১০. নিব্বানরূপসণ্ঠানপঞ্হো

১০. ‘‘ভন্তে নাগসেন, ‘নিব্বানং নিব্বান’ন্তি যং ৰদেসি, সক্কা পন তস্স নিব্বানস্স রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা উপদস্সযিতু’’ন্তি? ‘‘অপ্পটিভাগং, মহারাজ, নিব্বানং, ন সক্কা নিব্বানস্স রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা উপদস্সযিতু’’ন্তি. ‘‘এতম্পাহং, ভন্তে নাগসেন, ন সম্পটিচ্ছামি, যং অত্থিধম্মস্স নিব্বানস্স রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা অপঞ্ঞাপনং, কারণেন মং সঞ্ঞাপেহী’’তি. ‘‘হোতু, মহারাজ, কারণেন তং সঞ্ঞাপেস্সামি. অত্থি, মহারাজ, মহাসমুদ্দো নামা’’তি? ‘‘আম, ভন্তে, অত্থেসো মহাসমুদ্দো’’তি. ‘‘সচে তং, মহারাজ, কোচি এৰং পুচ্ছেয্য ‘কিত্তকং, মহারাজ, মহাসমুদ্দে উদকং, কতি পন তে সত্তা, যে মহাসমুদ্দে পটিৰসন্তী’তি, এৰং পুট্ঠো ত্ৰং, মহারাজ, কিন্তি তস্স ব্যাকরেয্যাসী’’তি? ‘‘সচে মং, ভন্তে, কোচি এৰং পুচ্ছেয্য ‘কিত্তকং, মহারাজ, মহাসমুদ্দে উদকং, কতি পন তে সত্তা, যে মহাসমুদ্দে পটিৰসন্তী’তি, তমহং, ভন্তে, এৰং ৰদেয্যং ‘অপুচ্ছিতব্বং মং ত্ৰং অম্ভো পুরিস পুচ্ছসি, নেসা পুচ্ছা কেনচি পুচ্ছিতব্বা, ঠপনীযো এসো পঞ্হো. অৰিভত্তো লোকক্খাযিকেহি মহাসমুদ্দো, ন সক্কা মহাসমুদ্দে উদকং পরিমিনিতুং সত্তা ৰা যে তত্থ ৰাসমুপগতাতি এৰাহং ভন্তে তস্স পটিৰচনং দদেয্য’’’ন্তি.

‘‘কিস্স পন, ত্ৰং মহারাজ, অত্থিধম্মে মহাসমুদ্দে এৰং পটিৰচনং দদেয্যাসি, ননু ৰিগণেত্ৰা [মিনিত্ৰা (ক.)] তস্স আচিক্খিতব্বং ‘এত্তকং মহাসমুদ্দে উদকং, এত্তকা চ সত্তা মহাসমুদ্দে পটিৰসন্তী’’তি? ‘‘ন সক্কা, ভন্তে, অৰিসযো এসো পঞ্হো’’তি.

‘‘যথা, মহারাজ, অত্থিধম্মে যেৰ মহাসমুদ্দে ন সক্কা উদকং পরিগণেতুং [পরিমিনিতুং (ক.)] সত্তা ৰা যে তত্থ ৰাসমুপগতা, এৰমেৰ খো, মহারাজ, অত্থিধম্মস্সেৰ নিব্বানস্স ন সক্কা রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা উপদস্সযিতুং, ৰিগণেয্য, মহারাজ, ইদ্ধিমা চেতোৰসিপ্পত্তো মহাসমুদ্দে উদকং তত্রাসযে চ সত্তে, ন ত্ৰেৰ সো ইদ্ধিমা চেতোৰসিপ্পত্তো সক্কুণেয্য নিব্বানস্স রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা উপদস্সযিতুং.

‘‘অপরম্পি, মহারাজ, উত্তরিং কারণং সুণোহি, অত্থিধম্মস্সেৰ নিব্বানস্স ন সক্কা রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা উপদস্সযিতুন্তি. অত্থি, মহারাজ, দেৰেসু অরূপকাযিকা নাম দেৰা’’তি. ‘‘আম, ভন্তে, সুয্যতি ‘অত্থি দেৰেসু অরূপকাযিকা নাম দেৰা’’’তি. ‘‘সক্কা পন, মহারাজ, তেসং অরূপকাযিকানং দেৰানং রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা উপদস্সযিতু’’ন্তি? ‘‘ন হি, ভন্তে’’তি. ‘‘তেন হি, মহারাজ, নত্থি অরূপকাযিকা দেৰা’’তি? ‘‘অত্থি, ভন্তে, অরূপকাযিকা দেৰা, ন চ সক্কা তেসং রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা উপদস্সযিতু’’ন্তি. ‘‘যথা, মহারাজ, অত্থিসত্তানং যেৰ অরূপকাযিকানং দেৰানং ন সক্কা রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা উপদস্সযিতুং, এৰমেৰ খো, মহারাজ, অত্থিধম্মস্সেৰ নিব্বানস্স ন সক্কা রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা উপদস্সযিতু’’ন্তি.

‘‘ভন্তে নাগসেন, হোতু একন্তসুখং নিব্বানং, ন চ সক্কা তস্স রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা উপদস্সযিতুং. অত্থি পন, ভন্তে, নিব্বানস্স গুণং অঞ্ঞেহি অনুপৰিট্ঠং কিঞ্চি ওপম্মনিদস্সনমত্ত’’ন্তি? ‘‘সরূপতো, মহারাজ, নত্থি, গুণতো পন সক্কা কিঞ্চি ওপম্মনিদস্সনমত্তং উপদস্সযিতু’’ন্তি. ‘‘সাধু, ভন্তে নাগসেন, যথাহং লভামি নিব্বানস্স গুণতোপি একদেসপরিদীপনমত্তং, তথা সীঘং ব্রূহি, নিব্বাপেহি মে হদযপরিল়াহং ৰিনয সীতলমধুরৰচনমালুতেনা’’তি.

‘‘পদুমস্স, মহারাজ, একো গুণো নিব্বানং অনুপৰিট্ঠো, উদকস্স দ্ৰে গুণা, অগদস্স তযো গুণা, মহাসমুদ্দস্স চত্তারো গুণা, ভোজনস্স পঞ্চ গুণা, আকাসস্স দস গুণা, মণিরতনস্স তযো গুণা, লোহিতচন্দনস্স তযো গুণা, সপ্পিমণ্ডস্স তযো গুণা, গিরিসিখরস্স পঞ্চ গুণা নিব্বানং অনুপৰিট্ঠা’’তি.

‘‘ভন্তে নাগসেন, ‘পদুমস্স একো গুণো নিব্বানং অনুপৰিট্ঠো’তি যং ৰদেসি, কতমো পদুমস্স একো গুণো নিব্বানং অনুপৰিট্ঠো’’তি? ‘‘যথা, মহারাজ, পদুমং অনুপলিত্তং উদকেন, এৰমেৰ খো, মহারাজ, নিব্বানং সব্বকিলেসেহি অনুপলিত্তং. অযং, মহারাজ, পদুমস্স একো গুণো নিব্বানং অনুপৰিট্ঠো’’তি.

‘‘ভন্তে নাগসেন, ‘উদকস্স দ্ৰে গুণা নিব্বানং অনুপৰিট্ঠা’তি যং ৰদেসি, কতমে উদকস্স দ্ৰে গুণা নিব্বানং অনুপৰিট্ঠা’’তি? ‘‘যথা, মহারাজ, উদকং সীতলং পরিল়াহনিব্বাপনং, এৰমেৰ খো, মহারাজ, নিব্বানং সীতলং সব্বকিলেসপরিল়াহনিব্বাপনং. অযং, মহারাজ, উদকস্স পঠমো গুণো নিব্বানং অনুপৰিট্ঠো. পুন চপরং, মহারাজ, উদকং কিলন্ততসিতপিপাসিতঘম্মাভিতত্তানং জনপসুপজানং পিপাসাৰিনযনং, এৰমেৰ খো, মহারাজ, নিব্বানং কামতণ্হাভৰতণ্হাৰিভৰতণ্হাপিপাসাৰিনযনং. অযং, মহারাজ, উদকস্স দুতিযো গুণো নিব্বানং অনুপৰিট্ঠো. ইমে খো, মহারাজ, উদকস্স দ্ৰে গুণা নিব্বানং অনুপৰিট্ঠা’’তি.

‘‘ভন্তে নাগসেন, ‘অগদস্স তযো গুণা নিব্বানং অনুপৰিট্ঠা’তি যং ৰদেসি, কতমে অগদস্স তযো গুণা নিব্বানং অনুপৰিট্ঠা’’তি? ‘‘যথা, মহারাজ, অগদো ৰিসপীল়িতানং সত্তানং পটিসরণং, এৰমেৰ খো, মহারাজ, নিব্বানং কিলেসৰিসপীল়িতানং সত্তানং পটিসরণং. অযং, মহারাজ, অগদস্স পঠমো গুণো নিব্বানং অনুপৰিট্ঠো. পুন চপরং, মহারাজ, অগদো রোগানং অন্তকরো, এৰমেৰ খো, মহারাজ, নিব্বানং সব্বদুক্খানং অন্তকরং. অযং, মহারাজ, অগদস্স দুতিযো গুণো নিব্বানং অনুপৰিট্ঠো. পুন চপরং, মহারাজ, অগদো অমতং, এৰমেৰ খো, মহারাজ, নিব্বানং অমতং. অযং, মহারাজ, অগদস্স ততিযো গুণো নিব্বানং অনুপৰিট্ঠো. ইমে খো, মহারাজ, অগদস্স তযো গুণা নিব্বানং অনুপৰিট্ঠা’’তি.

‘‘ভন্তে নাগসেন, ‘মহাসমুদ্দস্স চত্তারো গুণা নিব্বানং অনুপৰিট্ঠা’তি যং ৰদেসি, কতমে মহাসমুদ্দস্স চত্তারো গুণা নিব্বানং অনুপৰিট্ঠা’’তি? ‘‘যথা, মহারাজ, মহাসমুদ্দো সুঞ্ঞো সব্বকুণপেহি, এৰমেৰ খো, মহারাজ, নিব্বানং সুঞ্ঞং সব্বকিলেসকুণপেহি. অযং, মহারাজ, মহাসমুদ্দস্স পঠমো গুণো নিব্বানং অনুপৰিট্ঠো. পুন চপরং, মহারাজ, মহাসমুদ্দো মহন্তো অনোরপারো, ন পরিপূরতি সব্বসৰন্তীহি, এৰমেৰ খো, মহারাজ, নিব্বানং মহন্তং অনোরপারং, ন পূরতি সব্বসত্তেহি. অযং, মহারাজ, মহাসমুদ্দস্স দুতিযো গুণো নিব্বানং অনুপৰিট্ঠো. পুন চপরং, মহারাজ, মহাসমুদ্দো মহন্তানং ভূতানং আৰাসো, এৰমেৰ খো, মহারাজ, নিব্বানং মহন্তানং অরহন্তানং ৰিমলখীণাসৰবলপ্পত্তৰসীভূতমহাভূতানং আৰাসো. অযং, মহারাজ, মহাসমুদ্দস্স ততিযো গুণো নিব্বানং অনুপৰিট্ঠো. পুন চপরং, মহারাজ, মহাসমুদ্দো অপরিমিতৰিৰিধৰিপুলৰীচিপুপ্ফসংকুসুমিতো, এৰমেৰ খো, মহারাজ, নিব্বানং অপরিমিতৰিৰিধৰিপুলপরিসুদ্ধৰিজ্জাৰিমুত্তিপুপ্ফসংকুসুমিতং. অযং, মহারাজ, মহাসমুদ্দস্স চতুত্থো গুণো নিব্বানং অনুপৰিট্ঠো. ইমে খো, মহারাজ, মহাসমুদ্দস্স চত্তারো গুণা নিব্বানং অনুপৰিট্ঠা’’তি.

‘‘ভন্তে নাগসেন, ‘ভোজনস্স পঞ্চ গুণা নিব্বানং অনুপৰিট্ঠা’তি যং ৰদেসি, কতমে ভোজনস্স পঞ্চ গুণা নিব্বানং অনুপৰিট্ঠা’’তি? ‘‘যথা, মহারাজ, ভোজনং সব্বসত্তানং আযুধারণং, এৰমেৰ খো, মহারাজ, নিব্বানং সচ্ছিকতং জরামরণনাসনতো আযুধারণং. অযং, মহারাজ, ভোজনস্স পঠমো গুণো নিব্বানং অনুপৰিট্ঠো. পুন চপরং, মহারাজ, ভোজনং সব্বসত্তানং বলৰড্ঢনং, এৰমেৰ খো, মহারাজ, নিব্বানং সচ্ছিকতং সব্বসত্তানং ইদ্ধিবলৰড্ঢনং. অযং, মহারাজ, ভোজনস্স দুতিযো গুণো নিব্বানং অনুপৰিট্ঠো. পুন চপরং, মহারাজ, ভোজনং সব্বসত্তানং ৰণ্ণজননং, এৰমেৰ খো, মহারাজ, নিব্বানং সচ্ছিকতং সব্বসত্তানং গুণৰণ্ণজননং. অযং, মহারাজ, ভোজনস্স ততিযো গুণো নিব্বানং অনুপৰিট্ঠো. পুন চপরং, মহারাজ, ভোজনং সব্বসত্তানং দরথৰূপসমনং, এৰমেৰ খো, মহারাজ, নিব্বানং সচ্ছিকতং সব্বসত্তানং সব্বকিলেসদরথৰূপসমনং. অযং, মহারাজ, ভোজনস্স চতুত্থো গুণো নিব্বানং অনুপৰিট্ঠো. পুন চপরং, মহারাজ, ভোজনং সব্বসত্তানং জিঘচ্ছাদুব্বল্যপটিৰিনোদনং, এৰমেৰ খো, মহারাজ, নিব্বানং সচ্ছিকতং সব্বসত্তানং সব্বদুক্খজিঘচ্ছাদুব্বল্যপটিৰিনোদনং. অযং, মহারাজ, ভোজনস্স পঞ্চমো গুণো নিব্বানং অনুপৰিট্ঠো. ইমে খো, মহারাজ, ভোজনস্স পঞ্চ গুণা নিব্বানং অনুপৰিট্ঠা’’তি.

‘‘ভন্তে নাগসেন, ‘আকাসস্স দস গুণা নিব্বানং অনুপৰিট্ঠা’তি যং ৰদেসি, কতমে আকাসস্স দস গুণা নিব্বানং অনুপৰিট্ঠা’’তি? ‘‘যথা, মহারাজ, আকাসো ন জাযতি, ন জীযতি, ন মীযতি, ন চৰতি, ন উপ্পজ্জতি, দুপ্পসহো, অচোরাহরণো, অনিস্সিতো, ৰিহগগমনো, নিরাৰরণো, অনন্তো. এৰমেৰ খো, মহারাজ, নিব্বানং ন জাযতি, ন জীযতি, ন মীযতি, ন চৰতি, ন উপ্পজ্জতি, দুপ্পসহং, অচোরাহরণং, অনিস্সিতং, অরিযগমনং, নিরাৰরণং, অনন্তং. ইমে খো, মহারাজ, আকাসস্স দস গুণা নিব্বানং অনুপৰিট্ঠা’’তি.

‘‘ভন্তে নাগসেন, ‘মণিরতনস্স তযো গুণা নিব্বানং অনুপৰিট্ঠা’তি যং ৰদেসি, কতমে মণিরতনস্স তযো গুণা নিব্বানং অনুপৰিট্ঠা’’তি? ‘‘যথা, মহারাজ, মণিরতনং কামদদং, এৰমেৰ খো, মহারাজ, নিব্বানং কামদদং. অযং, মহারাজ, মণিরতনস্স পঠমো গুণো নিব্বানং অনুপৰিট্ঠো. পুন চপরং, মহারাজ, মণিরতনং হাসকরং, এৰমেৰ খো, মহারাজ, নিব্বানং হাসকরং. অযং, মহারাজ, মণিরতনস্স দুতিযো গুণো নিব্বানং অনুপৰিট্ঠো. পুন চপরং, মহারাজ, মণিরতনং উজ্জোতত্তকরং, এৰমেৰ খো, মহারাজ, নিব্বানং উজ্জোতত্তকরং [উজ্জোতত্থকরং (সী. পী.), উজ্জোতিতত্থকরং (স্যা.)]. অযং, মহারাজ, মণিরতনস্স ততিযো গুণো নিব্বানং অনুপৰিট্ঠো. ইমে খো, মহারাজ, মণিরতনস্স তযো গুণা নিব্বানং অনুপৰিট্ঠা’’তি.

‘‘ভন্তে নাগসেন, ‘লোহিতচন্দনস্স তযো গুণা নিব্বানং অনুপৰিট্ঠা’তি যং ৰদেসি, কতমে লোহিতচন্দনস্স তযো গুণা নিব্বানং অনুপৰিট্ঠা’’তি? ‘‘যথা, মহারাজ, লোহিতচন্দনং দুল্লভং, এৰমেৰ খো, মহারাজ, নিব্বানং দুল্লভং. অযং, মহারাজ, লোহিতচন্দনস্স পঠমো গুণো নিব্বানং অনুপৰিট্ঠো. পুন চপরং, মহারাজ, লোহিতচন্দনং অসমসুগন্ধং, এৰমেৰ খো, মহারাজ, নিব্বানং অসমসুগন্ধং. অযং, মহারাজ, লোহিতচন্দনস্স দুতিযো গুণো নিব্বানং অনুপৰিট্ঠো. পুন চপরং, মহারাজ, লোহিতচন্দনং সজ্জনপসত্থং [সব্বজনপসত্থং (স্যা.)], এৰমেৰ খো, মহারাজ, নিব্বানং অরিযসজ্জনপসত্থং. অযং, মহারাজ, লোহিতচন্দনস্স ততিযো গুণো নিব্বানং অনুপৰিট্ঠো. ইমে খো, মহারাজ, লোহিতচন্দনস্স তযো গুণা নিব্বানং অনুপৰিট্ঠা’’তি.

‘‘ভন্তে নাগসেন, ‘সপ্পিমণ্ডস্স তযো গুণা নিব্বানং অনুপৰিট্ঠা’তি যং ৰদেসি, কতমে সপ্পিমণ্ডস্স তযো গুণা নিব্বানং অনুপৰিট্ঠা’’তি? ‘‘যথা, মহারাজ, সপ্পিমণ্ডো ৰণ্ণসম্পন্নো, এৰমেৰ খো, মহারাজ, নিব্বানং গুণৰণ্ণসম্পন্নং. অযং, মহারাজ, সপ্পিমণ্ডস্স পঠমো গুণো নিব্বানং অনুপৰিট্ঠো. পুন চপরং, মহারাজ, সপ্পিমণ্ডো গন্ধসম্পন্নো, এৰমেৰ খো, মহারাজ, নিব্বানং সীলগন্ধসম্পন্নং. অযং, মহারাজ, সপ্পিমণ্ডস্স দুতিযো গুণো নিব্বানং অনুপৰিট্ঠো. পুন চপরং, মহারাজ, সপ্পিমণ্ডো রসসম্পন্নো, এৰমেৰ খো, মহারাজ, নিব্বানং রসসম্পন্নং. অযং, মহারাজ, সপ্পিমণ্ডস্স ততিযো গুণো নিব্বানং অনুপৰিট্ঠো. ইমে খো, মহারাজ, সপ্পিমণ্ডস্স তযো গুণা নিব্বানং অনুপৰিট্ঠা’’তি.

‘‘ভন্তে নাগসেন, ‘গিরিসিখরস্স পঞ্চ গুণা নিব্বানং অনুপৰিট্ঠা’তি যং ৰদেসি, কতমে গিরিসিখরস্স পঞ্চ গুণা নিব্বানং অনুপৰিট্ঠা’’তি? ‘‘যথা, মহারাজ, গিরিসিখরং অচ্চুগ্গতং, এৰমেৰ খো, মহারাজ, নিব্বানং অচ্চুগতং. অযং, মহারাজ, গিরিসিখরস্স পঠমো গুণো নিব্বানং অনুপৰিট্ঠো. পুন চপরং, মহারাজ, গিরিসিখরং অচলং, এৰমেৰ খো, মহারাজ, নিব্বানং অচলং. অযং, মহারাজ, গিরিসিখরস্স দুতিযো গুণো নিব্বানং অনুপৰিট্ঠো. পুন চপরং, মহারাজ, গিরিসিখরং দুরধিরোহং, এৰমেৰ খো, মহারাজ, নিব্বানং দুরধিরোহং সব্বকিলেসানং. অযং, মহারাজ, গিরিসিখরস্স ততিযো গুণো নিব্বানং অনুপৰিট্ঠো. পুন চপরং, মহারাজ, গিরিসিখরং সব্ববীজানং অৰিরূহনং, এৰমেৰ খো, মহারাজ, নিব্বানং সব্বকিলেসানং অৰিরূহনং. অযং, মহারাজ, গিরিসিখরস্স চতুত্থো গুণো নিব্বানং অনুপৰিট্ঠো. পুন চপরং, মহারাজ, গিরিসিখরং অনুনযপ্পটিঘৰিপ্পমুত্তং, এৰমেৰ খো, মহারাজ, নিব্বানং অনুনযপ্পটিঘৰিপ্পমুত্তং. অযং, মহারাজ, গিরিসিখরস্স পঞ্চমো গুণো নিব্বানং অনুপৰিট্ঠো. ইমে খো, মহারাজ, গিরিসিখরস্স পঞ্চ গুণা নিব্বানং অনুপৰিট্ঠা’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

নিব্বানরূপসণ্ঠানপঞ্হো দসমো.