৪. ঘটীকারসুত্তং

১০৫. একমন্তং ঠিতো খো ঘটীকারো দেৰপুত্তো ভগৰতো সন্তিকে ইমং গাথং অভাসি –

‘‘অৰিহং উপপন্নাসে, ৰিমুত্তা সত্ত ভিক্খৰো;

রাগদোসপরিক্খীণা, তিণ্ণা লোকে ৰিসত্তিক’’ন্তি.

‘‘কে চ তে অতরুং পঙ্কং, মচ্চুধেয্যং সুদুত্তরং;

কে হিত্ৰা মানুসং দেহং, দিব্বযোগং উপচ্চগু’’ন্তি.

‘‘উপকো পলগণ্ডো [ফলগণ্ডো (ক.)] চ, পুক্কুসাতি চ তে তযো;

ভদ্দিযো খণ্ডদেৰো চ, বাহুরগ্গি চ সঙ্গিযো [বাহুদন্তী চ পিঙ্গিযো (সী. স্যা.)];

তে হিত্ৰা মানুসং দেহং, দিব্বযোগং উপচ্চগু’’ন্তি.

‘‘কুসলী ভাসসী তেসং, মারপাসপ্পহাযিনং;

কস্স তে ধম্মমঞ্ঞায, অচ্ছিদুং ভৰবন্ধন’’ন্তি.

‘‘ন অঞ্ঞত্র ভগৰতা, নাঞ্ঞত্র তৰ সাসনা;

যস্স তে ধম্মমঞ্ঞায, অচ্ছিদুং ভৰবন্ধনং.

‘‘যত্থ নামঞ্চ রূপঞ্চ, অসেসং উপরুজ্ঝতি;

তং তে ধম্মং ইধঞ্ঞায, অচ্ছিদুং ভৰবন্ধন’’ন্তি.

‘‘গম্ভীরং ভাসসী ৰাচং, দুব্বিজানং সুদুব্বুধং;

কস্স ত্ৰং ধম্মমঞ্ঞায, ৰাচং ভাসসি ঈদিস’’ন্তি.

‘‘কুম্ভকারো পুরে আসিং, ৰেকল়িঙ্গে ঘটীকরো;

মাতাপেত্তিভরো আসিং, কস্সপস্স উপাসকো.

‘‘ৰিরতো মেথুনা ধম্মা, ব্রহ্মচারী নিরামিসো;

অহুৰা তে সগামেয্যো, অহুৰা তে পুরে সখা.

‘‘সোহমেতে পজানামি, ৰিমুত্তে সত্ত ভিক্খৰো;

রাগদোসপরিক্খীণে, তিণ্ণে লোকে ৰিসত্তিক’’ন্তি.

‘‘এৰমেতং তদা আসি, যথা ভাসসি ভগ্গৰ;

কুম্ভকারো পুরে আসি, ৰেকল়িঙ্গে ঘটীকরো.

‘‘মাতাপেত্তিভরো আসি, কস্সপস্স উপাসকো;

ৰিরতো মেথুনা ধম্মা, ব্রহ্মচারী নিরামিসো;

অহুৰা মে সগামেয্যো, অহুৰা মে পুরে সখা’’তি.

‘‘এৰমেতং পুরাণানং, সহাযানং অহু সঙ্গমো;

উভিন্নং ভাৰিতত্তানং, সরীরন্তিমধারিন’’ন্তি.