৯. কাল়িগোধসুত্তং

১০৩৫. একং সমযং ভগৰা সক্কেসু ৰিহরতি কপিলৰত্থুস্মিং নিগ্রোধারামে. অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায যেন কাল়িগোধায সাকিযানিযা নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. অথ খো কাল়িগোধা সাকিযানী যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো কাল়িগোধং সাকিযানিং ভগৰা এতদৰোচ –

‘‘চতূহি খো, গোধে, ধম্মেহি সমন্নাগতা অরিযসাৰিকা সোতাপন্না হোতি অৰিনিপাতধম্মা নিযতা সম্বোধিপরাযণা. কতমেহি চতূহি? ইধ, গোধে, অরিযসাৰিকা বুদ্ধে অৰেচ্চপ্পসাদেন সমন্নাগতা হোতি – ইতিপি সো ভগৰা…পে… সত্থা দেৰমনুস্সানং বুদ্ধো ভগৰাতি. ধম্মে…পে… সঙ্ঘে…পে… ৰিগতমলমচ্ছেরেন চেতসা অগারং অজ্ঝাৰসতি মুত্তচাগা পযতপাণিনী [পযতপাণী (সব্বত্থ) ৩.৩০ মোগ্গল্লানসুত্তং ওলোকেতব্বং] ৰোস্সগ্গরতা যাচযোগা দানসংৰিভাগরতা. ইমেহি খো, গোধে, চতূহি ধম্মেহি সমন্নাগতা অরিযসাৰিকা সোতাপন্না হোতি অৰিনিপাতধম্মা নিযতা সম্বোধিপরাযণা’’তি.

‘‘যানিমানি, ভন্তে, ভগৰতা চত্তারি সোতাপত্তিযঙ্গানি দেসিতানি, সংৰিজ্জন্তে তে ধম্মা মযি, অহঞ্চ তেসু ধম্মেসু সন্দিস্সামি. অহঞ্হি, ভন্তে, বুদ্ধে অৰেচ্চপ্পসাদেন সমন্নাগতা – ইতিপি সো ভগৰা…পে… সত্থা দেৰমনুস্সানং বুদ্ধো ভগৰাতি. ধম্মে…পে… সঙ্ঘে…পে… যং খো পন কিঞ্চি কুলে দেয্যধম্মং সব্বং তং অপ্পটিৰিভত্তং সীলৰন্তেহি কল্যাণধম্মেহী’’তি. ‘‘লাভা তে, গোধে, সুলদ্ধং তে, গোধে! সোতাপত্তিফলং তযা, গোধে, ব্যাকত’’ন্তি. নৰমং.