নমো তস্স ভগৰতো অরহতো সম্মাসম্বুদ্ধস্স

সংযুত্তনিকাযো

সগাথাৰগ্গো

১. দেৰতাসংযুত্তং

১. নল়ৰগ্গো

১. ওঘতরণসুত্তং

১. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো অঞ্ঞতরা দেৰতা অভিক্কন্তায রত্তিযা অভিক্কন্তৰণ্ণা কেৰলকপ্পং জেতৰনং ওভাসেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতা খো সা দেৰতা ভগৰন্তং এতদৰোচ – ‘‘‘কথং নু ত্ৰং, মারিস, ওঘমতরী’তি? ‘অপ্পতিট্ঠং খ্ৰাহং, আৰুসো, অনাযূহং ওঘমতরি’ন্তি. ‘যথা কথং পন ত্ৰং, মারিস, অপ্পতিট্ঠং অনাযূহং ওঘমতরী’তি? ‘যদাখ্ৰাহং, আৰুসো, সন্তিট্ঠামি তদাস্সু সংসীদামি; যদাখ্ৰাহং, আৰুসো, আযূহামি তদাস্সু নিব্বুয্হামি [নিৰুয্হামি (স্যা. কং. ক.)]. এৰং খ্ৰাহং, আৰুসো, অপ্পতিট্ঠং অনাযূহং ওঘমতরি’’’ন্তি.

‘‘চিরস্সং ৰত পস্সামি, ব্রাহ্মণং পরিনিব্বুতং;

অপ্পতিট্ঠং অনাযূহং, তিণ্ণং লোকে ৰিসত্তিক’’ন্তি. –

ইদমৰোচ সা দেৰতা. সমনুঞ্ঞো সত্থা অহোসি. অথ খো সা দেৰতা – ‘‘সমনুঞ্ঞো মে সত্থা’’তি ভগৰন্তং অভিৰাদেত্ৰা পদক্খিণং কত্ৰা তত্থেৰন্তরধাযীতি.

২. নিমোক্খসুত্তং

২. সাৰত্থিনিদানং. অথ খো অঞ্ঞতরা দেৰতা অভিক্কন্তায রত্তিযা অভিক্কন্তৰণ্ণা কেৰলকপ্পং জেতৰনং ওভাসেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতা খো সা দেৰতা ভগৰন্তং এতদৰোচ –

‘‘জানাসি নো ত্ৰং, মারিস, সত্তানং নিমোক্খং পমোক্খং ৰিৰেক’’ন্তি?

‘‘জানামি খ্ৰাহং, আৰুসো, সত্তানং নিমোক্খং পমোক্খং ৰিৰেক’’ন্তি.

‘‘যথা কথং পন ত্ৰং, মারিস, জানাসি সত্তানং নিমোক্খং পমোক্খং ৰিৰেক’’ন্তি?

‘‘নন্দীভৰপরিক্খযা [নন্দিভৰপরিক্খযা (স্যা. কং.)], সঞ্ঞাৰিঞ্ঞাণসঙ্খযা, ৰেদনানং নিরোধা উপসমা – এৰং খ্ৰাহং, আৰুসো, জানামি সত্তানং নিমোক্খং পমোক্খং ৰিৰেক’’ন্তি.

৩. উপনীযসুত্তং

৩. সাৰত্থিনিদানং. একমন্তং ঠিতা খো সা দেৰতা ভগৰতো সন্তিকে ইমং গাথং অভাসি –

‘‘উপনীযতি জীৰিতমপ্পমাযু,

জরূপনীতস্স ন সন্তি তাণা;

এতং ভযং মরণে পেক্খমানো,

পুঞ্ঞানি কযিরাথ সুখাৰহানী’’তি.

‘‘উপনীযতি জীৰিতমপ্পমাযু,

জরূপনীতস্স ন সন্তি তাণা;

এতং ভযং মরণে পেক্খমানো,

লোকামিসং পজহে সন্তিপেক্খো’’তি.

৪. অচ্চেন্তিসুত্তং

৪. সাৰত্থিনিদানং. একমন্তং ঠিতা খো সা দেৰতা ভগৰতো সন্তিকে ইমং গাথং অভাসি –

‘‘অচ্চেন্তি কালা তরযন্তি রত্তিযো,

ৰযোগুণা অনুপুব্বং জহন্তি;

এতং ভযং মরণে পেক্খমানো,

পুঞ্ঞানি কযিরাথ সুখাৰহানী’’তি.

‘‘অচ্চেন্তি কালা তরযন্তি রত্তিযো,

ৰযোগুণা অনুপুব্বং জহন্তি;

এতং ভযং মরণে পেক্খমানো,

লোকামিসং পজহে সন্তিপেক্খো’’তি.

৫. কতিছিন্দসুত্তং

৫. সাৰত্থিনিদানং. একমন্তং ঠিতা খো সা দেৰতা ভগৰতো সন্তিকে ইমং গাথং অভাসি –

‘‘কতি ছিন্দে কতি জহে, কতি চুত্তরি ভাৰযে;

কতি সঙ্গাতিগো ভিক্খু, ওঘতিণ্ণোতি ৰুচ্চতী’’তি.

‘‘পঞ্চ ছিন্দে পঞ্চ জহে, পঞ্চ চুত্তরি ভাৰযে;

পঞ্চ সঙ্গাতিগো ভিক্খু, ওঘতিণ্ণোতি ৰুচ্চতী’’তি.

৬. জাগরসুত্তং

৬. সাৰত্থিনিদানং. একমন্তং ঠিতা খো সা দেৰতা ভগৰতো সন্তিকে ইমং গাথং অভাসি –

‘‘কতি জাগরতং সুত্তা, কতি সুত্তেসু জাগরা;

কতিভি [কতীহি (সী.)] রজমাদেতি, কতিভি [কতীহি (সী.)] পরিসুজ্ঝতী’’তি.

‘‘পঞ্চ জাগরতং সুত্তা, পঞ্চ সুত্তেসু জাগরা;

পঞ্চভি [পঞ্চহি (সী.)] রজমাদেতি, পঞ্চভি [পঞ্চহি (সী.)] পরিসুজ্ঝতী’’তি.

৭. অপ্পটিৰিদিতসুত্তং

৭. সাৰত্থিনিদানং. একমন্তং ঠিতা খো সা দেৰতা ভগৰতো সন্তিকে ইমং গাথং অভাসি –

‘‘যেসং ধম্মা অপ্পটিৰিদিতা, পরৰাদেসু নীযরে [নিয্যরে (ক.)];

সুত্তা তে নপ্পবুজ্ঝন্তি, কালো তেসং পবুজ্ঝিতু’’ন্তি.

‘‘যেসং ধম্মা সুপ্পটিৰিদিতা, পরৰাদেসু ন নীযরে;

তে সম্বুদ্ধা সম্মদঞ্ঞা, চরন্তি ৰিসমে সম’’ন্তি.

৮. সুসম্মুট্ঠসুত্তং

৮. সাৰত্থিনিদানং. একমন্তং ঠিতা খো সা দেৰতা ভগৰতো সন্তিকে ইমং গাথং অভাসি –

‘‘যেসং ধম্মা সুসম্মুট্ঠা, পরৰাদেসু নীযরে;

সুত্তা তে নপ্পবুজ্ঝন্তি, কালো তেসং পবুজ্ঝিতু’’ন্তি.

‘‘যেসং ধম্মা অসম্মুট্ঠা, পরৰাদেসু ন নীযরে;

তে সম্বুদ্ধা সম্মদঞ্ঞা, চরন্তি ৰিসমে সম’’ন্তি.

৯. মানকামসুত্তং

৯. সাৰত্থিনিদানং. একমন্তং ঠিতা খো সা দেৰতা ভগৰতো সন্তিকে ইমং গাথং অভাসি –

‘‘ন মানকামস্স দমো ইধত্থি,

ন মোনমত্থি অসমাহিতস্স;

একো অরঞ্ঞে ৰিহরং পমত্তো,

ন মচ্চুধেয্যস্স তরেয্য পার’’ন্তি.

‘‘মানং পহায সুসমাহিতত্তো,

সুচেতসো সব্বধি ৰিপ্পমুত্তো;

একো অরঞ্ঞে ৰিহরং অপ্পমত্তো,

স মচ্চুধেয্যস্স তরেয্য পার’’ন্তি.

১০. অরঞ্ঞসুত্তং

১০. সাৰত্থিনিদানং. একমন্তং ঠিতা খো সা দেৰতা ভগৰন্তং গাথায অজ্ঝভাসি –

‘‘অরঞ্ঞে ৰিহরন্তানং, সন্তানং ব্রহ্মচারিনং;

একভত্তং ভুঞ্জমানানং, কেন ৰণ্ণো পসীদতী’’তি.

‘‘অতীতং নানুসোচন্তি, নপ্পজপ্পন্তি নাগতং;

পচ্চুপ্পন্নেন যাপেন্তি, তেন ৰণ্ণো পসীদতি’’.

‘‘অনাগতপ্পজপ্পায, অতীতস্সানুসোচনা;

এতেন বালা সুস্সন্তি, নল়োৰ হরিতো লুতো’’তি.

নল়ৰগ্গো পঠমো.

তস্সুদ্দানং –

ওঘং নিমোক্খং উপনেয্যং, অচ্চেন্তি কতিছিন্দি চ;

জাগরং অপ্পটিৰিদিতা, সুসম্মুট্ঠা মানকামিনা;

অরঞ্ঞে দসমো ৰুত্তো, ৰগ্গো তেন পৰুচ্চতি.

২. নন্দনৰগ্গো

১. নন্দনসুত্তং

১১. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘ভূতপুব্বং, ভিক্খৰে, অঞ্ঞতরা তাৰতিংসকাযিকা দেৰতা নন্দনে ৰনে অচ্ছরাসঙ্ঘপরিৰুতা দিব্বেহি পঞ্চহি কামগুণেহি সমপ্পিতা সমঙ্গীভূতা পরিচারিযমানা [পরিচারিযমানা (স্যা. কং. ক.)] তাযং ৰেলাযং ইমং গাথং অভাসি –

‘‘ন তে সুখং পজানন্তি, যে ন পস্সন্তি নন্দনং;

আৰাসং নরদেৰানং, তিদসানং যসস্সিন’’ন্তি.

‘‘এৰং ৰুত্তে, ভিক্খৰে, অঞ্ঞতরা দেৰতা তং দেৰতং গাথায পচ্চভাসি –

‘‘ন ত্ৰং বালে পজানাসি, যথা অরহতং ৰচো;

অনিচ্চা সব্বসঙ্খারা [সব্বে সঙ্খারা (সী. স্যা. কং.)], উপ্পাদৰযধম্মিনো;

উপ্পজ্জিত্ৰা নিরুজ্ঝন্তি, তেসং ৰূপসমো সুখো’’তি.

২. নন্দতিসুত্তং

১২. সাৰত্থিনিদানং. একমন্তং ঠিতা খো সা দেৰতা ভগৰতো সন্তিকে ইমং গাথং অভাসি –

‘‘নন্দতি পুত্তেহি পুত্তিমা,

গোমা [গোমিকো (সী. স্যা. কং. পী.)] গোহি তথেৰ নন্দতি;

উপধীহি নরস্স নন্দনা,

ন হি সো নন্দতি যো নিরূপধী’’তি.

‘‘সোচতি পুত্তেহি পুত্তিমা,

গোমা গোহি তথেৰ সোচতি;

উপধীহি নরস্স সোচনা,

ন হি সো সোচতি যো নিরূপধী’’তি.

৩. নত্থিপুত্তসমসুত্তং

১৩. সাৰত্থিনিদানং. একমন্তং ঠিতা খো সা দেৰতা ভগৰতো সন্তিকে ইমং গাথং অভাসি –

‘‘নত্থি পুত্তসমং পেমং, নত্থি গোসমিতং ধনং;

নত্থি সূরিযসমা [সুরিযসমা (সী. স্যা. কং. পী.)] আভা, সমুদ্দপরমা সরা’’তি.

‘‘নত্থি অত্তসমং পেমং, নত্থি ধঞ্ঞসমং ধনং;

নত্থি পঞ্ঞাসমা আভা, ৰুট্ঠি ৰে পরমা সরা’’তি.

৪. খত্তিযসুত্তং

১৪. ‘‘খত্তিযো দ্ৰিপদং সেট্ঠো, বলীবদ্দো [বলিৰদ্দো (সী. পী.), বলিবদ্দো (স্যা. কং. ক.)] চতুপ্পদং.

কোমারী সেট্ঠা ভরিযানং, যো চ পুত্তান পুব্বজো’’তি.

‘‘সম্বুদ্ধো দ্ৰিপদং সেট্ঠো, আজানীযো চতুপ্পদং;

সুস্সূসা সেট্ঠা ভরিযানং, যো চ পুত্তানমস্সৰো’’তি.

৫. সণমানসুত্তং

১৫. ‘‘ঠিতে মজ্ঝন্হিকে [মজ্ঝন্তিকে (সব্বত্থ)] কালে, সন্নিসীৰেসু পক্খিসু.

সণতেৰ ব্রহারঞ্ঞং [মহারঞ্ঞং (ক. সী. স্যা. কং. ক.)], তং ভযং পটিভাতি ম’’ন্তি.

‘‘ঠিতে মজ্ঝন্হিকে কালে, সন্নিসীৰেসু পক্খিসু;

সণতেৰ ব্রহারঞ্ঞং, সা রতি পটিভাতি ম’’ন্তি.

৬. নিদ্দাতন্দীসুত্তং

১৬. ‘‘নিদ্দা তন্দী ৰিজম্ভিতা [তন্দি ৰিজম্ভিকা (সী. পী.)], অরতী ভত্তসম্মদো.

এতেন নপ্পকাসতি, অরিযমগ্গো ইধ পাণিন’’ন্তি.

‘‘নিদ্দং তন্দিং ৰিজম্ভিতং, অরতিং ভত্তসম্মদং;

ৰীরিযেন [ৰিরিযেন (সী. স্যা. কং. পী.)] নং পণামেত্ৰা, অরিযমগ্গো ৰিসুজ্ঝতী’’তি.

৭. দুক্করসুত্তং

১৭. ‘‘দুক্করং দুত্তিতিক্খঞ্চ, অব্যত্তেন চ সামঞ্ঞং.

বহূহি তত্থ সম্বাধা, যত্থ বালো ৰিসীদতী’’তি.

‘‘কতিহং চরেয্য সামঞ্ঞং, চিত্তং চে ন নিৰারযে;

পদে পদে ৰিসীদেয্য, সঙ্কপ্পানং ৰসানুগো’’তি.

‘‘কুম্মোৰ অঙ্গানি সকে কপালে,

সমোদহং ভিক্খু মনোৰিতক্কে;

অনিস্সিতো অঞ্ঞমহেঠযানো,

পরিনিব্বুতো নূপৰদেয্য কঞ্চী’’তি.

৮. হিরীসুত্তং

১৮. ‘‘হিরীনিসেধো পুরিসো, কোচি লোকস্মিং ৰিজ্জতি.

যো নিন্দং অপবোধতি [অপবোধেতি (স্যা. কং. ক.)], অস্সো ভদ্রো কসামিৰা’’তি.

‘‘হিরীনিসেধা তনুযা, যে চরন্তি সদা সতা;

অন্তং দুক্খস্স পপ্পুয্য, চরন্তি ৰিসমে সম’’ন্তি.

৯. কুটিকাসুত্তং

১৯. ‘‘কচ্চি তে কুটিকা নত্থি, কচ্চি নত্থি কুলাৰকা;

কচ্চি সন্তানকা নত্থি, কচ্চি মুত্তোসি বন্ধনা’’তি.

‘‘তগ্ঘ মে কুটিকা নত্থি, তগ্ঘ নত্থি কুলাৰকা;

তগ্ঘ সন্তানকা নত্থি, তগ্ঘ মুত্তোম্হি বন্ধনা’’তি.

‘‘কিন্তাহং কুটিকং ব্রূমি, কিং তে ব্রূমি কুলাৰকং;

কিং তে সন্তানকং ব্রূমি, কিন্তাহং ব্রূমি বন্ধন’’ন্তি.

‘‘মাতরং কুটিকং ব্রূসি, ভরিযং ব্রূসি কুলাৰকং;

পুত্তে সন্তানকে ব্রূসি, তণ্হং মে ব্রূসি বন্ধন’’ন্তি.

‘‘সাহু তে কুটিকা নত্থি, সাহু নত্থি কুলাৰকা;

সাহু সন্তানকা নত্থি, সাহু মুত্তোসি বন্ধনা’’তি.

১০. সমিদ্ধিসুত্তং