১২. খোমদুস্সসুত্তং

২০৮. এৰং মে সুতং – একং সমযং ভগৰা সক্কেসু ৰিহরতি খোমদুস্সং নামং সক্যানং নিগমো. অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায খোমদুস্সং নিগমং পিণ্ডায পাৰিসি. তেন খো পন সমযেন খোমদুস্সকা ব্রাহ্মণগহপতিকা সভাযং সন্নিপতিতা হোন্তি কেনচিদেৰ করণীযেন, দেৰো চ একমেকং ফুসাযতি. অথ খো ভগৰা যেন সা সভা তেনুপসঙ্কমি. অদ্দসংসু খোমদুস্সকা ব্রাহ্মণগহপতিকা ভগৰন্তং দূরতোৰ আগচ্ছন্তং. দিস্ৰান এতদৰোচুং – ‘‘কে চ মুণ্ডকা সমণকা, কে চ সভাধম্মং জানিস্সন্তী’’তি? অথ খো ভগৰা খোমদুস্সকে ব্রাহ্মণগহপতিকে গাথায অজ্ঝভাসি –

‘‘নেসা সভা যত্থ ন সন্তি সন্তো,

সন্তো ন তে যে ন ৰদন্তি ধম্মং;

রাগঞ্চ দোসঞ্চ পহায মোহং,

ধম্মং ৰদন্তা চ ভৰন্তি সন্তো’’তি.

এৰং ৰুত্তে, খোমদুস্সকা ব্রাহ্মণগহপতিকা ভগৰন্তং এতদৰোচুং – ‘‘অভিক্কন্তং, ভো গোতম, অভিক্কন্তং, ভো গোতম; সেয্যথাপি, ভো গোতম, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য – চক্খুমন্তো রূপানি দক্খন্তীতি, এৰমেৰং ভোতা গোতমেন অনেকপরিযাযেন ধম্মো পকাসিতো. এতে মযং ভৰন্তং গোতমং সরণং গচ্ছাম ধম্মঞ্চ ভিক্খুসঙ্ঘঞ্চ. উপাসকে নো ভৰং গোতমো ধারেতু অজ্জতগ্গে পাণুপেতে সরণং গতে’’তি.

উপাসকৰগ্গো দুতিযো.

তস্সুদ্দানং –

কসি উদযো দেৰহিতো, অঞ্ঞতরমহাসালং;

মানথদ্ধং পচ্চনীকং, নৰকম্মিককট্ঠহারং;

মাতুপোসকং ভিক্খকো, সঙ্গারৰো চ খোমদুস্সেন দ্ৰাদসাতি.

ব্রাহ্মণসংযুত্তং সমত্তং.