাদিকরণে তথা অৰট্ঠানমত্তভাৰতো. ৰিরূপং, ৰিৰিধং ৰা সংহরণং ৰিকিরণং ৰিসাহারো, সংহরণং ৰা সম্পিণ্ডনং, তদভাৰো ৰিসাহারো.

১২. অঞ্ঞস্মিং পরিযাযেতি অঞ্ঞস্মিং কারণে. সমানাধিকরণভাৰো দ্ৰিন্নং বহূনং ৰা পদানং একস্মিং অত্থে পৰত্তি.

১৩. আরম্ভতি চাতি আপজ্জতি চ. উদ্ধং যমনং উয্যামো. ধুরন্তি নিপ্ফাদেতুং আরদ্ধং কুসলং, পটিঞ্ঞং ৰা.

১৪. তিণ্ণন্তি বুদ্ধাদীনং. চিত্তে আরম্মণস্স উপট্ঠানং জোতনঞ্চ সতিযেৰাতি তস্সা এতং লক্খণং.

১৬. পাসাণসক্খরৰালিকাদিরহিতা ভূমি সণ্হাতি ‘‘সণ্হট্ঠেনা’’তি ৰুত্তং.

১৯. অযন্তীতি এককম্মনিব্বত্তমনুস্সাদিসন্ততিঅৰিচ্ছেদৰসেন পৰত্তন্তি. কুসলাকুসলেসুপি হি জীৰিতং ইন্দ্রিযপচ্চযভাৰেন সম্পযুত্তে পৰত্তযমানমেৰ তদৰিচ্ছেদস্স পচ্চযো হোতি.

৩০. যং হিরীযতীতি হিরীযতি-সদ্দেন ৰুত্তো ভাৰো যং-সদ্দেন ৰুচ্চতীতি যন্তি ভাৰনপুংসকং ৰা এতং দট্ঠব্বং. হিরিযিতব্বেনাতি চ হেতুঅত্থে করণৰচনং যুজ্জতি.

৩২. অলুব্ভনকৰসেনাতি এত্থ অলুব্ভনমেৰ অলুব্ভনকন্তি ভাৰনিদ্দেসো দট্ঠব্বো.

৩৩. অব্যাপজ্জোতি ব্যাপাদেন দুক্খেন দোমনস্সসঙ্খাতেন দোসেন ৰিয ন ব্যাপাদেতব্বোতিপি অত্থো যুজ্জতি.

৪২-৪৩. থিনমিদ্ধাদিপটিপক্খভাৰেন কুসলধম্মে অনিচ্চাদিমনসিকারে চ সীঘং সীঘং পরিৰত্তনসমত্থতা লহুপরিণামতা, অৰিজ্জানীৰরণানঞ্হি তণ্হাসংযোজনানং সত্তানং অকুসলপ্পৰত্তি পকতিভূতাতি ন তত্থ লহুপরিণামতায অত্থো. তেসঞ্চ ভাৰো গরুতাযেৰাতি তব্বিধুরসভাৰানং লহুতা দট্ঠব্বা. সা হি পৰত্তমানা সীঘং ভৰঙ্গৰুট্ঠানস্স পচ্চযো হোতি.

৪৪-৪৫. যে চ ধম্মা মোহসম্পযুত্তা ৰিয অৰিপন্নলহুতা, তেসঞ্চ কুসলকরণে অপ্পটিঘাতো মুদুতা. অপ্পটিঘাতেন মুদুতাদিরূপসদিসতায অরূপধম্মানম্পি মুদুতা মদ্দৰতাতিআদি ৰুত্তং.

৪৬-৪৭. সিনেহৰসেন কিলিন্নং অতিমুদুকং চিত্তং অকম্মঞ্ঞং হোতি ৰিলীনং ৰিয সুৰণ্ণং, মানাদিৰসেন অতিথদ্ধঞ্চ অতাপিতং ৰিয সুৰণ্ণং, যং পনানুরূপমুদুতাযুত্তং, তং কম্মঞ্ঞং হোতি যুত্তমদ্দৰং ৰিয সুৰণ্ণং. তস্সেৰ মুদুকস্স যো কম্মঞ্ঞাকারো, সা কম্মঞ্ঞতাতি মুদুতাৰিসিট্ঠা কম্মঞ্ঞতা ৰেদিতব্বা.

৫০-৫১. পচ্চোসক্কনভাৰেন পৰত্তং অকুসলমেৰ পচ্চোসক্কনং. একৰীসতি অনেসনা নাম ৰেজ্জকম্মং করোতি, দূতকম্মং করোতি, পহিণকম্মং করোতি, গণ্ডং ফালেতি, অরুমক্খনং দেতি, উদ্ধংৰিরেচনং দেতি, অধোৰিরেচনং দেতি, নত্থুতেলং পচতি, চক্খুতেলং পচতি, ৰেল়ুদানং দেতি, পণ্ণদানং দেতি, পুপ্ফদানং দেতি, ফলদানং দেতি, সিনানদানং দেতি, দন্তকট্ঠদানং দেতি, মুখোদকদানং দেতি, চুণ্ণদানং দেতি, মত্তিকাদানং দেতি, চাটুককম্মং করোতি, মুগ্গসূপিযং, পারিভট্যং, জঙ্ঘপেসনিযং দ্ৰাৰীসতিমং দূতকম্মেন সদিসং, তস্মা একৰীসতি. ছ অগোচরা ৰেসিযাগোচরো, ৰিধৰা, থুল্লকুমারী, পণ্ডক, পানাগার, ভিক্খুনীঅগোচরোতি. সঙ্খেপতোতি সরূপেন অনুদ্দিট্ঠত্তা ‘‘তত্থ কতমো ছন্দো’’তিআদি ন সক্কা ৰত্তুন্তি ‘‘যো ছন্দো ছন্দিকতা’’তিআদিনিদ্দেসং সঙ্খিপিত্ৰা ‘‘যে ৰা পনা’’তি নিদ্দেসো কতোতি অত্থো.

নিদ্দেসৰারকথাৰণ্ণনা নিট্ঠিতা.

কোট্ঠাসৰারৰণ্ণনা

৫৮-১২০. নিদ্দেসৰারে পুচ্ছাদীনং পচ্চেকং অনেকত্তেপি পুচ্ছাদিভাৰেন একত্তং উপনেত্ৰা চতুপরিচ্ছেদতা ৰুত্তা. চত্তারো দ্ৰেতি এৰমাদিকং সঙ্খিপিত্ৰা সহ ৰা গহণং সঙ্গহো. ঠপেত্ৰা যেৰাপনকেতি সঙ্গহেতব্বে সন্ধায ৰুত্তং. তে হি ৰিসুং ৰিসুং উদ্দিট্ঠত্তা নিদ্দিট্ঠত্তা চ ৰিপ্পকিণ্ণাতি সঙ্গহেতব্বা হোন্তি, ন যেৰাপনকা সঙ্গহগমনেনেৰ তথা অৰিপ্পকিণ্ণত্তা. যস্মা পন সঙ্খারক্খন্ধপরিযাপন্না হোন্তি, তস্মা তংনিদ্দেসে অখন্ধভাৰনিৰারণত্থং যেৰাপনাত্ৰেৰ ৰুত্তাতি ন যেৰাপনকা ঠপেতব্বাতি. পচ্চযসঙ্খাতেনাতি আহারপচ্চযসঙ্খাতেনাতি ৰুত্তং হোতি. অথ ৰা ‘‘হেতু পচ্চযো’’তি এতেসু দ্ৰীসু জনকো হেতু উপত্থম্ভকো পচ্চযোতি এৰং ৰিসেসৰন্তেসু পচ্চযসঙ্খাতেন. যথা হি কবল়ীকারাহারো ওজট্ঠমকরূপাহরণেন রূপকাযং উপত্থম্ভেতি, এৰমিমেপি ৰেদনাদিআহরণেন নামকাযন্তি. তথা চ হোন্তীতি সাধারণে সহজাতাদিপচ্চযে সন্ধাযাহ. অঞ্ঞথা চাতি অঞ্ঞেন চ একেনাকারেন পচ্চযা হোন্তিযেৰাতি আহারাতি ৰুচ্চন্তীতি অত্থো. তস্মা আহরণকিচ্চরহিতানং হেতুঅধিপতিআদীনং নত্থি আহারভাৰপ্পসঙ্গো. তিস্সো চ ৰেদনা আহরতীতিআদি যথাসম্ভৰৰসেন ৰুত্তং, ন ইমস্মিংযেৰ চিত্তে ফস্সাদিৰসেন. তযো চ ভৰেতি কামাদিভৰভূতং ৰিঞ্ঞাণং ৰিসেসেন, অৰিসেসেন চ পঞ্চুপাদানক্খন্ধে.

আরম্মণং উপগন্ত্ৰা নিজ্ঝাযনং চিন্তনং উপনিজ্ঝাযনং. হেত্ৰট্ঠেনাতি উপাযত্থেন, ন মূলত্থেন. পুব্বভাগে গতো পটিপন্নো নানাক্খণিকো অট্ঠঙ্গিকো মগ্গো লোকুত্তরক্খণেৰ সহ পৰত্তো যথাগতমগ্গোতি ৰুত্তো. ৰিপস্সনাক্খণতো পুব্বেৰ কাযকম্মাদীনং সুপরিসুদ্ধতায অট্ঠঙ্গিকমগ্গুপনিস্সযস্স ‘‘অরিযো অট্ঠঙ্গিকো মগ্গো ভাৰনাপারিপূরিং গচ্ছতী’’তি (ম. নি. ৩.৪৩১) এৰং ৰুত্তেন পরিযাযেন পুব্বভাগমগ্গস্স অট্ঠঙ্গিকতা যথাগতৰচনেন দীপিতা, ন একক্খণে অট্ঠন্নং অঙ্গানং সব্ভাৰাতি এৰমস্সপি পরিযাযদেসনতা ৰেদিতব্বা. ৰিজাননমেৰ চিত্তৰিচিত্ততাতি ‘‘চিত্তৰিচিত্তট্ঠেন একোৰ ধম্মো ৰিঞ্ঞাণক্খন্ধো’’তি আহ. চত্তারো খন্ধা হোন্তীতিআদীসু ৰেদনাক্খন্ধাদীনং সঙ্গহে কতেপি পুন ‘‘একো ৰেদনাক্খন্ধো হোতী’’তিআদিৰচনং ন অনেকে ৰেদনাক্খন্ধাদযো জাতিনিদ্দেসেন ইধ ৰুত্তাতি দস্সনত্থং. ইন্দ্রিযেসু চ একস্স জাতিনিদ্দেসভাৰে পটিক্খিত্তে অঞ্ঞেসং ইন্দ্রিযানং আহারাদীনঞ্চ তপ্পটিক্খেপো কতো হোতীতি পুব্বঙ্গমস্স মনিন্দ্রিযস্সেৰ কতোতি দট্ঠব্বো.

কোট্ঠাসৰারৰণ্ণনা নিট্ঠিতা.

সুঞ্ঞতৰারৰণ্ণনা

১২১-১৪৫. এত্থাতি এতস্মিং যথাৰুত্তে সমযে, এতেসু ৰা ধম্মেসু. ভাৰোতি সত্তো, যো কোচি ৰা অত্থো.

দুতিযচিত্তাদিৰণ্ণনা

১৪৬. সপ্পযোগেনাতি লীনস্স চিত্তস্স উস্সাহনপযোগসহিতেন. সউপাযেনাতি কুসলস্স করণাকরণেসু আদীনৰানিসংসপচ্চৰেক্খণং পরেহি উস্সাহনন্তি এৰমাদিউপাযসহিতেন.

১৫৬-১৫৯. মহাঅট্ঠকথাযং অনুঞ্ঞাতা নাতিসমাহিতায ভাৰনাযাতি যেৰাপনকেহিপি নিব্বিসেসতং দস্সেতি.

পুঞ্ঞকিরিযৰত্থাদিকথাৰণ্ণনা

অপচিতি এৰ অপচিতিসহগতং পুঞ্ঞকিরিযাৰত্থু যথা ‘‘নন্দিরাগসহগতা’’তি. অপচিতি ৰা চেতনাসম্পযুত্তকধম্মা কাযৰচীকিরিযা ৰা, তংসহিতা চেতনা অপচিতিসহগতং. হিতফরণেনাতি দেসকে মেত্তাফরণেন, ‘‘এৰং মে হিতং ভৰিস্সতী’’তি পৰত্তেন হিতচিত্তেন ৰা. কম্মস্সকতাঞাণং দিট্ঠিজুকম্মং. নিযমলক্খণন্তি মহপ্ফলতানিযমস্স লক্খণং. সীলমযে সঙ্গহং গচ্ছন্তি চারিত্তৰসেন. অনৰজ্জৰত্থুং পরিচ্চজন্তো ৰিয অব্ভনুমোদমানোপি পরস্স সম্পত্তিযা মোদতীতি অব্ভনুমোদনা দানমযে সঙ্গহিতা. ভাৰেন্তোপীতি অসমত্তভাৰনং সন্ধাযাহ. সমত্তা হি অপ্পনা হোতীতি. অট্ঠেৰ কোট্ঠাসে কত্ৰাতি একস্স সত্তস্স একস্মিং খণে উপ্পন্নমেকং পঠমচিত্তং দস্সেত্ৰা অঞ্ঞানি তাদিসানি অদস্সেন্তেন সব্বানি তানি সরিক্খট্ঠেন একীকতানি হোন্তি, তথা সেসানিপীতি এৰং অট্ঠ কত্ৰা.

কামাৰচরকুসলৰণ্ণনা নিট্ঠিতা.

রূপাৰচরকুসলং

চতুক্কনযো

পঠমজ্ঝানকথাৰণ্ণনা

১৬০. উত্তরপদলোপং কত্ৰা রূপভৰো রূপন্তি ৰুত্তো. ঝানস্স অমগ্গভাৰেপি সতি মগ্গৰচনং অঞ্ঞমগ্গভাৰনিৰারণত্থন্তি ইমস্মিং অত্থে মগ্গগ্গহণস্স পযোজনং ৰুত্তং, ন সব্বস্স কুসলজ্ঝানস্স মগ্গভাৰোতি. তত্থ মগ্গস্স ভাৰনায সমযৰৰত্থানস্স কতত্তা অমগ্গভাৰনাসমযে পৰত্তানং ফস্সাদীনং কুসলভাৰো ন দস্সিতো সিযা, তস্মা সব্বস্স মগ্গভাৰো দস্সেতব্বোতি. ইতো অঞ্ঞো মগ্গো নত্থীতি এৰং অঞ্ঞভূমিকৰিধুরো সতি পচ্চযন্তরে রূপূপপত্তিজনকসভাৰো ৰিপাকধম্মসভাৰো ৰিয ৰিপাকধম্মৰসেন সব্বসমানো মগ্গসদ্দেন ৰুত্তোতি দস্সেতীতি ৰেদিতব্বং. কুসলং দানন্তি অলোভো দট্ঠব্বো. অথ ৰা চেতনা দানং, তং ৰজ্জেত্ৰা ইতরে দ্ৰে চেতনাসম্পযুত্তকাতি ৰুত্তা. ৰট্টন্তীতি মগ্গভাৰতো ঝানৰচনেন সঙ্গহেত্ৰা মগ্গোতি ৰত্তুং ৰট্টন্তীতি অত্থো. ওকপ্পনাতি সদ্দহনা. অঞ্ঞত্থ দিট্ঠং অত্থং পরিচ্চজিত্ৰা ‘‘জনেতি ৰড্ঢেতী’’তি অযমত্থো কস্মা ৰুত্তোতি নিরুপসগ্গস্স অঞ্ঞত্থ এৰমত্থস্সেৰ দিট্ঠত্তাতি ইমমত্থং ৰিভাৰেতুং ‘‘পুন চপরং উদাযী’’তি (ম. নি. ২.২৪৬ আদযো) সুত্তমাহটং. কেসঞ্চি অরিযানং অরিযমগ্গেন সিদ্ধানি অঞ্ঞানি চ ঝানানি ভাৰনাসভাৰানেৰাতি তেসুপি ভাৰেন্তেন সমযৰৰত্থানং ইজ্ঝতীতি.

নিস্সরন্তি নিগ্গচ্ছন্তি এতেন, এত্থ ৰাতি নিস্সরণং. কে নিগ্গচ্ছন্তি? কামা. তেসং কামানং নিস্সরণং পহানন্তি অত্থো. এৰঞ্হি ‘‘কামান’’ন্তি কত্তরি সামিৰচনং যুজ্জতি. ৰত্থুকামেহিপীতি ৰত্থুকামেহি ৰিৰিচ্চেৰাতিপি অত্থো যুজ্জতীতি এৰং যুজ্জমানত্থন্তরসমুচ্চযত্থো পি-সদ্দো, ন কিলেসকামসমুচ্চযত্থো. কস্মা? ইমস্মিং অত্থে কিলেসকামানং দুতিযপদেন ৰিৰেকস্স ৰুত্তত্তা. অকুসলসদ্দেন যদিপি কিলেসকামা, অথাপি সব্বাকুসলা গহিতা, সব্বথা পন কিলেসকামেহি ৰিৰেকো ৰুত্তোতি আহ ‘‘দুতিযেন কিলেসকামেহি ৰিৰেকৰচনতো’’তি. কামগুণাধিগমহেতুপি পাণাতিপাতাদিঅসুদ্ধপ্পযোগো হোতীতি তব্বিৰেকেন পযোগসুদ্ধি ৰিভাৰিতা. তণ্হাসংকিলেসসোধনেন আসযপোসনং.

অঞ্ঞেসম্পি চাতি দিট্ঠিমানাদীনং ফস্সাদীনঞ্চ. উপরি ৰুচ্চমানানি ঝানঙ্গানি উপরিজ্ঝানঙ্গানি, তেসং অত্তনো ৰিপচ্চনীকানং পটিপক্খভাৰদস্সনত্থং তপ্পচ্চনীকনীৰরণৰচনং. ব্যাপাদৰিৰেকৰচনেন ‘‘অনত্থং মে অচরী’’তিআদিআঘাতৰত্থুভেদৰিসযস্স দোসস্স মোহাধিকানং থিনমিদ্ধাদীনং ৰিৰেকৰচনেন পটিচ্ছাদনৰসেন দুক্খাদিপুব্বন্তাদিভেদৰিসযস্স মোহস্স ৰিক্খম্ভনৰিৰেকো ৰুত্তো. কামরাগব্যাপাদতদেকট্ঠথিনমিদ্ধাদিৰিক্খম্ভনকঞ্চেদং সব্বাকুসলপটিপক্খসভাৰত্তা সব্বকুসলানং তেন সভাৰেন সব্বাকুসলানং পহানং হোন্তম্পি কামরাগাদিৰিক্খম্ভনসভাৰমেৰাতি তংসভাৰত্তা অৰিসেসেত্ৰা নীৰরণাকুসলমূলাদীনং ৰিক্খম্ভনৰিৰেকো ৰুত্তো হোতীতি আহ.

ৰিতক্কস্স কিচ্চৰিসেসেন থিরভাৰপ্পত্তে পঠমজ্ঝানসমাধিম্হি পচ্চনীকদূরীভাৰকতেন থিরভাৰেন তংসদিসেসু ৰিতক্করহিতেসু দুতিযজ্ঝানাদিসমাধীসু চ অপ্পনাতি অট্ঠকথাৰোহারোতি ৰিতক্কস্স অপ্পনাযোগো ৰুত্তো, অঞ্ঞথা ৰিতক্কোৰ অপ্পনাতি তস্স তংসম্পযোগো ন সিযাতি. অত্থো…পে… দট্ঠব্বো ঝানসমঙ্গিনো ৰিতক্কৰিচারসমঙ্গিতাদস্সনেন ঝানস্সেৰ সৰিতক্কসৰিচারভাৰস্স ৰুত্তত্তা.

ৰিৰেকজং পীতিসুখন্তি এত্থ পুরিমস্মিং অত্থে ৰিৰেকজন্তি ঝানং. পীতিসুখসদ্দতো চ অত্থিঅত্থৰিসেসৰতো অস্স, অস্মিং ৰাতি এত্থ অ-কারো ৰুত্তো. দুতিযে পীতিসুখমেৰ ৰিৰেকজং. ৰিৰেকজংপীতিসুখন্তি চ অঞ্ঞপদত্থে সমাসো পচ্চত্তনিদ্দেসস্স চ অলোপো কতো, লোপে ৰা সতি ‘‘ৰিৰেকজপীতিসুখ’’ন্তি পাঠোতি অযং ৰিসেসো. গণনানুপুব্বতাতি গণনানুপুব্বতায, গণনানুপুব্বতামত্তং ৰা পঠমন্তি ৰচনন্তি অত্থো. নিচ্চাদিৰিপল্লাসপ্পহানেন মগ্গো অসম্মোহতো অনিচ্চাদিলক্খণানি পটিৰিজ্ঝতীতি লক্খণূপনিজ্ঝানং. অসম্মোসধম্মং নিব্বানং অৰিপরীতলক্খণত্তা অনঞ্ঞথাভাৰতো তথলক্খণং.

দুতিযজ্ঝানকথাৰণ্ণনা

১৬১-২. ৰিতক্কৰিচারানং ৰূপসমাতি এতেন যেহি ৰিতক্কৰিচারেহি পঠমজ্ঝানস্স ওল়ারিকতা, তেসং সমতিক্কমা দুতিযজ্ঝানস্স সমধিগমো, ন সভাৰতো অনোল়ারিকানং ফস্সাদীনং সমতিক্কমাতি অযমত্থো দীপিতো হোতি. এৰং ‘‘পীতিযা চ ৰিরাগা’’তিআদীসু নযো. তস্মা ৰিতক্কৰিচারপীতিসুখসমতিক্কমৰচনানি ওল়ারিকোল়ারিকঙ্গসমতিক্কমা দুতিযাদিঅধিগমপরিদীপকানীতি তেসং একদেসভূতং ৰিতক্কৰিচারসমতিক্কমৰচনং তংদীপকন্তি ৰুত্তং. অথ ৰা ৰিতক্কৰিচারৰূপসমৰচনেনেৰ তংসমতিক্কমা দুতিযাধিগমদীপকেন পীতিৰিরাগাদিৰচনানং পীতিযাদিসমতিক্কমা ততিযাদিঅধিগমদীপকতা হোতীতি তস্স তংদীপকতা ৰুত্তা.

নীলৰণ্ণযোগতো নীলৰত্থং ৰিযাতি নীলযোগতো ৰত্থং নীলং ৰিযাতি অধিপ্পাযো. যেন সম্পসাদনেন যোগা ঝানং সম্পসাদনং, তস্মিং দস্সিতে ‘‘সম্পসাদনং ঝান’’ন্তি সমানাধিকরণনিদ্দেসেনেৰ তংযোগা ঝানে তংসদ্দপ্পৰত্তি দস্সিতাতি অৰিরোধো যুত্তো. একোদিভাৰে কথন্তি একোদিম্হি দস্সিতে ‘‘একোদিভাৰং ঝান’’ন্তি সমানাধিকরণনিদ্দেসেনেৰ ঝানস্স একোদিৰড্ঢনতা ৰুত্তা হোতীতি. একোদিভাৰন্তি পনিদং উদ্ধরিত্ৰা একোদিস্স নিদ্দেসো ন কত্তব্বো সিযাতি একোদিভাৰসদ্দো এৰ সমাধিম্হি পৰত্তো সম্পসাদনসদ্দো ৰিয ঝানম্হি পৰত্ততীতি যুত্তং.

অপ্পিতাতি গমিতা ৰিনাসং. দুতিযজ্ঝানাদিঅধিগমুপাযদীপকেন অজ্ঝত্তসম্পসাদনতায চেতসো একোদিভাৰতায চ হেতুদীপকেন অৰিতক্কাৰিচারভাৰহেতুদীপকেন চ ৰিতক্কৰিচারৰূপসমৰচনেনেৰ ৰিতক্কৰিচারাভাৰো দীপিতোতি কিং পুন অৰিতক্কঅৰিচারৰচনেন কতেনাতি? ন, অদীপিতত্তা. ন হি ৰিতক্কৰিচারৰূপসমৰচনেন ৰিতক্কৰিচারানং অপ্পৰত্তি ৰুত্তা হোতি. ৰিতক্কৰিচারেসু হি তণ্হাপহানঞ্চ এতেসং ৰূপসমনং. যে চ সঙ্খারেসু তণ্হাপহানং করোন্তি, তেসু মগ্গেসু পহীনতণ্হেসু ফলেসু চ সঙ্খারপ্পৰত্তি হোতি, এৰমিধাপি ৰিক্খম্ভিতৰিতক্কৰিচারতণ্হস্স দুতিযজ্ঝানস্স ৰিতক্কৰিচারসম্পযোগো পুরিমেন ন নিৰারিতো সিযাতি তংনিৰারণত্থং আৰজ্জিতুকামতাদিঅতিক্কমোৰ তেসং ৰূপসমোতি দস্সনত্থঞ্চ ‘‘অৰিতক্কং অৰিচার’’ন্তি ৰুত্তং.

ততিযজ্ঝানকথাৰণ্ণনা

১৬৩. পরিসুদ্ধপকতি খীণাসৰপকতি নিক্কিলেসতা. উপেক্খানিমিত্তন্তি এত্থ লীনুদ্ধচ্চপক্খপাতরহিতং মজ্ঝত্তং ৰীরিযং ‘‘উপেক্খা’’তি ৰুত্তং, তদেৰ তং আকারং গহেত্ৰা পৰত্তেতব্বস্স তাদিসস্স ৰীরিযস্স নিমিত্তভাৰতো উপেক্খানিমিত্তং. পঠমজ্ঝানপ্পটিলাভত্থায নীৰরণে…পে… নেৰসঞ্ঞানাসঞ্ঞাযতনসমাপত্তিপটিলাভত্থায আকিঞ্চঞ্ঞাযতনসঞ্ঞং পটিসঙ্খাসন্তিট্ঠনাপঞ্ঞাসঙ্খারুপেক্খাসু ঞাণন্তি ইমা অট্ঠ সমাপত্তিৰসেন উপ্পজ্জন্তি. সোতাপত্তিমগ্গপটিলাভত্থায উপ্পাদং পৰত্তং নিমিত্তং আযূহনং পটিসন্ধিং গতিং নিব্বত্তিং উপপত্তিং জাতিং জরামরণসোকপরিদেৰদুক্খদোমনস্সউপাযাসে. সোতাপত্তিফলসমাপত্তত্থায উপ্পাদং…পে… উপাযাসে…পে… অরহত্তমগ্গপটিলাভত্থায উপ্পাদং…পে… উপাযাসে. অরহত্তফলসমাপত্তত্থায…পে… সুঞ্ঞতৰিহারসমাপত্তত্থায…পে… অনিমিত্তৰিহারসমাপত্তত্থায উপ্পাদং পৰত্তং আযূহনং পটিসন্ধিং…পে… পটিসঙ্খাসন্তিট্ঠনা পঞ্ঞা সঙ্খারুপেক্খাসু ঞাণন্তি ইমা দস ৰিপস্সনাৰসেন উপ্পজ্জন্তি.

যদত্থি যং ভূতন্তি খন্ধপঞ্চকং, তং মুঞ্চিতুকম্যতাঞাণেন পজহতি. দিট্ঠসোৰত্থিকত্তযস্স সপ্পলক্খণৰিচিননে ৰিয দিট্ঠলক্খণত্তযস্স ভূতস্স সঙ্খারলক্খণৰিচিননে উপেক্খং পটিলভতি. অনাভোগরসাতি পণীতসুখেপি তস্মিং অৰনতি পটিপক্খকিচ্চাতি অত্থো. নামকাযেন চেতসিকসুখং কাযিকসুখহেতু রূপসমুট্ঠাপনেন কাযিকসুখঞ্চ ঝানসমঙ্গী পটিসংৰেদেতীতি ৰুচ্চতি. ফুটত্তা ব্যাপিতত্তা. যথা হি উদকেন ফুটসরীরস্স তাদিসে নাতিপচ্চনীকে ৰাতাদিকে ফোট্ঠব্বে ফুট্ঠে সুখং উপ্পজ্জতি, এৰং এতেহি ফুটসরীরস্সপি.

চতুত্থজ্ঝানকথাৰণ্ণনা

১৬৫. অৰিভূতপচ্চুপট্ঠানাতি সুখদুক্খানি ৰিয অৰিভূতাকারা পিট্ঠিপাসাণগতমিগমগ্গো ৰিয তদনুমাতব্বাৰিভূতাকারোপট্ঠানা.

চতুক্কনযৰণ্ণনা নিট্ঠিতা.

পঞ্চকনযৰণ্ণনা

১৬৭. যস্সা পন ধম্মধাতুযাতি সব্বঞ্ঞুতঞ্ঞাণস্স. তেন হি ধম্মানং আকারভেদং ঞত্ৰা তদনুরূপং দেসনং নিযামেতীতি. এত্থ চ পঞ্চকনযে দুতিযজ্ঝানং চতুক্কনযে দুতিযজ্ঝানপক্খিকং কত্ৰা ৰিভত্তং ‘‘যস্মিং…পে… মগ্গং ভাৰেতি অৰিতক্কং ৰিচারমত্তং সমাধিজং পীতিসুখং দুতিযজ্ঝানং উপসম্পজ্জ ৰিহরতী’’তি. কস্মা? একত্তকাযনানত্তসঞ্ঞীসত্তাৰাসফলতায দুতিযজ্ঝানেন সমানফলত্তা পঠমজ্ঝানসমাধিতো জাতত্তা চ. পঠমজ্ঝানমেৰ হি কামেহি অকুসলেহি চ ৰিৰিত্তন্তি তদভাৰা ন ইধ ‘‘ৰিৰিচ্চেৰ কামেহি ৰিৰিচ্চ অকুসলেহী’’তি সক্কা ৰত্তুং, নাপি ‘‘ৰিৰেকজ’’ন্তি. সুত্তন্তদেসনাসু চ পঞ্চকনযে দুতিযততিযজ্ঝানানি দুতিযজ্ঝানমেৰ ভজন্তি ৰিতক্কৰূপসমা ৰিচারৰূপসমা অৰিতক্কত্তা অৰিচারত্তা চাতি.

পটিপদাচতুক্কৰণ্ণনা

১৭৬-১৮০. তস্স তস্স ঝানস্স উপচারন্তি নীৰরণৰিতক্কৰিচারনিকন্তিযাদীনং ৰূপসমা থিরভূতো কামাৰচরসমাধি. তদনুধম্মতাতি তদনুরূপতাভূতা, সা পন তদস্সাদসঙ্খাতা তদস্সাদসম্পযুত্তক্খন্ধসঙ্খাতা ৰা মিচ্ছাসতীতি ৰদন্তি. অৰিগতনিকন্তিকা তংতংপরিহরণসতীতিপি ৰত্তুং ৰট্টতীতি এৰঞ্চ কত্ৰা ‘‘সতিযা ৰা নিকন্তিযা ৰা’’তি ৰিকপ্পো কতো. আগমনৰসেনাপি চ পটিপদা হোন্তিযেৰাতি ইদং কদাচি দুতিযাদীনং পঠমাদিআগমনকতপটিপদতং সন্ধায ৰুত্তং. অপি-সদ্দো হি অনেকন্তিকতং দীপেতি, এতস্স অনেকন্তিকত্তা এৰ চ পাল়িযং একেকস্মিং ঝানে চতস্সো পটিপদা চত্তারি আরম্মণানি সোল়সক্খত্তুকঞ্চ ৰিসুং ৰিসুং যোজিতং. অঞ্ঞথা একেকস্মিং পটিপদাদিম্হি নৰ নৰ ঝানানি যোজেতব্বানি সিযুন্তি.

আরম্মণচতুক্কৰণ্ণনা

১৮১. অপ্পগুণন্তি পঞ্চহি ৰসিতাহি অৰসীকতং.

আরম্মণপটিপদামিস্সকৰণ্ণনা

১৮৬. হেট্ঠাতি সোল়সক্খত্তুকতো পুব্বে. যে কেচি ঝানং উপ্পাদেন্তি নামাতি ৰচনেন যে কতাধিকারা সেক্খা মগ্গেনেৰ উপ্পাদিতজ্ঝানা, তেসং ঝানানি মগ্গপটিবদ্ধতায সুদ্ধিকনৰকসঙ্গহিতানীতি ৰেদিতব্বানি. ন হি তে উপ্পাদেন্তি নামাতি.

কসিণকথাৰণ্ণনা

২০৩. নিরোধপাদকতাৰচনেন আরুপ্পপাদকতা চ দস্সিতা. খিপ্পদস্সনং খিপ্পাভিঞ্ঞতা খিপ্পনিসন্তিভাৰো.

অভিভাযতনকথাৰণ্ণনা

২০৪. অঞ্ঞম্পীতি কেৰলং কসিণাযতনসঙ্খাতমেৰ অহুত্ৰা অভিভাযতনসঙ্খাতম্পি পৰত্ততীতি সতিপি অভিভাযতনানং কসিণাযতনত্তে কসিণাযতনভাৰতো অঞ্ঞো অভিভাযতনভাৰো কসিণনিমিত্তাভিভৰনকভাৰনানিমিত্তনানত্ততোতি দস্সেতি. তত্থ অভিভৰতীতি অভিভু, পরিকম্মং, ঞাণং ৰা. অভিভু আযতনং এতস্সাতি অভিভাযতনং, ঝানং. অভিভৰিতব্বং ৰা আরম্মণসঙ্খাতং আযতনং এতস্সাতি অভিভাযতনং, ঝানং. আরম্মণাভিভৰনতো অভিভু চ তং আযতনঞ্চ যোগিনো সুখৰিসেসানং অধিট্ঠানভাৰতো মনাযতনধম্মাযতনভাৰতো চাতিপি সসম্পযুত্তং ঝানং অভিভাযতনং. মগ্গপ্পটিবদ্ধতায তদা সমাপত্তিতো ৰুট্ঠিতস্স আভোগো পুব্বভাগভাৰনাৰসেন ঝানক্খণে পৰত্তং অভিভৰনাকারং গহেত্ৰা পৰত্তো ৰুত্তোতি দট্ঠব্বো. আগমেসু পন ‘‘অজ্ঝত্তং রূপসঞ্ঞী একো বহিদ্ধা রূপানি পস্সতি পরিত্তানি সুৰণ্ণদুব্বণ্ণানি. অপ্পমাণানি সুৰণ্ণদুব্বণ্ণানি. অজ্ঝত্তং অরূপসঞ্ঞী একো…পে… পরিত্তানি সুৰণ্ণদুব্বণ্ণানি. অপ্পমাণানি সুৰণ্ণদুব্বণ্ণানী’’তি (দী. নি. ২.১৭৩; ম. নি. ২.২৪৯; অ. নি. ৮.৬৫) ইমেসং চতুন্নং অভিভাযতনানং আগতত্তা আগমট্ঠকথাসু (দী. নি. অট্ঠ. ২.১৭৩; ম. নি. অট্ঠ. ২. ২৪৯-২৫০; অ. নি. অট্ঠ. ৩.৮.৬৫) ‘‘ৰণ্ণৰসেন আভোগে ৰিজ্জমানেপি পরিত্তঅপ্পমাণৰসেনেৰ ইমানি অভিভাযতনানি দেসিতানী’’তি ৰুত্তং. পরিত্তঅপ্পমাণতা হি অভিভৰনস্স কারণং ৰণ্ণাভোগে সতিপি অসতিপি. তত্থ চ ৰণ্ণাভোগরহিতানি সহিতানি চ সব্বানি পরিত্তানি ‘‘সুৰণ্ণদুব্বণ্ণানী’’তি ৰুত্তানি, তথা অপ্পমাণানীতি দট্ঠব্বানি. অত্থি হি এসো পরিযাযো পরিত্তানি অভিভুয্য তানি চে কদাচি ৰণ্ণৰসেন আভুজিতানি হোন্তি সুৰণ্ণদুব্বণ্ণানি অভিভুয্যাতি. ইধ পন নিপ্পরিযাযদেসনত্তা ৰণ্ণাভোগরহিতানি ৰিসুং ৰুত্তানি সহিতানি চ. অত্থি হি উভযত্থ অভিভৰনৰিসেসোতি.

তত্থ চ পরিযাযদেসনত্তা ৰিমোক্খানম্পি অভিভৰনপরিযাযো অত্থীতি ‘‘অজ্ঝত্তং রূপসঞ্ঞী’’তি অভিভাযতনদ্ৰযং ৰুত্তং, ততিযচতুত্থঅভিভাযতনেসু দুতিযৰিমোক্খো ৰণ্ণাভিভাযতনেসু ততিযৰিমোক্খো চ অভিভৰনপ্পৰত্তিতো সঙ্গহিতো, ইধ পন নিপ্পরিযাযদেসনত্তা ৰিমোক্খাভিভাযতনানি অসঙ্করতো দস্সেতুং ৰিমোক্খে ৰজ্জেত্ৰা অভিভাযতনানি কথিতানি. সব্বানি চ ৰিমোক্খকিচ্চানি ৰিমোক্খদেসনায ৰুত্তানি, তদেতং ‘‘অজ্ঝত্তং রূপসঞ্ঞী’’তি আগতস্স অভিভাযতনদ্ৰযস্স অভিভাযতনেসু অৰচনতো ‘‘রূপী রূপানি পস্সতী’’তিআদীনঞ্চ সব্বৰিমোক্খকিচ্চসাধারণৰচনভাৰতো ৰৰত্থানং কতন্তি ৰিঞ্ঞাযতি.

অজ্ঝত্তরূপানং অনভিভৰনীযতোতি ইদং কত্থচিপি ‘‘অজ্ঝত্তং রূপানি পস্সতী’’তি অৰত্ৰা সব্বত্থ যং ৰুত্তং ‘‘বহিদ্ধা রূপানি পস্সতী’’তি, তস্স কারণৰচনং. তেন যং অঞ্ঞহেতুকং, তং তেন হেতুনা ৰুত্তং. যং পন দেসনাৰিলাসহেতুকং অজ্ঝত্তং অরূপসঞ্ঞিতায এৰ ইধ ৰচনং, ন তস্স অঞ্ঞং কারণং মগ্গিতব্বন্তি দস্সেতি. অজ্ঝত্তরূপানং অনভিভৰনীযতা চ বহিদ্ধারূপানং ৰিয অৰিভূতত্তা, দেসনাৰিলাসো চ যথাৰুত্তৰৰত্থানৰসেন ৰেদিতব্বো. সুৰণ্ণদুব্বণ্ণানীতি এতেনেৰ সিদ্ধত্তা নীলাদিঅভিভাযতনানি ন ৰত্তব্বানীতি চে? ন, নীলাদীসু কতাধিকারানং নীলাদিভাৰস্সেৰ অভিভৰনকারণত্তা. ন হি তেসং পরিসুদ্ধাপরিসুদ্ধৰণ্ণপরিত্ততা তদপ্পমাণতা ৰা অভিভৰনকারণং, অথ খো নীলাদিভাৰো এৰাতি.

অভিভাযতনকথাৰণ্ণনা নিট্ঠিতা.

ৰিমোক্খকথাৰণ্ণনা

২৪৮. রূপীতি যেনাযং সসন্ততিপরিযাপন্নেন রূপেন সমন্নাগতো, তং যস্স ঝানস্স হেতুভাৰেন ৰিসিট্ঠং রূপং হোতি. যেন ৰিসিট্ঠেন রূপীতি ৰুচ্চেয্য, তদেৰ সসন্ততিপরিযাপন্নরূপনিমিত্তং ঝানমিৰ পরমত্থতো রূপীভাৰসাধকন্তি দট্ঠব্বং. কসিণদেসনা ঝানানমেৰ কসিণভাৰেন পৰত্তা অভিধম্মে, সুত্তে পন আরম্মণানন্তি ‘‘অভিধম্মৰসেনা’’তি ৰুত্তং.

ৰিমোক্খকথাৰণ্ণনা নিট্ঠিতা.

ব্রহ্মৰিহারকথাৰণ্ণনা

২৫১. সোমনস্সদোমনস্সরহিতং অঞ্ঞাণমেৰ অঞ্ঞাণুপেক্খা. কিলেসোধীনং মগ্গোধীহি অজিতত্তা অনোধিজিনস্স. সত্তমভৰাদিতো উদ্ধং পৰত্তৰিপাকস্স অজিতত্তা অৰিপাকজিনস্স. নিদ্দোসভাৰেনাতি নিপ্পটিঘভাৰেন. একস্সপি সত্তস্স অপ্পটিভাগনিমিত্তত্তা পরিচ্ছেদগ্গহণং নত্থি, ন চ সম্মুতিসচ্চৰসেন পৰত্তং সত্তগ্গহণং পরিচ্ছিন্নরূপাদিগ্গহণং হোতীতি অপ্পনাপ্পত্তিযাপি অপরামাসসত্তগ্গহণমুদ্ধভূতানং মেত্তাদীনং একসত্তারম্মণানম্পি অপ্পমাণগোচরতা ৰুত্তাতি ৰেদিতব্বা.

ব্রহ্মৰিহারকথাৰণ্ণনা নিট্ঠিতা.

অসুভকথাৰণ্ণনা

২৬৩. উদ্ধং ধুমাতত্তা উদ্ধুমাতং. সেতরত্তেহি পরিভিন্নং ৰিমিস্সিতং নীলং ৰিনীলং, পুরিমৰণ্ণৰিপরিণামভূতং ৰা নীলং ৰিনীলং. সঙ্ঘাটো অঙ্গানং সুসম্বদ্ধতা. আরম্মণস্স দুব্বলতা পটিপক্খভাৰেন চিত্তং ঠপেতুং অসমত্থতা. অত্তনি আনিসংসদস্সননীৰরণরোগৰূপসমানং যথাক্কমং পুপ্ফছড্ডকৰমনৰিরেচনউপমা যোজেতব্বা. পটিকূলমনসিকারসামঞ্ঞেন অসুভেহি কেসাদীহি পটিকূলজ্ঝানস্স গহণং সিৰথিকাৰণ্ণজ্ঝানস্স চ. তম্পি হি পটিকূলমনসিকারৰসেনেৰ উপ্পজ্জতীতি, সিৰথিকপ্পকারানি ৰা সিৰথিকাৰণ্ণানি.

অসুভকথাৰণ্ণনা নিট্ঠিতা.

রূপাৰচরকুসলকথাৰণ্ণনা নিট্ঠিতা.

অরূপাৰচরকুসলকথাৰণ্ণনা

২৬৫. সব্বাকারেনাতি এৰং রূপনিমিত্তং দণ্ডাদানসম্ভৰদস্সনাদিনা সব্বেন রূপরূপনিমিত্তেসু তদারম্মণজ্ঝানেসু দোসদস্সনাকারেন, রূপাদীসু নিকন্তিপ্পহানঅনাৰজ্জিতুকামতাদিনা ৰা. ৰিরাগাতি জিগুচ্ছনা. আনেঞ্জাভিসঙ্খারৰচনাদীহি আনেঞ্জতা ‘‘সন্তা ইমে চুন্দ অরিযস্স ৰিনযে ৰিমোক্খা’’তিআদিনা সন্তৰিমোক্খতা চ ৰুত্তা. দোসদস্সনপটিপক্খভাৰনাৰসেন পটিঘসঞ্ঞানং সুপ্পহীনত্তা মহতাপি সদ্দেন অরূপসমাপত্তিতো ন ৰুট্ঠাতি. তথা পন ন সুপ্পহীনত্তা সব্বরূপসমাপত্তিতো ৰুট্ঠানং সিযা, পঠমজ্ঝানং পন অপ্পকম্পি সদ্দং ন সহতীতি তং সমাপন্নস্স সদ্দো কণ্টকোতি ৰুত্তং.

আরুপ্পভাৰনায অভাৰে চুতিতো উদ্ধং উপ্পত্তিরহানং রূপসঞ্ঞাপটিঘসঞ্ঞানং যাৰ অত্তনো ৰিপাকপ্পৰত্তি, তাৰ অনুপ্পত্তিধম্মতাপাদনেন সমতিক্কমো অত্থঙ্গমো চ ৰুত্তো. নানত্তসঞ্ঞাসু পন যা তস্মিং ভৰে ন উপ্পজ্জন্তি, তা অনোকাসতায ন উপ্পজ্জন্তি, ন আরুপ্পভাৰনায নিৰারিতত্তা. অনিৰারিতত্তা চ কাচি উপ্পজ্জন্তি. তস্মা তাসং অমনসিকারো অনাৰজ্জনং অপচ্চৰেক্খণং, জৰনপটিপাদকেন ৰা ভৰঙ্গমনস্স অন্তরে অকরণং অপ্পৰেসনং ৰুত্তং, তেন চ নানত্তসঞ্ঞামনসিকারহেতূনং রূপানং সমতিক্কমা সমাধিস্স থিরভাৰং দস্সেতি. রূপসমতিক্কমাভাৰেনেৰ হি রূপসমাপত্তীসু ‘‘নানত্তসঞ্ঞানং অমনসিকারা’’তি একস্স অৰচনন্তি. কো আনিসংসো, ন হি সব্বস্সাদৰত্থুরহিতে আকাসে পৰত্তিতসঞ্ঞায আনিসংসো দিস্সতীতি ৰুত্তং হোতি. রূপসঞ্ঞাসমতিক্কমনাদিকং ৰচনং আনিসংসস্স পকাসনং, ন অত্থো.

অঞ্ঞত্থাতি সুত্তেসু. তত্থ হি পরিত্তকসিণুগ্ঘাটনেপি রূপৰিৰেকমত্তগ্গহণেন পরিচ্ছেদস্স অগ্গহণতো অনন্তফরণতা চ ৰুত্তা, ইধ পন অনন্তফরণতাসব্ভাৰেপি উগ্ঘাটিতকসিণৰসেন পরিত্তানন্ততা হোতীতি দস্সনত্থং ‘‘অনন্তো আকাসো’’তি ন ৰুত্তন্তি অধিপ্পাযো. সমযৰৰত্থাপনঝানৰিসেসনেনেৰেত্থ অত্থো, ন পটিপত্তিযাতি তদৰচনং.

২৬৬. পঠমারুপ্পৰিঞ্ঞাণং অত্তনো ফরণাকারেনেৰ অনন্তন্তি মনসিকাতব্বত্তা ‘‘অনন্ত’’ন্তি ৰুত্তং. উগ্ঘাটভাৰো উগ্ঘাটিমং.

২৬৭. অকিঞ্চনন্তি ৰিঞ্ঞাণস্স কিঞ্চি পকারং অগ্গহেত্ৰা সব্বেন সব্বং ৰিভাৰনং আহ.

২৬৮. যাযাতি সঙ্খারাৰসেসসঞ্ঞায. তং তাৰ পটিপত্তিং. আৰজ্জিস্সামীতিআদিনা তন্নিন্নাৰজ্জনাদিপৰত্তিযা অভাৰং দস্সেতি, ন তদতিক্কমনত্থায আৰজ্জনভাৰনাপৰত্তিযা. নাসঞ্ঞাতি সঞ্ঞাভাৰো চ এতিস্সা অত্থীতি অত্থো. সমূহগহণৰসেন পৰত্তং কলাপসম্মসনং. ফস্সাদিএকেকধম্মগহণৰসেন পৰত্তা অনুপদধম্মৰিপস্সনা.

আকাসে পৰত্তিতৰিঞ্ঞাণাতিক্কমতো ততিযা. তদতিক্কমতো হি তস্সেৰ ৰিভাৰনং হোতি. দুতিযারুপ্পৰিঞ্ঞাণৰিভাৰনে হি তদেৰ অতিক্কন্তং সিযা, ন তস্স আরম্মণং, ন চারম্মণে দোসং দিস্ৰা অনারম্মণস্স ৰিভাৰনাতিক্কমো যুজ্জতি. পাল়িযঞ্চ ‘‘ৰিঞ্ঞাণঞ্চাযতনসমাপত্তিং সতো সমাপজ্জিত্ৰা ততো ৰুট্ঠহিত্ৰা তঞ্ঞেৰ ৰিঞ্ঞাণং অভাৰেতী’’তি (চূল়নি. উপসীৰমাণৰপুচ্ছানিদ্দেস ৩৯) ত্তং, ন ৰুত্তং ‘‘তঞ্ঞেৰ ৰিঞ্ঞাণঞ্চাযতনং অভাৰেতী’’তি, ‘‘তঞ্ঞেৰ অভাৰেতী’’তি ৰা. ‘‘অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জা’’তি (ৰিভ. ৫০৮) এত্থ পন দ্ৰযং ৰুত্তং আরম্মণঞ্চ ৰিঞ্ঞাণং ৰিঞ্ঞাণঞ্চাযতনঞ্চ. তস্মিং দ্ৰযে যেন কেনচি যতো ৰা ৰুট্ঠিতো, তেনেৰ পট্ঠাননিদ্দিট্ঠেন তংসদ্দস্স সম্বন্ধে আপন্নে ৰিঞ্ঞাণঞ্চাযতনস্স নিৰত্তনত্থং ৰিঞ্ঞাণৰচনং, তস্মা পঠমারুপ্পৰিঞ্ঞাণস্সেৰ অভাৰনাতিক্কমো ৰুত্তো. তন্নিস্সিতন্তি তেন নিস্সিতং. তং মণ্ডপলগ্গং অনিস্সায তেন ৰিনাভূতে ৰিৰিত্তে বহি ওকাসে ঠানং ৰিয আকাসলগ্গৰিঞ্ঞাণস্স ৰিৰেকে তদপগমে ততিযারুপ্পস্স ঠানং.

অরূপাৰচরকুসলকথাৰণ্ণনা নিট্ঠিতা.

তেভূমককুসলৰণ্ণনা

২৬৯. ইমে তাৰ ছন্দাধিপতেয্যে পঞ্চ নযাতি ছন্দাধিপতেয্যনযে অন্তে পুরিমনযানং তংনযাভিমুখপ্পৰত্তিং সন্ধায ৰুত্তং, অযং পন পকারো ন পাল়িঅনুগতো. ন হি পাল়িযং সুদ্ধিকনযাদযো ৰত্ৰা ৰীরিযাধিপতেয্যাদিনযা ৰুত্তাতি. মহাপকরণে সত্তহি মহাৰারেহি অনুলোমাদিনযৰিচিত্তেহি হীনত্তিকো ৰিভত্তো. তত্থ চ মজ্ঝিমধম্মেকদেসভূতা ইমে ৰীসতি লোকিযমহানযাতি কত্ৰা ‘‘তত্থ ৰিভত্তা’’তি ৰুত্তং, ন এতেন কমেন ইমেসং নযানং তত্থ আগতত্তা.

এৰমেতেসং ৰিভত্তট্ঠানং দস্সেত্ৰা ইদানি এতস্মিং তেভূমককুসলকথাৰসানট্ঠানে অট্ঠারসকম্মদ্ৰারদস্সনত্থং ‘‘ইমস্মিং পন ঠানে’’তিআদিমাহ. অথ ৰা হীনপণীতেহি ৰিনিৰত্তেত্ৰা মজ্ঝিমরাসিঅন্তোগধভাৰং দস্সেন্তেন এতেসং তেভূমককুসলনযানং হীনত্তিকে ৰিভাগো কতো. ‘‘ইমস্মিং পন ঠানে’’তিআদিকস্স যথাৰুত্তোৰ সম্বন্ধো. হীনত্তিকে মজ্ঝিমরাসিম্হি যে সৰিপাকা ৰট্টনিস্সিতেনেৰ দানাদিৰসেন পৰত্তিতা, তে হীনাতি কাতব্বা. যে ৰিৰট্টনিস্সিতেন দানাদিৰসেন পৰত্তিতা, তে পণীতাতি কাতব্বা. অৰিপাকা মজ্ঝিমাতি কাতব্বা. অৰিপাকত্তা চ তেসু মজ্ঝিমরাসিং ঠপেত্ৰা ইতরে দ্ৰে একন্তৰট্টনিস্সিতা নৰ, ৰিৰট্টুপনিস্সযভূতা চ নৰাতি অট্ঠারস কম্মদ্ৰারানি, কম্মানি চ তানি তস্স তস্স ফলস্স কারণভাৰেন দ্ৰারানি চাতি কম্মদ্ৰারানি. তত্থ তত্থ ৰা চিত্তানি কম্মদ্ৰারানীতি আহ. তংতংদ্ৰারানি ৰা কাযাদীনি. অট্ঠারস খত্তিযা চ অভব্বা হীনহীনত্তযাদযো নৰ, ভব্বা চ পণীতপণীতত্তযাদযো নৰাতি কম্মানুরূপেনেৰ ৰেদিতব্বা. এৰং ব্রাহ্মণাদযো দেৰা চ যোজেতব্বা. অট্ঠচত্তালীস গোত্তচরণানি তেসঞ্ঞেৰ খত্তিযাদীনং ভেদা. ‘‘কামাৰচরং কুসলং চিত্তং উপ্পন্নং হোতি…পে… চিত্তাধিপতেয্য’’ন্তি (ধ. স. ২৬৯-২৭০) এৰং ৰুত্তো চিত্তস্স চিত্তাধিপতেয্যভাৰো, চিত্তচেতসিকসমুদাযে সমযৰৰত্থাপকো চিত্তসদ্দো পৰত্তোতি ‘‘সম্পযুত্তধম্মানং ৰসেন ৰুত্তো’’তি আহ.

তেভূমককুসলৰণ্ণনা নিট্ঠিতা.

লোকুত্তরকুসলৰণ্ণনা

২৭৭. লোকং তরতীতি এতেন লোকসমতিক্কমপটিপত্তিমাহ. উত্তরতীতি এতেন লোকস্সন্তগমনং ফলে পতিট্ঠানং ফলং. সমতিক্কম্মাতিআদিনা নিব্বানং. সমতিক্কম্মাতি হি নিস্সরিত্ৰা. অভিভুয্যাতি ৰিসংযুত্তং হুত্ৰাতি অত্থো. তিৰিধোপি চত্থো মগ্গাদীসু একেকস্মিং যোজেতব্বো, মগ্গেযেৰ ৰা ইধ তস্স অধিপ্পেতত্তা. একচিত্তক্খণিকন্তি একমগ্গস্স দ্ৰে ৰারে অনুপ্পত্তিং সন্ধাযাহ. অঞ্ঞমঞ্ঞং ধম্মানং অনতিৰত্তনাদিসাধিকায পঞ্ঞায ৰড্ঢেতি. ‘‘নিয্যাতীতি নিয্যানীয’’ন্তি ৰত্তব্বে ঈ-কারস্স রস্সত্তং য-কারস্স চ ক-কারং কত্ৰা ‘‘নিয্যানিক’’ন্তি ৰুত্তং. নিয্যাতি এতেনাতি নিয্যানং, নিয্যানমেৰ নিয্যানিকং ৰেনযিকো ৰিয. এত্থ ‘‘নেয্যানিক’’ন্তি ৰত্তব্বে ই-কারস্স এ-কারত্তং অকত্ৰা ৰুত্তং.

ফলন্তি চিত্তচেতসিকরাসি ৰুচ্চতি, তং অঞ্ঞমঞ্ঞং সম্পযুত্তানং ধম্মানং অত্তনো অৰযৰভূতানং নিস্সযো হোতি. ফলঞাণং ৰা ফলং, সম্মাদিট্ঠিআদযো অঙ্গানি ৰা. লোকুত্তরভাৰেতি লোকং উত্তিণ্ণভাৰে. তেন ফলনিব্বানানি সঙ্গণ্হাতি. তেসু যং ভৰতি ফলং, তং ‘‘ভূমী’’তি ৰুচ্চতি. যথা ৰা কম্মনিব্বত্তা কামভৰাদযো তংসমঙ্গিনো নিস্সযভাৰেন ‘‘ভূমী’’তি ৰুচ্চন্তি, এৰং মগ্গেন নিব্বত্তং ফলং অরিযসাৰকস্স কালেন কালং সমাপজ্জিতব্বতায নিস্সযভাৰতো ‘‘ভূমী’’তি ৰুচ্চতি, ততোযেৰ অরিযা চিরতরং তিট্ঠন্তি. সমুচ্ছেদৰিৰেকৰসেনাতি এত্থ অপাযগমনীযানং অচ্চন্তসমুচ্ছেদো ইতরেসঞ্চ ৰিজ্জুতোভাসেন ৰিয তমস্স সমুচ্ছেদো দট্ঠব্বো. লোকিযজ্ঝানম্পি পুথুজ্জনস্স অরিযস্স চ অকতাধিকারস্স ন ৰিনা পটিপদায ইজ্ঝতি, কতাধিকারস্স পন অরিযস্স মগ্গেনেৰ সমিজ্ঝনতো ৰিপাকানং ৰিয কুসলেন তথা সমিদ্ধস্স অরিযমগ্গেন সদিসতায অভাৰতো অতব্বিপাকত্তা চ ন মগ্গপটিপদা তস্স ঝানস্স পটিপদাতি সক্কা ৰত্তুন্তি তত্থ তথা গরুং কত্ৰা পটিপদাহি এৰ দেসনা ন কতা, যথাৰুত্তজ্ঝানসঙ্গহত্থং সুদ্ধিকদেসনাপি কতা.

ইধ পন কস্সচি ৰিনা পটিপদায অসিদ্ধিতো গরুং কত্ৰা দস্সেতুং ‘‘দুক্খপটিপদ’’ন্তিআদি ৰুত্তং. যো কোচি ৰারোতি সকিং দ্ৰিক্খত্তুং তিক্খত্তুং চতুক্খত্তুং অনেকক্খত্তুন্তি এৰমাদীসু ৰিক্খম্ভনৰারেসু যো কোচি. সকিং দ্ৰিক্খত্তুঞ্চ ৰিক্খম্ভনৰারা সুখা পটিপদা এৰ, ন চ ততো উদ্ধং সুখা পটিপদা হোতীতি তিক্খত্তুং ৰিক্খম্ভনৰারং দুক্খা পটিপদাতি রোচেসুং অট্ঠকথাচরিযা. তস্মিং তথারোচিতে ততো পরেসু চতুক্খত্তুং ৰিক্খম্ভনৰারাদীসু ৰত্তব্বমেৰ নত্থীতি. রূপারূপানং লক্খণাদীহি পরিচ্ছিন্দিত্ৰা গহণং রূপারূপপরিগ্গহো, নামরূপমত্তমেতং, ন অঞ্ঞো কোচি সত্তাদিকোতি ৰৰত্থাপনং নামরূপৰৰত্থাপনং. পরিগ্গহিতরূপারূপস্স মগ্গপাতুভাৰদন্ধতা চ নামরূপৰৰত্থাপনাদীনং কিচ্ছসিদ্ধিতো সিযাতি ন রূপারূপপরিগ্গহকিচ্ছতায এৰ দুক্খপটিপদতা ৰত্তব্বাতি চে? তং ন, নামরূপৰৰত্থাপনাদীনং পচ্চনীককিলেসমন্দতায সুখসিদ্ধিযম্পি তথাসিদ্ধৰিপস্সনাসহগতানং ইন্দ্রিযানং মন্দতায মগ্গপাতুভাৰদন্ধভাৰতো.

রূপারূপং পরিগ্গহেত্ৰাতি অকিচ্ছেনপি পরিগ্গহেত্ৰা. কিচ্ছেন পরিগ্গহিতে ৰত্তব্বমেৰ নত্থি. এৰং সেসেসুপি. ইমং ৰারং রোচেসুন্তি কলাপসম্মসনাৰসানে উদযব্বযানুপস্সনায ৰত্তমানায উপ্পন্নস্স ৰিপস্সনুপক্কিলেসস্স তিক্খত্তুং ৰিক্খম্ভনেন কিচ্ছতাৰারং দুক্খা পটিপদাতি রোচেসুং এতদন্তত্তা পটিপদায. এতস্স অকিচ্ছত্তেপি পুরিমানং কিচ্ছত্তে দুক্খপটিপদতা ৰুত্তনযাৰাতি ন পটিসিদ্ধাতি দট্ঠব্বং. যথাৰুত্তং ৰা সব্বং রূপারূপপরিগ্গহাদিকিচ্ছতং তিক্খত্তুং ৰিক্খম্ভনৰারতাৰসেন ‘‘ইমং ৰার’’ন্তি আহ. যস্স পন সব্বত্থ অকিচ্ছতা, তস্স সুখা পটিপদা ৰেদিতব্বা.

মুসাৰাদাদীনং ৰিসংৰাদনাদিকিচ্চতায লূখানং অপরিগ্গাহকানং পটিপক্খভাৰতো পরিগ্গাহকসভাৰা সম্মাৰাচা. সা সিনিদ্ধভাৰতো সম্পযুত্তধম্মে পরিগ্গণ্হাতি সম্মাৰাচাপচ্চযসুভাসিতসোতারঞ্চ জনং. কাযিককিরিযাকিচ্চং কত্তব্বং সমুট্ঠাপেতি, সযঞ্চ সমুট্ঠহনং ঘটনং হোতীতি সম্মাকম্মন্তসঙ্খাতা ৰিরতিপি সমুট্ঠানসভাৰাতি ৰুত্তা. সম্পযুত্তধম্মানং ৰা উক্খিপনং সমুট্ঠহনং কাযিককিরিযায ভারুক্খিপনং ৰিয, জীৰমানস্স সত্তস্স, সম্পযুত্তধম্মানং ৰা সুদ্ধি ৰোদানং আজীৰস্সেৰ ৰা জীৰিতিন্দ্রিযৰুত্তিযা.

২৮৩. মগ্গসন্নিস্সিতন্তি পরমত্থমগ্গসভাৰত্তা মগ্গাৰযৰভাৰেন সমুদাযসন্নিস্সিতন্তি অত্থো.

২৮৫. পতিট্ঠানং কিলেসৰসেন, আযূহনং অভিসঙ্খারৰসেন. তণ্হাৰসেন ৰা পতিট্ঠানং, দিট্ঠিৰসেন আযূহনং. বোধীতি যা অযং ধম্মসামগ্গী ৰুচ্চতীতি যোজেতব্বা. সেনঙ্গরথঙ্গাদযো ৰিযাতি এতেন পুগ্গলপঞ্ঞত্তিযা অৰিজ্জমানপঞ্ঞত্তিভাৰং দস্সেতি. অঙ্গ-সদ্দো কারণত্থোপি হোতীতি চতুসচ্চবোধায সংৰত্তন্তীতি বোজ্ঝঙ্গা. বুজ্ঝন্তীতি বোধিযো, বোধিযো এৰ অঙ্গাতি ‘‘অনুবুজ্ঝন্তীতি বোজ্ঝঙ্গা’’তি ৰুত্তং. ৰিপস্সনাদীনং কারণানং বুজ্ঝিতব্বানঞ্চ সচ্চানং অনুরূপং পচ্চক্খভাৰেন পটিমুখং অৰিপরীততায সম্মা চ বুজ্ঝন্তীতি এৰমত্থৰিসেসদীপকেহি উপসগ্গেহি ‘‘অনুবুজ্ঝন্তী’’তিআদি ৰুত্তং. বোধি-সদ্দো হি সব্বৰিসেসযুত্তং বুজ্ঝনং সামঞ্ঞেন সঙ্গণ্হাতীতি.

২৯৯. তিণ্ণন্তি রাগাদীনং. করোতি নাম কিং দুচ্চরিতানি অনুৰত্তমানানি.

৩০১. পাণাতিপাতাদিনিপ্ফাদিতপচ্চযানং নিচ্চসেৰনং ধুৰপটিসেৰনং. সকিচ্চকোতি ৰিসুং অত্তনো কিচ্চৰা. ন হোতীতি অত্থন্তরভাৰং পটিক্খিপতি. পচ্চযপটিসেৰনসামন্তজপ্পনইরিযাপথপ্পৰত্তনানি পাপিচ্ছতানিব্বত্তানি তীণি কুহনৰত্থূনীতি.

৩৪৩. ৰুট্ঠানগামিনীৰিপস্সনা সঙ্খারুপেক্খা সানুলোমা, সা সুঞ্ঞতো পস্সন্তী ‘‘সুঞ্ঞতা’’তি ৰুচ্চতি, দুক্খতো পস্সন্তী তণ্হাপণিধিসোসনতো ‘‘অপ্পণিহিত’’ন্তি. সা আগমনীযট্ঠানে মগ্গাধিগমত্থং আগমনপটিপদাঠানে ঠত্ৰা সুঞ্ঞতাপ্পণিহিতন্তি নামং দেতি. আগমনতো নামে লদ্ধে সগুণতো আরম্মণতো চ নামং সিদ্ধমেৰ হোতি, ন পন সগুণারম্মণেহি নামলাভে সব্বত্থ আগমনতো নামং সিদ্ধং হোতীতি পরিপুণ্ণনামসিদ্ধিহেতুত্তা সগুণারম্মণেহি সব্বেসম্পি নামত্তযযোগো, ন আগমনতোতি ৰৰত্থানকরত্তা চ নিপ্পরিযাযদেসনায আগমনতোৰ ইধ নামং লভতি, ন ইতরেহীতি ৰুত্তং.

৩৫০. অনিমিত্তৰিপস্সনন্তি অনিচ্চানুপস্সনং. নিমিত্তধম্মেসূতি সমূহাদিঘনৰসেন চ সকিচ্চপরিচ্ছেদতায চ সপরিগ্গহেসু খন্ধেসু. অনিমিত্তৰিমোক্খোতি অনিচ্চানুপস্সনমাহ. এৰংসম্পদমিদন্তি কথমিধ উপমাসংসন্দনং হোতি. ন হি ছন্দচিত্তানং মগ্গসঙ্খাতঅধিপতিভাৰাভাৰো ৰিয সদ্ধিন্দ্রিযাধিকস্স অনিমিত্তৰিমোক্খস্স অনিমিত্তভাৰাভাৰো অত্থি, ন চ অমগ্গাধিপতীনং মগ্গাধিপতিনামদানাভাৰো ৰিয অনিমিত্তস্স অনিমিত্তনামদানাভাৰোতি সক্কা ৰত্তুং অনিমিত্তৰিমোক্খস্স অননিমিত্ততায অভাৰতো. মগ্গো অধিপতি এতেসন্তি চ মগ্গাধিপতিনোতি যুত্তো তত্থ ছন্দচিত্তেহি তংসম্পযুত্তানং মগ্গাধিপতিভাৰাভাৰো. ইধ পন মগ্গো অনিমিত্তং এতস্সাতি মগ্গানিমিত্তোতি অযমত্থো ন সম্ভৰতীতি ন তেন অমগ্গেন মগ্গস্স অনিমিত্তভাৰো ন যুজ্জতি, কিং ৰা এত্থ সামঞ্ঞং অধিপ্পেতন্তি. অমগ্গঙ্গমগ্গনামাভাৰো. যথা সতিপি অধিপতিভাৰে ছন্দচিত্তানং ন মগ্গাধিপতীতি মগ্গনামং, ন চ তেহি মগ্গস্স তেসং অমগ্গঙ্গত্তা, তথা সতিপি সদ্ধায আগমনভাৰেন তস্সা অনিমিত্তন্তি মগ্গনামং, ন চ তায মগ্গস্স তস্সা অমগ্গঙ্গত্তা. এৰং অনিমিত্তৰিপস্সনাযপি অনিমিত্তভাৰো নিপ্পরিযাযেন নত্থীতি দীপিতো হোতি.

ননু চ ইধ ঝানং সুঞ্ঞতাদিনামেন ৰুত্তং, ন মগ্গোতি চে? ন, মগ্গসম্পযোগতো ঝানস্স সুঞ্ঞতাদিনামকত্তা. সুত্তন্তপরিযাযেন সগুণারম্মণেহি ইধ অভিধম্মেপি নামং লভতীতি আহংসু. তস্মা পটিক্খিত্তা ‘‘ন পন লভন্তী’’তি. কিং কারণা? অভিধম্মে সরসং অনামসিত্ৰা পচ্চনীকতোৰ নামলাভাতি অধিপ্পাযো. যো হি সগুণারম্মণেহি নামলাভো, সো সরসপ্পধানো হোতি. সরসেনেৰ চ নামলাভে সব্বমগ্গানং সুঞ্ঞতাদিভাৰোতি ৰৰত্থানং ন সিযা. তস্মা অভিধম্মে সতিপি দ্ৰীহি নামলাভে পচ্চনীকতো নামৰৰত্থানকরং গহিতন্তি সগুণারম্মণেহি সুঞ্ঞতাপ্পণিহিতমগ্গা নামং ন লভন্তীতি আহ. অথ ৰা ন পন লভন্তীতি অঞ্ঞনিরপেক্খেহি সগুণারম্মণেহি ন লভন্তি. কিং কারণা? অভিধম্মে সরসপচ্চনীকেহি সহিতেহি নামলাভাতি অত্থো. পচ্চনীকঞ্হি ৰৰত্থানকরং অনপেক্খিত্ৰা কেৰলস্স সরসস্স নামহেতুভাৰো অভিধম্মে নত্থি অৰৰত্থানাপত্তিতো. তস্মা অত্তাভিনিৰেসপণিধিপটিপক্খৰিপস্সনানুলোমা মগ্গা সতিপি সরসন্তরে পচ্চনীকসহিতেন সরসেন নামং লভন্তি. অনিমিত্তমগ্গস্স পন ৰিপস্সনা নিমিত্তপটিপক্খা ন হোতি সযং নিমিত্তগ্গহণতো নিমিত্তগ্গহণানিৰারণাতি তদনুলোমমগ্গোপি ন নিমিত্তস্স পটিপক্খো. যদি সিযা, নিমিত্তগতৰিপস্সনাযপি পটিপক্খো সিযাতি. তস্মা ৰিজ্জমানোপি সরসো ৰৰত্থানকরপচ্চনীকাভাৰা অভিধম্মে অনিমিত্তন্তি নামদাযকো ন গহিতো. অনিচ্চানুপস্সনানুলোমো পন মগ্গো সুদ্ধিকপটিপদানযেযেৰ সঙ্গহিতোতি দট্ঠব্বো. তস্মা এৰ চ সো নযো ৰুত্তোতি. এৰন্তি যং ৰক্খতি ‘‘অনিচ্চতো ৰুট্ঠহন্তস্স মগ্গো অনিমিত্তো হোতী’’তি (ধ. স. অট্ঠ. ৩৫০), এৰং আহরিত্ৰা অট্ঠকথাচরিযেহি সো অনিমিত্তমগ্গো দীপিতোতি অত্থো.

ৰুট্ঠান…পে… কিমারম্মণাতি অনিচ্চাদিতো ৰুট্ঠহন্তস্স ৰুট্ঠানগামিনিযা লক্খণারম্মণত্তে সতি সঙ্খারেহি ৰুট্ঠানং ন সিযা, সঙ্খারারম্মণত্তে চ লক্খণপটিৰেধোতি মঞ্ঞমানো পুচ্ছতি. ‘‘অনিচ্চ’’ন্তিআদিনা সঙ্খারেসু পৰত্তমানেন ঞাণেন লক্খণানিপি পটিৰিদ্ধানি হোন্তি তদাকারসঙ্খারগহণতোতি আহ ‘‘লক্খণারম্মণা’’তি. সঙ্খারারম্মণা এৰ যথাৰুত্তাধিপ্পাযেন ‘‘লক্খণারম্মণা’’তি ৰুত্তাতি দস্সেন্তো ‘‘লক্খণং নামা’’তিআদিমাহ. অনিচ্চতা দুক্খতা অনত্ততাতি হি ৰিসুং গয্হমানং লক্খণং পঞ্ঞত্তিগতিকং পরমত্থতো অৰিজ্জমানং, অৰিজ্জমানত্তা এৰ পরিত্তাদিৰসেন নৰত্তব্বধম্মভূতং. তস্মা ৰিসুং গহেতব্বস্স লক্খণস্স পরমত্থতো অভাৰা ‘‘অনিচ্চং দুক্খমনত্তা’’তি সঙ্খারে সভাৰতো সল্লক্খেন্তোৰ লক্খণানি সল্লক্খেতি নামাতি আহ ‘‘যো পন অনিচ্চং দুক্খমনত্তাতি তীণি লক্খণানি সল্লক্খেতী’’তি. যস্মা চ অনিচ্চন্তিআদিনা সঙ্খারাৰ দিস্সমানা, তস্মা তে কণ্ঠে বদ্ধকুণপং ৰিয পটিনিস্সজ্জনীযা হোন্তি.

লোকুত্তরকুসলং

পকিণ্ণককথাৰণ্ণনা

তত্রাতি লোকুত্তরজ্ঝানে. অজ্ঝত্তঞ্চাতি উপড্ঢগাথায অভিনিৰিসিতব্বং ৰুট্ঠাতব্বং ৰিপস্সনাভূমিং পঞ্চধা উদ্দিসতি. সত্তঅট্ঠাদীনি অঙ্গানি সত্তট্ঠঙ্গানীতি আদিসদ্দস্স লোপো দট্ঠব্বো. নিমিত্তন্তি যতো ৰুট্ঠানং, তানি নিমিত্তপৰত্তানি নিমিত্তৰচনেনেৰ উদ্দিসতি. সঙ্খারুপেক্খাঞাণমেৰ অরিযমগ্গস্স বোজ্ঝঙ্গাদিৰিসেসং নিযমেতি. কস্মা? ততো ততো দুতিযাদিপাদকজ্ঝানতো উপ্পন্নস্স সসঙ্খারুপেক্খাঞাণস্স পাদকজ্ঝানাতিক্কন্তানং অঙ্গানং অসমাপজ্জিতুকামতাৰিরাগভাৰনাভাৰতো ইতরস্স চ অতব্ভাৰতো. তেসম্পি ৰাদেসু…পে… ৰিপস্সনাৰ নিযমেতীতি ৰেদিতব্বা. কস্মা? ৰিপস্সনানিযমেনেৰ হি পঠমত্থেরৰাদেপি অপাদকপঠমজ্ঝানপাদকমগ্গা পঠমজ্ঝানিকাৰ হোন্তি, ইতরে চ পাদকজ্ঝানৰিপস্সনানিযমেহি তংতংঝানিকা. এৰং সেসৰাদেসুপি ৰিপস্সনানিযমো যথাসম্ভৰং যোজেতব্বো.

পকিণ্ণকসঙ্খারেতি পাদকজ্ঝানতো অঞ্ঞসঙ্খারে. তেন পাদকজ্ঝানসঙ্খারেসু সম্মসিতেসু ৰত্তব্বমেৰ নত্থীতি দস্সেতি. তত্রাপীতি দুতিযত্থেরৰাদেপি. তংতংঝানিকতা তংতংসম্মসিতসঙ্খারৰিপস্সনানিযমেহি হোতি. তত্রাপি হি ৰিপস্সনা তংতংৰিরাগাৰিরাগভাৰনাভাৰেন সোমনস্সসহগতা উপেক্খাসহগতা চ হুত্ৰা ঝানঙ্গাদিনিযমং মগ্গস্স করোতীতি এৰং ৰিপস্সনানিযমো ৰুত্তনযেনেৰ ৰেদিতব্বো.

তন্তি তংতংঝানসদিসভৰনং. স্ৰাযমত্থো পাদকজ্ঝানসম্মসিতজ্ঝানুপনিস্সযেহি ৰিনা অজ্ঝাসযমত্তেন অসিজ্ঝনা উপনিস্সযেন ৰিনা সঙ্কপ্পমত্তেন সকদাগামিফলাদীনং অসিজ্ঝনদীপকেন নন্দকোৰাদেন (ম. নি. ৩.৩৯৮ আদযো) দীপেতব্বো. তত্থ হি সোতাপন্নাযপি পরিপুণ্ণসঙ্কপ্পভাৰং ৰদন্তেন ভগৰতা যস্স যস্স উপনিস্সযো অত্থি, তস্স তস্সেৰ অজ্ঝাসযো নিযামকো, নাঞ্ঞস্সাতি তেন তেন পরিপুণ্ণসঙ্কপ্পতা হোতি, ন ততো পরং সঙ্কপ্পসব্ভাৰেপি অসিজ্ঝনতোতি অযমত্থো দীপিতো হোতি. এৰমিধাপি যস্স যস্স দুতিযাদিঝানিকস্স মগ্গস্স যথাৰুত্তো উপনিস্সযো অত্থি, তস্স তস্সেৰ অজ্ঝাসযো নিযামকো, নাঞ্ঞস্স সতিপি তস্মিং অসিজ্ঝনতো. ইমস্মিং পন ৰাদে পাদকসম্মসিতজ্ঝানুপনিস্সযসব্ভাৰে অজ্ঝাসযো একন্তেন হোতি, তংতংফলূপনিস্সযসব্ভাৰে তংতংসঙ্কপ্পো ৰিযাতি তদভাৰাভাৰতো অজ্ঝাসযো নিযমেতীতি ৰুত্তং.

যস্মিং পন পাদকজ্ঝানং নত্থীতি চতুত্থজ্ঝানিকৰজ্জানং পাদকানি লোকিযজ্ঝানানি সন্ধায ৰুত্তং. অপ্পনাপ্পত্তি চ ওল়ারিকঙ্গাতিক্কমনুপনিস্সযাভাৰে পঞ্চহি অঙ্গেহি ৰিনা ন হোতীতি ‘‘সোমনস্সসহগতমগ্গো হোতী’’তি আহ. উপেক্খাসহগতমগ্গোতি এতেন চতুত্থজ্ঝানিকতাপি সমানা অনুসযসমুগ্ঘাটনসমত্থস্স ন সঙ্খারাৰসেসতাতি দস্সেতি. তে চ ৰাদা ন ৰিরুজ্ঝন্তি অজ্ঝাসযৰসেন পঞ্চমজ্ঝানিকতায পঠমাদিজ্ঝানিকতায চ সম্ভৰতোতি অধিপ্পাযো. অজ্ঝাসযো চ সাত্থকো হোতি, অঞ্ঞথা পাদকসম্মসিতজ্ঝানেহেৰ নিযমস্স সিদ্ধত্তা অজ্ঝাসযো নিযামকো ৰুচ্চমানো নিরত্থকো সিযাতি. ইধ পন অট্ঠসালিনিযা নিযামনে একন্তিকং ৰিপস্সনাসঙ্খাতং অত্থমেৰ উদ্ধরিত্ৰা ‘‘তেসম্পি ৰাদেসু অযং…পে… ৰিপস্সনাৰ নিযমেতী’’তি ৰদন্তেন তযোপেতে ৰাদে ৰিপস্সনাৰ নিযমেতীতি দস্সিতং. তংতংৰাদানঞ্হি ৰিপস্সনাসহিতানমেৰ সিদ্ধি, নাঞ্ঞথাতি দস্সিতন্তি.

পৰেধতীতি গোত্রভুস্স পচ্চযো ভৰিতুং ন সক্কোতীতি অত্থো. যদি পঞ্চমচিত্তক্খণে জৰনং পতিতং নাম হোতি, কথং তদা গোত্রভু তদনন্তরঞ্চ মগ্গো জৰনস্স পতিতক্খণে উপ্পজ্জতীতি? অপুব্বস্স জৰনন্তরস্স পতিততাভাৰতো. তদেৰ হি জৰনং অনেকক্খত্তুং পৰত্তমানং পতিতং সিযাতি, গোত্রভু পন আরম্মণন্তরে উপ্পন্নং অপুব্বং জৰনং, তথা মগ্গো ভূমন্তরতো চাতি. ননু চ সত্তমজৰনচেতনায বলৰতায উপপজ্জৰেদনীযভাৰো হোতি আনন্তরিযতাপীতি, তত্থাযং অধিপ্পাযো সিযা ‘‘পটিসন্ধিযা অনন্তরপচ্চযভাৰিনো ৰিপাকসন্তানস্স অনন্তরপচ্চযভাৰেন অন্তিমজৰনচেতনায সুসঙ্খতত্তা সা সত্তমজৰনচেতনা উপপজ্জৰেদনীযা আনন্তরিকা চ হোতি, ন অপতিতজৰনচেতনা ৰিয বলৰতাযা’’তি.

পুন অনুলোমং তং অনুবন্ধেয্যাতি গোত্রভুস্স হি সঙ্খারারম্মণত্তে সতি তদপি অনুলোমমেৰাতি পুরিমঅনুলোমং ৰিয তং তদপি অঞ্ঞং অনুলোমং অনুবন্ধেয্য, ন মগ্গোতি মগ্গৰুট্ঠানমেৰ চ ন ভৰেয্য অত্তনো সদিসালম্বনস্স আৰজ্জনট্ঠানিযস্স পচ্চযস্স অলাভা. অপ্পহীনভাৰেন পঞ্চসু উপাদানক্খন্ধেসু অনুসযিতা কিলেসা সা ভূমি এতেহি লদ্ধাতি কত্ৰা ভূমিলদ্ধা. ৰট্টং সিনোন্তি বন্ধন্তীতি কত্ৰা ৰট্টসেতূ চ, তেসং সমুগ্ঘাতকরণন্তিপি এতদেৰস্স লোভক্খন্ধাদিপদালনং ৰুচ্চতি. তন্তি পৰত্তং. একং ভৰন্তি অনাগামিনো অনেকক্খত্তুঞ্চ তত্থেৰ উপপজ্জন্তস্স হেট্ঠা অনাগমনৰসেন একো ভৰোতি গহেত্ৰা ৰুত্তং.

ইমস্স পনত্থস্সাতি যথাৰুত্তস্স উপাদিন্নকপৰত্ততো ৰুট্ঠানস্স. অপাযেসু সত্তমভৰতো উদ্ধং সুগতিযঞ্চ ৰিপাকদাযকস্স অভিসঙ্খারৰিঞ্ঞাণস্স পচ্চযঘাতো সোতাপত্তিমগ্গঞাণেন অভিসঙ্খারৰিঞ্ঞাণস্স নিরোধো দট্ঠব্বো. দ্ৰীসু ভৰেসূতি অনাগামিমগ্গে অভাৰিতে সকদাগামিস্স কামধাতুযং যে দ্ৰে ভৰা উপ্পজ্জেয্যুং, তেসূতি অত্থো. চলতীতি এতেন চলনসভাৰমেৰ দস্সেতি, ন অচলনাভাৰং, তস্মা অচলনং দস্সেত্ৰা পুন চলনং দস্সেতুং ‘‘তথাগতস্স হী’’তিআদিমাহ. যেপি ৰা কত্থচি চত্তারোপি মগ্গে সমানপটিপদে দিস্ৰা সভাৰতো অচলনমেৰ গণ্হেয্যুং, তেসং তংগহণনিৰারণত্থং ‘‘চলতী’’তি ৰুত্তং, ন চলনাৰধারণত্থন্তি যুত্তং উভযদস্সনং. অথ ৰা যদিপি কেসঞ্চি চত্তারোপি মগ্গা সমানপটিপদা, তথাপি কিলেসিন্দ্রিযেহি সিজ্ঝমানা পটিপদা তেসং ৰসেন চলনপকতিকা এৰাতি ‘‘চলতি’’চ্চেৰ ৰুত্তং, ন ‘‘ন চলতী’’তি.

লোকুত্তরকুসলপকিণ্ণককথাৰণ্ণনা নিট্ঠিতা.

পঠমমগ্গৰীসতিমহানযৰণ্ণনা

৩৫৭. যস্স পুব্বভাগে ‘‘মগ্গং ভাৰেমী’’তি অজ্ঝাসযো পৰত্তো, সো মগ্গং ভাৰেতি. এৰং সব্বত্থ অজ্ঝাসযৰিসেসেন তংতংভাৰনাৰিসেসো দট্ঠব্বো.

৩৫৮. ছন্দাধিপতেয্যন্তিআদীসু একচিত্তক্খণে ৰত্তমানেসু ধম্মেসু কথং ছন্দস্স তংসহজাতস্স অধিপতিভাৰো ৰীরিযাদীনঞ্চাতি? উপনিস্সযৰসেন. যস্স হি সচে ছন্দৰতো কুসলং নিপ্ফজ্জতি, ‘‘অহং নিপ্ফাদেস্সামী’’তি পৰত্তমানস্স কুসলং নিপ্ফন্নং, তস্স তংসহজাতো ছন্দো তেন পুরিমুপনিস্সযেন ৰিসিট্ঠো সহজাতধম্মে অত্তনো ৰসে ৰত্তেতি. তস্মিঞ্চ পৰত্তমানে তে পৰত্তন্তি, নিৰত্তমানে নিৰত্তন্তি, তদনুরূপবলা চ হোন্তি রাজপুরিসা ৰিযাতি. এৰং ৰীরিযাদীসু. সেসধম্মানং পন কত্থচি ৰুত্তপ্পকারপ্পৰত্তিসব্ভাৰেপি অতংসভাৰত্তা অধিপতিভাৰো নত্থীতি দট্ঠব্বো.

দুতিযমগ্গৰণ্ণনা

৩৬১. আ-কারস্স রস্সত্তং কত্ৰা অঞ্ঞিন্দ্রিযং ৰুত্তং, আ-কারো চ ধম্মমরিযাদত্থো.

ততিযচতুত্থমগ্গৰণ্ণনা

৩৬২. মগ্গঙ্গানি ন পূরেন্তি অকিচ্চকত্তা সম্মাদিট্ঠিযাতি অধিপ্পাযো. মারেন্তো গচ্ছতীতি হি মগ্গো, ন চেতায মারেতব্বং অত্থীতি. মানস্স দিট্ঠিসদিসা পৰত্তি অহমস্মীতি পৰত্তমানস্স দিট্ঠিট্ঠানে ঠানং. আলোকস্সেৰ পৰত্তিকালো ৰিযাতি চিরপ্পৰত্তিং সন্ধাযাহ. একদেসসামঞ্ঞেন হি যথাধিপ্পেতেন উপমা হোতীতি. খারে ৰাতি কট্ঠাদীনং খারচ্ছারিকাযং. সম্মদ্দিত্ৰাতি কিলেদেত্ৰা. ছন্দোতি তণ্হা. অনুসযোতি তণ্হা মানানুসযো চ. এতস্মিঞ্চ সুত্তে অসমূহতস্স গন্ধস্স সমুগ্ঘাটনং ৰিয অসমূহতমানাদিসমুগ্ঘাতং দস্সেন্তেন অঞ্ঞমঞ্ঞে কিলেসে পজহতীতি দস্সিতন্তি আনীতং, ন যথাৰুত্তনযেন উপমায ৰুত্তত্তাতি দট্ঠব্বং. নিরন্তরং পৰত্তমানে চিত্তে তস্স সংকিলেসৰোদানকরা সাৰজ্জানৰজ্জা চেতসিকা উপ্পজ্জমানা তস্সঙ্গভূতা অৰযৰা ৰিয হোন্তীতি ‘‘চিত্তঙ্গৰসেনা’’তি ৰুত্তং.

লোকুত্তরকুসলৰণ্ণনা নিট্ঠিতা.

কুসলকথাৰণ্ণনা নিট্ঠিতা.

অকুসলপদং

ধম্মুদ্দেসৰারো

পঠমচিত্তকথাৰণ্ণনা

৩৬৫. কুসলে ৰুত্তনযং অনুগন্ত্ৰা যথানুরূপং ৰেদিতব্বতায ‘‘ৰুত্তনযেনা’’তি আহ. গন্তব্বাভাৰতোতি বুজ্ঝিতব্বাভাৰতো. দিট্ঠিযা গতমত্তন্তি দিট্ঠিযা গতিমত্তং গহণমত্তং. আসন্নকারণত্তা অযোনিসোমনসিকারস্স ৰিসুং গহণং একন্তকারণত্তা চ. সতিসংৰরোতি ইধ সীতাদীহি ফুট্ঠস্স অপ্পমজ্জনং খমনং দট্ঠব্বং. পহানসংৰরোতি ৰীরিযসংৰরো.

অস্সাদদস্সনন্তি অস্সাদদিট্ঠি. ফলট্ঠেন পচ্চুপট্ঠানেন অসম্মাপটিপত্তিপচ্চুপট্ঠানোমোহো, সম্মাপটিপত্তিপটিপক্খভাৰগ্গহণাকারো ৰা. সব্বস্স লোভস্স অভিজ্ঝাভাৰে সতিপি ৰিসেসযুত্তায অভিজ্ঝায কম্মপথপ্পত্তায ইধুপ্পজ্জমানায লক্খণাদিং দস্সেতুং ‘‘সা পরসম্পত্তীন’’ন্তিআদিমাহ. অত্তনো পরিণামনস্স পুরেচারিকা তণ্হাভিরতি অভিরতি.

অনুপপরিক্খা মোহো. মোহৰসেন হি দিট্ঠিৰসেন ৰা অৰত্থুস্মিং সানুনযো অধিমোক্খো উপ্পজ্জতীতি. অসতিযচিত্তেতি অহিরিকাদীহি আরক্খরহিতচিত্তে. সতিরহিতত্তা সতিপটিপক্খত্তা চাতি এতেন সতিরহিতা সতিপটিপক্খা চ অকুসলা খন্ধা এৰ মিচ্ছাসতীতি দস্সেতি. তে পন উপনাহাদিপ্পৰত্তিযং চিরকতাদিসল্লক্খণে পটুসঞ্ঞাসম্পযুত্তা দট্ঠব্বা. সদরথাদিভাৰো অৰিসেসেন কিলেসসম্পযোগতো ৰুত্তো লহুতাদিএকন্তপটিপক্খানং থিনমিদ্ধাদীনং কেসঞ্চি ইধ অভাৰা. অৰূপসমোতি অসন্নিসিন্নসব্ভাৰমাহ. অনৰট্ঠানরসন্তি চলনকিচ্চং. চেতসো অৰূপসমেতি নিপ্ফাদেতব্বে পযোজনে ভুম্মং, অৰূপসমপচ্চযভূতং আরম্মণং ৰা ‘‘অৰূপসমো’’তি ৰুত্তং.

ধম্মুদ্দেসৰারকথাৰণ্ণনা নিট্ঠিতা.

নিদ্দেসৰারকথাৰণ্ণনা

৩৭৭. সহজাতধম্মেসু অকম্পনং ন কোসজ্জেসু অকম্পনং ৰিয তপ্পটিপক্খভাৰতো দট্ঠব্বং, তংতংপাপকিরিযায উস্সহনৰসেন পন থিরতা তত্থ অকম্পনং.

৩৮১. দিট্ঠিযা ৰিরূপং ফন্দিতন্তি তথা তথা সস্সতাদিৰসেন পৰত্তা দিট্ঠি এৰ ৰুচ্চতি. তরন্তীতি তিত্থে ৰিয পিলৰন্তি. ৰিপরিযেসতোতি ৰত্থুস্স ৰিপরীততো.

৩৯০. সভাৰপটিচ্ছাদনৰসেন পকতিঅত্তাদিঅসন্তগহণস্স অনিচ্চাদীনং নিচ্চাদিৰিসমগহণস্স চ সঞ্ঞাদিৰিপরিযেসস্স নিস্সযত্তা ‘‘অসন্তং অসমঞ্চ বুজ্ঝতী’’তি ৰুত্তং.

দুতিযচিত্তৰণ্ণনা

৩৯৯. কিঞ্চাপি…পে… পরামসন্তস্স উপ্পজ্জতীতি পুরিমচিত্তেন অৰিসেসং দস্সেতি. অনুস্সাহনাৰসীদনভাৰেন সংহতভাৰো থিনং.

ততিযচিত্তৰণ্ণনা

৪০০. ইধ মানেন সদ্ধিং পঞ্চ অপণ্ণকঙ্গানীতি অৰিরজ্ঝনকঙ্গানি উপ্পত্তিঅরহঙ্গানি হোন্তীতি অত্থো দট্ঠব্বো. মানস্স অনিযতত্তা ন নিযতযেৰাপনকাতি. পট্ঠানে হি ‘‘সংযোজনং ধম্মং পটিচ্চ সংযোজনো ধম্মো উপ্পজ্জতি হেতুপচ্চযা’’তি (পট্ঠা. ৩.৪.১) এত্থ ‘‘চতুক্খত্তুং কামরাগেন তিক্খত্তুং পটিঘেন চ মানো ৰিচিকিচ্ছা ভৰরাগো তযোপেতে সকদাগামিনো সংযোজনানং সংযোজনেহি দসৰিধা যোজনা’’তি দস্সিতায দসৰিধায যোজনায ‘‘কামরাগসংযোজনং পটিচ্চ মানসংযোজনং অৰিজ্জাসংযোজন’’ন্তি ৰত্ৰা ‘‘কামরাগসংযোজনং পটিচ্চ অৰিজ্জাসংযোজন’’ন্তি ‘‘মানসংযোজনং পটিচ্চ ভৰরাগসংযোজনং অৰিজ্জাসংযোজন’’ন্তি চ ৰত্ৰা ‘‘ভৰরাগসংযোজনং পটিচ্চ অৰিজ্জাসংযোজন’’ন্তি ৰুত্তাহি যোজনাহি মানস্স অনিযতভাৰো পকাসিতো, তথা কিলেসদুকেপি. ইধ চ ৰক্খতি ‘‘দসৰিধা সংযোজনানং যোজনা, তথা দসৰিধা কিলেসান’’ন্তি চ. উন্নমনৰসেনেৰ সম্পগ্গহরসো, ন ৰীরিযং ৰিয তংতংকিচ্চসাধনে অব্ভুস্সাহনৰসেন. ওমানস্সপি অত্তানং অৰংকত্ৰা গহণং সম্পগ্গহোতি দট্ঠব্বো.

চতুত্থচিত্তৰণ্ণনা

৪০২. পরিহরণত্থং ৰিক্খিত্তা হুত্ৰা উস্সাহং জনেন্তা ‘‘পরিহরণত্থং সউস্সাহা’’তি ৰুত্তা, তেসং.

নৰমচিত্তৰণ্ণনা

৪১৩. ৰিসপ্পনঅনিট্ঠরূপসমুট্ঠানৰসেন অত্তনো পৰত্তিআকারৰসেন চ ৰিসপ্পনরসো. দোসো উপযোগফলেসু অনিট্ঠত্তা ৰিসসংসট্ঠপূতিমুত্তং ৰিয দট্ঠব্বো. অনভিরতিরসাতি এৰংপকারেসু পটিক্খেপেন রসৰচনেসু তংতংপটিপক্খকিচ্চগহণং দট্ঠব্বং. কটুকাকারগতি কটুকঞ্চুকতা, অত্তসম্পত্তি আৰাসাদি, পরাযত্ততায দাসব্যং ৰিয দট্ঠব্বং. যথা হি দাসব্যে সতি দাসো পরাযত্তো হোতি, এৰং কুক্কুচ্চে সতি তংসমঙ্গী. ন হি সো অত্তনো ধম্মতায পৰত্তিতুং সক্কোতি কুসলেতি. অথ ৰা কতাকতাকুসলকুসলানুসোচনে আযত্ততায তদুভযৰসেন কুক্কুচ্চেন তংসমঙ্গী হোতীতি দাসব্যং ৰিয তং হোতি.

৪১৮. ৰিরুদ্ধাকারোতি ৰিরুদ্ধস্স পুগ্গলস্স, চিত্তস্স ৰা আকারো ৰিরুদ্ধভাৰো. তেন ৰিরুজ্ঝনং ৰিরোধোতি দস্সেতি. ৰচনন্তি এতং নিদস্সনমত্তং দট্ঠব্বং. সব্বমেৰ হি কিচ্চং এতেন করিযমানং সুরোপিতং সুজনিতং ন হোতীতি. রোপসদ্দৰচনত্থমেৰ কেচি ৰণ্ণেন্তি. তং অপ্পমাণন্তি কোধস্স তথাপৰত্তনসভাৰাভাৰা অঞ্ঞেন কেনচি কারণেন পরিপুণ্ণতা সিযাতি সন্ধায ৰুত্তং.

একাদসমচিত্তৰণ্ণনা

৪২২. ৰিগতা চিকিচ্ছাতি চিকিচ্ছিতুং দুক্করতায ৰুত্তং, ন সব্বথা চিকিচ্ছাভাৰা ৰিচিকিচ্ছাযাতি তদত্থং দস্সেতি.

৪২৪. নিচ্ছযাভাৰা অসণ্ঠহনতো চেতসো পৰত্তিপচ্চযমত্ততায ‘‘পৰত্তিট্ঠিতিমত্ত’’ন্তি ৰুত্তং.

৪২৫. একং আকারং গন্তুং অসমত্থতায অত্তনো আমুখং সপ্পনতো ওসক্কতি.

দ্ৰাদসমচিত্তৰণ্ণনা