১১. আচরিযানাচরিযপঞ্হো

১১. ‘‘ভন্তে, নাগসেন, ভাসিতম্পেতং ভগৰতা –

‘‘‘ন মে আচরিযো অত্থি, সদিসো মে ন ৰিজ্জতি;

সদেৰকস্মিং লোকস্মিং, নত্থি মে পটিপুগ্গলো’তি [মহাৰ. ১১].

‘‘পুন চ ভণিতং ‘ইতি খো, ভিক্খৰে, আল়ারো কালামো আচরিযো মে সমানো অন্তেৰাসিং মং সমানং অত্তনা সমসমং ঠপেসি, উল়ারায চ মং পূজায পূজেসী’তি. যদি, ভন্তে নাগসেন, তথাগতেন ভণিতং ‘ন মে আচরিযো অত্থি, সদিসো মে ন ৰিজ্জতি. সদেৰকস্মিং লোকস্মিং, নত্থি মে পটিপুগ্গলো’তি, তেন হি ‘ইতি খো, ভিক্খৰে, আল়ারো কালামো আচরিযো মে সমানো অন্তেৰাসিং মং সমানং অত্তনা সমসমং ঠপেসী’তি যং ৰচনং, তং মিচ্ছা. যদি তথাগতেন ভণিতং ‘ইতি খো, ভিক্খৰে, আল়ারো কালামো আচরিযো মে সমানো অন্তেৰাসিং মং সমানং অত্তনা সমসমং ঠপেসী’তি, তেন হি ‘ন মে আচরিযো অত্থি, সদিসো মে ন ৰিজ্জতি. সদেৰকস্মিং লোকস্মিং, নত্থি মে পটিপুগ্গলো’তি তম্পি ৰচনং মিচ্ছা. অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি.

‘‘ভাসিতম্পেতং, মহারাজ, তথাগতেন ‘ন মে আচরিযো অত্থি, সদিসো মে ন ৰিজ্জতি. সদেৰকস্মিং লোকস্মিং, নত্থি মে পটিপুগ্গলো’তি, ভণিতঞ্চ ‘ইতি খো, ভিক্খৰে, আল়ারো কালামো আচরিযো মে সমানো অন্তেৰাসিং মং সমানং অত্তনা সমসমং ঠপেসি, উল়ারায চ মং পূজায পূজেসী’তি.

‘‘তঞ্চ পন ৰচনং পুব্বেৰ সম্বোধা অনভিসম্বুদ্ধস্স বোধিসত্তস্সেৰ সতো আচরিযভাৰং সন্ধায ভাসিতং.

‘পঞ্চিমে, মহারাজ, পুব্বেৰ সম্বোধা অনভিসম্বুদ্ধস্স বোধিসত্তস্স সতো আচরিযা, যেহি অনুসিট্ঠো বোধিসত্তো তত্থ তত্থ দিৰসং ৰীতিনামেসি. কতমে পঞ্চ? যে তে, মহারাজ, অট্ঠ ব্রাহ্মণা জাতমত্তে বোধিসত্তে লক্খণানি পরিগ্গণ্হিংসু, সেয্যথীদং, রামো ধজো লক্খণো মন্তী যঞ্ঞো সুযামো সুভোজো সুদত্তোতি. তে তস্স সোত্থিং পৰেদযিত্ৰা রক্খাকম্মং অকংসু, তে চ পঠমং আচরিযা.

‘‘পুন চপরং, মহারাজ, বোধিসত্তস্স পিতা সুদ্ধোদনো রাজা যং তেন সমযেন অভিজাতং উদিচ্চজাতিমন্তং পদকং ৰেয্যাকরণং ছল়ঙ্গৰন্তং সব্বমিত্তং নাম ব্রাহ্মণং উপনেত্ৰা সোৰণ্ণেন ভিঙ্গারেন [ভিঙ্কারেন (সী. পী.)] উদকং ওণোজেত্ৰা ‘ইমং কুমারং সিক্খাপেহী’তি অদাসি, অযং দুতিযো আচরিযো.

‘‘পুন চপরং, মহারাজ, যা সা দেৰতা বোধিসত্তং সংৰেজেসী, যস্সা ৰচনং সুত্ৰা বোধিসত্তো সংৰিগ্গো উব্বিগ্গো তস্মিং যেৰ খণে নেক্খম্মং নিক্খমিত্ৰা পব্বজি, অযং ততিযো আচরিযো.

‘‘পুন চপরং, মহারাজ, আল়ারো কালামো আকিঞ্চঞ্ঞাযতনস্স পরিকম্মং আচিক্খি, অযং চতুত্থো আচরিযো.

‘‘পুন চপরং, মহারাজ, উদকো রামপুত্তো নেৰসঞ্ঞানাসঞ্ঞাযতনস্স পরিকম্মং আচিক্খি [আচিক্খতি (ক.)], অযং পঞ্চমো আচরিযো. ইমে খো, মহারাজ, পুব্বেৰ সম্বোধা অনভিসম্বুদ্ধস্স বোধিসত্তস্স সতো পঞ্চ আচরিযা. তে চ পন আচরিযা লোকিযে ধম্মে. ইমস্মিঞ্চ পন, মহারাজ, লোকুত্তরে ধম্মে সব্বঞ্ঞুতঞাণপ্পটিৰেধায নত্থি তথাগতস্স অনুত্তরো অনুসাসকো, সযম্ভূ, মহারাজ, তথাগতো অনাচরিযকো, তস্মা কারণা তথাগতেন ভণিতং ‘ন মে আচরিযো অত্থি, সদিসো মে ন ৰিজ্জতি. সদেৰকস্মিং লোকস্মিং, নত্থি মে পটিপুগ্গলো’তি. ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি.

আচরিযানাচরিযপঞ্হো একাদসমো.

সন্থৰৰগ্গো পঞ্চমো.

ইমস্মিং ৰগ্গে একাদস পঞ্হো.

মেণ্ডকপঞ্হো নিট্ঠিতো.