৪. মেণ্ডকপঞ্হো
১. ইদ্ধিবলৰগ্গো
১. কতাধিকারসফলপঞ্হো
১. অথ খো মিলিন্দো রাজা কতাৰকাসো নিপচ্চ গরুনো পাদে সিরসি অঞ্জলিং কত্ৰা এতদৰোচ ‘‘ভন্তে নাগসেন, ইমে তিত্থিযা এৰং ভণন্তি [ৰঞ্চো ভৰতি অফলো (সী. পী. ক.)] ‘যদি বুদ্ধো পূজং সাদিযতি, ন পরিনিব্বুতো বুদ্ধো সংযুত্তো লোকেন অন্তোভৰিকো লোকস্মিং লোকসাধারণো, তস্মা তস্স কতো অধিকারো অৰঞ্ঝো ভৰতি সফলো. যদি পরিনিব্বুতো ৰিসংযুত্তো লোকেন নিস্সটো সব্বভৰেহি, তস্স পূজা নুপ্পজ্জতি, পরিনিব্বুতো ন কিঞ্চি সাদিযতি, অসাদিযন্তস্স কতো অধিকারো ৰঞ্ঝো ভৰতি অফলো’তি উভতো কোটিকো এসো পঞ্হো, নেসো ৰিসযো অপ্পত্তমানসানং, মহন্তানং যেৰেসো ৰিসযো, ভিন্দেতং দিট্ঠিজালং একংসে ঠপয, তৰেসো পঞ্হো অনুপ্পত্তো, অনাগতানং জিনপুত্তানং চক্খুং দেহি পরৰাদনিগ্গহাযা’’তি.
থেরো আহ ‘‘পরিনিব্বুতো, মহারাজ, ভগৰা, ন চ ভগৰা পূজং সাদিযতি, বোধিমূলে যেৰ তথাগতস্স সাদিযনা পহীনা, কিং পন অনুপাদিসেসায নিব্বানধাতুযা পরিনিব্বুতস্স. ভাসিতম্পেতং, মহারাজ, থেরেন সারিপুত্তেন ধম্মসেনাপতিনা –
‘‘‘পূজিযন্তা [পূজিতা (স্যা.)] অসমসমা, সদেৰমানুসেহি তে;
ন সাদিযন্তি সক্কারং, বুদ্ধানং এস ধম্মতা’’’তি.
রাজা আহ ‘‘ভন্তে নাগসেন, পুত্তো ৰা পিতুনো ৰণ্ণং ভাসতি, পিতা ৰা পুত্তস্স ৰণ্ণং ভাসতি, ন চেতং কারণং পরৰাদানং নিগ্গহায, পসাদপ্পকাসনং নামেতং, ইঙ্ঘ মে ত্ৰং তত্থ কারণং সম্মা ব্রূহি সকৰাদস্স পতিট্ঠাপনায দিট্ঠিজালৰিনিৰেঠনাযা’’তি.
থেরো আহ ‘‘পরিনিব্বুতো, মহারাজ, ভগৰা, ন চ ভগৰা পূজং সাদিযতি, অসাদিযন্তস্সেৰ তথাগতস্স দেৰমনুস্সা ধাতুরতনং ৰত্থুং করিত্ৰা তথাগতস্স ঞাণরতনারম্মণেন সম্মাপটিপত্তিং সেৰন্তা তিস্সো সম্পত্তিযো পটিলভন্তি.
‘‘যথা, মহারাজ, মহতিমহাঅগ্গিক্খন্ধো পজ্জলিত্ৰা নিব্বাযেয্য, অপি নু খো সো, মহারাজ, মহাঅগ্গিক্খন্ধো সাদিযতি তিণকট্ঠুপাদান’’ন্তি? ‘‘জলমানোপি সো, ভন্তে, মহাঅগ্গিক্খন্ধো তিণকট্ঠুপাদানং ন সাদিযতি, কিং পন নিব্বুতো উপসন্তো অচেতনো সাদিযতি? ‘‘তস্মিং পন, মহারাজ, অগ্গিক্খন্ধে উপরতে উপসন্তে লোকে অগ্গি সুঞ্ঞো হোতী’’তি. ‘‘ন হি, ভন্তে, কট্ঠং অগ্গিস্স ৰত্থু হোতি উপাদানং, যে কেচি মনুস্সা অগ্গিকামা, তে অত্তনো থামবলৰীরিযেন পচ্চত্তপুরিসকারেন কট্ঠং মন্থযিত্ৰা [মদ্দিত্ৰা (ক.)] অগ্গিং নিব্বত্তেত্ৰা তেন অগ্গিনা অগ্গিকরণীযানি কম্মানি করোন্তী’’তি. ‘‘তেন হি, মহারাজ, তিত্থিযানং ৰচনং মিচ্ছা ভৰতি ‘অসাদিযন্তস্স কতো অধিকারো ৰঞ্ঝো ভৰতি অফলো’তি.
‘‘যথা, মহারাজ, মহতিমহাঅগ্গিক্খন্ধো পজ্জলি, এৰমেৰ ভগৰা দসসহস্সিযা [দসসহস্সিম্হি (সী. পী. ক.)] লোকধাতুযা বুদ্ধসিরিযা পজ্জলি. যথা, মহারাজ, মহতিমহাঅগ্গিক্খন্ধো পজ্জলিত্ৰা নিব্বুতো, এৰমেৰ ভগৰা দসসহস্সিযা লোকধাতুযা বুদ্ধসিরিযা পজ্জলিত্ৰা অনুপাদিসেসায নিব্বানধাতুযা পরিনিব্বুতো. যথা, মহারাজ, নিব্বুতো অগ্গিক্খন্ধো তিণকট্ঠুপাদানং ন সাদিযতি, এৰমেৰ খো লোকহিতস্স সাদিযনা পহীনা উপসন্তা. যথা, মহারাজ, মনুস্সা নিব্বুতে অগ্গিক্খন্ধে অনুপাদানে অত্তনো থামবলৰীরিযেন পচ্চত্তপুরিসকারেন কট্ঠং মন্থযিত্ৰা অগ্গিং নিব্বত্তেত্ৰা তেন অগ্গিনা অগ্গিকরণীযানি কম্মানি করোন্তি, এৰমেৰ খো দেৰমনুস্সা তথাগতস্স পরিনিব্বুতস্স অসাদিযন্তস্সেৰ ধাতুরতনং ৰত্থুং করিত্ৰা তথাগতস্স ঞাণরতনারম্মণেন সম্মাপটিপত্তিং সেৰন্তা তিস্সো সম্পত্তিযো পটিলভন্তি, ইমিনাপি, মহারাজ, কারণেন তথাগতস্স পরিনিব্বুতস্স অসাদিযন্তস্সেৰ কতো অধিকারো অৰঞ্ঝো ভৰতি সফলো.
‘‘অপরম্পি, মহারাজ, উত্তরিং কারণং সুণোহি যেন কারণেন তথাগতস্স পরিনিব্বুতস্স অসাদিযন্তস্সেৰ কতো অধিকারো অৰঞ্ঝো ভৰতি সফলো. যথা, মহারাজ, মহতিমহাৰাতো ৰাযিত্ৰা উপরমেয্য, অপি নু খো সো, মহারাজ, উপরতো ৰাতো সাদিযতি পুন নিব্বত্তাপন’’ন্তি? ‘‘ন হি, ভন্তে, উপরতস্স ৰাতস্স আভোগো ৰা মনসিকারো ৰা পুন নিব্বত্তাপনায’’. ‘‘কিং কারণং’’? ‘‘অচেতনা সা ৰাযোধাতূ’’তি. ‘‘অপি নু তস্স, মহারাজ, উপরতস্স ৰাতস্স ৰাতোতি সমঞ্ঞা অপগচ্ছতী’’তি? ‘‘ন হি, ভন্তে, তালৰণ্টৰিধূপনানি ৰাতস্স উপ্পত্তিযা পচ্চযা, যে কেচি মনুস্সা উণ্হাভিতত্তা পরিল়াহপরিপীল়িতা, তে তালৰণ্টেন ৰা ৰিধূপনেন ৰা অত্তনো থামবলৰীরিযেন পচ্চত্তপুরিসকারেন তং নিব্বত্তেত্ৰা তেন ৰাতেন উণ্হং নিব্বাপেন্তি পরিল়াহং ৰূপসমেন্তী’’তি. ‘‘তেন হি, মহারাজ, তিত্থিযানং ৰচনং মিচ্ছা ভৰতি ‘অসাদিযন্তস্স কতো অধিকারো ৰঞ্ঝো ভৰতি অফলো’তি.
‘‘যথা, মহারাজ, মহতিমহাৰাতো ৰাযি, এৰমেৰ ভগৰা দসসহস্সিযা লোকধাতুযা সীতলমধুরসন্তসুখুমমেত্তাৰাতেন উপৰাযি. যথা, মহারাজ, মহতিমহাৰাতো ৰাযিত্ৰা উপরতো, এৰমেৰ ভগৰা সীতলমধুরসন্তসুখুমমেত্তাৰাতেন উপৰাযিত্ৰা অনুপাদিসেসায নিব্বানধাতুযা পরিনিব্বুতো. যথা, মহারাজ, উপরতো ৰাতো পুন নিব্বত্তাপনং ন সাদিযতি, এৰমেৰ লোকহিতস্স সাদিযনা পহীনা উপসন্তা. যথা, মহারাজ, তে মনুস্সা উণ্হাভিতত্তা পরিল়াহপরিপীল়িতা, এৰমেৰ দেৰমনুস্সা তিৰিধগ্গিসন্তাপপরিল়াহপরিপীল়িতা. যথা তালৰণ্টৰিধূপনানি ৰাতস্স নিব্বত্তিযা পচ্চযা হোন্তি, এৰমেৰ তথাগতস্স ধাতু চ ঞাণরতনঞ্চ পচ্চযো হোতি তিস্সন্নং সম্পত্তীনং পটিলাভায. যথা মনুস্সা উণ্হাভিতত্তা পরিল়াহপরিপীল়িতা তালৰণ্টেন ৰা ৰিধূপনেন ৰা ৰাতং নিব্বত্তেত্ৰা উণ্হং নিব্বাপেন্তি পরিল়াহং ৰূপসমেন্তি, এৰমেৰ দেৰমনুস্সা তথাগতস্স পরিনিব্বুতস্স অসাদিযন্তস্সেৰ ধাতুঞ্চ ঞাণরতনঞ্চ পূজেত্ৰা কুসলং নিব্বত্তেত্ৰা তেন কুসলেন তিৰিধগ্গিসন্তাপপরিল়াহং নিব্বাপেন্তি ৰূপসমেন্তি. ইমিনাপি, মহারাজ, কারণেন তথাগতস্স পরিনিব্বুতস্স অসাদিযন্তস্সেৰ কতো অধিকারো অৰঞ্ঝো ভৰতি সফলোতি.
‘‘অপরম্পি, মহারাজ, উত্তরিং কারণং সুণোহি পরৰাদানং নিগ্গহায. যথা, মহারাজ, পুরিসো ভেরিং আকোটেত্ৰা সদ্দং নিব্বত্তেয্য, যো সো ভেরিসদ্দো পুরিসেন নিব্বত্তিতো, সো সদ্দো অন্তরধাযেয্য, অপি নু খো সো, মহারাজ, সদ্দো সাদিযতি পুন নিব্বত্তাপন’’ন্তি? ‘‘ন হি, ভন্তে, অন্তরহিতো সো সদ্দো, নত্থি তস্স পুন উপ্পাদায আভোগো ৰা মনসিকারো ৰা, সকিং নিব্বত্তে ভেরিসদ্দে অন্তরহিতে সো ভেরিসদ্দো সমুচ্ছিন্নো হোতি. ভেরী পন, ভন্তে, পচ্চযো হোতি সদ্দস্স নিব্বত্তিযা, অথ পুরিসো পচ্চযে সতি অত্তজেন ৰাযামেন ভেরিং অকোটেত্ৰা সদ্দং নিব্বত্তেতী’’তি. ‘‘এৰমেৰ খো, মহারাজ, ভগৰা সীলসমাধিপঞ্ঞাৰিমুত্তিৰিমুত্তিঞাণদস্সনপরিভাৰিতং ধাতুরতনঞ্চ ধম্মঞ্চ ৰিনযঞ্চ অনুসিট্ঠঞ্চ [অনুসত্থিঞ্চ (সী. পী.)] সত্থারং ঠপযিত্ৰা সযং অনুপাদিসেসায নিব্বানধাতুযা পরিনিব্বুতো, ন চ পরিনিব্বুতে ভগৰতি সম্পত্তিলাভো উপচ্ছিন্নো হোতি, ভৰদুক্খপটিপীল়িতা সত্তা ধাতুরতনঞ্চ ধম্মঞ্চ ৰিনযঞ্চ অনুসিট্ঠঞ্চ পচ্চযং করিত্ৰা সম্পত্তিকামা সম্পত্তিযো পটিলভন্তি, ইমিনাপি, মহারাজ, কারণেন তথাগতস্স পরিনিব্বুতস্স অসাদিযন্তস্সেৰ কতো অধিকারো অৰঞ্ঝো ভৰতি সফলোতি.
‘‘দিট্ঠঞ্চেতং, মহারাজ, ভগৰতা অনাগতমদ্ধানং. কথিতঞ্চ ভণিতঞ্চ আচিক্খিতঞ্চ ‘সিযা খো পনানন্দ, তুম্হাকং এৰমস্স অতীতসত্থুকং পাৰচনং নত্থি নো সত্থাতি, ন খো পনেতং, আনন্দ, এৰং দট্ঠব্বং, যো ৰো, আনন্দ, মযা ধম্মো চ ৰিনযো চ দেসিতো পঞ্ঞত্তো, সো ৰো মমচ্চযেন সত্থা’তি. পরিনিব্বুতস্স তথাগতস্স অসাদিযন্তস্স কতো অধিকারো ৰঞ্ঝো ভৰতি অফলোতি, তং তেসং তিত্থিযানং ৰচনং মিচ্ছা অভূতং ৰিতথং অলিকং ৰিরুদ্ধং ৰিপরীতং দুক্খদাযকং দুক্খৰিপাকং অপাযগমনীযন্তি.
‘‘অপরম্পি, মহারাজ, উত্তরিং কারণং সুণোহি যেন কারণেন তথাগতস্স পরিনিব্বুতস্স অসাদিযন্তস্সেৰ কতো অধিকারো অৰঞ্ঝো ভৰতি সফলো. সাদিযতি নু খো, মহারাজ, অযং মহাপথৰী ‘সব্ববীজানি মযি সংৰিরুহন্তূ’’’তি? ‘‘ন হি, ভন্তে’’তি. ‘‘কিস্স পন তানি, মহারাজ, বীজানি অসাদিযন্তিযা মহাপথৰিযা সংৰিরুহিত্ৰা দল়্হমূলজটাপতিট্ঠিতা খন্ধসারসাখাপরিৰিত্থিণ্ণা পুপ্ফফলধরা হোন্তী’’তি? ‘‘অসাদিযন্তীপি, ভন্তে, মহাপথৰী তেসং বীজানং ৰত্থুং হোতি পচ্চযং দেতি ৰিরুহনায, তানি বীজানি তং ৰত্থুং নিস্সায তেন পচ্চযেন সংৰিরুহিত্ৰা দল়্হমূলজটাপতিট্ঠিতা খন্ধসারসাখাপরিৰিত্থিণ্ণা পুপ্ফফলধরা হোন্তী’’তি. ‘‘তেন হি, মহারাজ, তিত্থিযা সকে ৰাদে নট্ঠা হোন্তি হতা ৰিরুদ্ধা, সচে তে ভণন্তি ‘অসাদিযন্তস্স কতো অধিকারো ৰঞ্ঝো ভৰতি অফলো’ তি.
‘‘যথা, মহারাজ, মহাপথৰী, এৰং তথাগতো অরহং সম্মাসম্বুদ্ধো. যথা, মহারাজ, মহাপথৰী ন কিঞ্চি সাদিযতি, এৰং তথাগতো ন কিঞ্চি সাদিযতি. যথা, মহারাজ, তানি বীজানি পথৰিং নিস্সায সংৰিরুহিত্ৰা দল়্হমূলজটাপতিট্ঠিতা খন্ধসারসাখাপরিৰিত্থিণ্ণা পুপ্ফফলধরা হোন্তি, এৰং দেৰমনুস্সা তথাগতস্স পরিনিব্বুতস্স অসাদিযন্তস্সেৰ ধাতুঞ্চ ঞাণরতনঞ্চ নিস্সায দল়্হকুসলমূলপতিট্ঠিতা সমাধিক্খন্ধধম্মসারসীলসাখাপরিৰিত্থিণ্ণা ৰিমুত্তিপুপ্ফসামঞ্ঞফলধরা হোন্তি, ইমিনাপি, মহারাজ, কারণেন তথাগতস্স পরিনিব্বুতস্স অসাদিযন্তস্সেৰ কতো অধিকারো অৰঞ্ঝো ভৰতি সফলোতি.
‘‘অপরম্পি, মহারাজ, উত্তরিং কারণং সুণোহি যেন কারণেন তথাগতস্স পরিনিব্বুতস্স অসাদিযন্তস্সেৰ কতো অধিকারো অৰঞ্ঝো ভৰতি সফলো. সাদিযন্তি নু খো, মহারাজ, ইমে ওট্ঠা গোণা গদ্রভা অজা পসূ মনুস্সা অন্তোকুচ্ছিস্মিং কিমিকুলানং সম্ভৰ’’ন্তি? ‘‘ন হি, ভন্তে’’তি. ‘‘কিস্স পন তে, মহারাজ, কিমযো তেসং অসাদিযন্তানং অন্তোকুচ্ছিস্মিং সম্ভৰিত্ৰা বহুপুত্তনত্তা ৰেপুল্লতং পাপুণন্তী’’তি? ‘‘পাপস্স, ভন্তে, কম্মস্স বলৰতায অসাদিযন্তানং যেৰ তেসং সত্তানং অন্তোকুচ্ছিস্মিং কিমযো সম্ভৰিত্ৰা বহুপুত্তনত্তা ৰেপুল্লতং পাপুণন্তী’’তি. ‘‘এৰমেৰ খো, মহারাজ, তথাগতস্স পরিনিব্বুতস্স অসাদিযন্তস্সেৰ ধাতুস্স চ ঞাণারম্মণস্স চ বলৰতায তথাগতে কতো অধিকারো অৰঞ্ঝো ভৰতি সফলোতি.
‘‘অপরম্পি, মহারাজ, উত্তরিং কারণং সুণোহি যেন কারণেন তথাগতস্স পরিনিব্বুতস্স অসাদিযন্তস্সেৰ কতো অধিকারো অৰঞ্ঝো ভৰতি সফলো. সাদিযন্তি নু খো, মহারাজ, ইমে মনুস্সা ইমে অট্ঠনৰুতি রোগা কাযে নিব্বত্তন্তূ’’তি? ‘‘ন হি, ভন্তে’’তি. ‘‘কিস্স পন তে, মহারাজ, রোগা অসাদিযন্তানং কাযে নিপতন্তী’’তি? ‘‘পুব্বে কতেন, ভন্তে, দুচ্চরিতেনা’’তি. ‘‘যদি, মহারাজ, পুব্বে কতং অকুসলং ইধ ৰেদনীযং হোতি, তেন হি, মহারাজ, পুব্বে কতম্পি ইধ কতম্পি কুসলাকুসলং কম্মং অৰঞ্ঝং ভৰতি সফলন্তি. ইমিনাপি, মহারাজ, কারণেন তথাগতস্স পরিনিব্বুতস্স অসাদিযন্তস্সেৰ কতো অধিকারো অৰঞ্ঝো ভৰতি সফলোতি.
‘‘সুতপুব্বং পন তযা, মহারাজ, নন্দকো নাম যক্খো থেরং সারিপুত্তং আসাদযিত্ৰা পথৰিং পৰিট্ঠো’’তি? ‘‘আম, ভন্তে, সুয্যতি, লোকে পাকটো এসো’’তি. ‘‘অপি নু খো, মহারাজ, থেরো সারিপুত্তো সাদিযি নন্দকস্স যক্খস্স মহাপথৰিগিলন’’ন্তি [পৰত্তমানেপি (স্যা.)]. ‘‘উব্বত্তিযন্তেপি, ভন্তে, সদেৰকে লোকে পতমানেপি ছমাযং চন্দিমসূরিযে ৰিকিরন্তেপি সিনেরুপব্বতরাজে থেরো সারিপুত্তো ন পরস্স দুক্খং সাদিযেয্য. তং কিস্স হেতু? যেন হেতুনা থেরো সারিপুত্তো কুজ্ঝেয্য ৰা দুস্সেয্য ৰা, সো হেতু থেরস্স সারিপুত্তস্স সমূহতো সমুচ্ছিন্নো, হেতুনো সমুগ্ঘাতিতত্তা, ভন্তে, থেরো সারিপুত্তো জীৰিতহারকেপি কোপং ন করেয্যা’’তি. ‘‘যদি, মহারাজ, থেরো সারিপুত্তো নন্দকস্স যক্খস্স পথৰিগিলনং ন সাদিযি, কিস্স পন নন্দকো যক্খো পথৰিং পৰিট্ঠো’’তি? ‘‘অকুসলস্স, ভন্তে, কম্মস্স বলৰতাযা’’তি. ‘‘যদি, মহারাজ, অকুসলস্স কম্মস্স বলৰতায নন্দকো যক্খো পথৰিং পৰিট্ঠো, অসাদিযন্তস্সাপি কতো অপরাধো অৰঞ্ঝো ভৰতি সফলো. তেন হি, মহারাজ, অকুসলস্সপি কম্মস্স বলৰতায অসাদিযন্তস্স কতো অধিকারো অৰঞ্ঝো ভৰতি সফলোতি. ইমিনাপি, মহারাজ, কারণেন তথাগতস্স পরিনিব্বুতস্স অসাদিযন্তস্সেৰ কতো অধিকারো অৰঞ্ঝো ভৰতি সফলোতি.
‘‘কতি নু খো তে, মহারাজ, মনুস্সা, যে এতরহি মহাপথৰিং পৰিট্ঠা, অত্থি তে তত্থ সৰণ’’ন্তি? ‘‘আম, ভন্তে, সুয্যতী’’তি. ‘‘ইঙ্ঘ ত্ৰং, মহারাজ, সাৰেহী’’তি? ‘‘চিঞ্চমাণৰিকা, ভন্তে, সুপ্পবুদ্ধো চ সক্কো, দেৰদত্তো চ থেরো, নন্দকো চ যক্খো, নন্দো চ মাণৰকোতি. সুতমেতং, ভন্তে, ইমে পঞ্চ জনা মহাপথৰিং পৰিট্ঠা’’তি. ‘‘কিস্মিং তে, মহারাজ, অপরদ্ধা’’তি? ‘‘ভগৰতি চ, ভন্তে, সাৰকেসু চা’’তি. ‘‘অপি নু খো, মহারাজ, ভগৰা ৰা সাৰকা ৰা সাদিযিংসু ইমেসং মহাপথৰিপৰিসন’’ন্তি? ‘‘ন হি ভন্তে’’তি. ‘‘তেন হি, মহারাজ, তথাগতস্স পরিনিব্বুতস্স অসাদিযন্তস্সেৰ কতো অধিকারো অৰঞ্ঝো ভৰতি সফলো’’তি. ‘‘সুৰিঞ্ঞাপিতো, ভন্তে নাগসেন, পঞ্হো গম্ভীরো উত্তানীকতো, গুয্হং ৰিদংসিতং, গণ্ঠি ভিন্নো, গহনং অগহনং কতং, নট্ঠা পরৰাদা, ভগ্গা কুদিট্ঠী, নিপ্পভা জাতা কুতিত্থিযা, ত্ৰং গণীৰরপৰরমাসজ্জা’’তি.
কতাধিকারসফলপঞ্হো পঠমো.
২. সব্বঞ্ঞুভাৰপঞ্হো
২. ‘‘ভন্তে নাগসেন, বুদ্ধো সব্বঞ্ঞূ’’তি? ‘‘আম, মহারাজ, ভগৰা সব্বঞ্ঞূ, ন চ ভগৰতো সততং সমিতং ঞাণদস্সনং পচ্চুপট্ঠিতং, আৰজ্জনপটিবদ্ধং ভগৰতো সব্বঞ্ঞুতঞাণং, আৰজ্জিত্ৰা যদিচ্ছকং জানাতী’’তি. ‘‘তেন হি, ভন্তে নাগসেন, বুদ্ধো অসব্বঞ্ঞূতি. যদি তস্স পরিযেসনায সব্বঞ্ঞুতঞাণং হোতী’’তি. ‘‘ৰাহসতং খো, মহারাজ, ৰীহীনং অড্ঢচূল়ঞ্চ ৰাহা ৰীহিসত্তম্বণানি দ্ৰে চ তুম্বা একচ্ছরাক্খণে পৰত্তচিত্তস্স এত্তকা ৰীহী লক্খং ঠপীযমানা [ঠপীযমানে (সী. পী.)] পরিক্খযং পরিযাদানং গচ্ছেয্যুং?
‘‘তত্রিমে সত্তৰিধা চিত্তা পৰত্তন্তি, যে তে, মহারাজ, সরাগা সদোসা সমোহা সকিলেসা অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা, তেসং তং চিত্তং গরুকং উপ্পজ্জতি দন্ধং পৰত্ততি. কিং কারণা? অভাৰিতত্তা চিত্তস্স. যথা, মহারাজ, ৰংসনাল়স্স ৰিততস্স ৰিসালস্স ৰিত্থিণ্ণস্স সংসিব্বিতৰিসিব্বিতস্স সাখাজটাজটিতস্স আকড্ঢিযন্তস্স গরুকং হোতি আগমনং দন্ধং. কিং কারণা? সংসিব্বিতৰিসিব্বিতত্তা সাখানং. এৰমেৰ খো, মহারাজ, যে তে সরাগা সদোসা সমোহা সকিলেসা অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা, তেসং তং চিত্তং গরুকং উপ্পজ্জতি দন্ধং পৰত্ততি. কিং কারণা? সংসিব্বিতৰিসিব্বিতত্তা কিলেসেহি, ইদং পঠমং চিত্তং.
‘‘তত্রিদং দুতিযং চিত্তং ৰিভত্তমাপজ্জতি – যে তে, মহারাজ, সোতাপন্না পিহিতাপাযা দিট্ঠিপ্পত্তা ৰিঞ্ঞাতসত্থুসাসনা, তেসং তং চিত্তং তীসু ঠানেসু লহুকং উপ্পজ্জতি লহুকং পৰত্ততি. উপরিভূমীসু গরুকং উপ্পজ্জতি দন্ধং পৰত্ততি. কিং কারণা? তীসু ঠানেসু চিত্তস্স পরিসুদ্ধত্তা উপরি কিলেসানং অপ্পহীনত্তা. যথা, মহারাজ, ৰংসনাল়স্স তিপব্বগণ্ঠিপরিসুদ্ধস্স উপরি সাখাজটাজটিতস্স আকড্ঢিযন্তস্স যাৰ তিপব্বং তাৰ লহুকং এতি, ততো উপরি থদ্ধং. কিং কারণা? হেট্ঠা পরিসুদ্ধত্তা উপরি সাখাজটাজটিতত্তা. এৰমেৰ খো, মহারাজ, যে তে সোতাপন্না পিহিতাপাযা দিট্ঠিপ্পত্তা ৰিঞ্ঞাতসত্থুসাসনা, তেসং তং চিত্তং তীসু ঠানেসু লহুকং উপ্পজ্জতি লহুকং পৰত্ততি, উপরিভূমীসু গরুকং উপ্পজ্জতি দন্ধং পৰত্ততি. কিং কারণা? তীসু ঠানেসু চিত্তস্স পরিসুদ্ধত্তা উপরি কিলেসানং অপ্পহীনত্তা, ইদং দুতিযং চিত্তং.
‘‘তত্রিদং ততিযং চিত্তং ৰিভত্তমাপজ্জতি – যে তে, মহারাজ, সকদাগামিনো, যেসং রাগদোসমোহা তনুভূতা, তেসং তং চিত্তং পঞ্চসু ঠানেসু লহুকং উপ্পজ্জতি লহুকং পৰত্ততি, উপরিভূমীসু গরুকং উপ্পজ্জতি দন্ধং পৰত্ততি. কিং কারণা? পঞ্চসু ঠানেসু চিত্তস্স পরিসুদ্ধত্তা উপরি কিলেসানং অপ্পহীনত্তা. যথা, মহারাজ, ৰংসনাল়স্স পঞ্চপব্বগণ্ঠিপরিসুদ্ধস্স উপরি সাখাজটাজটিতস্স আকড্ঢিযন্তস্স যাৰ পঞ্চপব্বং তাৰ লহুকং এতি, ততো উপরি থদ্ধং. কিং কারণা? হেট্ঠা পরিসুদ্ধত্তা উপরি সাখাজটাজটিতত্তা. এৰমেৰ খো, মহারাজ, যে তে সকদাগামিনো, যেসং রাগদোসমোহা তনুভূতা, তেসং তং চিত্তং পঞ্চসু ঠানেসু লহুকং উপ্পজ্জতি লহুকং পৰত্ততি, উপরিভূমীসু গরুকং উপ্পজ্জতি দন্ধং পৰত্ততি. কিং কারণা? পঞ্চসু ঠানেসু চিত্তস্স পরিসুদ্ধত্তা উপরি কিলেসানং অপ্পহীনত্তা, ইদং ততিযং চিত্তং.
‘‘তত্রিদং চতুত্থং চিত্তং ৰিভত্তমাপজ্জতি – যে তে, মহারাজ, অনাগামিনো, যেসং পঞ্চোরম্ভাগিযানি সঞ্ঞোজনানি পহীনানি, তেসং তং চিত্তং দসসু ঠানেসু লহুকং উপ্পজ্জতি লহুকং পৰত্ততি, উপরিভূমীসু গরুকং উপ্পজ্জতি দন্ধং পৰত্ততি. কিং কারণা? দসসু ঠানেসু চিত্তস্স পরিসুদ্ধত্তা উপরি কিলেসানং অপ্পহীনত্তা. যথা, মহারাজ, ৰংসনাল়স্স দসপব্বগণ্ঠিপরিসুদ্ধস্স উপরি সাখাজটাজটিতস্স আকড্ঢিযন্তস্স যাৰ দসপব্বং তাৰ লহুকং এতি, ততো উপরি থদ্ধং. কিং কারণা? হেট্ঠা পরিসুদ্ধত্তা উপরি সাখাজটাজটিতত্তা. এৰমেৰ খো, মহারাজ, যে তে অনাগামিনো, যেসং পঞ্চোরম্ভাগিযানি সঞ্ঞোজনানি পহীনানি, তেসং তং চিত্তং দসসু ঠানেসু লহুকং উপ্পজ্জতি লহুকং পৰত্ততি, উপরিভূমীসু গরুকং উপ্পজ্জতি দন্ধং পৰত্ততি. কিং কারণা? দসসু ঠানেসু চিত্তস্স পরিসুদ্ধত্তা উপরি কিলেসানং অপ্পহীনত্তা, ইদং চতুত্থং চিত্তং.
‘‘তত্রিদং পঞ্চমং চিত্তং ৰিভত্তমাপজ্জতি – যে তে, মহারাজ, অরহন্তো খীণাসৰা ধোতমলা ৰন্তকিলেসা ৰুসিতৰন্তো কতকরণীযা ওহিতভারা অনুপ্পত্তসদত্থা পরিক্খীণভৰসঞ্ঞোজনা পত্তপটিসম্ভিদা সাৰকভূমীসু পরিসুদ্ধা, তেসং তং চিত্তং সাৰকৰিসযে লহুকং উপ্পজ্জতি লহুকং পৰত্ততি, পচ্চেকবুদ্ধভূমীসু গরুকং উপ্পজ্জতি দন্ধং পৰত্ততি. কিং কারণা? পরিসুদ্ধত্তা সাৰকৰিসযে, অপরিসুদ্ধত্তা পচ্চেকবুদ্ধৰিসযে. যথা, মহারাজ, ৰংসনাল়স্স সব্বপব্বগণ্ঠিপরিসুদ্ধস্স আকড্ঢিযন্তস্স লহুকং হোতি আগমনং অদন্ধং. কিং কারণা? সব্বপব্বগণ্ঠিপরিসুদ্ধত্তা অগহনত্তা ৰংসস্স. এৰমেৰ খো, মহারাজ, যে তে অরহন্তো খীণাসৰা ধোতমলা ৰন্তকিলেসা ৰুসিতৰন্তো কতকরণীযা ওহিতভারা অনুপ্পত্তসদত্থা পরিক্খীণভৰসঞ্ঞোজনা পত্তপটিসম্ভিদা সাৰকভূমীসু পরিসুদ্ধা, তেসং তং চিত্তং সাৰকৰিসযে লহুকং উপ্পজ্জতি লহুকং পৰত্ততি, পচ্চেকবুদ্ধভূমীসু গরুকং উপ্পজ্জতি দন্ধং পৰত্ততি. কিং কারণা? পরিসুদ্ধত্তা সাৰকৰিসযে, অপরিসুদ্ধত্তা পচ্চেকবুদ্ধৰিসযে, ইদং পঞ্চমং চিত্তং.
‘‘তত্রিদং ছট্ঠং চিত্তং ৰিভত্তমাপজ্জতি – যে তে, মহারাজ, পচ্চেকবুদ্ধা সযম্ভুনো অনাচরিযকা একচারিনো খগ্গৰিসাণকপ্পা সকৰিসযে পরিসুদ্ধৰিমলচিত্তা, তেসং তং চিত্তং সকৰিসযে লহুকং উপ্পজ্জতি লহুকং পৰত্ততি, সব্বঞ্ঞুবুদ্ধভূমীসু গরুকং উপ্পজ্জতি দন্ধং পৰত্ততি. কিং কারণা? পরিসুদ্ধত্তা সকৰিসযে মহন্তত্তা সব্বঞ্ঞুবুদ্ধৰিসযস্স. যথা, মহারাজ, পুরিসো সকৰিসযং পরিত্তং নদিং রত্তিম্পি দিৰাপি যদিচ্ছক অচ্ছম্ভিতো ওতরেয্য, অথ পরতো মহাসমুদ্দং গম্ভীরং ৰিত্থতং অগাধমপারং দিস্ৰা ভাযেয্য, দন্ধাযেয্য ন ৰিসহেয্য ওতরিতুং. কিং কারণা? তিণ্ণত্তা [চিণ্ণত্তা (সী. স্যা. পী.)] সকৰিসযস্স, মহন্তত্তা চ মহাসমুদ্দস্স. এৰমেৰ খো, মহারাজ, যে তে পচ্চেকবুদ্ধা সযম্ভুনো অনাচরিযকা একচারিনো খগ্গৰিসাণকপ্পা সকৰিসযে পরিসুদ্ধৰিমলচিত্তা, তেসং তং চিত্তং সকৰিসযে লহুকং উপ্পজ্জতি লহুকং পৰত্ততি, সব্বঞ্ঞুবুদ্ধভূমীসু গরুকং উপ্পজ্জতি দন্ধং পৰত্ততি. কিং কারণা? পরিসুদ্ধত্তা সকৰিসযে মহন্তত্তা সব্বঞ্ঞুবুদ্ধৰিসযস্স, ইদং ছট্ঠং চিত্তং.
‘‘তত্রিদং সত্তমং চিত্তং ৰিভত্তমাপজ্জতি – যে তে, মহারাজ, সম্মাসম্বুদ্ধা সব্বঞ্ঞুনো দসবলধরা চতুৰেসারজ্জৰিসারদা অট্ঠারসহি বুদ্ধধম্মেহি সমন্নাগতা অনন্তজিনা অনাৰরণঞাণা, তেসং তং চিত্তং সব্বত্থ লহুকং উপ্পজ্জতি লহুকং পৰত্ততি. কিং কারণা? সব্বত্থ পরিসুদ্ধত্তা. অপি নু খো, মহারাজ, নারাচস্স সুধোতস্স ৰিমলস্স নিগ্গণ্ঠিস্স সুখুমধারস্স অজিম্হস্স অৰঙ্কস্স অকুটিলস্স দল়্হচাপসমারূল়্হস্স খোমসুখুমে ৰা কপ্পাসসুখুমে ৰা কম্বলসুখুমে ৰা বলৰনিপাতিতস্স দন্ধাযিতত্তং ৰা লগ্গনং ৰা হোতী’’তি? ‘‘ন হি, ভন্তে, ‘‘কিং কারণা’’? ‘‘সুখুমত্তা ৰত্থানং সুধোতত্তা নারাচস্স নিপাতস্স চ বলৰত্তা’’তি, এৰমেৰ খো, মহারাজ, যে তে সম্মাসম্বুদ্ধা সব্বঞ্ঞুনো দসবলধরা চতুৰেসারজ্জৰিসারদা অট্ঠারসহি বুদ্ধধম্মেহি সমন্নাগতা অনন্তজিনা অনাৰরণঞাণা, তেসং তং চিত্তং সব্বত্থ লহুকং উপ্পজ্জতি লহুকং পৰত্ততি. কিং কারণা? সব্বত্থ পরিসুদ্ধত্তা, ইদং সত্তমং চিত্তং.
‘‘তত্র, মহারাজ, যদিদং সব্বঞ্ঞুবুদ্ধানং চিত্তং, তং ছন্নম্পি চিত্তানং গণনং অতিক্কমিত্ৰা অসঙ্খ্যেয্যেন গুণেন পরিসুদ্ধঞ্চ লহুকঞ্চ. যস্মা চ ভগৰতো চিত্তং পরিসুদ্ধঞ্চ লহুকঞ্চ, তস্মা, মহারাজ, ভগৰা যমকপাটিহীরং দস্সেতি. যমকপাটিহীরে, মহারাজ, ঞাতব্বং বুদ্ধানং ভগৰন্তানং চিত্তং এৰং লহুপরিৰত্তন্তি, ন তত্থ সক্কা উত্তরিং কারণং ৰত্তুং, তেপি, মহারাজ, পাটিহীরা সব্বঞ্ঞুবুদ্ধানং চিত্তং উপাদায গণনম্পি সঙ্খম্পি কলম্পি কলভাগম্পি ন উপেন্তি, আৰজ্জনপটিবদ্ধং, মহারাজ, ভগৰতো সব্বঞ্ঞুতঞাণং, আৰজ্জেত্ৰা যদিচ্ছকং জানাতি.
‘‘যথা, মহারাজ, পুরিসো হত্থে ঠপিতং যং কিঞ্চি দুতিযে হত্থে ঠপেয্য ৰিৰটেন মুখেন ৰাচং নিচ্ছারেয্য, মুখগতং ভোজনং গিলেয্য, উম্মীলেত্ৰা ৰা নিমীলেয্য, নিমীলেত্ৰা ৰা উম্মীলেয্য, সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য, চিরতরং এতং, মহারাজ, লহুতরং ভগৰতো সব্বঞ্ঞুতঞাণং, লহুতরং আৰজ্জনং, আৰজ্জেত্ৰা যদিচ্ছকং জানাতি, আৰজ্জনৰিকলমত্তকেন ন তাৰতা বুদ্ধা ভগৰন্তো অসব্বঞ্ঞুনো নাম হোন্তী’’তি.
‘‘আৰজ্জনম্পি, ভন্তে নাগসেন, পরিযেসনায কাতব্বং, ইঙ্ঘ মং তত্থ কারণেন সঞ্ঞাপেহী’’তি. ‘‘যথা, মহারাজ, পুরিসস্স অড্ঢস্স মহদ্ধনস্স মহাভোগস্স পহূতজাতরূপরজতস্স পহূতৰিত্তূপকরণস্স পহূতধনধঞ্ঞস্স সালিৰীহিযৰতণ্ডুলতিলমুগ্গমাসপুব্বণ্ণাপরণ্ণসপ্পিতেলনৰনীতখীরদধিমধুগুল়ফাণিতা চ খল়োপিকুম্ভিপীঠরকোট্ঠভাজনগতা ভৰেয্যুং, তস্স চ পুরিসস্স পাহুনকো আগচ্ছেয্য ভত্তারহো ভত্তাভিকঙ্খী, তস্স চ গেহে যং রন্ধং ভোজনং, তং পরিনিট্ঠিতং ভৰেয্য, কুম্ভিতো তণ্ডুলে নীহরিত্ৰা ভোজনং রন্ধেয্য, অপি চ খো সো, মহারাজ, তাৰতকেন ভোজনৰেকল্লমত্তকেন অধনো নাম কপণো নাম ভৰেয্যা’’তি? ‘‘ন হি, ভন্তে, চক্কৰত্তিরঞ্ঞো ঘরেপি, ভন্তে, অকালে ভোজনৰেকল্লং হোতি, কিং পন গহপতিকস্সা’’তি? ‘‘এৰমেৰ খো, মহারাজ, তথাগতস্স আৰজ্জনৰিকলমত্তকং সব্বঞ্ঞুতঞাণং আৰজ্জেত্ৰা যদিচ্ছকং জানাতি.
‘‘যথা ৰা পন, মহারাজ, রুক্খো অস্স ফলিতো ওণতৰিনতো পিণ্ডিভারভরিতো, ন কিঞ্চি তত্থ পতিতং ফলং ভৰেয্য, অপি নু খো সো, মহারাজ, রুক্খো তাৰতকেন পতিতফলৰেকল্লমত্তকেন অফলো নাম ভৰেয্যা’’তি? ‘‘ন হি, ভন্তে, পতনপটিবদ্ধানি তানি রুক্খফলানি, পতিতে যদিচ্ছকং লভতী’’তি. ‘‘এৰমেৰ খো, মহারাজ, তথাগতস্স আৰজ্জনপটিবদ্ধং সব্বঞ্ঞুতঞাণং আৰজ্জেত্ৰা যদিচ্ছকং জানাতী’’তি.
‘‘ভন্তে নাগসেন, আৰজ্জেত্ৰা আৰজ্জেত্ৰা বুদ্ধো যদিচ্ছকং জানাতী’’তি? ‘‘আম, মহারাজ, ভগৰা আৰজ্জেত্ৰা আৰজ্জেত্ৰা যদিচ্ছকং জানাতী’’তি.
‘‘যথা, মহারাজ, চক্কৰত্তী রাজা যদা চক্করতনং সরতি ‘উপেতু মে চক্করতন’ন্তি, সরিতে চক্করতনং উপেতি, এৰমেৰ খো, মহারাজ, তথাগতো আৰজ্জেত্ৰা আৰজ্জেত্ৰা যদিচ্ছকং জানাতী’’তি. ‘‘দল়্হং, ভন্তে নাগসেন, কারণং, বুদ্ধো সব্বঞ্ঞূ, সম্পটিচ্ছাম বুদ্ধো সব্বঞ্ঞূ’’তি.
বুদ্ধসব্বঞ্ঞুভাৰপঞ্হো দুতিযো.
৩. দেৰদত্তপব্বজ্জপঞ্হো
৩. ‘‘ভন্তে নাগসেন, দেৰদত্তো কেন পব্বাজিতো’’তি? ‘‘ছ যিমে, মহারাজ, খত্তিযকুমারা ভদ্দিযো চ অনুরুদ্ধো চ আনন্দো চ ভগু চ কিমিলো [কিম্বিলো (সী. পী.) ম. নি. ২.১৬৬ পস্সিতব্বং] চ দেৰদত্তো চ উপালিকপ্পকো সত্তমো অভিসম্বুদ্ধে সত্থরি সক্যকুলানন্দজননে ভগৰন্তং অনুপব্বজন্তা নিক্খমিংসু, তে ভগৰা পব্বাজেসী’’তি. ‘‘ননু, ভন্তে, দেৰদত্তেন পব্বজিত্ৰা সঙ্ঘো ভিন্নো’’তি? ‘‘আম, মহারাজ, দেৰদত্তেন পব্বজিত্ৰা সঙ্ঘো ভিন্নো, ন গিহী সঙ্ঘং ভিন্দতি, ন ভিক্খুনী, ন সিক্খমানা, ন সামণেরো, ন সামণেরী সঙ্ঘং ভিন্দতি, ভিক্খু পকতত্তো সমানসংৰাসকো সমানসীমাযং ঠিতো সঙ্ঘং ভিন্দতীতি. সঙ্ঘভেদকো, ভন্তে, পুগ্গলো কিং কম্মং ফুসতী’’তি? ‘‘কপ্পট্ঠিতিকং, মহারাজ, কম্মং ফুসতী’’তি.
‘‘কিং পন, ভন্তে নাগসেন, বুদ্ধো জানাতি ‘দেৰদত্তো পব্বজিত্ৰা সঙ্ঘং ভিন্দিস্সতি, সঙ্ঘং ভিন্দিত্ৰা কপ্পং নিরযে পচ্চিস্সতী’’’তি? ‘‘আম, মহারাজ, তথাগতো জানাতি ‘দেৰদত্তো পব্বজিত্ৰা সঙ্ঘং ভিন্দিস্সতি, সঙ্ঘং ভিন্দিত্ৰা কপ্পং নিরযে পচ্চিস্সতী’’’তি. ‘‘যদি, ভন্তে নাগসেন, বুদ্ধো জানাতি ‘দেৰদত্তো পব্বজিত্ৰা সঙ্ঘং ভিন্দিস্সতি, সঙ্ঘং ভিন্দিত্ৰা কপ্পং নিরযে পচ্চিস্সতী’তি, তেন হি, ভন্তে নাগসেন, বুদ্ধো কারুণিকো অনুকম্পকো হিতেসী সব্বসত্তানং অহিতং অপনেত্ৰা হিতমুপদহতীতি যং ৰচনং, তং মিচ্ছা. যদি তং অজানিত্ৰা পব্বাজেসি, তেন হি বুদ্ধো অসব্বঞ্ঞূতি, অযম্পি উভতো কোটিকো পঞ্হো তৰানুপ্পত্তো, ৰিজটেহি এতং মহাজটং, ভিন্দ পরাপৰাদং, অনাগতে অদ্ধানে তযা সদিসা বুদ্ধিমন্তো ভিক্খূ দুল্লভা ভৰিস্সন্তি, এত্থ তৰ বলং পকাসেহী’’তি.
‘‘কারুণিকো, মহারাজ, ভগৰা সব্বঞ্ঞূ চ, কারুঞ্ঞেন, মহারাজ, ভগৰা সব্বঞ্ঞুতঞাণেন দেৰদত্তস্স গতিং ওলোকেন্তো অদ্দস দেৰদত্তং আপাযিকং কম্মং [অপরাপরিযকম্মং (সী. স্যা. পী.)] আযূহিত্ৰা অনেকানি কপ্পকোটিসতসহস্সানি নিরযেন নিরযং ৰিনিপাতেন ৰিনিপাতং গচ্ছন্তং, তং ভগৰা সব্বঞ্ঞুতঞাণেন জানিত্ৰা ইমস্স অপরিযন্তকতং কম্মং মম সাসনে পব্বজিতস্স পরিযন্তকতং ভৰিস্সতি, পুরিমং উপাদায পরিযন্তকতং দুক্খং ভৰিস্সতি, অপব্বজিতোপি অযং মোঘপুরিসো কপ্পট্ঠিযমেৰ কম্মং আযূহিস্সতীতি কারুঞ্ঞেন দেৰদত্তং পব্বাজেসী’’তি.
‘‘তেন হি, ভন্তে নাগসেন, বুদ্ধো ৰধিত্ৰা তেলেন মক্খেতি, পপাতে পাতেত্ৰা হত্থং দেতি, মারেত্ৰা জীৰিতং পরিযেসতি, যং সো পঠমং দুক্খং দত্ৰা পচ্ছা সুখং উপদহতী’’তি? ‘‘ৰধেতিপি, মহারাজ, তথাগতো সত্তানং হিতৰসেন, পাতেতিপি সত্তানং হিতৰসেন, মারেতিপি সত্তানং হিতৰসেন, ৰধিত্ৰাপি, মহারাজ, তথাগতো সত্তানং হিতমেৰ উপদহতি, পাতেত্ৰাপি সত্তানং হিতমেৰ উপদহতি, মারেত্ৰাপি সত্তানং হিতমেৰ উপদহতি. যথা, মহারাজ, মাতাপিতরো নাম ৰধিত্ৰাপি পাতযিত্ৰাপি পুত্তানং হিতমেৰ উপদহন্তি, এৰমেৰ খো, মহারাজ, তথাগতো ৰধেতিপি সত্তানং হিতৰসেন, পাতেতিপি সত্তানং হিতৰসেন, মারেতিপি সত্তানং হিতৰসেন, ৰধিত্ৰাপি, মহারাজ, তথাগতো সত্তানং হিতমেৰ উপদহতি, পাতেত্ৰাপি সত্তানং হিতমেৰ উপদহতি, মারেত্ৰাপি সত্তানং হিতমেৰ উপদহতি, যেন যেন যোগেন সত্তানং গুণৰুড্ঢি হোতি, তেন তেন যোগেন সব্বসত্তানং হিতমেৰ উপদহতি. সচে, মহারাজ, দেৰদত্তো ন পব্বাজেয্য, গিহিভূতো সমানো নিরযসংৰত্তনিকং বহুং পাপকম্মং কত্ৰা অনেকানি কপ্পকোটিসতসহস্সানি নিরযেন নিরযং ৰিনিপাতেন ৰিনিপাতং গচ্ছন্তো বহুং দুক্খং ৰেদযিস্সতি, তং ভগৰা জানমানো কারুঞ্ঞেন দেৰদত্তং পব্বাজেসি, ‘মম সাসনে পব্বজিতস্স দুক্খং পরিযন্তকতং ভৰিস্সতী’তি কারুঞ্ঞেন গরুকং দুক্খং লহুকং অকাসি.
‘‘যথা ৰা, মহারাজ, ধনযসসিরিঞাতিবলেন বলৰা পুরিসো অত্তনো ঞাতিং ৰা মিত্তং ৰা রঞ্ঞা গরুকং দণ্ডং ধারেন্তং অত্তনো বহুৰিস্সত্থভাৰেন সমত্থতায গরুকং দণ্ডং লহুকং অকাসি, এৰমেৰ খো, মহারাজ, ভগৰা বহূনি কপ্পকোটিসতসহস্সানি দুক্খং ৰেদযমানং দেৰদত্তং পব্বাজেত্ৰা সীলসমাধিপঞ্ঞাৰিমুত্তিবলসমত্থভাৰেন গরুকং দুক্খং লহুকং অকাসি.
‘‘যথা ৰা পন, মহারাজ, কুসলো ভিসক্কো সল্লকত্তো গরুকং রোগং বলৰোসধবলেন লহুকং করোতি, এৰমেৰ খো, মহারাজ, বহূনি কপ্পকোটিসতসহস্সানি দুক্খং ৰেদযমানং দেৰদত্তং ভগৰা রোগঞ্ঞুতায পব্বাজেত্ৰা কারুঞ্ঞবলো পত্থদ্ধধম্মোসধবলেন গরুকং দুক্খং লহুকং অকাসি. অপি নু খো সো, মহারাজ, ভগৰা বহুৰেদনীযং দেৰদত্তং অপ্পৰেদনীযং করোন্তো কিঞ্চি অপুঞ্ঞং আপজ্জেয্যা’’তি? ‘‘ন কিঞ্চি, ভন্তে, অপুঞ্ঞং আপজ্জেয্য অন্তমসো গদ্দূহনমত্তম্পী’’তি. ‘‘ইমম্পি খো, মহারাজ, কারণং অত্থতো সম্পটিচ্ছ, যেন কারণেন ভগৰা দেৰদত্তং পব্বাজেসি.
‘‘অপরম্পি, মহারাজ, উত্তরিং কারণং সুণোহি, যেন কারণেন ভগৰা দেৰদত্তং পব্বাজেসি. যথা, মহারাজ, চোরং আগুচারিং গহেত্ৰা রঞ্ঞো দস্সেয্যুং, ‘অযং খো, দেৰ, চোরো আগুচারী, ইমস্স যং ইচ্ছসি, তং দণ্ডং পণেহী’তি. তমেনং রাজা এৰং ৰদেয্য ‘তেন হি, ভণে, ইমং চোরং বহিনগরং নীহরিত্ৰা আঘাতনে সীসং ছিন্দথা’’তি, ‘এৰং দেৰা’তি খো তে রঞ্ঞো পটিস্সুত্ৰা তং বহিনগরং নীহরিত্ৰা আঘাতনং নযেয্যুং. তমেনং পস্সেয্য কোচিদেৰ পুরিসো রঞ্ঞো সন্তিকা লদ্ধৰরো লদ্ধযসধনভোগো আদেয্যৰচনো বলৰিচ্ছিতকারী, সো তস্স কারুঞ্ঞং কত্ৰা তে পুরিসে এৰং ৰদেয্য ‘অলং, ভো, কিং তুম্হাকং ইমস্স সীসচ্ছেদনেন, তেন হি ভো ইমস্স হত্থং ৰা পাদং ৰা ছিন্দিত্ৰা জীৰিতং রক্খথ, অহমেতস্স কারণা রঞ্ঞো সন্তিকে পটিৰচনং করিস্সামী’তি. তে তস্স বলৰতো ৰচনেন তস্স চোরস্স হত্থং ৰা পাদং ৰা ছিন্দিত্ৰা জীৰিতং রক্খেয্যুং. অপি নু খো সো, মহারাজ, পুরিসো এৰং কারী তস্স চোরস্স কিচ্চকারী অস্সা’’তি? ‘‘জীৰিতদাযকো সো, ভন্তে, পুরিসো তস্স চোরস্স, জীৰিতে দিন্নে কিং তস্স অকতং নাম অত্থী’’তি? ‘‘যা পন হত্থপাদচ্ছেদনে ৰেদনা, সো তায ৰেদনায কিঞ্চি অপুঞ্ঞং আপজ্জেয্যা’’তি? ‘‘অত্তনো কতেন সো, ভন্তে, চোরো দুক্খৰেদনং ৰেদযতি, জীৰিতদাযকো পন পুরিসো ন কিঞ্চি অপুঞ্ঞং আপজ্জেয্যা’’তি. ‘‘এৰমেৰ খো, মহারাজ, ভগৰা কারুঞ্ঞেন দেৰদত্তং পব্বাজেসি ‘মম সাসনে পব্বজিতস্স দুক্খং পরিযন্তকতং ভৰিস্সতী’তি. পরিযন্তকতঞ্চ, মহারাজ, দেৰদত্তস্স দুক্খং, দেৰদত্তো, মহারাজ, মরণকালে –
‘‘‘ইমেহি অট্ঠীহি তমগ্গপুগ্গলং, দেৰাতিদেৰং নরদম্মসারথিং;
সমন্তচক্খুং সতপুঞ্ঞলক্খণং, পাণেহি বুদ্ধং সরণং উপেমী’তি.
‘‘পাণুপেতং সরণমগমাসি. দেৰদত্তো, মহারাজ, ছ কোট্ঠাসে কতে কপ্পে অতিক্কন্তে পঠমকোট্ঠাসে সঙ্ঘং ভিন্দি, পঞ্চ কোট্ঠাসে নিরযে পচ্চিত্ৰা ততো মুচ্চিত্ৰা অট্ঠিস্সরো নাম পচ্চেকবুদ্ধো ভৰিস্সতি. অপি নু খো সো, মহারাজ, ভগৰা এৰং কারী দেৰদত্তস্স কিচ্চকারী অস্সা’’তি? ‘‘সব্বদদো, ভন্তে নাগসেন, তথাগতো দেৰদত্তস্স, যং তথাগতো দেৰদত্তং পচ্চেকবোধিং পাপেস্সতি, কিং তথাগতেন দেৰদত্তস্স অকতং নাম অত্থী’’তি? ‘‘যং পন, মহারাজ, দেৰদত্তো সঙ্ঘং ভিন্দিত্ৰা নিরযে দুক্খৰেদনং ৰেদযতি, অপি নু খো ভগৰা ততোনিদানং কিঞ্চি অপুঞ্ঞং আপজ্জেয্যা’’তি? ‘‘ন হি, ভন্তে, অত্তনা কতেন, ভন্তে, দেৰদত্তো কপ্পং নিরযে পচ্চতি, দুক্খপরিযন্তকারকো সত্থা ন কিঞ্চি অপুঞ্ঞং আপজ্জতী’’তি. ‘‘ইমম্পি খো, ত্ৰং মহারাজ, কারণং অত্থতো সম্পটিচ্ছ, যেন কারণেন ভগৰা দেৰদত্তং পব্বাজেসি.
‘‘অপরম্পি, মহারাজ, উত্তরিং কারণং সুণোহি, যেন কারণেন ভগৰা দেৰদত্তং পব্বাজেসি. যথা, মহারাজ, কুসলো ভিসক্কো সল্লকত্তো ৰাতপিত্তসেম্হসন্নিপাতউতুপরিণামৰিসমপরিহারওপক্কমিকোপক্কন্তং পূতিকুণপদুগ্গন্ধাভিসঞ্ছন্নং অন্তোসল্লং সুসিরগতং পুব্বরুহিরসম্পুণ্ণং ৰণং ৰূপসমেন্তো ৰণমুখং কক্খল়তিখিণখারকটুকেন ভেসজ্জেন অনুলিম্পতি পরিপচ্চনায, পরিপচ্চিত্ৰা মুদুভাৰমুপগতং সত্থেন ৰিকন্তযিত্ৰা ডহতি সলাকায, দড্ঢে খারলৰণং দেতি, ভেসজ্জেন অনুলিম্পতি ৰণরুহনায ব্যাধিতস্স সোত্থিভাৰমনুপ্পত্তিযা, অপি নু খো সো, মহারাজ, ভিসক্কো সল্লকত্তো অহিতচিত্তো ভেসজ্জেন অনুলিম্পতি, সত্থেন ৰিকন্তেতি, ডহতি সলাকায, খারলৰণং দেতী’’তি? ‘‘ন হি, ভন্তে, হিতচিত্তো সোত্থিকামো তানি কিরিযানি করোতী’’তি. ‘‘যা পনস্স ভেসজ্জকিরিযাকরণেন উপ্পন্না দুক্খৰেদনা, ততোনিদানং সো ভিসক্কো সল্লকত্তো কিঞ্চি অপুঞ্ঞং আপজ্জেয্যা’’তি? ‘‘হিতচিত্তো, ভন্তে, সোত্থিকামো ভিসক্কো সল্লকত্তো তানি কিরিযানি করোতি, কিং সো ততোনিদানং অপুঞ্ঞং আপজ্জেয্য, সগ্গগামী সো, ভন্তে, ভিসক্কো সল্লকত্তো’’তি. ‘‘এৰমেৰ খো, মহারাজ, কারুঞ্ঞেন ভগৰা দেৰদত্তং পব্বাজেসি দুক্খপরিমুত্তিযা.
‘‘অপরম্পি, মহারাজ, উত্তরিং কারণং সুণোহি, যেন কারণেন ভগৰা দেৰদত্তং পব্বাজেসি. যথা, মহারাজ, পুরিসো কণ্টকেন ৰিদ্ধো অস্স, অথঞ্ঞতরো পুরিসো তস্স হিতকামো সোত্থিকামো তিণ্হেন কণ্টকেনৰা সত্থমুখেন ৰা সমন্ততো ছিন্দিত্ৰা পগ্ঘরন্তেন লোহিতেন তং কণ্টকং নীহরেয্য, অপি নু খো সো, মহারাজ, পুরিসো অহিতকামো তং কণ্টকং নীহরতী’’তি? ‘‘ন হি, ভন্তে, হিতকামো সো, ভন্তে, পুরিসো সোত্থিকামো তং কণ্টকং নীহরতি. সচে সো, ভন্তে, তং কণ্টকং ন নীহরেয্য, মরণং ৰা সো তেন পাপুণেয্য মরণমত্তং ৰা দুক্খ’’ন্তি. ‘‘এৰমেৰ খো, মহারাজ, তথাগতো কারুঞ্ঞেন দেৰদত্তং পব্বাজেসি দুক্খপরিমুত্তিযা. সচে মহারাজ, ভগৰা দেৰদত্তং ন পব্বাজেয্য, কপ্পকোটিসতসহস্সম্পি দেৰদত্তো ভৰপরম্পরায নিরযে পচ্চেয্যা’’তি.
‘‘অনুসোতগামিং, ভন্তে নাগসেন, দেৰদত্তং তথাগতো পটিসোতং পাপেসি, ৰিপন্থপটিপন্নং দেৰদত্তং পন্থে পটিপাদেসি, পপাতে পতিতস্স দেৰদত্তস্স পতিট্ঠং অদাসি, ৰিসমগতং দেৰদত্তং তথাগতো সমং আরোপেসি, ইমে চ, ভন্তে নাগসেন, হেতূ ইমানি চ কারণানি ন সক্কা অঞ্ঞেন সন্দস্সেতুং অঞ্ঞত্র তৰাদিসেন বুদ্ধিমতা’’তি.
দেৰদত্তপব্বজ্জপঞ্হো ততিযো.
৪. পথৰিচলনপঞ্হো
৪. ‘‘ভন্তে নাগসেন, ভাসিতম্পেতং ভগৰতা – ‘অট্ঠিমে, ভিক্খৰে [অট্ঠিমে আনন্দ (অ. নি. ৮.৭০)], হেতূ অট্ঠ পচ্চযা মহতো ভূমিচালস্স পাতুভাৰাযা’তি. অসেসৰচনং ইদং, নিস্সেসৰচনং ইদং, নিপ্পরিযাযৰচনং ইদং, নত্থঞ্ঞো নৰমো হেতু মহতো ভূমিচালস্স পাতুভাৰায. যদি, ভন্তে নাগসেন, অঞ্ঞো নৰমো হেতু ভৰেয্য মহতো ভূমিচালস্স পাতুভাৰায, তম্পি হেতুং ভগৰা কথেয্য. যস্মা চ খো, ভন্তে নাগসেন, নত্থঞ্ঞো নৰমো হেতু মহতো ভূমিচালস্স পাতুভাৰায, তস্মা অনাচিক্খিতো ভগৰতা, অযঞ্চ নৰমো হেতু দিস্সতি মহতো ভূমিচালস্স পাতুভাৰায, যং ৰেস্সন্তরেন রঞ্ঞা মহাদানে দীযমানে সত্তক্খত্তুং মহাপথৰী কম্পিতাতি. যদি, ভন্তে নাগসেন, অট্ঠেৰ হেতূ অট্ঠ পচ্চযা মহতো ভূমিচালস্স পাতুভাৰায, তেন হি ৰেস্সন্তরেন রঞ্ঞা মহাদানে দীযমানে সত্তক্খত্তুং মহাপথৰী কম্পিতাতি যং ৰচনং, তং মিচ্ছা. যদি ৰেস্সন্তরেন রঞ্ঞা মহাদানে দীযমানে সত্তক্খত্তুং মহাপথৰী কম্পিতা, তেন হি অট্ঠেৰ হেতূ অট্ঠ পচ্চযা মহতো ভূমিচালস্স পাতুভাৰাযাতি তম্পি ৰচনং মিচ্ছা. অযম্পি উভতো কোটিকো পঞ্হো সুখুমো দুন্নিৰেঠিযো অন্ধকরণো চেৰ গম্ভীরো চ, সো তৰানুপ্পত্তো, নেসো অঞ্ঞেন ইত্তরপঞ্ঞেন সক্কা ৰিসজ্জেতুং অঞ্ঞত্র তৰাদিসেন বুদ্ধিমতা’’তি.
‘‘ভাসিতম্পেতং, মহারাজ, ভগৰতা – ‘অট্ঠিমে, ভিক্খৰে, হেতূ অট্ঠ পচ্চযা মহতো ভূমিচালস্স পাতুভাৰাযা’তি. যং ৰেস্সন্তরেন রঞ্ঞা মহাদানে দীযমানে সত্তক্খত্তুং মহাপথৰী কম্পিতা, তঞ্চ পন অকালিকং কদাচুপ্পত্তিকং অট্ঠহি হেতূহি ৰিপ্পমুত্তং, তস্মা অগণিতং অট্ঠহি হেতূহি.
‘‘যথা, মহারাজ, লোকে তযো যেৰ মেঘা গণীযন্তি ৰস্সিকো হেমন্তিকো পাৰুসকোতি. যদি তে মুঞ্চিত্ৰা অঞ্ঞো মেঘো পৰস্সতি, ন সো মেঘো গণীযতি সম্মতেহি মেঘেহি, অকালমেঘোত্ৰেৰ সঙ্খং গচ্ছতি. এৰমেৰ খো, মহারাজ, ৰেস্সন্তরেন রঞ্ঞা মহাদানে দীযমানে যং সত্তক্খত্তুং মহাপথৰী কম্পিতা, অকালিকং এতং কদাচুপ্পত্তিকং অট্ঠহি হেতূহি ৰিপ্পমুত্তং, ন তং গণীযতি অট্ঠহি হেতূহি.
‘‘যথা ৰা পন, মহারাজ, হিমৰন্তা পব্বতা পঞ্চ নদিসতানি সন্দন্তি, তেসং, মহারাজ, পঞ্চন্নং নদিসতানং দসেৰ নদিযো নদিগণনায গণীযন্তি. সেয্যথীদং, গঙ্গা যমুনা অচিরৰতী সরভূ মহী সিন্ধু সরস্সতী ৰেত্রৰতী ৰীতংসা চন্দভাগাতি, অৰসেসা নদিযো নদিগণনায অগণিতা. কিং কারণা? ন তা নদিযো ধুৰসলিলা. এৰমেৰ খো, মহারাজ, ৰেস্সন্তরেন রঞ্ঞা মহাদানে দীযমানে যং সত্তক্খত্তুং মহাপথৰী কম্পিতা, অকালিকং এতং কদাচুপ্পত্তিকং অট্ঠহি হেতূহি ৰিপ্পমুত্তং, ন তং গণীযতি অট্ঠহি হেতূহি.
‘‘যথা ৰা পন, মহারাজ, রঞ্ঞো সতম্পি দ্ৰিসতম্পি তিসতম্পি অমচ্চা হোন্তি, তেসং ছ যেৰ জনা অমচ্চগণনায গণীযন্তি. সেয্যথীদং, সেনাপতি পুরোহিতো অক্খদস্সো ভণ্ডাগারিকো ছত্তগ্গাহকো খগ্গগ্গাহকো. এতে যেৰ অমচ্চগণনায গণীযন্তি. কিং কারণা? যুত্তত্তা রাজগুণেহি, অৰসেসা অগণিতা, সব্বে অমচ্চাত্ৰেৰ সঙ্খং গচ্ছন্তি. এৰমেৰ খো, মহারাজ, ৰেস্সন্তরেন রঞ্ঞা মহাদানে দীযমানে যং সত্তক্খত্তুং মহাপথৰী কম্পিতা, অকালিকং এতং কদাচুপ্পত্তিকং অট্ঠহি হেতূহি ৰিপ্পমুত্তং, ন তং গণীযতি অট্ঠহি হেতূহি.
‘‘সুয্যতি নু খো, মহারাজ, এতরহি জিনসাসনে কতাধিকারানং দিট্ঠধম্মসুখৰেদনীযকম্মং, কিত্তি চ যেসং অব্ভুগ্গতা দেৰমনুস্সেসূ’’তি? ‘‘আম, ভন্তে, সুয্যতি এতরহি জিনসাসনে কতাধিকারানং দিট্ঠধম্মসুখৰেদনীযকম্মং, কিত্তি চ যেসং অব্ভুগ্গতা দেৰমনুস্সেসু সত্ত জনাতি’’. ‘‘কে চ তে, মহারাজা’’তি? ‘‘সুমনো চ, ভন্তে, মালাকারো, একসাটকো চ ব্রাহ্মণো, পুণ্ণো চ ভতকো, মল্লিকা চ দেৰী, গোপালমাতা চ দেৰী, সুপ্পিযা চ উপাসিকা, পুণ্ণা চ দাসীতি ইমে সত্ত দিট্ঠধম্মসুখৰেদনীযা সত্তা, কিত্তি চ ইমেসং অব্ভুগ্গতা দেৰমনুস্সেসূ’’তি.
‘‘অপরেপি সুয্যন্তি নু খো অতীতে মানুসকেনেৰ সরীরদেহেন তিদসভৰনং গতা’’তি? ‘‘আম, ভন্তে, সুয্যন্তী’’তি. ‘‘কে চ তে, মহারাজা’’তি? ‘‘গুত্তিলো চ গন্ধব্বো, সাধীনো চ রাজা, নিমি চ রাজা, মন্ধাতা চ রাজাতি ইমে চতুরো জনা সুয্যন্তি, তেনেৰ মানুসকেন সরীরদেহেন তিদসভৰনং গতা’’তি. ‘‘সুচিরম্পি কতং সুয্যতি সুকতদুক্কটন্তি? সুতপুব্বং পন তযা, মহারাজ, অতীতে ৰা অদ্ধানে ৰত্তমানে ৰা অদ্ধানে ইত্থন্নামস্স দানে দীযমানে সকিং ৰা দ্ৰিক্খত্তুং ৰা তিক্খত্তুং ৰা মহাপথৰী কম্পিতা’’তি? ‘‘ন হি ভন্তে’’তি. ‘‘অত্থি মে, মহারাজ, আগমো অধিগমো পরিযত্তি সৰনং সিক্খাবলং সুস্সূসা পরিপুচ্ছা আচরিযুপাসনং, মযাপি ন সুতপুব্বং ‘ইত্থন্নামস্স দানে দীযমানে সকিং ৰা দ্ৰিক্খত্তুং ৰা তিক্খত্তুং ৰা মহাপথৰী কম্পিতা’তি ঠপেত্ৰা ৰেস্সন্তরস্স রাজৰসভস্স দানৰরং. ভগৰতো চ, মহারাজ, কস্সপস্স, ভগৰতো চ সক্যমুনিনোতি দ্ৰিন্নং বুদ্ধানং অন্তরে গণনপথং ৰীতিৰত্তা ৰস্সকোটিযো অতিক্কন্তা, তত্থপি মে সৰনং নত্থি ‘ইত্থন্নামস্স দানে দীযমানে সকিং ৰা দ্ৰিক্খত্তুং ৰা তিক্খত্তুং ৰা মহাপথৰী কম্পিতা’তি. ন, মহারাজ, তাৰতকেন ৰীরিযেন তাৰতকেন পরক্কমেন মহাপথৰী কম্পতি, গুণভারভরিতা, মহারাজ, সব্বসোচেয্যকিরিযগুণভারভরিতা ধারেতুং ন ৰিসহন্তী মহাপথৰী চলতি কম্পতি পৰেধতি.
‘‘যথা, মহারাজ, সকটস্স অতিভারভরিতস্স নাভিযো চ নেমিযো চ ফলন্তি অক্খো ভিজ্জতি, এৰমেৰ খো, মহারাজ, সব্বসোচেয্যকিরিযগুণভারভরিতা মহাপথৰী ধারেতুং ন ৰিসহন্তী চলতি কম্পতি পৰেধতি.
‘‘যথা ৰা পন, মহারাজ, গগনং অনিলজলৰেগসঞ্ছাদিতং উস্সন্নজলভারভরিতং অতিৰাতেন ফুটিতত্তা নদতি রৰতি গল়গল়াযতি, এৰমেৰ খো, মহারাজ, মহাপথৰী রঞ্ঞো ৰেস্সন্তরস্স দানবলৰিপুলউস্সন্নভারভরিতা ধারেতুং ন ৰিসহন্তী চলতি কম্পতি পৰেধতি. ন হি, মহারাজ, রঞ্ঞো ৰেস্সন্তরস্স চিত্তং রাগৰসেন পৰত্ততি, ন দোসৰসেন পৰত্ততি, ন মোহৰসেন পৰত্ততি, ন মানৰসেন পৰত্ততি, ন দিট্ঠিৰসেন পৰত্ততি, ন কিলেসৰসেন পৰত্ততি, ন ৰিতক্কৰসেন পৰত্ততি, ন অরতিৰসেন পৰত্ততি, অথ খো দানৰসেন বহুলং পৰত্ততি ‘কিন্তি অনাগতা যাচকা মম সন্তিকে আগচ্ছেয্যুং, আগতা চ যাচকা যথাকামং লভিত্ৰা অত্তমনা ভৰেয্যু’ন্তি সততং সমিতং দানং পতি মানসং ঠপিতং হোতি. রঞ্ঞো, মহারাজ, ৰেস্সন্তরস্স সততং সমিতং দসসু ঠানেসু মানসং ঠপিতং হোতি দমে সমে খন্তিযং সংৰরে যমে নিযমে অক্কোধে অৰিহিংসাযং সচ্চে সোচেয্যে. রঞ্ঞো, মহারাজ, ৰেস্সন্তরস্স কামেসনা পহীনা, ভৰেসনা পটিপ্পস্সদ্ধা, ব্রহ্মচরিযেসনায যেৰ উস্সুক্কং আপন্নো, রঞ্ঞো, মহারাজ, ৰেস্সন্তরস্স অত্তরক্খা [পররক্খায (সী. পী.)] পহীনা, সব্বসত্তরক্খায উস্সুক্কং আপন্নো ‘কিন্তি ইমে সত্তা সমগ্গা অস্সু অরোগা সধনা দীঘাযুকা’তি বহুলং যেৰ মানসং পৰত্ততি. দদমানো চ, মহারাজ, ৰেস্সন্তরো রাজা তং দানং ন ভৰসম্পত্তিহেতু দেতি, ন ধনহেতু দেতি, ন পটিদানহেতু দেতি, ন উপলাপনহেতু দেতি, ন আযুহেতু দেতি, ন ৰণ্ণহেতু দেতি, ন সুখহেতু দেতি, ন বলহেতু দেতি, ন যসহেতু দেতি, ন পুত্তহেতু দেতি, ন ধীতুহেতু দেতি, অথ খো সব্বঞ্ঞুতঞাণহেতু সব্বঞ্ঞুতঞাণরতনস্স কারণা এৰরূপে অতুলৰিপুলানুত্তরে দানৰরে অদাসি, সব্বঞ্ঞুতং পত্তো চ ইমং গাথং অভাসি –
‘‘‘জালিং কণ্হাজিনং ধীতং, মদ্দিদেৰিং পতিব্বতং;
চজমানো ন চিন্তেসিং, বোধিযা যেৰ কারণা’তি.
‘‘ৰেস্সন্তরো, মহারাজ, রাজা অক্কোধেন কোধং জিনাতি, অসাধুং সাধুনা জিনাতি, কদরিযং দানেন জিনাতি, অলিকৰাদিনং সচ্চেন জিনাতি, সব্বং অকুসলং কুসলেন জিনাতি. তস্স এৰং দদমানস্স ধম্মানুগতস্স ধম্মসীসকস্স [ধম্মাসীসকস্স (ক.)] দাননিস্সন্দবলৰ [দাননিস্সন্দবল (সী. পী.)] ৰীরিযৰিপুলৰিপ্ফারেন হেট্ঠা মহাৰাতা সঞ্চলন্তি সণিকং সণিকং সকিং সকিং আকুলাকুলা ৰাযন্তি ওনমন্তি উন্নমন্তি ৰিনমন্তি, ছিন্নপত্তপাদপা [সীন্নপ্পত্তপাদপা (সী.)] পপতন্তি, গুম্বং গুম্বং ৰলাহকা গগনে সন্ধাৰন্তি, রজোসঞ্চিতা ৰাতা দারুণা হোন্তি, গগনং উপ্পীল়িতা ৰাতা ৰাযন্তি, সহসা ধমধমাযন্তি, মহাভীমো সদ্দো নিচ্ছরতি, তেসু ৰাতেসু কুপিতেসু উদকং সণিকং সণিকং চলতি, উদকে চলিতে খুব্ভন্তি মচ্ছকচ্ছপা, যমকযমকা ঊমিযো জাযন্তি, জলচরা সত্তা তসন্তি, জলৰীচি যুগনদ্ধো ৰত্ততি, ৰীচিনাদো পৰত্ততি, ঘোরা বুব্বুল়া [পুব্বুল়া (ক.)] উট্ঠহন্তি, ফেণমালা ভৰন্তি, উত্তরতি মহাসমুদ্দো, দিসাৰিদিসং ধাৰতি উদকং, উদ্ধংসোতপটিসোতমুখা সন্দন্তি সলিলধারা, তসন্তি অসুরা গরুল়া নাগা যক্খা, উব্বিজ্জন্তি ‘কিং নু খো, কথং নু খো, সাগরো ৰিপরিৰত্ততী’তি, গমনপথমেসন্তি ভীতচিত্তা, খুভিতে লুল়িতে জলধারে পকম্পতি মহাপথৰী সনগা সসাগরা, পরিৰত্ততি সিনেরুগিরি কূটসেলসিখরো ৰিনমমানো হোতি, ৰিমনা হোন্তি অহিনকুলবিল়ারকোট্ঠুকসূকরমিগপক্খিনো, রুদন্তি যক্খা অপ্পেসক্খা, হসন্তি যক্খা মহেসক্খা কম্পমানায মহাপথৰিযা.
‘‘যথা, মহারাজ, মহতি মহাপরিযোগে উদ্ধনগতে উদকসম্পুণ্ণে আকিণ্ণতণ্ডুলে হেট্ঠতো অগ্গি জলমানো পঠমং তাৰ পরিযোগং সন্তাপেতি, পরিযোগো সন্তত্তো উদকং সন্তাপেতি, উদকং সন্তত্তং তণ্ডুলং সন্তাপেতি, তণ্ডুলং সন্তত্তং উম্মুজ্জতি নিমুজ্জতি, বুব্বুল়কজাতং হোতি, ফেণমালা উত্তরতি; এৰমেৰ খো, মহারাজ, ৰেস্সন্তরো রাজা যং লোকে দুচ্চজং, তং চজি, তস্স তং দুচ্চজং চজন্তস্স দানস্স সভাৰনিস্সন্দেন হেট্ঠা মহাৰাতা ধারেতুং ন ৰিসহন্তা পরিকুপ্পিংসু [পরিকম্পিংসু (ক.)], মহাৰাতেসু পরিকুপিতেসু [পরিখুব্ভিতেসু (স্যা.)] উদকং কম্পি, উদকে কম্পিতে মহাপথৰী কম্পি, ইতি তদা মহাৰাতা চ উদকঞ্চ মহাপথৰী চাতি ইমে তযো একমনা ৰিয অহেসুং মহাদাননিস্সন্দেন ৰিপুলবলৰীরিযেন নত্থেদিসো, মহারাজ, অঞ্ঞস্স দানানুভাৰো, যথা ৰেস্সন্তরস্স রঞ্ঞো মহাদানানুভাৰো. যথা, মহারাজ, মহিযা বহুৰিধা মণযো ৰিজ্জন্তি. সেয্যথীদং, ইন্দনীলো মহানীলো জোতিরসো ৰেল়ুরিযো উম্মাপুপ্ফো সিরীসপুপ্ফো মনোহরো সূরিযকন্তো চন্দকন্তো ৰজিরো খজ্জোপনকো ফুস্সরাগো লোহিতঙ্গো মসারগল্লোতি, এতে সব্বে অতিক্কম্ম চক্কৰত্তিমণি অগ্গমক্খাযতি, চক্কৰত্তিমণি, মহারাজ, সমন্তা যোজনং ওভাসেতি. এৰমেৰ খো, মহারাজ, যং কিঞ্চি মহিযা দানং ৰিজ্জতি অপি অসদিসদানং পরমং, তং সব্বং অতিক্কম্ম ৰেস্সন্তরস্স রঞ্ঞো মহাদানং অগ্গমক্খাযতি, ৰেস্সন্তরস্স, মহারাজ, রঞ্ঞো মহাদানে দীযমানে সত্তক্খত্তুং মহাপথৰী কম্পিতা’’তি.
‘‘অচ্ছরিযং, ভন্তে নাগসেন, বুদ্ধানং, অব্ভুতং, ভন্তে নাগসেন, বুদ্ধানং, যং তথাগতো বোধিসত্তো সমানো অসমো লোকেন এৰংখন্তি এৰংচিত্তো এৰংঅধিমুত্তি এৰংঅধিপ্পাযো, বোধিসত্তানং, ভন্তে নাগসেন, পরক্কমো দক্খাপিতো, পারমী চ জিনানং ভিয্যো ওভাসিতা, চরিযং চরতোপি তাৰ তথাগতস্স সদেৰকে লোকে সেট্ঠভাৰো অনুদস্সিতো. সাধু, ভন্তে নাগসেন, থোমিতং জিনসাসনং, জোতিতা জিনপারমী, ছিন্নো তিত্থিযানং ৰাদগণ্ঠি, ভিন্নো পরাপৰাদকুম্ভো [গুম্বো তযা ৰিদ্ধংসিতো (স্যা.)], পঞ্হো গম্ভীরো উত্তানীকতো, গহনং অগহনং কতং, সম্মা লদ্ধং জিনপুত্তানং নিব্বাহনং [নিব্বাযনং (ক.)], এৰমেতং গণিৰরপৰর তথা সম্পটিচ্ছামা’’তি.
পথৰিচলনপঞ্হো চতুত্থো.
৫. সিৰিরাজচক্খুদানপঞ্হো
৫. ‘‘ভন্তে নাগসেন, তুম্হে এৰং ভণথ ‘সিৰিরাজেন যাচকস্স চক্খূনি দিন্নানি, অন্ধস্স সতো পুন দিব্বচক্খূনি উপ্পন্নানী’তি, এতম্পি ৰচনং সকসটং সনিগ্গহং সদোসং ‘হেতুসমুগ্ঘাতে অহেতুস্মিং অৰত্থুস্মিং নত্থি দিব্বচক্খুস্স উপ্পাদো’তি সুত্তে ৰুত্তং, যদি, ভন্তে নাগসেন, সিৰিরাজেন যাচকস্স চক্খূনি দিন্নানি, তেন হি ‘পুন দিব্বচক্খূনি উপ্পন্নানী’তি যং ৰচনং, তং মিচ্ছা; যদি দিব্বচক্খূনি উপ্পন্নানি, তেন হি ‘সিৰিরাজেন যাচকস্স চক্খূনি দিন্নানী’তি যং ৰচনং, তম্পি মিচ্ছা. অযম্পি উভতো কোটিকো পঞ্হো গণ্ঠিতোপি গণ্ঠিতরো ৰেঠতোপি ৰেঠতরো গহনতোপি গহনতরো, সো তৰানুপ্পত্তো, তত্থ ছন্দমভিজনেহি নিব্বাহনায পরৰাদানং নিগ্গহাযা’’তি.
‘‘দিন্নানি, মহারাজ, সিৰিরাজেন যাচকস্স চক্খূনি, তত্থ মা ৰিমতিং উপ্পাদেহি, পুন দিব্বানি চ চক্খূনি উপ্পন্নানি, তত্থাপি মা ৰিমতিং জনেহী’’তি. ‘‘অপি নু খো, ভন্তে নাগসেন, হেতুসমুগ্ঘাতে অহেতুস্মিং অৰত্থুস্মিং দিব্বচক্খু উপ্পজ্জতী’’তি? ‘‘ন হি, মহারাজা’’তি. ‘‘কিং পন, ভন্তে, এত্থ কারণং, যেন কারণেন হেতুসমুগ্ঘাতে অহেতুস্মিং অৰত্থুস্মিং দিব্বচক্খু উপ্পজ্জতি, ইঙ্ঘ তাৰ কারণেন মং সঞ্ঞাপেহী’’তি?
‘‘কিং পন, মহারাজ, অত্থি লোকে সচ্চং নাম, যেন সচ্চৰাদিনো সচ্চকিরিযং করোন্তী’’তি? ‘‘আম, ভন্তে, অত্থি লোকে সচ্চং নাম, সচ্চেন, ভন্তে নাগসেন, সচ্চৰাদিনো সচ্চকিরিযং কত্ৰা দেৰং ৰস্সাপেন্তি, অগ্গিং নিব্বাপেন্তি, ৰিসং পটিহনন্তি, অঞ্ঞম্পি ৰিৰিধং কত্তব্বং করোন্তী’’তি. ‘‘তেন হি, মহারাজ, যুজ্জতি সমেতি সিৰিরাজস্স সচ্চবলেন দিব্বচক্খূনি উপ্পন্নানীতি, সচ্চবলেন, মহারাজ, অৰত্থুস্মিং দিব্বচক্খু উপ্পজ্জতি, সচ্চং যেৰ তত্থ ৰত্থু ভৰতি দিব্বচক্খুস্স উপ্পাদায.
‘‘যথা, মহারাজ, যে কেচি সত্তা সচ্চমনুগাযন্তি ‘মহামেঘো পৰস্সতূ’তি, তেসং সহ সচ্চমনুগীতেন মহামেঘো পৰস্সতি, অপি নু খো, মহারাজ, অত্থি আকাসে ৰস্সহেতু সন্নিচিতো ‘যেন হেতুনা মহামেঘো পৰস্সতী’’’তি? ‘‘ন হি, ভন্তে, সচ্চং যেৰ তত্থ হেতু ভৰতি মহতো মেঘস্স পৰস্সনাযা’’তি. ‘‘এৰমেৰ খো, মহারাজ, নত্থি তস্স পকতিহেতু, সচ্চং যেৰেত্থ ৰত্থু ভৰতি দিব্বচক্খুস্স উপ্পাদাযাতি.
‘‘যথা ৰা পন, মহারাজ, যে কেচি সত্তা সচ্চমনুগাযন্তি ‘জলিতপজ্জলিতমহাঅগ্গিক্খন্ধো পটিনিৰত্ততূ’তি, তেসং সহ সচ্চমনুগীতেন জলিতপজ্জলিতমহাঅগ্গিক্খন্ধো খণেন পটিনিৰত্ততি. অপি নু খো, মহারাজ, অত্থি তস্মিং জলিতপজ্জলিতে মহাঅগ্গিক্খন্ধে হেতু সন্নিচিতো ‘যেন হেতুনা জলিতপজ্জলিতমহাঅগ্গিক্খন্ধো খণেন পটিনিৰত্ততী’’তি? ‘‘ন হি, ভন্তে, সচ্চং যেৰ তত্থ ৰত্থু হোতি তস্স জলিতপজ্জলিতস্স মহাঅগ্গিক্খন্ধস্স খণেন পটিনিৰত্তনাযা’’তি. ‘‘এৰমেৰ খো, মহারাজ, নত্থি তস্স পকতিহেতু, সচ্চং যেৰেত্থ ৰত্থু ভৰতি দিব্বচক্খুস্স উপ্পাদাযাতি.
‘‘যথা ৰা পন, মহারাজ, যে কেচি সত্তা সচ্চমনুগাযন্তি ‘ৰিসং হলাহলং অগদং ভৰতূ’তি. তেসং সহ সচ্চমনুগীতেন ৰিসং হলাহলং খণেন অগদং ভৰতি, অপি নু খো, মহারাজ, অত্থি তস্মিং হলাহলৰিসে হেতু সন্নিচিতো ‘যেন হেতুনা ৰিসং হলাহলং খণেন অগদং ভৰতী’’’তি? ‘‘ন হি, ভন্তে, সচ্চং যেৰ তত্থ হেতু ভৰতি ৰিসস্স হলাহলস্স খণেন পটিঘাতাযা’’তি. ‘‘এৰমেৰ খো, মহারাজ, ৰিনা পকতিহেতুং সচ্চং যেৰেত্থ ৰত্থু ভৰতি দিব্বচক্খুস্স উপ্পাদাযাতি.
‘‘চতুন্নম্পি, মহারাজ, অরিযসচ্চানং পটিৰেধায নত্থঞ্ঞং ৰত্থু, সচ্চং ৰত্থুং কত্ৰা চত্তারি অরিযসচ্চানি পটিৰিজ্ঝন্তীতি. অত্থি, মহারাজ, চীনৰিসযে চীনরাজা, সো মহাসমুদ্দে কীল়িতুকামো [বলিং কাতুকামো (সী. পী.)] চতুমাসে চতুমাসে সচ্চকিরিযং কত্ৰা সহ রথেন অন্তোমহাসমুদ্দে যোজনং পৰিসতি, তস্স রথসীসস্স পুরতো পুরতো মহাৰারিক্খন্ধো পটিক্কমতি, নিক্খন্তস্স পুন ওত্থরতি, অপি নু খো, মহারাজ, সো মহাসমুদ্দো সদেৰমনুস্সেনপি লোকেন পকতিকাযবলেন সক্কা পটিক্কমাপেতু’’ন্তি? ‘‘অতিপরিত্তকেপি, ভন্তে, তল়াকে উদকং ন সক্কা সদেৰমনুস্সেনপি লোকেন পকতিকাযবলেন পটিক্কমাপেতুং, কিং পন মহাসমুদ্দে উদক’’ন্তি? ‘‘ইমিনাপি, মহারাজ, কারণেন সচ্চবলং ঞাতব্বং ‘নত্থি তং ঠানং, যং সচ্চেন ন পত্তব্ব’ন্তি.
‘‘নগরে, মহারাজ, পাটলিপুত্তে অসোকো ধম্মরাজা সনেগমজানপদঅমচ্চভটবলমহামত্তেহি পরিৰুতো গঙ্গং নদিং [গঙ্গানদিং (সী.)] নৰসলিলসম্পুণ্ণং সমতিত্থিকং সম্ভরিতং পঞ্চযোজনসতাযামং যোজনপুথুলং সন্দমানং দিস্ৰা অমচ্চে এৰমাহ ‘অত্থি কোচি, ভণে, সমত্থো, যো ইমং মহাগঙ্গং পটিসোতং সন্দাপেতু’ন্তি. অমচ্চা আহংসু ‘দুক্করং দেৰা’তি.
‘‘তস্মিং যেৰ গঙ্গাকূলে ঠিতা বন্ধুমতী নাম গণিকা অস্সোসি রঞ্ঞা কির এৰং ৰুত্তং ‘সক্কা নু খো ইমং মহাগঙ্গং পটিসোতং সন্দাপেতু’ন্তি, সা এৰমাহ ‘অহঞ্হি নগরে পাটলিপুত্তে গণিকা রূপূপজীৰিনী অন্তিমজীৰিকা, মম তাৰ রাজা সচ্চকিরিযং পস্সতূ’তি. অথ সা সচ্চকিরিযং অকাসি, সহ তস্সা সচ্চকিরিযায খণেন সা মহাগঙ্গা গল়গল়াযন্তী পটিসোতং সন্দিত্থ মহতো জনকাযস্স পস্সতো.
‘‘অথ রাজা গঙ্গায আৰট্টঊমিৰেগজনিতং হলাহলসদ্দং সুত্ৰা ৰিম্হিতো অচ্ছরিযব্ভুতজাতো অমচ্চে এৰমাহ ‘কিস্সাযং, ভণে, মহাগঙ্গা পটিসোতং সন্দতী’তি? ‘বন্ধুমতী, মহারাজ, গণিকা তৰ ৰচনং সুত্ৰা সচ্চকিরিযং অকাসি, তস্সা সচ্চকিরিযায মহাগঙ্গা উদ্ধংমুখা সন্দতী’তি.
‘‘অথ সংৰিগ্গহদযো রাজা তুরিততুরিতো সযং গন্ত্ৰা তং গণিকং পুচ্ছি ‘সচ্চং কির, জে, তযা সচ্চকিরিযায অযং গঙ্গা পটিসোতং সন্দাপিতা’তি? ‘আম দেৰা’তি. রাজা আহ ‘কিং তে তত্থ বলং অত্থি, কো ৰা তে ৰচনং আদিযতি অনুম্মত্তো, কেন ত্ৰং বলেন ইমং মহাগঙ্গং পটিসোতং সন্দাপেসী’তি? সা আহ ‘সচ্চবলেনাহং, মহারাজ, ইমং মহাগঙ্গং পটিসোতং সন্দাপেসি’ন্তি. রাজা আহ ‘কিং তে সচ্চবলং অত্থি চোরিযা ধুত্তিযা অসতিযা ছিন্নিকায পাপিযা ভিন্নসীলায [পাপিকায ভিন্নসীমায (সী.)] হিরিঅতিক্কন্তিকায অন্ধজনপলোভিকাযা’তি. ‘সচ্চং, মহারাজ, তাদিসিকা অহং, তাদিসিকাযপি মে, মহারাজ, সচ্চকিরিযা অত্থি, যাযাহং ইচ্ছমানা সদেৰকম্পি লোকং পরিৰত্তেয্য’ন্তি. রাজা আহ ‘কতমা পন সা হোতি সচ্চকিরিযা, ইঙ্ঘ মং সাৰেহী’তি. ‘যো মে, মহারাজ, ধনং দেতি খত্তিযো ৰা ব্রাহ্মণো ৰা ৰেস্সো ৰা সুদ্দো ৰা অঞ্ঞো ৰা কোচি, তেসং সমকং যেৰ উপট্ঠহামি, ‘‘খত্তিযো’’তি ৰিসেসো নত্থি, ‘‘সুদ্দো’’তি অতিমঞ্ঞনা [অতিমঞ্ঞমানো (ক.)] নত্থি, অনুনযপ্পটিঘৰিপ্পমুত্তা ধনস্সামিকং পরিচরামি, এসা মে দেৰ সচ্চকিরিযা, যাযাহং ইমং মহাগঙ্গং পটিসোতং সন্দাপেসি’ন্তি.
‘‘ইতিপি, মহারাজ, সচ্চে ঠিতা ন কিঞ্চি অত্থং ন ৰিন্দন্তি. দিন্নানি চ, মহারাজ, সিৰিরাজেন যাচকস্স চক্খূনি, দিব্বচক্খূনি চ উপ্পন্নানি, তঞ্চ সচ্চকিরিযায. যং পন সুত্তে ৰুত্তং ‘মংসচক্খুস্মিং নট্ঠে অহেতুস্মিং অৰত্থুস্মিং নত্থি দিব্বচক্খুস্স উপ্পাদো’তি. তং ভাৰনামযং চক্খুং সন্ধায ৰুত্তং, এৰমেতং, মহারাজ, ধারেহী’’তি. ‘‘সাধু, ভন্তে নাগসেন, সুনিব্বেঠিতো পঞ্হো, সুনিদ্দিট্ঠো নিগ্গহো, সুমদ্দিতা পরৰাদা, এৰমেতং তথা সম্পটিচ্ছামী’’তি.
সিৰিরাজচক্খুদানপঞ্হো পঞ্চমো.
৬. গব্ভাৰক্কন্তিপঞ্হো
৬. ‘‘ভন্তে নাগসেন, ভাসিতম্পেতং ভগৰতা ‘তিণ্ণং খো পন, ভিক্খৰে, সন্নিপাতা গব্ভস্স অৰক্কন্তি [গব্ভস্সাৰক্কন্তি (ম. নি. ১.৪০৮)] হোতি, ইধ মাতাপিতরো চ সন্নিপতিতা হোন্তি, মাতা চ উতুনী হোতি, গন্ধব্বো চ পচ্চুপট্ঠিতো হোতি, ইমেসং খো, ভিক্খৰে, তিণ্ণং সন্নিপাতা গব্ভস্স অৰক্কন্তি হোতী’তি, অসেসৰচনমেতং, নিস্সেসৰচনমেতং, নিপ্পরিযাযৰচনমেতং, অরহস্সৰচনমেতং, সদেৰমনুস্সানং মজ্ঝে নিসীদিত্ৰা ভণিতং, অযঞ্চ দ্ৰিন্নং সন্নিপাতা গব্ভস্স অৰক্কন্তি দিস্সতি, দুকূলেন তাপসেন পারিকায তাপসিযা উতুনিকালে দক্খিণেন হত্থঙ্গুট্ঠেন নাভি পরামট্ঠা, তস্স তেন নাভিপরামসনেন সামকুমারো নিব্বত্তো. মাতঙ্গেনাপি ইসিনা ব্রাহ্মণকঞ্ঞায উতুনিকালে দক্খিণেন হত্থঙ্গুট্ঠেন নাভি পরামট্ঠা, তস্স তেন নাভিপরামসনেন মণ্ডব্যো নাম মাণৰকো নিব্বত্তোতি. যদি, ভন্তে নাগসেন, ভগৰতা ভণিতং ‘তিণ্ণং খো পন, ভিক্খৰে, সন্নিপাতা গব্ভস্স অৰক্কন্তি হোতী’তি. তেন হি সামো চ কুমারো মণ্ডব্যো চ মাণৰকো উভোপি তে নাভিপরামসনেন নিব্বত্তাতি যং ৰচনং, তং মিচ্ছা. যদি, ভন্তে, তথাগতেন ভণিতং ‘সামো চ কুমারো মণ্ডব্যো চ মাণৰকো নাভিপরামসনেন নিব্বত্তা’’তি, তেন হি ‘তিণ্ণং খো পন, ভিক্খৰে, সন্নিপাতা গব্ভস্স অৰক্কন্তি হোতী’তি যং ৰচনং, তম্পি মিচ্ছা. অযম্পি উভতো কোটিকো পঞ্হো সুগম্ভীরো সুনিপুণো ৰিসযো বুদ্ধিমন্তানং, সো তৰানুপ্পত্তো, ছিন্দ ৰিমতিপথং, ধারেহি ঞাণৰরপ্পজ্জোত’’ন্তি.
‘‘ভাসিতম্পেতং, মহারাজ, ভগৰতা ‘তিণ্ণং খো পন, ভিক্খৰে, সন্নিপাতা গব্ভস্স অৰক্কন্তি হোতি, ইধ মাতাপিতরো চ সন্নিপতিতা হোন্তি, মাতা চ উতুনী হোতি, গন্ধব্বো চ পচ্চুপট্ঠিতো হোতি, এৰং তিণ্ণং সন্নিপাতা গব্ভস্স অৰক্কন্তি হোতী’তি. ভণিতঞ্চ ‘সামো চ কুমারো মণ্ডব্যো চ মাণৰকো নাভিপরামসনেন নিব্বত্তা’’তি. ‘‘তেন হি, ভন্তে নাগসেন, যেন কারণেন পঞ্হো সুৰিনিচ্ছিতো হোতি, তেন কারণেন মং সঞ্ঞাপেহী’’তি.
‘‘সুতপুব্বং পন তযা, মহারাজ, সংকিচ্চো চ কুমারো ইসিসিঙ্গো চ তাপসো থেরো চ কুমারকস্সপো ‘ইমিনা নাম তে নিব্বত্তা’’তি? ‘‘আম, ভন্তে, সুয্যতি, অব্ভুগ্গতা তেসং জাতি, দ্ৰে মিগধেনুযো তাৰ উতুনিকালে দ্ৰিন্নং তাপসানং পস্সাৰট্ঠানং আগন্ত্ৰা সসম্ভৰং পস্সাৰং পিৰিংসু, তেন পস্সাৰসম্ভৰেন সংকিচ্চো চ কুমারো ইসিসিঙ্গো চ তাপসো নিব্বত্তা. থেরস্স উদাযিস্স ভিক্খুনুপস্সযং উপগতস্স রত্তচিত্তেন ভিক্খুনিযা অঙ্গজাতং উপনিজ্ঝাযন্তস্স সম্ভৰং কাসাৰে মুচ্চি. অথ খো আযস্মা উদাযি তং ভিক্খুনিং এতদৰোচ ‘গচ্ছ ভগিনি, উদকং আহর অন্তরৰাসকং ধোৰিস্সামী’তি. ‘আহরয্য অহমেৰ ধোৰিস্সামী’তি. ততো সা ভিক্খুনী উতুনিসমযে তং সম্ভৰং একদেসং মুখেন অগ্গহেসি, একদেসং অঙ্গজাতে পক্খিপি, তেন থেরো কুমারকস্সপো নিব্বত্তোতি এতং জনো আহা’’তি.
‘‘অপি নু খো ত্ৰং, মহারাজ, সদ্দহসি তং ৰচন’’ন্তি? ‘‘আম ভন্তে, বলৰং তত্থ মযং কারণং উপলভাম, যেন মযং কারণেন সদ্দহাম ‘ইমিনা কারণেন নিব্বত্তা’’তি. ‘‘কিং পনেত্থ, মহারাজ, কারণ’’ন্তি? ‘‘সুপরিকম্মকতে, ভন্তে, কললে বীজং নিপতিত্ৰা খিপ্পং সংৰিরুহতী’’তি. ‘‘আম মহারাজা’’তি. ‘‘এৰমেৰ খো, ভন্তে, সা ভিক্খুনী উতুনী সমানা সণ্ঠিতে কললে রুহিরে পচ্ছিন্নৰেগে ঠিতায ধাতুযা তং সম্ভৰং গহেত্ৰা তস্মিং কললে পক্খিপি, তেন তস্সা গব্ভো সণ্ঠাসি, এৰং তত্থ কারণং পচ্চেম তেসং নিব্বত্তিযা’’তি. ‘‘এৰমেতং, মহারাজ, তথা সম্পটিচ্ছামি, যোনিপ্পৰেসেন গব্ভো সম্ভৰতীতি. সম্পটিচ্ছসি পন, ত্ৰং মহারাজ, থেরস্স কুমারকস্সপস্স গব্ভাৰক্কমন’’ন্তি? ‘‘আম ভন্তে’’তি. ‘‘সাধু, মহারাজ, পচ্চাগতোসি মম ৰিসযং, একৰিধেনপি গব্ভাৰক্কন্তিং কথযন্তো মমানুবলং ভৰিস্সসি, অথ যা পন তা দ্ৰে মিগধেনুযো পস্সাৰং পিৰিত্ৰা গব্ভং পটিলভিংসু, তাসং ত্ৰং সদ্দহসি গব্ভস্সাৰক্কমন’’ন্তি? ‘‘আম, ভন্তে, যং কিঞ্চি ভুত্তং পীতং খাযিতং লেহিতং, সব্বং তং কললং ওসরতি, ঠানগতং ৰুড্ঢিমাপজ্জতি. যথা, ভন্তে নাগসেন, যা কাচি সরিতা নাম, সব্বা তা মহাসমুদ্দং ওসরন্তি, ঠানগতা ৰুড্ঢিমাপজ্জন্তি. এৰমেৰ খো, ভন্তে নাগসেন, যং কিঞ্চি ভুত্তং পীতং খাযিতং লেহিতং, সব্বং তং কললং ওসরতি, ঠানগতং ৰুড্ঢিমাপজ্জতি, তেনাহং কারণেন সদ্দহামি মুখগতেনপি গব্ভস্স অৰক্কন্তি হোতী’’তি. ‘‘সাধু, মহারাজ, গাল়্হতরং উপগতোসি মম ৰিসযং, মুখপানেনপি দ্ৰযসন্নিপাতো ভৰতি. সংকিচ্চস্স চ, মহারাজ, কুমারস্স ইসিসিঙ্গস্স চ তাপসস্স থেরস্স চ কুমারকস্সপস্স গব্ভাৰক্কমনং সম্পটিচ্ছসী’’তি? ‘‘আম, ভন্তে, সন্নিপাতো ওসরতী’’তি.
‘‘সামোপি, মহারাজ, কুমারো মণ্ডব্যোপি মাণৰকো তীসু সন্নিপাতেসু অন্তোগধা, একরসা যেৰ পুরিমেন, তত্থ কারণং ৰক্খামি. দুকূলো চ, মহারাজ, তাপসো পারিকা চ তাপসী উভোপি তে অরঞ্ঞৰাসা অহেসুং পৰিৰেকাধিমুত্তা উত্তমত্থগৰেসকা, তপতেজেন যাৰ ব্রহ্মলোকং সন্তাপেসুং. তেসং তদা সক্কো দেৰানমিন্দো সাযং পাতং উপট্ঠানং আগচ্ছতি. সো তেসং গরুকতমেত্ততায উপধারেন্তো অদ্দস অনাগতমদ্ধানে দ্ৰিন্নম্পি তেসং চক্খূনং অন্তরধানং, দিস্ৰা তে এৰমাহ ‘একং মে, ভোন্তো, ৰচনং করোথ, সাধু একং পুত্তং জনেয্যাথ, সো তুম্হাকং উপট্ঠাকো ভৰিস্সতি আলম্বনো চা’তি. ‘অলং, কোসিয, মা এৰং ভণী’তি. তে তস্স তং ৰচনং ন সম্পটিচ্ছিংসু. অনুকম্পকো অত্থকামো সক্কো দেৰানমিন্দো দুতিযম্পি…পে… ততিযম্পি তে এৰমাহ ‘একং মে, ভোন্তো, ৰচনং করোথ, সাধু একং পুত্তং জনেয্যাথ, সো তুম্হাকং উপট্ঠাকো ভৰিস্সতি আলম্বনো চা’তি. ততিযম্পি তে আহংসু ‘অলং, কোসিয, মা ত্ৰং খো অম্হে অনত্থে নিযোজেহি, কদাযং কাযো ন ভিজ্জিস্সতি, ভিজ্জতু অযং কাযো ভেদনধম্মো, ভিজ্জন্তিযাপি ধরণিযা পতন্তেপি সেলসিখরে ফলন্তেপি আকাসে পতন্তেপি চন্দিমসূরিযে নেৰ মযং লোকধম্মেহি মিস্সযিস্সাম, মা ত্ৰং অম্হাকং সম্মুখভাৰং উপগচ্ছ, উপগতস্স তে এসো ৰিস্সাসো, অনত্থচরো ত্ৰং মঞ্ঞে’তি.
ততো সক্কো দেৰানমিন্দো তেসং মনং অলভমানো গরুকতো পঞ্জলিকো পুন যাচি ‘যদি মে ৰচনং ন উস্সহথ কাতুং, যদা তাপসী উতুনী হোতি পুপ্ফৰতী, তদা ত্ৰং, ভন্তে, দক্খিণেন হত্থঙ্গুট্ঠেন নাভিং পরামসেয্যাসি, তেন সা গব্ভং লচ্ছতি, সন্নিপাতো যেৰেস গব্ভাৰক্কন্তিযা’তি. ‘সক্কোমহং, কোসিয, তং ৰচনং কাতুং, ন তাৰতকেন অম্হাকং তপো ভিজ্জতি, হোতূ’তি সম্পটিচ্ছিংসু. তায চ পন ৰেলায দেৰভৰনে অত্থি দেৰপুত্তো উস্সন্নকুসলমূলো খীণাযুকো আযুক্খযপ্পত্তো যদিচ্ছকং সমত্থো ওক্কমিতুং অপি চক্কৰত্তিকুলেপি. অথ সক্কো দেৰানমিন্দো তং দেৰপুত্তং উপসঙ্কমিত্ৰা এৰমাহ ‘এহি খো, মারিস, সুপভাতো তে দিৰসো, অত্থসিদ্ধি উপগতা, যমহং তে উপট্ঠানমাগমিং, রমণীযে তে ওকাসে ৰাসো ভৰিস্সতি, পতিরূপে কুলে পটিসন্ধি ভৰিস্সতি, সুন্দরেহি মাতাপিতূহি ৰড্ঢেতব্বো, এহি মে ৰচনং করোহী’তি যাচি. দুতিযম্পি…পে… ততিযম্পি যাচি সিরসি পঞ্জলিকতো.
ততো সো দেৰপুত্তো এৰমাহ ‘কতমং তং, মারিস, কুলং, যং ত্ৰং অভিক্খণং কিত্তযসি পুনপ্পুন’ন্তি. ‘দুকূলো চ তাপসো পারিকা চ তাপসী’তি. সো তস্স ৰচনং সুত্ৰা তুট্ঠো সম্পটিচ্ছি ‘সাধু, মারিস, যো তৰ ছন্দো, সো হোতু, আকঙ্খমানো অহং, মারিস, পত্থিতে কুলে উপ্পজ্জেয্যং, কিম্হি কুলে উপ্পজ্জামি অণ্ডজে ৰা জলাবুজে ৰা সংসেদজে ৰা ওপপাতিকে ৰা’তি? ‘জলাবুজায, মারিস, যোনিযা উপ্পজ্জাহী’তি. অথ সক্কো দেৰানমিন্দো উপ্পত্তিদিৰসং ৰিগণেত্ৰা দুকূলস্স তাপসস্স আরোচেসি ‘অসুকস্মিং নাম দিৰসে তাপসী উতুনী ভৰিস্সতি পুপ্ফৰতী, তদা ত্ৰং, ভন্তে, দক্খিণেন হত্থঙ্গুট্ঠেন নাভিং পরামসেয্যাসী’তি. তস্মিং, মহারাজ, দিৰসে তাপসী চ উতুনী পুপ্ফৰতী অহোসি, দেৰপুত্তো চ তত্থূপগো পচ্চুপট্ঠিতো অহোসি, তাপসো চ দক্খিণেন হত্থঙ্গুট্ঠেন তাপসিযা নাভিং পরামসি, ইতি তে তযো সন্নিপাতা অহেসুং, নাভিপরামসনেন তাপসিযা রাগো উদপাদি, সো পনস্সা রাগো নাভিপরামসনং পটিচ্চ মা ত্ৰং সন্নিপাতং অজ্ঝাচারমেৰ মঞ্ঞি, ঊহসনম্পি [হসনম্পি (ক.)] সন্নিপাতো, উল্লপনম্পি সন্নিপাতো, উপনিজ্ঝাযনম্পি সন্নিপাতো, পুব্বভাগভাৰতো রাগস্স উপ্পাদায আমসনেন সন্নিপাতো জাযতি, সন্নিপাতা ওক্কমনং হোতীতি.
‘‘অনজ্ঝাচারেপি, মহারাজ, পরামসনেন গব্ভাৰক্কন্তি হোতি. যথা, মহারাজ, অগ্গি জলমানো অপরামসনোপি উপগতস্স সীতং ব্যপহন্তি, এৰমেৰ খো, মহারাজ, অনজ্ঝাচারেপি পরামসনেন গব্ভাৰক্কন্তি হোতি.
‘‘চতুন্নং, মহারাজ, ৰসেন সত্তানং গব্ভাৰক্কন্তি হোতি কম্মৰসেন যোনিৰসেন কুলৰসেন আযাচনৰসেন, অপি চ সব্বেপেতে সত্তা কম্মসম্ভৰা কম্মসমুট্ঠানা.
‘‘কথং, মহারাজ, কম্মৰসেন সত্তানং গব্ভাৰক্কন্তি হোতি? উস্সন্নকুসলমূলা, মহারাজ, সত্তা যদিচ্ছকং উপ্পজ্জন্তি খত্তিযমহাসালকুলে ৰা ব্রাহ্মণমহাসালকুলে ৰা গহপতিমহাসালকুলে ৰা দেৰেসু ৰা অণ্ডজায ৰা যোনিযা জলাবুজায ৰা যোনিযা সংসেদজায ৰা যোনিযা ওপপাতিকায ৰা যোনিযা. যথা, মহারাজ, পুরিসো অড্ঢো মহদ্ধনো মহাভোগো পহূতজাতরূপরজতো পহূতৰিত্তূপকরণো পহূতধনধঞ্ঞো পহূতঞাতিপক্খো দাসিং ৰা দাসং ৰা খেত্তং ৰা ৰত্থুং ৰা গামং ৰা নিগমং ৰা জনপদং ৰা যং কিঞ্চি মনসা অভিপত্থিতং, যদিচ্ছকং দ্ৰিগুণতিগুণম্পি ধনং দত্ৰা কিণাতি, এৰমেৰ খো, মহারাজ, উস্সন্নকুসলমূলা সত্তা যদিচ্ছকং উপ্পজ্জন্তি খত্তিযমহাসালকুলে ৰা ব্রাহ্মণমহাসালকুলে ৰা গহপতিমহাসালকুলে ৰা দেৰেসু ৰা অণ্ডজায ৰা যোনিযা জলাবুজায ৰা যোনিযা সংসেদজয ৰা যোনিযা ওপপাতিকায ৰা যোনিযা. এৰং কম্মৰসেন সত্তানং গব্ভাৰক্কন্তি হোতি.
‘‘কথং যোনিৰসেন সত্তানং গব্ভাৰক্কন্তি হোতি? কুক্কুটানং, মহারাজ, ৰাতেন গব্ভাৰক্কন্তি হোতি. বলাকানং মেঘসদ্দেন গব্ভাৰক্কন্তি হোতি. সব্বেপি দেৰা অগব্ভসেয্যকা সত্তা যেৰ, তেসং নানাৰণ্ণেন গব্ভাৰক্কন্তি হোতি. যথা, মহারাজ, মনুস্সা নানাৰণ্ণেন মহিযা চরন্তি, কেচি পুরতো পটিচ্ছাদেন্তি, কেচি পচ্ছতো পটিচ্ছাদেন্তি, কেচি নগ্গা হোন্তি, কেচি ভণ্ডূ হোন্তি সেতপটধরা, কেচি মোল়িবদ্ধা হোন্তি, কেচি ভণ্ডূ কাসাৰৰসনা হোন্তি, কেচি কাসাৰৰসনা মোল়িবদ্ধা হোন্তি, কেচি জটিনো ৰাকচীরধরা [ৰাকচীরা (ক.)] হোন্তি, কেচি চম্মৰসনা হোন্তি, কেচি রস্মিযো নিৰাসেন্তি, সব্বেপেতে মনুস্সা নানাৰণ্ণেন মহিযা চরন্তি, এৰমেৰ খো, মহারাজ, সত্তা যেৰ তে সব্বে, তেসং নানাৰণ্ণেন গব্ভাৰক্কন্তি হোতি. এৰং যোনিৰসেন সত্তানং গব্ভাৰক্কন্তি হোতি.
‘‘কথং কুলৰসেন সত্তানং গব্ভাৰক্কন্তি হোতি? কুলং নাম, মহারাজ, চত্তারি কুলানি অণ্ডজং জলাবুজং সংসেদজং ওপপাতিকং. যদি তত্থ গন্ধব্বো যতো কুতোচি আগন্ত্ৰা অণ্ডজে কুলে উপ্পজ্জতি, সো তত্থ অণ্ডজো হোতি…পে… জলাবুজে কুলে…পে… সংসেদজে কুলে…পে… ওপপাতিকে কুলে উপ্পজ্জতি, সো তত্থ ওপপাতিকো হোতি. তেসু তেসু কুলেসু তাদিসা যেৰ সত্তা সম্ভৰন্তি. যথা, মহারাজ, হিমৰতি নেরুপব্বতং যে কেচি মিগপক্খিনো উপেন্তি, সব্বে তে সকৰণ্ণং ৰিজহিত্ৰা সুৰণ্ণৰণ্ণা হোন্তি, এৰমেৰ খো, মহারাজ, যো কোচি গন্ধব্বো যতো কুতোচি আগন্ত্ৰা অণ্ডজং যোনিং উপগন্ত্ৰা সভাৰৰণ্ণং ৰিজহিত্ৰা অণ্ডজো হোতি…পে… জলাবুজং…পে… সংসেদজং…পে… ওপপাতিকং যোনিং উপগন্ত্ৰা সভাৰৰণ্ণং ৰিজহিত্ৰা ওপপাতিকো হোতি, এৰং কুলৰসেন সত্তানং গব্ভাৰক্কন্তি হোতি.
‘‘কথং আযাচনৰসেন সত্তানং গব্ভাৰক্কন্তি হোতি? ইধ, মহারাজ, কুলং হোতি অপুত্তকং বহুসাপতেয্যং সদ্ধং পসন্নং সীলৰন্তং কল্যাণধম্মং তপনিস্সিতং, দেৰপুত্তো চ উস্সন্নকুসলমূলো চৰনধম্মো হোতি. অথ সক্কো দেৰানমিন্দো তস্স কুলস্স অনুকম্পায তং দেৰপুত্তং আযাচতি ‘পণিধেহি, মারিস, অসুকস্স কুলস্স মহেসিযা কুচ্ছি’ন্তি. সো তস্স আযাচনহেতু তং কুলং পণিধেতি. যথা, মহারাজ, মনুস্সা পুঞ্ঞকামা সমণং মনোভাৰনীযং আযাচিত্ৰা গেহং উপনেন্তি, অযং উপগন্ত্ৰা সব্বস্স কুলস্স সুখাৰহো ভৰিস্সতীতি. এৰমেৰ খো, মহারাজ, সক্কো দেৰানমিন্দো তং দেৰপুত্তং আযাচিত্ৰা তং কুলং উপনেতি. এৰং আযাচনৰসেন সত্তানং গব্ভাৰক্কন্তি হোতি.
‘‘সামো, মহারাজ, কুমারো সক্কেন দেৰানমিন্দেন আযাচিতো পারিকায তাপসিযা কুচ্ছিং ওক্কন্তো. সামো, মহারাজ, কুমারো কতপুঞ্ঞো, মাতাপিতরো সীলৰন্তো কল্যাণধম্মা, আযাচকো সক্কো, তিণ্ণং চেতোপণিধিযা সামো কুমারো নিব্বত্তো. ইধ, মহারাজ, নযকুসলো পুরিসো সুকট্ঠে অনূপখেত্তে বীজং রোপেয্য, অপি নু তস্স বীজস্স অন্তরাযং ৰিৰজ্জেন্তস্স ৰুড্ঢিযা কোচি অন্তরাযো ভৰেয্যা’’তি? ‘‘ন হি, ভন্তে, নিরুপঘাতং বীজং খিপ্পং সংৰিরুহেয্যা’’তি. ‘‘এৰমেৰ খো, মহারাজ, সামো কুমারো মুত্তো উপ্পন্নন্তরাযেহি তিণ্ণং চেতোপণিধিযা নিব্বত্তো.
‘‘অপি নু খো, মহারাজ, সুতপুব্বং তযা ইসীনং মনোপদোসেন ইদ্ধো ফীতো মহাজনপদো সজনো সমুচ্ছিন্নো’’তি? ‘‘আম, ভন্তে, সুয্যতি. মহিযা দণ্ডকারঞ্ঞং [দণ্ডকীরঞ্ঞং (ম. নি. ২.৬৫)] মজ্ঝারঞ্ঞং কালিঙ্গারঞ্ঞং মাতঙ্গারঞ্ঞং, সব্বং তং অরঞ্ঞং অরঞ্ঞভূতং, সব্বেপেতে জনপদা ইসীনং মনোপদোসেন খযং গতা’’তি. ‘‘যদি, মহারাজ, তেসং মনোপদোসেন সুসমিদ্ধা জনপদা উচ্ছিজ্জন্তি, অপি নু খো তেসং মনোপসাদেন কিঞ্চি নিব্বত্তেয্যা’’তি? ‘‘আম ভন্তে’’তি. ‘‘তেন হি, মহারাজ, সামো কুমারো তিণ্ণং বলৰন্তানং চেতোপসাদেন নিব্বত্তো ইসিনিম্মিতো দেৰনিম্মিতো পুঞ্ঞনিম্মিতোতি. এৰমেতং, মহারাজ, ধারেহি.
‘‘তযোমে, মহারাজ, দেৰপুত্তা সক্কেন দেৰানমিন্দেন আযাচিতা কুলং উপ্পন্না. কতমে তযো? সামো কুমারো মহাপনাদো কুসরাজা, তযোপেতে বোধিসত্তা’’তি. ‘‘সুনিদ্দিট্ঠা, ভন্তে নাগসেন, গব্ভাৰক্কন্তি, সুকথিতং কারণং, অন্ধকারো আলোকো কতো, জটা ৰিজটিতা, নিচ্ছুদ্ধা পরৰাদা, এৰমেতং তথা সম্পটিচ্ছামী’’তি.
গব্ভাৰক্কন্তিপঞ্হো ছট্ঠো.
৭. সদ্ধম্মন্তরধানপঞ্হো
৭. ‘‘ভন্তে নাগসেন, ভাসিতম্পেতং ভগৰতা ‘পঞ্চেৰ দানি, আনন্দ, ৰস্সসতানি [ৰস্সসহস্সানি (সী.) পস্স অ. নি. ৮.৫১] সদ্ধম্মো ঠস্সতী’তি. পুন চ পরিনিব্বানসমযে সুভদ্দেন পরিব্বাজকেন পঞ্হং পুট্ঠেন ভগৰতা ভণিতং ‘ইমে চ, সুভদ্দ [দী. নি. ২.২১৪ পস্সিতব্বং], ভিক্খূ সম্মা ৰিহরেয্যুং, অসুঞ্ঞো লোকো অরহন্তেহি অস্সা’তি, অসেসৰচনমেতং, নিস্সেসৰচনমেতং, নিপ্পরিযাযৰচনমেতং. যদি, ভন্তে নাগসেন, তথাগতেন ভণিতং ‘পঞ্চেৰ দানি, আনন্দ, ৰস্সসতানি সদ্ধম্মো ঠস্সতী’তি, তেন হি ‘অসুঞ্ঞো লোকো অরহন্তেহি অস্সা’তি যং ৰচনং, তং মিচ্ছা. যদি তথাগতেন ভণিতং ‘অসুঞ্ঞো লোকো অরহন্তেহি অস্সা’তি, তেন হি ‘পঞ্চেৰ দানি, আনন্দ, ৰস্সসতানি সদ্ধম্মো ঠস্সতী’তি তম্পি ৰচনং মিচ্ছা. অযম্পি উভতো কোটিকো পঞ্হো গহনতোপি গহনতরো বলৰতোপি বলৰতরো গণ্ঠিতোপি গণ্ঠিতরো, সো তৰানুপ্পত্তো, তত্থ তে ঞাণবলৰিপ্ফারং দস্সেহি মকরো ৰিয সাগরব্ভন্তরগতো’’তি.
‘‘ভাসিতম্পেতং, মহারাজ, ভগৰতা ‘পঞ্চেৰ দানি, আনন্দ, ৰস্সসতানি সদ্ধম্মো ঠস্সতী’তি. পরিনিব্বানসমযে চ সুভদ্দস্স পরিব্বাজকস্স ভণিতং ‘ইমে চ, সুভদ্দ, ভিক্খূ সম্মা ৰিহরেয্যুং, অসুঞ্ঞো লোকো অরহন্তেহি অস্সা’তি. তঞ্চ পন, মহারাজ, ভগৰতো ৰচনং নানত্থঞ্চেৰ হোতি নানাব্যঞ্জনঞ্চ, অযং সাসনপরিচ্ছেদো, অযং পটিপত্তি পরিদীপনাতি দূরং ৰিৰজ্জিতা তে উভো অঞ্ঞমঞ্ঞং. যথা, মহারাজ, নভং পথৰিতো দূরং ৰিৰজ্জিতং, নিরযং সগ্গতো দূরং ৰিৰজ্জিতং, কুসলং অকুসলতো দূরং ৰিৰজ্জিতং, সুখং দুক্খতো দূরং ৰিৰজ্জিতং. এৰমেৰ খো, মহারাজ, তে উভো অঞ্ঞমঞ্ঞং দূরং ৰিৰজ্জিতা.
‘‘অপি চ, মহারাজ, মা তে পুচ্ছা মোঘা অস্স [অস্সু (সী. স্যা.)], রসতো তে সংসন্দিত্ৰা কথযিস্সামি ‘পঞ্চেৰ দানি, আনন্দ, ৰস্সসতানি সদ্ধম্মো ঠস্সতী’তি যং ভগৰা আহ, তং খযং পরিদীপযন্তো সেসকং পরিচ্ছিন্দি, ৰস্সসহস্সং, আনন্দ, সদ্ধম্মো তিট্ঠেয্য, সচে ভিক্খুনিযো ন পব্বাজেয্যুং. পঞ্চেৰ দানি, আনন্দ, ৰস্সসতানি সদ্ধম্মো ঠস্সতীতি. অপি নু খো, মহারাজ, ভগৰা এৰং ৰদন্তো সদ্ধম্মস্স অন্তরধানং ৰা ৰদেতি অভিসমযং ৰা পটিক্কোসতী’’তি? ‘‘ন হি ভন্তে’’তি. ‘‘নট্ঠং, মহারাজ, পরিকিত্তযন্তো সেসকং পরিদীপযন্তো পরিচ্ছিন্দি. যথা, মহারাজ, পুরিসো নট্ঠাযিকো সব্বসেসকং গহেত্ৰা জনস্স পরিদীপেয্য ‘এত্তকং মে ভণ্ডং নট্ঠং, ইদং সেসক’ন্তি. এৰমেৰ খো, মহারাজ, ভগৰা নট্ঠং পরিদীপযন্তো সেসকং দেৰমনুস্সানং কথেসি ‘পঞ্চেৰ দানি, আনন্দ, ৰস্সসতানি সদ্ধম্মো ঠস্সতী’তি. যং পন, মহারাজ, ভগৰতা ভণিতং ‘পঞ্চেৰ দানি, আনন্দ, ৰস্সসতানি সদ্ধম্মো ঠস্সতী’তি, সাসনপরিচ্ছেদো এসো.
‘‘যং পন পরিনিব্বানসমযে সুভদ্দস্স পরিব্বাজকস্স সমণে পরিকিত্তযন্তো আহ ‘ইমে চ, সুভদ্দ, ভিক্খূ সম্মা ৰিহরেয্যুং, অসুঞ্ঞো লোকো অরহন্তেহি অস্সা’তি, পটিপত্তিপরিদীপনা এসা, ত্ৰং পন তং পরিচ্ছেদঞ্চ পরিদীপনঞ্চ একরসং করোসি. যদি পন তে ছন্দো, একরসং কত্ৰা কথযিস্সামি, সাধুকং সুণোহি মনসিকরোহি অৰিক্খিত্তমানসো [অৰিচলমানসো (সী.) অৰিমানসো (পী. ক.)].
‘‘ইধ, মহারাজ, তল়াকো ভৰেয্য নৰসলিলসম্পুণ্ণো সম্মুখমুত্তরিযমানো পরিচ্ছিন্নো পরিৰটুমকতো, অপরিযাদিণ্ণে যেৰ তস্মিং তল়াকে উদকূপরি মহামেঘো অপরাপরং অনুপ্পবন্ধো অভিৰস্সেয্য, অপি নু খো, মহারাজ, তস্মিং তল়াকে উদকং পরিক্খযং পরিযাদানং গচ্ছেয্যা’’তি? ‘‘ন হি ভন্তে’’তি. ‘‘কেন কারণেন মহারাজা’’তি? ‘‘মেঘস্স, ভন্তে, অনুপ্পবন্ধতাযা’’তি. ‘‘এৰমেৰ খো, মহারাজ, জিনসাসনৰরসদ্ধম্মতল়াকো আচারসীলগুণৰত্তপটিপত্তিৰিমলনৰসলিলসম্পুণ্ণো উত্তরিযমানো ভৰগ্গমভিভৰিত্ৰা ঠিতো. যদি তত্থ বুদ্ধপুত্তা আচারসীলগুণৰত্তপটিপত্তিমেঘৰস্সং অপরাপরং অনুপ্পবন্ধাপেয্যুং অভিৰস্সাপেয্যুং. এৰমিদং জিনসাসনৰরসদ্ধম্মতল়াকো চিরং দীঘমদ্ধানং তিট্ঠেয্য, অরহন্তেহি লোকো অসুঞ্ঞো ভৰেয্য, ইমমত্থং ভগৰতা সন্ধায ভাসিতং ‘ইমে চ, সুভদ্দ, ভিক্খূ সম্মা ৰিহরেয্যুং, অসুঞ্ঞো লোকো অরহন্তেহি অস্সা’তি.
‘‘ইধ পন, মহারাজ, মহতি মহাঅগ্গিক্খন্ধে জলমানে অপরাপরং সুক্খতিণকট্ঠগোমযানি উপসংহরেয্যুং, অপি নু খো সো, মহারাজ, অগ্গিক্খন্ধো নিব্বাযেয্যা’’তি? ‘‘ন হি, ভন্তে, ভিয্যো ভিয্যো সো অগ্গিক্খন্ধো জলেয্য, ভিয্যো ভিয্যো পভাসেয্যা’’তি. ‘‘এৰমেৰ খো, মহারাজ, দসসহস্সিযা [দসসহস্সিম্হি (বহূসু)] লোকধাতুযা জিনসাসনৰরম্পি আচারসীলগুণৰত্তপটিপত্তিযা জলতি পভাসতি. যদি পন, মহারাজ, তদুত্তরিং বুদ্ধপুত্তা পঞ্চহি পধানিযঙ্গেহি সমন্নাগতা সততমপ্পমত্তা পদহেয্যুং, তীসু সিক্খাসু ছন্দজাতা সিক্খেয্যুং, চারিত্তঞ্চ সীলং সমত্তং পরিপূরেয্যুং, এৰমিদং জিনসাসনৰরং ভিয্যো ভিয্যো চিরং দীঘমদ্ধানং তিট্ঠেয্য, অসুঞ্ঞো লোকো অরহন্তেহি অস্সাতি ইমমত্থং ভগৰতা সন্ধায ভাসিতং ‘ইমে চ, সুভদ্দ, ভিক্খূ সম্মা ৰিহরেয্যুং, অসুঞ্ঞো লোকো অরহন্তেহি অস্সা’তি.
‘‘ইধ পন, মহারাজ, সিনিদ্ধসমসুমজ্জিতসপ্পভাসৰিমলাদাসং [সপ্পভং সুৰিমলাদাসং (সী.)] সণ্হসুখুমগেরুকচুণ্ণেন অপরাপরং মজ্জেয্যুং, অপি নু খো, মহারাজ, তস্মিং আদাসে মলকদ্দমরজোজল্লং জাযেয্যা’’তি? ‘‘ন হি, ভন্তে, অঞ্ঞদত্থু ৰিমলতরং যেৰ ভৰেয্যা’’তি. ‘‘এৰমেৰ খো, মহারাজ, জিনসাসনৰরং পকতিনিম্মলং ব্যপগতকিলেসমলরজোজল্লং, যদি তং বুদ্ধপুত্তা আচারসীলগুণৰত্তপটিপত্তিসল্লেখধুতগুণেন জিনসাসনৰরং সল্লক্খেয্যুং [সল্লিক্খেয্যুং (সী. পী.)], এৰমিদং জিনসাসনৰরং চিরং দীঘমদ্ধানং তিট্ঠেয্য, অসুঞ্ঞো চ লোকো অরহন্তেহি অস্সাতি ইমমত্থং ভগৰতা সন্ধায ভাসিতং ‘ইমে চ, সুভদ্দ, ভিক্খূ সম্মা ৰিহরেয্যুং, অসুঞ্ঞো লোকো অরহন্তেহি অস্সা’তি. পটিপত্তিমূলকং, মহারাজ, সত্থুসাসনং পটিপত্তিকারণং পটিপত্তিযা অনন্তরহিতায তিট্ঠতী’’তি.
‘‘ভন্তে নাগসেন, ‘সদ্ধম্মন্তরধান’ন্তি যং ৰদেসি, কতমং তং সদ্ধম্মন্তরধান’’ন্তি? ‘‘তীণিমানি, মহারাজ, সাসনন্তরধানানি. কতমানি তীণি? অধিগমন্তরধানং পটিপত্তন্তরধানং লিঙ্গন্তরধানং, অধিগমে, মহারাজ, অন্তরহিতে সুপ্পটিপন্নস্সাপি ধম্মাভিসমযো ন হোতি, পটিপত্তিযা অন্তরহিতায সিক্খাপদপঞ্ঞত্তি অন্তরধাযতি, লিঙ্গংযেৰ তিট্ঠতি, লিঙ্গে অন্তরহিতে পৰেণুপচ্ছেদো হোতি, ইমানি খো, মহারাজ, তীণি অন্তরধানানী’’তি.
‘‘সুৰিঞ্ঞাপিতো, ভন্তে নাগসেন, পঞ্হো, গম্ভীরো উত্তানীকতো, গণ্ঠি ভিন্নো, নট্ঠা পরৰাদা ভগ্গা নিপ্পভা কতা, ত্ৰং গণিৰরৰসভমাসজ্জাতি.
সদ্ধম্মন্তরধানপঞ্হো সত্তমো.
৮. অকুসলচ্ছেদনপঞ্হো
৮. ‘‘ভন্তে নাগসেন, তথাগতো সব্বং অকুসলং ঝাপেত্ৰা সব্বঞ্ঞুতং পত্তো, উদাহু সাৰসেসে অকুসলে সব্বঞ্ঞুতং পত্তো’’তি? ‘‘সব্বং, মহারাজ, অকুসলং ঝাপেত্ৰা ভগৰা সব্বঞ্ঞুতং পত্তো, নত্থি ভগৰতো সেসেকং অকুসল’’ন্তি.
‘‘কিং পন, ভন্তে, দুক্খা ৰেদনা তথাগতস্স কাযে উপ্পন্নপুব্বা’’তি? ‘‘আম, মহারাজ, রাজগহে ভগৰতো পাদো সকলিকায [সক্খলিকায (স্যা. ক.)] খতো, লোহিতপক্খন্দিকাবাধো উপ্পন্নো, কাযে অভিসন্নে জীৰকেন ৰিরেকো কারিতো, ৰাতাবাধে উপ্পন্নে উপট্ঠাকেন থেরেন উণ্হোদকং পরিযিট্ঠ’’ন্তি.
‘‘যদি, ভন্তে নাগসেন, তথাগতো সব্বং অকুসলং ঝাপেত্ৰা সব্বঞ্ঞুতং পত্তো, তেন হি ভগৰতো পাদো সকলিকায খতো, লোহিতপক্খন্দিকা চ আবাধো উপ্পন্নোতি যং ৰচনং, তং মিচ্ছা. যদি তথাগতস্স পাদো সকলিকায খতো, লোহিতপক্খন্দিকা চ আবাধো উপ্পন্নো, তেন হি তথাগতো সব্বং অকুসলং ঝাপেত্ৰা সব্বঞ্ঞুতং পত্তোতি তম্পি ৰচনং মিচ্ছা. নত্থি, ভন্তে, ৰিনা কম্মেন ৰেদযিতং, সব্বং তং ৰেদযিতং কম্মমূলকং, তং কম্মেনেৰ ৰেদযতি, অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি [নিব্বাযিতব্বোতি (ক.)].
‘‘ন হি, মহারাজ, সব্বং তং ৰেদযিতং কম্মমূলকং. অট্ঠহি, মহারাজ, কারণেহি ৰেদযিতানি উপ্পজ্জন্তি, যেহি কারণেহি পুথূ সত্তা ৰেদনা ৰেদিযন্তি. কতমেহি অট্ঠহি? ৰাতসমুট্ঠানানিপি খো, মহারাজ, ইধেকচ্চানি ৰেদযিতানি উপ্পজ্জন্তি, পিত্তসমুট্ঠানানিপি খো, মহারাজ…পে… সেম্হসমুট্ঠানানিপি খো, মহারাজ…পে… সন্নিপাতিকানিপি খো, মহারাজ…পে… উতুপরিণামজানিপি খো, মহারাজ…পে… ৰিসমপরিহারজানিপি খো, মহারাজ…পে… ওপক্কমিকানিপি খো, মহারাজ…পে… কম্মৰিপাকজানিপি খো, মহারাজ, ইধেকচ্চানি ৰেদযিতানি উপ্পজ্জন্তি. ইমেহি খো, মহারাজ, অট্ঠহি কারণেহি পুথূ সত্তা ৰেদনা ৰেদযন্তি. তত্থ যে তে পুগ্গলা ‘সত্তে কম্মং ৰিবাধতী’তি ৰদেয্যুং, তে ইমে পুগ্গলা সত্তকারণং পটিবাহন্তি. তেসং তং ৰচনং মিচ্ছা’’তি. ‘‘ভন্তে নাগসেন, যঞ্চ ৰাতিকং যঞ্চ পিত্তিকং যঞ্চ সেম্হিকং যঞ্চ সন্নিপাতিকং যঞ্চ উতুপরিণামজং যঞ্চ ৰিসমপরিহারজং যঞ্চ ওপক্কমিকং, সব্বেতে কম্মসমুট্ঠানা যেৰ, কম্মেনেৰ তে সব্বে সম্ভৰন্তী’’তি.
‘‘যদি, মহারাজ, তেপি সব্বে কম্মসমুট্ঠানাৰ আবাধা ভৰেয্যুং, ন তেসং কোট্ঠাসতো লক্খণানি ভৰেয্যুং. ৰাতো খো, মহারাজ, কুপ্পমানো দসৰিধেন কুপ্পতি সীতেন উণ্হেন জিঘচ্ছায ৰিপাসায অতিভুত্তেন ঠানেন পধানেন আধাৰনেন উপক্কমেন কম্মৰিপাকেন. তত্র যে তে নৰ ৰিধা, ন তে অতীতে, ন অনাগতে, ৰত্তমানকে ভৰে উপ্পজ্জন্তি, তস্মা ন ৰত্তব্বা ‘কম্মসম্ভৰা সব্বা ৰেদনা’তি. পিত্তং, মহারাজ, কুপ্পমানং তিৰিধেন কুপ্পতি সীতেন উণ্হেন ৰিসমভোজনেন. সেম্হং, মহারাজ, কুপ্পমানং তিৰিধেন কুপ্পতি সীতেন উণ্হেন অন্নপানেন. যো চ, মহারাজ, ৰাতো যঞ্চ পিত্তং যঞ্চ সেম্হং, তেহি তেহি কোপেহি কুপ্পিত্ৰা মিস্সী হুত্ৰা সকং সকং ৰেদনং আকড্ঢতি. উতুপরিণামজা, মহারাজ, ৰেদনা উতুপরিযামেন উপ্পজ্জতি. ৰিসমপরিহারজা ৰেদনা ৰিসমপরিহারেন উপ্পজ্জতি. ওপক্কমিকা, মহারাজ, ৰেদনা অত্থি কিরিযা, অত্থি কম্মৰিপাকা, কম্মৰিপাকজা ৰেদনা পুব্বে কতেন কম্মেন উপ্পজ্জতি. ইতি খো, মহারাজ, অপ্পং কম্মৰিপাকজং, বহুতরং অৰসেসং. তত্থ বালা ‘সব্বং কম্মৰিপাকজং যেৰা’তি অতিধাৰন্তি. তং কম্মং ন সক্কা ৰিনা বুদ্ধঞাণেন ৰৰত্থানং কাতুং.
‘‘যং পন, মহারাজ, ভগৰতো পাদো সকলিকায খতো, তং ৰেদযিতং নেৰ ৰাতসমুট্ঠানং, ন পিত্তসমুট্ঠানং, ন সেম্হসমুট্ঠানং, ন সন্নিপাতিকং, ন উতুপরিণামজং, ন ৰিসমপরিহারজং, ন কম্মৰিপাকজং, ওপক্কমিকং যেৰ. দেৰদত্তো হি, মহারাজ, বহূনি জাতিসতসহস্সানি তথাগতে আঘাতং বন্ধি, সো তেন আঘাতেন মহতিং গরুং সিলং গহেত্ৰা ‘মত্থকে পাতেস্সামী’তি মুঞ্চি, অথঞ্ঞে দ্ৰে সেলা আগন্ত্ৰা তং সিলং তথাগতং অসম্পত্তং যেৰ সম্পটিচ্ছিংসু, তাসং পহারেন পপটিকা ভিজ্জিত্ৰা ভগৰতো পাদে পতিত্ৰা রুহিরং [নিপতিত্ৰা রুধিরং (স্যা.)] উপ্পাদেসি, কম্মৰিপাকতো ৰা, মহারাজ, ভগৰতো এসা ৰেদনা নিব্বত্তা কিরিযতো ৰা, ততুদ্ধং নত্থঞ্ঞা ৰেদনা.
‘‘যথা, মহারাজ, খেত্তদুট্ঠতায ৰা বীজং ন সম্ভৰতি বীজদুট্ঠতায ৰা. এৰমেৰ খো, মহারাজ, কম্মৰিপাকতো ৰা ভগৰতো এসা ৰেদনা নিব্বত্তা কিরিযতো ৰা, ততুদ্ধং নত্থঞ্ঞা ৰেদনা.
‘‘যথা ৰা পন, মহারাজ, কোট্ঠদুট্ঠতায ৰা ভোজনং ৰিসমং পরিণমতি আহারদুট্ঠতায ৰা, এৰমেৰ খো, মহারাজ, কম্মৰিপাকতো ৰা ভগৰতো এসা ৰেদনা নিব্বত্তা কিরিযতো ৰা, ততুদ্ধং নত্থঞ্ঞা ৰেদনা. অপি চ, মহারাজ, নত্থি ভগৰতো কম্মৰিপাকজা ৰেদনা, নত্থি ৰিসমপরিহারজা ৰেদনা, অৰসেসেহি সমুট্ঠানেহি ভগৰতো ৰেদনা উপ্পজ্জতি, তায চ পন ৰেদনায ন সক্কা ভগৰন্তং জীৰিতা ৰোরোপেতুং.
‘‘নিপতন্তি, মহারাজ, ইমস্মিং চাতুমহাভূতিকে [চাতুম্মহাভূতিকে (সী.)] কাযে ইট্ঠানিট্ঠা সুভাসুভৰেদনা. ইধ, মহারাজ, আকাসে খিত্তো লেড্ডু মহাপথৰিযা নিপততি, অপি নু খো সো, মহারাজ, লেড্ডু পুব্বে কতেন মহাপথৰিযা নিপতী’’তি? ‘‘ন হি, ভন্তে, নত্থি সো, ভন্তে, হেতু মহাপথৰিযা, যেন হেতুনা মহাপথৰী কুসলাকুসলৰিপাকং পটিসংৰেদেয্য, পচ্চুপ্পন্নেন, ভন্তে, অকম্মকেন হেতুনা সো লেড্ডু মহাপথৰিযং নিপততি. যথা, মহারাজ, মহাপথৰী, এৰং তথাগতো দট্ঠব্বো. যথা লেড্ডু পুব্বে অকতেন মহাপথৰিযং নিপততি, এৰমেৰ খো, মহারাজ, তথাগতস্স পুব্বে অকতেন সা সকলিকাপাদে নিপতিতা.
‘‘ইধ পন, মহারাজ, মনুস্সা মহাপথৰিং ভিন্দন্তি চ খণন্তি চ, অপি নু খো, মহারাজ, তে মনুস্সা পুব্বে কতেন মহাপথৰিং ভিন্দন্তি চ খণন্তি চা’’তি? ‘‘ন হি ভন্তে’’তি. ‘‘এৰমেৰ খো, মহারাজ, যা সা সকলিকা ভগৰতো পাদে নিপতিতা, ন সা সকলিকা পুব্বে কতেন ভগৰতো পাদে নিপতিতা. যোপি, মহারাজ, ভগৰতো লোহিতপক্খন্দিকাবাধো উপ্পন্নো, সোপি আবাধো ন পুব্বে কতেন উপ্পন্নো, সন্নিপাতিকেনেৰ উপ্পন্নো, যে কেচি, মহারাজ, ভগৰতো কাযিকা আবাধা উপ্পন্না, ন তে কম্মাভিনিব্বত্তা, ছন্নং এতেসং সমুট্ঠানানং অঞ্ঞতরতো নিব্বত্তা.
‘‘ভাসিতম্পেতং, মহারাজ, ভগৰতা দেৰাতিদেৰেন সংযুত্তনিকাযৰরলঞ্ছকে মোল়িযসীৰকে [মোলিযসিৰকে (স্যা. ক.) সং. নি. ৪.২৬৯ পস্সিতব্বং] ৰেয্যাকরণে –
‘‘‘পিত্তসমুট্ঠানানিপি খো, সীৰক, ইধেকচ্চানি ৰেদযিতানি উপ্পজ্জন্তি. সামম্পি খো এতং, সীৰক, ৰেদিতব্বং, যথা পিত্তসমুট্ঠানানিপি ইধেকচ্চানি ৰেদযিতানি উপ্পজ্জন্তি. লোকস্সপি খো এতং, সীৰক, সচ্চসম্মতং, যথা পিত্তসমুট্ঠানানিপি ইধেকচ্চানি ৰেদযিতানি উপ্পজ্জন্তি. তত্র, সীৰক, যে তে সমণব্রাহ্মণা এৰংৰাদিনো এৰংদিট্ঠিনো ‘‘যং কিঞ্চাযং পুরিসপুগ্গলো পটিসংৰেদেতি সুখং ৰা দুক্খং ৰা অদুক্খমসুখং ৰা, সব্বং তং পুব্বে কতহেতূ’’তি. যঞ্চ সামং ঞাতং, তঞ্চ অতিধাৰন্তি, যঞ্চ লোকে সচ্চসম্মতং, তঞ্চ অতিধাৰন্তি. তস্মা তেসং সমণব্রাহ্মণানং মিচ্ছাতি ৰদামি.
‘‘‘সেম্হসমুট্ঠানানিপি খো, সীৰক, ইধেকচ্চানি ৰেদযিতানি উপ্পজ্জন্তি. ৰাতসমুট্ঠানানিপি খো, সীৰক…পে… সন্নিপাতিকানিপি খো, সীৰক…পে… উতুপরিণামজানিপি খো, সীৰক…পে… ৰিসমপরিহারজানিপি খো, সীৰক…পে… ওপক্কমিকানিপি খো, সীৰক…পে… কম্মৰিপাকজানিপি খো, সীৰক, ইধেকচ্চানি ৰেদযিতানি উপ্পজ্জন্তি. সামম্পি খো এতং, সীৰক, ৰেদিতব্বং, যথা কম্মৰিপাকজানিপি ইধেকচ্চানি ৰেদযিতানি উপ্পজ্জন্তি. লোকস্সপি খো এতং, সীৰক, সচ্চসম্মতং, যথা কম্মৰিপাকজানিপি ইধেকচ্চানি ৰেদযিতানি উপ্পজ্জন্তি. তত্র, সীৰক, যে তে সমণব্রাহ্মণা এৰংৰাদিনো এৰংদিট্ঠিনো ‘‘যং কিঞ্চাযং পুরিসপুগ্গলো পটিসংৰেদেতি সুখং ৰা দুক্খং ৰা অদুক্খমসুখং ৰা, সব্বং তং পুব্বে কতহেতূ’’তি. যঞ্চ সামং ঞাতং, তঞ্চ অতিধাৰন্তি, যঞ্চ লোকে সচ্চসম্মতং, তঞ্চ অতিধাৰন্তি. তস্মা তেসং সমণব্রাহ্মণানং মিচ্ছাতি ৰদামী’’’তি.
‘‘ইতিপি, মহারাজ, ন সব্বা ৰেদনা কম্মৰিপাকজা, সব্বং, মহারাজ, অকুসলং ঝাপেত্ৰা ভগৰা সব্বঞ্ঞুতং পত্তোতি এৰমেতং ধারেহী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.
অকুসলচ্ছেদনপঞ্হো অট্ঠমো.
৯. উত্তরিকরণীযপঞ্হো
৯. ‘‘ভন্তে নাগসেন, তুম্হে ভণথ ‘যং কিঞ্চি করণীযং তথাগতস্স, সব্বং তং বোধিযা যেৰ মূলে পরিনিট্ঠিতং, নত্থি তথাগতস্স উত্তরিং করণীযং, কতস্স ৰা পতিচযো’তি, ইদঞ্চ তেমাসং পটিসল্লানং দিস্সতি. যদি, ভন্তে নাগসেন, যং কিঞ্চি করণীযং তথাগতস্স, সব্বং তং বোধিযা যেৰ মূলে পরিনিট্ঠিতং, নত্থি তথাগতস্স উত্তরিং করণীযং, কতস্স ৰা পতিচযো, তেন হি ‘তেমাসং পটিসল্লীনো’তি যং ৰচনং, তং মিচ্ছা. যদি তেমাসং পটিসল্লীনো, তেন হি ‘যং কিঞ্চি করণীযং, তথাগতস্স, সব্বং তং বোধিযা যেৰ মূলে পরিনিট্ঠিত’ন্তি তম্পি ৰচনং মিচ্ছা. নত্থি কতকরণীযস্স পটিসল্লানং, সকরণীযস্সেৰ পটিসল্লানং যথা নাম ব্যাধিতস্সেৰ ভেসজ্জেন করণীযং হোতি, অব্যাধিতস্স কিং ভেসজ্জেন. ছাতস্সেৰ ভোজনেন করণীযং হোতি, অছাতস্স কিং ভোজনেন. এৰমেৰ খো, ভন্তে নাগসেন, নত্থি কতকরণীযস্স পটিসল্লানং, সকরণীযস্সেৰ পটিসল্লানং. অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি.
‘‘যং কিঞ্চি, মহারাজ, করণীযং তথাগতস্স, সব্বং তং বোধিযা যেৰ মূলে পরিনিট্ঠিতং, নত্থি তথাগতস্স উত্তরিং করণীযং, কতস্স ৰা পতিচযো, ভগৰা চ তেমাসং পটিসল্লীনো, পটিসল্লানং খো, মহারাজ, বহুগুণং, সব্বেপি তথাগতা পটিসল্লীযিত্ৰা সব্বঞ্ঞুতং পত্তা, তং তে সুকতগুণমনুস্সরন্তা পটিসল্লানং সেৰন্তি. যথা, মহারাজ, পুরিসো রঞ্ঞো সন্তিকা লদ্ধৰরো পটিলদ্ধভোগো তং সুকতগুণমনুস্সরন্তো অপরাপরং রঞ্ঞো উপট্ঠানং এতি. এৰমেৰ খো, মহারাজ, সব্বেপি তথাগতা পটিসল্লীযিত্ৰা সব্বঞ্ঞুতং পত্তা, তং তে সুকতগুণমনুস্সরন্তা পটিসল্লানং সেৰন্তি.
‘‘যথা ৰা পন, মহারাজ, পুরিসো আতুরো দুক্খিতো বাল়্হগিলানো ভিসক্কমুপসেৰিত্ৰা সোত্থিমনুপ্পত্তো তং সুকতগুণমনুস্সরন্তো অপরাপরং ভিসক্কমুপসেৰতি. এৰমেৰ খো, মহারাজ, সব্বেপি তথাগতা পটিসল্লীযিত্ৰা সব্বঞ্ঞুতং পত্তা, তং তে সুকতগুণমনুস্সরন্তা পটিসল্লানং সেৰন্তি.
‘‘অট্ঠৰীসতি খো পনিমে, মহারাজ, পটিসল্লানগুণা, যে গুণে সমনুস্সরন্তা [সমনুপস্সন্তা (সী. পী.)] তথাগতা পটিসল্লানং সেৰন্তি. কতমে অট্ঠৰীসতি? ইধ, মহারাজ, পটিসল্লানং পটিসল্লীযমানং অত্তানং রক্খতি, আযুং ৰড্ঢেতি, বলং দেতি, ৰজ্জং পিদহতি, অযসমপনেতি, যসমুপনেতি, অরতিং ৰিনোদেতি, রতিমুপদহতি, ভযমপনেতি, ৰেসারজ্জং করোতি, কোসজ্জমপনেতি, ৰীরিযমভিজনেতি, রাগমপনেতি, দোসমপনেতি, মোহমপনেতি, মানং নিহন্তি, ৰিতক্কং ভঞ্জতি, চিত্তং একগ্গং করোতি, মানসং স্নেহযতি [সোভযতি (সী.)], হাসং জনেতি, গরুকং করোতি, লাভমুপ্পাদযতি, নমস্সিযং করোতি, পীতিং পাপেতি, পামোজ্জং করোতি, সঙ্খারানং সভাৰং দস্সযতি, ভৰপ্পটিসন্ধিং উগ্ঘাটেতি, সব্বসামঞ্ঞং দেতি. ইমে খো, মহারাজ, অট্ঠৰীসতি পটিসল্লানগুণা, যে গুণে সমনুস্সরন্তা তথাগতা পটিসল্লানং সেৰন্তি.
‘‘অপি চ খো, মহারাজ, তথাগতা সন্তং সুখং সমাপত্তিরতিং অনুভৰিতুকামা পটিসল্লানং সেৰন্তি পরিযোসিতসঙ্কপ্পা. চতূহি খো, মহারাজ, কারণেহি তথাগতা পটিসল্লানং সেৰন্তি. কতমেহি চতূহি? ৰিহারফাসুতাযপি, মহারাজ, তথাগতা পটিসল্লানং সেৰন্তি, অনৰজ্জগুণবহুলতাযপি তথাগতা পটিসল্লানং সেৰন্তি, অসেসঅরিযৰীথিতোপি তথাগতা পটিসল্লানং সেৰন্তি, সব্ববুদ্ধানং থুতথোমিতৰণ্ণিতপসত্থতোপি তথাগতা পটিসল্লানং সেৰন্তি. ইমেহি খো, মহারাজ, চতূহি কারণেহি তথাগতা পটিসল্লানং সেৰন্তি. ইতি খো, মহারাজ, তথাগতা পটিসল্লানং সেৰন্তি ন সকরণীযতায, ন কতস্স ৰা পতিচযায, অথ খো গুণৰিসেসদস্সাৰিতায তথাগতা পটিসল্লানং সেৰন্তী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.
উত্তরিকরণীযপঞ্হো নৰমো.
১০. ইদ্ধিবলদস্সনপঞ্হো
১০. ‘‘ভন্তে নাগসেন, ভাসিতম্পেতং ভগৰতা ‘তথাগতস্স খো, আনন্দ, চত্তারো ইদ্ধিপাদা ভাৰিতা বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা, সো আকঙ্খমানো, আনন্দ, তথাগতো কপ্পং ৰা তিট্ঠেয্য কপ্পাৰসেসং ৰা’তি. পুন চ ভণিতং ‘ইতো তিণ্ণং মাসানং অচ্চযেন তথাগতো পরিনিব্বাযিস্সতী’তি. যদি, ভন্তে নাগসেন, ভগৰতা ভণিতং ‘তথাগতস্স খো, আনন্দ, চত্তারো ইদ্ধিপাদা ভাৰিতা…পে… কপ্পাৰসেসং ৰা’তি, তেন হি তেমাসপরিচ্ছেদো মিচ্ছা. যদি, ভন্তে, তথাগতেন ভণিতং ‘ইতো তিণ্ণং মাসানং অচ্চযেন তথাগতো পরিনিব্বাযিস্সতী’তি, তেন হি ‘‘তথাগতস্স খো, আনন্দ, চত্তারো ইদ্ধিপাদা ভাৰিতা…পে… কপ্পাৰসেসং ৰা’তি তম্পি ৰচনং মিচ্ছা. নত্থি তথাগতানং অট্ঠানে গজ্জিতং. অমোঘৰচনা বুদ্ধা ভগৰন্তো তথৰচনা অদ্ৰেজ্ঝৰচনা. অযম্পি উভতো কোটিকো পঞ্হো গম্ভীরো সুনিপুণো দুন্নিজ্ঝাপযো তৰানুপ্পত্তো, ভিন্দেতং দিট্ঠিজালং, একংসে ঠপয, ভিন্দ পরৰাদ’’ন্তি.
‘‘ভাসিতম্পেতং, মহারাজ, ভগৰতা ‘তথাগতস্স খো, আনন্দ, চত্তারো ইদ্ধিপাদা ভাৰিতা…পে… কপ্পাৰসেসং ৰা’তি, তেমাসপরিচ্ছেদো চ ভণিতো, সো চ পন কপ্পো আযুকপ্পো ৰুচ্চতি. ন, মহারাজ, ভগৰা অত্তনো বলং কিত্তযমানো এৰমাহ, ইদ্ধিবলং পন মহারাজ, ভগৰা পরিকিত্তযমানো এৰমাহ ‘তথাগতস্স খো, আনন্দ, চত্তারো ইদ্ধিপাদা ভাৰিতা…পে… কপ্পাৰসেসং ৰা’তি.
‘‘যথা, মহারাজ, রঞ্ঞো অস্সাজানীযো ভৰেয্য সীঘগতি অনিলজৰো, তস্স রাজা জৰবলং পরিকিত্তযন্তো সনেগমজানপদভটবলব্রাহ্মণগহপতিকঅমচ্চজনমজ্ঝে এৰং ৰদেয্য ‘আকঙ্খমানো মে, ভো, অযং হযৰরো সাগরজলপরিযন্তং মহিং অনুৰিচরিত্ৰা খণেন ইধাগচ্ছেয্যা’তি, ন চ তং জৰগতিং তস্সং পরিসাযং দস্সেয্য, ৰিজ্জতি চ সো জৰো তস্স, সমত্থো চ সো খণেন সাগরজলপরিযন্তং মহিং অনুৰিচরিতুং. এৰমেৰ খো, মহারাজ, ভগৰা অত্তনো ইদ্ধিবলং পরিকিত্তযমানো এৰমাহ, তম্পি তেৰিজ্জানং ছল়ভিঞ্ঞানং অরহন্তানং ৰিমলখীণাসৰানং দেৰমনুস্সানঞ্চ মজ্ঝে নিসীদিত্ৰা ভণিতং ‘তথাগতস্স খো, আনন্দ, চত্তারো ইদ্ধিপাদা ভাৰিতা বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা, সো আকঙ্খমানো, আনন্দ, তথাগতো কপ্পং ৰা তিট্ঠেয্য কপ্পাৰসেসং ৰা’তি. ৰিজ্জতি চ তং, মহারাজ, ইদ্ধিবলং ভগৰতো, সমত্থো চ ভগৰা ইদ্ধিবলেন কপ্পং ৰা ঠাতুং কপ্পাৰসেসং ৰা, ন চ ভগৰা তং ইদ্ধিবলং তস্সং পরিসাযং দস্সেতি, অনত্থিকো, মহারাজ, ভগৰা সব্বভৰেহি, গরহিতা চ তথাগতস্স সব্বভৰা. ভাসিতম্পেতং, মহারাজ, ভগৰতা ‘সেয্যথাপি, ভিক্খৰে, অপ্পমত্তকোপি গূথো দুগ্গন্ধো হোতি. এৰমেৰ খো অহং, ভিক্খৰে, অপ্পমত্তকম্পি ভৰং ন ৰণ্ণেমি অন্তমসো অচ্ছরাসঙ্ঘাতমত্তম্পী’তি অপি নু খো, মহারাজ, ভগৰা সব্বভৰগতিযোনিযো গূথসমং দিস্ৰা ইদ্ধিবলং নিস্সায ভৰেসু ছন্দরাগং করেয্যা’’তি? ‘‘ন হি ভন্তে’’তি. ‘‘তেন হি, মহারাজ, ভগৰা ইদ্ধিবলং পরিকিত্তযমানো এৰরূপং বুদ্ধসীহনাদমভিনদী’’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.
ইদ্ধিবলদস্সনপঞ্হো দসমো.
ইদ্ধিবলৰগ্গো পঠমো.
ইমস্মিং ৰগ্গে দস পঞ্হা.
২. অভেজ্জৰগ্গো
১. খুদ্দানুখুদ্দকপঞ্হো
১. ‘‘ভন্তে নাগসেন, ভাসিতম্পেতং ভগৰতা ‘অভিঞ্ঞাযাহং, ভিক্খৰে, ধম্মং দেসেমি নো অনভিঞ্ঞাযা’তি. পুন চ ৰিনযপঞ্ঞত্তিযা এৰং ভণিতং ‘আকঙ্খমানো, আনন্দ, সঙ্ঘো মমচ্চযেন খুদ্দানুখুদ্দকানি সিক্খাপদানি সমূহনতূ’তি. কিং নু খো, ভন্তে নাগসেন, খুদ্দানুখুদ্দকানি সিক্খাপদানি দুপ্পঞ্ঞত্তানি, উদাহু অৰত্থুস্মিং অজানিত্ৰা পঞ্ঞত্তানি, যং ভগৰা অত্তনো অচ্চযেন খুদ্দানুখুদ্দকানি সিক্খাপদানি সমূহনাপেতি? যদি, ভন্তে নাগসেন, ভগৰতা ভণিতং ‘অভিঞ্ঞাযাহং, ভিক্খৰে, ধম্মং দেসেমি নো অনভিঞ্ঞাযা’তি, তেন হি ‘আকঙ্খমানো, আনন্দ, সঙ্ঘো মমচ্চযেন খুদ্দানুখুদ্দকানি সিক্খাপদানি সমূহনতূ’তি যং ৰচনং, তং মিচ্ছা. যদি তথাগতে ৰিনযপঞ্ঞত্তিযা এৰং ভণিতং ‘আকঙ্খমানো, আনন্দ, সঙ্ঘো মমচ্চযেন খুদ্দানুখুদ্দকানি সিক্খাপদানি সমূহনতূ’তি তেন হি ‘অভিঞ্ঞাযাহং, ভিক্খৰে, ধম্মং দেসেমি নো অনভিঞ্ঞাযা’তি তম্পি ৰচনং মিচ্ছা. অযম্পি উভতো কোটিকো পঞ্হো সুখুমো নিপুণো গম্ভীরো সুগম্ভীরো দুন্নিজ্ঝাপযো, সো তৰানুপ্পত্তো, তত্থ তে ঞাণবলৰিপ্ফারং দস্সেহী’’তি.
‘‘ভাসিতম্পেতং, মহারাজ, ভগৰতা ‘অভিঞ্ঞাযাহং, ভিক্খৰে, ধম্মং দেসেমি নো অনভিঞ্ঞাযা’তি, ৰিনযপঞ্ঞত্তিযাপি এৰং ভণিতং ‘আকঙ্খমানো, আনন্দ, সঙ্ঘো মমচ্চযেন খুদ্দানুখুদ্দকানি সিক্খাপদানি সমূহনতূ’তি, তং পন, মহারাজ, তথাগতো ভিক্খূ ৰীমংসমানো আহ ‘উক্কলেস্সন্তি [উক্কড্ঢিস্সন্তি (সী.), উস্সক্কিস্সন্তি (স্যা.)] নু খো মম সাৰকা মযা ৰিস্সজ্জাপীযমানা মমচ্চযেন খুদ্দানুখুদ্দকানি সিক্খাপদানি, উদাহু আদিযিস্সন্তী’তি.
‘‘যথা, মহারাজ, চক্কৰত্তী রাজা পুত্তে এৰং ৰদেয্য ‘অযং খো, তাতা, মহাজনপদো সব্বদিসাসু সাগরপরিযন্তো, দুক্করো, তাতা, তাৰতকেন বলেন ধারেতুং, এথ তুম্হে, তাতা, মমচ্চযেন পচ্চন্তে পচ্চন্তে দেসে পজহথা’তি. অপি নু খো তে, মহারাজ, কুমারা পিতুঅচ্চযেন হত্থগতে জনপদে সব্বে তে পচ্চন্তে পচ্চন্তে দেসে মুঞ্চেয্যু’’ন্তি? ‘‘ন হি ভন্তে, রাজতো [রাজানো (সী. পী.)], ভন্তে, লুদ্ধতরা [লদ্ধতরা (ক.)] কুমারা রজ্জলোভেন তদুত্তরিং দিগুণতিগুণং জনপদং পরিগ্গণ্হেয্যুং [পরিকড্ঢেয্যুং (সী. পী.)], কিং পন তে হত্থগতং জনপদং মুঞ্চেয্যু’’ন্তি? ‘‘এৰমেৰ খো, মহারাজ, তথাগতো ভিক্খূ ৰীমংসমানো এৰমাহ ‘আকঙ্খমানো, আনন্দ, সঙ্ঘো মমচ্চযেন খুদ্দানুখুদ্দকানি সিক্খাপদানি সমূহনতূ’তি. দুক্খপরিমুত্তিযা, মহারাজ, বুদ্ধপুত্তা ধম্মলোভেন অঞ্ঞম্পি উত্তরিং দিযড্ঢসিক্খাপদসতং গোপেয্যুং, কিং পন পকতিপঞ্ঞত্তং সিক্খাপদং মুঞ্চেয্যু’’ন্তি?
‘‘ভন্তে নাগসেন, যং ভগৰা আহ ‘খুদ্দানুখুদ্দকানি সিক্খাপদানী’তি, এত্থাযং জনো সম্মূল়্হো ৰিমতিজাতো অধিকতো সংসযপক্খন্দো. কতমানি তানি খুদ্দকানি সিক্খাপদানি, কতমানি অনুখুদ্দকানি সিক্খাপদানীতি? দুক্কটং, মহারাজ, খুদ্দকং সিক্খাপদং, দুব্ভাসিতং অনুখুদ্দকং সিক্খাপদং, ইমানি দ্ৰে খুদ্দানুখুদ্দকানি সিক্খাপদানি, পুব্বকেহিপি, মহারাজ, মহাথেরেহি এত্থ ৰিমতি উপ্পাদিতা, তেহিপি একজ্ঝং ন কতো ধম্মসণ্ঠিতিপরিযাযে ভগৰতা এসো পঞ্হো উপদিট্ঠোতি. চিরনিক্খিত্তং, ভন্তে নাগসেন, জিনরহস্সং অজ্জেতরহি লোকে ৰিৰটং পাকটং কত’’ন্তি.
খুদ্দানুখুদ্দকপঞ্হো পঠমো.