২. চক্কৰাকঙ্গপঞ্হো

২. ‘‘ভন্তে নাগসেন, ‘চক্কৰাকস্স তীণি অঙ্গানি গহেতব্বানী’তি যং ৰদেসি, কতমানি তানি তীণি অঙ্গানি গহেতব্বানীতি’’? ‘‘যথা, মহারাজ, চক্কৰাকো যাৰ জীৰিতপরিযাদানা দুতিযিকং ন ৰিজহতি, এৰমেৰ খো, মহারাজ, যোগিনা যোগাৰচরেন যাৰ জীৰিতপরিযাদানা যোনিসো মনসিকারো ন ৰিজহিতব্বো. ইদং, মহারাজ, চক্কৰাকস্স পঠমং অঙ্গং গহেতব্বং.

‘‘পুন চপরং, মহারাজ, চক্কৰাকো সেৰালপণকভক্খো, তেন চ সন্তুট্ঠিং আপজ্জতি, তায চ সন্তুট্ঠিযা বলেন চ ৰণ্ণেন চ ন পরিহাযতি, এৰমেৰ খো, মহারাজ, যোগিনা যোগাৰচরেন যথালাভসন্তোসো করণীযো, যথালাভসন্তুট্ঠো খো, মহারাজ, যোগী যোগাৰচরো ন পরিহাযতি সীলেন, ন পরিহাযতি সমাধিনা, ন পরিহাযতি পঞ্ঞায, ন পরিহাযতি ৰিমুত্তিযা, ন পরিহাযতি ৰিমুত্তিঞাণদস্সনেন, ন পরিহাযতি সব্বেহি কুসলেহি ধম্মেহি. ইদং, মহারাজ, চক্কৰাকস্স দুতিযং অঙ্গং গহেতব্বং.

‘‘পুন চপরং, মহারাজ, চক্কৰাকো পাণে ন ৰিহেঠযতি, এৰমেৰ খো, মহারাজ, যোগিনা যোগাৰচরেন নিহিতদণ্ডেন নিহিতসত্থেন লজ্জিনা দযাপন্নেন সব্বপাণভূতহিতানুকম্পিনা ভৰিতব্বং. ইদং, মহারাজ, চক্কৰাকস্স ততিযং অঙ্গং গহেতব্বং. ভাসতম্পেতং, মহারাজ, ভগৰতা দেৰাতিদেৰেন চক্কৰাকজাতকে –

‘‘‘যো ন হন্তি ন ঘাতেতি, ন জিনাতি ন জাপযে;

মেত্তংসো [অহিংসা (সী. পী.)] সব্বভূতেসু, ৰেরং তস্স ন কেনচী’’’তি.

চক্কৰাকঙ্গপঞ্হো দুতিযো.