২. উদরসংযতপঞ্হো

২. ‘‘ভন্তে নাগসেন, ভাসিতম্পেতং ভগৰতা –

‘‘‘উত্তিট্ঠে নপ্পমজ্জেয্য, উদরে সংযতো সিযা’তি.

‘‘পুন চ ভগৰতা ভণিতং ‘অহং খো পনুদাযি, অপ্পেকদা ইমিনা পত্তেন সমতিত্তিকম্পি ভুঞ্জামি, ভিয্যোপি ভুঞ্জামী’তি. যদি, ভন্তে নাগসেন, ভগৰতা ভণিতং ‘উত্তিট্ঠে নপ্পমজ্জেয্য, উদরে সংযতো সিযা’তি, তেন হি ‘অহং খো পনুদাযি, অপ্পেকদা ইমিনা পত্তেন সমতিত্থিকম্পি ভুঞ্জামি, ভিয্যোপি ভুঞ্জামী’তি যং ৰচনং, তং মিচ্ছা. যদি তথাগতেন ভণিতং ‘অহং খো পনুদাযি, অপ্পেকদা ইমিনা পত্তেন সমতিত্থিকম্পি ভুঞ্জামি, ভিয্যোপি ভুঞ্জামী’তি, তেন হি ‘উত্তিট্ঠে নপ্পমজ্জেয্য, উদরে সংযতো সিযা’তি তম্পি ৰচনং মিচ্ছা. অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি.

‘‘ভাসিতম্পেতং, মহারাজ, ভগৰতা ‘উত্তিট্ঠে নপ্পমজ্জেয্য, উদরে সংযতো সিযা’তি, ভণিতঞ্চ ‘অহং খো পনুদাযি, অপ্পেকদা ইমিনা পত্তেন সমতিত্তিকম্পি ভুঞ্জামি, ভিয্যোপি ভুঞ্জামী’তি. যং, মহারাজ, ভগৰতা ভণিতং ‘উত্তিট্ঠে নপ্পমজ্জেয্য, উদরে সংযতো সিযা’তি, তং সভাৰৰচনং অসেসৰচনং নিস্সেসৰচনং নিপ্পরিযাযৰচনং ভূতৰচনং তচ্ছৰচনং যাথাৰৰচনং অৰিপরীতৰচনং ইসিৰচনং মুনিৰচনং ভগৰন্তৰচনং অরহন্তৰচনং পচ্চেকবুদ্ধৰচনং জিনৰচনং সব্বঞ্ঞুৰচনং তথাগতস্স অরহতো সম্মাসম্বুদ্ধস্স ৰচনং.

‘‘উদরে অসংযতো, মহারাজ, পাণম্পি হনতি, অদিন্নম্পি আদিযতি, পরদারম্পি গচ্ছতি, মুসাপি ভণতি, মজ্জম্পি পিৰতি, মাতরম্পি জীৰিতা ৰোরোপেতি, পিতরম্পি জীৰিতা ৰোরোপেতি, অরহন্তম্পি জীৰিতা ৰোরোপেতি, সঙ্ঘম্পি ভিন্দতি, দুট্ঠেন চিত্তেন তথাগতস্স লোহিতম্পি উপ্পাদেতি. ননু, মহারাজ, দেৰদত্তো উদরে অসংযতো সঙ্ঘং ভিন্দিত্ৰা কপ্পট্ঠিযং কম্মং আযূহি [আযূহতি (ক.)]. এৰরূপানি, মহারাজ, অঞ্ঞানিপি বহুৰিধানি কারণানি দিস্ৰা ভগৰতা ভণিতং ‘উত্তিট্ঠে নপ্পমজ্জেয্য, উদরে সংযতো সিযা’তি.

‘‘উদরে সংযতো, মহারাজ, চতুসচ্চাভিসমযং অভিসমেতি, চত্তারি সামঞ্ঞফলানি সচ্ছিকরোতি, চতূসু পটিসম্ভিদাসু অট্ঠসু সমাপত্তীসু ছসু অভিঞ্ঞাসু ৰসীভাৰং পাপুণাতি, কেৰলঞ্চ সমণধম্মং পূরেতি. ননু, মহারাজ, সুকপোতকো উদরে সংযতো হুত্ৰা যাৰ তাৰতিংসভৰনং কম্পেত্ৰা সক্কং দেৰানমিন্দং উপট্ঠানমুপনেসি, এৰরূপানি, মহারাজ, অঞ্ঞানিপি বহুৰিধানি কারণানি দিস্ৰা ভগৰতা ভণিতং ‘উত্তিট্ঠে নপ্পমজ্জেয্য, উদরে সংযতো সিযা’তি.

‘‘যং পন, মহারাজ, ভগৰতা ভণিতং ‘অহং খো পনুদাযি অপ্পেকদা ইমিনা পত্তেন সমতিত্তিকম্পি ভুঞ্জামি, ভিয্যোপি ভুঞ্জামী’তি, তং কতকিচ্চেন নিট্ঠিতকিরিযেন সিদ্ধত্থেন ৰুসিতৰোসানেন নিরাৰরণেন সব্বঞ্ঞুনা সযম্ভুনা তথাগতেন অত্তানং উপাদায ভণিতং.

‘‘যথা, মহারাজ, ৰন্তস্স ৰিরিত্তস্স অনুৰাসিতস্স আতুরস্স সপ্পাযকিরিযা ইচ্ছিতব্বা হোতি, এৰমেৰ খো, মহারাজ, সকিলেসস্স অদিট্ঠসচ্চস্স উদরে সংযমো করণীযো হোতি. যথা, মহারাজ, মণিরতনস্স সপ্পভাসস্স জাতিমন্তস্স অভিজাতিপরিসুদ্ধস্স মজ্জননিঘংসনপরিসোধনেন করণীযং ন হোতি, এৰমেৰ খো, মহারাজ, তথাগতস্স বুদ্ধৰিসযে পারমিং গতস্স কিরিযাকরণেসু আৰরণং ন হোতী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

উদরসংযতপঞ্হো দুতিযো.