১. সীহঙ্গপঞ্হো

১. ‘‘ভন্তে নাগসেন, ‘সীহস্স সত্ত অঙ্গানি গহেতব্বানী’তি যং ৰদেসি, কতমানি তানি সত্ত অঙ্গানি গহেতব্বানী’’তি? ‘‘যথা, মহারাজ, সীহো নাম সেতৰিমলপরিসুদ্ধপণ্ডরো, এৰমেৰ খো, মহারাজ, যোগিনা যোগাৰচরেন সেতৰিমলপরিসুদ্ধপণ্ডরচিত্তেন ব্যপগতকুক্কুচ্চেন ভৰিতব্বং. ইদং, মহারাজ, সীহস্স পঠমং অঙ্গং গহেতব্বং.

‘‘পুন চপরং, মহারাজ, সীহো চতুচরণো ৰিক্কন্তচারী, এৰমেৰ খো, মহারাজ, যোগিনা যোগাৰচরেন চতুরিদ্ধিপাদচরণেন ভৰিতব্বং. ইদং, মহারাজ, সীহস্স দুতিযং অঙ্গং গহেতব্বং.

‘‘পুন চপরং, মহারাজ, সীহো অভিরূপরুচিরকেসরী, এৰমেৰ খো, মহারাজ, যোগিনা যোগাৰচরেন অভিরূপরুচিরসীলকেসরিনা ভৰিতব্বং. ইদং, মহারাজ, সীহস্স ততিযং অঙ্গং গহেতব্বং.

‘‘পুন চপরং, মহারাজ, সীহো জীৰিতপরিযাদানেপি ন কস্সচি ওনমতি, এৰমেৰ খো, মহারাজ, যোগিনা যোগাৰচরেন চীৰরপিণ্ডপাতসেনাসনগিলানপচ্চযভেসজ্জপরিক্খারপরিযাদানেপি ন কস্সচি ওনমিতব্বং. ইদং, মহারাজ, সীহস্স চতুত্থং অঙ্গং গহেতব্বং.

‘‘পুন চপরং, মহারাজ, সীহো সপদানভক্খো যস্মিং ওকাসে নিপততি, তত্থেৰ যাৰদত্থং ভক্খযতি, ন ৰরমংসং ৰিচিনাতি, এৰমেৰ খো, মহারাজ, যোগিনা যোগাৰচরেন সপদানভক্খেন ভৰিতব্বং, ন কুলানি ৰিচিনিতব্বানি, ন পুব্বগেহং হিত্ৰা কুলানি উপসঙ্কমিতব্বানি, ন ভোজনং ৰিচিনিতব্বং, যস্মিং ওকাসে কবল়ং আদীযতি, তস্মিং যেৰ ওকাসে ভুঞ্জিতব্বং সরীরযাপনত্থং [সরীরযাপনমত্তং (সী. পী.)], ন ৰরভোজনং ৰিচিনিতব্বং. ইদং, মহারাজ, সীহস্স পঞ্চমং অঙ্গং গহেতব্বং.

‘‘পুন চপরং, মহারাজ, সীহো অসন্নিধিভক্খো, সকিং গোচরং ভক্খযিত্ৰা ন পুন তং উপগচ্ছতি, এৰমেৰ খো, মহারাজ, যোগিনা যোগাৰচরেন অসন্নিধিকারপরিভোগিনা ভৰিতব্বং. ইদং, মহারাজ, সীহস্স ছট্ঠং অঙ্গং গহেতব্বং.

‘‘পুন চপরং, মহারাজ, সীহো ভোজনং অলদ্ধা ন পরিতস্সতি, লদ্ধাপি ভোজনং অগধিতো [অগথিতো (সী.)] অমুচ্ছিতো অনজ্ঝোসন্নো পরিভুঞ্জতি, এৰমেৰ খো, মহারাজ, যোগিনা যোগাৰচরেন ভোজনং অলদ্ধা ন পরিতস্সিতব্বং, লদ্ধাপি ভোজনং অগধিতেন অমুচ্ছিতেন অনজ্ঝোসন্নেন আদীনৰদস্সাৰিনা নিস্সরণপঞ্ঞেন পরিভুঞ্জিতব্বং. ইদং, মহারাজ, সীহস্স সত্তমং অঙ্গং গহেতব্বং. ভাসিতম্পেতং, মহারাজ, ভগৰতা দেৰাতিদেৰেন সংযুত্তনিকাযৰরে থেরং মহাকস্সপং পরিকিত্তযমানেন –

‘সন্তুট্ঠোযং, ভিক্খৰে, কস্সপো ইতরীতরেন পিণ্ডপাতেন, ইতরীতরপিণ্ডপাতসন্তুট্ঠিযা চ ৰণ্ণৰাদী, ন চ পিণ্ডপাতহেতু অনেসনং অপ্পতিরূপং আপজ্জতি, অলদ্ধা চ পিণ্ডপাতং ন পরিতস্সতি, লদ্ধা চ পিণ্ডপাতং অগধিতো অমুচ্ছিতো অনজ্ঝোসন্নো আদীনৰদস্সাৰী নিস্সরণপঞ্ঞো পরিভুঞ্জতী’’’তি.

সীহঙ্গপঞ্হো পঠমো.