১০. নন্দিযসক্কসুত্তং

১০৩৬. একং সমযং ভগৰা সক্কেসু ৰিহরতি কপিলৰত্থুস্মিং নিগ্রোধারামে. অথ খো নন্দিযো সক্কো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো নন্দিযো সক্কো ভগৰন্তং এতদৰোচ – ‘‘যস্সেৰ নু খো, ভন্তে, অরিযসাৰকস্স চত্তারি সোতাপত্তিযঙ্গানি সব্বেন সব্বং সব্বথা সব্বং নত্থি স্ৰেৰ নু খো, ভন্তে, অরিযসাৰকো পমাদৰিহারী’’তি.

‘‘‘যস্স খো, নন্দিয, চত্তারি সোতাপত্তিযঙ্গানি সব্বেন সব্বং সব্বথা সব্বং নত্থি তমহং বাহিরো পুথুজ্জনপক্খে ঠিতো’তি ৰদামি. অপি চ, নন্দিয, যথা অরিযসাৰকো পমাদৰিহারী চেৰ হোতি, অপ্পমাদৰিহারী চ তং সুণাহি, সাধুকং মনসি করোহি; ভাসিস্সামী’’তি. ‘‘এৰং, ভন্তে’’তি খো নন্দিযো সক্কো ভগৰতো পচ্চস্সোসি. ভগৰা এতদৰোচ –

‘‘কথঞ্চ, নন্দিয, অরিযসাৰকো পমাদৰিহারী হোতি? ইধ নন্দিয, অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ইতিপি সো ভগৰা…পে… সত্থা দেৰমনুস্সানং বুদ্ধো ভগৰাতি. সো তেন বুদ্ধে অৰেচ্চপ্পসাদেন সন্তুট্ঠো ন উত্তরি ৰাযমতি দিৰা পৰিৰেকায, রত্তিং পটিসল্লানায. তস্স এৰং পমত্তস্স ৰিহরতো পামোজ্জং ন হোতি. পামোজ্জে অসতি, পীতি ন হোতি. পীতিযা অসতি, পস্সদ্ধি ন হোতি. পস্সদ্ধিযা অসতি, দুক্খং ৰিহরতি. দুক্খিনো চিত্তং ন সমাধিযতি. অসমাহিতে চিত্তে ধম্মা ন পাতুভৰন্তি. ধম্মানং অপাতুভাৰা পমাদৰিহারী ত্ৰেৰ সঙ্খ্যং গচ্ছতি.

‘‘পুন চপরং, নন্দিয, অরিযসাৰকো ধম্মে…পে… সঙ্ঘে…পে… অরিযকন্তেহি সীলেহি সমন্নাগতো হোতি অখণ্ডেহি…পে… সমাধিসংৰত্তনিকেহি. সো তেহি অরিযকন্তেহি সীলেহি সন্তুট্ঠো ন উত্তরি ৰাযমতি দিৰা পৰিৰেকায রত্তিং পটিসল্লানায. তস্স এৰং পমত্তস্স ৰিহরতো পামোজ্জং ন হোতি. পামোজ্জে অসতি, পীতি ন হোতি. পীতিযা অসতি, পস্সদ্ধি ন হোতি. পস্সদ্ধিযা অসতি, দুক্খং ৰিহরতি. দুক্খিনো চিত্তং ন সমাধিযতি. অসমাহিতে চিত্তে ধম্মা ন পাতুভৰন্তি. ধম্মানং অপাতুভাৰা পমাদৰিহারী ত্ৰেৰ সঙ্খ্যং গচ্ছতি. এৰং খো, নন্দিয, অরিযসাৰকো পমাদৰিহারী হোতি.

‘‘কথঞ্চ, নন্দিয, অরিযসাৰকো অপ্পমাদৰিহারী হোতি? ইধ, নন্দিয, অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ইতিপি সো ভগৰা…পে… সত্থা দেৰমনুস্সানং বুদ্ধো ভগৰাতি. সো তেন বুদ্ধে অৰেচ্চপ্পসাদেন অসন্তুট্ঠো উত্তরি ৰাযমতি দিৰা পৰিৰেকায রত্তিং পটিসল্লানায. তস্স এৰং অপ্পমত্তস্স ৰিহরতো পামোজ্জং জাযতি. পমুদিতস্স পীতি জাযতি. পীতিমনস্স কাযো পস্সম্ভতি. পস্সদ্ধকাযো সুখং ৰেদিযতি. সুখিনো চিত্তং সমাধিযতি. সমাহিতে চিত্তে ধম্মা পাতুভৰন্তি. ধম্মানং পাতুভাৰা অপ্পমাদৰিহারী ত্ৰেৰ সঙ্খ্যং গচ্ছতি.

‘‘পুন চপরং, নন্দিয, অরিযসাৰকো ধম্মে…পে… সঙ্ঘে…পে… অরিযকন্তেহি সীলেহি সমন্নাগতো হোতি অখণ্ডেহি…পে… সমাধিসংৰত্তনিকেহি. সো তেহি অরিযকন্তেহি সীলেহি অসন্তুট্ঠো উত্তরি ৰাযমতি দিৰা পৰিৰেকায রত্তিং পটিসল্লানায. তস্স এৰং অপ্পমত্তস্স ৰিহরতো পামোজ্জং জাযতি. পমুদিতস্স পীতি জাযতি. পীতিমনস্স কাযো পস্সম্ভতি. পস্সদ্ধকাযো সুখং ৰেদিযতি. সুখিনো চিত্তং সমাধিযতি. সমাহিতে চিত্তে ধম্মা পাতুভৰন্তি. ধম্মানং পাতুভাৰা অপ্পমাদৰিহারী ত্ৰেৰ সঙ্খ্যং গচ্ছতি. এৰং খো, নন্দিয, অরিযসাৰকো অপ্পমাদৰিহারী হোতী’’তি. দসমং.

পুঞ্ঞাভিসন্দৰগ্গো চতুত্থো.

তস্সুদ্দানং –

অভিসন্দা তযো ৰুত্তা, দুৰে দেৰপদানি চ;

সভাগতং মহানামো, ৰস্সং কাল়ী চ নন্দিযাতি.