৩. ৰেস্সন্তরৰগ্গো

১. ৰেস্সন্তরপঞ্হো

১. ‘‘ভন্তে নাগসেন, সব্বেৰ বোধিসত্তা পুত্তদারং দেন্তি, উদাহু ৰেস্সন্তরেনেৰ রঞ্ঞা পুত্তদারং দিন্ন’’ন্তি? ‘‘সব্বেপি, মহারাজ, বোধিসত্তা পুত্তদারং দেন্তি, ন ৰেস্সন্তরেনেৰ রঞ্ঞা পুত্তদারং দিন্ন’’ন্তি. ‘‘অপি চ খো, ভন্তে নাগসেন, তেসং অনুমতেন দেন্তী’’তি. ‘‘ভরিযা, মহারাজ, অনুমতা, দারকা পন বালতায ৰিলপিংসু [লালপিংসু (সী. পী.)], যদি তে অত্থতো জানেয্যুং, তেপি অনুমোদেয্যুং, ন তে ৰিলপেয্যু’’ন্তি.

‘‘দুক্করং, ভন্তে নাগসেন, বোধিসত্তেন কতং, যং সো অত্তনো ওরসে পিযে পুত্তে ব্রাহ্মণস্স দাসত্থায অদাসি.

‘‘ইদম্পি দুতিযং দুক্করতো দুক্করতরং, যং সো অত্তনো ওরসে পিযে পুত্তে বালকে তরুণকে লতায বন্ধিত্ৰা তেন ব্রাহ্মণেন লতায অনুমজ্জীযন্তে দিস্ৰা অজ্ঝুপেক্খি.

‘‘ইদম্পি ততিযং দুক্করতো দুক্করতরং, যং সো সকেন বলেন বন্ধনা মুচ্চিত্ৰা আগতে দারকে সারজ্জমুপগতে পুনদেৰ লতায বন্ধিত্ৰা অদাসি.

‘‘ইদম্পি চতুত্থং দুক্করতো দুক্করতরং, যং সো দারকে ‘অযং খো, তাত, যক্খো খাদিতুং নেতি অম্হে’তি ৰিলপন্তে ‘মা ভাযিত্থা’তি ন অস্সাসেসি.

‘‘ইদম্পি পঞ্চমং দুক্করতো দুক্করতরং, যং সো জালিস্স কুমারস্স রুদমানস্স পাদেসু নিপতিত্ৰা ‘অলং, তাত, কণ্হাজিনং নিৰত্তেহি, অহমেৰ গচ্ছামি যক্খেন সহ, খাদতু মং যক্খো’তি যাচমানস্স এৰং ন সম্পটিচ্ছি.

‘‘ইদম্পি ছট্ঠং দুক্করতো দুক্করতরং, যং সো জালিস্স কুমারস্স ‘পাসাণসমং নূন তে, তাত, হদযং, যং ত্ৰং অম্হাকং দুক্খিতানং পেক্খমানো নিম্মনুস্সকে ব্রহারঞ্ঞে যক্খেন নীযমানে ন নিৰারেসী’তি ৰিলপমানস্স কারুঞ্ঞং নাকাসি.

‘‘ইদম্পি সত্তমং দুক্করতো দুক্করতরং, যং তস্স রুল়রুল়স্স ভীমভীমস্স নীতে দারকে অদস্সনং গমিতে ন ফলি হদযং সতধা ৰা সহস্সধা ৰা, পুঞ্ঞকামেন মনুজেন কিং পরদুক্খাপনেন, ননু নাম সকদানং দাতব্বং হোতী’’তি?

‘‘দুক্করস্স, মহারাজ, কতত্তা বোধিসত্তস্স কিত্তিসদ্দো দসসহস্সিযা লোকধাতুযা সদেৰমনুস্সেসু অব্ভুগ্গতো, দেৰা দেৰভৰনে পকিত্তেন্তি, অসুরা অসুরভৰনে পকিত্তেন্তি, গরুল়া গরুল়ভৰনে পকিত্তেন্তি, নাগা নাগভৰনে পকিত্তেন্তি, যক্খা যক্খভৰনে পকিত্তেন্তি, অনুপুব্বেন তস্স কিত্তিসদ্দো পরম্পরায অজ্জেতরহি ইধ অম্হাকং সমযং অনুপ্পত্তো, তং মযং দানং পকিত্তেন্তা ৰিকোপেন্তা নিসিন্না সুদিন্নং, উদাহু দুদ্দিন্নন্তি. সো খো পনাযং, মহারাজ, কিত্তিসদ্দো নিপুণানং ৰিঞ্ঞূনং ৰিদূনং ৰিভাৰীনং বোধিসত্তানং দস গুণে অনুদস্সতি. কতমে দস? অগেধতা নিরালযতা চাগো পহানং অপুনরাৰত্তিতা সুখুমতা মহন্ততা দুরনুবোধতা দুল্লভতা অসদিসতা বুদ্ধধম্মস্স, সো খো পনাযং, মহারাজ, কিত্তিসদ্দো নিপুণানং ৰিঞ্ঞূনং ৰিদূনং ৰিভাৰীনং বোধিসত্তানং ইমে দস গুণে অনুদস্সতী’’তি.

‘‘ভন্তে নাগসেন, যো পরং দুক্খাপেত্ৰা দানং দেতি, অপি নু তং দানং সুখৰিপাকং হোতি সগ্গসংৰত্তনিক’’ন্তি? ‘‘আম, মহারাজ, কিং ৰত্তব্ব’’ন্তি. ‘‘ইঙ্ঘ, ভন্তে নাগসেন, কারণং উপদস্সেহী’’তি. ‘‘ইধ, মহারাজ, কোচি সমণো ৰা ব্রাহ্মণো ৰা সীলৰা হোতি কল্যাণধম্মো, সো ভৰেয্য পক্খহতো ৰা পীঠসপ্পী ৰা অঞ্ঞতরং ৰা ব্যাধিং আপন্নো, তমেনং যো কোচি পুঞ্ঞকামো যানং আরোপেত্ৰা পত্থিতং দেসমনুপাপেয্য, অপি নু খো, মহারাজ, তস্স পুরিসস্স ততোনিদানং কিঞ্চি সুখং নিব্বত্তেয্য সগ্গসংৰত্তনিকং তং কম্ম’’ন্তি? ‘‘আম, ভন্তে, কিং ৰত্তব্বং? হত্থিযানং ৰা সো, ভন্তে, পুরিসো লভেয্য অস্সযানং ৰা রথযানং ৰা, থলে থলযানং জলে জলযানং দেৰেসু দেৰযানং মনুস্সেসু মনুস্সযানং, তদনুচ্ছৰিকং তদনুলোমিকং ভৰে ভৰে নিব্বত্তেয্য, তদনুচ্ছৰিকানি তদনুলোমিকানি চস্স সুখানি নিব্বত্তেয্যুং, সুগতিতো সুগতিং গচ্ছেয্য, তেনেৰ কম্মাভিসন্দেন ইদ্ধিযানং অভিরুয্হ পত্থিতং নিব্বাননগরং পাপুণেয্যা’’তি. ‘‘তেন হি, মহারাজ, পরদুক্খাপনেন দিন্নদানং সুখৰিপাকং হোতি সগ্গসংৰত্তনিকং, যং সো পুরিসো বলীবদ্দে দুক্খাপেত্ৰা এৰরূপং সুখং অনুভৰতি.

‘‘অপরম্পি, মহারাজ, উত্তরিং কারণং সুণোহি, যথা পরদুক্খাপনেন দিন্নদানং সুখৰিপাকং হোতি সগ্গসংৰত্তনিকং. ইধ, মহারাজ, যো কোচি রাজা জনপদতো ধম্মিকং বলিং উদ্ধরাপেত্ৰা আণাপৰত্তনেন দানং দদেয্য, অপি নু খো সো, মহারাজ, রাজা ততোনিদানং কিঞ্চি সুখং অনুভৰেয্য সগ্গসংৰত্তনিকং তং দান’’ন্তি? ‘‘আম, ভন্তে, কিং ৰত্তব্বং, ততোনিদানং সো, ভন্তে, রাজা উত্তরিং অনেকসতসহস্সগুণং লভেয্য. রাজূনং অতিরাজা ভৰেয্য, দেৰানং অতিদেৰো ভৰেয্য, ব্রহ্মানং অতিব্রহ্মা ভৰেয্য, সমণানং অতিসমণো ভৰেয্য, ব্রাহ্মণানং অতিব্রাহ্মণো ভৰেয্য, অরহন্তানং অতিঅরহা [অতিঅরহন্তো (স্যা. ক.)] ভৰেয্যা’’তি. ‘‘তেন হি, মহারাজ, পরদুক্খাপনেন দিন্নদানং সুখৰিপাকং হোতি সগ্গসংৰত্তনিকং, যং সো রাজা বলিনা জনং পীল়েত্ৰা দিন্নদানেন এৰরূপং উত্তরিং যসসুখং অনুভৰতী’’তি.

‘‘অতিদানং, ভন্তে নাগসেন, ৰেস্সন্তরেন রঞ্ঞা দিন্নং, যং সো সকং ভরিযং পরস্স ভরিযত্থায অদাসি, সকে ওরসে পুত্তে ব্রাহ্মণস্স দাসত্থায অদাসি, অতিদানং নাম, ভন্তে নাগসেন, লোকে ৰিদূহি নিন্দিতং গরহিতং, যথা নাম, ভন্তে নাগসেন, অতিভারেন সকটস্স অক্খো ভিজ্জতি, অতিভারেন নাৰা ওসীদতি, অতিভুত্তেন ভোজনং ৰিসমং পরিণমতি, অতিৰস্সেন ধঞ্ঞং ৰিনস্সতি, অতিদানেন ভোগক্খযং উপেতি, অতিতাপেন পথৰী উপডয্হতি, অতিরাগেন উম্মত্তকো হোতি, অতিদোসেন ৰজ্ঝো হোতি, অতিমোহেন অনযং আপজ্জতি, অতিলোভেন চোরগ্গহণমুপগচ্ছতি, অতিভযেন নিরুজ্ঝতি, অতিপূরেন নদী উত্তরতি, অতিৰাতেন অসনি পততি, অতিঅগ্গিনা ওদনং উত্তরতি, অতিসঞ্চরণেন ন চিরং জীৰতি. এৰমেৰ খো, ভন্তে নাগসেন, অতিদানং নাম লোকে ৰিদূহি নিন্দিতং গরহিতং, অতিদানং, ভন্তে নাগসেন, ৰেস্সন্তরেন রঞ্ঞা দিন্নং, ন তত্থ কিঞ্চি ফলং ইচ্ছিতব্ব’’ন্তি.

‘‘অতিদানং, মহারাজ, লোকে ৰিদূহি ৰণ্ণিতং থুতং পসত্থং, যে কেচি যাদিসং কীদিসং দানং দেন্তি [কেচি যাদিসং তাদিসং দানং দেন্তি (স্যা.)], অতিদানদাযী লোকে কিত্তিং পাপুণাতি. যথা, মহারাজ, অতিপৰরতায দিব্বং ৰনমূলং গহিতম্পি হত্থপাসে ঠিতানং পরজনানং ন দস্সযতি, অগদো অতিজচ্চতায [অতিউসভতায (ক.)] পীল়ায সমুগ্ঘাতকো রোগানং অন্তকরো, অগ্গি অতিজোতিতায ডহতি, উদকং অতিসীততায নিব্বাপেতি, পদুমং পরিসুদ্ধতায ন উপলিম্পতি ৰারিকদ্দমেন, মণি অতিগুণতায কামদদো, ৰজিরং অতিতিখিণতায ৰিজ্ঝতি মণিমুত্তাফলিকং, পথৰী অতিমহন্ততায নরোরগমিগপক্খিজলসেলপব্বতদুমে ধারেতি, সমুদ্দো অতিমহন্ততায অপরিপূরণো, সিনেরু অতিভারতায অচলো, আকাসো অতিৰিত্থারতায অনন্তো, সূরিযো অতিপ্পভতায তিমিরং ঘাতেতি, সীহো অতিজাতিতায ৰিগতভযো, মল্লো অতিবলৰতায পটিমল্লং খিপ্পং উক্খিপতি, রাজা অতিপুঞ্ঞতায অধিপতি, ভিক্খু অতিসীলৰন্ততায নাগযক্খনরমরূহি নমস্সনীযো, বুদ্ধো অতিঅগ্গতায [অতিৰিসিট্ঠতায (স্যা.)] অনুপমো. এৰমেৰ খো, মহারাজ, অতিদানং নাম লোকে ৰিদূহি ৰণ্ণিতং থুতং পসত্থং, যে কেচি যাদিসং কীদিসং দানং দেন্তি, অতিদানদাযী লোকে কিত্তিং পাপুণাতি, অতিদানেন ৰেস্সন্তরো রাজা দসসহস্সিযা লোকধাতুযা ৰণ্ণিতো থুতো পসত্থো মহিতো কিত্তিতো, তেনেৰ অতিদানেন ৰেস্সন্তরো রাজা অজ্জেতরহি বুদ্ধো জাতো অগ্গো সদেৰকে লোকে.

‘‘অত্থি পন, মহারাজ, লোকে ঠপনীযং দানং, যং দক্খিণেয্যে অনুপ্পত্তে ন দাতব্ব’’ন্তি? ‘‘দস খো পনিমানি, ভন্তে নাগসেন, দানানি, যানি লোকে অদানসম্মতানি, যো তানি দানানি দেতি, সো অপাযগামী হোতি. কতমানি দস? মজ্জদানং, ভন্তে নাগসেন, লোকে অদানসম্মতং, যো তং দানং দেতি, সো অপাযগামী হোতি. সমজ্জদানং…পে… ইত্থিদানং…পে… উসভদানং…পে… চিত্তকম্মদানং…পে… সত্থদানং …পে… ৰিসদানং…পে… সঙ্খলিকদানং…পে… কুক্কুটসূকরদানং…পে… তুলাকূটমানকূটদানং, ভন্তে নাগসেন, লোকে অদানসম্মতং হোতি, যো তং দানং দেতি, সো অপাযগামী হোতি. ইমানি খো, ভন্তে নাগসেন, দস দানানি লোকে অদানসম্মতানি, যো তানি দানানি দেতি, সো অপাযগামী হোতী’’তি.

‘‘নাহং তং, মহারাজ, অদানসম্মতং পুচ্ছামি, ইমং খ্ৰাহং, মহারাজ, তং পুচ্ছামি ‘অত্থি পন, মহারাজ, লোকে ঠপনীযং দানং, যং দক্খিণেয্যে অনুপ্পত্তে ন দাতব্ব’ন্তি. ‘‘নত্থি, ভন্তে নাগসেন, লোকে ঠপনীযং দানং. যং দক্খিণেয্যে অনুপ্পত্তে ন দাতব্বং, চিত্তপ্পসাদে উপ্পন্নে কেচি দক্খিণেয্যানং ভোজনং দেন্তি, কেচি অচ্ছাদনং, কেচি সযনং, কেচি আৰসথং, কেচি অত্থরণপাৰুরণং, কেচি দাসিদাসং, কেচি খেত্তৰত্থুং, কেচি দ্ৰিপদচতুপ্পদং, কেচি সতং সহস্সং সতসহস্সং, কেচি মহারজ্জং, কেচি জীৰিতম্পি দেন্তী’’তি. ‘‘যদি পন, মহারাজ, কেচি জীৰিতম্পি দেন্তি, কিং কারণা ৰেস্সন্তরং দানপতিং অতিবাল়্হং পরিপাতেসি সুদিন্নে পুত্তে চ দারে চ?

‘‘অপি নু খো, মহারাজ, অত্থি লোকপকতি লোকাচিণ্ণং, লভতি পিতা পুত্তং ইণট্টো ৰা আজীৰিকপকতো ৰা আৰপিতুং ৰা [আধাপেতুং ৰা (স্যা.), আধপিতুং ৰা (ক.)] ৰিক্কিণিতুং ৰা’’তি? ‘‘আম, ভন্তে, লভতি পিতা পুত্তং ইণট্টো ৰা আজীৰিকপকতো ৰা আৰপিতুং ৰা ৰিক্কিণিতুং ৰা’’তি. ‘‘যদি, মহারাজ, লভতি পিতা পুত্তং ইণট্টো ৰা আজীৰিকপকতো ৰা আৰপিতুং ৰা ৰিক্কিণিতুং ৰা, ৰেস্সন্তরোপি, মহারাজ, রাজা অলভমানো সব্বঞ্ঞুতঞাণং উপদ্দুতো দুক্খিতো তস্স ধম্মধনস্স পটিলাভায পুত্তদারং আৰপেসি চ ৰিক্কিণি চ. ইতি, মহারাজ, ৰেস্সন্তরেন রঞ্ঞা অঞ্ঞেসং দিন্নং যেৰ দিন্নং, কতং যেৰ কতং. কিস্স পন ত্ৰং, মহারাজ, তেন দানেন ৰেস্সন্তরং দানপতিং অতিবাল়্হং অপসাদেসী’’তি?

‘‘নাহং, ভন্তে নাগসেন, ৰেস্সন্তরস্স দানপতিনো দানং গরহামি, অপি চ পুত্তদারং যাচন্তে নিমিনিত্ৰা অত্তানং দাতব্ব’’ন্তি. ‘‘এতং খো, মহারাজ, অসব্ভিকারণং, যং পুত্তদারং যাচন্তে অত্তানং দদেয্য, যং যং হি যাচন্তে তং তদেৰ দাতব্বং, এতং সপ্পুরিসানং কম্মং. যথা, মহারাজ, কোচি পুরিসো পানীযং আহরাপেয্য, তস্স যো ভোজনং দদেয্য, অপি নু সো, মহারাজ, পুরিসো তস্স কিচ্চকারী অস্সা’’তি? ‘‘ন হি, ভন্তে, যং সো আহরাপেতি, তমেৰ তস্স দেন্তো কিচ্চকারী অস্সা’’তি. ‘‘এৰমেৰ খো, মহারাজ, ৰেস্সন্তরো রাজা ব্রাহ্মণে পুত্তদারং যাচন্তে পুত্তদারং যেৰ অদাসি. সচে, মহারাজ, ব্রাহ্মণো ৰেস্সন্তরস্স সরীরং যাচেয্য, ন সো, মহারাজ, অত্তানং রক্খেয্য ন কম্পেয্য ন রজ্জেয্য, তস্স দিন্নং পরিচ্চত্তং যেৰ সরীরং ভৰেয্য. সচে, মহারাজ, কোচি ৰেস্সন্তরং দানপতিং উপগন্ত্ৰা যাচেয্য ‘দাসত্তং মে উপেহী’তি, দিন্নং পরিচ্চত্তং যেৰস্স সরীরং ভৰেয্য, ন সো দত্ৰা তপেয্য [ঠপেয্য (সী.)], রঞ্ঞো, মহারাজ, ৰেস্সন্তরস্স কাযো বহুসাধারণো.

‘‘যথা, মহারাজ, পক্কা মংসপেসি বহুসাধারণা, এৰমেৰ খো, মহারাজ, রঞ্ঞো ৰেস্সন্তরস্স কাযো বহুসাধারণো. যথা ৰা পন, মহারাজ, ফলিতো [ফলিনো (?)] রুক্খো নানাদিজগণসাধারণো, এৰমেৰ খো, মহারাজ, রঞ্ঞো ৰেস্সন্তরস্স কাযো বহুসাধারণো. কিং কারণা? ‘এৰাহং পটিপজ্জন্তো সম্মাসম্বোধিং পাপুণিস্সামী’তি.

‘‘যথা, মহারাজ, পুরিসো অধনো ধনত্থিকো ধনপরিযেসনং চরমানো অজপথং সঙ্কুপথং ৰেত্তপথং গচ্ছতি, জলথলৰাণিজ্জং করোতি, কাযেন ৰাচায মনসা ধনং আরাধেতি, ধনপ্পটিলাভায ৰাযমতি. এৰমেৰ খো, মহারাজ, ৰেস্সন্তরো দানপতি অধনো বুদ্ধধনেন সব্বঞ্ঞুতঞাণরতনপ্পটিলাভায যাচকানং ধনধঞ্ঞং দাসিদাসং যানৰাহনং সকলসাপতেয্যং সকং পুত্তদারং অত্তানঞ্চ চজিত্ৰা সম্মাসম্বোধিং যেৰ পরিযেসতি.

‘‘যথা ৰা পন, মহারাজ, অমচ্চো মুদ্দকামো মুদ্দাধিকরণং যং কিঞ্চি গেহে ধনধঞ্ঞং হিরঞ্ঞসুৰণ্ণং, তং সব্বং দত্ৰাপি মুদ্দপ্পটিলাভায ৰাযমতি. এৰমেৰ খো, মহারাজ, ৰেস্সন্তরো দানপতি সব্বং তং বাহিরব্ভন্তরধনং দত্ৰা জীৰিতম্পি পরেসং দত্ৰা সম্মাসম্বোধিং যেৰ পরিযেসতি.

‘‘অপি চ, মহারাজ, ৰেস্সন্তরস্স দানপতিনো এৰং অহোসি ‘যং সো ব্রাহ্মণো যাচতি, তমেৰাহং তস্স দেন্তো কিচ্চকারী নাম হোমী’তি, এৰং সো তস্স পুত্তদারমদাসি. ন খো, মহারাজ, ৰেস্সন্তরো দানপতি দেস্সতায ব্রাহ্মণস্স পুত্তদারমদাসি, ন অদস্সনকামতায পুত্তদারমদাসি, ন অতিবহুকা মে পুত্তদারা, ‘ন সক্কোমি তে পোসেতু’ন্তি পুত্তদারমদাসি, ন উক্কণ্ঠিতো ‘অপ্পিযা মে’তি নীহরিতুকামতায পুত্তদারমদাসি. অথ খো সব্বঞ্ঞুতঞাণরতনস্সেৰ পিযত্তা সব্বঞ্ঞুতঞাণস্স কারণা ৰেস্সন্তরো রাজা এৰরূপং অতুলং ৰিপুলমনুত্তরং পিযং মনাপং দযিতং পাণসমং পুত্তদারদানৰরং ব্রাহ্মণস্স অদাসি.

‘‘ভাসিতম্পেতং, মহারাজ, ভগৰতা দেৰাতিদেৰেন চরিযাপিটকে –

‘‘‘ন মে দেস্সা উভো পুত্তা, মদ্দী দেৰী ন দেস্সিযা;

সব্বঞ্ঞুতং পিযং ময্হং, তস্মা পিযে অদাসহ’ন্তি.

‘‘তস্মা, মহারাজ, ৰেস্সতরো রাজা পুত্তদানং [পুত্তদারং (ক.)] দত্ৰা পণ্ণসালং পৰিসিত্ৰা নিপজ্জি. তস্স অতিপেমেন দুক্খিতস্স বলৰসোকো উপ্পজ্জি, হদযৰত্থু উণ্হমহোসি. নাসিকায অপ্পহোন্তিযা মুখেন উণ্হে অস্সাসপস্সাসে ৰিস্সজ্জেসি, অস্সূনি পরিৰত্তিত্ৰা লোহিতবিন্দূনি হুত্ৰা নেত্তেহি নিক্খমিংসু. এৰমেৰ খো, মহারাজ, দুক্খেন ৰেস্সন্তরো রাজা ব্রাহ্মণস্স পুত্তদারমদাসি ‘মা মে দানপথো পরিহাযী’তি.

‘‘অপি চ, মহারাজ, ৰেস্সন্তরো রাজা দ্ৰে অত্থৰসে পটিচ্চ ব্রাহ্মণস্স দ্ৰে দারকে অদাসি. কতমে দ্ৰে? দানপথো চ মে অপরিহীনো ভৰিস্সতি, দুক্খিতে চ মে পুত্তকে ৰনমূলফলেহি ইতোনিদানং অয্যকো মোচেস্সতীতি. জানাতি হি, মহারাজ, ৰেস্সন্তরো রাজা ‘ন মে দারকা সক্কা কেনচি দাসভোগেন ভুঞ্জিতুং, ইমে চ দারকে অয্যকো নিক্কিণিস্সতি, এৰং অম্হাকম্পি গমনং ভৰিস্সতী’তি. ইমে খো, মহারাজ, দ্ৰে অত্থৰসে পটিচ্চ ব্রাহ্মণস্স দ্ৰে দারকে অদাসি.

‘‘অপি চ, মহারাজ, ৰেস্সন্তরো রাজা জানাতি ‘অযং খো ব্রাহ্মণো জিণ্ণো ৰুড্ঢো মহল্লকো দুব্বলো ভগ্গো দণ্ডপরাযণো খীণাযুকো পরিত্তপুঞ্ঞো, নেসো সমত্থো ইমে দারকে দাসভোগেন ভুঞ্জিতু’ন্তি. সক্কুণেয্য পন, মহারাজ, পুরিসো পাকতিকেন বলেন ইমে চন্দিমসূরিযে এৰংমহিদ্ধিকে এৰংমহানুভাৰে গহেত্ৰা পেল়ায ৰা সমুগ্গে ৰা পক্খিপিত্ৰা নিপ্পভে কত্ৰা থালকপরিভোগেন [পদীপপরিভোগেন (স্যা.)] পরিভুঞ্জিতু’’ন্তি? ‘‘ন হি, ভন্তে’’তি. ‘‘এৰমেৰ খো, মহারাজ, ইমস্মিং লোকে চন্দিমসূরিযপ্পটিভাগস্স ৰেস্সন্তরস্স দারকা ন সক্কা কেনচি দাসভোগেন ভুঞ্জিতুন্তি.

‘‘অপরম্পি, মহারাজ, উত্তরিং কারণং সুণোহি, যেন কারণেন ৰেস্সন্তরস্স দারকা ন সক্কা কেনচি দাসভোগেন ভুঞ্জিতুং. যথা, মহারাজ, রঞ্ঞো চক্কৰত্তিস্স মণিরতনং সুভং জাতিমন্তং অট্ঠংসং সুপরিকম্মকতং চতুহত্থাযামং সকটনাভিপরিণাহং ন সক্কা কেনচি পিলোতিকায ৰেঠেত্ৰা পেল়ায পক্খিপিত্ৰা সত্থকনিসানপরিভোগেন পরিভুঞ্জিতুং, এৰমেৰ খো, মহারাজ, লোকে চক্কৰত্তিরঞ্ঞো মণিরতনপ্পটিভাগস্স ৰেস্সন্তরস্স দারকা ন সক্কা কেনচি দাসভোগেন ভুঞ্জিতুং.

‘‘অপরম্পি, মহারাজ, উত্তরিং কারণং সুণোহি, যেন কারণেন ৰেস্সন্তরস্স দারকা ন সক্কা কেনচি দাসভোগেন ভুঞ্জিতুং. যথা, মহারাজ, তিধা পভিন্নো সব্বসেতো সত্তপ্পতিট্ঠিতো অট্ঠরতনুব্বেধো নৰরতনাযামপরিণাহো পাসাদিকো দস্সনীযো উপোসথো নাগরাজা ন সক্কা কেনচি সুপ্পেন ৰা সরাৰেন ৰা পিদহিতুং, গোৰচ্ছকো ৰিয ৰচ্ছকসালায পক্খিপিত্ৰা পরিহরিতুং ৰা, এৰমেৰ খো, মহারাজ, লোকে উপোসথনাগরাজপ্পটিভাগস্স ৰেস্সন্তরস্স দারকা ন সক্কা কেনচি দাসভোগেন ভুঞ্জিতুং.

‘‘অপরম্পি, মহারাজ, উত্তরিং কারণং সুণোহি, যেন কারণেন ৰেস্সন্তরস্স দারকা ন সক্কা কেনচি দাসভোগেন ভুঞ্জিতুং. যথা, মহারাজ, মহাসমুদ্দো দীঘপুথুলৰিত্থিণ্ণো গম্ভীরো অপ্পমেয্যো দুরুত্তরো অপরিযোগাল়্হো অনাৰটো ন সক্কা কেনচি সব্বত্থ পিদহিত্ৰা একতিত্থেন পরিভোগং কাতুং, এৰমেৰ খো, মহারাজ, লোকে মহাসমুদ্দপ্পটিভাগস্স ৰেস্সন্তরস্স দারকা ন সক্কা কেনচি দাসভোগেন ভুঞ্জিতুং.

‘‘অপরম্পি, মহারাজ, উত্তরিং কারণং সুণোহি, যেন কারণেন ৰেস্সন্তরস্স দারকা ন সক্কা কেনচি দাসভোগেন ভুঞ্জিতুং. যথা, মহারাজ, হিমৰন্তো পব্বতরাজা পঞ্চযোজনসতং অচ্চুগ্গতো নভে তিসহস্সযোজনাযামৰিত্থারো চতুরাসীতিকূটসহস্সপ্পটিমণ্ডিতো পঞ্চন্নং মহানদীসতানং পভৰো মহাভূতগণালযো নানাৰিধগন্ধধরো দিব্বোসধসতসমলঙ্কতো নভে ৰলাহকো ৰিয অচ্চুগ্গতো দিস্সতি, এৰমেৰ খো, মহারাজ, লোকে হিমৰন্তপব্বতরাজপ্পটিভাগস্স ৰেস্সন্তরস্স দারকা ন সক্কা কেনচি দাসভোগেন ভুঞ্জিতুং.

‘‘অপরম্পি, মহারাজ, উত্তরিং কারণং সুণোহি, যেন কারণেন ৰেস্সন্তরস্স দারকা ন সক্কা কেনচি দাসভোগেন ভুঞ্জিতুং. যথা, মহারাজ, রত্তন্ধকারতিমিসাযং উপরিপব্বতগ্গে জলমানো মহাঅগ্গিক্খন্ধো সুৰিদূরেপি পঞ্ঞাযতি, এৰমেৰ খো, মহারাজ, ৰেস্সন্তরো রাজা পব্বতগ্গে জলমানো মহাঅগ্গিক্খন্ধো ৰিয সুৰিদূরেপি পাকটো পঞ্ঞাযতি, তস্স দারকা ন সক্কা কেনচি দাসভোগেন ভুঞ্জিতুং.

‘‘অপরম্পি, মহারাজ, উত্তরিং কারণং সুণোহি, যেন কারণেন ৰেস্সন্তরস্স দারকা ন সক্কা কেনচি দাসভোগেন ভুঞ্জিতুং. যথা, মহারাজ, হিমৰন্তে পব্বতে নাগপুপ্ফসমযে উজুৰাতে ৰাযন্তে দস দ্ৰাদস যোজনানি পুপ্ফগন্ধো ৰাযতি, এৰমেৰ খো, মহারাজ, ৰেস্সন্তরস্স রঞ্ঞো অপি যোজনসহস্সেহিপি যাৰ অকনিট্ঠভৰনং এত্থন্তরে সুরাসুরগরুল়গন্ধব্বযক্খরক্খসমহোরগকিন্নরইন্দভৰনেসু কিত্তিসদ্দো অব্ভুগ্গতো, সীলৰরগন্ধো চস্স সম্পৰাযতি, তেন তস্স দারকা ন সক্কা কেনচি দাসভোগেন ভুঞ্জিতুং. অনুসিট্ঠো, মহারাজ, জালী কুমারো পিতরা ৰেস্সন্তরেন রঞ্ঞা ‘অয্যকো তে, তাত, তুম্হে ব্রাহ্মণস্স ধনং দত্ৰা নিক্কিণন্তো তং নিক্খসহস্সং দত্ৰা নিক্কিণাতু, কণ্হাজিনং নিক্কিণন্তো দাসসতং দাসিসতং হত্থিসতং অস্সসতং ধেনুসতং উসভসতং নিক্খসতন্তি সব্বসতং দত্ৰা নিক্কিণাতু, যদি তে, তাত, অয্যকো তুম্হে ব্রাহ্মণস্স হত্থতো আণায বলসা মুধা গণ্হাতি, মা তুম্হে অয্যকস্স ৰচনং করিত্থ, ব্রাহ্মণস্সেৰ অনুযাযিনো হোথা’তি, এৰমনুসাসিত্ৰা পুত্তে পেসেসি, ততো জালীকুমারো গন্ত্ৰা অয্যকেন পুট্ঠো কথেসি –

‘‘‘সহস্সগ্ঘং হি মং তাত, ব্রাহ্মণস্স পিতা অদা;

অথো কণ্হাজিনং কঞ্ঞং, হত্থীনঞ্চ সতেন চা’’’তি.

‘‘সুনিব্বেঠিতো, ভন্তে নাগসেন, পঞ্হো; সুভিন্নং দিট্ঠিজালং; সুমদ্দিতো পরৰাদো; সকসমযো সুদীপিতো; ব্যঞ্জনং সুপরিসোধিতং; সুৰিভত্তো অত্থো; এৰমেতং তথা সম্পটিচ্ছামী’’তি.

ৰেস্সন্তরপঞ্হো পঠমো.

২. দুক্করকারিকপঞ্হো

২. ‘‘ভন্তে নাগসেন, সব্বেৰ বোধিসত্তা দুক্করকারিকং করোন্তি, উদাহু গোতমেনেৰ বোধিসত্তেন দুক্করকারিকা কতা’’তি? ‘‘নত্থি, মহারাজ, সব্বেসং বোধিসত্তানং দুক্করকারিকা, গোতমেনেৰ বোধিসত্তেন দুক্করকারিকা কতা’’তি.

‘‘ভন্তে নাগসেন, যদি এৰং অযুত্তং, যং বোধিসত্তানং বোধিসত্তেহি ৰেমত্ততা হোতী’’তি. ‘‘চতূহি, মহারাজ, ঠানেহি বোধিসত্তানং বোধিসত্তেহি ৰেমত্ততা হোতি. কতমেহি চতূহি? কুলৰেমত্ততা পধানৰেমত্ততা [অদ্ধানৰেমত্ততা (সী. স্যা. পী.)] আযুৰেমত্ততা পমাণৰেমত্ততাতি. ইমেহি খো, মহারাজ, চতূহি ঠানেহি বোধিসত্তানং বোধিসত্তেহি ৰেমত্ততা হোতি. সব্বেসম্পি, মহারাজ, বুদ্ধানং রূপে সীলে সমাধিম্হি পঞ্ঞায ৰিমুত্তিযা ৰিমুত্তিঞাণদস্সনে চতুৰেসারজ্জে দসতথাগতবলে ছঅসাধারণঞাণে চুদ্দসবুদ্ধঞাণে অট্ঠারসবুদ্ধধম্মে কেৰলে চ বুদ্ধগুণে [বুদ্ধধম্মে (সী. পী.)] নত্থি ৰেমত্ততা, সব্বেপি বুদ্ধা বুদ্ধধম্মেহি সমসমা’’তি.

‘‘যদি, ভন্তে নাগসেন, সব্বেপি বুদ্ধা বুদ্ধধম্মেহি সমসমা, কেন কারণেন গোতমেনেৰ বোধিসত্তেন দুক্করকারিকা কতা’’তি? ‘‘অপরিপক্কে, মহারাজ, ঞাণে অপরিপক্কায বোধিযা গোতমো বোধিসত্তো নেক্খম্মমভিনিক্খন্তো অপরিপক্কং ঞাণং পরিপাচযমানেন দুক্করকারিকা কতা’’তি.

‘‘ভন্তে নাগসেন, কেন কারণেন বোধিসত্তো অপরিপক্কে ঞাণে অপরিপক্কায বোধিযা মহাভিনিক্খমনং নিক্খন্তো, ননু নাম ঞাণং পরিপাচেত্ৰা পরিপক্কে ঞাণে নিক্খমিতব্ব’’ন্তি?

‘‘বোধিসত্তো, মহারাজ, ৰিপরীতং ইত্থাগারং দিস্ৰা ৰিপ্পটিসারী অহোসি, তস্স ৰিপ্পটিসারিস্স অরতি উপ্পজ্জি, অরতিচিত্তং উপ্পন্নং দিস্ৰা অঞ্ঞতরো মারকাযিকো দেৰপুত্তো ‘অযং খো কালো অরতিচিত্তস্স ৰিনোদনাযা’তি ৰেহাসে ঠত্ৰা ইদং ৰচনমব্রৰি –

‘‘মারিস, মা খো ত্ৰং উক্কণ্ঠিতো অহোসি, ইতো তে সত্তমে দিৰসে দিব্বং চক্করতনং পাতুভৰিস্সতি সহস্সারং সনেমিকং সনাভিকং সব্বাকারপরিপূরং, পথৰিগতানি চ তে রতনানি আকাসট্ঠানি চ সযমেৰ উপগচ্ছিস্সন্তি, দ্ৰিসহস্সপরিত্তদীপপরিৰারেসু চতূসু মহাদীপেসু একমুখেন আণা পৰত্তিস্সতি, পরোসহস্সঞ্চ তে পুত্তা ভৰিস্সন্তি সূরা ৰীরঙ্গরূপা পরসেনপ্পমদ্দনা, তেহি পুত্তেহি পরিকিণ্ণো সত্তরতনসমন্নাগতো চতুদ্দীপমনুসাসিস্সসী’তি.

‘‘যথা নাম দিৰসসন্তত্তং অযোসূলং সব্বত্থ উপডহন্তং কণ্ণসোতং পৰিসেয্য, এৰমেৰ খো, মহারাজ, বোধিসত্তস্স তং ৰচনং কণ্ণসোতং পৰিসিত্থ, ইতি সো পকতিযাৰ উক্কণ্ঠিতো তস্সা দেৰতায ৰচনেন ভিয্যোসোমত্তায উব্বিজ্জি সংৰিজ্জি সংৰেগমাপজ্জি.

‘‘যথা পন, মহারাজ, মহতিমহাঅগ্গিক্খন্ধো জলমানো অঞ্ঞেন কট্ঠেন উপডহিতো ভিয্যোসোমত্তায জলেয্য, এৰমেৰ খো, মহারাজ, বোধিসত্তো পকতিযাৰ উক্কণ্ঠিতো তস্সা দেৰতায ৰচনেন ভিয্যোসোমত্তায উব্বিজ্জি সংৰিজ্জি সংৰেগমাপজ্জি.

‘‘যথা ৰা পন, মহারাজ, মহাপথৰী পকতিতিন্তা নিব্বত্তহরিতসদ্দলা আসিত্তোদকা চিক্খল্লজাতা পুনদেৰ মহামেঘে অভিৰুট্ঠে ভিয্যোসোমত্তায চিক্খল্লতরা অস্স, এৰমেৰ খো, মহারাজ, বোধিসত্তো পকতিযাৰ উক্কণ্ঠিতো তস্সা দেৰতায ৰচনেন ভিয্যোসোমত্তায উব্বিজ্জি সংৰিজ্জি সংৰেগমাপজ্জী’’তি.

‘‘অপি নু খো, ভন্তে নাগসেন, বোধিসত্তস্স যদি সত্তমে দিৰসে দিব্বং চক্করতনং নিব্বত্তেয্য, পটিনিৰত্তেয্য বোধিসত্তো দিব্বে চক্করতনে নিব্বত্তে’’তি? ‘‘ন হি, মহারাজ, সত্তমে দিৰসে বোধিসত্তস্স দিব্বং চক্করতনং নিব্বত্তেয্য, অপি চ পলোভনত্থায তায দেৰতায মুসা ভণিতং, যদিপি, মহারাজ, সত্তমে দিৰসে দিব্বং চক্করতনং নিব্বত্তেয্য, বোধিসত্তো ন নিৰত্তেয্য. কিং কারণং? ‘অনিচ্চ’ন্তি, মহারাজ, বোধিসত্তো দল়্হং অগ্গহেসি, ‘দুক্খং অনত্তা’তি দল়্হং অগ্গহেসি, উপাদানক্খযং পত্তো.

‘‘যথা, মহারাজ, অনোতত্তদহতো উদকং গঙ্গং নদিং পৰিসতি, গঙ্গায নদিযা মহাসমুদ্দং পৰিসতি, মহাসমুদ্দতো পাতালমুখং পৰিসতি, অপি নু, মহারাজ, তং উদকং পাতালমুখগতং পটিনিৰত্তিত্ৰা মহাসমুদ্দং পৰিসেয্য, মহাসমুদ্দতো গঙ্গং নদিং পৰিসেয্য, গঙ্গায নদিযা পুন অনোতত্তং পৰিসেয্যা’’তি? ‘‘ন হি, ভন্তে’’তি. ‘‘এৰমেৰ খো, মহারাজ, বোধিসত্তেন কপ্পানং সতসহস্সং চতুরো চ অসঙ্খ্যেয্যে কুসলং পরিপাচিতং ইমস্স ভৰস্স কারণা, সোযং অন্তিমভৰো অনুপ্পত্তো পরিপক্কং বোধিঞাণং ছহি ৰস্সেহি বুদ্ধো ভৰিস্সতি সব্বঞ্ঞূ লোকে অগ্গপুগ্গলো, অপি নু খো, মহারাজ, বোধিসত্তো চক্করতনকারণা [চক্করতনস্স কারণা (সী. স্যা. পী.)] পটিনিৰত্তেয্যা’’তি [পরিনিৰত্তেয্যাতি (সী. পী. ক.)]? ‘‘ন হি, ভন্তে’’তি.

‘‘অপি চ, মহারাজ, মহাপথৰী পরিৰত্তেয্য সকাননা সপব্বতা, নত্ৰেৰ বোধিসত্তো পটিনিৰত্তেয্য অপত্ৰা সম্মাসম্বোধিং. আরোহেয্যপি চে, মহারাজ, গঙ্গায উদকং পটিসোতং, নত্ৰেৰ বোধিসত্তো পটিনিৰত্তেয্য অপত্ৰা সম্মাসম্বোধিং; ৰিসুস্সেয্যপি চে, মহারাজ, মহাসমুদ্দো অপরিমিতজলধরো গোপদে উদকং ৰিয, নত্ৰেৰ বোধিসত্তো পটিনিৰত্তেয্য অপত্ৰা সম্মাসম্বোধিং; ফলেয্যপি চে, মহারাজ, সিনেরুপব্বতরাজা সতধা ৰা সহস্সধা ৰা, নত্ৰেৰ বোধিসত্তো পটিনিৰত্তেয্য অপত্ৰা সম্মাসম্বোধিং; পতেয্যুম্পি চে, মহারাজ, চন্দিমসূরিযা সতারকা লেড্ডু ৰিয ছমাযং, নত্ৰেৰ বোধিসত্তো পটিনিৰত্তেয্য অপত্ৰা সম্মাসম্বোধিং; সংৰত্তেয্যপি চে, মহারাজ, আকাসো কিলঞ্জমিৰ, নত্ৰেৰ বোধিসত্তো পটিনিৰত্তেয্য অপত্ৰা সম্মাসম্বোধিং. কিং কারণা? পদালিতত্তা সব্ববন্ধনান’’ন্তি.

‘‘ভন্তে নাগসেন, কতি লোকে বন্ধনানী’’তি? ‘‘দস খো পনিমানি, মহারাজ, লোকে বন্ধনানি, যেহি বন্ধনেহি বদ্ধা সত্তা ন নিক্খমন্তি, নিক্খমিত্ৰাপি পটিনিৰত্তন্তি. কতমানি দস? মাতা, মহারাজ, লোকে বন্ধনং, পিতা, মহারাজ, লোকে বন্ধনং, ভরিযা, মহারাজ, লোকে বন্ধনং, পুত্তা, মহারাজ, লোকে বন্ধনং, ঞাতী, মহারাজ, লোকে বন্ধনং, মিত্তং, মহারাজ, লোকে বন্ধনং, ধনং, মহারাজ, লোকে বন্ধনং, লাভসক্কারো, মহারাজ, লোকে বন্ধনং, ইস্সরিযং, মহারাজ, লোকে বন্ধনং, পঞ্চ কামগুণা, মহারাজ, লোকে বন্ধনং, ইমানি খো মহারাজ দস লোকে বন্ধনানি, যেহি বন্ধনেহি বদ্ধা সত্তা ন নিক্খমন্তি, নিক্খমিত্ৰাপি পটিনিৰত্তন্তি, তানি দস বন্ধনানি বোধিসত্তস্স ছিন্নানি পদালিতানি, তস্মা, মহারাজ, বোধিসত্তো ন পটিনিৰত্ততী’’তি.

‘‘ভন্তে নাগসেন, যদি বোধিসত্তো উপ্পন্নে অরতিচিত্তে দেৰতায ৰচনেন অপরিপক্কে ঞাণে অপরিপক্কায বোধিযা নেক্খম্মমভিনিক্খন্তো, কিং তস্স দুক্করকারিকায কতায, ননু নাম সব্বভক্খেন ভৰিতব্বং ঞাণপরিপাকং আগমযমানেনা’’তি?

‘‘দস খো পনিমে, মহারাজ, পুগ্গলা লোকস্মিং ওঞ্ঞাতা অৰঞ্ঞাতা হীল়িতা খীল়িতা গরহিতা পরিভূতা অচিত্তীকতা. কতমে দস? ইত্থী, মহারাজ, ৰিধৰা লোকস্মিং ওঞ্ঞাতা অৰঞ্ঞাতা হীল়িতা খীল়িতা গরহিতা পরিভূতা অচিত্তীকতা. দুব্বলো, মহারাজ, পুগ্গলো…পে… অমিত্তঞাতি, মহারাজ, পুগ্গলো…পে… মহগ্ঘসো, মহারাজ, পুগ্গলো…পে… অগরুকুলৰাসিকো, মহারাজ, পুগ্গলো…পে… পাপমিত্তো, মহারাজ, পুগ্গলো…পে… ধনহীনো, মহারাজ, পুগ্গলো…পে… আচারহীনো, মহারাজ, পুগ্গলো…পে… কম্মহীনো, মহারাজ, পুগ্গলো…পে… পযোগহীনো, মহারাজ, পুগ্গলো লোকস্মিং ওঞ্ঞাতো অৰঞ্ঞাতো হীল়িতো খীল়িতো গরহিতো পরিভূতো অচিত্তীকতো. ইমে খো, মহারাজ, দস পুগ্গলা লোকস্মিং ওঞ্ঞাতা অৰঞ্ঞাতা হীল়িতা খীল়িতা গরহিতা পরিভূতা অচিত্তীকতা. ইমানি খো, মহারাজ, দস ঠানানি অনুস্সরমানস্স বোধিসত্তস্স এৰং সঞ্ঞা উপ্পজ্জি ‘মাহং কম্মহীনো অস্সং পযোগহীনো গরহিতো দেৰমনুস্সানং, যংনূনাহং কম্মস্সামী অস্সং কম্মগরু কম্মাধিপতেয্যো কম্মসীলো কম্মধোরয্হো কম্মনিকেতৰা অপ্পমত্তো ৰিহরেয্য’ন্তি, এৰং খো, মহারাজ, বোধিসত্তো ঞাণং পরিপাচেন্তো দুক্করকারিকং অকাসী’’তি.

‘‘ভন্তে নাগসেন, বোধিসত্তো দুক্করকারিকং করোন্তো এৰমাহ ‘ন খো পনাহং ইমায কটুকায দুক্করকারিকায অধিগচ্ছামি উত্তরিমনুস্সধম্মং অলমরিযঞাণদস্সনৰিসেসং, সিযা নু খো অঞ্ঞো মগ্গো বোধাযা’তি. অপি নু তস্মিং সমযে বোধিসত্তস্স মগ্গং আরব্ভ সতিসম্মোসো অহোসী’’তি?

‘‘পঞ্চৰীসতি খো পনিমে, মহারাজ, চিত্তদুব্বলীকরণা ধম্মা, যেহি দুব্বলীকতং চিত্তং ন সম্মা সমাধিযতি আসৰানং খযায. কতমে পঞ্চৰীসতি? কোধো, মহারাজ, চিত্তদুব্বলীকরণো ধম্মো, যেন দুব্বলীকতং চিত্তং ন সম্মা সমাধিযতি আসৰানং খযায, উপনাহো…পে… মক্খো…পে… পল়াসো…পে… ইস্সা…পে… মচ্ছরিযং…পে… মাযা…পে… সাঠেয্যং…পে… থম্ভো…পে… সারম্ভো…পে… মানো…পে… অতিমানো …পে… মদো…পে… পমাদো…পে… থিনমিদ্ধং…পে… তন্দি [নন্দী (পী. ক.)] …পে… আলস্যং…পে… পাপমিত্ততা…পে… রূপা…পে… সদ্দা…পে… গন্ধা…পে… রসা…পে… ফোট্ঠব্বা…পে… খুদাপিপাসা…পে… অরতি, মহারাজ, চিত্তদুব্বলীকরণো ধম্মো, যেন দুব্বলীকতং চিত্তং ন সম্মা সমাধিযতি আসৰানং খযায. ইমে খো, মহারাজ, পঞ্চৰীসতি চিত্তদুব্বলীকরণা ধম্মা, যেহি দুব্বলীকতং চিত্তং ন সম্মা সমাধিযতি আসৰানং খযায.

বোধিসত্তস্স খো, মহারাজ, খুদাপিপাসা [খুদাপিপাসা (সী. পী. ক.)] কাযং পরিযাদিযিংসু, কাযে পরিযাদিন্নে চিত্তং ন সম্মা সমাধিযতি আসৰানং খযায. সতসহস্সং, মহারাজ, কপ্পানং [কপ্পে (ক.)] চতুরো চ অসঙ্খ্যেয্যে কপ্পে বোধিসত্তো চতুন্নং যেৰ অরিযসচ্চানং অভিসমযং অন্ৰেসি তাসু তাসু জাতীসু, কিং পনস্স পচ্ছিমে ভৰে অভিসমযজাতিযং মগ্গং আরব্ভ সতিসম্মোসো হেস্সতি? অপি চ, মহারাজ, বোধিসত্তস্স সঞ্ঞামত্তং উপ্পজ্জি ‘সিযা নু খো অঞ্ঞো মগ্গো বোধাযা’তি. পুব্বে খো, মহারাজ, বোধিসত্তো একমাসিকো সমানো পিতু সক্কস্স কম্মন্তে সীতায জম্বুচ্ছাযায সিরিসযনে পল্লঙ্কং আভুজিত্ৰা নিসিন্নো ৰিৰিচ্চেৰ কামেহি ৰিচিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহাসি…পে… চতুত্থং ঝানং উপসম্পজ্জ ৰিহাসী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামি, ঞাণং পরিপাচেন্তো বোধিসত্তো দুক্করকারিকং অকাসী’’তি.

দুক্করকারিকপঞ্হো দুতিযো.

৩. কুসলাকুসলবলৰতরপঞ্হো

৩. ‘‘ভন্তে নাগসেন, কতমং অধিমত্তং বলৰতরং কুসলং ৰা অকুসলং ৰা’’তি? ‘‘কুসলং, মহারাজ, অধিমত্তং বলৰতরং, নো তথা অকুসল’ন্তি. ‘‘নাহং, ভন্তে নাগসেন, তং ৰচনং সম্পটিচ্ছামি ‘কুসলং অধিমত্তং বলৰতরং, নো তথা অকুসল’ন্তি, দিস্সন্তি, ভন্তে নাগসেন, ইধ পাণাতিপাতিনো অদিন্নাদাযিনো কামেসুমিচ্ছাচারিনো মুসাৰাদিনো গামঘাতিকা পন্থদূসকা নেকতিকা ৰঞ্চনিকা, সব্বে তে তাৰতকেন পাপেন লভন্তি হত্থচ্ছেদং পাদচ্ছেদং হত্থপাদচ্ছেদং কণ্ণচ্ছেদং নাসচ্ছেদং কণ্ণনাসচ্ছেদং বিলঙ্গথালিকং সঙ্খমুণ্ডিকং রাহুমুখং জোতিমালিকং হত্থপজ্জোতিকং এরকৰত্তিকং চীরকৰাসিকং এণেয্যকং বল়িসমংসিকং কহাপণিকং খারাপতচ্ছিকং পলিঘপরিৰত্তিকং পলালপীঠকং তত্তেনপি তেলেন ওসিঞ্চনং সুনখেহিপি খাদাপনং জীৰসূলারোপনং অসিনাপি সীসচ্ছেদং, কেচি রত্তিং পাপং কত্ৰা রত্তিং যেৰ ৰিপাকং অনুভৰন্তি, কেচি রত্তিং কত্ৰা দিৰা যেৰ অনুভৰন্তি, কেচি দিৰা কত্ৰা দিৰা যেৰ অনুভৰন্তি, কেচি দিৰা কত্ৰা রত্তিং যেৰ অনুভৰন্তি, কেচি দ্ৰে তযো দিৰসে ৰীতিৰত্তে অনুভৰন্তি, সব্বেপি তে দিট্ঠেৰ ধম্মে ৰিপাকং অনুভৰন্তি. অত্থি পন, ভন্তে নাগসেন, কোচি একস্স ৰা দ্ৰিন্নং ৰা তিণ্ণং ৰা চতুন্নং ৰা পঞ্চন্নং ৰা দসন্নং ৰা সতস্স ৰা সহস্সস্স ৰা সতসহস্সস্স ৰা সপরিৰারং দানং দত্ৰা দিট্ঠধম্মিকং ভোগং ৰা যসং ৰা সুখং ৰা অনুভৰিতা সীলেন ৰা উপোসথকম্মেন ৰা’’তি?

‘‘অত্থি, মহারাজ, চত্তারো পুরিসা দানং দত্ৰা সীলং সমাদিযিত্ৰা উপোসথকম্মং কত্ৰা দিট্ঠেৰ ধম্মে তেনেৰ সরীরদেহেন তিদসপুরে সমনুপ্পত্তা’’তি [যসমনুপত্তাতি (সী. পী.)]. ‘‘কো চ কো চ ভন্তে’’তি? ‘‘মন্ধাতা, মহারাজ, রাজা, নিমি রাজা, সাধীনো রাজা, গুত্তিলো চ গন্ধব্বো’’তি.

‘‘ভন্তে নাগসেন, অনেকেহি তং ভৰসহস্সেহি অন্তরিতং, দ্ৰিন্নম্পেতং অম্হাকং [দীপিতং, অম্হাকম্পেতং (ক.)] পরোক্খং, যদি সমত্থোসি ৰত্তমানকে ভৰে ভগৰতো ধরমানকালে কথেহী’’তি? ‘‘ৰত্তমানকেপি, মহারাজ, ভৰে পুণ্ণকো দাসো থেরস্স সারিপুত্তস্স ভোজনং দত্ৰা তদহেৰ সেট্ঠিট্ঠানং অজ্ঝুপগতো, সো এতরহি পুণ্ণকো সেট্ঠীতি পঞ্ঞাযি, গোপালমাতা দেৰী অত্তনো কেসে ৰিক্কিণিত্ৰা লদ্ধেহি অট্ঠহি কহাপণেহি থেরস্স মহাকচ্চাযনস্স অত্তট্ঠমকস্স পিণ্ডপাতং দত্ৰা তদহেৰ রঞ্ঞো চন্দপজ্জোতস্স [উদেনস্স (সী. পী.)] অগ্গমহেসিট্ঠানং পত্তা. সুপ্পিযা উপাসিকা অঞ্ঞতরস্স গিলানভিক্খুনো অত্তনো ঊরুমংসেন পটিচ্ছাদনীযং দত্ৰা দুতিযদিৰসে যেৰ রূল়্হৰণা সঞ্ছৰী [সচ্ছৰী (সী. পী.)] অরোগা জাতা. মল্লিকা দেৰী ভগৰতো আভিদোসিকং কুম্মাসপিণ্ডং দত্ৰা তদহেৰ রঞ্ঞো কোসলস্স অগ্গমহেসী জাতা. সুমনো মালাকারো অট্ঠহি সুমনপুপ্ফমুট্ঠীহি ভগৰন্তং পূজেত্ৰা তং দিৰসং যেৰ মহাসম্পত্তিং পত্তো. একসাটকো ব্রাহ্মণো উত্তরসাটকেন ভগৰন্তং পূজেত্ৰা তং দিৰসং যেৰ সব্বট্ঠকং লভি, সব্বেপেতে, মহারাজ, দিট্ঠধম্মিকং ভোগঞ্চ যসঞ্চ অনুভৰিংসূ’’তি.

‘‘ভন্তে নাগসেন, ৰিচিনিত্ৰা পরিযেসিত্ৰা ছ জনে যেৰ অদ্দসাসী’’তি. ‘‘আম, মহারাজা’’তি. ‘‘তেন হি, ভন্তে নাগসেন, অকুসলং যেৰ অধিমত্তং বলৰতরং, নো তথা কুসলং. অহঞ্হি, ভন্তে নাগসেন, একদিৰসং যেৰ দসপি পুরিসে পস্সামি পাপস্স কম্মস্স ৰিপাকেন সূলেসু আরোপেন্তে, ৰীসম্পি তিংসম্পি চত্তালীসম্পি পঞ্ঞাসম্পি পুরিসসতম্পি পুরিসসহস্সম্পি পস্সামি পাপস্স কম্মস্স ৰিপাকেন সূলেসু আরোপেন্তে. নন্দকুলস্স, ভন্তে নাগসেন, ভদ্দসালো নাম সেনাপতিপুত্তো অহোসি. তেন চ রঞ্ঞা চন্দগুত্তেন সঙ্গামো সমুপব্যূল়্হো অহোসি. তস্মিং খো পন, ভন্তে নাগসেন, সঙ্গামে উভতো বলকাযে অসীতিকবন্ধরূপানি অহেসুং, একস্মিং কির সীসকবন্ধে পরিপাতে [পরিপুণ্ণে (সব্বত্থ)] একং কবন্ধরূপং উট্ঠহতি, সব্বেপেতে পাপস্সেৰ কম্মস্স ৰিপাকেন অনযব্যসনং আপন্না. ইমিনাপি, ভন্তে নাগসেন, কারণেন ভণামি অকুসলং যেৰ অধিমত্তং বলৰতরং, নো তথা কুসল’’ন্তি.

‘‘সুয্যতি, ভন্তে নাগসেন, ইমস্মিং বুদ্ধসাসনে কোসলেন রঞ্ঞা অসদিসদানং দিন্ন’’ন্তি? ‘‘আম, মহারাজ, সুয্যতী’’তি. ‘‘অপি নু খো, ভন্তে নাগসেন, কোসলরাজা তং অসদিসং দানং দত্ৰা ততোনিদানং কঞ্চি দিট্ঠধম্মিকং ভোগং ৰা যসং ৰা সুখং ৰা পটিলভী’’তি [পটিলভতীতি (ক.)]? ‘‘ন হি, মহারাজা’’তি. ‘‘যদি, ভন্তে নাগসেন, কোসলরাজা এৰরূপং অনুত্তরং দানং দত্ৰাপি ন লভি [ন লভতি (ক.)] ততোনিদানং কঞ্চি দিট্ঠধম্মিকং ভোগং ৰা যসং ৰা সুখং ৰা, তেন হি, ভন্তে নাগসেন, অকুসলং যেৰ অধিমত্তং বলৰতরং, নো তথা কুসল’’ন্তি.

‘‘পরিত্তত্তা, মহারাজ, অকুসলং খিপ্পং পরিণমতি, ৰিপুলত্তা কুসলং দীঘেন কালেন পরিণমতি, উপমাযপি, মহারাজ, এতং উপপরিক্খিতব্বং. যথা, মহারাজ, অপরন্তে জনপদে কুমুদভণ্ডিকা নাম ধঞ্ঞজাতি মাসলূনা [মাসপূরা (ক.)] অন্তোগেহগতা হোতি, সালযো ছপ্পঞ্চমাসেহি পরিণমন্তি, কিং পনেত্থ, মহারাজ, অন্তরং কো ৰিসেসো কুমুদভণ্ডিকায চ সালীনঞ্চা’’তি? ‘‘পরিত্তত্তা, ভন্তে, কুমুদভণ্ডিকায, ৰিপুলত্তা চ সালীনং. সালযো, ভন্তে নাগসেন, রাজারহা রাজভোজনং, কুমুদভণ্ডিকা দাসকম্মকরানং ভোজন’’ন্তি. ‘‘এৰমেৰ খো, মহারাজ, পরিত্তত্তা অকুসলং খিপ্পং পরিণমতি, ৰিপুলত্তা কুসলং দীঘেন কালেন পরিণমতী’’তি.

‘‘যং তত্থ, ভন্তে নাগসেন, খিপ্পং পরিণমতি, তং নাম লোকে অধিমত্তং বলৰতরং, তস্মা অকুসলং বলৰতরং, নো তথা কুসলং. যথা নাম, ভন্তে নাগসেন, যো কোচি যোধো মহতিমহাযুদ্ধং পৰিসিত্ৰা পটিসত্তুং উপকচ্ছকে গহেত্ৰা আকড্ঢিত্ৰা খিপ্পতরং সামিনো উপনেয্য, সো যোধো লোকে সমত্থো সূরো নাম. যো চ ভিসক্কো খিপ্পং সল্লং উদ্ধরতি রোগমপনেতি, সো ভিসক্কো ছেকো নাম. যো গণকো সীঘসীঘং গণেত্ৰা খিপ্পং দস্সযতি, সো গণকো ছেকো নাম. যো মল্লো খিপ্পং পটিমল্লং উক্খিপিত্ৰা উত্তানকং পাতেতি, সো মল্লো সমত্থো সূরো নাম. এৰমেৰ খো, ভন্তে নাগসেন, যং খিপ্পং পরিণমতি কুসলং ৰা অকুসলং ৰা, তং লোকে অধিমত্তং বলৰতর’’ন্তি.

‘‘উভযম্পি তং, মহারাজ, কম্মং সম্পরাযৰেদনীযমেৰ, অপি চ খো অকুসলং সাৰজ্জতায খণেন দিট্ঠধম্মৰেদনীযং হোতি, পুব্বকেহি, মহারাজ, খত্তিযেহি ঠপিতো এসো নিযমো ‘যো পাণং হনতি, সো দণ্ডারহো…পে… যো অদিন্নং আদিযতি…পে… যো পরদারং গচ্ছতি…পে… যো মুসা ভণতি…পে… যো গামং ঘাতেতি…পে… যো পন্থং দূসেতি…পে… যো নিকতিং করোতি…পে… যো ৰঞ্চনং করোতি, সো দণ্ডারহো ৰধিতব্বো ছেত্তব্বো ভেত্তব্বো হন্তব্বো’তি. তং তে উপাদায ৰিচিনিত্ৰা ৰিচিনিত্ৰা দণ্ডেন্তি ৰধেন্তি ছিন্দন্তি ভিন্দন্তি হনন্তি চ, অপি নু, মহারাজ, অত্থি কেহিচি ঠপিতো নিযমো ‘যো দানং ৰা দেতি, সীলং ৰা রক্খতি, উপোসথকম্মং ৰা করোতি, তস্স ধনং ৰা যসং ৰা দাতব্ব’ন্তি; অপি নু তং ৰিচিনিত্ৰা ৰিচিনিত্ৰা ধনং ৰা যসং ৰা দেন্তি, চোরস্স কতকম্মস্স ৰধবন্ধনং ৰিযা’’তি? ‘‘ন হি, ভন্তে’’তি. ‘‘যদি, মহারাজ, দাযকানং ৰিচিনিত্ৰা ৰিচিনিত্ৰা ধনং ৰা যসং ৰা দদেয্যুং, কুসলম্পি দিট্ঠধম্মৰেদনীযং ভৰেয্য, যস্মা চ খো, মহারাজ, দাযকে ন ৰিচিনন্তি ‘ধনং ৰা যসং ৰা দস্সামা’তি, তস্মা কুসলং ন দিট্ঠধম্মৰেদনীযং. ইমিনা, মহারাজ, কারণেন অকুসলং দিট্ঠধম্মৰেদনীযং, সম্পরাযেৰ সো অধিমত্তং বলৰতরং ৰেদনং ৰেদযতী’’তি. ‘‘সাধু, ভন্তে নাগসেন, তৰাদিসেন বুদ্ধিমন্তেন ৰিনা নেসো পঞ্হো সুনিব্বেঠিযো, লোকিকং, ভন্তে নাগসেন, লোকুত্তরেন ৰিঞ্ঞাপিত’’ন্তি.

কুসলাকুসলবলৰতরপঞ্হো ততিযো.

৪. পুব্বপেতাদিসপঞ্হো

৪. ‘‘ভন্তে নাগসেন, ইমে দাযকা দানং দত্ৰা পুব্বপেতানং আদিসন্তি [উদ্দিসন্তি (ক. সী.)] ‘ইদং তেসং পাপুণাতূ’তি, অপি নু তে কিঞ্চি ততোনিদানং ৰিপাকং পটিলভন্তী’’তি? ‘‘কেচি, মহারাজ, পটিলভন্তি, কেচি নপ্পটিলভন্তী’’তি. ‘‘কে, ভন্তে, পটিলভন্তি, কে নপ্পটিলভন্তী’’তি? ‘‘নিরযূপপন্না, মহারাজ, নপ্পটিলভন্তি, সগ্গগতা নপ্পটিলভন্তি, তিরচ্ছানযোনিগতা নপ্পটিলভন্তি, চতুন্নং পেতানং তযো পেতা নপ্পটিলভন্তি ৰন্তাসিকা খুপ্পিপাসিনো নিজ্ঝামতণ্হিকা, লভন্তি পেতা পরদত্তূপজীৰিনো, তেপি সরমানা যেৰ লভন্তী’’তি.

‘‘তেন হি, ভন্তে নাগসেন, দাযকানং দানং ৰিসোসিতং [ৰিসোতং (সী. পী.)] হোতি অফলং, যেসং উদ্দিস্স কতং যদি তে নপ্পটিলভন্তী’’তি? ‘‘ন হি তং, মহারাজ, দানং অফলং হোতি অৰিপাকং, দাযকা যেৰ তস্স ফলং অনুভৰন্তী’’তি. ‘‘তেন হি, ভন্তে নাগসেন, কারণেন মং সঞ্ঞাপেহী’’তি. ‘‘ইধ, মহারাজ, কেচি মনুস্সা মচ্ছমংসসুরাভত্তখজ্জকানি পটিযাদেত্ৰা ঞাতিকুলং গচ্ছন্তি, যদি তে ঞাতকা তং উপাযনং ন সম্পটিচ্ছেয্যুং, অপি নু তং উপাযনং ৰিসোসিতং গচ্ছেয্য ৰিনস্সেয্য ৰা’’তি? ‘‘ন হি, ভন্তে, সামিকানং যেৰ তং হোতী’’তি. ‘‘এৰমেৰ খো, মহারাজ, দাযকা যেৰ তস্স ফলং অনুভৰন্তি. যথা পন, মহারাজ, পুরিসো গব্ভং পৰিট্ঠো অসতি পুরতো নিক্খমনমুখে কেন নিক্খমেয্যা’’তি. ‘‘পৰিট্ঠেনেৰ ভন্তে’’তি. ‘‘এৰমেৰ খো, মহারাজ, দাযকা যেৰ তস্স ফলং অনুভৰন্তী’’তি. ‘‘হোতু, ভন্তে নাগসেন, এৰমেতং তথা সম্পটিচ্ছামি, দাযকা যেৰ তস্স ফলং অনুভৰন্তি, ন মযং তং কারণং ৰিলোমেমাতি.

‘‘ভন্তে নাগসেন, যদি ইমেসং দাযকানং দিন্নদানং পুব্বপেতানং পাপুণাতি, তে চ তস্স ৰিপাকং অনুভৰন্তি. তেন হি যো পাণাতিপাতী লুদ্দো লোহিতপাণী পদুট্ঠমনসঙ্কপ্পো মনুস্সে ঘাতেত্ৰা দারুণং কম্মং কত্ৰা পুব্বপেতানং আদিসেয্য ‘ইমস্স মে কম্মস্স ৰিপাকো পুব্বপেতানং পাপুণাতূ’তি, অপি নু তস্স ৰিপাকো পুব্বপেতানং পাপুণাতী’’তি? ‘‘ন হি, মহারাজা’’তি.

‘‘ভন্তে নাগসেন, কো তত্থ হেতু কিং কারণং, যেন কুসলং পাপুণাতি অকুসলং ন পাপুণাতী’’তি? ‘‘নেসো, মহারাজ, পঞ্হো পুচ্ছিতব্বো, মা চ ত্ৰং, মহারাজ, ‘ৰিসজ্জকো অত্থী’তি অপুচ্ছিতব্বং পুচ্ছি, ‘কিস্স আকাসো নিরালম্বো, কিস্স গঙ্গা উদ্ধম্মুখা ন সন্দতি, কিস্স ইমে মনুস্সা চ দিজা চ দ্ৰিপদা মিগা চতুপ্পদা’তি তম্পি মং ত্ৰং পুচ্ছিস্সসী’’তি. ‘‘নাহং তং, ভন্তে নাগসেন, ৰিহেসাপেক্খো পুচ্ছামি, অপি চ নিব্বাহনত্থায [নিব্বানত্থায (ক.)] সন্দেহস্স পুচ্ছামি, বহূ মনুস্সা লোকে ৰামগামিনো [পাপগাহিনো (স্যা.)] ৰিচক্খুকা, ‘কিন্তি তে ওতারং ন লভেয্যু’ন্তি এৰাহং তং পুচ্ছামী’’তি. ‘‘ন সক্কা, মহারাজ, সহ অকতেন অননুমতেন সহ পাপং কম্মং সংৰিভজিতুং.

‘‘যথা, মহারাজ, মনুস্সা উদকনিব্বাহনেন উদকং সুৰিদূরম্পি হরন্তি, অপি নু, মহারাজ, সক্কা ঘনমহাসেলপব্বতো [পব্বততো (ক.)] নিব্বাহনেন যথিচ্ছিতং হরিতু’’ন্তি? ‘‘ন হি, ভন্তে’’তি. ‘‘এৰমেৰ খো, মহারাজ, সক্কা কুসলং সংৰিভজিতুং, ন সক্কা অকুসলং সংৰিভজিতুং. যথা ৰা পন, মহারাজ, সক্কা তেলেন পদীপো জালেতুং, অপি নু, মহারাজ, সক্কা উদকেন পদীপো জালেতু’’ন্তি? ‘‘ন হি, ভন্তে’’তি. ‘‘এৰমেৰ খো, মহারাজ, সক্কা কুসলং সংৰিভজিতুং, ন সক্কা অকুসলং সংৰিভজিতুং. যথা ৰা পন, মহারাজ, কস্সকা তল়াকতো উদকং নীহরিত্ৰা ধঞ্ঞং পরিপাচেন্তি, অপি নু খো, মহারাজ, সক্কা মহাসমুদ্দতো উদকং নীহরিত্ৰা ধঞ্ঞং পরিপাচেতু’’ন্তি? ‘‘ন হি, ভন্তে’’তি. ‘‘এৰমেৰ খো, মহারাজ, সক্কা কুসলং সংৰিভজিতুং, ন সক্কা অকুসলং সংৰিভজিতু’’ন্তি.

‘‘ভন্তে নাগসেন, কেন কারণেন সক্কা কুসলং সংৰিভজিতুং, ন সক্কা অকুসলং সংৰিভজিতুং. কারণেন মং সঞ্ঞাপেহি, নাহং অন্ধো অনালোকো সুত্ৰা ৰেদিস্সামী’’তি. ‘‘অকুসলং, মহারাজ, থোকং, কুসলং বহুকং, থোকত্তা অকুসলং কত্তারং যেৰ পরিযাদিযতি, বহুকত্তা কুসলং সদেৰকং লোকং অজ্ঝোত্থরতী’’তি. ‘‘ওপম্মং করোহী’’তি.

‘‘যথা, মহারাজ, পরিত্তং একং উদকবিন্দু পথৰিযং নিপতেয্য, অপি নু খো তং, মহারাজ, উদকবিন্দু দসপি দ্ৰাদসপি যোজনানি অজ্ঝোত্থরেয্যা’’তি? ‘‘ন হি, ভন্তে, যত্থ তং উদকবিন্দু নিপতিতং, তত্থেৰ পরিযাদিযতী’’তি. ‘‘কেন কারণেন, মহারাজা’’তি? ‘‘পরিত্তত্তা, ভন্তে, উদকবিন্দুস্সা’’তি. ‘‘এৰমেৰ খো, মহারাজ, পরিত্তং অকুসলং পরিত্তত্তা কত্তারং যেৰ পরিযাদিযতি, ন সক্কা সংৰিভজিতুং.

‘‘যথা ৰা পন, মহারাজ, মহতিমহামেঘো অভিৰস্সেয্য তপ্পযন্তো ধরণিতলং, অপি নু খো সো, মহারাজ, মহামেঘো সমন্ততো ওত্থরেয্যা’’তি. ‘‘আম, ভন্তে, পূরযিত্ৰা সো মহামেঘো সোব্ভসর সরিতসাখাকন্দরপদরদহতল়াক [মাতিকাতল়াক (ক.)] উদপানপোক্খরণিযো দসপি দ্ৰাদসপি যোজনানি অজ্ঝোত্থরেয্যা’’তি. ‘‘কেন কারণেন, মহারাজা’’তি? ‘‘মহন্তত্তা, ভন্তে, মেঘস্সা’’তি. ‘‘এৰমেৰ খো, মহারাজ, কুসলং বহুকং, বহুকত্তা সক্কা দেৰমনুস্সেহিপি সংৰিভজিতু’’ন্তি.

‘‘ভন্তে নাগসেন, কেন কারণেন অকুসলং থোকং কুসলং বহুতর’’ন্তি? ‘‘ইধ, মহারাজ, যো কোচি দানং দেতি, সীলং সমাদিযতি, উপোসথকম্মং করোতি, সো হট্ঠো পহট্ঠো হসিতো পমুদিতো পসন্নমানসো ৰেদজাতো হোতি, তস্স অপরাপরং পীতি উপ্পজ্জতি, পীতিমনস্স ভিয্যো ভিয্যো কুসলং পৰড্ঢতি.

‘‘যথা, মহারাজ, উদপানে বহুসলিলসম্পুণ্ণে একেন দেসেন উদকং পৰিসেয্য, একেন নিক্খমেয্য, নিক্খমন্তেপি অপরাপরং উপ্পজ্জতি, ন সক্কা হোতি খযং পাপেতুং. এৰমেৰ খো, মহারাজ, কুসলং ভিয্যো ভিয্যো পৰড্ঢতি. ৰস্সসতেপি চে, মহারাজ, পুরিসো কতং কুসলং আৰজ্জেয্য, আৰজ্জিতে আৰজ্জিতে ভিয্যো ভিয্যো কুসলং পৰড্ঢতি. তস্স তং কুসলং সক্কা হোতি যথিচ্ছকেহি সদ্ধিং সংৰিভজিতুং, ইদমেত্থ, মহারাজ, কারণং, যেন কারণেন কুসলং বহুতরং.

‘‘অকুসলং পন, মহারাজ, করোন্তো পচ্ছা ৰিপ্পটিসারী হোতি, ৰিপ্পটিসারিনো চিত্তং পটিলীযতি পটিকুটতি পটিৰত্ততি ন সম্পসারীযতি সোচতি তপ্পতি হাযতি খীযতি ন পরিৰড্ঢতি তত্থেৰ পরিযাদিযতি. যথা, মহারাজ, সুক্খায নদিযা মহাপুল়িনায উন্নতাৰনতায কুটিলসঙ্কুটিলায উপরিতো পরিত্তং উদকং আগচ্ছন্তং হাযতি খীযতি ন পরিৰড্ঢতি তত্থেৰ পরিযাদিযতি. এৰমেৰ খো, মহারাজ, অকুসলং করোন্তস্স চিত্তং পটিলীযতি পটিকুটতি পটিৰত্ততি ন সম্পসারীযতি সোচতি তপ্পতি হাযতি খীযতি ন পরিৰড্ঢতি তত্থেৰ পরিযাদিযতি, ইদমেত্থ, মহারাজ, কারণং, যেন কারণেন অকুসলং থোক’’ন্তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

পুব্বপেতাদিসপঞ্হো চতুত্থো.

৫. সুপিনপঞ্হো

৫. ‘‘ভন্তে নাগসেন, ইমস্মিং লোকে নরনারিযো সুপিনং পস্সন্তি কল্যাণম্পি পাপকম্পি, দিট্ঠপুব্বম্পি অদিট্ঠপুব্বম্পি, কতপুব্বম্পি অকতপুব্বম্পি, খেমম্পি সভযম্পি, দূরেপি সন্তিকেপি, বহুৰিধানিপি অনেকৰণ্ণসহস্সানি দিস্সন্তি, কিঞ্চেতং সুপিনং নাম, কো চেতং পস্সতী’’তি? ‘‘নিমিত্তমেতং, মহারাজ, সুপিনং নাম, যং চিত্তস্স আপাত [আপাথ (সী. পী.)] মুপগচ্ছতি. ছযিমে, মহারাজ, সুপিনং পস্সন্তি, ৰাতিকো সুপিনং পস্সতি, পিত্তিকো সুপিনং পস্সতি, সেম্হিকো সুপিনং পস্সতি, দেৰতূপসংহারতো সুপিনং পস্সতি, সমুদাচিণ্ণতো সুপিনং পস্সতি, পুব্বনিমিত্ততো সুপিনং পস্সতি, তত্র, মহারাজ, যং পুব্বনিমিত্ততো সুপিনং পস্সতি, তং যেৰ সচ্চং, অৰসেসং মিচ্ছা’’তি.

‘‘ভন্তে নাগসেন, যো পুব্বনিমিত্ততো সুপিনং পস্সতি, কিং তস্স চিত্তং সযং গন্ত্ৰা তং নিমিত্তং ৰিচিনাতি, তং ৰা নিমিত্তং চিত্তস্স আপাতমুপগচ্ছতি, অঞ্ঞো ৰা আগন্ত্ৰা তস্স আরোচেতী’’তি? ‘‘ন, মহারাজ, তস্স চিত্তং সযং গন্ত্ৰা তং নিমিত্তং ৰিচিনাতি, নাপি অঞ্ঞো কোচি আগন্ত্ৰা তস্স আরোচেতি, অথ খো তং যেৰ নিমিত্তং চিত্তস্স আপাতমুপগচ্ছতি. যথা, মহারাজ, আদাসো ন সযং কুহিঞ্চি গন্ত্ৰা ছাযং ৰিচিনাতি, নাপি অঞ্ঞো কোচি ছাযং আনেত্ৰা আদাসং আরোপেতি [আরোচেতি (ক.)], অথ খো যতো কুতোচি ছাযা আগন্ত্ৰা আদাসস্স আপাতমুপগচ্ছতি, এৰমেৰ খো, মহারাজ, ন তস্স চিত্তং সযং গন্ত্ৰা তং নিমিত্তং ৰিচিনাতি, নাপি অঞ্ঞো কোচি আগন্ত্ৰা আরোচেতি, অথ খো যতো কুতোচি নিমিত্তং আগন্ত্ৰা চিত্তস্স আপাতমুপগচ্ছতী’’তি.

‘‘ভন্তে নাগসেন, যং তং চিত্তং সুপিনং পস্সতি, অপি নু তং চিত্তং জানাতি ‘এৰং নাম ৰিপাকো ভৰিস্সতি খেমং ৰা ভযং ৰা’তি? ‘‘ন হি, মহারাজ, তং চিত্তং জানাতি ‘এৰংৰিপাকো ভৰিস্সতি খেমং ৰা ভযং ৰা’তি, নিমিত্তে পন উপ্পন্নে অঞ্ঞেসং কথেতি, ততো তে অত্থং কথেন্তী’’তি.

‘‘ইঙ্ঘ, ভন্তে নাগসেন, কারণং মে দস্সেহী’’তি. ‘‘যথা, মহারাজ, সরীরে তিলকা পীল়কা দদ্দূনি উট্ঠহন্তি লাভায ৰা অলাভায ৰা, যসায ৰা অযসায ৰা, নিন্দায ৰা পসংসায ৰা, সুখায ৰা দুক্খায ৰা, অপি নু তা, মহারাজ, পীল়কা জানিত্ৰা উপ্পজ্জন্তি ‘ইমং নাম মযং অত্থং নিপ্ফাদেস্সামা’’’তি? ‘‘ন হি, ভন্তে, যাদিসে তা ওকাসে পীল়কা সম্ভৰন্তি, তত্থ তা পীল়কা দিস্ৰা নেমিত্তকা ব্যাকরোন্তি ‘এৰং নাম ৰিপাকো ভৰিস্সতী’’’তি. ‘‘এৰমেৰ খো, মহারাজ, যং তং চিত্তং সুপিনং পস্সতি, ন তং চিত্তং জানাতি ‘এৰং নাম ৰিপাকো ভৰিস্সতি খেমং ৰা ভযং ৰা’তি, নিমিত্তে পন উপ্পন্নে অঞ্ঞেসং কথেতি, ততো তে অত্থং কথেন্তী’’তি.

‘‘ভন্তে নাগসেন, যো সুপিনং পস্সতি, সো নিদ্দাযন্তো, উদাহু জাগরন্তো [জগ্গন্তো (সী. পী.)] পস্সতী’’তি? ‘‘যো সো, মহারাজ, সুপিনং পস্সতি, ন সো নিদ্দাযন্তো পস্সতি, নাপি জাগরন্তো পস্সতি. অপি চ ওক্কন্তে মিদ্ধে অসম্পত্তে ভৰঙ্গে এত্থন্তরে সুপিনং পস্সতি. মিদ্ধসমারূল়্হস্স, মহারাজ, চিত্তং ভৰঙ্গগতং হোতি, ভৰঙ্গগতং চিত্তং নপ্পৰত্ততি, অপ্পৰত্তং চিত্তং সুখদুক্খং নপ্পজানাতি, অপ্পটিৰিজানন্তস্স সুপিনো ন হোতি, পৰত্তমানে চিত্তে সুপিনং পস্সতি.

‘‘যথা, মহারাজ, তিমিরে অন্ধকারে অপ্পভাসে সুপরিসুদ্ধেপি আদাসে ছাযা ন দিস্সতি, এৰমেৰ খো, মহারাজ, মিদ্ধসমারূল়্হে চিত্তে ভৰঙ্গগতে তিট্ঠমানেপি সরীরে চিত্তং অপ্পৰত্তং হোতি, অপ্পৰত্তে চিত্তে সুপিনং ন পস্সতি. যথা, মহারাজ, আদাসো, এৰং সরীরং দট্ঠব্বং; যথা অন্ধকারো, এৰং মিদ্ধং দট্ঠব্বং; যথা আলোকো, এৰং চিত্তং দট্ঠব্বং.

‘‘যথা ৰা পন, মহারাজ, মহিকোত্থটস্স সূরিযস্স পভা ন দিস্সতি সন্তা যেৰ সূরিযরস্মি অপ্পৰত্তা হোতি, অপ্পৰত্তায সূরিযরস্মিযা আলোকো ন হোতি, এৰমেৰ খো, মহারাজ, মিদ্ধসমারূল়্হস্স চিত্তং ভৰঙ্গগতং হোতি, ভৰঙ্গগতং চিত্তং নপ্পৰত্ততি, অপ্পৰত্তে চিত্তে সুপিনং ন পস্সতি. যথা, মহারাজ, সূরিযো, এৰং সরীরং দট্ঠব্বং; যথা মহিকোত্থরণং, এৰং মিদ্ধং দট্ঠব্বং; যথা সূরিযরস্মি, এৰং চিত্তং দট্ঠব্বং.

‘‘দ্ৰিন্নং, মহারাজ, সন্তেপি সরীরে চিত্তং অপ্পৰত্তং হোতি, মিদ্ধসমারূল়্হস্স ভৰঙ্গগতস্স সন্তেপি সরীরে চিত্তং অপ্পৰত্তং হোতি, নিরোধসমাপন্নস্স সন্তেপি সরীরে চিত্তং অপ্পৰত্তং হোতি, জাগরন্তস্স, মহারাজ, চিত্তং লোলং হোতি ৰিৰটং পাকটং অনিবদ্ধং, এৰরূপস্স চিত্তে নিমিত্তং আপাতং ন উপেতি. যথা, মহারাজ, পুরিসং ৰিৰটং পাকটং অকিরিযং অরহস্সং রহস্সকামা পরিৰজ্জেন্তি, এৰমেৰ খো, মহারাজ, জাগরন্তস্স দিব্বো অত্থো আপাতং ন উপেতি, তস্মা জাগরন্তো সুপিনং ন পস্সতি. যথা ৰা পন, মহারাজ, ভিক্খুং ভিন্নাজীৰং অনাচারং পাপমিত্তং দুস্সীলং কুসীতং হীনৰীরিযং কুসলা বোধিপক্খিযা ধম্মা আপাতং ন উপেন্তি, এৰমেৰ খো, মহারাজ, জাগরন্তস্স দিব্বো অত্থো আপাতং ন উপেতি, তস্মা জাগরন্তো সুপিনং ন পস্সতী’’তি.

‘‘ভন্তে নাগসেন, অত্থি মিদ্ধস্স আদিমজ্ঝপরিযোসান’’ন্তি? ‘‘আম, মহারাজ, অত্থি মিদ্ধস্স আদিমজ্ঝপরিযোসান’’ন্তি. ‘‘কতমং আদি, কতমং মজ্ঝং, কতমং পরিযোসান’’ন্তি? ‘‘যো, মহারাজ, কাযস্স ওনাহো পরিযোনাহো দুব্বল্যং মন্দতা অকম্মঞ্ঞতা কাযস্স, অযং মিদ্ধস্স আদি; যো, মহারাজ, কপিনিদ্দাপরেতো ৰোকিণ্ণকং জগ্গতি [ৰোকিণ্ণতং গচ্ছতি (নিস্য)], ইদং মিদ্ধস্স মজ্ঝং; ভৰঙ্গগতি পরিযোসনং. মজ্ঝূপগতো, মহারাজ, কপিনিদ্দাপরেতো সুপিনং পস্সতি. যথা, মহারাজ, কোচি যতচারী সমাহিতচিত্তো ঠিতধম্মো অচলবুদ্ধি পহীনকোতূহলসদ্দং ৰনমজ্ঝোগাহিত্ৰা সুখুমং অত্থং চিন্তযতি, ন চ সো তত্থ মিদ্ধং ওক্কমতি, সো তত্থ সমাহিতো একগ্গচিত্তো সুখুমং অত্থং পটিৰিজ্ঝতি, এৰমেৰ খো, মহারাজ, জাগরো ন মিদ্ধসমাপন্নো, মজ্ঝূপগতো কপিনিদ্দাপরেতো সুপিনং পস্সতি. যথা, মহারাজ, কোতূহলসদ্দো, এৰং জাগরং দট্ঠব্বং; যথা ৰিৰিত্তং ৰনং, এৰং কপিনিদ্দাপরেতো দট্ঠব্বো; যথা সো কোতূহলসদ্দং ওহায মিদ্ধং ৰিৰজ্জেত্ৰা মজ্ঝত্তভূতো সুখুমং অত্থং পটিৰিজ্ঝতি, এৰং জাগরো ন মিদ্ধসমাপন্নো কপিনিদ্দাপরেতো সুপিনং পস্সতী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

সুপিনপঞ্হো পঞ্চমো.

৬. অকালমরণপঞ্হো

৬. ‘‘ভন্তে নাগসেন, যে তে সত্তা মরন্তি, সব্বে তে কালে যেৰ মরন্তি, উদাহু অকালেপি মরন্তী’’তি? ‘‘অত্থি, মহারাজ, কালেপি মরণং, অত্থি অকালেপি মরণ’’ন্তি.

‘‘ভন্তে নাগসেন, কে কালে মরন্তি, কে অকালে মরন্তী’’তি? ‘‘দিট্ঠপুব্বা পন, মহারাজ, তযা অম্বরুক্খা ৰা জম্বুরুক্খা ৰা, অঞ্ঞস্মা ৰা পন ফলরুক্খা ফলানি পতন্তানি আমানি চ পক্কানি চা’’তি? ‘‘আম, ভন্তে’’তি. ‘‘যানি তানি, মহারাজ, ফলানি রুক্খতো পতন্তি, সব্বানি তানি কালে যেৰ পতন্তি, উদাহু অকালেপী’’তি? ‘‘যানি তানি, ভন্তে নাগসেন, ফলানি পরিপক্কানি ৰিলীনানি পতন্তি, সব্বানি তানি কালে পতন্তি. যানি পন তানি অৰসেসানি ফলানি তেসু কানিচি কিমিৰিদ্ধানি পতন্তি, কানিচি লগুল়হতানি [সকুণপহতা (স্যা.), লকুটহতানি (সী. পী. ক.)] পতন্তি, কানিচি ৰাতপ্পহতানি পতন্তি, কানিচি অন্তোপূতিকানি হুত্ৰা পতন্তি, সব্বানি তানি অকালে পতন্তী’’তি. ‘‘এৰমেৰ খো, মহারাজ, যে তে জরাৰেগহতা মরন্তি, তে যেৰ কালে মরন্তি, অৰসেসা কেচি কম্মপ্পটিবাল়্হা মরন্তি, কেচি গতিপ্পটিবাল়্হা মরন্তি, কেচি কিরিযপ্পটিবাল়্হা মরন্তী’’তি.

‘‘ভন্তে নাগসেন, যে তে কম্মপ্পটিবাল়্হা মরন্তি, যেপি তে গতিপ্পটিবাল়্হা মরন্তি, যেপি তে কিরিযপ্পটিবাল়্হা মরন্তি, যেপি তে জরাৰেগপ্পটিবাল়্হা মরন্তি, সব্বে তে কালে যেৰ মরন্তি, যোপি মাতুকুচ্ছিগতো মরতি, সো তস্স কালো, কালে যেৰ সো মরতি. যোপি ৰিজাতঘরে মরতি, সো তস্স কালো, সোপি কালে যেৰ মরতি. যোপি মাসিকো মরতি…পে… যোপি ৰস্সসতিকো মরতি, সো তস্স কালো, কালে যেৰ সো মরতি, তেন হি, ভন্তে নাগসেন, অকালে মরণং নাম ন হোতি, যে কেচি মরন্তি, সব্বে তে কালে যেৰ মরন্তী’’তি.

‘‘সত্তিমে, মহারাজ, ৰিজ্জমানেপি উত্তরিং আযুস্মিং অকালে মরন্তি. কতমে সত্ত? জিঘচ্ছিতো, মহারাজ, ভোজনং অলভমানো উপহতব্ভন্তরো ৰিজ্জমানেপি উত্তরিং আযুস্মিং অকালে মরতি, পিপাসিতো, মহারাজ, পানীযং অলভমানো পরিসুক্খহদযো ৰিজ্জমানেপি উত্তরিং আযুস্মিং অকালে মরতি, অহিনা দট্ঠো, মহারাজ, ৰিসৰেগাভিহতো তিকিচ্ছকং অলভমানো ৰিজ্জমানেপি উত্তরিং আযুস্মিং অকালে মরতি, ৰিসমাসিতো, মহারাজ, ডয্হন্তেসু অঙ্গপচ্চঙ্গেসু অগদং অলভমানো ৰিজ্জমানেপি উত্তরিং আযুস্মিং অকালে মরতি, অগ্গিগতো, মহারাজ, ঝাযমানো নিব্বাপনং অলভমানো ৰিজ্জমানেপি উত্তরিং আযুস্মিং অকালে মরতি, উদকগতো, মহারাজ, পতিট্ঠং অলভমানো ৰিজ্জমানেপি উত্তরিং আযুস্মিং অকালে মরতি, সত্তিহতো, মহারাজ, আবাধিকো ভিসক্কং অলভমানো ৰিজ্জমানেপি উত্তরিং আযুস্মিং অকালে মরতি, ইমে খো, মহারাজ, সত্ত ৰিজ্জমানেপি উত্তরিং আযুস্মিং অকালে মরন্তি. তত্রাপাহং, মহারাজ, একংসেন ৰদামি.

‘‘অট্ঠৰিধেন, মহারাজ, সত্তানং কালঙ্কিরিযা হোতি, ৰাতসমুট্ঠানেন পিত্তসমুট্ঠানেন সেম্হসমুট্ঠানেন সন্নিপাতিকেন উতুৰিপরিণামেন ৰিসমপরিহারেন ওপক্কমিকেন কম্মৰিপাকেন, মহারাজ, সত্তানং কালঙ্কিরিযা হোতি. তত্র, মহারাজ, যদিদং কম্মৰিপাকেন কালঙ্কিরিযা, সা যেৰ তত্থ সামযিকা [সামাযিকা (ক.)] কালঙ্কিরিযা, অৰসেসা অসামযিকা কালঙ্কিরিযাতি. ভৰতি চ –

‘‘‘জিঘচ্ছায পিপাসায, অহিদট্ঠা [অহিদট্ঠো (সী.), অহিনা দট্ঠো (পী.)] ৰিসেন চ;

অগ্গিউদকসত্তীহি, অকালে তত্থ মীযতি;

ৰাতপিত্তেন সেম্হেন, সন্নিপাতেনুতূহি চ;

ৰিসমোপক্কমকম্মেহি, অকালে তত্থ মীযতী’তি.

‘‘কেচি, মহারাজ, সত্তা পুব্বে কতেন তেন তেন অকুসলকম্মৰিপাকেন মরন্তি. ইধ, মহারাজ, যো পুব্বে পরে জিঘচ্ছায মারেতি, সো বহূনি ৰস্সসতসহস্সানি জিঘচ্ছায পরিপীল়িতো ছাতো পরিকিলন্তো সুক্খমিলাতহদযো বুভুক্খিতো [সুক্খিতো (সী. পী. ক.)] ৰিসুক্খিতো ঝাযন্তো অব্ভন্তরং পরিডয্হন্তো জিঘচ্ছায যেৰ মরতি দহরোপি মজ্ঝিমোপি মহল্লকোপি, ইদম্পি তস্স সামযিকমরণং.

‘‘যো পুব্বে পরে পিপাসায মারেতি, সো বহূনি ৰস্সসতসহস্সানি পেতো হুত্ৰা নিজ্ঝামতণ্হিকো সমানো লূখো কিসো পরিসুক্খিতহদযো পিপাসায যেৰ মরতি দহরোপি মজ্ঝিমোপি মহল্লকোপি, ইদম্পি তস্স সামযিকমরণং.

‘‘যো পুব্বে পরে অহিনা ডংসাপেত্ৰা মারেতি, সো বহূনি ৰস্সসতসহস্সানি অজগরমুখেনেৰ অজগরমুখং কণ্হসপ্পমুখেনেৰ কণ্হসপ্পমুখং পরিৰত্তিত্ৰা তেহি খাযিতখাযিতো অহীহি দট্ঠো যেৰ মরতি দহরোপি মজ্ঝিমোপি মহল্লকোপি, ইদম্পি তস্স সামযিকমরণং.

‘‘যো পুব্বে পরে ৰিসং দত্ৰা মারেতি, সো বহূনি ৰস্সসতসহস্সানি ডয্হন্তেহি অঙ্গপচ্চঙ্গেহি ভিজ্জমানেন সরীরেন কুণপগন্ধং ৰাযন্তো ৰিসেনেৰ মরতি দহরোপি মজ্ঝিমোপি মহল্লকোপি, ইদম্পি তস্স সামযিকমরণং.

‘‘যো পুব্বে পরে অগ্গিনা মারেতি, সো বহূনি ৰস্সসতসহস্সানি অঙ্গারপব্বতেনেৰ অঙ্গারপব্বতং যমৰিসযেনেৰ যমৰিসযং পরিৰত্তিত্ৰা দড্ঢৰিদড্ঢগত্তো অগ্গিনা যেৰ মরতি দহরোপি মজ্ঝিমোপি মলল্লকোপি, ইদম্পি তস্স সামযিকমরণং.

‘‘যো পুব্বে পরে উদকেন মারেতি, সো বহূনি ৰস্সসতসহস্সানি হতৰিলুত্তভগ্গদুব্বলগত্তো খুব্ভিতচিত্তো [খুভিতচিত্তো (সী. পী.)] উদকেনেৰ [উদকে যেৰ (বহূসু)] মরতি দহরোপি মজ্ঝিমোপি মহল্লকোপি, ইদম্পি তস্স সামযিকমরণং.

‘‘যো পুব্বে পরে সত্তিযা মারেতি, সো বহূনি ৰস্সসতসহস্সানি ছিন্নভিন্নকোট্টিতৰিকোট্টিতো সত্তিমুখসমাহতো সত্তিযা যেৰ মরতি দহরোপি মজ্ঝিমোপি মহল্লকোপি, ইদম্পি তস্স সামযিকমরণং’’.

‘‘ভন্তে নাগসেন, অকালে মরণং অত্থীতি যং ৰদেতি, ইঙ্ঘ মে ত্ৰং তত্থ কারণং অতিদিসাতি’’. ‘‘যথা, মহারাজ, মহতিমহাঅগ্গিক্খন্ধো আদিন্নতিণকট্ঠসাখাপলাসো পরিযাদিন্নভক্খো উপাদানসঙ্খযা নিব্বাযতি, সো অগ্গি ৰুচ্চতি ‘অনীতিকো অনুপদ্দৰো সমযে নিব্বুতো নামা’তি, এৰমেৰ খো, মহারাজ, যো কোচি বহূনি দিৰসসহস্সানি জীৰিত্ৰা জরাজিণ্ণো আযুক্খযা অনীতিকো অনুপদ্দৰো মরতি, সো ৰুচ্চতি ‘সমযে মরণমুপগতো’তি.

‘‘যথা ৰা পন, মহারাজ, মহতিমহাঅগ্গিক্খন্ধো আদিন্নতিণকট্ঠসাখাপলাসো অস্স, তং অপরিযাদিন্নে যেৰ তিণকট্ঠসাখাপলাসে মহতিমহামেঘো অভিপ্পৰস্সিত্ৰা নিব্বাপেয্য, অপি নু খো, মহারাজ, মহাঅগ্গিক্খন্ধো সমযে নিব্বুতো নাম হোতী’’তি? ‘‘ন হি, ভন্তে’’তি. ‘‘কিস্স পন সো, মহারাজ, পচ্ছিমো অগ্গিক্খন্ধো পুরিমকেন অগ্গিক্খন্ধেন সমসমগতিকো নাহোসী’’তি? ‘‘আগন্তুকেন, ভন্তে, মেঘেন পটিপীল়িতো সো অগ্গিক্খন্ধো অসমযে নিব্বুতো’’তি. এৰমেৰ খো, মহারাজ, যো কোচি অকালে মরতি, সো আগন্তুকেন রোগেন পটিপীল়িতো ৰাতসমুট্ঠানেন ৰা পিত্তসমুট্ঠানেন ৰা সেম্হসমুট্ঠানেন ৰা সন্নিপাতিকেন ৰা উতুপরিণামজেন ৰা ৰিসমপরিহারজেন ৰা ওপক্কমিকেন ৰা জিঘচ্ছায ৰা পিপাসায ৰা সপ্পদট্ঠেন ৰা ৰিসমাসিতেন ৰা অগ্গিনা ৰা উদকেন ৰা সত্তিৰেগপ্পটিপীল়িতো ৰা অকালে মরতি. ইদমেত্থ, মহারাজ, কারণং, যেন কারণেন অকালে মরণং অত্থি.

‘‘যথা ৰা পন, মহারাজ, গগনে মহতিমহাৰলাহকো উট্ঠহিত্ৰা নিন্নঞ্চ থলঞ্চ পরিপূরযন্তো অভিৰস্সতি, সো ৰুচ্চতি ‘মেঘো অনীতিকো অনুপদ্দৰো ৰস্সতী’তি. এৰমেৰ খো, মহারাজ, যো কোচি চিরং জীৰিত্ৰা জরাজিণ্ণো আযুক্খযা অনীতিকো অনুপদ্দৰো মরতি, সো ৰুচ্চতি ‘সমযে মরণমুপগতো’তি.

‘‘যথা ৰা পন, মহারাজ, গগনে মহতিমহাৰলাহকো উট্ঠহিত্ৰা অন্তরাযেৰ মহতা ৰাতেন অব্ভত্থং গচ্ছেয্য, অপি নু খো সো, মহারাজ, মহাৰলাহকো সমযে ৰিগতো নাম হোতী’’তি? ‘‘ন হি, ভন্তে’’তি. ‘‘কিস্স পন সো, মহারাজ, পচ্ছিমো ৰলাহকো পুরিমেন ৰলাহকেন সমসমগতিকো নাহোসী’’তি? ‘‘আগন্তুকেন, ভন্তে, ৰাতেন পটিপীল়িতো সো ৰলাহকো অসমযপ্পত্তো যেৰ ৰিগতো’’তি. ‘‘এৰমেৰ খো, মহারাজ, যো কোচি অকালে মরতি, সো আগন্তুকেন রোগেন পটিপীল়িতো ৰাতসমুট্ঠানেন ৰা…পে… সত্তিৰেগপ্পটিপীল়িতো ৰা অকালে মরতি. ইদমেত্থ, মহারাজ, কারণং, যেন কারণেন অকালে মরণং অত্থীতি.

‘‘যথা ৰা পন, মহারাজ, বলৰা আসীৰিসো কুপিতো কিঞ্চিদেৰ পুরিসং ডংসেয্য, তস্স তং ৰিসং অনীতিকং অনুপদ্দৰং মরণং পাপেয্য, তং ৰিসং ৰুচ্চতি ‘অনীতিকমনুপদ্দৰং কোটিগত’ন্তি. এৰমেৰ খো, মহারাজ, যো কোচি চিরং জীৰিত্ৰা জরাজিণ্ণো আযুক্খযা অনীতিকো অনুপদ্দৰো মরতি, সো ৰুচ্চতি ‘অনীতিকো অনুপদ্দৰো জীৰিতকোটিগতো সামযিকং মরণমুপগতো’তি.

‘‘যথা ৰা পন, মহারাজ, বলৰতা আসীৰিসেন দট্ঠস্স অন্তরাযেৰ আহিতুণ্ডিকো অগদং দত্ৰা অৰিসং করেয্য, অপি নু খো তং, মহারাজ, ৰিসং সমযে ৰিগতং নাম হোতী’’তি? ‘‘ন হি ভন্তে’’তি. ‘‘কিস্স পন তং, মহারাজ, পচ্ছিমং ৰিসং পুরিমকেন ৰিসেন সমসমগতিকং নাহোসী’’তি? ‘‘আগন্তুকেন, ভন্তে, অগদেন পটিপীল়িতং ৰিসং অকোটিগতং যেৰ ৰিগত’’ন্তি. ‘‘এৰমেৰ খো, মহারাজ, যো কোচি অকালে মরতি, সো আগন্তুকেন রোগেন পটিপীল়িতো ৰাতসমুট্ঠানেন ৰা…পে… সত্তিৰেগপ্পটিপীল়িতো ৰা অকালে মরতি. ইদমেত্থ, মহারাজ, কারণং, যেন কারণেন অকালে মরণং অত্থীতি.

‘‘যথা ৰা পন, মহারাজ, ইস্সাসো সরং পাতেয্য, সচে সো সরো যথাগতিগমনপথমত্থকং গচ্ছতি, সো সরো ৰুচ্চতি ‘অনীতিকো অনুপদ্দৰো যথাগতিগমনপথমত্থকং গতো নামা’তি. এৰমেৰ খো, মহারাজ, যো কোচি চিরং জীৰিত্ৰা জরাজিণ্ণো আযুক্খযা অনীতিকো অনুপদ্দৰো মরতি, সো ৰুচ্চতি ‘অনীতিকো অনুপদ্দৰো সমযে মরণমুপগতো’তি.

‘‘যথা ৰা পন, মহারাজ, ইস্সাসো সরং পাতেয্য, তস্স তং সরং তস্মিং যেৰ খণে কোচি গণ্হেয্য, অপি নু খো সো, মহারাজ, সরো যথাগতিগমনপথমত্থকং গতো নাম হোতী’’তি? ‘‘ন হি, ভন্তে’’তি. ‘‘কিস্স পন সো, মহারাজ, পচ্ছিমো সরো পুরিমকেন সরেন সমসমগতিকো নাহোসী’’তি? ‘‘আগন্তুকেন, ভন্তে, গহণেন তস্স সরস্স গমনং উপচ্ছিন্ন’’ন্তি. ‘‘এৰমেৰ খো, মহারাজ, যো কোচি অকালে মরতি, সো আগন্তুকেন রোগেন পটিপীল়িতো ৰাতসমুট্ঠানেন ৰা…পে… সত্তিৰেগপ্পটিপীল়িতো ৰা অকালে মরতি. ইদমেত্থ, মহারাজ, কারণং, যেন কারণেন অকালে মরণং অত্থীতি.

‘‘যথা ৰা পন, মহারাজ, যো কোচি লোহমযং ভাজনং আকোটেয্য, তস্স আকোটনেন সদ্দো নিব্বত্তিত্ৰা যথাগতিগমনপথমত্থকং গচ্ছতি, সো সদ্দো ৰুচ্চতি ‘অনীতিকো অনুপদ্দৰো যথাগতিগমনপথমত্থকং গতো নামা’তি. এৰমেৰ খো, মহারাজ, যো কোচি বহূনি দিৰসসহস্সানি জীৰিত্ৰা জরাজিণ্ণো আযুক্খযা অনীতিকো অনুপদ্দৰো মরতি, সো ৰুচ্চতি ‘অনীতিকো অনুপদ্দৰো সমযে মরণমুপাগতো’তি.

‘‘যথা ৰা পন, মহারাজ, যো কোচি লোহমযং ভাজনং আকোটেয্য, তস্স আকোটনেন সদ্দো নিব্বত্তেয্য, নিব্বত্তে সদ্দে অদূরগতে কোচি আমসেয্য, সহ আমসনেন সদ্দো নিরুজ্ঝেয্য, অপি নু খো সো, মহারাজ, সদ্দো যথাগতিগমনপথমত্থকং গতো নাম হোতী’’তি? ‘‘ন হি, ভন্তে’’তি. ‘‘কিস্স পন, মহারাজ, পচ্ছিমো সদ্দো পুরিমকেন সদ্দেন সমসমগতিকো নাহোসী’’তি? ‘‘আগন্তুকেন, ভন্তে, আমসনেন সো সদ্দো উপরতো’’তি. ‘‘এৰমেৰ খো, মহারাজ, যো কোচি অকালে মরতি, সো আগন্তুকেন রোগেন পটিপীল়িতো ৰাতসমুট্ঠানেন ৰা…পে… সত্তিৰেগপ্পটিপীল়িতো ৰা অকালে মরতি. ইদমেত্থ মহারাজ কারণং, যেন কারণেন অকালে মরণং অত্থীতি.

‘‘যথা ৰা পন, মহারাজ, খেত্তে সুৰিরূল়্হং ধঞ্ঞবীজং সম্মা পৰত্তমানেন ৰস্সেন ওততৰিততআকিণ্ণবহুফলং হুত্ৰা [উট্ঠিতআকিণ্ণবহুফলং ভৰিত্ৰা (স্যা.)] সস্সুট্ঠানসমযং পাপুণাতি, তং ধঞ্ঞং ৰুচ্চতি ‘অনীতিকমনুপদ্দৰং সমযসম্পত্তং নাম হোতী’তি. এৰমেৰ খো, মহারাজ, যো কোচি বহূনি দিৰসসহস্সানি জীৰিত্ৰা জরাজিণ্ণো আযুক্খযা অনীতিকো অনুপদ্দৰো মরতি, সো ৰুচ্চতি ‘অনীতিকো অনুপদ্দৰো সমযে মরণমুপগতো’তি.

‘‘যথা ৰা পন, মহারাজ, খেত্তে সুৰিরূল়্হং ধঞ্ঞবীজং উদকেন ৰিকলং মরেয্য, অপি নু খো তং, মহারাজ, ধঞ্ঞং অসমযসম্পত্তং নাম হোতী’’তি? ‘‘ন হি, ভন্তে’’তি. ‘‘কিস্স পন তং, মহারাজ, পচ্ছিমং ধঞ্ঞং পুরিমকেন ধঞ্ঞেন সমসমগতিকং নাহোসী’’তি? ‘‘আগন্তুকেন, ভন্তে, উণ্হেন পটিপীল়িতং তং ধঞ্ঞং মত’’ন্তি. ‘‘এৰমেৰ খো, মহারাজ, যো কোচি অকালে মরতি, সো আগন্তুকেন রোগেন পটিপীল়িতো ৰাতসমুট্ঠানেন ৰা…পে… সত্তিৰেগপ্পটিপীল়িতো ৰা অকালে মরতি. ইদমেত্থ, মহারাজ, কারণং, যেন কারণেন অকালে মরণং অত্থীতি.

‘‘সুতপুব্বং পন তযা, মহারাজ, ‘সম্পন্নতরুণসস্সং কিমযো উট্ঠহিত্ৰা সমূলং নাসেন্তী’’’তি? ‘‘সুতপুব্বঞ্চেৰ তং, ভন্তে, অম্হেহি দিট্ঠপুব্বঞ্চা’’তি. ‘‘কিং নু খো তং, মহারাজ, সস্সং কালে নট্ঠং, উদাহু অকালে নট্ঠ’’ন্তি? ‘‘অকালে, ভন্তে, যদি খো তং, ভন্তে, সস্সং কিমযো ন খাদেয্যুং, সস্সুদ্ধরণসমযং পাপুণেয্যা’’তি. ‘‘কিং পন, মহারাজ, আগন্তুকেন উপঘাতেন সস্সং ৰিনস্সতি, নিরুপঘাতং সস্সং সস্সুদ্ধরণসমযং পাপুণাতী’’তি? ‘‘আম, ভন্তে’’তি. ‘‘এৰমেৰ খো, মহারাজ, যো কোচি অকালে মরতি, সো আগন্তুকেন রোগেন পটিপীল়িতো ৰাতসমুট্ঠানেন ৰা…পে… সত্তিৰেগপ্পটিপীল়িতো ৰা মরতি. ইদমেত্থ, মহারাজ, কারণং, যেন কারণেন অকালে মরণং অত্থীতি.

‘‘সুতপুব্বং পন তযা, মহারাজ, ‘সম্পন্নে সস্সে ফলভারনমিতে মঞ্চরিতপত্তে করকৰস্সং নাম ৰস্সজাতি নিপতিত্ৰা ৰিনাসেতি অফলং করোতী’তি? ‘‘সুতপুব্বঞ্চেৰ তং, ভন্তে, অম্হেহি দিট্ঠপুব্বঞ্চা’’তি. ‘‘অপি নু খো তং, মহারাজ, সস্সং কালে নট্ঠং, উদাহু অকালে নট্ঠ’’ন্তি? ‘‘অকালে, ভন্তে, যদি খো তং, ভন্তে, সস্সং করকৰস্সং ন ৰস্সেয্য সস্সুদ্ধরণসমযং পাপুণেয্যা’’তি. ‘‘কিং পন, মহারাজ, আগন্তুকেন উপঘাতেন সস্সং ৰিনস্সতি, নিরুপঘাতং সস্সং সস্সুদ্ধরণসমযং পাপুণাতী’’তি? ‘‘আম, ভন্তে’’তি. ‘‘এৰমেৰ খো, মহারাজ, যো কোচি অকালে মরতি, সো আগন্তুকেন রোগেন পটিপীল়িতো ৰাতসমুট্ঠানেন ৰা পিত্তসমুট্ঠানেন ৰা সেম্হসমুট্ঠানেন ৰা সন্নিপাতিকেন ৰা উতুপরিণামজেন ৰা ৰিসমপরিহারজেন ৰা ওপক্কমিকেন ৰা জিঘচ্ছায ৰা পিপাসায ৰা সপ্পদট্ঠেন ৰা ৰিসমাসিতেন ৰা অগ্গিনা ৰা উদকেন ৰা সত্তিৰেগপ্পটিপীল়িতো ৰা অকালে মরতি. যদি পন আগন্তুকেন রোগেন পটিপীল়িতো ন ভৰেয্য, সমযেৰ মরণং পাপুণেয্য. ইদমেত্থ, মহারাজ, কারণং, যেন কারণেন অকালে মরণং অত্থী’’তি.

‘‘অচ্ছরিযং, ভন্তে নাগসেন, অব্ভুতং ভন্তে নাগসেন, সুদস্সিতং কারণং, সুদস্সিতং ওপম্মং অকালে মরণস্স পরিদীপনায, ‘অত্থি অকালে মরণ’ন্তি উত্তানীকতং পাকটং কতং ৰিভূতং কতং, অচিত্তৰিক্খিত্তকোপি, ভন্তে নাগসেন, মনুজো একমেকেনপি তাৰ ওপম্মেন নিট্ঠং গচ্ছেয্য ‘অত্থি অকালে মরণ’ন্তি, কিং পন মনুজো সচেতনো? পঠমোপম্মেনেৰাহং, ভন্তে, সঞ্ঞত্তো ‘অত্থি অকালে মরণ’ন্তি, অপি চ অপরাপরং নিব্বাহনং সোতুকামো ন সম্পটিচ্ছি’’ন্তি.

অকালমরণপঞ্হো ছট্ঠো.

৭. চেতিযপাটিহারিযপঞ্হো

৭. ‘‘ভন্তে নাগসেন, সব্বেসং পরিনিব্বুতানং চেতিযে পাটিহীরং হোতি, উদাহু একচ্চানং যেৰ হোতী’’তি? ‘‘একচ্চানং, মহারাজ, হোতি, একচ্চানং ন হোতী’’তি. ‘‘কতমেসং, ভন্তে, হোতি, কতমেসং ন হোতী’’তি? ‘‘তিণ্ণন্নং, মহারাজ, অঞ্ঞতরস্স অধিট্ঠানা পরিনিব্বুতস্স চেতিযে পাটিহীরং হোতি. কতমেসং তিণ্ণন্নং? ইধ, মহারাজ, অরহা দেৰমনুস্সানং অনুকম্পায তিট্ঠন্তোৰ অধিট্ঠাতি ‘এৰংনাম চেতিযে পাটিহীরং হোতূ’তি, তস্স অধিট্ঠানৰসেন চেতিযে পাটিহীরং হোতি, এৰং অরহতো অধিট্ঠানৰসেন পরিনিব্বুতস্স চেতিযে পাটিহীরং হোতি.

‘‘পুন চপরং, মহারাজ, দেৰতা মনুস্সানং অনুকম্পায পরিনিব্বুতস্স চেতিযে পাটিহীরং দস্সেন্তি ‘ইমিনা পাটিহীরেন সদ্ধম্মো নিচ্চসম্পগ্গহিতো ভৰিস্সতি, মনুস্সা চ পসন্না কুসলেন অভিৰড্ঢিস্সন্তী’তি, এৰং দেৰতানং অধিট্ঠানৰসেন পরিনিব্বুতস্স চেতিযে পাটিহীরং হোতি.

‘‘পুন চপরং, মহারাজ, ইত্থী ৰা পুরিসো ৰা সদ্ধো পসন্নো পণ্ডিতো ব্যত্তো মেধাৰী বুদ্ধিসম্পন্নো যোনিসো চিন্তযিত্ৰা গন্ধং ৰা মালং ৰা দুস্সং ৰা অঞ্ঞতরং ৰা কিঞ্চি অধিট্ঠহিত্ৰা চেতিযে উক্খিপতি ‘এৰংনাম হোতূ’তি, তস্সপি অধিট্ঠানৰসেন পরিনিব্বুতস্স চেতিযে পাটিহীরং হোতি, এৰং মনুস্সানং অধিট্ঠানৰসেন পরিনিব্বুতস্স চেতিযে পাটিহীরং হোতি.

‘‘ইমেসং খো, মহারাজ, তিণ্ণন্নং অঞ্ঞতরস্স অধিট্ঠানৰসেন পরিনিব্বুতস্স চেতিযে পাটিহীরং হোতি.

‘‘যদি, মহারাজ, তেসং অধিট্ঠানং ন হোতি, খীণাসৰস্সপি ছল়ভিঞ্ঞস্স চেতোৰসিপ্পত্তস্স চেতিযে পাটিহীরং ন হোতি, অসতিপি, মহারাজ, পাটিহীরে চরিতং দিস্ৰা সুপরিসুদ্ধং ওকপ্পেতব্বং নিট্ঠং গন্তব্বং সদ্দহিতব্বং ‘সুপরিনিব্বুতো অযং বুদ্ধপুত্তো’’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

চেতিযপাটিহারিযপঞ্হো সত্তমো.

৮. ধম্মাভিসমযপঞ্হো

৮. ‘‘ভন্তে নাগসেন, যে তে সম্মা পটিপজ্জন্তি, তেসং সব্বেসং যেৰ ধম্মাভিসমযো হোতি, উদাহু কস্সচি ন হোতী’’তি? ‘‘কস্সচি, মহারাজ, হোতি, কস্সচি ন হোতী’’তি. ‘‘কস্স ভন্তে হোতি, কস্স ন হোতী’’তি? ‘‘তিরচ্ছানগতস্স, মহারাজ, সুপ্পটিপন্নস্সাপি ধম্মাভিসমযো ন হোতি, পেত্তিৰিসযূপপন্নস্স…পে… মিচ্ছাদিট্ঠিকস্স…পে… কুহকস্স…পে… মাতুঘাতকস্স…পে… পিতুঘাতকস্স…পে… অরহন্তঘাতকস্স…পে… সঙ্ঘভেদকস্স…পে… লোহিতুপ্পাদকস্স…পে… থেয্যসংৰাসকস্স…পে… তিত্থিযপক্কন্তস্স…পে… ভিক্খুনিদূসকস্স…পে… তেরসন্নং গরুকাপত্তীনং অঞ্ঞতরং আপজ্জিত্ৰা অৰুট্ঠিতস্স…পে… পণ্ডকস্স…পে… উভতোব্যঞ্জনকস্স সুপ্পটিপন্নস্সাপি ধম্মাভিসমযো ন হোতি…পে… যোপি মনুস্সদহরকো ঊনকসত্তৰস্সিকো, তস্স সুপ্পটিপন্নস্সাপি ধম্মাভিসমযো ন হোতি. ইমেসং খো, মহারাজ, সোল়সন্নং পুগ্গলানং সুপ্পটিপন্নানম্পি ধম্মাভিসমযো ন হোতী’’তি.

‘‘ভন্তে নাগসেন, যে তে পন্নরস পুগ্গলা ৰিরুদ্ধা যেৰ, তেসং ধম্মাভিসমযো হোতু ৰা মা ৰা হোতু, অথ কেন কারণেন মনুস্সদহরকস্স ঊনকসত্তৰস্সিকস্স সুপ্পটিপন্নস্সাপি ধম্মাভিসমযো ন হোতি? এত্থ তাৰ পঞ্হো ভৰতি ‘ননু নাম দহরকস্স ন রাগো হোতি, ন দোসো হোতি, ন মোহো হোতি, ন মানো হোতি, ন মিচ্ছাদিট্ঠি হোতি, ন অরতি হোতি, ন কামৰিতক্কো হোতি, অমিস্সিতো কিলেসেহি, সো নাম দহরকো যুত্তো চ পত্তো চ অরহতি চ চত্তারি সচ্চানি একপটিৰেধেন পটিৰিজ্ঝিতু’’’ন্তি.

‘‘তঞ্ঞেৰেত্থ, মহারাজ, কারণং, যেনাহং কারণেন ভণামি ‘ঊনকসত্তৰস্সিকস্স সুপ্পটিপন্নস্সাপি ধম্মাভিসমযো ন হোতী’তি. যদি, মহারাজ, ঊনকসত্তৰস্সিকো রজনীযে রজ্জেয্য, দুস্সনীযে দুস্সেয্য, মোহনীযে মুয্হেয্য, মদনীযে মজ্জেয্য, দিট্ঠিং ৰিজানেয্য, রতিঞ্চ অরতিঞ্চ ৰিজানেয্য, কুসলাকুসলং ৰিতক্কেয্য, ভৰেয্য তস্স ধম্মাভিসমযো, অপি চ, মহারাজ, ঊনকসত্তৰস্সিকস্স চিত্তং অবলং দুব্বলং পরিত্তং অপ্পং থোকং মন্দং অৰিভূতং, অসঙ্খতা নিব্বানধাতু গরুকা ভারিকা ৰিপুলা মহতী. ঊনকসত্তৰস্সিকো, মহারাজ, তেন দুব্বলেন চিত্তেন পরিত্তকেন মন্দেন অৰিভূতেন ন সক্কোতি গরুকং ভারিকং ৰিপুলং মহতিং অসঙ্খতং নিব্বানধাতুং পটিৰিজ্ঝিতুং.

‘‘যথা, মহারাজ, সিনেরুপব্বতরাজা গরুকো ভারিকো ৰিপুলো মহন্তো, অপি নু খো তং, মহারাজ, পুরিসো অত্তনো পাকতিকেন থামবলৰীরিযেন সক্কুণেয্য সিনেরুপব্বতরাজানং উদ্ধরিতু’’ন্তি? ‘‘ন হি, ভন্তে’’তি. ‘‘কেন কারণেন মহারাজা’’তি? ‘‘দুব্বলত্তা, ভন্তে, পুরিসস্স, মহন্তত্তা সিনেরুপব্বতরাজস্সা’’তি. ‘‘এৰমেৰ খো, মহারাজ, ঊনকসত্তৰস্সিকস্স চিত্তং অবলং দুব্বলং পরিত্তং অপ্পং থোকং মন্দং অৰিভূতং, অসঙ্খতা নিব্বানধাতু গরুকা ভারিকা ৰিপুলা মহতী. ঊনকসত্তৰস্সিকো তেন দুব্বলেন চিত্তেন পরিত্তেন মন্দেন অৰিভূতেন ন সক্কোতি গরুকং ভারিকং ৰিপুলং মহতিং অসঙ্খতং নিব্বানধাতুং পটিৰিজ্ঝিতুং, তেন কারণেন ঊনকসত্তৰস্সিকস্স সুপ্পটিপন্নস্সাপি ধম্মাভিসমযো ন হোতি.

‘‘যথা ৰা পন, মহারাজ, অযং মহাপথৰী দীঘা আযতা পুথুলা ৰিত্থতা ৰিসালা ৰিত্থিণ্ণা ৰিপুলা মহন্তা, অপি নু খো তং, মহারাজ, মহাপথৰিং সক্কা পরিত্তকেন উদকবিন্দুকেন তেমেত্ৰা উদকচিক্খল্লং কাতু’’ন্তি? ‘‘ন হি, ভন্তে’’তি. ‘‘কেন কারণেন, মহারাজা’’তি? ‘‘পরিত্তত্তা, ভন্তে, উদকবিন্দুস্স, মহন্তত্তা মহাপথৰিযা’’তি. ‘‘এৰমেৰ খো, মহারাজ, ঊনকসত্তৰস্সিকস্স চিত্তং অবলং দুব্বলং পরিত্তং অপ্পং থোকং মন্দং অৰিভূতং, অসঙ্খতা নিব্বানধাতু দীঘা আযতা পুথুলা ৰিত্থতা ৰিসালা ৰিত্থিণ্ণা ৰিপুলা মহন্তা. ঊনকসত্তৰস্সিকো তেন দুব্বলেন চিত্তেন পরিত্তকেন মন্দেন অৰিভূতেন ন সক্কোতি মহতিং অসঙ্খতং নিব্বানধাতুং পটিৰিজ্ঝিতুং, তেন কারণেন ঊনকসত্তৰস্সিকস্স সুপ্পটিপন্নস্সাপি ধম্মাভিসমযো ন হোতি.

‘‘যথা ৰা পন, মহারাজ, অবলদুব্বলপরিত্তঅপ্পথোকমন্দগ্গি ভৰেয্য, অপি নু খো, মহারাজ, তাৰতকেন মন্দেন অগ্গিনা সক্কা সদেৰকে লোকে অন্ধকারং ৰিধমিত্ৰা আলোকং দস্সেতু’’ন্তি? ‘‘ন হি, ভন্তে’’তি. ‘‘কেন কারণেন মহারাজা’’তি? ‘‘মন্দত্তা, ভন্তে, অগ্গিস্স, লোকস্স মহন্তত্তা’’তি. ‘‘এৰমেৰ খো, মহারাজ, ঊনকসত্তৰস্সিকস্স চিত্তং অবলং দুব্বলং পরিত্তং অপ্পং থোকং মন্দং অৰিভূতং, মহতা চ অৰিজ্জন্ধকারেন পিহিতং. তস্মা দুক্করং ঞাণালোকং দস্সযিতুং, তেন কারণেন ঊনকসত্তৰস্সিকস্স সুপ্পটিপন্নস্সাপি ধম্মাভিসমযো ন হোতি.

‘‘যথা ৰা পন, মহারাজ, আতুরো কিসো অণুপরিমিতকাযো সালককিমি হত্থিনাগং তিধা পভিন্নং নৰাযতং তিৰিত্থতং দসপরিণাহং অট্ঠরতনিকং সকট্ঠানমুপগতং দিস্ৰা গিলিতুং পরিকড্ঢেয্য, অপি নু খো সো, মহারাজ, সালককিমি সক্কুণেয্য তং হত্থিনাগং গিলিতু’’ন্তি? ‘‘ন হি, ভন্তে’’তি. ‘‘কেন কারণেন, মহারাজা’’তি? ‘‘পরিত্তত্তা, ভন্তে, সালককিমিস্স, মহন্তত্তা হত্থিনাগস্সা’’তি. ‘‘এৰমেৰ খো, মহারাজ, ঊনকসত্তৰস্সিকস্স চিত্তং অবলং দুব্বলং পরিত্তং অপ্পং থোকং মন্দং অৰিভূতং, মহতী অসঙ্খতা নিব্বানধাতু. সো তেন দুব্বলেন চিত্তেন পরিত্তকেন মন্দেন অৰিভূতেন ন সক্কোতি মহতিং অসঙ্খতং নিব্বানধাতুং পটিৰিজ্ঝিতুং, তেন কারণেন ঊনকসত্তৰস্সিকস্স সুপ্পটিপন্নস্সাপি ধম্মাভিসমযো ন হোতী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

ধম্মাভিসমযপঞ্হো অট্ঠমো.

৯. একন্তসুখনিব্বানপঞ্হো

৯. ‘‘ভন্তে নাগসেন, কিং একন্তসুখং নিব্বানং, উদাহু দুক্খেন মিস্স’’ন্তি? ‘‘একন্তসুখং, মহারাজ, নিব্বানং, দুক্খেন অমিস্স’’ন্তি.

‘‘ন মযং তং, ভন্তে নাগসেন, ৰচনং সদ্দহাম ‘একন্তসুখং নিব্বান’ন্তি, এৰমেত্থ মযং, ভন্তে নাগসেন, পচ্চেম ‘নিব্বানং দুক্খেন মিস্স’ন্তি, কারণঞ্চেত্থ উপলভাম ‘নিব্বানং দুক্খেন মিস্স’ন্তি. কতমং এত্থ কারণং? যে তে, ভন্তে নাগসেন, নিব্বানং পরিযেসন্তি, তেসং দিস্সতি কাযস্স চ চিত্তস্স চ আতাপো পরিতাপো ঠানচঙ্কমনিসজ্জাসযনাহারপরিগ্গহো মিদ্ধস্স চ উপরোধো আযতনানঞ্চ পটিপীল়নং ধনধঞ্ঞপিযঞাতিমিত্তপ্পজহনং. যে কেচি লোকে সুখিতা সুখসমপ্পিতা, তে সব্বেপি পঞ্চহি কামগুণেহি আযতনে রমেন্তি ব্রূহেন্তি, মনাপিকমনাপিকবহুৰিধসুভনিমিত্তেন রূপেন চক্খুং রমেন্তি ব্রূহেন্তি, মনাপিকমনাপিকগীতৰাদিতবহুৰিধসুভনিমিত্তেন সদ্দেন সোতং রমেন্তি ব্রূহেন্তি, মনাপিকমনাপিকপুপ্ফফলপত্ততচমূলসারবহুৰিধসুভনিমিত্তেন গন্ধেন ঘানং রমেন্তি ব্রূহেন্তি, মনাপিকমনাপিকখজ্জভোজ্জলেয্যপেয্যসাযনীযবহুৰিধসুভনিমিত্তেন রসেন জিৰ্হং রমেন্তি ব্রুহেন্তি, মনাপিকমনাপিকসণ্হসুখুমমুদুমদ্দৰবহুৰিধসুভনিমিত্তেন ফস্সেন কাযং রমেন্তি ব্রূহেন্তি, মনাপিকমনাপিককল্যাণপাপকসুভাসুভবহুৰিধৰিতক্কমনসিকারেন মনং রমেন্তি ব্রূহেন্তি. তুম্হে তং চক্খুসোতঘানজিৰ্হাকাযমনোব্রূহনং হনথ উপহনথ, ছিন্দথ উপচ্ছিন্দথ, রুন্ধথ উপরুন্ধথ. তেন কাযোপি পরিতপতি, চিত্তম্পি পরিতপতি, কাযে পরিতত্তে কাযিকদুক্খৰেদনং ৰেদিযতি, চিত্তে পরিতত্তে চেতসিকদুক্খৰেদনং ৰেদযতি. ননু মাগণ্ডিযোপি [মাগন্দিযোপি (সী. পী.)] পরিব্বাজকো ভগৰন্তং গরহমানো এৰমাহ ‘ভূনহু [ভূতহচ্চো (পী.), ভূনহচ্চো (ক.)] সমণো গোতমো’তি. ইদমেত্থ কারণং, যেনাহং কারণেন ব্রূমি ‘নিব্বানং দুক্খেন মিস্স’’’ন্তি.

‘‘ন হি, মহারাজ, নিব্বানং দুক্খেন মিস্সং, একন্তসুখং নিব্বানং. যং পন ত্ৰং, মহারাজ, ব্রূসি ‘নিব্বানং দুক্খ’ন্তি, নেতং দুক্খং নিব্বানং নাম, নিব্বানস্স পন সচ্ছিকিরিযায পুব্বভাগো এসো, নিব্বানপরিযেসনং এতং, একন্তসুখং যেৰ, মহারাজ, নিব্বানং, ন দুক্খেন মিস্সং. এত্থ কারণং ৰদামি. অত্থি, মহারাজ, রাজূনং রজ্জসুখং নামা’’তি? ‘‘আম, ভন্তে, অত্থি রাজূনং রজ্জসুখ’’ন্তি. ‘‘অপি নু খো তং, মহারাজ, রজ্জসুখং দুক্খেন মিস্স’’ন্তি? ‘‘ন হি, ভন্তে’’তি. ‘‘কিস্স পন তে, মহারাজ, রাজানো পচ্চন্তে কুপিতে তেসং পচ্চন্তনিস্সিতানং পটিসেধায অমচ্চেহি পরিণাযকেহি ভটেহি বলত্থেহি পরিৰুতা পৰাসং গন্ত্ৰা ডংসমকসৰাতাতপপটিপীল়িতা সমৰিসমে পরিধাৰন্তি, মহাযুদ্ধঞ্চ করোন্তি, জীৰিতসংসযঞ্চ পাপুণন্তী’’তি? ‘‘নেতং, ভন্তে নাগসেন, রজ্জসুখং নাম, রজ্জসুখস্স পরিযেসনায পুব্বভাগো এসো, দুক্খেন, ভন্তে নাগসেন, রাজানো রজ্জং পরিযেসিত্ৰা রজ্জসুখং অনুভৰন্তি, এৰং, ভন্তে নাগসেন, রজ্জসুখং দুক্খেন অমিস্সং, অঞ্ঞং তং রজ্জসুখং, অঞ্ঞং দুক্খ’’ন্তি. ‘‘এৰমেৰ খো, মহারাজ, একন্তসুখং নিব্বানং, ন দুক্খেন মিস্সং. যে পন তং নিব্বানং পরিযেসন্তি, তে কাযঞ্চ চিত্তঞ্চ আতাপেত্ৰা ঠানচঙ্কমনিসজ্জাসযনাহারং পরিগ্গহেত্ৰা মিদ্ধং উপরুন্ধিত্ৰা আযতনানি পটিপীল়েত্ৰা কাযঞ্চ জীৰিতঞ্চ পরিচ্চজিত্ৰা দুক্খেন নিব্বানং পরিযেসিত্ৰা একন্তসুখং নিব্বানং অনুভৰন্তি, নিহতপচ্চামিত্তা ৰিয রাজানো রজ্জসুখং. এৰং, মহারাজ, একন্তসুখং নিব্বানং, ন দুক্খেন মিস্সং, অঞ্ঞং নিব্বানং, অঞ্ঞং দুক্খন্তি.

‘‘অপরম্পি, মহারাজ, উত্তরিং কারণং সুণোহি একন্তসুখং নিব্বানং, ন দুক্খেন মিস্সং, অঞ্ঞং দুক্খং, অঞ্ঞং নিব্বানন্তি. অত্থি, মহারাজ, আচরিযানং সিপ্পৰন্তানং সিপ্পসুখং নামা’’তি? ‘‘আম, ভন্তে, অত্থি আচরিযানং সিপ্পৰন্তানং সিপ্পসুখ’’ন্তি. ‘‘অপি নু খো তং, মহারাজ, সিপ্পসুখং দুক্খেন মিস্স’’ন্তি? ‘‘ন হি, ভন্তে’’তি. ‘‘কিস্স পন তে, মহারাজ, আচরিযা [ইদং পদং সী. পী. পোত্থকেসু নত্থি] আচরিযানং অভিৰাদনপচ্চুট্ঠানেন উদকাহরণঘরসম্মজ্জনদন্তকট্ঠমুখোদকানুপ্পদানেন উচ্ছিট্ঠপটিগ্গহণউচ্ছাদননহাপনপাদপরিকম্মেন সকচিত্তং নিক্খিপিত্ৰা পরচিত্তানুৰত্তনেন দুক্খসেয্যায ৰিসমভোজনেন কাযং আতাপেন্তী’’তি? ‘‘নেতং, ভন্তে নাগসেন, সিপ্পসুখং নাম, সিপ্পপরিযেসনায পুব্বভাগো এসো, দুক্খেন, ভন্তে নাগসেন, আচরিযা সিপ্পং পরিযেসিত্ৰা সিপ্পসুখং অনুভৰন্তি, এৰং, ভন্তে নাগসেন, সিপ্পসুখং দুক্খেন অমিস্সং, অঞ্ঞং তং সিপ্পসুখং, অঞ্ঞং দুক্খ’’ন্তি. ‘‘এৰমেৰ খো, মহারাজ, একন্তসুখং নিব্বানং, ন দুক্খেন মিস্সং. যে পন তং নিব্বানং পরিযেসন্তি, তে কাযঞ্চ চিত্তঞ্চ আতাপেত্ৰা ঠানচঙ্কমনিসজ্জাসযনাহারং পরিগ্গহেত্ৰা মিদ্ধং উপরুন্ধিত্ৰা আযতনানি পটিপীল়েত্ৰা কাযঞ্চ জীৰিতঞ্চ পরিচ্চজিত্ৰা দুক্খেন নিব্বানং পরিযেসিত্ৰা একন্তসুখং নিব্বানং অনুভৰন্তি, আচরিযা ৰিয সিপ্পসুখং. এৰং, মহারাজ, একন্তসুখং নিব্বানং, ন দুক্খেন মিস্সং, অঞ্ঞং দুক্খং, অঞ্ঞং নিব্বান’’ন্তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

একন্তসুখনিব্বানপঞ্হো নৰমো.

১০. নিব্বানরূপসণ্ঠানপঞ্হো

১০. ‘‘ভন্তে নাগসেন, ‘নিব্বানং নিব্বান’ন্তি যং ৰদেসি, সক্কা পন তস্স নিব্বানস্স রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা উপদস্সযিতু’’ন্তি? ‘‘অপ্পটিভাগং, মহারাজ, নিব্বানং, ন সক্কা নিব্বানস্স রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা উপদস্সযিতু’’ন্তি. ‘‘এতম্পাহং, ভন্তে নাগসেন, ন সম্পটিচ্ছামি, যং অত্থিধম্মস্স নিব্বানস্স রূপং ৰা সণ্ঠানং ৰা ৰযং ৰা পমাণং ৰা ওপম্মেন ৰা কারণেন ৰা হেতুনা ৰা নযেন ৰা অপঞ্ঞাপনং, কারণেন মং সঞ্ঞাপেহী’’তি. ‘‘হোতু, মহারাজ, কারণেন তং সঞ্ঞাপেস্সামি. অত্থি, মহারাজ, মহাসমুদ্দো নামা’’তি? ‘‘আম, ভন্তে, অত্থেসো মহাসমুদ্দো’’তি. ‘‘সচে তং, মহারাজ, কোচি এৰং পুচ্ছেয্য ‘কিত্তকং, মহারাজ, মহাসমুদ্দে উদকং, কতি পন তে সত্তা, যে মহাসমুদ্দে পটিৰসন্তী’তি, এৰং পুট্ঠো ত্ৰং, মহারাজ, কিন্তি তস্স ব্যাকরেয্যাসী’’তি? ‘‘সচে মং, ভন্তে, কোচি এৰং পুচ্ছেয্য ‘কিত্তকং, মহারাজ, মহাসমুদ্দে উদকং, কতি পন তে সত্তা, যে মহাসমুদ্দে পটিৰসন্তী’তি, তমহং, ভন্তে, এৰং ৰদেয্যং ‘অপুচ্ছিতব্বং মং ত্ৰং অম্ভো পুরিস পুচ্ছসি, নেসা পুচ্ছা কেনচি পুচ্ছিতব্বা, ঠপনীযো এসো পঞ্হো. অৰিভত্তো লোকক্খাযিকেহি মহাসমুদ্দো, ন সক্কা মহাসমুদ্দে উদকং পরিমিনিতুং সত্তা ৰা যে তত্থ ৰাসমুপগতাতি এৰাহং ভন্তে তস্স পটিৰচনং দদেয্য’’’ন্তি.