১০. কঠিনতপনপঞ্হো

১০. ‘‘ভন্তে নাগসেন, কিস্স হেমন্তে সূরিযো কঠিনং তপতি, নো তথা গিম্হে’’তি? ‘‘গিম্হে, মহারাজ, অনুপহতং হোতি রজোজল্লং, ৰাতক্খুভিতা রেণূ গগনানুগতা হোন্তি, আকাসেপি অব্ভা সুবহলা হোন্তি, মহাৰাতো চ অধিমত্তং ৰাযতি, তে সব্বে নানাকুলা সমাযুতা সূরিযরংসিযো পিদহন্তি, তেন গিম্হে সূরিযো মন্দং তপতি.

‘‘হেমন্তে পন, মহারাজ, হেট্ঠা পথৰী নিব্বুতা হোতি, উপরি মহামেঘো উপট্ঠিতো হোতি, উপসন্তং হোতি রজোজল্লং, রেণু চ সন্তসন্তং গগনে চরতি, ৰিগতৰলাহকো চ হোতি আকাসো, ৰাতো চ মন্দমন্দং ৰাযতি, এতেসং উপরতিযা ৰিসুদ্ধা [ৰিসদা (সী. পী.)] হোন্তি সূরিযরংসিযো, উপঘাতৰিমুত্তস্স সূরিযস্স তাপো অতি ৰিয তপতি. ইদমেত্থ, মহারাজ, কারণং, যেন কারণেন সূরিযো হেমন্তে কঠিনং তপতি, নো তথা গিম্হে’’তি. ‘‘সব্বীতিমুত্তো, ভন্তে, সূরিযো কঠিনং তপতি, মেঘাদিসহগতো কঠিনং ন তপতী’’তি.

কঠিনতপনপঞ্হো দসমো.

নিপ্পপঞ্চৰগ্গো দুতিযো.

ইমস্মিং ৰগ্গে দস পঞ্হা.