৫. অনুমানপঞ্হো

১. বুদ্ধৰগ্গো

১. দ্ৰিন্নং বুদ্ধানং অনুপ্পজ্জমানপঞ্হো

১. ‘‘ভন্তে নাগসেন, ভাসিতম্পেতং ভগৰতা ‘অট্ঠানমেতং, ভিক্খৰে, অনৰকাসো, যং একিস্সা লোকধাতুযা দ্ৰে অরহন্তো সম্মাসম্বুদ্ধো অপুব্বং অচরিমং উপ্পজ্জেয্যুং, নেতং ঠানং ৰিজ্জতী’তি. দেসেন্তা চ, ভন্তে নাগসেন, সব্বেপি তথাগতা সত্ততিংস বোধিপক্খিযধম্মে দেসেন্তি, কথযমানা চ চত্তারি অরিযসচ্চানি কথেন্তি, সিক্খাপেন্তা চ তীসু সিক্খাসু সিক্খাপেন্তি, অনুসাসমানা চ অপ্পমাদপ্পটিপত্তিযং অনুসাসন্তি. যদি, ভন্তে নাগসেন, সব্বেসম্পি তথাগতানং একা দেসনা একা কথা একা সিক্খা একা অনুসিট্ঠি, কেন কারণেন দ্ৰে তথাগতা একক্খণে নুপ্পজ্জন্তি? একেনপি তাৰ বুদ্ধুপ্পাদেন অযং লোকো ওভাসজাতো, যদি দুতিযো বুদ্ধো ভৰেয্য, দ্ৰিন্নং পভায অযং লোকো ভিয্যোসোমত্তায ওভাসজাতো ভৰেয্য, ওৰদমানা চ দ্ৰে তথাগতা সুখং ওৰদেয্যুং, অনুসাসমানা চ সুখং অনুসাসেয্যুং, তত্থ মে কারণং ব্রূহি, যথাহং নিস্সংসযো ভৰেয্য’’ন্তি.

‘‘অযং, মহারাজ, দসসহস্সী লোকধাতু একবুদ্ধধারণী, একস্সেৰ তথাগতস্স গুণং ধারেতি, যদি দুতিযো বুদ্ধো উপ্পজ্জেয্য, নাযং দসসহস্সী লোকধাতু ধারেয্য, চলেয্য কম্পেয্য নমেয্য ওনমেয্য ৰিনমেয্য ৰিকিরেয্য ৰিধমেয্য ৰিদ্ধংসেয্য, ন ঠানমুপগচ্ছেয্য.

‘‘যথা, মহারাজ, নাৰা একপুরিসসন্ধারণী [একপুরিসসন্তারণী (সী. পী.)] ভৰেয্য, একস্মিং পুরিসে অভিরূল়্হে সা নাৰা সমুপাদিকা [সমুদকা (ক.)] ভৰেয্য. অথ দুতিযো পুরিসো আগচ্ছেয্য তাদিসো আযুনা ৰণ্ণেন ৰযেন পমাণেন কিসথূলেন সব্বঙ্গপচ্চঙ্গেন, সো তং নাৰং অভিরূহেয্য, অপি নু সা, মহারাজ, নাৰা দ্ৰিন্নম্পি ধারেয্যা’’তি? ‘‘ন হি, ভন্তে, চলেয্য কম্পেয্য নমেয্য ওনমেয্য ৰিনমেয্য ৰিকিরেয্য ৰিধমেয্য ৰিদ্ধংসেয্য, ন ঠানমুপগচ্ছেয্য, ওসীদেয্য উদকে’’তি. ‘‘এৰমেৰ খো, মহারাজ, অযং দসসহস্সী লোকধাতু একবুদ্ধধারণী, একস্সেৰ তথাগতস্স গুণং ধারেতি, যদি দুতিযো বুদ্ধো উপ্পজ্জেয্য, নাযং দসসহস্সী লোকধাতু ধারেয্য, চলেয্য কম্পেয্য নমেয্য ওনমেয্য ৰিনমেয্য ৰিকিরেয্য ৰিধমেয্য ৰিদ্ধংসেয্য, ন ঠানমুপগচ্ছেয্য.

‘‘যথা ৰা পন, মহারাজ, পুরিসো যাৰদত্থং ভোজনং ভুঞ্জেয্য ছাদেন্তং যাৰ কণ্ঠমভিপূরযিত্ৰা, সো ধাতো পীণিতো পরিপুণ্ণো নিরন্তরো তন্দিকতো অনোনমিতদণ্ডজাতো পুনদেৰ তত্তকং ভোজনং ভুঞ্জেয্য, অপি নু খো সো, মহারাজ, পুরিসো সুখিতো ভৰেয্যা’’তি? ‘‘ন হি, ভন্তে, সকিং ভুত্তোৰ মরেয্যা’’তি [ভুত্তো ৰমেয্যাতি (ক.)]. ‘‘এৰমেৰ খো, মহারাজ, অযং দসসহস্সী লোকধাতু একবুদ্ধধারণী, একস্সেৰ তথাগতস্স গুণং ধারেতি, যদি দুতিযো বুদ্ধো উপ্পজ্জেয্য, নাযং দসসহস্সী লোকধাতু ধারেয্য, চলেয্য কম্পেয্য নমেয্য ওনমেয্য ৰিনমেয্য ৰিকিরেয্য ৰিধমেয্য ৰিদ্ধংসেয্য, ন ঠানমুপগচ্ছেয্যা’’তি.

‘‘কিং নু খো, ভন্তে নাগসেন, অতিধম্মভারেন পথৰী চলতী’’তি? ‘‘ইধ, মহারাজ, দ্ৰে সকটা রতনপরিপূরিতা ভৰেয্যুং যাৰ মুখসমা, একস্মা সকটতো রতনং গহেত্ৰা একস্মিং সকটে আকিরেয্যুং, অপি নু খো তং, মহারাজ, সকটং দ্ৰিন্নম্পি সকটানং রতনং ধারেয্যা’’তি? ‘‘ন হি, ভন্তে, নাভিপি তস্স ফলেয্য, অরাপি তস্স ভিজ্জেয্যুং, নেমিপি তস্স ওপতেয্য, অক্খোপি তস্স ভিজ্জেয্যা’’তি. ‘‘কিং নু খো, মহারাজ, অতিরতনভারেন সকটং ভিজ্জতী’’তি? ‘‘আম, ভন্তে’’তি. ‘‘এৰমেৰ খো, মহারাজ, অতিধম্মভারেন পথৰী চলতি.

‘‘অপি চ, মহারাজ, ইমং কারণং বুদ্ধবলপরিদীপনায ওসারিতং. অঞ্ঞম্পি তত্থ অভিরূপং কারণং সুণোহি, যেন কারণেন দ্ৰে সম্মাসম্বুদ্ধো একক্খণে নুপ্পজ্জন্তি. যদি, মহারাজ, দ্ৰে সম্মাসম্বুদ্ধা একক্খণে উপ্পজ্জেয্যুং, তেসং পরিসায ৰিৰাদো উপ্পজ্জেয্য ‘তুম্হাকং বুদ্ধো, অম্হাকং বুদ্ধো’তি, উভতো পক্খজাতা ভৰেয্যুং, যথা, মহারাজ, দ্ৰিন্নং বলৰামচ্চানং পরিসায ৰিৰাদো উপ্পজ্জেয্য ‘তুম্হাকং অমচ্চো, অম্হাকং অমচ্চো’তি, উভতো পক্খজাতা হোন্তি, এৰমেৰ খো, মহারাজ, যদি দ্ৰে সম্মাসম্বুদ্ধা একক্খণে উপ্পজ্জেয্যুং, তেসং পরিসায ৰিৰাদো উপ্পজ্জেয্য ‘তুম্হাকং বুদ্ধো, অম্হাকং বুদ্ধো’তি, উভতো পক্খজাতা ভৰেয্যুং. ইদং তাৰ, মহারাজ, একং কারণং, যেন কারণেন দ্ৰে সম্মাসম্বুদ্ধা একক্খণে নুপ্পজ্জন্তি.

‘‘অপরম্পি, মহারাজ, উত্তরিং কারণং সুণোহি, যেন কারণেন দ্ৰে সম্মাসম্বুদ্ধা একক্খণে নুপ্পজ্জন্তি. যদি, মহারাজ, দ্ৰে সম্মাসম্বুদ্ধা একক্খণে উপ্পজ্জেয্যুং, ‘অগ্গো বুদ্ধো’তি যং ৰচনং, তং মিচ্ছা ভৰেয্য, ‘জেট্ঠো বুদ্ধো’তি যং ৰচনং, তং মিচ্ছা ভৰেয্য, ‘সেট্ঠো বুদ্ধো’তি, ‘ৰিসিট্ঠো বুদ্ধো’তি, ‘উত্তমো বুদ্ধো’তি, ‘পৰরো বুদ্ধো’তি, ‘অসমো বুদ্ধো’তি, ‘অসমসমো বুদ্ধো’তি, ‘অপ্পটিমো বুদ্ধো’তি, ‘অপ্পটিভাগো বুদ্ধো’তি, ‘অপ্পটিপুগ্গলো বুদ্ধো’তি যং ৰচনং, তং মিচ্ছা ভৰেয্য. ইদম্পি খো ত্ৰং, মহারাজ, কারণং অত্থতো সম্পটিচ্ছ, যেন কারণেন দ্ৰে সম্মাসম্বুদ্ধা একক্খণে নুপ্পজ্জন্তি.

‘‘অপি চ খো, মহারাজ, বুদ্ধানং ভগৰন্তানং সভাৰপকতি এসাযং, একো যেৰ বুদ্ধো লোকে উপ্পজ্জতি. কস্মা কারণা? মহন্ততায সব্বঞ্ঞুবুদ্ধগুণানং. অঞ্ঞম্পি, মহারাজ, যং লোকে মহন্তং, তং একং যেৰ হোতি. পথৰী, মহারাজ, মহন্তী, সা একা যেৰ. সাগরো মহন্তো, সো একো যেৰ. সিনেরু গিরিরাজা মহন্তো, সো একো যেৰ. আকাসো মহন্তো, সো একো যেৰ. সক্কো মহন্তো, সো একো যেৰ. মারো মহন্তো, সো একো যেৰ. মহাব্রহ্মা মহন্তো, সো একো যেৰ. তথাগতো অরহং সম্মাসম্বুদ্ধো মহন্তো, সো একো যেৰ লোকস্মিং. যত্থ তে উপ্পজ্জন্তি, তত্থ অঞ্ঞস্স ওকাসো ন হোতি, তস্মা, মহারাজ, তথাগতো অরহং সম্মাসম্বুদ্ধো একো যেৰ লোকস্মিং উপ্পজ্জতী’’তি.

‘‘সুকথিতো, ভন্তে নাগসেন, পঞ্হো ওপম্মেহি কারণেহি. অনিপুণোপেতং সুত্ৰা অত্তমনো ভৰেয্য, কিং পন মাদিসো মহাপঞ্ঞো. সাধু, ভন্তে নাগসেন, এৰমেতং তথা সম্পটিচ্ছামী’’তি.

দ্ৰিন্নং বুদ্ধানং অনুপ্পজ্জমানপঞ্হো পঠমো.

২. গোতমিৰত্থদানপঞ্হো

২. ‘‘ভন্তে নাগসেন, ভাসিতম্পেতং ভগৰতা মাতুচ্ছায মহাপজাপতিযা গোতমিযা ৰস্সিকসাটিকায দীযমানায ‘সঙ্ঘে গোতমি দেহি, সঙ্ঘে তে দিন্নে অহঞ্চেৰ পূজিতো ভৰিস্সামি সঙ্ঘো চা’তি. কিং নু খো, ভন্তে নাগসেন, তথাগতো সঙ্ঘরতনতো ন ভারিকো ন গরুকো ন দক্খিণেয্যো, যং তথাগতো সকায মাতুচ্ছায সযং পিঞ্জিতং [পিচ্ছিতং (সী. পী.)] সযং লুঞ্চিতং সযং পোথিতং সযং কন্তিতং সযং ৰাযিতং ৰস্সিকসাটিকং অত্তনো দীযমানং সঙ্ঘস্স দাপেসি. যদি, ভন্তে নাগসেন, তথাগতো সঙ্ঘরতনতো উত্তরো ভৰেয্য অধিকো ৰা ৰিসিট্ঠো ৰা, ‘মযি দিন্নে মহপ্ফলং ভৰিস্সতী’তি ন তথাগতো মাতুচ্ছায সযং পিঞ্জিতং সযং লুঞ্চিতং সযং পোথিতং ৰস্সিকসাটিকং সঙ্ঘে দাপেয্য, যস্মা চ খো ভন্তে নাগসেন তথাগতো অত্তানং ন পত্থযতি [ন পত্থীযতি (সী. পী.)] ন উপনিস্সযতি, তস্মা তথাগতো মাতুচ্ছায তং ৰস্সিকসাটিকং সঙ্ঘস্স দাপেসী’’তি.

‘‘ভাসিতম্পেতং, মহারাজ, ভগৰতা মাতুচ্ছায মহাপজাপতিযা গোতমিযা ৰস্সিকসাটিকায দীযমানায ‘সঙ্ঘে গোতমি দেহি, সঙ্ঘে তে দিন্নে অহঞ্চেৰ পূজিতো ভৰিস্সামি সঙ্ঘো চা’তি. তং পন ন অত্তনো পতিমাননস্স অৰিপাকতায ন অদক্খিণেয্যতায, অপি চ খো, মহারাজ, হিতত্থায অনুকম্পায অনাগতমদ্ধানং সঙ্ঘো মমচ্চযেন চিত্তীকতো ভৰিস্সতীতি ৰিজ্জমানে যেৰ গুণে পরিকিত্তযন্তো এৰমাহ ‘সঙ্ঘে গোতমি দেহি, সঙ্ঘে তে দিন্নে অহঞ্চেৰ পূজিতো ভৰিস্সামি সঙ্ঘো চা’তি.

‘‘যথা, মহারাজ, পিতা ধরমানো যেৰ অমচ্চভটবলদোৰারিকঅনীকট্ঠপারিসজ্জজনমজ্ঝে রঞ্ঞো সন্তিকে পুত্তস্স ৰিজ্জমানং যেৰ গুণং পকিত্তেতি [পরিকিত্তেতি (ক.)] ‘ইধ ঠপিতো অনাগতমদ্ধানং জনমজ্ঝে পূজিতো ভৰিস্সতী’তি. এৰমেৰ খো, মহারাজ, তথাগতো হিতত্থায অনুকম্পায অনাগতমদ্ধানং সঙ্ঘো মমচ্চযেন চিত্তীকতো ভৰিস্সতীতি ৰিজ্জমানে যেৰ গুণে পকিত্তযন্তো এৰমাহ ‘সঙ্ঘে গোতমি দেহি, সঙ্ঘে তে দিন্নে অহঞ্চেৰ পুজিতো ভৰিস্সামি সঙ্ঘো চা’তি.

‘‘ন খো, মহারাজ, তাৰতকেন ৰস্সিকসাটিকানুপ্পদানমত্তকেন সঙ্ঘো তথাগততো অধিকো নাম হোতি ৰিসিট্ঠো ৰা. যথা, মহারাজ, মাতাপিতরো পুত্তানং উচ্ছাদেন্তি পরিমদ্দন্তি নহাপেন্তি সম্বাহেন্তি, অপি নু খো, মহারাজ, তাৰতকেন উচ্ছাদনপরিমদ্দননহাপনসম্বাহনমত্তকেন ‘পুত্তো মাতাপিতূহি অধিকো নাম হোতি ৰিসিট্ঠো ৰা’তি? ‘‘ন হি, ভন্তে, অকামকরণীযা ভন্তে পুত্তা মাতাপিতূনং, তস্মা মাতাপিতরো পুত্তানং উচ্ছাদনপরিমদ্দননহাপনসম্বাহনং করোন্তী’’তি. এৰমেৰ খো, মহারাজ, ন তাৰতকেন ৰস্সিকসাটিকানুপ্পদানমত্তকেন সঙ্ঘো তথাগততো অধিকো নাম হোতি ৰিসিট্ঠো ৰাতি. অপি চ তথাগতো অকামকরণীযং করোন্তো মাতুচ্ছায তং ৰস্সিকসাটিকং সঙ্ঘস্স দাপেসি.

‘‘যথা ৰা পন, মহারাজ, কোচিদেৰ পুরিসো রঞ্ঞো উপাযনং আহরেয্য, তং রাজা উপাযনং অঞ্ঞতরস্স ভটস্স ৰা বলস্স ৰা সেনাপতিস্স ৰা পুরোহিতস্স ৰা দদেয্য. অপি নু খো সো, মহারাজ, পুরিসো তাৰতকেন উপাযনপটিলাভমত্তকেন রঞ্ঞা অধিকো নাম হোতি ৰিসিট্ঠো ৰা’’তি? ‘‘ন হি, ভন্তে, রাজভত্তিকো, ভন্তে, সো পুরিসো রাজূপজীৰী, তট্ঠানে ঠপেন্তো রাজা উপাযনং দেতী’’তি. ‘‘এৰমেৰ খো, মহারাজ, ন তাৰতকেন ৰস্সিকসাটিকানুপ্পদানমত্তকেন সঙ্ঘো তথাগততো অধিকো নাম হোতি ৰিসিট্ঠো ৰা, অথ খো তথাগতভত্তিকো তথাগতূপজীৰী. তট্ঠানে ঠপেন্তো তথাগতো সঙ্ঘস্স ৰস্সিকসাটিকং দাপেসি.

‘‘অপি চ, মহারাজ, তথাগতস্স এৰং অহোসি ‘সভাৰপটিপূজনীযো সঙ্ঘো, মম সন্তকেন সঙ্ঘং পটিপূজেস্সামী’তি সঙ্ঘস্স ৰস্সিকসাটিকং দাপেসি, ন, মহারাজ, তথাগতো অত্তনো যেৰ পটিপূজনং ৰণ্ণেতি, অথ খো যে লোকে পটিপূজনারহা, তেসম্পি তথাগতো পটিপূজনং ৰণ্ণেতি.

‘‘ভাসিতম্পেতং, মহারাজ, ভগৰতা দেৰাতিদেৰেন মজ্ঝিমনিকাযৰরলঞ্ছকে ধম্মদাযাদধম্মপরিযাযে অপ্পিচ্ছপ্পটিপত্তিং পকিত্তযমানেন ‘অসু যেৰ মে পুরিমো ভিক্খু পুজ্জতরো চ পাসংসতরো চা’তি. ‘‘নত্থি, মহারাজ, ভৰেসু কোচি সত্তো তথাগততো দক্খিণেয্যো ৰা উত্তরো ৰা অধিকো ৰা ৰিসিট্ঠো ৰা, তথাগতোৰ উত্তরো অধিকো ৰিসিট্ঠো.

‘‘ভাসিতম্পেতং, মহারাজ, সংযুত্তনিকাযৰরে মাণৰগামিকেন দেৰপুত্তেন ভগৰতো পুরতো ঠত্ৰা দেৰমনুস্সমজ্ঝে –

‘‘‘ৰিপুলো রাজগহীযানং [রাজগহিকানং (ক.) সং. নি. ১.১১১ পস্সিতব্বং], গিরি সেট্ঠো পৰুচ্চতি;

সেতো হিমৰতং সেট্ঠো, আদিচ্চো অঘগামিনং.

‘‘‘সমুদ্দো উদধিনং সেট্ঠো, নক্খত্তানঞ্চ চন্দিমা;

সদেৰকস্স লোকস্স, বুদ্ধো অগ্গো পৰুচ্চতী’তি.

‘‘তা খো পনেতা, মহারাজ, মাণৰগামিকেন দেৰপুত্তেন গাথা সুগীতা ন দুগ্গীতা, সুভাসিতা ন দুব্ভাসিতা, অনুমতা চ ভগৰতা, ননু, মহারাজ, থেরেনপি সারিপুত্তেন ধম্মসেনাপতিনা ভণিতং –

‘‘‘একো মনোপসাদো; সরণগমনমঞ্জলিপণামো ৰা;

উস্সহতে তারযিতুং, মারবলনিসূদনে বুদ্ধে’তি.

‘‘ভগৰতা চ ভণিতং দেৰাতিদেৰেন ‘একপুগ্গলো, ভিক্খৰে, লোকে উপ্পজ্জমানো উপ্পজ্জতি বহুজনহিতায বহুজনসুখায লোকানুকম্পায অত্থায হিতায সুখায দেৰমনুস্সানং. কতমো একপুগ্গলো? তথাগতো অরহং সম্মাসম্বুদ্ধো…পে… দেৰমনুস্সান’’’ন্তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

গোতমিৰত্থদানপঞ্হো দুতিযো.

৩. গিহিপব্বজিতসম্মাপটিপত্তিপঞ্হো

[৩] ‘‘ভন্তে নাগসেন, ভাসিতম্পেতং ভগৰতা ‘গিহিনো ৰাহং, ভিক্খৰে, পব্বজিতস্স ৰা সম্মাপটিপত্তিং ৰণ্ণেমি, গিহী ৰা ভিক্খৰে পব্বজিতো ৰা সম্মাপটিপন্নো সম্মাপটিপত্তাধিকরণহেতু আরাধকো হোতি ঞাযং ধম্মং কুসল’’ন্তি. যদি, ভন্তে নাগসেন, গিহী ওদাতৰসনো কামভোগী পুত্তদারসম্বাধসযনং অজ্ঝাৰসন্তো কাসিকচন্দনং পচ্চনুভোন্তো মালাগন্ধৰিলেপনং ধারেন্তো জাতরূপরজতং সাদিযন্তো মণিকুণ্ডল [মণিকনক (সী. পী.)] ৰিচিত্তমোল়িবদ্ধো সম্মাপটিপন্নো আরাধকো হোতি ঞাযং ধম্মং কুসলং, পব্বজিতোপি ভণ্ডুকাসাৰৰত্থৰসনো পরপিণ্ডমজ্ঝুপগতো চতূসু সীলক্খন্ধেসু সম্মাপরিপূরকারী দিযড্ঢেসু সিক্খাপদসতেসু সমাদায ৰত্তন্তো তেরসসু ধুতগুণেসু অনৰসেসং ৰত্তন্তো সম্মাপটিপন্নো আরাধকো হোতি ঞাযং ধম্মং কুসলং. তত্থ, ভন্তে, কো ৰিসেসো গিহিনো ৰা পব্বজিতস্স ৰা? অফলং হোতি তপোকম্মং, নিরত্থকা পব্বজ্জা. ৰঞ্ঝা সিক্খাপদগোপনা, মোঘং ধুতগুণসমাদানং, কিং তত্থ দুক্খমনুচিণ্ণেন, ননু নাম সুখেনেৰ সুখং অধিগন্তব্ব’’ন্তি.

‘‘ভাসিতম্পেতং, মহারাজ, ভগৰতা ‘গিহিনো ৰাহং, ভিক্খৰে, পব্বজিতস্স ৰা সম্মাপটিপত্তিং ৰণ্ণেমি, গিহী ৰা, ভিক্খৰে, পব্বজিতো ৰা সম্মাপটিপন্নো সম্মাপটিপত্তাধিকরণহেতু আরাধকো হোতি ঞাযং ধম্মং কুসল’’ন্তি. এৰমেতং, মহারাজ, সম্মাপটিপন্নোৰ সেট্ঠো, পব্বজিতোপি, মহারাজ, ‘পব্বজিতোম্হী’তি ন সম্মা পটিপজ্জেয্য, অথ খো সো আরকাৰ সামঞ্ঞা, আরকাৰ ব্রহ্মঞ্ঞা, পগেৰ গিহী ওদাতৰসনো. গিহীপি, মহারাজ, সম্মাপটিপন্নো আরাধকো হোতি ঞাযং ধম্মং কুসলং, পব্বজিতোপি, মহারাজ, সম্মাপটিপন্নো আরাধকো হোতি ঞাযং ধম্মং কুসলং.

‘‘অপি চ খো, মহারাজ, পব্বজিতোৰ সামঞ্ঞস্স ইস্সরো অধিপতি; পব্বজ্জা, মহারাজ, বহুগুণা অনেকগুণা অপ্পমাণগুণা, ন সক্কা পব্বজ্জায গুণং পরিমাণং কাতুং.

‘‘যথা, মহারাজ, কামদদস্স মণিরতনস্স ন সক্কা ধনেন অগ্ঘো পরিমাণং কাতুং ‘এত্তকং মণিরতনস্স মূল’ন্তি, এৰমেৰ খো, মহারাজ, পব্বজ্জা বহুগুণা অনেকগুণা অপ্পমাণগুণা, ন সক্কা পব্বজ্জায গুণং পরিমাণং কাতুং.

‘‘যথা ৰা পন, মহারাজ, মহাসমুদ্দে ঊমিযো ন সক্কা পরিমাণং কাতুং ‘এত্তকা মহাসমুদ্দে ঊমিযো’তি, এৰমেৰ খো, মহারাজ, পব্বজ্জা বহুগুণা অনেকগুণা অপ্পমাণগুণা, ন সক্কা পব্বজ্জায গুণং পরিমাণং কাতুং.

‘‘পব্বজিতস্স, মহারাজ, যং কিঞ্চি করণীযং, সব্বং তং খিপ্পমেৰ সমিজ্ঝতি নো চিররত্তায. কিং কারণা? পব্বজিতো, মহারাজ, অপ্পিচ্ছো হোতি সন্তুট্ঠো পৰিৰিত্তো অসংসট্ঠো আরদ্ধৰীরিযো নিরালযো অনিকেতো পরিপুণ্ণসীলো সল্লেখিতাচারো ধুতপ্পটিপত্তিকুসলো হোতি, তং কারণা পব্বজিতস্স যং কিঞ্চি করণীযং, সব্বং তং খিপ্পমেৰ সমিজ্ঝতি নো চিররত্তায. যথা, মহারাজ, নিগ্গণ্ঠিসমসুধোতউজুৰিমলনারাচো সুসজ্জিতো সম্মা ৰহতি, এৰমেৰ খো, মহারাজ, পব্বজিতস্স যং কিঞ্চি করণীযং, সব্বং তং খিপ্পমেৰ সমিজ্ঝতি নো চিররত্তাযা’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

গিহিপব্বজিতসম্মাপটিপত্তিপঞ্হো ততিযো.

৪. পটিপদাদোসপঞ্হো

৪. ‘‘ভন্তে নাগসেন, যদা বোধিসত্তো দুক্করকারিকং অকাসি, নেতাদিসো অঞ্ঞত্র আরম্ভো অহোসি নিক্কমো কিলেসযুদ্ধং মচ্চুসেনং ৰিধমনং আহারপরিগ্গহো দুক্করকারিকা, এৰরূপে পরক্কমে কিঞ্চি অস্সাদং অলভিত্ৰা তমেৰ চিত্তং পরিহাপেত্ৰা এৰমৰোচ ‘ন খো পনাহং ইমায কটুকায দুক্করকারিকায অধিগচ্ছামি উত্তরিমনুস্সধম্মং অলমরিযঞাণদস্সনৰিসেসং, সিযা নু খো অঞ্ঞো মগ্গো বোধাযা’তি, ততো নিব্বিন্দিত্ৰা অঞ্ঞেন মগেন সব্বঞ্ঞুতং পত্তো, পুন তায পটিপদায সাৰকে অনুসাসতি সমাদপেতি.

‘‘‘আরম্ভথ নিক্খমথ, যুঞ্জথ বুদ্ধসাসনে;

ধুনাথ মচ্চুনো সেনং, নল়াগারংৰ কুঞ্জরো’তি [সং. নি. ১.১৮৫].

‘‘কেন ন খো, ভন্তে নাগসেন, কারণেন তথাগতো যায পটিপদায অত্তনা নিব্বিন্নো ৰিরত্তরূপো, তত্থ সাৰকে অনুসাসতি সমাদপেতী’’তি?

‘‘তদাপি, মহারাজ, এতরহিপি সা যেৰ পটিপদা, তং যেৰ পটিপদং পটিপজ্জিত্ৰা বোধিসত্তো সব্বঞ্ঞুতং পত্তো. অপি চ, মহারাজ, বোধিসত্তো অতিৰীরিযং করোন্তো নিরৰসেসতো আহারং উপরুন্ধি. তস্স আহারূপরোধেন চিত্তদুব্বল্যং উপ্পজ্জি. সো তেন দুব্বল্যেন নাসক্খি সব্বঞ্ঞুতং পাপুণিতুং, সো মত্তমত্তং কবল়ীকারাহারং সেৰন্তো তাযেৰ পটিপদায নচিরস্সেৰ সব্বঞ্ঞুতং পাপুণি. সো যেৰ, মহারাজ, পটিপদা সব্বেসং তথাগতানং সব্বঞ্ঞুতঞাণপ্পটিলাভায.

‘‘যথা, মহারাজ, সব্বেসং সত্তানং আহারো উপত্থম্ভো, আহারূপনিস্সিতা সব্বে সত্তা সুখং অনুভৰন্তি, এৰমেৰ খো, মহারাজ, সা যেৰ পটিপদা সব্বেসং তথাগতানং সব্বঞ্ঞুতঞাণপ্পটিলাভায, নেসো, মহারাজ, দোসো আরম্ভস্স, ন নিক্কমস্স, ন কিলেসযুদ্ধস্স, যেন তথাগতো তস্মিং সমযে ন পাপুণি সব্বঞ্ঞুতঞাণং, অথ খো আহারূপরোধস্সেৰেসো দোসো, সদা পটিযত্তা যেৰেসা পটিপদা.

‘‘যথা, মহারাজ, পুরিসো অদ্ধানং অতিৰেগেন গচ্ছেয্য, তেন সো পক্খহতো ৰা ভৰেয্য পীঠসপ্পী ৰা অসঞ্চরো পথৰিতলে. অপি নু খো, মহারাজ, মহাপথৰিযা দোসো অত্থি, যেন সো পুরিসো পক্খহতো অহোসী’’তি? ‘‘ন হি, ভন্তে; সদা পটিযত্তা, ভন্তে, মহাপথৰী, কুতো তস্সা দোসো? ৰাযামস্সেৰেসো দোসো, যেন সো পুরিসো পক্খহতো অহোসী’’তি. ‘‘এৰমেৰ খো, মহারাজ, নেসো দোসো আরম্ভস্স, ন নিক্কমস্স, ন কিলেসযুদ্ধস্স, যেন তথাগতো তস্মিং সমযে ন পাপুণি সব্বঞ্ঞুতঞাণং, অথ খো আহারূপরোধস্সেৰেসো দোসো সদা পটিযত্তা যেৰেসা পটিপদা.

‘‘যথা ৰা পন, মহারাজ, পুরিসো কিলিট্ঠং সাটকং নিৰাসেয্য, ন সো তং ধোৰাপেয্য, নেসো দোসো উদকস্স, সদা পটিযত্তং উদকং. পুরিসস্সেৰেসো দোসো. এৰমেৰ খো, মহারাজ, নেসো দোসো আরম্ভস্স, ন নিক্কমস্স, ন কিলেসযুদ্ধস্স, যেন তথাগতো তস্মিং সমযে ন পাপুণি সব্বঞ্ঞুতঞাণং, অথ খো আহারূপরোধস্সেৰেসো দোসো, সদা পটিযত্তা যেৰেসা পটিপদা, তস্মা তথাগতো তাযেৰ পটিপদায সাৰকে অনুসাসতি সমাদপেতি, এৰং খো, মহারাজ, সদা পটিযত্তা অনৰজ্জা সা পটিপদা’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

পটিপদাদোসপঞ্হো চতুত্থো.

৫. হীনাযাৰত্তনপঞ্হো

৫. ‘‘ভন্তে নাগসেন, মহন্তং ইদং তথাগতসাসনং সারং ৰরং সেট্ঠং পৰরং অনুপমং পরিসুদ্ধং ৰিমলং পণ্ডরং অনৰজ্জং, ন যুত্তং গিহিং তাৰতকং পব্বজেতুং, গিহী যেৰ [গিহিং যেৰ (সী. পী.)] একস্মিং ফলে ৰিনেত্ৰা যদা অপুনরাৰত্তী হোতি তদা সো পব্বাজেতব্বো. কিং কারণা? ইমে দুজ্জনা তাৰ তত্থ সাসনে ৰিসুদ্ধে পব্বজিত্ৰা পটিনিৰত্তিত্ৰা হীনাযাৰত্তন্তি, তেসং পচ্চাগমনেন অযং মহাজনো এৰং ৰিচিন্তেতি ‘তুচ্ছকং ৰত ভো এতং সমণস্স গোতমস্স সাসনং ভৰিস্সতি, যং ইমে পটিনিৰত্তন্তী’তি, ইদমেত্থ কারণ’’ন্তি.

‘‘যথা, মহারাজ, তল়াকো ভৰেয্য সম্পুণ্ণসুচিৰিমলসীতলসলিলো, অথ যো কোচি কিলিট্ঠো মলকদ্দমগতো তং তল়াকং গন্ত্ৰা অনহাযিত্ৰা কিলিট্ঠোৰ পটিনিৰত্তেয্য, তত্থ, মহারাজ, কতমং জনো গরহেয্য কিলিট্ঠং ৰা তল়াকং ৰা’’তি? ‘‘কিলিট্ঠং, ভন্তে, জনো গরহেয্য ‘অযং তল়াকং গন্ত্ৰা অনহাযিত্ৰা কিলিট্ঠোৰ পটিনিৰত্তো, কিং ইমং অনহাযিতুকামং তল়াকো সযং নহাপেস্সতি, কো দোসো তল়াকস্সা’তি. এৰমেৰ খো, মহারাজ, তথাগতো ৰিমুত্তিৰরসলিলসম্পুণ্ণং সদ্ধম্মৰরতল়াকং মাপেসি ‘যে কেচি কিলেসমলকিলিট্ঠা সচেতনা বুধা, তে ইধ নহাযিত্ৰা সব্বকিলেসে পৰাহযিস্সন্তী’তি. যদি কোচি তং সদ্ধম্মৰরতল়াকং গন্ত্ৰা অনহাযিত্ৰা সকিলেসোৰ পটিনিৰত্তিত্ৰা হীনাযাৰত্ততি তং যেৰ জনো গরহিস্সতি ‘অযং জিনসাসনে পব্বজিত্ৰা তত্থ পতিট্ঠং অলভিত্ৰা হীনাযাৰত্তো, কিং ইমং অপ্পটিপজ্জন্তং জিনসাসনং সযং বোধেস্সতি, কো দোসো জিনসাসনস্সা’তি?

‘‘যথা ৰা পন, মহারাজ, পুরিসো পরমব্যাধিতো রোগুপ্পত্তিকুসলং অমোঘধুৰসিদ্ধকম্মং ভিসক্কং সল্লকত্তং দিস্ৰা অতিকিচ্ছাপেত্ৰা সব্যাধিকোৰ পটিনিৰত্তেয্য, তত্থ কতমং জনো গরহেয্য আতুরং ৰা ভিসক্কং ৰা’’তি? ‘‘আতুরং, ভন্তে, জনো গরহেয্য ‘অযং রোগুপ্পত্তিকুসলং অমোঘধুৰসিদ্ধকম্মং ভিসক্কং সল্লকত্তং দিস্ৰা অতিকিচ্ছাপেত্ৰা সব্যাধিকোৰ পটিনিৰত্তো, কিং ইমং অতিকিচ্ছাপেন্তং ভিসক্কো সযং তিকিচ্ছিস্সতি, কো দোসো ভিসক্কস্সা’’’তি? ‘‘এৰমেৰ খো, মহারাজ, তথাগতো অন্তোসাসনসমুগ্গে কেৰলং সকলকিলেসব্যাধিৰূপসমনসমত্থং অমতোসধং পক্খিপি, ‘যে কেচি কিলেসব্যাধিপীল়িতা সচেতনা বুধা, তে ইমং অমতোসধং পিৰিত্ৰা সব্বকিলেসব্যাধিং ৰূপসমেস্সন্তী’তি. যদি কোচি যং অমতোসধং অপিৰিত্ৰা সকিলেসোৰ পটিনিৰত্তিত্ৰা হীনাযাৰত্ততি, তং যেৰ জনো গরহিস্সতি ‘অযং জিনসাসনে পব্বজিত্ৰা তত্থ পতিট্ঠং অলভিত্ৰা হীনাযাৰত্তো, কিং ইমং অপ্পটিপজ্জন্তং জিনসাসনং সযং বোধেস্সতি, কো দোসো জিনসাসনস্সা’তি?

‘‘যথা ৰা পন, মহারাজ, ছাতো পুরিসো মহতিমহাপুঞ্ঞভত্তপরিৰেসনং গন্ত্ৰা তং ভত্তং অভুঞ্জিত্ৰা ছাতোৰ পটিনিৰত্তেয্য, তত্থ কতমং জনো গরহেয্য ছাতং ৰা পুঞ্ঞভত্তং ৰা’’তি? ‘‘ছাতং, ভন্তে, জনো গরহেয্য ‘অযং খুদাপীল়িতো পুঞ্ঞভত্তং পটিলভিত্ৰা অভুঞ্জিত্ৰা ছাতোৰ পটিনিৰত্তো, কিং ইমস্স অভুঞ্জন্তস্স ভোজনং সযং মুখং পৰিসিস্সতি, কো দোসো ভোজনস্সা’’’তি? ‘‘এৰমেৰ খো, মহারাজ, তথাগতো অন্তোসাসনসমুগ্গে পরমপৰরং সন্তং সিৰং পণীতং অমতং পরমমধুরং কাযগতাসতিভোজনং ঠপেসি ‘যে কেচি কিলেসছাতজ্ঝত্তা তণ্হাপরেতমানসা সচেতনা বুধা, তে ইমং ভোজনং ভুঞ্জিত্ৰা কামরূপারূপভৰেসু সব্বং তণ্হমপনেস্সন্তী’তি. যদি কোচি তং ভোজনং অভুঞ্জিত্ৰা তণ্হাসিতোৰ পটিনিৰত্তিত্ৰা হীনাযাৰত্ততি, তঞ্ঞেৰ জনো গরহিস্সতি ‘অযং জিনসাসনে পব্বজিত্ৰা তত্থ পতিট্ঠং অলভিত্ৰা হীনাযাৰত্তো, কিং ইমং অপ্পটিপজ্জন্তং জিনসাসনং সযং বোধেস্সসি, কো দোসো জিনসাসনস্সা’তি.

‘‘যদি, মহারাজ, তথাগতো গিহিং যেৰ একস্মিং ফলে ৰিনীতং পব্বাজেয্য, ন নামাযং পব্বজ্জা কিলেসপ্পহানায ৰিসুদ্ধিযা ৰা, নত্থি পব্বজ্জায করণীযং. যথা, মহারাজ, পুরিসো অনেকসতেন কম্মেন তল়াকং খণাপেত্ৰা পরিসায এৰমনুস্সাৰেয্য ‘মা মে, ভোন্তো, কেচি সংকিলিট্ঠা ইমং তল়াকং ওতরথ, পৰাহিতরজোজল্লা পরিসুদ্ধা ৰিমলমট্ঠা ইমং তল়াকং ওতরথা’তি. অপি নু খো, মহারাজ, তেসং পৰাহিতরজোজল্লানং পরিসুদ্ধানং ৰিমলমট্ঠানং তেন তল়াকেন করণীযং ভৰেয্যা’’তি? ‘‘ন হি, ভন্তে, যস্সত্থায তে তং তল়াকং উপগচ্ছেয্যুং, তং অঞ্ঞত্রেৰ তেসং কতং করণীযং, কিং তেসং তেন তল়াকেনা’’তি? ‘‘এৰমেৰ খো, মহারাজ, যদি তথাগতো গিহিং যেৰ একস্মিং ফলে ৰিনীতং পব্বাজেয্য, তত্থেৰ তেসং কতং করণীযং, কিং তেসং পব্বজ্জায.

‘‘যথা ৰা পন, মহারাজ, সভাৰইসিভত্তিকো সুতমন্তপদধরো অতক্কিকো রোগুপ্পত্তিকুসলো অমোঘধুৰসিদ্ধকম্মো ভিসক্কো সল্লকত্তো সব্বরোগূপসমভেসজ্জং সন্নিপাতেত্ৰা পরিসায এৰমনুস্সাৰেয্য ‘মা খো, ভোন্তো, কেচি সব্যাধিকা মম সন্তিকে উপগচ্ছথ, অব্যাধিকা অরোগা মম সন্তিকে উপগচ্ছথা’তি. অপি নু খো, মহারাজ, তেসং অব্যাধিকানং অরোগানং পরিপুণ্ণানং উদগ্গানং তেন ভিসক্কেন করণীযং ভৰেয্যা’’তি? ‘‘ন হি, ভন্তে, যস্সত্থায তে তং ভিসক্কং সল্লকত্তং উপগচ্ছেয্যুং, তং অঞ্ঞত্রেৰ তেসং কতং করণীযং, কিং তেসং তেন ভিসক্কেনা’’তি? ‘‘এৰমেৰ খো, মহারাজ, যদি তথাগতো গিহিং যেৰ একস্মিং ফলে ৰিনীতং পব্বাজেয্য, তত্থেৰ তেসং কতং করণীযং, কিং তেসং পব্বজ্জায?

‘‘যথা ৰা পন, মহারাজ, কোচি পুরিসো অনেকথালিপাকসতং ভোজনং পটিযাদাপেত্ৰা পরিসায এৰমনুস্সাৰেয্য ‘মা মে, ভোন্তো, কেচি ছাতা ইমং পরিৰেসনং উপগচ্ছথ, সুভুত্তা তিত্তা সুহিতা ধাতা পীণিতা পরিপুণ্ণা ইমং পরিৰেসনং উপগচ্ছথা’’তি. অপি নু খো মহারাজ, তেসং ভুত্তাৰীনং তিত্তানং সুহিতানং ধাতানং পীণিতানং পরিপুণ্ণানং তেন ভোজনেন করণীযং ভৰেয্যা’’তি? ‘‘ন হি, ভন্তে, যস্সত্থায তে তং পরিৰেসনং উপগচ্ছেয্যুং, তং অঞ্ঞত্রেৰ তেসং কতং করণীযং, কিং তেসং তায পরিৰেসনাযা’’তি? ‘‘এৰমেৰ খো, মহারাজ, যদি তথাগতো গিহিং যেৰ একস্মিং ফলে ৰিনীতং পব্বাজেয্য, তত্থেৰ তেসং কতং করণীযং, কিং তেসং পব্বজ্জায?

‘‘অপি চ, মহারাজ, যে হীনাযাৰত্তন্তি, তে জিনসাসনস্স পঞ্চ অতুলিযে গুণে দস্সেন্তি. কতমে পঞ্চ? ভূমিমহন্তভাৰং দস্সেন্তি, পরিসুদ্ধৰিমলভাৰং দস্সেন্তি, পাপেহি অসংৰাসিযভাৰং দস্সেন্তি, দুপ্পটিৰেধভাৰং দস্সেন্তি, বহুসংৰররক্খিযভাৰং দস্সেন্তি.

‘‘কথং ভূমিমহন্তভাৰং দস্সেন্তি? যথা, মহারাজ, পুরিসো অধনো হীনজচ্চো নিব্বিসেসো বুদ্ধিপরিহীনো মহারজ্জং পটিলভিত্ৰা ন চিরস্সেৰ পরিপততি পরিধংসতি পরিহাযতি যসতো, ন সক্কোতি ইস্সরিযং সন্ধারেতুং. কিং কারণং? মহন্তত্তা ইস্সরিযস্স. এৰমেৰ খো, মহারাজ, যে কেচি নিব্বিসেসা অকতপুঞ্ঞা বুদ্ধিপরিহীনা জিনসাসনে পব্বজন্তি, তে তং পব্বজ্জং পৰরুত্তমং সন্ধারেতুং অৰিসহন্তা ন চিরস্সেৰ জিনসাসনা পরিপতিত্ৰা পরিধংসিত্ৰা পরিহাযিত্ৰা হীনাযাৰত্তন্তি, ন সক্কোন্তি জিনসাসনং সন্ধারেতুং. কিং কারণং? মহন্তত্তা জিনসাসনভূমিযা. এৰং ভূমিমহন্তভাৰং দস্সেন্তি.

‘‘কথং পরিসুদ্ধৰিমলভাৰং দস্সেন্তি? যথা, মহারাজ, ৰারি পোক্খরপত্তে ৰিকিরতি ৰিধমতি ৰিধংসেতি, ন ঠানমুপগচ্ছতি নূপলিম্পতি. কিং কারণং? পরিসুদ্ধৰিমলত্তা পদুমস্স. এৰমেৰ খো, মহারাজ, যে কেচি সঠা কূটা ৰঙ্কা কুটিলা ৰিসমদিট্ঠিনো জিনসাসনে পব্বজন্তি, তে পরিসুদ্ধৰিমলনিক্কণ্টকপণ্ডরৰরপ্পৰরসাসনতো ন চিরস্সেৰ ৰিকিরিত্ৰা ৰিধমিত্ৰা ৰিধংসেত্ৰা অসণ্ঠহিত্ৰা অনুপলিম্পিত্ৰা হীনাযাৰত্তন্তি. কিং কারণং? পরিসুদ্ধৰিমলত্তা জিনসাসনস্স. এৰং পরিসুদ্ধৰিমলভাৰং দস্সেন্তি.

‘‘কথং পাপেহি অসংৰাসিযভাৰং দস্সেন্তি? যথা, মহারাজ, মহাসমুদ্দো ন মতেন কুণপেন সংৰসতি, যং হোতি মহাসমুদ্দে মতং কুণপং, তং খিপ্পমেৰ তীরং উপনেতি থলং ৰা উস্সারেতি. কিং কারণং? মহাভূতানং ভৰনত্তা মহাসমুদ্দস্স. এৰমেৰ খো, মহারাজ, যে কেচি পাপকা অসংৰুতা অহিরিকা অকিরিযা ওসন্নৰীরিযা কুসীতা কিলিট্ঠা দুজ্জনা মনুস্সা জিনসাসনে পব্বজন্তি, তে ন চিরস্সেৰ জিনসাসনতো অরহন্তৰিমলখীণাসৰমহাভূতভৰনতো নিক্খমিত্ৰা অসংৰসিত্ৰা হীনাযাৰত্তন্তি. কিং কারণং? পাপেহি অসংৰাসিযত্তা জিনসাসনস্স. এৰং পাপেহি অসংৰাসিযভাৰং দস্সেন্তি.

‘‘কথং দুপ্পটিৰেধভাৰং দস্সেন্তি? যথা, মহারাজ, যে কেচি অছেকা অসিক্খিতা অসিপ্পিনো মতিৰিপ্পহীনা ইস্সাসা [ইস্সত্থা (সী. স্যা. পী.)] ৰালগ্গৰেধং অৰিসহন্তা ৰিগল়ন্তি পক্কমন্তি. কিং কারণং? সণ্হসুখুমদুপ্পটিৰেধত্তা ৰালগ্গস্স. এৰমেৰ খো, মহারাজ, যে কেচি দুপ্পঞ্ঞা জল়া এল়মূগা মূল়্হা দন্ধগতিকা জনা জিনসাসনে পব্বজন্তি, তে তং পরমসণ্হসুখুমচতুসচ্চপ্পটিৰেধং পটিৰিজ্ঝিতুং অৰিসহন্তা জিনসাসনা ৰিগল়িত্ৰা পক্কমিত্ৰা ন চিরস্সেৰ হীনাযাৰত্তন্তি. কিং কারণং? পরমসণ্হসুখুমদুপ্পটিৰেধতায সচ্চানং. এৰং দুপ্পটিৰেধভাৰং দস্সেন্তি.

‘‘কথং বহুসংৰররক্খিযভাৰং দস্সেন্তি? যথা, মহারাজ, কোচিদেৰ পুরিসো মহতিমহাযুদ্ধভূমিমুপগতো পরসেনায দিসাৰিদিসাহি সমন্তা পরিৰারিতো সত্তিহত্থং জনমুপেন্তং দিস্ৰা ভীতো ওসক্কতি পটিনিৰত্ততি পলাযতি. কিং কারণং? বহুৰিধযুদ্ধমুখরক্খণভযা. এৰমেৰ খো, মহারাজ, যে কেচি পাপকা অসংৰুতা অহিরিকা অকিরিযা অক্খন্তী চপলা চলিতা ইত্তরা বালজনা জিনসাসনে পব্বজন্তি, তে বহুৰিধং সিক্খাপদং পরিরক্খিতুং অৰিসহন্তা ওসক্কিত্ৰা পটিনিৰত্তিত্ৰা পলাযিত্ৰা ন চিরস্সেৰ হীনাযাৰত্তন্তি. কিং কারণং? বহুৰিধসংৰররক্খিযভাৰত্তা জিনসাসনস্স. এৰং বহুৰিধসংৰররক্খিযভাৰং দস্সেন্তি.

‘‘থলজুত্তমেপি, মহারাজ, ৰস্সিকাগুম্বে কিমিৰিদ্ধানি পুপ্ফানি হোন্তি, তানি অঙ্কুরানি সঙ্কুটিতানি অন্তরা যেৰ পরিপতন্তি, ন চ তেসু পরিপতিতেসু ৰস্সিকাগুম্বো হীল়িতো নাম হোতি. যানি তত্থ ঠিতানি পুপ্ফানি, তানি সম্মা গন্ধেন দিসাৰিদিসং অভিব্যাপেন্তি. এৰমেৰ খো, মহারাজ, যে তে জিনসাসনে পব্বজিত্ৰা হীনাযাৰত্তন্তি, তে জিনসাসনে কিমিৰিদ্ধানি ৰস্সিকাপুপ্ফানি ৰিয ৰণ্ণগন্ধরহিতা নিব্বণ্ণাকারসীলা অভব্বা ৰেপুল্লায, ন চ তেসং হীনাযাৰত্তনেন জিনসাসনং হীল়িতং নাম হোতি. যে তত্থ ঠিতা ভিক্খূ, তে সদেৰকং লোকং সীলৰরগন্ধেন অভিব্যাপেন্তি.

‘‘সালীনম্পি, মহারাজ, নিরাতঙ্কানং লোহিতকানং অন্তরে করুম্ভকং নাম সালিজাতি উপ্পজ্জিত্ৰা অন্তরা যেৰ ৰিনস্সতি, ন চ তস্সা ৰিনট্ঠত্তা লোহিতকসালী হীল়িতা নাম হোন্তি. যে তত্থ ঠিতা সালী, তে রাজূপভোগা হোন্তি. এৰমেৰ খো, মহারাজ, যে তে জিনসাসনে পব্বজিত্ৰা হীনাযাৰত্তন্তি, তে লোহিতকসালীনমন্তরে করুম্ভকা ৰিয জিনসাসনে ন ৰড্ঢিত্ৰা ৰেপুল্লতং ন পাপুণিত্ৰা [ৰড্ঢিত্ৰা ৰেপুল্লতং অপাপুণিত্ৰা (সী. ক.)] অন্তরা যেৰ হীনাযাৰত্তন্তি, ন চ তেসং হীনাযাৰত্তনেন জিনসাসনং হীল়িতং নাম হোতি. যে তত্থ ঠিতা ভিক্খূ তে অরহত্তস্স অনুচ্ছৰিকা হোন্তি.

‘‘কামদদস্সাপি, মহারাজ, মণিরতনস্স একদেসং [একদেসে (ক.)] কক্কসং উপ্পজ্জতি, ন চ তত্থ কক্কসুপ্পন্নত্তা মণিরতনং হীল়িতং নাম হোতি. যং তত্থ পরিসুদ্ধং মণিরতনস্স, তং জনস্স হাসকরং হোতি. এৰমেৰ খো, মহারাজ, যে তে জিনসাসনে পব্বজিত্ৰা হীনাযাৰত্তন্তি, কক্কসা তে জিনসাসনে পপটিকা, ন চ তেসং হীনাযাৰত্তনেন জিনসাসনং হীল়িতং নাম হোতি. যে তত্থ ঠিতা ভিক্খূ, তে দেৰমনুস্সানং হাসজনকা হোন্তি.

‘‘জাতিসম্পন্নস্সপি, মহারাজ, লোহিতচন্দনস্স একদেসং পূতিকং হোতি অপ্পগন্ধং. ন তেন লোহিতচন্দনং হীল়িতং নাম হোতি. যং তত্থ অপূতিকং সুগন্ধং, তং সমন্তা ৰিধূপেতি অভিব্যাপেতি. এৰমেৰ খো, মহারাজ, যে তে জিনসাসনে পব্বজিত্ৰা হীনাযাৰত্তন্তি, তে লোহিতচন্দনসারন্তরে পূতিকদেসমিৰ ছড্ডনীযা জিনসাসনে, ন চ তেসং হীনাযাৰত্তনেন জিনসাসনং হীল়িতং নাম হোতি. যে তত্থ ঠিতা ভিক্খূ, তে সদেৰকং লোকং সীলৰরচন্দনগন্ধেন অনুলিম্পযন্তী’’তি.

‘‘সাধু, ভন্তে নাগসেন, তেন তেন অনুচ্ছৰিকেন তেন তেন সদিসেন কারণেন নিরৰজ্জমনুপাপিতং জিনসাসনং সেট্ঠভাৰেন পরিদীপিতং, হীনাযাৰত্তমানাপি তে জিনসাসনস্স সেট্ঠভাৰং যেৰ পরিদীপেন্তী’’তি.

হীনাযাৰত্তনপঞ্হো পঞ্চমো.

৬. অরহন্তৰেদনাৰেদিযনপঞ্হো

৬. ‘‘ভন্তে নাগসেন, তুম্হে ভণথ ‘অরহা একং ৰেদনং ৰেদযতি কাযিকং, ন চেতসিক’ন্তি. কিং নু খো, ভন্তে নাগসেন, অরহতো চিত্তং যং কাযং নিস্সায পৰত্ততি, তত্থ অরহা অনিস্সরো অস্সামী অৰসৰত্তী’’তি? ‘‘আম, মহারাজা’’তি. ‘‘ন খো, ভন্তে নাগসেন, যুত্তমেতং, যং সো সকচিত্তস্স পৰত্তমানে কাযে অনিস্সরো হোতি অস্সামী অৰসৰত্তী; সকুণোপি তাৰ, ভন্তে, যস্মিং কুলাৰকে পটিৰসতি, তত্থ সো ইস্সরো হোতি সামী ৰসৰত্তী’’তি.

‘‘দসযিমে, মহারাজ, কাযানুগতা ধম্মা ভৰে ভৰে কাযং অনুধাৰন্তি অনুপরিৰত্তন্তি. কতমে দস? সীতং উণ্হং জিঘচ্ছা পিপাসা উচ্চারো পস্সাৰো মিদ্ধং জরা ব্যাধি মরণং. ইমে খো, মহারাজ, দস কাযানুগতা ধম্মা ভৰে ভৰে কাযং অনুধাৰন্তি অনুপরিৰত্তন্তি, তত্থ অরহা অনিস্সরো অস্সামী অৰসৰত্তী’’তি.

‘‘ভন্তে নাগসেন, কেন কারণেন অরহতো কাযে আণা নপ্পৰত্ততি ইস্সরিযং ৰা, তত্থ মে কারণং ব্রূহী’’তি? ‘‘যথা, মহারাজ, যে কেচি পথৰিনিস্সিতা সত্তা, সব্বে তে পথৰিং নিস্সায চরন্তি ৰিহরন্তি ৰুত্তিং কপ্পেন্তি, অপি নু খো, মহারাজ, তেসং পথৰিযা আণা পৰত্ততি ইস্সরিযং ৰা’’তি? ‘‘ন হি, ভন্তে’’তি. ‘‘এৰমেৰ খো, মহারাজ, অরহতো চিত্তং কাযং নিস্সায পৰত্ততি, ন চ অরহতো কাযে আণা পৰত্ততি ইস্সরিযং ৰা’’তি.

‘‘ভন্তে নাগসেন, কেন কারণেন পুথুজ্জনো কাযিকম্পি চেতসিকম্পি ৰেদনং ৰেদযতী’’তি? ‘‘অভাৰিতত্তা, মহারাজ, চিত্তস্স পুথুজ্জনো কাযিকম্পি চেতসিকম্পি ৰেদনং ৰেদযতি. যথা, মহারাজ, গোণো ছাতো পরিতসিতো অবলদুব্বলপরিত্তকতিণেসু ৰা লতায ৰা উপনিবদ্ধো অস্স, যদা সো গোণো পরিকুপিতো হোতি, তদা সহ উপনিবন্ধনেন পক্কমতি. এৰমেৰ খো, মহারাজ, অভাৰিতচিত্তস্স ৰেদনা উপ্পজ্জিত্ৰা চিত্তং পরিকোপেতি, চিত্তং পরিকুপিতং কাযং আভুজতি নিব্ভুজতি সম্পরিৰত্তকং করোতি. অথ খো সো অভাৰিতচিত্তো তসতি রৰতি ভেরৰরাৰমভিরৰতি, ইদমেত্থ, মহারাজ, কারণং, যেন কারণেন পুথুজ্জনো কাযিকম্পি চেতসিকম্পি ৰেদনং ৰেদযতী’’তি.

‘‘কিং পন তং কারণং, যেন কারণেন অরহা একং ৰেদনং ৰেদযতি কাযিকং, ন চেতসিক’’ন্তি? ‘‘অরহতো, মহারাজ, চিত্তং ভাৰিতং হোতি সুভাৰিতং দন্তং সুদন্তং অস্সৰং ৰচনকরং, সো দুক্খায ৰেদনায ফুট্ঠো সমানো ‘অনিচ্চ’ন্তি দল়্হং গণ্হাতি, সমাধিথম্ভে চিত্তং উপনিবন্ধতি, তস্স তং চিত্তং সমাধিথম্ভে উপনিবন্ধনং ন ৰেধতি ন চলতি, ঠিতং হোতি অৰিক্খিত্তং, তস্স ৰেদনাৰিকারৰিপ্ফারেন কাযো আভুজতি নিব্ভুজতি সম্পরিৰত্ততি, ইদমেত্থ, মহারাজ, কারণং, যেন কারণেন অরহা একং ৰেদনং ৰেদযতি কাযিকং, ন চেতসিক’’ন্তি.

‘‘ভন্তে নাগসেন, তং নাম লোকে অচ্ছরিযং যং কাযে চলমানে চিত্তং ন চলতি, তত্থ মে কারণং ব্রূহী’’তি. ‘‘যথা, মহারাজ, মহতিমহারুক্খে খন্ধসাখাপলাসসম্পন্নে অনিলবলসমাহতে সাখা চলতি, অপি নু তস্স খন্ধোপি চলতী’’তি? ‘‘ন হি, ভন্তে’’তি. ‘‘এৰমেৰ খো, মহারাজ, অরহা দুক্খায ৰেদনায ফুট্ঠো সমানো ‘অনিচ্চ’ন্তি দল়্হং গণ্হাতি, সমাধিথম্ভে চিত্তং উপনিবন্ধতি, তস্স তং চিত্তং সমাধিথম্ভে উপনিবন্ধনং ন ৰেধতি ন চলতি, ঠিতং হোতি অৰিক্খিত্তং, তস্স ৰেদনাৰিকারৰিপ্ফারেন কাযো আভুজতি নিব্ভুজতি সম্পরিৰত্ততি, চিত্তং পন তস্স ন ৰেধতি ন চলতি খন্ধো ৰিয মহারুক্খস্সা’’তি. ‘‘অচ্ছরিযং, ভন্তে নাগসেন, অব্ভুতং, ভন্তে নাগসেন, ন মে এৰরূপো সব্বকালিকো ধম্মপদীপো দিট্ঠপুব্বো’’তি.

অরহন্তৰেদনাৰেদিযনপঞ্হো ছট্ঠো.

৭. অভিসমযন্তরাযকরপঞ্হো

৭. ‘‘ভন্তে নাগসেন, ইধ যো কোচি গিহী পারাজিকং অজ্ঝাপন্নো ভৰেয্য, সো অপরেন সমযেন পব্বাজেয্য, অত্তনাপি সো ন জানেয্য ‘গিহিপারাজিকং অজ্ঝাপন্নোস্মী’তি, নপি তস্স অঞ্ঞো কোচি আচিক্খেয্য ‘গিহিপারাজিকং অজ্ঝাপন্নোসী’তি. সো চ তথত্তায পটিপজ্জেয্য, অপি নু তস্স ধম্মাভিসমযো ভৰেয্যা’’তি? ‘‘ন হি, মহারাজা’’তি. ‘‘কেন, ভন্তে, কারণেনা’’তি? ‘‘যো তস্স হেতু ধম্মাভিসমযায, সো তস্স সমুচ্ছিন্নো, তস্মা ধম্মাভিসমযো ন ভৰতী’’তি.

‘‘ভন্তে নাগসেন, তুম্হে ভণথ ‘জানন্তস্স কুক্কুচ্চং হোতি, কুক্কুচ্চে সতি আৰরণং হোতি, আৰটে চিত্তে ধম্মাভিসমযো ন হোতী’তি. ইমস্স পন অজানন্তস্স অকুক্কুচ্চজাতস্স সন্তচিত্তস্স ৰিহরতো কেন কারণেন ধম্মাভিসমযো ন হোতি, ৰিসমেন ৰিসমেনেসো পঞ্হো গচ্ছতি, চিন্তেত্ৰা ৰিসজ্জেথা’’তি.

‘‘রুহতি, মহারাজ, সুকট্ঠে সুকললে মণ্ডখেত্তে সারদং সুখসযিতং বীজ’’ন্তি? ‘‘আম, ভন্তে’’তি. ‘‘অপি নু, মহারাজ, তঞ্ঞেৰ বীজং ঘনসেলসিলাতলে রুহেয্যা’’তি? ‘‘ন হি, ভন্তে’’তি. ‘‘কিস্স পন, মহারাজ, তঞ্ঞেৰ বীজং কললে রুহতি, কিস্স ঘনসেলে ন রুহতী’’তি? ‘‘নত্থি, ভন্তে, তস্স বীজস্স রুহনায ঘনসেলে হেতু, অহেতুনা বীজং ন রুহতী’’তি. ‘‘এৰমেৰ খো, মহারাজ, যেন হেতুনা তস্স ধম্মাভিসমযো ভৰেয্য, সো তস্স হেতু সমুচ্ছিন্নো, অহেতুনা ধম্মাভিসমযো ন হোতি.

‘‘যথা ৰা পন, মহারাজ, দণ্ডলেড্ডুলগুল়মুগ্গরা পথৰিযা ঠানমুপগচ্ছন্তি, অপি নু, মহারাজ, তে যেৰ দণ্ডলেড্ডুলগুল়মুগ্গরা গগনে ঠানমুপগচ্ছন্তী’’তি? ‘‘ন হি ভন্তে’’তি. ‘‘কিং পনেত্থ, মহারাজ, কারণং, যেন কারণেন তে যেৰ দণ্ডলেড্ডুলগুল়মুগ্গরা পথৰিযা ঠানমুপগচ্ছন্তি, কেন কারণেন গগনে ন তিট্ঠন্তী’’তি? ‘‘নত্থি, ভন্তে, তেসং দণ্ডলেড্ডুলগুল়মুগ্গরানং পতিট্ঠানায আকাসে হেতু, অহেতুনা ন তিট্ঠন্তী’’তি. ‘‘এৰমেৰ খো, মহারাজ, তস্স তেন দোসেন অভিসমযহেতু সমুচ্ছিন্নো, হেতুসমুগ্ঘাতে অহেতুনা অভিসমযো ন হোতীতি.

‘‘যথা ৰা পন, মহারাজ, থলে অগ্গি জলতি, অপি নু খো, মহারাজ, সো যেৰ অগ্গি উদকে জলতী’’তি? ‘‘ন হি, ভন্তে’’তি. ‘‘কিং পনেত্থ, মহারাজ, কারণং, যেন কারণেন সো যেৰ অগ্গি থলে জলতি, কেন কারণেন উদকে ন জলতী’’তি? ‘‘নত্থি, ভন্তে, অগ্গিস্স জলনায উদকে হেতু, অহেতুনা ন জলতী’’তি. ‘‘এৰমেৰ খো, মহারাজ, তস্স তেন দোসেন অভিসমযহেতু সমুচ্ছিন্নো, হেতুসমুগ্ঘাতে অহেতুনা ধম্মাভিসমযো ন হোতী’’তি.

‘‘ভন্তে নাগসেন, পুনপেতং অত্থং চিন্তেহি, ন মে তত্থ চিত্তসঞ্ঞত্তি ভৰতি, অজানন্তস্স অসতি কুক্কুচ্চে আৰরণং হোতীতি, কারণেন মং সঞ্ঞাপেহী’’তি. ‘‘অপি নু, মহারাজ, ৰিসং হলাহলং অজানন্তেন খাযিতং জীৰিতং হরতী’’তি? ‘‘আম, ভন্তে’’তি. ‘‘এৰমেৰ খো, মহারাজ, অজানন্তেনপি কতং পাপং অভিসমযন্তরাযকরং হোতি.

‘‘অপি নু, মহারাজ, অগ্গি অজানিত্ৰা অক্কমন্তং ডহতী’’তি? ‘‘আম, ভন্তে’’তি. ‘‘এৰমেৰ খো, মহারাজ, অজানন্তেনপি কতং পাপং অভিসমযন্তরাযকরং হোতি.

‘‘অপি নু, মহারাজ, অজানন্তং আসীৰিসো ডংসিত্ৰা জীৰিতং হরতী’’তি? ‘‘আম, ভন্তে’’তি. ‘‘এৰমেৰ খো, মহারাজ, অজানন্তেনপি কতং পাপং অভিসমযন্তরাযকরং হোতি.

‘‘ননু, মহারাজ, কালিঙ্গরাজা সমণকোলঞ্ঞো সত্তরতনপরিকিণ্ণো হত্থিরতনমভিরুয্হ কুলদস্সনায গচ্ছন্তো অজানন্তোপি নাসক্খি বোধিমণ্ডস্স উপরিতো গন্তুং, ইদমেত্থ, মহারাজ, কারণং, যেন কারণেন অজানন্তেনপি কতং পাপং অভিসমযন্তরাযকরং হোতী’’তি? ‘‘জিনভাসিতং, ভন্তে নাগসেন, কারণং ন সক্কা পটিক্কোসিতুং, এসোৰেতস্স অত্থো তথা সম্পটিচ্ছামী’’তি.

অভিসমযন্তরাযকরপঞ্হো সত্তমো.

৮. দুস্সীলপঞ্হো

৮. ‘‘ভন্তে নাগসেন, গিহিদুস্সীলস্স চ সমণদুস্সীলস্স চ কো ৰিসেসো, কিং নানাকরণং, উভোপেতে সমসমগতিকা, উভিন্নম্পি সমসমো ৰিপাকো হোতি, উদাহু কিঞ্চি নানাকারণং অত্থী’’তি?

‘‘দস যিমে, মহারাজ, গুণা সমণদুস্সীলস্স গিহিদুস্সীলতো ৰিসেসেন অতিরেকা, দসহি চ কারণেহি উত্তরিং দক্খিণং ৰিসোধেতি.

‘‘কতমে দস গুণা সমণদুস্সীলস্স গিহিদুস্সীলতো ৰিসেসেন অতিরেকা? ইধ, মহারাজ, সমণদুস্সীলো বুদ্ধে সগারৰো হোতি, ধম্মে সগারৰো হোতি, সঙ্ঘে সগারৰো হোতি, সব্রহ্মচারীসু সগারৰো হোতি, উদ্দেসপরিপুচ্ছায ৰাযমতি, সৰনবহুলো হোতি, ভিন্নসীলোপি, মহারাজ, দুস্সীলো পরিসগতো আকপ্পং উপট্ঠপেতি, গরহভযা কাযিকং ৰাচসিকং রক্খতি, পধানাভিমুখঞ্চস্স হোতি চিত্তং, ভিক্খুসামঞ্ঞং উপগতো হোতি. করোন্তোপি, মহারাজ, সমণদুস্সীলো পাপং পটিচ্ছন্নং আচরতি. যথা, মহারাজ, ইত্থী সপতিকা নিলীযিত্ৰা রহস্সেনেৰ পাপমাচরতি; এৰমেৰ খো, মহারাজ, করোন্তোপি সমণদুস্সীলো পাপং পটিচ্ছন্নং আচরতি. ইমে খো, মহারাজ, দস গুণা সমণদুস্সীলস্স গিহিদুস্সীলতো ৰিসেসেন অতিরেকা.

‘‘কতমেহি দসহি কারণেহি উত্তরিং দক্খিণং ৰিসোধেতি? অনৰজ্জকৰচধারণতাযপি দক্খিণং ৰিসোধেতি, ইসিসামঞ্ঞভণ্ডুলিঙ্গধারণতোপি দক্খিণং ৰিসোধেতি, সঙ্ঘসমযমনুপ্পৰিট্ঠতাযপি দক্খিণং ৰিসোধেতি, বুদ্ধধম্মসঙ্ঘসরণগততাযপি দক্খিণং ৰিসোধেতি, পধানাসযনিকেতৰাসিতাযপি দক্খিণং ৰিসোধেতি, জিনসাসনধর [জিনসাসনধন (সী. পী.)] পরিযেসনতোপি দক্খিণং ৰিসোধেতি, পৰরধম্মদেসনতোপি দক্খিণং ৰিসোধেতি, ধম্মদীপগতিপরাযণতাযপি দক্খিণং ৰিসোধেতি, ‘অগ্গো বুদ্ধো’তি একন্তউজুদিট্ঠিতাযপি দক্খিণং ৰিসোধেতি, উপোসথসমাদানতোপি দক্খিণং ৰিসোধেতি. ইমেহি খো, মহারাজ, দসহি কারণেহি উত্তরিং দক্খিণং ৰিসোধেতি.

‘‘সুৰিপন্নোপি হি, মহারাজ, সমণদুস্সীলো দাযকানং দক্খিণং ৰিসোধেতি. যথা, মহারাজ, উদকং সুবহলম্পি কললকদ্দমরজোজল্লং অপনেতি; এৰমেৰ খো, মহারাজ, সুৰিপন্নোপি সমণদুস্সীলো দাযকানং দক্খিণং ৰিসোধেতি.

‘‘যথা ৰা পন, মহারাজ, উণ্হোদকং সুকুধিতম্পি [সুকঠিতম্পি (সী. পী), সুখুঠিতম্পি (স্যা.)] জ্জলন্তং মহন্তং অগ্গিক্খন্ধং নিব্বাপেতি, এৰমেৰ খো, মহারাজ, সুৰিপন্নোপি সমণদুস্সীলো দাযকানং দক্খিণং ৰিসোধেতি.

‘‘যথা ৰা পন, মহারাজ, ভোজনং ৰিরসম্পি খুদাদুব্বল্যং অপনেতি, এৰমেৰ খো, মহারাজ, সুৰিপন্নোপি সমণদুস্সীলো দাযকানং দক্খিণং ৰিসোধেতি.

‘‘ভাসিতম্পেতং, মহারাজ, তথাগতেন দেৰাতিদেৰেন মজ্ঝিমনিকাযৰরলঞ্ছকে দক্খিণৰিভঙ্গে ৰেয্যাকরণে –

‘‘‘যো সীলৰা দুস্সীলেসু দদাতি দানং, ধম্মেন লদ্ধং সুপসন্নচিত্তো;

অভিসদ্দহং কম্মফলং উল়ারং, সা দক্খিণা দাযকতো ৰিসুজ্ঝতী’’’তি [ম. নি. ৩.৩৮২].

‘‘অচ্ছরিযং, ভন্তে নাগসেন, অব্ভুতং, ভন্তে নাগসেন, তাৰতকং মযং পঞ্হং অপুচ্ছিম্হ, তং ত্ৰং ওপম্মেহি কারণেহি ৰিভাৰেন্তো অমতমধুরং সৰনূপগং অকাসি. যথা নাম, ভন্তে, সূদো ৰা সূদন্তেৰাসী ৰা তাৰতকং মংসং লভিত্ৰা নানাৰিধেহি সম্ভারেহি সম্পাদেত্ৰা রাজূপভোগং করোতি; এৰমেৰ খো, ভন্তে নাগসেন, তাৰতকং মযং পঞ্হং অপুচ্ছিম্হ, তং ত্ৰং ওপম্মেহি কারণেহি ৰিভাৰেত্ৰা অমতমধুরং সৰনূপগং অকাসী’’তি.

দুস্সীলপঞ্হো অট্ঠমো.

৯. উদকসত্তজীৰপঞ্হো

৯. ‘‘ভন্তে নাগসেন, ইমং উদকং অগ্গিম্হি তপ্পমানং চিচ্চিটাযতি চিটিচিটাযতি সদ্দাযতি বহুৰিধং, কিং নু খো, ভন্তে নাগসেন, উদকং জীৰতি, কিং কীল়মানং সদ্দাযতি, উদাহু অঞ্ঞেন পটিপীল়িতং সদ্দাযতী’’তি? ‘‘ন হি, মহারাজ, উদকং জীৰতি, নত্থি উদকে জীৰো ৰা সত্তো ৰা, অপি চ, মহারাজ, অগ্গিসন্তাপৰেগস্স মহন্ততায উদকং চিচ্চিটাযতি চিটিচিটাযতি সদ্দাযতি বহুৰিধ’’ন্তি.

‘‘ভন্তে নাগসেন, ইধেকচ্চে তিত্থিযা উদকং জীৰতীতি সীতোদকং পটিক্খিপিত্ৰা উদকং তাপেত্ৰা ৰেকতিকৰেকতিকং পরিভুঞ্জন্তি, তে তুম্হে গরহন্তি পরিভৰন্তি ‘একিন্দ্রিযং সমণা সক্যপুত্তিযা জীৰং ৰিহেঠেন্তী’তি, তং তেসং গরহং পরিভৰং ৰিনোদেহি অপনেহি নিচ্ছারেহী’’তি. ‘‘ন হি, মহারাজ, উদকং জীৰতি, নত্থি, মহারাজ, উদকে জীৰো ৰা সত্তো ৰা, অপি চ, মহারাজ, অগ্গিসন্তাপৰেগস্স মহন্ততায উদকং চিচ্চিটাযতি চিটিচিটাযতি সদ্দাযতি বহুৰিধং.

‘‘যথা, মহারাজ, উদকং সোব্ভসরসরিতদহতল়াককন্দরপদরউদপাননিন্নপোক্খরণিগতং ৰাতাতপৰেগস্স মহন্ততায পরিযাদিযতি পরিক্খযং গচ্ছতি, অপি নু তত্থ উদকং চিচ্চিটাযতি চিটিচিটাযতি সদ্দাযতি বহুৰিধ’’ন্তি? ‘‘ন হি, ভন্তে’’তি. ‘‘যদি, মহারাজ, উদকং জীৰেয্য, তত্থাপি উদকং সদ্দাযেয্য, ইমিনাপি, মহারাজ, কারণেন জানাহি ‘নত্থি উদকে জীৰো ৰা সত্তো ৰা, অগ্গিসন্তাপৰেগস্স মহন্ততায উদকং চিচ্চিটাযতি চিটিচিটাযতি সদ্দাযতি বহুৰিধ’ন্তি.

‘‘অপরম্পি, মহারাজ, উত্তরিং কারণং সুণোহি ‘নত্থি উদকে জীৰো ৰা সত্তো ৰা, অগ্গিসন্তাপৰেগস্স মহন্ততায উদকং সদ্দাযতী’তি. যদা পন, মহারাজ, উদকং তণ্ডুলেহি সম্মিস্সিতং ভাজনগতং হোতি পিহিতং উদ্ধনে অঠপিতং, অপি নু তত্থ উদকং সদ্দাযতী’’তি? ‘‘ন হি, ভন্তে, অচলং হোতি সন্তসন্ত’’ন্তি. ‘‘তং যেৰ পন, মহারাজ, উদকং ভাজনগতং অগ্গিং উজ্জালেত্ৰা উদ্ধনে ঠপিতং হোতি, অপি নু তত্থ উদকং অচলং হোতি সন্তসন্ত’’ন্তি? ‘‘ন হি, ভন্তে, চলতি খুব্ভতি লুল়তি আৰিলতি ঊমিজাতং হোতি, উদ্ধমধো দিসাৰিদিসং গচ্ছতি, উত্তরতি পতরতি ফেণমালী হোতীতি. কিস্স পন তং, মহারাজ, পাকতিকং উদকং ন চলতি সন্তসন্তং হোতি, কিস্স পন অগ্গিগতং চলতি খুব্ভতি লুল়তি আৰিলতি ঊমিজাতং হোতি, উদ্ধমধো দিসাৰিদিসং গচ্ছতি, উত্তরতি পতরতি ফেণমালী হোতী’’তি? ‘‘পাকতিকং, ভন্তে, উদকং ন চলতি, অগ্গিকতং পন উদকং অগ্গিসন্তাপৰেগস্স মহন্ততায চিচ্চিটাযতি চিটিচিটাযতি সদ্দাযতি বহুৰিধ’’ন্তি. ‘‘ইমিনাপি মহারাজ, কারণেন জানাহি ‘নত্থি উদকে জীৰো ৰা সত্তো ৰা, অগ্গিসন্তাপৰেগস্স মহন্ততায উদকং সদ্দাযতী’তি.

‘‘অপরম্পি, মহারাজ, উত্তরং কারণং সুণোহি, নত্থি উদকে জীৰো ৰা সত্তো ৰা, অগ্গিসন্তাপৰেগস্স মহন্ততায উদকং সদ্দাযতি. হোতি তং, মহারাজ, উদকং ঘরে ঘরে উদকৰারকগতং পিহিত’’ন্তি? ‘‘আম, ভন্তে’’তি. ‘‘অপি নু তং, মহারাজ, উদকং চলতি খুব্ভতি লুল়তি আৰিলতি ঊমিজাতং হোতি, উদ্ধমধো দিসাৰিদিসং গচ্ছতি, উত্তরতি পতরতি ফেণমালী হোতী’’তি. ‘‘ন হি, ভন্তে, অচলং তং হোতি পাকতিকং উদকৰারকগতং উদক’’ন্তি.

‘‘সুতপুব্বং পন তযা, মহারাজ, ‘মহাসমুদ্দে উদকং চলতি খুব্ভতি লুল়তি আৰিলতি ঊমিজাতং হোতি, উদ্ধমধো দিসাৰিদিসং গচ্ছতি, উত্তরতি পতরতি ফেণমালী হোতি, উস্সক্কিত্ৰা ওস্সক্কিত্ৰা [ওস্সক্কিত্ৰা’’তি পদং সী. পী. পোত্থকেসু নত্থি] ৰেলায পহরতি সদ্দাযতি বহুৰিধ’’’ন্তি? ‘‘আম, ভন্তে, সুতপুব্বং এতং মযা দিট্ঠপুব্বঞ্চ ‘মহাসমুদ্দে উদকং হত্থসতম্পি দ্ৰেপি হত্থসতানি গগনে উস্সক্কতী’’’তি. ‘‘কিস্স, মহারাজ, উদকৰারকগতং উদকং ন চলতি ন সদ্দাযতি, কিস্স পন মহাসমুদ্দে উদকং চলতি সদ্দাযতী’’তি? ‘‘ৰাতৰেগস্স মহন্ততায, ভন্তে, মহাসমুদ্দে উদকং চলতি সদ্দাযতি, উদকৰারকগতং উদকং অঘট্টিতং কেহিচি ন চলতি ন সদ্দাযতী’’তি. ‘‘যথা, মহারাজ, ৰাতৰেগস্স মহন্ততায মহাসমুদ্দে উদকং চলতি সদ্দাযতি এৰমেৰ অগ্গিসন্তাপৰেগস্স মহন্ততায উদকং সদ্দাযতী’’তি.

‘‘ননু, মহারাজ, ভেরিপোক্খরং সুক্খং সুক্খেন গোচম্মেন ওনন্ধন্তী’’তি? ‘‘আম, ভন্তে’’. ‘‘অপি নু, মহারাজ, ভেরিযা জীৰো ৰা সত্তো ৰা অত্থী’’তি. ‘‘ন হি, ভন্তে’’তি. ‘‘কিস্স পন, মহারাজ, ভেরী সদ্দাযতী’’তি? ‘‘ইত্থিযা ৰা, ভন্তে, পুরিসস্স ৰা তজ্জেন ৰাযামেনা’’তি. ‘‘যথা, মহারাজ, ইত্থিযা ৰা পুরিসস্স ৰা তজ্জেন ৰাযামেন ভেরী সদ্দাযতি, এৰমেৰ অগ্গিসন্তাপৰেগস্স মহন্ততায উদকং সদ্দাযতি. ইমিনাপি, মহারাজ, কারণেন জানাহি ‘নত্থি উদকে জীৰো ৰা সত্তো ৰা, অগ্গিসন্তাপৰেগস্স মহন্ততায উদকং সদ্দাযতী’তি.

‘‘ময্হম্পি তাৰ, মহারাজ, তৰ পুচ্ছিতব্বং অত্থি, এৰমেসো পঞ্হো সুৰিনিচ্ছিতো হোতি, কিং নু খো, মহারাজ, সব্বেহিপি ভাজনেহি উদকং তপ্পমানং সদ্দাযতি, উদাহু একচ্চেহি যেৰ ভাজনেহি তপ্পমানং সদ্দাযতী’’তি? ‘‘ন হি, ভন্তে, সব্বেহিপি ভাজনেহি উদকং তপ্পমানং সদ্দাযতি, একচ্চেহি যেৰ ভাজনেহি উদকং তপ্পমানং সদ্দাযতী’’তি. ‘‘তেন হি, মহারাজ, জহিতোসি সকসমযং, পচ্চাগতোসি মম ৰিসযং, নত্থি উদকে জীৰো ৰা সত্তো ৰা. যদি, মহারাজ, সব্বেহিপি ভাজনেহি উদকং তপ্পমানং সদ্দাযেয্য, যুত্তমিদং ‘উদকং জীৰতী’তি ৰত্তুং. ন হি, মহারাজ, উদকং দ্ৰযং হোতি, যং সদ্দাযতি, তং জীৰতি, যং ন সদ্দাযতি, তং ন জীৰতীতি. যদি, মহারাজ, উদকং জীৰেয্য, মহন্তানং হত্থিনাগানং উস্সন্নকাযানং পভিন্নানং সোণ্ডায উস্সিঞ্চিত্ৰা মুখে পক্খিপিত্ৰা কুচ্ছিং পৰেসযন্তানং, তম্পি উদকং তেসং দন্তন্তরে চিপ্পিযমানং সদ্দাযেয্য. হত্থসতিকাপি মহানাৰা গরুকা ভারিকা অনেকসতসহস্সভারপরিপূরা মহাসমুদ্দে ৰিচরন্তি, তাহিপি চিপ্পিযমানং উদকং সদ্দাযেয্য. মহতিমহন্তাপি মচ্ছা অনেকসতযোজনিককাযা তিমী তিমিঙ্গলা তিমিরপিঙ্গলা অব্ভন্তরে নিমুগ্গা মহাসমুদ্দে নিৰাসট্ঠানতায পটিৰসন্তা মহাউদকধারা আচমন্তি ধমন্তি চ, তেসম্পি তং দন্তন্তরেপি উদরন্তরেপি চিপ্পিযমানং উদকং সদ্দাযেয্য. যস্মা চ খো, মহারাজ, এৰরূপেহি এৰরূপেহি মহন্তেহি পটিপীল়নেহি পটিপীল়িতং উদকং ন সদ্দাযতি তস্মাপি নত্থি উদকে জীৰো ৰা সত্তো ৰাতি, এৰমেতং, মহারাজ, ধারেহী’’তি.

‘‘সাধু, ভন্তে নাগসেন, দোসাগতো পঞ্হো অনুচ্ছৰিকায ৰিভত্তিযা ৰিভত্তো, যথা নাম, ভন্তে নাগসেন, মহগ্ঘং মণিরতনং ছেকং আচরিযং কুসলং সিক্খিতং মণিকারং পাপুণিত্ৰা কিত্তিং লভেয্য থোমনং পসংসং, মুত্তারতনং ৰা মুত্তিকং দুস্সরতনং ৰা দুস্সিকং, লোহিতচন্দনং ৰা গন্ধিকং পাপুণিত্ৰা কিত্তিং লভেয্য থোমনং পসংসং. এৰমেৰ খো, ভন্তে নাগসেন, দোসাগতো [দেসাগতো (সী. পী.)] পঞ্হো অনুচ্ছৰিকায ৰিভত্তিযা ৰিভত্তো, এৰমেতং তথা সম্পটিচ্ছামী’’তি.

উদকসত্তজীৰপঞ্হো নৰমো.

বুদ্ধৰগ্গো পঠমো.

ইমস্মিং ৰগ্গে নৰ পঞ্হা.

২. নিপ্পপঞ্চৰগ্গো

১. নিপ্পপঞ্চপঞ্হো

১. ‘‘ভন্তে নাগসেন, ভাসিতম্পেতং ভগৰতা ‘নিপ্পপঞ্চারামা, ভিক্খৰে, ৰিহরথ নিপ্পপঞ্চরতিনো’তি, কতমং তং নিপ্পপঞ্চ’’ন্তি? ‘‘সোতাপত্তিফলং, মহারাজ, নিপ্পপঞ্চং, সকদাগামিফলং নিপ্পপঞ্চং, অনাগামিফলং নিপ্পপঞ্চং, অরহত্তফলং নিপ্পপঞ্চ’’ন্তি.

‘‘যদি, ভন্তে নাগসেন, সোতাপত্তিফলং নিপ্পপঞ্চং, সকদাগামিঅনাগামিঅরহত্তফলং নিপ্পপঞ্চং, কিস্স পন ইমে ভিক্খূ উদ্দিসন্তি পরিপুচ্ছন্তি সুত্তং গেয্যং ৰেয্যাকরণং গাথং উদানং ইতিৰুত্তকং জাতকং অব্ভুতধম্মং ৰেদল্লং, নৰকম্মেন পলিবুজ্ঝন্তি দানেন চ পূজায চ, ননু তে জিনপ্পটিক্খিত্তং কম্মং করোতী’’তি?

‘‘যে তে, মহারাজ, ভিক্খূ উদ্দিসন্তি পরিপুচ্ছন্তি সুত্তং গেয্যং ৰেয্যাকরণং গাথং উদানং ইতিৰুত্তকং জাতকং অব্ভুতধম্মং ৰেদল্লং, নৰকম্মেন পলিবুজ্ঝন্তি দানেন চ পূজায চ, সব্বে তে নিপ্পপঞ্চস্স পত্তিযা করোন্তি. যে তে, মহারাজ, সভাৰপরিসুদ্ধা পুব্বে ৰাসিতৰাসনা, তে একচিত্তক্খণেন নিপ্পপচ হোন্তি. যে পন তে ভিক্খূ মহারজক্খা, তে ইমেহি পযোগেহি নিপ্পপঞ্চা হোন্তি.

‘‘যথা, মহারাজ, একো পুরিসো খেত্তে বীজং রোপেত্ৰা অত্তনো যথাবলৰীরিযেন ৰিনা পাকারৰতিযা ধঞ্ঞং উদ্ধরেয্য, একো পুরিসো খেত্তে বীজং রোপেত্ৰা ৰনং পৰিসিত্ৰা কট্ঠঞ্চ সাখঞ্চ ছিন্দিত্ৰা ৰতিপাকারং কত্ৰা ধঞ্ঞং উদ্ধরেয্য. যা তত্থ তস্স ৰতিপাকারপরিযেসনা, সা ধঞ্ঞত্থায. এৰমেৰ খো, মহারাজ, যে তে সভাৰপরিসুদ্ধা পুব্বে ৰাসিতৰাসনা, তে একচিত্তক্খণেন নিপ্পপঞ্চা হোন্তি, ৰিনা ৰতিপাকারং পুরিসো ৰিয ধঞ্ঞুদ্ধারো. যে পন তে ভিক্খূ মহারজক্খা, তে ইমেহি পযোগেহি নিপ্পপঞ্চা হোন্তি, ৰতিপাকারং কত্ৰা পুরিসো ৰিয ধঞ্ঞুদ্ধারো.

‘‘যথা ৰা পন, মহারাজ, পুরিসো মহতিমহন্তে অম্বরুক্খমত্থকে ফলপিণ্ডি ভৰেয্য, অথ তত্থ যো কোচি ইদ্ধিমা আগন্ত্ৰা তস্স ফলং হরেয্য, যো পন তত্থ অনিদ্ধিমা, সো কট্ঠঞ্চ ৰল্লিঞ্চ ছিন্দিত্ৰা নিস্সেণিং বন্ধিত্ৰা তায তং রুক্খং অভিরুহিত্ৰা ফলং হরেয্য. যা তত্থ তস্স নিস্সেণিপরিযেসনা, সা ফলত্থায. এৰমেৰ খো, মহারাজ, যে তে সভাৰপরিসুদ্ধা পুব্বে ৰাসিতৰাসনা, তে একচিত্তক্খণেন নিপ্পপঞ্চা হোন্তি, ইদ্ধিমা ৰিয রুক্খফলং হরন্তো. যে পন তে ভিক্খূ মহারজক্খা, তে ইমিনা পযোগেন সচ্চানি অভিসমেন্তি, নিস্সেণিযা ৰিয পুরিসো রুক্খফলং হরন্তো.

‘‘যথা ৰা পন, মহারাজ, একো পুরিসো অত্থকরণিকো এককো যেৰ সামিকং উপগন্ত্ৰা অত্থং সাধেতি. একো ধনৰা ধনৰসেন পরিসং ৰড্ঢেত্ৰা পরিসায অত্থং সাধেতি. যা তত্থ তস্স পরিসপরিযেসনা, সা অত্থত্থায. এৰমেৰ খো, মহারাজ, যে তে সভাৰপরিসুদ্ধা পুব্বে ৰাসিতৰাসনা, তে একচিত্তক্খণেন ছসু অভিঞ্ঞাসু ৰসিভাৰং পাপুণন্তি, পুরিসো ৰিয এককো অত্থসিদ্ধিং করোন্তো. যে পন তে ভিক্খূ মহারজক্খা, তে ইমেহি পযোগেহি সামঞ্ঞত্থমভিসাধেন্তি, পরিসায ৰিয পুরিসো অত্থসিদ্ধিং করোন্তো.

‘‘উদ্দেসোপি, মহারাজ, বহুকারো, পরিপুচ্ছাপি বহুকারা, নৰকম্মম্পি বহুকারং, দানম্পি বহুকারং, পূজাপি বহুকারা তেসু তেসু করণীযেসু. যথা, মহারাজ, পুরিসো রাজূপসেৰী কতাৰী অমচ্চভটবলদোৰারিকঅনীকট্ঠপারিসজ্জজনেহি, তে তস্স করণীযে অনুপ্পত্তে সব্বেপি উপকারা হোন্তি. এৰমেৰ খো, মহারাজ, উদ্দেসোপি বহুকারো, পরিপুচ্ছাপি বহুকারা, নৰকম্মম্পি বহুকারং, দানম্পি বহুকারং, পূজাপি বহুকারা তেসু তেসু করণীযেসু. যদি, মহারাজ, সব্বেপি অভিজাতিপরিসুদ্ধা ভৰেয্যুং, অনুসাসনেন [অনুসাসকেন (সী. পী.)] করণীযং ন ভৰেয্য. যস্মা চ খো, মহারাজ, সৰনেন করণীযং হোতি, থেরো, মহারাজ, সারিপুত্তো অপরিমিতমসঙ্খেয্যকপ্পং উপাদায উপচিতকুসলমূলো পঞ্ঞায কোটিং গতো, সোপি ৰিনা সৰনেন নাসক্খি আসৰক্খযং পাপুণিতুং. তস্মা, মহারাজ, বহুকারং সৰনং, তথা উদ্দেসোপি পরিপুচ্ছাপি. তস্মা উদ্দেসপরিপুচ্ছাপি নিপ্পপঞ্চা সঙ্খতা’’তি. ‘‘সুনিজ্ঝাপিতো, ভন্তে নাগসেন, পঞ্হো, এৰমেতং তথা সম্পটিচ্ছামী’’তি.

নিপ্পপঞ্চপঞ্হো পঠমো.

২. খীণাসৰভাৰপঞ্হো

২. ‘‘ভন্তে নাগসেন, তুম্হে ভণথ ‘যো গিহী অরহত্তং পত্তো, দ্ৰে ৰাস্স গতিযো ভৰন্তি অনঞ্ঞা, তস্মিং যেৰ দিৰসে পব্বজতি ৰা পরিনিব্বাযতি ৰা. ন সো দিৰসো সক্কা অতিক্কমেতু’ন্তি. সচে সো, ভন্তে নাগসেন, তস্মিং দিৰসে আচরিযং ৰা উপজ্ঝাযং ৰা পত্তচীৰরং ৰা ন লভেথ, অপি নু খো সো অরহা সযং ৰা পব্বজেয্য দিৰসং ৰা অতিক্কমেয্য, অঞ্ঞো কোচি অরহা ইদ্ধিমা আগন্ত্ৰা তং পব্বাজেয্য ৰা পরিনিব্বাযেয্য ৰা’’তি? ‘‘ন সো, মহারাজ, অরহা সযং পব্বজেয্য, সযং পব্বজন্তো থেয্যং আপজ্জতি, ন চ দিৰসং অতিক্কমেয্য, অঞ্ঞস্স অরহন্তস্স আগমনং ভৰেয্য ৰা ন ৰা ভৰেয্য, তস্মিং যেৰ দিৰসে পরিনিব্বাযেয্যা’’তি. ‘‘তেন হি, ভন্তে নাগসেন, অরহত্তস্স সন্তভাৰো ৰিজহিতো হোতি, যেন অধিগতস্স জীৰিতহারো ভৰতী’’তি.

‘‘ৰিসমং, মহারাজ, গিহিলিঙ্গং, ৰিসমে লিঙ্গে লিঙ্গদুব্বলতায অরহত্তং পত্তো গিহী তস্মিং যেৰ দিৰসে পব্বজতি ৰা পরিনিব্বাযতি ৰা. নেসো, মহারাজ, দোসো অরহত্তস্স, গিহিলিঙ্গস্সেৰেসো দোসো যদিদং লিঙ্গদুব্বলতা.

‘‘যথা, মহারাজ, ভোজনং সব্বসত্তানং আযুপালকং জীৰিতরক্খকং ৰিসমকোট্ঠস্স মন্দদুব্বলগহণিকস্স অৰিপাকেন জীৰিতং হরতি. নেসো, মহারাজ, দোসো ভোজনস্স, কোট্ঠস্সেৰেসো দোসো যদিদং অগ্গিদুব্বলতা. এৰমেৰ খো, মহারাজ, ৰিসমে লিঙ্গে লিঙ্গদুব্বলতায অরহত্তং পত্তো গিহী তস্মিং যেৰ দিৰসে পব্বজতি ৰা পরিনিব্বাযতি ৰা. নেসো, মহারাজ, দোসো অরহত্তস্স, গিহিলিঙ্গস্সেৰেসো দোসো যদিদং লিঙ্গদুব্বলতা.

‘‘যথা ৰা পন, মহারাজ, পরিত্তং তিণসলাকং উপরি গরুকে পাসাণে ঠপিতে দুব্বলতায ভিজ্জিত্ৰা পততি. এৰমেৰ খো, মহারাজ, অরহত্তং পত্তো গিহী তেন লিঙ্গেন অরহত্তং ধারেতুং অসক্কোন্তো তস্মিং যেৰ দিৰসে পব্বজতি ৰা পরিনিব্বাযতি ৰা.

‘‘যথা ৰা পন, মহারাজ, পুরিসো অবলো দুব্বলো নিহীনজচ্চো পরিত্তপুঞ্ঞো মহতিমহারজ্জং লভিত্ৰা খণেন পরিপততি পরিধংসতি ওসক্কতি, ন সক্কোতি ইস্সরিযং ধারেতুং, এৰমেৰ খো, মহারাজ, অরহত্তং পত্তো গিহী তেন লিঙ্গেন অরহত্তং ধারেতুং ন সক্কোতি, তেন কারণেন তস্মিং যেৰ দিৰসে পব্বজতি ৰা পরিনিব্বাযতি ৰা’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

খীণাসৰভাৰপঞ্হো দুতিযো.

৩. খীণাসৰসতিসম্মোসপঞ্হো

৩. ‘‘ভন্তে নাগসেন, অত্থি অরহতো সতিসম্মোসো’’তি? ‘‘ৰিগতসতিসম্মোসা খো, মহারাজ, অরহন্তো, নত্থি অরহন্তানং সতিসম্মোসো’’তি. ‘‘আপজ্জেয্য পন, ভন্তে, অরহা আপত্তি’’ন্তি? ‘‘আম, মহারাজা’’তি. ‘‘কিস্মিং ৰত্থুস্মি’’ন্তি? ‘‘কুটিকারে, মহারাজ, সঞ্চরিত্তে, ৰিকালে কালসঞ্ঞায, পৰারিতে অপ্পৰারিতসঞ্ঞায, অনতিরিত্তে অতিরিত্তসঞ্ঞাযা’’তি.

‘‘ভন্তে নাগসেন, তুম্হে ভণথ ‘যে আপত্তিং আপজ্জন্তি, তে দ্ৰীহি কারণেহি আপজ্জন্তি অনাদরিযেন ৰা অজাননেন ৰা’তি. অপি নু খো, ভন্তে, অরহতো অনাদরিযং হোতি, যং অরহা আপত্তিং আপজ্জতী’’তি? ‘‘ন হি, মহারাজা’’তি.

‘‘যদি, ভন্তে নাগসেন, অরহা আপত্তিং আপজ্জতি, নত্থি চ অরহতো অনাদরিযং, তেন হি অত্থি অরহতো সতিসম্মোসো’’তি? ‘‘নত্থি, মহারাজ, অরহতো সতিসম্মোসো, আপত্তিঞ্চ অরহা আপজ্জতী’’তি.

‘‘তেন হি, ভন্তে, কারণেন মং সঞ্ঞাপেহি, কিং তত্থ কারণ’’ন্তি? ‘‘দ্ৰেমে, মহারাজ, কিলেসা লোকৰজ্জং পণ্ণত্তিৰজ্জঞ্চাতি. কতমং, মহারাজ, লোকৰজ্জং? দস অকুসলকম্মপথা, ইদং ৰুচ্চতি লোকৰজ্জং. কতমং পণ্ণত্তিৰজ্জং? যং লোকে অত্থি সমণানং অননুচ্ছৰিকং অননুলোমিকং, গিহীনং অনৰজ্জং. তত্থ ভগৰা সাৰকানং সিক্খাপদং পঞ্ঞপেতি ‘যাৰজীৰং অনতিক্কমনীয’ন্তি. ৰিকালভোজনং, মহারাজ, লোকস্স অনৰজ্জং, তং জিনসাসনে ৰজ্জং. ভূতগামৰিকোপনং, মহারাজ, লোকস্স অনৰজ্জং, তং জিনসাসনে ৰজ্জং. উদকে হস্সধম্মং, মহারাজ, লোকস্স অনৰজ্জং, তং জিনসাসনে ৰজ্জং. ইতি এৰরূপানি এৰরূপানি, মহারাজ, জিনসাসনে ৰজ্জানি, ইদং ৰুচ্চতি পণ্ণত্তিৰজ্জং.

‘‘লোকৰজ্জং অভব্বো খীণাসৰো তং অজ্ঝাচরিতুং, যং কিলেসং পণ্ণত্তিৰজ্জং, তং অজানন্তো আপজ্জেয্য. অৰিসযো, মহারাজ, একচ্চস্স অরহতো সব্বং জানিতুং, ন হি তস্স বলং অত্থি সব্বং জানিতুং. অনঞ্ঞাতং, মহারাজ, অরহতো ইত্থিপুরিসানং নামম্পি গোত্তম্পি, মগ্গোপি তস্স মহিযা অনঞ্ঞাতো; ৰিমুত্তিং যেৰ, মহারাজ, একচ্চো অরহা জানেয্য; ছল়ভিঞ্ঞো অরহা সকৰিসযং জানেয্য; সব্বঞ্ঞূ, মহারাজ, তথাগতোৰ সব্বং জানাতী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

খীণাসৰসতিসম্মোসপঞ্হো ততিযো.

৪. লোকে নত্থিভাৰপঞ্হো

৪. ‘‘ভন্তে নাগসেন, দিস্সন্তি লোকে বুদ্ধা, দিস্সন্তি পচ্চেকবুদ্ধা, দিস্সন্তি তথাগতস্স সাৰকা, দিস্সন্তি চক্কৰত্তিরাজানো, দিস্সন্তি পদেসরাজানো, দিস্সন্তি দেৰমনুস্সা, দিস্সন্তি সধনা, দিস্সন্তি অধনা, দিস্সন্তি সুগতা, দিস্সন্তি দুগ্গতা, দিস্সতি পুরিসস্স ইত্থিলিঙ্গং পাতুভূতং, দিস্সতি ইত্থিযা পুরিসলিঙ্গং পাতুভূতং, দিস্সতি সুকতং দুক্কতং কম্মং, দিস্সন্তি কল্যাণপাপকানং কম্মানং ৰিপাকূপভোগিনো সত্তা, অত্থি লোকে সত্তা অণ্ডজা জলাবুজা সংসেদজা ওপপাতিকা, অত্থি সত্তা অপদা দ্ৰিপদা চতুপ্পদা বহুপ্পদা, অত্থি লোকে যক্খা রক্খসা কুম্ভণ্ডা অসুরা দানৰা গন্ধব্বা পেতা পিসাচা, অত্থি কিন্নরা মহোরগা নাগা সুপণ্ণা সিদ্ধা ৰিজ্জাধরা, অত্থি হত্থী অস্সা গাৰো মহিংসা [মহিসা (সী. পী.)] ওট্ঠা গদ্রভা অজা এল়কা মিগা সূকরা সীহা ব্যগ্ঘা দীপী অচ্ছা কোকা তরচ্ছা সোণা সিঙ্গালা, অত্থি বহুৰিধা সকুণা, অত্থি সুৰণ্ণং রজতং মুত্তা মণি সঙ্খো সিলা পৰাল়ং লোহিতঙ্কো মসারগল্লং ৰেল়ুরিযো ৰজিরং ফলিকং কাল়লোহং তম্বলোহং ৰট্টলোহং কংসলোহং, অত্থি খোমং কোসেয্যং কপ্পাসিকং সাণং ভঙ্গং কম্বলং, অত্থি সালি ৰীহি যৰো কঙ্গু কুদ্রূসো ৰরকো গোধূমো মুগ্গো, মাসো তিলং কুলত্থং, অত্থি মূলগন্ধো সারগন্ধো ফেগ্গুগন্ধো তচগন্ধো পত্তগন্ধো পুপ্ফগন্ধো ফলগন্ধো সব্বগন্ধো, অত্থি তিণ লতা গচ্ছ রুক্খ ওসধি ৰনপ্পতি নদী পব্বত সমুদ্দ মচ্ছকচ্ছপা সব্বং লোকে অত্থি. যং, ভন্তে, লোকে নত্থি, তং মে কথেহী’’তি.

‘‘তীণিমানি, মহারাজ, লোকে নত্থি. কতমানি তীণি? সচেতনা ৰা অচেতনা ৰা অজরামরা লোকে নত্থি, সঙ্খারানং নিচ্চতা নত্থি, পরমত্থেন সত্তূপলদ্ধি নত্থি, ইমানি খো, মহারাজ, তীণি লোকে নত্থী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

লোকে নত্থিভাৰপঞ্হো চতুত্থো.

৫. অকম্মজাদিপঞ্হো

৫. ‘‘ভন্তে নাগসেন, দিস্সন্তি লোকে কম্মনিব্বত্তা, দিস্সন্তি হেতুনিব্বত্তা, দিস্সন্তি উতুনিব্বত্তা, যং লোকে অকম্মজং অহেতুজং অনুতুজং, তং মে কথেহী’’তি. ‘‘দ্ৰেমে, মহারাজ, লোকস্মিং অকম্মজা অহেতুজা অনুতুজা. কতমে দ্ৰে? আকাসো, মহারাজ, অকম্মজো অহেতুজো অনুতুজো; নিব্বানং, মহারাজ, অকম্মজং অহেতুজং অনুতুজং. ইমে খো, মহারাজ, দ্ৰে অকম্মজা অহেতুজা অনুতুজা’’তি.

‘‘মা, ভন্তে নাগসেন, জিনৰচনং মক্খেহি, মা অজানিত্ৰা পঞ্হং ব্যাকরোহী’’তি. ‘‘কিং খো, মহারাজ, অহং ৰদামি, যং মং ত্ৰং এৰং ৰদেসি ‘মা, ভন্তে নাগসেন, জিনৰচনং মক্খেহি, মা অজানিত্ৰা পঞ্হং ব্যাকরোহী’’’তি? ‘‘ভন্তে নাগসেন, যুত্তমিদং তাৰ ৰত্তুং ‘আকাসো অকম্মজো অহেতুজো অনুতুজো’তি. অনেকসতেহি পন, ভন্তে নাগসেন, কারণেহি ভগৰতা সাৰকানং নিব্বানস্স সচ্ছিকিরিযায মগ্গো অক্খাতো, অথ চ পন ত্ৰং এৰং ৰদেসি ‘অহেতুজং নিব্বান’’’ন্তি. ‘‘সচ্চং, মহারাজ, ভগৰতা অনেকসতেহি কারণেহি সাৰকানং নিব্বানস্স সচ্ছিকিরিযায মগ্গো অক্খাতো, ন চ পন নিব্বানস্স উপ্পাদায হেতু অক্খাতো’’তি.

‘‘এত্থ মযং, ভন্তে নাগসেন, অন্ধকারতো অন্ধকারতরং পৰিসাম, ৰনতো ৰনতরং পৰিসাম, গহনতো গহনতরং [গহনন্তরতো গহনন্তরং (ক.)] পৰিসাম, যত্র হি নাম নিব্বানস্স সচ্ছিকিরিযায হেতু অত্থি, তস্স পন ধম্মস্স উপ্পাদায হেতু নত্থি. যদি, ভন্তে নাগসেন, নিব্বানস্স সচ্ছিকিরিযায হেতু অত্থি, তেন হি নিব্বানস্স উপ্পাদাযপি হেতু ইচ্ছিতব্বো.

‘‘যথা পন, ভন্তে নাগসেন, পুত্তস্স পিতা অত্থি, তেন কারণেন পিতুনোপি পিতা ইচ্ছিতব্বো. যথা অন্তেৰাসিকস্স আচরিযো অত্থি, তেন কারণেন আচরিযস্সপি আচরিযো ইচ্ছিতব্বো. যথা অঙ্কুরস্স বীজং অত্থি, তেন কারণেন বীজস্সপি বীজং ইচ্ছিতব্বং. এৰমেৰ খো, ভন্তে নাগসেন, যদি নিব্বানস্স সচ্ছিকিরিযায হেতু অত্থি, তেন কারণেন নিব্বানস্স উপ্পাদাযপি হেতু ইচ্ছিতব্বো.

‘‘যথা রুক্খস্স ৰা লতায ৰা অগ্গে সতি তেন কারণেন মজ্ঝম্পি অত্থি, মূলম্পি অত্থি. এৰমেৰ খো, ভন্তে নাগসেন, যদি নিব্বানস্স সচ্ছিকিরিযায হেতু অত্থি, তেন কারণেন নিব্বানস্স উপ্পাদাযপি হেতু ইচ্ছিতব্বো’’’তি.

‘‘অনুপ্পাদনীযং, মহারাজ, নিব্বানং, তস্মা ন নিব্বানস্স উপ্পাদায হেতু অক্খাতো’’তি. ‘‘ইঙ্ঘ, ভন্তে নাগসেন, কারণং দস্সেত্ৰা কারণেন মং সঞ্ঞাপেহি, যথাহং জানেয্যং নিব্বানস্স সচ্ছিকিরিযায হেতু অত্থি, নিব্বানস্স উপ্পাদায হেতু নত্থী’’তি.

‘‘তেন হি, মহারাজ, সক্কচ্চং সোতং ওদহ, সাধুকং সুণোহি, ৰক্খামি তত্থ কারণং, সক্কুণেয্য, মহারাজ, পুরিসো পাকতিকেন বলেন ইতো হিমৰন্তং পব্বতরাজং উপগন্তু’’ন্তি? ‘‘আম, ভন্তে’’তি. ‘‘সক্কুণেয্য পন সো, মহারাজ, পুরিসো পাকতিকেন বলেন হিমৰন্তং পব্বতরাজং ইধ আহরিতু’’ন্তি? ‘‘ন হি, ভন্তে’’তি. ‘‘এৰমেৰ খো, মহারাজ, সক্কা নিব্বানস্স সচ্ছিকিরিযায মগ্গো অক্খাতুং, ন সক্কা নিব্বানস্স উপ্পাদায হেতু দস্সেতুং.